Suplemen PA Mamre tanggal 20-26 Maret 2016, Ogen II Raja-raja 23:24-25

Ibas pemerintahen entah pe organisasi, rakyat entah anggota oraganisasi si ipimpin e mbelin pengarapenna gelah arah pemimpinna e banci ialamina kemajun, kemakmuren ras kedamen. Erkiteken si e, sekalak pemimpin si nggit erpengue arus nggit nggegehisa e me arah nggit erlajar ndarami pemeteh; khususna arah teladan pemimpin si sukses ras mendisiplinken diri. Sekalak pemimpin si benar arus itandaina kai perbeben si ihadapi bangsana entah organisasi si ipimpinna, bage pe arus ipahamina tujun si man ayaken. Erkiteken si e guna mencapai tujun si itetapken arus maka iaturkenna strategi pencapaian tujun, ibenaken arah diri pemimpin e nari, nggit nandai kengasupenna (kemampun, keterampilen entahpe keahlinna), nggit ngkembangken kekuaten si lit ibas dirina, terampil ia ngidah kemampun ibas teman-temanna sada aron ibas kepemimpinen e, bagepe ndarami rumusen sukses mencapai tujun ras sidebanna. Pemimpin si benar e me pemimpin si jadi motor menggerakken kerina kekuaten ku arah tujun. Pemimpin si enggo ndalanken fungsina alu benar e me bukti kesetianna.

 

Yosia iangkat jadi raja i Juda ibas umur waluh tahun. Ilaporken maka ope ia ras kenca ia jadi raja la pernah lit sekalak raja bagi Josia tutusna nembah Tuhan; asa atena, asa ukurna ras asa gegehna ipatuhina kerina undang-undang Musa. (23:25). Kenca ia itangkuhken jadi raja, sedekah waluh tahun i ikutina pendidiken i istanana, seh maka ibas umur sepuluh enam tahun enggo bulat ukurna nembah Dibata nini-ninina Raja Daud. Asum Josia jadi raja kenca pemerintahen Manase bapana keadaan kiniteken ras moral Juda ras Jerusalem seh kal jahatna, itadingkenna Tuhan janah igantikenna fungsi rumah Tuhan jadi ingan nembah berhala-berhala; penembahen man Baal, gana-gana dewi asera, penembahen man bintang-bintang ras sidebanna (21:1-9, bdg Yeremia 1-12). Pelanggaren e mpeturah rawa Dibata ngancam bangsa e alu ukumen kehancuren (21:10-14). Guna mewujudken gelah Juda ras Jerusalem banci lebih makmur ras dame, bagepe pulah ibas ancamen ukumen Dibata nari tentu mberat kal perjuangen si arus ilakoken Josia.

 

Bulat ukur Josia guna nembah Dibata, keputusenna e tentu la pulah ibas ia nggit erlajar, khususna arah sukses Israel ibas masa pemerintahen raja Daud, mbiar ia man Dibata, ersura-sura ia mbangun Rumah Pertoton guna Tuhan, gelah Tuhan lit itengah tengah bangsaNa, Tuhan isembah ras ipermuliaken, gelah idahikenNa kemakmuren, e me adi bangsa e erkemalangen man BaNa. Josia la nggit terpengaruh tradisi penembahen berhala ras moral si salah ibas raja si enggona. Erkiteken si e ibas ngelaksanaken kepemimpinenna si pemena ilakokenna e me mbangun mulihi Rumah Pertoton Tuhan, mbersihkennca, ngulihken ku fungsina si seharusna; ingan ersembah man Dibata labo ingan ersembah man berhala-berhala. Ibas paksa pemugaren Rumah Pertoton Tuhan idat kitab undang-undang Musa si enggo ndekah ilupaken raja-raja ope Josia. Kitab undang-undang Musa e isehken Hilkia imam si mbelin si itugasken raja mimpin pemugaren Rumah Pertoton Tuhan e man Sapan sekrestaris istana guna isehken man raja Josia, janah asum Sapan nehken kitab e man raja iogekenna man raja. Kenca ibegi Josia isi kitab e mis icaingkenna uisna (jubahna) perbahan biarna. Igejapken Josia mbelin tanggung jawabna guna mbabai bangsa e ku Dibata ras gelah pulah ibas ukumen Dibata nari. Uis si icaingken e tanda pertobaten Josia (pertobaten bangsa-petobaten nasional) ras mpeteruk bana iadep-adepen Dibata, merupaken syarat utama gelah banci mengalami pembarun ras ngaloken perkuah ate Dibata. Erkite-kiteken perbahanenna si mehuli e ialoken Tuhan pertoton Josia seh maka Tuhan erjanji ibas masa pemerintahenna ras kidekah umur geluhna hukumen bagi si enggo itetapken Tuhan man Jerusalem la ilakokenNa (23:18-20). Pertobaten ras pembarun Josia la ergegeh guna mengubah kepuutusen Dibata tapi sikap awal Josia ibas kepemimpinenna e iperhitungken Tuhan, e maka itunda Tuhan paksa penghukumen si enggo itetapkenNa e.

