Galeri Kegiatan

Jadwal Kegiatan

Ibadah Umum - (08PM - 09PM)
Ibaadah Remaja - (09PM - 10PM)

Print

Suplemen PA Mamre tanggal 27 Maret-2 April 2016, Ogen II Korinti1:12

Thema:
”Mamre Idola”
 
Kata Perlebe
Erti kata idola sue si ijelasken ibas Kamus Besar Bahasa Indonesia e me “Orang, gambar, patung, dsb yang menjadi pujian”. Jadi tema Mamre-nta si ngataken “Mamre idola” e me mamre si jadi pujin, curahan perhatian, tapi makna kata enda langa bo tentu kerina kalak banci ngalokenca. Sesekalak jelma banci jadi idola man si “A” tapi langabo tentu teraloken si “B” jadi idolana, ras kai si jadi pujin e langa bo jelas; mungkin model bukna, bajuna, sorana rende ras sidebanna. Ibas Alkitab labo lit i idah kami kata idola tapi si ipake e me kata “teladan” si ijelasken Kamus Besar Bahasa Indonesia ertina e me: “Suatu yang patut di tiru atau baik untuk di contoh (tentang perbuatan, kelakuan, sifat dsb)”. Erti kata teladan ibas cakap karo e me usihen, enggo jelas si man usihen e eme  perbahanen, ras si lebih spesisifik mencakup sifat si jadi palas perbahanen. Jadi bahan PA nta wari enda ngajuk kita ngerana kerna Mamre si jadi usihen erkiteken lagu langkahna entah pe perbahanenna si mehuli bagepe pusuhna si bersih (tulus).
 
Pembahasen teks
Kerina kalak si erkiniteken i lebuh gelah jadi usihen “Janah kam, i bas kai pe arus jadi usihen kerna dahin si mehuli. Tutus min atendu dingen ergiah giahlah ukurndu ngajar” (Titus 2:7). Perberita si meriah adi langa ia ngasup njadiken dirina jadi usihen kerna kata Dibata ula min ia pebenarken diri alu ngataken ”Begikenlah kai si kuajarken, dalanken kerina e alu tutus, ula inehenndu-ula usihndu perbahanenku”. Perberita si meriah arusna ope denga ia mberitaken berita Kata e, enggo min lagu langkahna mehuli, sabab kalak si mberitaken kata Dibata ope denga ia ngaloken dahin e arusna ia enggo mengalami pertobaten, gelah lagu langkahna ula jadi batu antuken nandangi berita si meriah si iberitakenna.
Kata Dibata si iberitaken perberita si meriah ipertimbangken kalak si ilayanina arah lagu langkah perberita si meriah e. Erkiteken si me maka Rasul Paulus arus mbela dirina kerna motifasina ngelai perpulungen i Korintus, gelah berita si meriah si iberitakenna ula itulak, erkite-kiteken lit perpulungen nulak diri Rasul Paulus alu ngataken Rasul Paulus perbual, iragukenna palas kekelengen Rasul Paulus (bdg. 2 Kor 1:17-2:4). Adi kerasulen Rasul Paulus itulak maka kerina pengajaren si enggo isehkenna pe itulak. Perberita si meriah labo banci berlawanen motivasina bagepen perbahanenna ras berita si meriah si iberitakenna.
 
