PA MAMRE, Tgl 22 – 28  Juli 2018

(Keselamaten: Konfesi GBKP)

Ogen      :  Pilipi  2 : 12 – 15

Tema     : Njaga ras Ncidahken Keselamaten

Tujuan    : Gelah Mamre :

         1.                   Meteh maka ia enggo ndatken keselamaten.

         2.                   Ngasup ncidahken biak-biak kalak si enggo iselamatken.

Metode  : Diskusi

I.              Kata Penaruh

Ise kin la perlu selamat? Tentu saja kerina manusia perlu selamat. Kai pe si irencanaken, iprogramken ras idalanken sesekalak tujunna eme gelah selamat. Misalna ibas erdahin, sekolah, nekolahken anak, ngajarisa ras ngepkepsa, ersembah ku Tuhan i gereja, ngelai, rst. Selamat ibas nggeluh, selamat ibas benana, pertengahen ras seh ku pendungi kegeluhen. Selamat ndiher kal ertina ras mejuah-juah, malem ate, ras ketuahen (Indonesia: ‘Salam sejahtera’). Uga kerna keselamaten si tuhu-tuhu? Banci kin manusia nelamatken dirina alu usahana? Kai si erbahanca manusia ndatken keselamaten si tuhu-tuhu? Mari erlajar kita arah Kata Dibata berngi enda.

II.         Isi/ Tafsiren

Paulus nuratken surat Pilipi tupung ia ipenjaraken erkiteken Kristus. Aminna ia ipenjara tapi la engkurangi keriahen ukurna ras kinitekenna man perpulungen. Kulana banci ibatasi besi tapi ukur ras pusuhna la terambati ibas mberiteken kerna keselamaten ibas ras arah Tuhan Jesus.

‘Emaka, o teman-temanku, bagi tetap ikutkenndu katangku, asum aku ras kam, terlebih pe genduari ikutkenlah katangk asum ndauh ibas kam nari. “Tetaplah erdahin alu mbiar dingen gentar enggenepi keselamatenndu” (ayat 12). La meriah ukur Paulus adi perpulungen ngikutken Tuhan Jesus tupung ia ras-ras ngenca. Emaka iajukna perpulungen e tetap patuh man Kristus terlebih tupung Paulus la adir i tengah-tengahna. Tole Paulus ngajuk perpulungen gelah tetap erdahin nggenepi kesesalamtenna. Keselamaten kalak si tek man Kristus labo erkiteken usahana, gegehna ras kengasupenna. Kalak si tek enggo selamat arah kinitekenna man Tuhan Jesus. Kita selamat erkiteken perkuah ate Dibata. Selaku kalak si enggo selamat emaka kalak si tek arus njaga keselamatenna eme alu tetap ndahiken dahin-dahin si mehuli sebage wujud keselamaten si enggo alokenna. Kalak si tek ndahikennca alu tutus (mbiar dingen gentar).

“Sabab Dibata pe tetap erdahin ibas kam gelah kam nggit dingen ngasup ndalanken si ngena ateNa” (ayat 13). Enda me tole penjelasen maka keselamatenna erkiteken Dibata jine. Dibata tetap erdahin ibas kita guna ndalanken si ngena ateNa si enggo nelamatken kita.

“Dahikenlah kerina dahin alu la jungut-jungut ntah nimbak” (ayat 14). Emaka ibas kita ndahiken dahinta ras ndalanken si ngena ate Dibata eme naksiken perkuah ate ras keleng ateNa la banci kalak si tek jungut-jungut apai ka nimbak Dibata. Tujunna eme gelah kalak si tek la ersalah dingen la erpandangen selaku anak-anak Dibata si nggeluh i doni kalak si jahat dingen erdosa. Alu bage geluh kalak si tek ersinalsal bagi bintang-bintang nerangi langit tupung berngi wari i tengah-tengah doni enda (ayat 15).

