Suplemen PJJ tanggal 06-12 Maret 2016, Ogen Galatia 2:1-10

Thema :

Ersada Arih Guna Muat Si Mehuli

1. Bhineka Tunggal Ika eme semboyan si lit ibas negararanta, se ncidahken erti aminna pe pelain-lain tapi tetap ersada. Enda teridah ibas suku, bahasa, agama bage pe situasi kegeluhen si erbage-bage si lit ibas negaranta tapi kerina irakut ibas sada ingan si nigelari NKRI (Negara Kesatuan Republik Indonesia). Bage pe ibas tengah-tengah gerejanta, aminna la kal bagi Indonesia enda erbage-bagena, tapi pe ibas gereja pe lit nge kinierbagen. Lanai kalak Karo ngenca si jadi anggota, enggo me lit erbage-bage suku bahkan bangsa si jadi warga GBKP. Adi man banta si tading I Kota, maka lanai bo kita reh ibas sada kuta kemulihen nari tapi enggo kita pulung ibas erbage-bage kuta asalta. Kerina enda dungna irakut ka ibas sada ingan eme GBKP, gerejanta.

 

2. Pengogenta pe encidahken maka Paulus ras teman-temanna pe labo ibas sada golongen ntah suku tapi dungna banci ersada ias pengajaren si isehken Paulus man bana. Paulus kalak Yahudi ras isunatken, Titus kalak Yunani la isunatken.  Bage pe ibas perjumpanna ras Rasul-Rasul, ije pe pang ia ngataken maka Berita si isehkenna e labo saja man kalak yahudi tapi pe man kerina jelma. Paulus labo ngerana guna pesenangken ukur kalak si enterem tapi ibas ia enggo andai Tuhan Yesus, maka si ilakokenna eme pesenangken ukur Yesus.

 

3. Lit nge si la senang ibas kai si ibahanna e… ? Pasti lit. Engkai sabab lit denga ibas manusia sifat maka pangen ia ntah merhat ia gelarna si itandai. Emaka kai pe si ibahan kalak banci jadi pandangen akapna. Ipakena kerina si lit ibas ia baik pemeteh, kuasa, erta guna banci nehken sura-surana. Tapi payo kin bage? Tentu lang. paulus pe ngidah si enda. Emaka alu tangkas ngerana ia kerna kai si ngena ate Tuhan Yesus. Janah malem atena sabab Rasul-rasul pe dungna ngasup ngangkai ras ngaloken kai sinidahiken Paulus rikut ras pengajarenna.

 

4. Genduari ngerana kita kerna kecibal gerejanta. Ibas gerejanta lit Majelis Jemaat, lit Lembaga Kategorial, lit Perpululengen Jabu-Jabu. Erbage-bage latar belakang ta, baik gegeh ras kengasupen, pendidiken, rsd. Lit ka si megang sorana, lit ka si la mbue ngerana, bahkan lit ka si persinik. Lit si meriah akapna pulung-pulung, lit ka si sesekaln ngenca pulung, bahkan lit ka nge si la pulung-pulung. Tapi kerina nge enda kita ersada I tengah-tengah gerejanta. Janah ibas gerejanta tentu lit ka nge dahin-dahin ntah program si man dalanenken. Ibas si enda mari dage maka labo perlu kita “ncidahken kinijagonta, ncidahken kebeluhenta” si sada.; tapi alu ngukuri ukur temanta ras si terpenting ngukuri ukur Tuhan, radu ras kita nggeluhken kegeluhenta I tengah-tengah gerejanta she gelah kerina dahin-dahin banci idungi alu mehuli, malem ateta ras terpuji gelar Tuhan.

 

Pdt. BRC Munthe-Rg. Cisalak