Ibas nehken pembelanna Rasul Paulus labo alu merawa tapi isehkenna alu megah atena, sabab menurut Rasul Paulus adi lit pengaloken perpulungen e salah kerna ia e erkiteken mediate kap perpulunegn e man bana maka lit penilaianna kerna dirina ras pengajaren si isehkenna. Nina Rasul Paulus “Pusuh peraten kami naksiken maka ibas hubungen kami ras kalak si deban, terlebih lebih ras kam, perbahanen kami tetap erpalasken kinibujuren ras ukur si bersih i adep-adepen Dibata”. Kalimat enda merupaken kalimat pembuka ibas ate Rasul Paulus gedang ngerana kerna pemberitanna. Rasul Paulus mpetandaken bana kerna motivasina si bersih, man ise pe labo atena nembeh terlebih lebih ka pe man perpulungen Korintus. Kinibujuren ras ukurna si bersih e pang Rasul Paulus mpertanggung jawab kenca i adep adepen Dibata. Pembuktin kebenaren alu mbaba gelar Dibata merupaken cara meyakinken kalak gelah pembelanna ialoken. Umpamana bagi cakap anak-anak sapih–sapih ia i kesain, kira-kira nina: “Pang aku ersumpah, maka bujur kap aku ras pusuhku pe bersih kap, Dibata saksina”. Rasul Paulus erusaha meyakinken perpulungen Korintus alu cakapna si meteruk maka nina adi ngasup ia tetap rukur bersih ras mehuli perbahanenna labo e erkteken kelebihenna, tapi erkiteken lias ate Dibata si mpengasup ia ngaloken situasi e, tetap tenang ras rukur positip.
Amina Perpulungen Korinti nulak dirina tapi Rasul Paulus tetap ngaloken perpulungen e alu pusuh si bersih. Pusuh si bersih, ketenagenna ras perukurenna si mehuli e labo erbahanca Rasul Paulus meganjang rukur, tapi kerina e igejapkenna erkiteken lias ate Dibata. Emaka labo lit sura-sura Rasul Paulus gelah ia imegahken, tapi Tuhan Dibata kap si tetap arus i megahken. Kai si ibahan Rasul Paulus e pantas jadi usihen (teladan), tapi ise pe labo ka ngasup ngusih bagi si ilakoken Rasul paulus adi la kin ia nggeluh iteruh lias ate Dibata.
 
Nina Rasul Paulus “Dage kupindoken man banndu: usihlah aku” (1 Korinti 4:16). Bagem seharusna kata-kata si mpegegehi kesaksin ras pengajaren si isehken sekalak perberita si meriah, pang ia njadiken dirina jadi model pengajarenna. Seterusna siperdiateken pe tenah Rasul Paulus man Titus selaku perberita si meriah si umurna nguda denga “Janah kam, ibas kai pe arus jadi usihen kerna dahin si mehuli. Tutus min atendu dingen ergih-giahlah ukurndu ngajar” (Titus 2:7). Kalak si umurna nguda denga kurang ialoken sebage pengajar, tapi Rasul Paulus mere pengajaren man Titus, aminna umurna nguda denga adi ijadikenna dirina jadi usihen dingen ergiah giah ia ibas nehken pengajaren tentu ia ialoken perpulungen.
 
Aplikasi ras Renungen
Ngusih-ngusih gaya sesekalak jelma mungkin melala kalak si beluh tapi ngusih kiniulin perukuren, motivasi ras perbahanen si mehuli labo banci ilakoken kalak adi la kin seri si jadi palas perbahanenna e. Bagi si ituriken ibas bahan bahasenta enda Rasul Pulus enggo ncidahken palas motivasi ras perbahanenna si mehuli e me lias ate Dibata, e maka kalak si atena ngusih perbahanen Rasul Paulus arus ka ia nggeluh iteruh lias ate Dibata.
 
Kai si iadapi sekalak mamre ibas kegeluhena; ibas jabuna, ibas lingkungen pendahinna ras ibas lingkungen pergaulenna labo kerinana bagi ukur. Maun-maun jumpa hal si mngecewaken si erbahanca banci turah emosi, tapi perlu kal isadari maka arus min nilai nilai kiniteken e lebih megegeh mere pengaruh, gelah situasi si mengecewaken e la erbahanc hilang kendali seh maka merosot nilai dirina. Kualitas diri mehuli ula min erkite-kiteken si iadapi bagi ukur, tapi si iadapi bagi ukur entah la bagi ukur sekalak mamre tetap min jadi teladan, sabab kiniulinna erkite-kiteken kualitas kinitekenna man Dibata.
 