III.          Aplikasi/ Pengkenaina

1.             Kerina manusia ngarapken  selamat ntah pe keselamaten. Emaka kerina ndarami gelah selamat. Selamat secara doni bage pe selamat secara rohani. Selamat secara kula ras selamat secara tendi ras jiwa. Alu kata si deban selamat secara kuh (utuh/ menyeluruh). Labo lit ise pe manusia rusaha ndarami ntah pe ndatken si nanggel ras cilaka. Lit kalak  erpengakap maka keselamaten e banci idatkenna alu perbahanen ras usahana jine. Kegiaten, persembahen, penembahen, upacara, ritual, perbahanen si mehuli guna jadi pahala, rsd iban manusia guna selamat. Si enda ndai kerina ndatken selamat terjeng nggeluh i doni saja ngenca. Keselamaten si bage keselamaten si kentisik ngenca dingen la kekal. Keselamaten si tuhu-tuhu labo pernah idatkenna alu kerina upayana.

2.             Kita selamat labo arah gegehta, beluhta, perbahanenta tapi erkiteken perkuah  arah nuruh ras mereken AnakNa Sitonggal eme Jesus Kristus (Joh. 3:16, bnd Markus 16:16, Ep. 2:8, 9). Keselamaten e inisiatif Dibata man manusia perdosa. Keselamaten sialoken bas dibata nari arah kiniteken ras mereken buah ibas geluh si mbaru sue ras Kata Dibata. Buah si iasilken kalak si tek e sebage asil keselamatenna dingen sebage pengataken bujurna man Tuhan. Enda me isi Konfesi (Pengakuan iman GBKP). Kita si enggo tek man Tuhan Yesus, njadiken Ia sebage Tuhan dingen Juruselamatta enggo selamat. Yakinlah, bahwa kita enggo selamat. Kita si tek pasti selamat. Ulanai sangsikenndu keselamatenndu e.

3.             Tema: “Njaga ras Ncidahken Keselamaten”. Erkiteken kita enggo selamat arah kinitekenta man Kristus Jesus, emaka dahinta njaga ras encidahken keselamatenta. Geluhgta kalak si tek eme geluh ibas rangka njaga keselamaten si enggo seh ras enggo si aloken. Bagi petinju, kita e sebage juara bertahan. Lanai kita ngerebut juara (keselamten) e. Sabab kita enggo juara. Sicidahken bahwa kita enggo iselamatken arah perukuren, pengerana, perbahanen ras pendahinta. Geluhta lanai ikuasai aru ate, mbiar, rangap kerna geluhta si gundari bage pe si pepagi. Seh maka lanai kita tenang, lanai kita rehku perpulungen ras ersembah man Tuhan. Jaga dingen cidahken keselamatenta e sabab banci kari itangko iblis alu nguji ras nggoda kita.  

4.             Keselamaten si enggo si aloken la ngadi ibas kita ras ula ngadi ibas kita. Ate Tuhan maka kerina min kalak selamat.  Emaka leselamatenta e arus si terusken man kalak si deban. Kita idilo lako nggeluh ibas keselamaten e alu encidahken buah keselamaten si enggo si aloken. Enterem denga kal kalak lenga ngaloken Jesus Kristus jadi Tuhan ras Juruselamatna. Emaka mari si cidahkan keselamatenta e man bana. Si peseh dingen si saksiken Tuhan Jesus Juruselamatta e man kalak si deban.

5.             Lit telu si tetap si arus si dalanken  eme : erkiniteken man Tuhan, erpengarapen man Dibata ras erkeleng ate man kalak si deban, janah si mbelinna ibas si telu e, eme engkelengi kalak si deban (I Kor. 13:13). Arah nehken kekelengen tole si cidahken keselamtenta e man kalak si deban. Kiniteken si erbuahken kekelengen mabai kita seh ku pengarapenta eme surga ingan kesenangen si tuhu-tuhu si ipadanken Tuhan man anak-anakNa. Buah-buah si iarapken Tuhan bas kita nari eme: meteruk ukur, perkuah ate, perkeleng, erdiate, kepate, erpemere, erdame, rst. ‘Tapi Aku nge si milih kam janah nuruh kam lawes gelah erbuah meramis, eme buah si tahan seh rasa lalap’ (Johanes 15:16a). Asilken dage buah si meramis ras buah si tetap. Keselamaten si tuhu-tuhu tetap jadi sekerajangenta. Amin.

Pdt. Juris Tarigan, MTh (GBKP Depok – LA; 081316879945)

PA MAMRE, Tgl 15 – 21  Juli 2018

(Pendidikan)

Ogen     :  Kuan-Kuanen  8 : 10 – 13

Tema    : Ngergaken Pemeteh

Tujuan   : Gelah Mamre : 1. Meteh erti ras pentingna pemeteh ergan asa pirak ras emas murni.

