Suplemen PA Mamre ; Mazmur 52 : 10-11 : Tgl 05-11 Agustus 2018

Ogen  : Masmur 52: 10-11

 

Tema : “Erlajar ras Ngergai Pengalamen Saitun”

 

I.                   Kata Perlebe

Kegeluhen kalak si tek rusur kal iandingken bagi batang ntah pe sinuan-sinuan si harus mengalami tahap demi tahap: mulai ia ersuli, rurat, turah ras kedungenna erbuah. Enda me kegeluhen Kristen si normal eme kegeluhen si terus erbuah secara rohani. Ertina kegeluhen Kristen eme kegeluhen si terus berproses, dinamis, bergerak maju, aktif, la statis. Tapi mbue kalak si nggo ngikutken Tuhan ntah pe jadi Kristen selama ertahun-tahun kegeluhen kinitekenna la mengalami perubahen si berarti, lalit kemajun, tempa bagi “jalan di tempat”. Adi bage berarti kekristenanna nggo mate, amin pe secara “kasat mata” tempa teridah ngelakoken aktivitas kerohanian si mungkin la lebih sekedar bagi ndalanken rutinitas.

II.                Isi/Tafsiren

Judul Masmur enda eme ukumen man kalak jahat. Masmur enda termasuk cukup singkat/gendek, terjeng sebelas pasal. Masmur enda ibagi jadi piga-piga bagin, gelah mesunah guna ngantusisa. Bagin pertama: ayat 2-6, bagin peduaken: ayat 7-9, bagin peteluken: ayat 10-11. Si jadi oratenta eme bagin si peteluken: ayat 10-11. Ayat enda menggambarken kegeluhen kalak si benar. Singkatna kegeluhen kalak si benar e jadi sada perbedan ras kalak si jahat. Adi kalak jahat cenderung ia kubas kematen, maka kalak si benar justru sebalikna: ia pasti nggeluh. La terjeng nggeluh saja, tapi nggeluh erkecukupen. Kegeluhen si mehuli e iandingken pemasmur ijenda bagi batang saitun si meratah. Meratah e tanda kegeluhen ras pengarapen. Enda kerina terjadi, erkiteken ia nggeluh ibas Dibata, iadepen Dibata, bahkan ibas rumah Dibata. Ibas ayat 10b, banci si idah kontras si seh kal unikna antara perbahanen kalak jahat ras kalak benar. Ibas ayat 10 enda si idah perbahanen kalak si benar, tek ia kerna kekelengen Dibata. Sie jelas beda ras ayat 9, erkiteken kalak jahat e lebih tek ras mengandalken ertana, kinibayakenna, dirina jine, ras la mengandalken Dibata. Dibata tersingkir erkiteken kalak jahat e lebih mbue akapna ertana. Kedungenna, erkiteken iperhadapken ibas kegeluhen kalak si benar, kalak si benar terjeng lit ibas ia sikap nggeluh si lalap ngataken bujur man Dibata. Terdorong ia ngelakoken hal sie ibas kegeluhenna, erkiteken ia sadar ras ngidah maka Dibata me si bertindak ngelakoken si enda kerina. Sura-surana eme mpebelinken gelar  Dibata iadepen kerina kalak si bujur.

III.             Pengkenaina

Kegeluhen kiniteken kalak si tek seharusna bagi batang saitun, jenis batang si tetap nggeluh seh ribuan tahun dekahna. Enda ngerana kerna kesetian ngikutken Tuhan. Reh setiana kita man Tuhan, reh rembakna kita ras Ia, reh buena gegeh si ibereken Dibata man banta reh ngasupna kita ngalaken perbeben kegeluhen enda. Emaka kita harus bagi batang saitun si tersuan ibas rumah Tuhan, sekali tersuan pasti tetap tersuan seh rasa lalap. Urat batanga saitun tuhu-tuhu megegeh seh maka la mesunah guna ngeruahsa ntah ipindahken ku ingan sideban, enda me sebabna banci ia nggeluh ibas waktu si cukup ndekah. Batang saitun eme batang si menghasilken minak si kin ibas paksa sie rusur ipake guna minaki raja, selain guna keperlun si tep-tep wari, ija kerina kalak merlukenca. Kegeluhen Kristen eme kegeluhen si harus menghasilken buah si mehuli si banci inanami jelma si nterem, jadi pasu-pasu man kalak sideban.

Apakah kalak si nggo Lansia/Saitun banci denga berkarya ras berprestasi? Tentu saja banci! Tapi mbuena tapina. Banci si idah contoh. Mungkin ibas lingkungenta lit Lansia/Saitun si nggo mbengkung, tapi tetap denga ngelakoken pendahin rumah secara penuh waktu tiap wari. Ilakokenna bage labo erkiteken la ngasup ia nggalari pembantu, tapi erkiteken memang kin ngasup denga ia. Alu bage, tiap wari ia tetap denga berprestasi. Piga-piga Kitap Masmur isuratken piga-piga sastrawan si nggo Lansia. Musik klasis si rusur ibegi kita mbue kal igubah komponis-komponis si nggo menam lanai erpengidah. Pengabdian Mahatma Gandhi, Bunda Theresa, ras Nelson Mandela, justru seh puncakna ibas umur sekitar 80 tahun. Martha Graham tetap denga mencipta, menggubah, ras ngajar tari/landek seh umur 80 tahun. Paus pe biasana ipilih antara calon-calon si umur 80 tahun. Emaka, ise singatakenca kalak si nggo lanjut umurna dahinna terjeng pekesahken saja, lanai erdahin. Ibas bidang si berbeda ras cara si berbeda, kalak si nggo lanjut umurna tetap denga banci berkarya ras berprestasi. Mutu karya ras prestasi e lenga tentu lebih rendah, bahkan banci lebih meganjang mutuna. Selain erlajar arah batang saitun, kita pe iajuk erlajar arah batang kurma, erkiteken batang kurma justru lebih bermutu buahna sanga batang e nggo metua (bnd. Msm. 92: 13-16). Perdiatekenlah, erbuah seh ngayak metua tentu e lit tujunna. Tujunna eme lit ibas 2 Korinti 4: 16 eme guna mberitaken maka TUHAN e bujur. Erbuah seh ngayak metua imaksudken gelah terus ersaksi alu ranan ras perbahanen man sinursur maka Tuhan e tuhu-tuhu bujur. Karya ras pendahin tentu la seri ras kalak si nggo lanjut umurna. Tapi, uga kin pe harus erbuah. Arah enda me njemba kita gelah erlajar arah pengalamen orangtuanta si nggo lanjut umurna ntah pe si nggo bengket kubas kategorial Saitun. Erkiteken ibas Sidang Majelis Kerja Sinode (SKMS) GBKP tahun 2016 gelar Lanjut Usia ibas GBKP nggo itetapken jadi Saitun GBKP. Saitun sebage lembaga pelayanen kategorial GBKP bengket ibas bidang koinonia Moderamen GBKP, lanai bagi si gelgel e ibas bidang diakonia Moderamen GBKP. Ertina arah enda pe si idah maka orangtuanta enda pe tuhu-tuhu semangat ia ndalani kegeluhen. Man sampaten nge situhuna orangtuanta si nggo Saitun enda tapi erkiteken semangatna ia ka nge salah sada kategorial si man usihen bas GBKP enda (salah sada si aktifna).

Pdt. Andreas Pranata S. Meliala, S.Th

(GBKP Rg. Cibinong)