Jadi teladan labo prestasi si man ayaken tapi si penting si jadi perayaken kalak si tek e me lagu langkah si enggo teruji kebenaren ras kualitas kiniulinna.  Adi teladan si jadi perayaken maka perbahanen si mehuli banci jadi ilakoken alu terpaksa. Entah pe perbahanen si mehuli ilakoken erkite-kiteken lit kalak si ngidahsa, adi bage uga lagu langkahna adi paksa ia si sada entah la lit kalak si  mperdiatekenca? Keteladanen e me erkite-kiteken perbahanen si ipalasken jujur erkiniteken; motvasi si bersih, iadep-adepen Dibata ras iadep-adepen manusia mehuli perbahanenna.
 
Sue ras kata Dibata ibas kitab Ulangen 6:6-7; tanggung jawab sekalak bapa e me mperdiateken kata Dibata ras ngajarkenca ku isi jabuna, khususna man anak-anakna. Erkiteken si e mamre arus teraloken keteladanenna, lit wibawana (“kuasana”)  gelah ajaren si isehkenna ialoken anggota jabuna.
                                          pdt.ewgm.sitelusada-bekasi
 

on . Posted in Suplemen Bimbingen PA Mamre

Print

Suplemen PA Mamre tanggal 20-26 Maret 2016, Ogen II Raja-raja 23:24-25

Thema:
”Setia Ibas Keputusen”
 
Kata Perlebe
Ibas pemerintahen entah pe organisasi, rakyat entah anggota oraganisasi si ipimpin e mbelin pengarapenna gelah arah pemimpinna e banci ialamina kemajun, kemakmuren ras kedamen. Erkiteken si e, sekalak pemimpin si nggit erpengue arus nggit nggegehisa e me arah nggit erlajar ndarami pemeteh; khususna arah teladan pemimpin si sukses ras mendisiplinken diri. Sekalak pemimpin si benar arus itandaina kai perbeben si ihadapi bangsana entah organisasi si ipimpinna, bage pe arus ipahamina tujun si man ayaken. Erkiteken si e guna mencapai tujun si itetapken arus maka iaturkenna strategi pencapaian tujun, ibenaken arah diri pemimpin e nari, nggit nandai kengasupenna (kemampun, keterampilen entahpe keahlinna), nggit ngkembangken kekuaten si lit ibas dirina, terampil ia ngidah kemampun ibas teman-temanna sada aron ibas kepemimpinen e, bagepe ndarami rumusen sukses mencapai tujun ras sidebanna. Pemimpin si benar e me pemimpin si jadi motor menggerakken kerina kekuaten ku arah tujun. Pemimpin si enggo ndalanken fungsina alu benar e me bukti kesetianna.
 
Pembahasen teks
Yosia iangkat jadi raja i Juda ibas umur waluh tahun. Ilaporken maka ope ia ras kenca ia jadi raja la pernah lit sekalak raja bagi Josia tutusna nembah Tuhan; asa atena, asa ukurna ras asa gegehna ipatuhina kerina undang-undang Musa. (23:25). Kenca ia itangkuhken jadi raja, sedekah waluh tahun i ikutina pendidiken i istanana, seh maka ibas umur sepuluh enam tahun enggo bulat ukurna nembah Dibata nini-ninina Raja Daud. Asum Josia jadi raja kenca pemerintahen Manase bapana keadaan kiniteken ras moral Juda ras Jerusalem seh kal jahatna, itadingkenna Tuhan janah igantikenna fungsi rumah Tuhan jadi ingan nembah berhala-berhala; penembahen man Baal, gana-gana dewi asera, penembahen man bintang-bintang ras sidebanna (21:1-9, bdg Yeremia 1-12). Pelanggaren e mpeturah rawa Dibata ngancam bangsa e alu ukumen kehancuren (21:10-14). Guna mewujudken gelah Juda ras Jerusalem banci lebih makmur ras dame, bagepe pulah ibas ancamen ukumen Dibata nari tentu mberat kal perjuangen si arus ilakoken Josia.
 
