Suplemen PJJ tanggal 13-19 Maret 2016, Ogen Johanes 13:1-17

Thema :

Meteruk Ukur

1. Ibas ngelakoken Retreat-Retreat si lit I tengah-tengah gerejanta mungkin aksi murihi nahe nggo megati si lakoken. Biasana enda ibahan ibas sada kebaktin meditasi. Ija perlebe ibabai kita lako ngukuri kerna kegeluhenta rikut ras perbahanen-perbahanen si nggo si lakoken. Khususna kerna perbahanen-perbahanen si langena ate Tuhan tah temanta manusia. Kenca bage alu muat lau ras uis ras I iringi alu ende-enden si melenget ibenaken si mbaba acara murihi ntah ngelap nahe kerina si pulung. Megati ibas perdalanen acara e enterem si ngandung bahkan nderkuh pe. Lit ka si la ggit iburihi nahena, alu nataken maka labo pantas ia ngaloken si e. pokokna suasana ias paksa e tuhu-tuhu teridah “badia”. Tapi ggo nge erkedungen kerina kenca si e? Kerna si e, kita lah si nggo perna ngenanamisa metehsa.

2. Peristiwa si ituriken ibas bahan PJJ nta sekali enda encidahken uga perbahanen Yesus si ilakokennNa nandangi ajar-ajarNa. Adi megermet kita ngogesa maka kai si ilakoken Yesus nandangi ajar-ajarNa eme sada perbahanen si ibas paksa si e labo bagi semalna. Mungkin ibas paksa end ape bage ka nge. Ija sekalak “pemimpin, guru, seh pe Tuhan” eme gelar si ibereken ajar-ajarNa man baNa nggit muat sada sikap ras keputusen si “bertentangen” ras kebiaken si lit. ITANGTANGINA JUBAHNA  ngertiken nggit Ia meneken “predikat” si leket ibas dagingNa, IBUATNA LAU RAS LAP ertina ioesikapna kai si arus ilakokenna janah si lakokenna e pasti erguna man ajar-ajarNa. IBERSIHKENNA ntah IBURIHINA NAHE AJAR-AJARNA ALU MUNGKUK I ADEP-ADEPEN AJAR-AJARNA ertina ngelai labo perlu ngenehen ise si man elan ras ise ka kita ibandingken ras si ni elai kita. Fokus eme dahn si lit ras nggo nge lengkap kerna si ngkuhi dahin e.

3. Tantangen guna ngelai sibagenda rupana pe teridah labo arah Yesus saja (Yesus nggo ngasup naluken diriNa), tapi reh arah ajar-ajarNa. Si jababen Ia ras Simon Petrus. Si enda arusna mbabai pengertin man banta maka kita arus ngasup nehken pengertin man ise pe maka nggo kin jadi bagi kai sinisuraken Yesus nandangi ajar-ajarNa maka ise pe atena ngelai ibas gelar TUhan Yesus, maka si la banci lang ibeneken ibas kegeluhennta eme KINIGANJANGEN UKUR, si ni kataken kita alu Gengsi, La Pantas, Kitiksa Dahin E ntah La Level nina si gundari, rsd.

4. Mpeteruk ukur ilakoken labo banci tanggung-tanggung, ntah pe sung-sungen. Tapi mpeteruk ukur arus ilakoken segedang-gedang geluhta. Mpeteruk ukur labo ilakoken nandangi kalak si man bana pantas si akap mehamat kita erkiteken ganjangen pangkatna, bayaken ia, kalimubunta, ntah ise pe ia siniakap kita lebih asa kita; Tapi mpeteruk ukur arus tetap jadi “jati diri”nta janah silakoken man ise pe alu la ngenen ku status kegeluhenna. Mpeteruk ukur pe arus nggit ngerembakken diri nandangi kerina jelma gelah baik si bagi ukurta ntah la bagi ukurta kerina banci ngidah kiniulin Tuhan si nggo isehkenna nandangi manusia.

5. Ngusih kai si ilakoekn Yesus alu nggit mpeteruk ukurta aminna mberat tangtangna, tapi dung jadi keriahen man banta sabab ngasup kita mulahi bana ibas si meserana bene ibas kita. Selamat Mpeteruk Ukur. Inget kuan-kuan  kerna Page“ Semakin Berisi, Semakin Merunduk”.  

Pdt. BRC Munthe-Rg.Cisalak