Suplemen PJJ tanggal 20-26 Maret 2016, Ogen Lukas 9:22

Thema :

Kiniseran, Kematen ras Kekeken Yesus Palas Kiniteken ras Pengarapen

 

1. Adi kita mbangun rumah, adi paguh ras nteguh ateta rumah e maka si tangtangna iukurken eme uga erbahan palas si mehuli. Gelah kenca dung palas e ibahan jenari iterusken me alu mbangun bangunen rumah e. Janah adi enggo dung rumah e ibahan, jenari iiani me, ras tentuna lit pengarapen maka adi palas rumah enggo mehuli  tentuna penggejaben ibas ngianisa pe tentu aman.  Bage pe adi erkiniteken ras erpengarapen nndangi Tuhanta, adi labo lit palas si nteguh, maka tentuna labo banci kiniteken ras pengarapenta nandangi Tuhan e jadi serta. Sabab lit denga tempa si deban si aka psi banci denga nampati kita. Banci saja e, gegehta, kinilitenta, kade-kade ntah temanta. Tapi sada hal si lupa kita eme, maka kerina si lit I babo doni enda labo lit si tahan rasa lalap.

2. Ogenta enda ncidahken maka Yesus ngataken kerna perdalenen kegeluhen ras kematenNa. Kai si banci si datken arah pengerana Yesus sope denga Ia mate, eme ncidahken kebenaren ras ketuhu-tuhun e labo perkara si mesukah. Padahal adi nen kai si ibahanNa ras si iajarkenNa labo lit si la payo. Kerina e ilakokenNa gelah manusia banci mulih kempak kebenaren si tuhu-tuhu. Tapi lit nge si atena tetap ngolangi pendahin Yesus, seh maka dungna erpekat kalak e lako munuh Yesus. Memang tempa sura-sura kalak si ngimbangi Yesus e rulih. Sabab radu ras kita metehsa maka MATE YESUS I KAYU PERSILANG.

3. Tapi ibas kematenNa e talu kin Ia? Kalak si erpekat munuh Ia erpengakap maka enggomenang ia kerina. La iingetna maka lit denga kata Yesus si enga iidahna eme kenca mate Ia, jenari KEKE me Ia ibas kematenNa nari. Yesus memang pernah mpekeke kalak si enggo mate. Tapi Yesus ise si mpekekesa? Adi secara doni… lalit si mpekeke Ia, tapi arah kinitekenta maka Dibata ka psi mpekekesa. Kai tandana e? Tandana eme maka kebenaren si sedekah enda enggo ipeseh Yesus labo lit si nalukenca. Arah si e pe ate Yesus ncidahken maka kalak si nggo tek man baNa aminna lenga denga dem kinitekenna dungna jadi serta. Janah adi nggo serta kinitekenna maka amin kai pe bentuk perbeben ntah kiniseran si reh nderpa lanai jadi kebiaren, sabab lit pengarapen maka kenca kiniseran e turah ntah reh me kemalemen ate.

4. Arah peristiwa kegeluhen Yesus, ibas Ia ngenanami kiniseran, mate, janah dungna keke enda ibabai kita maka ibas erkiniteken end aula ndabuh kubas pengakap maka kerinana pasti aman ras senang sabab lit Tuhan Yesus si ndungi persoalenta. Memang payo, Tuhan ndungi persoalenta. Saja guna kita seh ku perukuren si bage me, ibabai kita lako terus erlajar tek, erlajar megenggeng, erlajar erpengarapen. Janah ibas proses enda me maka alu la si arap rem me penampat e lako mulahi kita ibas perbeben ras kiniseranta. Janah ibas si e ka pe kita ngasup erberita man kalak si deban uga kin nanamna ernalem man Tuhan.

Pdt. BRC Munthe-Rg. Cisalak