Suplemen PA Mamre 26 Agustus-01 September 2018

Ogen : Masmur 139: 1-6

Tema : “Bapa Sierpengangka Nandang Anai”

I.                   Kata Perlebe

Bahan PA Mamrenta enda merupaken bagin si pemena arah 3 cataten kerna pergumulen Daud. Bagin pemena enda kerna ekspresi pemahamen Daud kerna Dibata si meteh kerinana, kerna Dibata si hadir ibas kerina situasi kegeluhen, ras bagin si terakhir merupaken pemindon Daud. Kerina bagin enda la reh bage saja tapi arah perdalanen pergumulen raduken kesadaren diri si terbuka iadepen Tuhan. Kita pe ateta nggejapken pengalamen hubungen ras Dibata bagi si igejapken Daud. Bahan PA enda ikawitken antara kondisi kerohanian ras pemahamen kerna Dibata, janah hal enda merupaken palas arah kerina pengalamen kiniteken ibas kerina kegeluhen kerohanian. Kai sieteh kerna Dibata pasti ncidahken kegeluhen kerohanianta.

II.                Tafsiren/Isi

Daud ncubaken nehken man banta uga menghubungken antara kai sieteh ras kai sigeluhken kita. Harus siakui maka antara pemetehta kerna Dibata ras kegeluhen kerohanianta lit sinirangkenca ras la sieteh uga carana ndatken kegeluhen ibas pemeteh kerna Dibata. Dibata sieteh kita labo Dibata si terjeng objek arah pemeteh saja, tapi Dibata siatena itandai manusia. Bahan PA enda menyoroti uga Daud menghubungken antara pemetehna kerna Dibata ras kegeluhenna. Dibata ibas pemahamen Daud lit ibas kerina sisi kegeluhen janah la ipediat Dibata kita ndarami Ia alu perukuren apakah Ia lit ntah lang, apakah ietehna pergumulenta ntah lang?

Masmur 139 lit ibas kondisi si la biasa. Ibas jaman sie mbue kalak si tek man dewa ras raja si la erpemeteh. Sanga Daud  ngataken maka Dibata e meteh kerinana maka hal sie merupaken sada terobosen perukuren. Sisi sideban ibas jaman sie raja ianggap meteh kerinana sedangken Daud ngerana maka dirina la meteh kerinana. Jadi, Masmur 139 enda lit erkiteken litna tekanen antara 2 konteks i datas. Ate Daud ngataken maka Dibata ngelebihi kerina dewa si lit ibas bangsa-bangsa sideban, janah ia selaku raja si seharusna meteh kerinana justru ia pe labo tehna kerinana. Kalak Israel si atena tehna kerina kerna Dibata ntah pe kegeluhen kerohanian maka nungkun me kalak Israel e man Daud sebab iakapna Daud meteh kerinana.

Masmur 139 eme sada pengakun kiniteken kerna Tuhan, Dibata si meteh kerinana. Inti pengakun kiniteken enda rusur iakui ras itegasken ibas Padan Sindekah (1 Sam. 2: 3). Tapi lenga pernah lit pengakun si seh kal bagenda bagesna alu ungkapen kekagumen, kemalemen ate, penembahen, kepercayan, bagepe pengendesen diri bagi si lit ibas Kitap Masmur enda. Arah pemasmur kita erlajar uga ndalani kegeluhen sebage kalak si lit ibas ia Dibata si meteh kerinana.

III.             Pengkenaina

Isi pokok kiniteken kerna Dibata si meteh kerinana eme kita enda itandai Dibata. Man pemasmur, “itandai Dibata” labo terjeng pemeteh saja, tapi keyakinen si turah arah pengalamen kegeluhen. Pengalamen ikapiti, isentuh, ijumpai, ibabai Dibata. Janah hal enda teridah ibenai arah uga Dibata njadiken manusia i doni enda, pemasmur naksiken lit mujizat simbelin ibas kejadin e. Janah si lebihn erbanca kagum eme Dibata nggo nandai kita lenga pe kita tubuh, janah kerina wari-warinta seh ku pengujung geluhta, kerina lit ibas rancangen Dibata. Alu kerina keyakinen ras pengalamen ras Dibata si meteh kerinana, kedungenna pemasmur menyadari keterbatasen perukuren ras pemetehna sebage tinepa Dibata. Manusia la ngasup seh ibas pemeteh Dibata, la ngasup meteh perukuren Dibata.