                                   2.Ngasup ndarami ras erjuang ndatken pemeteh ras ngajarkenca man isi jabu.

Metode  : Diskusi

I.           Kata Penaruh

Tuntutlah ilmu sampai ke negeri Cina”. Ungkapen enda mereken sada pengangkan maka erlajar, ndarami ras ndatken pemeteh e penting ras perlu kal. Ku ingan si ndauh pe itelas gunda ndatken pemeteh. Arah kai pe  banci jadi erlajar, ija pe banci erlajar, ras man ise pe banci erlajar ras ndatken pelajaren. Erlajar ras nggit erlajar eme salah sada erti nggeluh. Erlajar segedang nggeluh (Long Life Education) segelah si dat pemeteh ras kepentaren si erguna la saja man banta tapi pe man kalak si deban. Arah erlajar, nggit dingen tutus erlajar me kita ngergaken pemeteh. Si eteh pemeteh e seh kal perluna, pentingna ras ergunana. Tuhan mereken otak man banta gelah lit akal budita. Arah nggarut ras ngembangken akal budita me maka lit pemeteh dingen tambah pemetehta. Pemeteh e erguna ku kegeluhen si gundari bage pe si pepagi.

II.         Isi/ Tafsiren

Kuan-Kuanen 8:10-13 eme bagin ibas Kuan-Kuanen 8 secara keseluruhen. Kuan-Kuanen 8 enda eme ‘Pujin nangdangi kepentaren’. Secara garis besar Kuan-Kuanen 8 ngerana ras ngajarken man banta 3 hal kerna kepentaren. Sipemena, kepentaren erlebuh erdilo man manusia (ayat 1-5). Kepentaren ndilo manusia gelah ndatken ras ngaloken kepentaren e. Ibas zaman si adi/ nai, kepenteren erdilo ibas 3 ingan eme: i datas uruk i tepi dalan si biasana ije ipajekken ingan ersembah, i serpang-serpang ingan jumpa kalak gawah-gawah ras si erminaga ercakap ras ertransaksi, bagepe i pintu gerbang kuta ingan bisnis kuta ras pengadilen ilakoken. Kepentaren e ndilo kerina jelma, la lit si tading-tading: jelma manusia, si ngiani doni, si lenga dewasa, ras kalak si lenge. Sipeduaken ngerana kerna guna/ kegunaan kepentaren (ayat 6-9, 12). Kepentaren e kap kata si meherga janah payo (ayat 6). Kepentaren e kata tuhu kerina. Nembeh kal ate kepentaren nangdangi kata guak (ayat 7). La ibabaina ku si papak (ayat 8). Kepentaren e pemeteh ras njadiken kalak jadi pentar (ayat 9). Kepentaren mereken pengertin si mbages, erbanca kalak cerdik, mehuli kal pemeteh idat arah kepentaren e (ayat 12). Sipeteluken (enda me si jadi ogen bas PA ta) ngajuk kita gelah ngaloken ras ngergaken kepentaren (ayat 10-12). Kepentaren e ergan asangken pirak, lebihen asangken emas murni (ayat 10). Ia ergan asangken permata, janah la terbandingken ras kai pe si iakap manusia meherga (ayat 11). Ibas kepentaren lit pengertin si mbages. Kepentaren e pe kecerdiken. Kepentaren e pemeteh si mehuli (ayat 12). Erkemalangen man Tuhan ertina erciga ate man kejahaten, si megombang ras ukur meganjang. Malang man Tuhan tole ertina ernembeh ate kempak lagu langkah si jahat dingen ranan si la tuhu (ayat 13).  