Bulat ukur Josia guna nembah Dibata, keputusenna e tentu la pulah ibas ia nggit erlajar, khususna arah sukses Israel ibas masa pemerintahen raja Daud, mbiar ia man Dibata, ersura-sura ia mbangun Rumah Pertoton guna Tuhan, gelah Tuhan lit itengah tengah bangsaNa, Tuhan isembah ras ipermuliaken, gelah idahikenNa kemakmuren, e me adi bangsa e erkemalangen man BaNa. Josia la nggit terpengaruh tradisi penembahen berhala ras moral si salah ibas raja si enggona. Erkiteken si e ibas ngelaksanaken kepemimpinenna si pemena ilakokenna e me mbangun mulihi Rumah Pertoton Tuhan, mbersihkennca, ngulihken ku fungsina si seharusna; ingan ersembah man Dibata labo ingan ersembah man berhala-berhala. Ibas paksa pemugaren Rumah Pertoton Tuhan idat kitab undang-undang Musa si enggo ndekah ilupaken raja-raja ope Josia. Kitab undang-undang Musa e isehken Hilkia imam si mbelin si itugasken raja mimpin pemugaren Rumah Pertoton Tuhan e man Sapan sekrestaris istana guna isehken man raja Josia, janah asum Sapan nehken kitab e man raja iogekenna man raja. Kenca ibegi Josia isi kitab e mis icaingkenna uisna (jubahna) perbahan biarna. Igejapken Josia mbelin tanggung jawabna guna mbabai bangsa e ku Dibata ras gelah pulah ibas ukumen Dibata nari. Uis si icaingken e tanda pertobaten Josia (pertobaten bangsa-petobaten nasional) ras mpeteruk bana iadep-adepen Dibata, merupaken syarat utama gelah banci mengalami pembarun ras ngaloken perkuah ate Dibata. Erkite-kiteken perbahanenna si mehuli e ialoken Tuhan pertoton Josia seh maka Tuhan erjanji ibas masa pemerintahenna ras kidekah umur geluhna hukumen bagi si enggo itetapken Tuhan man Jerusalem la ilakokenNa (23:18-20). Pertobaten ras pembarun Josia la ergegeh guna mengubah kepuutusen Dibata tapi sikap awal Josia ibas kepemimpinenna e iperhitungken Tuhan, e maka itunda Tuhan paksa penghukumen si enggo itetapkenNa e.
 
Josia ncidahken tutus atena ndalanken pertobaten e, ijadikenna pertobatena e jadi pertobaten nasional bangsana. Iperentahkenna anak buahna mbersihken (menajiskan) Juda ras Jerusalem ibas penembahen berhala nari. Penggunan Rumah Pertoton Dibata hanya guna Dibata saja. (23:4-20 bdg. 2 Kronika 34:3-4). Kenca pembersihen Rumah Pertoton arah kerina bentuk penembahen berhala ras barang barang berhala nari guna pelaksanan ibadah-ibadah man Tuhan ipulihken Josia tugas kalak Lewi si ngaturkenca.
 
Pembarun Josia man Juda ras Jerusalem ilibatkenna kerinna pemimpin-pemimpin ras rakyatna; ipepulungna kerina pemimpin-pemimpin Juda ku Jerusalem (Rumah Pertoton Dibata); bagepe imam-imam, nabi-nabi ras jelma si enterem, si bayak bagepe si musil la lit si ketadingen, ilebe-lebe jelma si enterem e iogeken Josia kitab undang-undang Musa, kenca si e isehkenna perpadanenna man Tuhan maka ia tetap erkemalangen man Tuhan saja, bagepe kerina jelma si enterem si pulung ije erjanji maka patuh ia ndalanken perpadanen e (23:1-3). Perpadanen si isehken Josia ras jelma si enterem e tentu lit konsekwensina, adi ilanggar mpereh rawa Dibata si akan erbahanca keadaan Juda ras Jerusalem lebih buruk, e maka kerinana ia arus tetap setia ndalanken perpadanenna, kerina anak kuta e arus nggit mpebarui mental ras kinitekena man Dibata.
 