Ma harus nge kita pe banci ngkuasai perukurenta teruh kekuasan Dibata si la terbatas e? Ngkai maka sanga kita ngerenungken kerna kinibelinen Dibata, kita malah rusur kal bertindak jadi hakim ngelebihi perukuren Dibata. Penandainta kerna Tuhan mendorong kita guna patuh man baNa. Ibas Masmur 139 isehken ije kerna Dibata si meteh kerinana, Dibata pe erdahin  ibas kerinana guna mperehken kiniulin man kalak si ngkelengi Ia. Sebage anak-anak Tuhan lanai lit man kebiaren erkiteken Tuhan si erdolat mimpin kegeluhentan janah nggit kita patuh man baNa.

Pemasmur la terjeng sadar maka Tuhan e tuhu-tuhu nandai dirina, tapi nggit ia reh ku adepen Tuhan. Ipindona gelah Tuhan nandai ras nguji pusuh ras perukurenna, janah mereken bimbingen man bana. Bage ka pe ibas kegeluhenta, tiap kejadin si lit la terlepas ibas perhatian Tuhan. Termasuk kerina persoalen kegeluhen ras pergumulen si gundari ialoken kita. Sedekah enda kuja nge kita maba perbeben kegeluhenta?

Selain Masmur 139 lit ka ibas Masmur sideban eme pasal 128 ije iandingkenna pewarisen arah bapa nari ku anak bagi tunas batang saitun. Kualitas tunas tergantung induk batang. Adi batang e mehuli, tunasna pe mehuli. Adi batang e la mejile, tunasna pe la mejile. Biak, karakter ras kepribadian anak tergantung ibas teladan orangtuana. Enda me pusaka si warisken orangtua. Tentu sienda kerina banci iwarisken adi orangtua e tuhu-tuhu nandai anakna, bagi Dibata nandai kita anak-anakNa. Ibas budaya Bali iutamaken pewarisen nilai-nilai kegeluhen. Kai si ianggap perbahanen si mehuli ibas masyarakat Bali? Ngkali sumur. Tapi ngkali seratus sumur tetap denga talu arah erban empang/kolam si banci ipakeken kerina penduduk kuta/desa. Tapi, erbahan seratus empang/kolam tetap denga talu nilaina arah yadnya eme ngelakoken persembahen man Sang Hyang Widi Wasa. Tapi, ngelakoken seratus yadnya tetap talu denga ibahan nilaina arah ngajari sekalak anak jadi suputra (anak si perbahanenna mehuli). Enda me perbahanen si mehuli arah kerina perbahanen si mehuli: mewarisken biak si mehuli man anak. Enda kerina banci jadi adi sitandai uga karakter anakta. Memang lit denga nge orangtua (bapa) e la ietehna uga biak anakna, karakter anakna, kebutuhen anakna, kebiasan anakna, pergaulen anakna, rsd. Arah enda jadi persinget man banta gelah memaksimalken waktu man anakta guna lebih nandai ia.

Pdt. Andreas Pranata S. Meliala, S.Th

(GBKP Rg. Cibinong)

Ogen : Epesus 5: 14-16

Tema : “Nggeluh Ibas Terang”

I.                   Kata Perlebe

Mungkin rukur kita, uga nge kalak si mbaru tek man Kristus banci erdalan ibas kepentaren Dibata? Ma harus nge kita enda turah? Jadi kalak Kristen si pentar perlu waktu si ndekah. Penungkunen-penungkunen si bagenda rupana tuhu-tuhu salah, erkiteken bahan PA si jadi oratenta sendah la ncidahken man kalak Kristen si mbaru, tapi Paulus atena ngataken uga nggeluh sebage kalak si nggo iselamatken. Surat Paulus man perpulungen Epesus isina kerna uga rencana Tuhan guna mpersadaken kerina tinepa baik i surga bagepe i doni janah Jesus e sebage pemimpinna. Paulus njelasken persadan e terjadi erkiteken Dibata si nggo milih bangsaNa, ngalemisa ras mbebaskenca ibas Jesus ras ipeteguhi ibas Kesah Si Badia. Paulus ngajuk tiap kalak Kristen gelah nggeluh ibas terang. Terang eme sada hal si teridah jelas, la terbuni. Terang la pernah italuken gelap.

