Suplemen PA Mamre tanggal 27 Maret-2 April 2016, Ogen II Korinti1:12

Thema:

”Mamre Idola”

 

Kata Perlebe

Erti kata idola sue si ijelasken ibas Kamus Besar Bahasa Indonesia e me “Orang, gambar, patung, dsb yang menjadi pujian”. Jadi tema Mamre-nta si ngataken “Mamre idola” e me mamre si jadi pujin, curahan perhatian, tapi makna kata enda langa bo tentu kerina kalak banci ngalokenca. Sesekalak jelma banci jadi idola man si “A” tapi langabo tentu teraloken si “B” jadi idolana, ras kai si jadi pujin e langa bo jelas; mungkin model bukna, bajuna, sorana rende ras sidebanna. Ibas Alkitab labo lit i idah kami kata idola tapi si ipake e me kata “teladan” si ijelasken Kamus Besar Bahasa Indonesia ertina e me: “Suatu yang patut di tiru atau baik untuk di contoh (tentang perbuatan, kelakuan, sifat dsb)”. Erti kata teladan ibas cakap karo e me usihen, enggo jelas si man usihen e eme  perbahanen, ras si lebih spesisifik mencakup sifat si jadi palas perbahanen. Jadi bahan PA nta wari enda ngajuk kita ngerana kerna Mamre si jadi usihen erkiteken lagu langkahna entah pe perbahanenna si mehuli bagepe pusuhna si bersih (tulus).

 

Pembahasen teks

Kerina kalak si erkiniteken i lebuh gelah jadi usihen “Janah kam, i bas kai pe arus jadi usihen kerna dahin si mehuli. Tutus min atendu dingen ergiah giahlah ukurndu ngajar” (Titus 2:7). Perberita si meriah adi langa ia ngasup njadiken dirina jadi usihen kerna kata Dibata ula min ia pebenarken diri alu ngataken ”Begikenlah kai si kuajarken, dalanken kerina e alu tutus, ula inehenndu-ula usihndu perbahanenku”. Perberita si meriah arusna ope denga ia mberitaken berita Kata e, enggo min lagu langkahna mehuli, sabab kalak si mberitaken kata Dibata ope denga ia ngaloken dahin e arusna ia enggo mengalami pertobaten, gelah lagu langkahna ula jadi batu antuken nandangi berita si meriah si iberitakenna.

Kata Dibata si iberitaken perberita si meriah ipertimbangken kalak si ilayanina arah lagu langkah perberita si meriah e. Erkiteken si me maka Rasul Paulus arus mbela dirina kerna motifasina ngelai perpulungen i Korintus, gelah berita si meriah si iberitakenna ula itulak, erkite-kiteken lit perpulungen nulak diri Rasul Paulus alu ngataken Rasul Paulus perbual, iragukenna palas kekelengen Rasul Paulus (bdg. 2 Kor 1:17-2:4). Adi kerasulen Rasul Paulus itulak maka kerina pengajaren si enggo isehkenna pe itulak. Perberita si meriah labo banci berlawanen motivasina bagepen perbahanenna ras berita si meriah si iberitakenna.

 

Ibas nehken pembelanna Rasul Paulus labo alu merawa tapi isehkenna alu megah atena, sabab menurut Rasul Paulus adi lit pengaloken perpulungen e salah kerna ia e erkiteken mediate kap perpulunegn e man bana maka lit penilaianna kerna dirina ras pengajaren si isehkenna. Nina Rasul Paulus “Pusuh peraten kami naksiken maka ibas hubungen kami ras kalak si deban, terlebih lebih ras kam, perbahanen kami tetap erpalasken kinibujuren ras ukur si bersih i adep-adepen Dibata”. Kalimat enda merupaken kalimat pembuka ibas ate Rasul Paulus gedang ngerana kerna pemberitanna. Rasul Paulus mpetandaken bana kerna motivasina si bersih, man ise pe labo atena nembeh terlebih lebih ka pe man perpulungen Korintus. Kinibujuren ras ukurna si bersih e pang Rasul Paulus mpertanggung jawab kenca i adep adepen Dibata. Pembuktin kebenaren alu mbaba gelar Dibata merupaken cara meyakinken kalak gelah pembelanna ialoken. Umpamana bagi cakap anak-anak sapih–sapih ia i kesain, kira-kira nina: “Pang aku ersumpah, maka bujur kap aku ras pusuhku pe bersih kap, Dibata saksina”. Rasul Paulus erusaha meyakinken perpulungen Korintus alu cakapna si meteruk maka nina adi ngasup ia tetap rukur bersih ras mehuli perbahanenna labo e erkteken kelebihenna, tapi erkiteken lias ate Dibata si mpengasup ia ngaloken situasi e, tetap tenang ras rukur positip.