III.          Aplikasi/ Pengkenaina

1.             Geluh ras kegeluhenta eme proses erlajar ras terus erlajar. Erlajar la ertammat-tammat. Erlajar subuk secara formal (teoritis) bage pe erlajar non-formal/ informal (pengalamen). Kepentaren e ndilo kerina jelma, la lit si tading-tading: diaki-diberu, nguda-metua, anak musil-bayak. Erlajar kerna pemeteh, terlebih erkemalangen man Dibata. Guna ndatken pemeteh, si pemena si la banci la lit ibas kita eme mehamat dinger erkemalangen man Dibata (Kuan-Kuanen 1:7a). Dibata kap sumber kepentaren. Ibas Ia kap ringan kepentaren. Kepentaren e tangkas teridah alu sempurna ibas diri Jesus Kristus, si belinen asangken Salomo (bnd, Lukas 11:31). Kristus Jesus kap kepentaren kalak si tek (1 Korinti 1:30). Kristus kap kunci si nalangi kerina erta-erta kepentaren ras pemeteh Dibata si terligen (Kolose 2:3). Mari dage si tambahi kerembakenta ras Kristus Jesus, ketedehen ateta ras ketergantungenta man baNa gelah tamah pemeteh dingen kepentarenta.

2.             Asal nggit erlajar, tutus dingen fokus erlajar pasti kita erpemeteh. Emaka musti si peturah bas ukur ras pusuhta muas lalap lako erlajar. Bahanlah pemeteh e la ermbue-mbuesa bas dirita. Ula metersa kita merasa puas ras cukup kerna pemetehta. Metersa puas ras bias kerna pemeteh erbahanca kita lanai nggit erlajar, semangat erlajar ndarami ras engkali pemeteh. Emaka lanai kita berkemang. Sedar kerna perluna ras pentingna pemeteh musti lalap si pegara bas dirita. Doni enda iban Dibata jadi sekolah, universitas gelah kita erlajar.

3.             Darami, legi ras buatlah pemeteh e sebab mbelin kal gunana ras ulihna. Ergan kap  pemeteh asangken pirak, emas murni, permata. La terbandingken ras kai pe si akap  kita meherga, misalna: rumah, villa, apartemen, surat-surat berharga, saham, usaha, rsd. Ise kin kalak si la akapna meherga pirak, emas, permata, ras kerina si enggo ibelasken i datas ndai? Tentu kerina kita meherga si akap. Ibas si e Kata Dibata ngataken maka lit denga ter-regan asangken si ndai eme pemeteh ras kepentaren. Kepentaren erguna secara pribadi bagepe secara keluarga. Kepentaren erguna ibas kegeluhenta sewari-wari, ibas jabuta, pendahinta, erteman/ ergaul, ermasyarakat, erbangsa ras ernegara. Kepentaren ngajari kita menempatken dirinta alu payo ibas interaksita. Ngajari kita ertimbang alu payo, erbelas alu payo, erdahin alu payo, ras muat keputusen si pas. Ulihna tentu meriah si akap, dame dingen malem ateta.

4.             Ula kal kita bagi katak iteruh berku. Akapna ia mbelin man bana janah kitik akapna doni enda. Jadilah kita bagi sada perahu ntah pe kapal i tengah-tengah samudera. Kujapa pe penatap la lit tampukna. Arah mbuka perukuren nge maka nggit kita erlajar, nambahi pemeteh ras ngergakenca. Arah erlajar, erlajar ras terus erlajar nge maka luas/ mbelang wawasenta.  “Kedungenna o senina-seningku, ukurilah kerna si mehuli, eme kerna si bujur, mulia, benar, bersih, mejile ras kerna kerina si patut ipuji” (Pilipi 4:8). ‘Brain Management’: kita baru mengaktifkan 1% otak kita. Ada 99% kapasitas otak kita yang belum aktif. Kita seperti ‘a sleeping giant’. So kembangkanlah kemampuan berpikir kita. Namun jangan sampai gara-gara berpikir, berpikir yg tidak benar dan berpikir negatif kita jadi sakit. Ingat: maag, diabetes dst, terjadi erkiteken perukuren si salah.

5.             Kenca si datken pemeteh, ula lupa mpesehsa ras ngajarkenca man ndehara, anak ras kemputa. Pemetehta e la kita ngenca perlu tapi isi jabuta pe. La terjeng lit kesempaten ngenca kita ngajarkenca man isi jabuta, tapi mari si sempatken ngajarkenca. “Ajarkenlah e man anak-anakndu. Persingetilah rusur, subuk sanga kam i rumah, ntah sanga kam i bas perdalanen, subuk sangan kam ngadi-ngadi ntah sanga kam erdahin” (Ul. 6:7). Pemeteh ras kepentaren e njaga kawali dingen nelamatken kita ras isi jabuta kap.