II.                Tafsiren/Isi

Ijenda Paulus ngataken, “Medakkenlah, o, kam si tunduh, janah kekekenlah ibas si mate nari!”. Ibas ayat 14 enda lit kata “medakkenlah” janah enda merupaken kata si penting. Kata “medakkenlah” ncidahken kita nggo “nggeluh” janah adi kita “nggeluh” sie berarti lit ibas kita kesadaren. Adi kita nggo sadar emaka banci me kita keke. Kenca keke emaka banci me kita erdahin janah Kristus banci ersinalsal ibas kegeluhenta. Sayangna, melala kalak ngataken dirina Kristen bahkan nggo ndekah ia Kristen tapi kegeluhenna la ersinalsal i tengah-tengah doni enda bahkan terbaba ia ibas pengaruh si la mehuli. Perpulungen si nggeluh, si medak ras si keke ngenca banci ngidah sinalsal terang Kristus ibas kegelapen.

Ijenda ikataken Paulus ka, “ersinalsal me Kristus ku babondu”. Ertina gelah Kristus ersinalsal ibas kegeluhen perpulungen labo sada hal si mesunah. Enda me sebabna perpulungen si nggo iselamatken harus mbages iukurina piga-piga hal: pemena, perpulungen perlu mperdiateken lagu langkahna. Ertina la banci nggeluh alu sembarangen. Ola nggeluh bagi kalak motu. Kalak motu ijenda labo berarti kalak si IQ-na rendah. Lang! Tapi kalak si la mbiar man Dibata. Secara kognitif memang tehna kerna Tuhan e bahkan mungkin lit ibas ia pemeteh kerna Taurat si cukup mehuli tapi justru arah perbahanenna la icidahkenna uga kekelengen Dibata. Emaka seterus ikataken Paulus nggeluhlah bagi kalak pentar. Kalak pentar ijenda harus si kaitken ibas Padan Sindekah. Ibas Padan Sindekah kalak pentar rusur kal ikaitken “erkemalangen man Dibata”. Kalak si erkemalangen man Dibata, ibas geluhna pasti lit ibas ia biak megermet guna megiken sora  Dibata. Jadi kalak si pentar ijenda eme kalak si ngehamati Dibata labo arah perukurenna saja tapi pe ibas pusuhna ras perbahanenna. Enda me salah sada perbedan antara filsafat Junani ras Filsafat Ibrani. Ibas filsafat Junani lebih itekanken ibas aspek teori sedangken ibas konsep Ibrani filsafat lebih ncidahken kerna perbahanen. Jadi, adi rusur sibegi “guna ndatken pemeteh, si pemena si la banci lalit ibas kalak eme mehamat dingen erkemalangen man TUHAN, ntah pe bahasa Indonesia permulaan hikmat adalah takut akan Tuhan”. Enda ncidahken aspek perbahanen manusia iadepen Tuhan. Jadi kalak si pentar labo terjeng lit ibas ia pemeteh kerna Dibata saja tapi pe ngehamati Dibata ibas kerina perbahanenna termasuk ibas ngerencanaken ras mengarahken kerina tujun geluhna sue ras sura-sura Tuhan ras iterus pimpinen Tuhan. Peduaken, pergunaken tiap kesempaten si ibereken Tuhan. Istilah waktu ibas ayat 16 ijenda ncidahken kerna kesempaten. Ibas cakap Junani la make kata “kronos” tapi “kairos”. Jadi ibas ayat 16 enda ngatakenca man banta “pergunakenlah kesempaten si lit ibas kam alu mehuli”. Ibas dongen Junani kesempaten igambarken ras dewa kesempaten si lit bukna i lebe. Janah dewa kesempaten e lit kabengna i nahena adi erlumba kiam tentu talu kita. Jadi sada ngenca cara uga kita banci nangkap dewa kesempaten e harus sitimai seh dewa kesempaten e reh emaka sitarik bukna. Kita harus tuhu-tuhu makeken kesempaten e. Sitik saja kita terlambat lanai banci sitangkap. Ibas bagin enda secara singkatna guna mendorong kita uga kita makeken tiap kesempaten si ibereken Tuhan alu mehuli. Kesempaten ijenda banci mencakup mbue aspek, misalna kesempaten ngelai, PI, rsd. Labo sie saja bahkan ikataken Paulus maka wari-wari enda la kap mehuli. Secara umur banci si idah maka wari-wari sidalani kita  mbue kal potensi guna erban kejahaten. Sitik saja kita celus banci kita erdosa. Secara khusus ibas masa kegeluhen Paulus, perpulungen Epesus sangana ngadapi peniksan. Gelah Kristus ersinalsal labo sada hal si mesunah. Idatkenna tantangen. Ibas kondisi sibagenda Paulus ngataken ersinalsallah terangndu. La mesunah kecuali ipakekenna tiap kesempaten si lit amin pe wari-wari e la mehuli.