Selaku “pemimpin politik” raja Josia pe mperanken dirina sebage pemimpin rohani nandangi rakyatna. Kesetianna man Dibata mpengasup ia ngidah hal si penting si enggo ndekah ilupaken, e me ngelakoken perayan paskah. Erkiteken si e ipimpinna bangsa e erbahan pesta perayan paskah si meriah (bdg. 2 Kronika 35:1-19). Arah pembinan kiniteken ibenahi Josia jabu ku jabu kalak Juda ras Jerusalem sabab keluarga si megegeh ibas Tuhan ras bersih merupaken landasen masyarakat si megegh ras bersih. Bageme seh ku ujung pemerintahenna Josia tetap setia man Tuhan, ibabaina rakyatna erkemalangen man Tuhan ras ngenanami kesejahteran iteruh pemasu-masun Tuhan.
 
AplikasirasRenungen
Ibas sekalak pemimpin si la banci lang arus lit kini nggiten (keterbebanan) guna ndahiken kemajun man si ipimpinna. Erkiteken sekalak pemimpin labo ngayaki kiniulinna saja tapi ndahiken kiniulin man kalak sideban e maka penting kal pembenahen diri, janah pembenahen e seharusna enggo imulai ibas paksa ngaloken dahin e. Umpamana ibas pelantiken pengurus Mamre nina pengurus si ngaloken dahin e “Tuhu bage ateku”. Kata kata e arus isadari isehken man Dibata bagepe man perpulungen. Pengakun “Tuhu bage ateku” labo erkiteken kiniganjangen ukur tapi pengakun maka enggo ia erketetapen ukur alu sesadar-sadarna (ialoken tanpa lit tekanen), nggit ndahiken dahin e, nggegehisa bagi peraten Tuhan si mere dahin e. Kalak si erpengue nandangi pendilo Tuhan arus ipebadiakenna dirina gelah banci ialokenna pemasu-masun Tuhan; idatkenna semangat pelayanen si tulus, kerelan berkorban, keterbebanen mengembangken potensi diri, ngasup ngergai teman ras mimpin sebage sada aron Tuhan, pang ngadapi tantangen pelayanen, setia seh kedungenna ras sidebanna.
 
Emaka perlu kal kita erlajar ku kepemimpinen raja Josia; mbenaken kepemimpinenna idaramina Tuhan, ibuatna keputusen ngikutken Tuhan. Penting kal man bana pembenahen Rumah pertoton sebab kehadiren Dibata nge arapen sukses e. Labo hanya ia si mbiar man Dibata tapi ibabaina pe kerina pemimpin bangsa e ras pemimpin rumah pertoton bagepe rakyat si ipimpinna berkomitmen setia ngikut Tuhan, mbegiken undang-undang Dibata (Kata Dibata) ras tutus ibas nembah Dibata. Guna sukses kepemimpinenna, ijadikenna dirina jadi teladan, emaka kesetian Josia jadi semangat man kerina pemimpin Juda ras Jerusalem bagepe rakyatna ras jadi semangat pelayanen ibas rumah pertoton. Kehadiren sekalak pemimpin arus jadi motivasi man aronna ras si ipimpinna.
 
 
Pdt.ewgm.sitelusada-bekasi
 

on . Posted in Suplemen Bimbingen PA Mamre

Selanjutnya

Print

Suplemen PA Mamre tanggal 13-19 Maret 2016, Ogen Matius 4:18-22

Thema:
”Minter Kuikutken Pendilo Tuhan”
 
 
Kata Perlebe
Turi turin enda ilatar belakangi penangkapen Johanes Peridiken si erbahanca Jesus harus nilah ku Galilea. Adi Johanes peridiken terancam erkite kiteken mberitaken Kata Dibata emaka man Jesus pe tentu lit dampakna bagepe man kerina kalak si ngikut Johanes Peridiken ras Jesus. Tapi iberitaken maka kerina kalak si tek e tetap nge ukurna ngikut Jesus, labo ia mundur ngalo-ngalo kekejamen pemerintahen Romawi. Si ngikut Jesus e umumna kalak si musil, si mberat baban geluhna, ertambah-tambah pe keberaten si inanamina erkiteken kekejamen pemerintah Romawi. Man Jesus me kerina ia erpengarapen kerna dalan pulah. Ibas Jesus enggo mbenaken pelayanenNa ras Johanes Peridiken enggo itangkap emaka pemberitan Johanes Peridiken enggo dung janah ibenaken me masa pemberitan Jesus.
 