Pdt. Juris Tarigan, MTh (GBKP Depok – LA; 081316879945)

PA MAMRE, Tgl 08 – 14  Juli 2018

(HUT ALPHA OMEGA Ke-30)

Ogen      :  Johanes  9 : 1 – 7 

Tema      : “Ngaloken ras Ngergai Disabilitas”

Tujuan    : Gelah Mamre :

1.                   Meteh maka disabilitas ncidahken kuasa Dibata.

2.                   Ngasup ngergai ras nampati kalak disabilitas.

Metode  : Aksi

I.           Kata Penaruh

Adi lit si idah ntah jumpa kita ras sekalak jelma si lit kekurangenna subuk secara kula nah pe mental (disabilitas) uga penilaianta? Kai nge si lit ibas ukurta, uga menurutta kerna kekurangen ntah pe keterbatasenna e? Man banta si lenga pernah ndahi ingan pelayanen disabilitas i Yayasan Kesejahteraan Penyandang Disabilitas (YKPD) Alpa Omega, Kabanjahe ntah ingan si deban si seri pelayanena. Kune si dahi yakin aku maka erbage tanggapen, perukuren ras penilaianta kerna kalak disabilitas enda. Nai adi idah kenca ntah tubuh sekalak anak disabilitas ibas sada jabu, minter si enda ikawitken ras dosa, kesalahen si mbelin ntah mesangat si pernah iban ntah pe terjadi. Dosa nini-apung susur man anak kempuna. Lit kenca tubuh anak disabilitas, minter kalak salih jadi malekat Dibata lako nggargari ras ncubaken ndaftarken dosa si lit ibas ia, bas orangtuana ntah ninina. Gundari pe megati denga nge si begi perukuren ras tanggapen si bagenda nangdangi disabilitas. Jarang kalak ngidah ntah rukur ras nilaisa alu cara si deban. Guna ngidah alu payo kerna disabilitas, mari erlajar kita arah Kata Dibata.

II.         Isi/ Tafsiren

Tupung Tuhan Jesus erdalan ras ajar-ajarNa i Jerusalem, kerina ia ngidah sekalak pentang. Ikataken alu jelas bas ayat 1 maka ia pentang tangtang tubuhna nari. Ngidah kalak pentang enda ajar-ajar Jesus alu spontan nungkun man Tuhan Jesus selaku Guruna. Nina ajar-ajar e, “Dosa ise nge erbahanca maka ia pentang tubuhna nari? Dosana ntah dosa orangtuana?” (ayat 2). Kepeken penungkunen ajar-ajar  enda semal kal jadi penungkunen ras perukuren jelma si enterem. Penungkunen enda mewakili penungkunen ras perukuren manusia secara umum. Perukuren si lit bas jelma si enterem ngataken maka anak si tubuh ibas disabilitas jadi erkiteken ia erbahan dosa ibas bertin nandena. Lenga pe ia tubuh ras lenga pe ia mbelin nggo ikataken ras ivonis ia erbahan dosa bas berin nari. Janah adi ia la erdosa tapi tubuh ia bas disablitas e berarti erkiteken dosa orangtuana.

Pengidah Tuhan Jesus ras ajar-ajarNa la seri. Si enda tangkas si idah arah jawapen Jesus. Nina, “Ia pentang labo erkiteken dosa dasana bagepe labo erkiteken dosa orangtuana, tapi gelah teridah kuasa Dibata ibas geluhna” (ayat 3). Tuhan Jesus mpekena ras mpepinter perukuren ajar-ajar ras manusia secara umum kerna disabilitas. Labo salah si pentang e ras labo kepeken salah ntah dosa orangtuana. Tapi gelah arah si pentang terjadi sada kesempaten man Dibata lako encidahken perbahanenNa si mbebasken ( bnd. 11:4). Jenari ibas paksa si kentisik, Jesus nuriken kerna missiNa ras ajar-ajar eme lako ndahiken persuruhen Dibata. Tupung terang wari me maka banci erdahin. Terang wari eme kesempaten lako erdahin. Adi enggo gelap lanai kap lit kesempaten erdahin. Janah tupung Jesus selaku manusia si isuruh Dibata i doni enda denga me maka arus Ia ndahiken persuruhen BapaNa e (ayat 4,5 ).