III.             Pengkenaina

Maun-maun mungkin kita tergoda guna ngikuti “gaya hidup” la ras Tuhan erkiteken terbaba nilai-nilai sekuler tiap wari. Mungkin si hibur dirinta alu alasen maka tetap denga kita reh ku kebaktin minggu, tetap denga sioge Pustaka ntah pe ertoto, tapi lenga ncidahken buah kiniulin, keadilen ras kebenaren, maka kemungkinen kegelapen sangana ngkuasai terang si lit ibas dirinta. Reh dekahna reh benena terang e. Erkiteken adi kegeluhen kalak Kristen la menghasilken buah terang maka kalak sideban si tetap denga nggeluh ibas kegelapen labo idahna kerehen terang Kristus ibas doni enda. Sebalikna kalak sideban pasti nggejapken terang Kristus e adi sicidahken buahta erkiniteken e. Erkiteken sie, Kata Dibata ngajarken kita guna nggeluh ibas biak metenget ras megermet bagepe erjaga-jaga. Kegeluhen sibagena merluken kengasupen guna mbedaken apai benar apai salah, janah pe nadingken sura-sura jahat, janah secara aktif ngayaki kebadian. Kita harus terus erjaga-jaga gelah la papak ibas kegelapen doni enda. Kemalemen ate simbelin anak-anak terang eme jadi pewaris Kinirajan Dibata. Enda me sebabna pewaris Kinirajan Dibata la pernah ngadi guna nerangi kegelapen arah perbahanen-perbahanenna si ncidahken terang.

Gundari kita eme terang, erkiteken sie nggeluhlah sebage anak-anak terang. Terang iperluken manusia. Adi lit ibas gelap, si idarami manusia pemenana kal eme terang. Ibas kegelapen kerina aktivitas manusia rempet ngadi, la nerusken perdalan erkiteken la ngidah kai pe. Sebage terang kita harus ngasup njadiken kalak sideban ngidah kebenaren. Adi sekalak lit ibas kegelapen, maka lanai tehna kuja pe, kerina tumburina. Ngidah si bage kita harus terus ngelakoken fungsita sebage anak-anak terang.

Pdt. Andreas Pranata S. Meliala, S.Th

(GBKP RG. Cibinong)

Suplemen PA Mamre 12-18 Agustus 2018

Ogen : 2 Raja-raja 23: 24-25

Tema : “Pemimpin si mbebasken”

I.                   Kata Perlebe

Kepemimpinen e itentuken arah pemimpinna. Kualitas pemimpin berpengaruh man anggotana.  Kepemimpinen eme aktivitas ras kengasupen maba anggotana guna nehi sada tujun. GBKP mengusung visi “GBKP jadi pasu-pasu” emaka kerina sisi kegeluhen GBKP secara total iarahkenna kengasupenna guna banci jadi pasu-pasu man sekelewetna. Kepemimpinen eme seni mereken pengaruh man kalak sideban. Ibas motif kita mimpin tentu ipengaruhi arah penggejapen ras pemahamenta kerna ise si ndilo kita. Adi lenga jelas ise si ndilo kita, maka lenga jelas me kuja ibaba persadan si ipimpin kita.