Amina Perpulungen Korinti nulak dirina tapi Rasul Paulus tetap ngaloken perpulungen e alu pusuh si bersih. Pusuh si bersih, ketenagenna ras perukurenna si mehuli e labo erbahanca Rasul Paulus meganjang rukur, tapi kerina e igejapkenna erkiteken lias ate Dibata. Emaka labo lit sura-sura Rasul Paulus gelah ia imegahken, tapi Tuhan Dibata kap si tetap arus i megahken. Kai si ibahan Rasul Paulus e pantas jadi usihen (teladan), tapi ise pe labo ka ngasup ngusih bagi si ilakoken Rasul paulus adi la kin ia nggeluh iteruh lias ate Dibata.

 

Nina Rasul Paulus “Dage kupindoken man banndu: usihlah aku” (1 Korinti 4:16). Bagem seharusna kata-kata si mpegegehi kesaksin ras pengajaren si isehken sekalak perberita si meriah, pang ia njadiken dirina jadi model pengajarenna. Seterusna siperdiateken pe tenah Rasul Paulus man Titus selaku perberita si meriah si umurna nguda denga “Janah kam, ibas kai pe arus jadi usihen kerna dahin si mehuli. Tutus min atendu dingen ergih-giahlah ukurndu ngajar” (Titus 2:7). Kalak si umurna nguda denga kurang ialoken sebage pengajar, tapi Rasul Paulus mere pengajaren man Titus, aminna umurna nguda denga adi ijadikenna dirina jadi usihen dingen ergiah giah ia ibas nehken pengajaren tentu ia ialoken perpulungen.

 

Aplikasi ras Renungen

Ngusih-ngusih gaya sesekalak jelma mungkin melala kalak si beluh tapi ngusih kiniulin perukuren, motivasi ras perbahanen si mehuli labo banci ilakoken kalak adi la kin seri si jadi palas perbahanenna e. Bagi si ituriken ibas bahan bahasenta enda Rasul Pulus enggo ncidahken palas motivasi ras perbahanenna si mehuli e me lias ate Dibata, e maka kalak si atena ngusih perbahanen Rasul Paulus arus ka ia nggeluh iteruh lias ate Dibata.

 

Kai si iadapi sekalak mamre ibas kegeluhena; ibas jabuna, ibas lingkungen pendahinna ras ibas lingkungen pergaulenna labo kerinana bagi ukur. Maun-maun jumpa hal si mngecewaken si erbahanca banci turah emosi, tapi perlu kal isadari maka arus min nilai nilai kiniteken e lebih megegeh mere pengaruh, gelah situasi si mengecewaken e la erbahanc hilang kendali seh maka merosot nilai dirina. Kualitas diri mehuli ula min erkite-kiteken si iadapi bagi ukur, tapi si iadapi bagi ukur entah la bagi ukur sekalak mamre tetap min jadi teladan, sabab kiniulinna erkite-kiteken kualitas kinitekenna man Dibata.

 

Jadi teladan labo prestasi si man ayaken tapi si penting si jadi perayaken kalak si tek e me lagu langkah si enggo teruji kebenaren ras kualitas kiniulinna.  Adi teladan si jadi perayaken maka perbahanen si mehuli banci jadi ilakoken alu terpaksa. Entah pe perbahanen si mehuli ilakoken erkite-kiteken lit kalak si ngidahsa, adi bage uga lagu langkahna adi paksa ia si sada entah la lit kalak si  mperdiatekenca? Keteladanen e me erkite-kiteken perbahanen si ipalasken jujur erkiniteken; motvasi si bersih, iadep-adepen Dibata ras iadep-adepen manusia mehuli perbahanenna.

 

Sue ras kata Dibata ibas kitab Ulangen 6:6-7; tanggung jawab sekalak bapa e me mperdiateken kata Dibata ras ngajarkenca ku isi jabuna, khususna man anak-anakna. Erkiteken si e mamre arus teraloken keteladanenna, lit wibawana (“kuasana”)  gelah ajaren si isehkenna ialoken anggota jabuna.

                                          pdt.ewgm.sitelusada-bekasi