Suplemen PJJ tanggal 27 Maret-02 April 2016, Ogen Lukas 22:14-20

Thema :

Persadan Ras Kristus Ibas Lakon Persadan Si Badia

 

1. Uga nge penggejabenta adi ibas sada acara, kita si erpengakap maka kehadirenta e hanya sebage temue biasa, tapi ibahan si mada kerja kita jadi sinipehaga. Banci kita sengget janah lanai si eteh uga ncibalken dirinya. Tapi ndauh ibas pusuh ukurta si mbagesna tentu seh kal riahna ukurta. Sabab kita si erpengakap biasa-biasa saja, kepeken mehaga ras meherga. Ras biasana nandangi si bage rupana maka si isehken pe man bana lit nge lainna. Bagem si tuhuna ibas kita ngaloken Lakon Persadan si Badia e. Kita si perdosa ras la metunggung, jadi si ipetunggungken Dibata i adepenNa. Saja adi ngidah kerna perdalanen Lakon Persaan si Badia ibas gerejanta, ug nge ninta? Nggo nge erpengakap kita maka kita lit ibas sada kerja si Mbelin ras Badia. Sabab labo Pendeta ntah Pertua- Diaken si ndilo kita, Tapi Pandita, Pertua ras Diaken eme si ngelai si puna Kerj e eme Dibata. Jadi…. Dibata nge si enggo nenahken kita.

2. Guna kai kin Yesus erbahan Lakon Peradan nandangi ajar-ajarNa. Adi nen kubas peristiwa peringet-ingeten kerna Paskah kalak Jahudi tentu e hal si nggo biasa. Ise pe banci ngelakoken peringet-ingeten e. Tapi kai si ilakoken Yesus eme nuduhken sada tanda maka arah daging ras darehNa Ia enggo nggenepi dahinNa i doni enda. Lit piga piga si perlu si perdiateken ije, eme Ise si ertenah …. Yesus, itandaiNa kin ise si ienahkenNa e? Tentu itandaiNa. Ise si ndayaken Ia, Ise si erbual sope denga terkuak manuk. Ise si kiam nadingken Ia. Kerina itandaiNa. Jadi ngkai maka itenahkenNa kalak si bage. Enda me bedana kita ras Dibata, kita itenahkenNa gelah kit ape ngasup erdame ras kalak si la bagi ukurta. Ise si ngelai…. Tuhan. Ia si nuriken ukurna ras sura-suraNa nandangi ajar-ajarna (baca : kita manusia). Kai si elakenNa….. DagingNa, enda ngertiken maka la ate Dibata nadingken manusia kenca Yesus nangkih ku Surga. Daging e daging si Badia, tentu si ngalokenca pe arus nggeluh badia. Janah daging e pe jadi tanda maka kalak si ngalokenca lanai italuken kuasa kematen. Sabab daging e nge si mate janah daging e ka nge si keke ibas si mate nari. Kai nari …. DarehNa. Kalak si enggo melket gelah banci bersih tentu perlu ridi, tapi kenca ridi, banci denga kula e melket mulihi. Tapi darehNa e icurcurkenNa gelah banci jadi lau peridin kegeluhenta. Gelah kita si nggo melket ibas dosa e, kenca ngaloken daren e lanai banci melket.

3. Jadi alu bage, enggo nge reh tangkasna man banta kerna uga ergana Lakon Persadan si Badia e man banta? Adi enggo maka mari siperdiateken ka teman-temanta, ntah lit denga si erpengakap maka Lakon Persadan si Badia eme sada bagin rutinitas gerejawi; enda jadi tanggungjawabta mpersingetisa. Gelah alu bage radu ras kita ngasup ngergaken dahin e sebab tuhu-tuhu meherga kal kita iakap Dibata. Itehna mbue kinilapayonya, tapi tetap kita ikelengina.

 

Pdt. BRC Munthe-Rg.Cisalak