Pembahasen teks
Matius mberitaken asum si e Jesus nilah ku Galilea janah i jah Ia mberitaken Berita si Meriah alu pengajuk “Jeralah kam i bas dosandu nari, sabab Kinirajan Surga enggo ndeher.” Pengajuk si isehken Jesus e seri ras pengajuk si isehken Johanes Peridiken (bdg. 3:2). Aminna antara Johanes Peridiken ras Jesus seri pengajuk si isehkenna, tapi Jesus lebih populer asangken Johanes Peridiken, emaka ngikut Jesus lebih mberat ancamen si akan ihadapina asangken ngikutken Johanes Peridiken sebab turahna nembeh ate ibas pemerintahen Romawi si erkuasa ras kalak Jahudi nari e me erkiteken ia merasa terancam sebab melala kalak si ndube ngikut ia enggo beralih ngikut Jesus. Jadi asum paksa Jesus milih murid-muridNa labo ibas paksa keadaan tenang ras aman-aman saja tapi pemilihen e terjadi ibas paksa situasi ngikut Jesus berarti terancam. Penungkunenna engkai maka Simon Petrus, Andereas, Jakub ras Johanes nggit jadi murid Jesus adi erkite-kiteken ngikut Jesus enggo jelas maka iadepina me perlawanen ibas pemerintahen Romawi ras kalak Jahudi nari? Bicara min ndai adi erkiteken ngikut Jesus senang-senang saja, isegani ras ihormati jelma si enterem, ngalo upah si melala ka tentu labo min ndai mesera nggar-garisa alasen Simon Petrus, andereas, Jakub ras Johanes nggit ngikut Jesus.

Guna lebih memahami teks enda perlu si perdiaken pemberitan ibas Lukas 5:1-11 kerna peristiwa si seri, sebab la mungkin Yesus rempet reh ngajak Simon Petrus, Adereas, Jakub ras Johanes ras mis ia nggit ngikutken Jesus.

Ituriken Lukas ope Jesus ngelebuh murid-muridNa e, isehkenNa pengajaren kata Dibata man jelma si enterem. Asum si e idatasi Jesus perahu Simon, jenari isuruhNa Simon njembaken perahu e sitik ku lau nirangken tepi dano, kundul Jesus ibas perahu e, ijenari me ia ngajar man jelma si enterem. I bas paksa Jesus ngajar e tentu pe empatna kalak e megi kai si iajarken Jesus ras ialokenna sebab idatkenna pengertin. Asum si e Jesus mberitaken kerna Kerajan Surga labo kerajan doni e maka kinitekenna turah. “Dage kiniteken rehna arah megi Berita e, janah isi Berita e, e me kata kerna Kristus.” (Roma 10:17).

Kenca Jesus nehken pengajaren e, i suruhNa Simon mbaba perahu e tertengahen ku ingan si mbages ras isuruhna Simon ngamburken jalana. Aminna salu ukur si mberat sabab sada berngi ia njala tapi la lit si idatna tapi erkiteken ihamatina Jesus sebage Guru, ilakokenna bagi si ikataken Jesus. Melala kal idatsa nurung, ban buena menam merigat pe atena jalana. Ilebuhna teman temanna guna nampati ia janah duana perahu e dem isin nurung seh menam gedap. Arah peristiwa e, tentu empatna ia ndatken pengalamen si mbaru e me, empatna ia nelayan, ia me arusna si meteh kerna dano e ras cara nangkap nurung, sedangken Jesus “anak darten” labo sieteh lit pengalamenNa kerna dano e ras cara nangkap nurung, tapi Jesus enggo lebih metehsa. Jadi sibanci si pelajari maka empatna kalak e nggit ngelakoken bagi si isuruh Jesus sabab pengalokenna kerna Jesus labo bagi pengalokenna jelma biasa, nina ngelebuh Jesus Guru.