II.                Tafsiren/Isi

Raja Josia merupaken raja si cukup unik, hal enda erkiteken ia iangkat jadi raja sanga umurna waluh tahun. Amin pe ibas umur si nguda denga, ipimpinna Israel alu cara si berbeda bagi bapa ras ninina. Ilakokenna kai si mehuli i lebe-lebe Dibata. Erkiteken sie me masa pemerintahen Josia itandai masa jayana eme ngelakoken pembaharun si mbelin i tengah-tengah bangsa Israel.

Raja Josia berhasil ngelakoken pembaharun kegeluhen man bangsa Israel erkiteken ibenakenna kerina rencana pembaharunna alu njadiken Dibata sebage palas kunci kerina pembaharun si ilakokenna. Ilakokenna si enda erkiteken metedeh kal ia bangsa jera ibas dosa nari. Sebab kinijeran si tuhu-tuhu la terjeng sadar kerna dosa ngenca, ngaku dosa, erkadiola ras mindo pengalemi dosa ras ipepalem kegeluhenna. Kinijeran si tuhu-tuhu adi la kin lit buahna alu ngelakoken pembaharun diri labo pernah banci maba kegeluhen sekalak jelma rembak ras Dibata. Hal enda erkiteken pembaharun diri merupaken sada perbahanen nyata guna merubah perbahanen geluhna secara total ibas si la mehuli nari jadi kalak si mehuli iadepen Dibata.

III.             Pengkenaina

Kepemimpinen eme uga kita mereken pengaruh man kalak si ipimpin kita. Palas ibas kita mimpin lit ibas Esekiel3: 1-4, pendilo si rehna ibas Tuhan nari, tentu mereken penggejapen si mbages ibas hubungen pribadi ras Tuhan, berhubungen ras Tuhan labo terjeng kontak saja, tapi hubungen si sipatna intim. Janah uga kita banci ras-ras ngenanami kebersaman ras Tuhan. Labo bagi nina lirik lagu “senyum dan tawa hanya sekedar saja, sebagai pelengkap sempurnanya sandiwara”. Ras ise kita erteman nentuken cara kegeluhenta. Ibas mimpin, sukat-sukatna labo dirinta jine, tapi Tuhan Jesus. Uga kita banci ngelai Tuhan ibas persadan bagi kita sangana ngelai Jesus e jine. Uga kita banci muat keputusen tempa-tempa Jesus sangana ras kita. Emaka labo cara rukur manusia si ipelebe ibas sada persadan.

Kerehen kepala negara si mbuena sanga momen ceda ate eme kematen Bunda Theresa. Ngkai? Erkiteken ibas pelayanenna ilakokenna kerinana man Tuhan. irawatna korban perang alu nggejapken maka si sakit e eme Tuhan Jesus. Ise Bunda Theresa? Ia sekalak suster i Calcuta India si nggeluh ras kalak musil i India, tapi sanga ia ngelai alu pusuh si meteruk ukur, maka kerinana jadi mbelin kai si ilakokenna e. Emaka lakokenlah pendahin kitik ntah pe sederhana alu kekelengen si mbelin. Ula sekali-sekali sidahiken pendahin si kitik alu kekelengen si kitik. Ibas kepemimpinen eme uga kita banci memotivasi kalak sideban alu kita mereken usihen, bagi si ilakoken Raja Josia. Ije me kita banci ngelai alu kepuasen. Ngelai labo ndarami kehormaten, sebab kita kalak terhormat (bnd. Kej. 1: 26), la pe ipoles kita kalak terhormat. Labo ndatken ingan ibas pusuh manusia, tapi ndatken ingan ibas pusuh Dibata. Kalak si lenga terhormat, cenderung ndarami cara gelah ia ihamati.