Kenca dung iturikenNa si enda emaka ilakokenNa aksiNa. ibenakenNa alu ndauk taneh si enggo leben iciduriNa. Jenari ndampelkenca ku mata kalak pentang ndai. Tole isuruhNa gelah kalak pentang e lawes ku kolam Siloam si ertina “Isuruh” lako erduhap. Ilakoken kalak pentang e kai si isuruh Jesus. Asilna erpengidah ia. Lanai ia sekalak disabilitas (ayat 7). Arah ayat enda penulis Injil Johanes ngataken maka arah Jesus si isuruh (diutus dan diurapi)  Dibata ngenca tuhu-tuhu ngasup mpepalem ras ndemi (kepenuhan) man doni enda.

III.       Pengkenaina/ Aplikasi

1.         Cara rukur ras penilainta khususna nangdangi kalak disabilitas arus si ubah ras sipelimbarui. Baik kita si lit bas jabuta si disabilitas, bas jabu sangkep geluhta ras pe ibas jabu kalak si deban. Ntah Ulanai si pake label si ndekah eme erkiteken dosana, dosana orangtuna ntah pe dosa nini-ninina. Cara rukur ras perukuren si male arus iganti alu cara rukur si mbaru eme si sue ras Kata Tuhan Jesus. Lanai kita ndarami dosa ras kesalahen kalak disablitias ntah pe keluargana tapi ndarami kai sura-sura ras peraten Dibata.

2.         Kita ras senina turangta si disabilitas seri ras la erndobahen i lebe-lebe Dibata. Labo ganjangen derajat ras martabatta asangken disabilitas. Doni ras aturen doni ngenca erbahanca lit perbedan manusia. Emaka arus si aloken ras si ergai kalak disabilitas. La banci si pekitik, si lecehken, si bully rsd. Ula mela adi lit disabilitasta. Tetaplah percaya diri. Bagepe ula mela ras ula buniken adi lit bas jabuta si disabilitas. E erbahanca ia susah ras mesera dingen la berkembang alu mehuli ngenca. Nenlah Nick Vujicik si banci ipake Dibata alu luar biasa gia ia sekalak disabilitas.

3.         Tupung terang denga wari ertina tupung kita nggeluh denga dingen ngasup, marilah si pake kesempaten e guna ngelai, nampati ras jadi pasu-pasu man kalak memerluken khususna man disabilitas. Lit pagi waktuna lanai lit waktuna. Lita pagi paksana ntaku sampati sesamaku, disabilitas e ateta lanai banci si sampati. Enda banci erkiteken nggo terlambat, misalna: enggo ia metuasa, enggo sakit mekelek ia, ntah enggo mate ia. Atau kita pe banci ka leben mate asangken ia. Tuhan mindo pertanggungjawapenta nangdangi gegeh, pemeteh ras talenta si iberekenNa man banta (bnd Roma 14:12).

4.         Tuhan la mindo kita ngubah terjeng mindset ta ngenca kerna disabilitas. Bagepe labo ka terjeng merasa kasihan ras berbelaskasihan ngenca. Bagi Tuhan Jesus la terjeng mpepinter cara rukur ras perukuren si nggeduk ajar-ajarNa tapi mpepalemsa, bageme pe kita. Jesus Kap Terang doni (Joh 8:12). Janah kita si tek man baNa ijadikenNa jadi sira ras terang doni (Matius 5:13-15). Mari dage kita pe jadi terang ras penampat man kalak si deban, termasuk disabilitas. Tuhan Jesus mindo aksi, perbahanenta si nyata nangdangi disabilitas. Si pindoNa gelah kita erkeleng ate ras ngergai disabilitas e. keleng ate e arus alu perbahanen. Kita si lebih secara kula ras mental asangken disabilitas mari si lakoken kai si banci si lakoken man disabilitas.

5.         Bahanlah ras lakokenlah gelah arah kita ermulia Dibata. Ibas kita erdiate, erkeleng ate ras nampati kalak si deban termasuk disabilitas ermulia kap Dibata. Dage, labo erkiteken Tuhan Jesus langsung erbahan mujizat nangdangi disabilitas maka ermulia Dibata. Tapi pe arah perukuren, pengerana ras perbahanenta si mehuli dingen payo nangdangi sesamata ije Dibata ipermuliaken (Matius 5:16).

Pdt. Juris Tarigan, MTh (GBKP Depok – LA; 081316879945)