Simon ngelebuh Jesus “ G u r u “ emaka kepatuhenna ngelakoken kerina kai si isuruh Jesus e me kepauhen sekalak murid nandangi guru, ijadikenna dirina jadi murid Jesus. Empatna ia labo hanya ndatken pengajaren ibas Jesus nari tapi pe idatkenna pengalamen mujizat Jesus, ialamina kuasa si lit ibas Jesus. Erkite-kiteken peristiwa si alamina e, erjimpuh Simon Petrus nembah man Jesus, igejapkenna kerna kemulian Jesus ras kinilatunggungenna, emaka nina “O Tuhan, laweslah Kam i bas aku nari! Aku kalak perdosa kap!” tapi nina Jesus ngaloisa “Ola kam mbiar, mulai genduari nari kam jadi penjala jelma.” Istilah penjala jelma labo istilah si umum sebab labo lit kalak dahinna penjala jelma, tapi ungkapen penjala jelma nuduhken uga belinna pengarapen Jesus ras kepercayan si iberekenna guna mbabai jelma si enterem tek ras reh ku Jesus. Arah percakapen e si idah penandai Simon Petrus, ndube ia ngelebuh Jesus Guru jadi Tuhan.

  • Pengelebuh guru ertina nggit menundukkan diri,nggit erlajar ibas Ia nari ras nggit ngelai Guru alu tulus.
  • Pengelebuh Tuhan ibelasken hanya man kalak si mbelin. Asal kata Tuhan e me ibas kata tuan nari. Jesus ilebuh Simon Petrus Tuhan erkite-kiteken Jesus labo hanya beluh ngajar tapi pe ibas Jesus lit kuasa.

Simon Petrus mewakili empatna murid murid si ilebuh Jesus e enggo nehken penandaina kerna ise kin Jesus, e me Tuhan si erdolat si erkuasa janah arah penandaina Tuhan itandaina pe dirina kalak si perdosa. Adi penandai sesekalak jelma dirina arah penandaina ise kin Dibata mpeturah meteruk ukur, janah lit kepatuhen si mbages ibas ia.

Ngertiken erpenguae nandangi pengelebuh Jesus perlu pe si renungken pengakun ras perayaken Rasul Paulus kenca itandaina Jesus, nina “Labo kerna si e saja, tapi kai pe kinirugin kuakap rimbangken si meherga, e me penandai kerna Jesus Kristus Tuhanku. Erkiteken Kristus, enggo kuambekken kerinanna, janah kupedirep si e kerina sampah-sampah, gelah banci kudat Kristus, dingen tuhu-tuhu ersada aku ras Ia. Lanaibo ku usahaken ngerembakken diringku man Dibata arah ndalanken undang-undang. Tapi aku enggo rembak ras Dibata arah kinitekenku man Kristus. Dibata jine si enggo ngerembakken aku kempak diriNa erkiteken kinitekenku. Sada ngenca sura-surangku e me gelah kutandai Kristus dingen ku gejap kuasa kekelengenNa janah ikut aku ngenanami kiniseranNa dingen bali ras Ia ibas kematenNa alu pengarapen maka aku ipekeke Dibata i bas si mate nari ku kegeluhen.” (Pilipi 3:8-11)