Ibas pelayanen melala kalak mesera man aturenken, janah dahinta eme memenangken kalak si bage. Biasana hal sie terjadi erkiteken potensina la tersalurken. Hal enda biasa ras ijapa pe lit nge bage. Janah kunci jadi pemimpin si bersinergi eme kita nggo dung ras dirinta jine. Kita kalak terhormat, emaka kelasta lanai bo ndarami penghormaten, tetap uga kita banci makeken dirinta guna si mehuli. Erga dirinta tergantung seh ija kita mereken pengaruh si mehuli man kalak sideban. Jesus, soko gurunta 33 tahun Ia nggeluh mereken nanam ras erguna, tapi Ia mate nguda. Man kai kita mate metua tapi la erguna. Kuncina eme perjumpanta ras Jesus, adi nggo sigejapken perjumpan ras Kristus maka kerinana pasti berubah. Lanai jamanna kita ndarami kehormaten. Kepemimpinen mereken kegeluhen man kalak sideban, ras mereken pengaruh positif man kalak sideban.

Ibas tanggal 17 Agustus 2018 si peringeti HUT RI 73 tahun. Kemerdekan RI eme pembebasen bangsanta ibas penjajahen nari. Kemerdekan erbahanca lit kebebasen man banta nggeluh ibas teneng dingen dame. Me nggo kin kita merdeka? Lit singatakenca lenga, erkiteken lenga kita terbebas ibas kemusilen nari, ibas kebodohen nari, rsd. Gereja-gereja ras kalak Kristen Indonesia, radu ras ras temanna sada bangsa lalap erjuang guna keadilen, labo terjeng arah suara kenabian tapi pe arah perbahanen nyata. Pemimpin arah erbage-bage agama radu ras pernah ngingetken pemerintah gelah penyelenggaraan kekuasan lalap itempatken ibabo konstitusi. Gereja-gereja i Indonesia ertahun-ertahun erjuang gelah ibeneken kemusilen, terlebih ka adi kemusilen e isebabken struktur kekuasan si cenderung la adil. Pemerintah Indonesia memang memcapai kemajun si mbelin ibas bidang ekonomi makro. Iklaim maka kemajun ekonomi mencapai 6% setahun. Tapi, persoalenna eme kemajun makro e tetap denga kurang resonansina ibas kalangen bawah. Kerna piga persen jumlah kalak musil i Indonesia enda, lalap lalit angka si pasti. Kerna korupsi. Enda pinakit akut si menam lalit  ujungna. Bahkan, angka korupsi nggo seh kal luar biasana. Gundari praktek korupsi nggo terjadi ibas kerina lembaga pemerintahen. Hal sideban si jadi keprihatinen gereja terkait ras kebebasen beragama i Indonesia. Amin pe  UUD RI menjamin kebebasen e, ibas piga-piga daerah cenderung terancam. Sedih kal kita gedung gereja itutup secara paksa alu alasen lenga lit izin. Tapi, guna ngurus izin, labo persoalen sederhana i Indoensia enda. Lit nge si nggo ngurus izin lebih 5-10 tahun, tapi lalap lenga ndarat izinna. Alternatif sideban pe mesera ndaramisa. Hal enda me si erbanca perpulungen ngelakoken kebaktin i ruko-ruko. Tapi, sie pe icegah alu alasen maka bangunen e la sesuai ras peruntukenna. Sikap intoleransi labo karakter asli kalak Indonesia. Tapi, alu bengketna elemen-elemen radikalisme, relasi antarumat beragama e terganggu. Mungkin si enda erbanca erkiteken ketimpangen ekonomi.

Emaka arah enda iajuk kita kerina Mamre gelah ija pe kita ringan maba pembaharun si mbebasken masyarakat ibas kegeluhenn si la sikap, ibas mental si lemah, si bobrok, si korup. Jadilah pemimpin si erkiniteken ras si erkarakter bagi Raja Josia. Ula kal lasamken pemere Dibata kap kemerdekan enda, erkiteken secara logika labo mungkin bambu runcing ntah pe senjata tradisional sideban menang ngelawan senjata penjajah. Emaka tangarlah kita kerina. Ula melantar, sebab kesah ras dareh kap ndube tukurna kemerdekan enda.

Pdt. Andreas Pranata S. Meliala, S.Th

(GBKP Rg. Cibinong)