 

Josia ncidahken tutus atena ndalanken pertobaten e, ijadikenna pertobatena e jadi pertobaten nasional bangsana. Iperentahkenna anak buahna mbersihken (menajiskan) Juda ras Jerusalem ibas penembahen berhala nari. Penggunan Rumah Pertoton Dibata hanya guna Dibata saja. (23:4-20 bdg. 2 Kronika 34:3-4). Kenca pembersihen Rumah Pertoton arah kerina bentuk penembahen berhala ras barang barang berhala nari guna pelaksanan ibadah-ibadah man Tuhan ipulihken Josia tugas kalak Lewi si ngaturkenca.

 

Pembarun Josia man Juda ras Jerusalem ilibatkenna kerinna pemimpin-pemimpin ras rakyatna; ipepulungna kerina pemimpin-pemimpin Juda ku Jerusalem (Rumah Pertoton Dibata); bagepe imam-imam, nabi-nabi ras jelma si enterem, si bayak bagepe si musil la lit si ketadingen, ilebe-lebe jelma si enterem e iogeken Josia kitab undang-undang Musa, kenca si e isehkenna perpadanenna man Tuhan maka ia tetap erkemalangen man Tuhan saja, bagepe kerina jelma si enterem si pulung ije erjanji maka patuh ia ndalanken perpadanen e (23:1-3). Perpadanen si isehken Josia ras jelma si enterem e tentu lit konsekwensina, adi ilanggar mpereh rawa Dibata si akan erbahanca keadaan Juda ras Jerusalem lebih buruk, e maka kerinana ia arus tetap setia ndalanken perpadanenna, kerina anak kuta e arus nggit mpebarui mental ras kinitekena man Dibata.

 

Selaku “pemimpin politik” raja Josia pe mperanken dirina sebage pemimpin rohani nandangi rakyatna. Kesetianna man Dibata mpengasup ia ngidah hal si penting si enggo ndekah ilupaken, e me ngelakoken perayan paskah. Erkiteken si e ipimpinna bangsa e erbahan pesta perayan paskah si meriah (bdg. 2 Kronika 35:1-19). Arah pembinan kiniteken ibenahi Josia jabu ku jabu kalak Juda ras Jerusalem sabab keluarga si megegeh ibas Tuhan ras bersih merupaken landasen masyarakat si megegh ras bersih. Bageme seh ku ujung pemerintahenna Josia tetap setia man Tuhan, ibabaina rakyatna erkemalangen man Tuhan ras ngenanami kesejahteran iteruh pemasu-masun Tuhan.

 

Ibas sekalak pemimpin si la banci lang arus lit kini nggiten (keterbebanan) guna ndahiken kemajun man si ipimpinna. Erkiteken sekalak pemimpin labo ngayaki kiniulinna saja tapi ndahiken kiniulin man kalak sideban e maka penting kal pembenahen diri, janah pembenahen e seharusna enggo imulai ibas paksa ngaloken dahin e. Umpamana ibas pelantiken pengurus Mamre nina pengurus si ngaloken dahin e “Tuhu bage ateku”. Kata kata e arus isadari isehken man Dibata bagepe man perpulungen. Pengakun “Tuhu bage ateku” labo erkiteken kiniganjangen ukur tapi pengakun maka enggo ia erketetapen ukur alu sesadar-sadarna (ialoken tanpa lit tekanen), nggit ndahiken dahin e, nggegehisa bagi peraten Tuhan si mere dahin e. Kalak si erpengue nandangi pendilo Tuhan arus ipebadiakenna dirina gelah banci ialokenna pemasu-masun Tuhan; idatkenna semangat pelayanen si tulus, kerelan berkorban, keterbebanen mengembangken potensi diri, ngasup ngergai teman ras mimpin sebage sada aron Tuhan, pang ngadapi tantangen pelayanen, setia seh kedungenna ras sidebanna.

 

Emaka perlu kal kita erlajar ku kepemimpinen raja Josia; mbenaken kepemimpinenna idaramina Tuhan, ibuatna keputusen ngikutken Tuhan. Penting kal man bana pembenahen Rumah pertoton sebab kehadiren Dibata nge arapen sukses e. Labo hanya ia si mbiar man Dibata tapi ibabaina pe kerina pemimpin bangsa e ras pemimpin rumah pertoton bagepe rakyat si ipimpinna berkomitmen setia ngikut Tuhan, mbegiken undang-undang Dibata (Kata Dibata) ras tutus ibas nembah Dibata. Guna sukses kepemimpinenna, ijadikenna dirina jadi teladan, emaka kesetian Josia jadi semangat man kerina pemimpin Juda ras Jerusalem bagepe rakyatna ras jadi semangat pelayanen ibas rumah pertoton. Kehadiren sekalak pemimpin arus jadi motivasi man aronna ras si ipimpinna.

 

 

Pdt.ewgm.sitelusada-bekasi