Aplikasi ras Renungen
Alasen simon, Adereas, Jakub ras Johanes nggit mis epengue nandangi pengelebuh Jesus ras tentuna e pe jadi alasen kita Mamre mis nggit erpengue nandangi pengelebuh Tuhan:
  1. Empatna ia enggo ngaloken pengajatren ibas Jesus nari, e me pengajaren kerna Kerajan Dibata. Kita gia Mamre ma enggo nge si aloken pengajaren kerna Kerajan Dibata e?
  2. Idalankenna perentah Jesus mbaba perahu e ku ingan si mbages ras ngamburken jalana, aminna pe ndube sada berngi ia gagal ndatken nurung. Nggit ia ngelakoken perentah Jesus ras kepatuhenna e erbahanca ia empatna jadi murid Jesus. Man banta Mamre, adi bekas penuruh Tuhan aminna la gia bagi perkiranta ma pantas nge e silakoken?
  3. Engo i idahna ras ialamina tanda kuasa ibas Jesus nari, emaka mis itandaina Tuhan, iakuina ibas kegeluhenna ras isadarina pe kinilatunggungenna erkite-kiteken dosana. Kita gia Mamre ma enggo nge si idah ras sialami perbahanen Tuhan si mbelin? Ma bias kin e arusna erbahan kita nandai Tuhan ras dirnta ras pengelebuhNa?
  4. Empatna ia iajak Jesus ras ilakokenna keputusenna:
  • Nadingken jala ras perahuna, nadingken pengalamen nggeluhna ras perayakenna (nipina) si ndekah. Nadingken rumusen suksesna si ndekah, janah ibas ngikutken Jesus isadarina lit si arus i ubahna, labo banci lalap seri ras si gel-gel e.
  • Itadingkenna bapana. Nadingken bapa selaku kepala keluarga ertina nadingke nande ras keluargana, guna jadi manusia dewasa ibas meniti masa depan si mbaru e me pelayanen (bdg. Kejadin 2:24).

Nina Jesus kerja erpengue nandangi pengelebuhNa“Ise pe si reh ndahi Aku labo banci ia jadi ajar-ajarKu, adi la kin kelengen atena man Dibata asangken man bapana ras nandena, ndeharana ras anak-anakna, turangna ras seninana janah bagepe dirina jine. Ise pe labo banci jadi ajar-ajarKu adi la kin ipersanna kayu persilangna dingen ikutkenna aku.” (Lukas 14:26-27).

Nadingken bapa nandena ras kerina keluargana ertina ibas Tuhan lit tutur si mbaru “turang ras senina ibas Jesus Kristus” ija kedekaten ras orang tua bagepe kerina anggota keluarga e me merupaken kiniersadan ibas kula ni Kristus. Keluarga e me gereja kecil (jemaat rumah tangga, semua harus diselamatkan). Anggota keluarga labo ibas hubungen kepemiliken-dareh, tapi njadiken keluarga jadi teladan pelayanen si ngaloken warisen Kerajan Surga.

5. Empatna ia si ipilih Jesus e labo erkiteken ia enggo ndekah itandai Jesus, tapi Jesus enggo ngidah kai si ilakokenna; ibegikenna, tek ia ras ilakokenna kai si isuruh Jesus.

6. Pemilihen e 100% erkiteken tujun Dibata.

7. Nadingken kegeluhen nelayan guna ngikut Jesus labo hal si melukah, Simon Petrus, Andereas, Jakub ras Johanes nggit ngikut Jesus labo erkite-kitekenken ngidah kelebihen-entah populeritas diri Jesus, labo lit ije motivasi kerna upah ngikut Jesus, tapi iberekenna dirina ipake Jesus.

Piga-piga persaman dahin penjala nurung ras penjala jelma:

  1. Biasana ia arus erdalan ndauh ku tengah lawit-dano, sebab i je me ingan melala ikan si galang. Penjala jelma pe arus nggit ku igan si ndauh, ndarat ikutana nari “nabi la meherga i kuta na” (Lukas 4:24).
  2. Iperluken kinipangen ngalaken kerina ancamen. Dano ikuasai kuasa-kuasa doni, ancamenna galumbang si mbelin.Bagepe ibas ndalanken pelayanen ndatken perlawanen ras ancamen ibas penguasa doni nari.
  3. Arus sabar nimai paksa si pas, beluh ngoge situasi si pas, tapiibas pelayanen lebih asa si ula min putus asa ras menyerah, pas la pas waktuna, entah cocok ras la cocok situasina bagi perhitungen manusia tetaplah beritaken Kerajan Dibata.  

 Pdt.ewgm.sitelusada-bekasi

on . Posted in Suplemen Bimbingen PA Mamre

Selanjutnya

More Articles ...


Mamre


Moria


Permata


Ka-Kr

Info Kontak

GBKP Klasis Jakarta - Kalimantan
Jl. Jatiwaringin raya No. 45/88
Pondok Gede - Bekasi
Indonesia

Phone:
(021-9898xxxxx)

Link

Download

Mediate