PA MAMRE, Tgl 1 – 07  Juli 2018

(BEASISWA MAMRE)

Ogen      :  Masmur 112 : 5 – 9

Tema      : Mamre Simelumbar Mere

Tujuan    : Gelah Mamre :

1.       Meteh maka biak Mamre eme melumbar mere.

2.       Ngasup mere alu meriah ukur.

Metode  : Aksi

I.           Kata Penaruh

Nggeluh ermalem ate ntah pe ndatken pasu-pasu eme sura-sura, arapen ras perayaken umumna kerina jelma. La ketadingen Mamre, perbapan GBKP pe ersura-sura gelah nggeluh ermalem ate. Bahken seh ku nggeluh malem kal ate. La lit jelma, la lit perbapan ersura-sura ras ndarami gelah nggeluh mesera dingen rate mesui. Bicara lit kin pe enggo banci ibaba ku dokter jiwa gelah iperiksana. Kerina si ipikirken kita, si isuraken, si irencanaken, si idahiken ras usahaken kita tujunna gelah si dat malem ate. Saja megatisa nggeluh ermalem ate e ibatasi kalak terjeng erta, duit ras kinibayaken ngenca. Adi mbue kenca serpi ras kebayaken jelma, minter ikataken atau icap ia sebage kalak si ermalem ate. Nggeluh ermalem ate la kepe terjeng melala duit, mbue kiniliten ras kebayaken materi ngenca. Pustaka Si Badia ngajarken dampar si deban kerna kemalemen ate janah ituduhken dingen iajarkenna kerna kemalemen ate si tuhu-tuhu. Kemalemen ate si tuhu-tuhu idatken ras ialoken kalak si mehamat ras erkemalangen man Dibata. Uga maksudna kalak kalak si erkemalangen man Dibata nge si ndatken kemalemen ate si tuhu-tuhu? Guna lebih jelas dingen tangkasna, marilah si pelajari dingen si siksiki Kata Dibata arah PA ta.

II.         Isi/ Tafsiren

Erkemalangen man Tuhan ertina tek man Tuhan, erpengendes man baNa, ernalem ras erpengarapen tetap man baNa. Erkemalangen man Tuhan seri ertina ras ermeriah ukur ngikutken perentah-perentahNa. Erkemalangen man Tuhan ertina lanai mengandalken gegehna si sada, lanai perayakenna terjeng doni saja ngenca tapi terlebih man Tuhan. Kalak si ngaloken Jesus Kristus jadi Tuhan ras JuruselamatNa ialokenna kap biak Dibata. Biak-biak Dibata e me: bujur, adil, perkuah dingen perkeleng (ayat 4) jadi biakna si mbaru. Emaka kalak si erkemalangen man Tuhan igelari pe kalak bujur, adil, perkuah ras perkeleng. Kita bujur labo erkiteken kebujurenna, tapi kebujuren Dibata ntah pe Dibata si bujur ras benar si erbahanca ia jadi kalak bujur. Emaka man kalak si enggo ngaloken biak Dibata enda ndai me maka ersinalsal terang ibas si gelap nari.  

Kalak bujur teridah arah melumbar mpepinjamken, melumbar mere. Malem kal atena erkiteken melumbar ia pepinjamken dingen bujur ibas kerina urusen (ayat 5). Kalak bujur la ngukurken dirina ras sekerajangenna saja. Erkiteken si e kalak bujur asa ndigan pe labo ia guling, ia tetap iinget rasa lalap (ayat 6). Kalak bujur la perbiar. La ia mbiar ngaloken berita si la mehuli sabab kinitekenna paguh dingen ernalem ia man Tuhan (ayat 7). La ia mbiar dingen la aru atena, tek ia maka talu kap imbang-imbangna (ayat 8). Erkiteken ia mbiar man Dibata emaka lanai ia mbair man kai pe. Payo kal kata enda. Ise si mbiar man Dibata maka lanai perlu mbiar man kai pe si banci jadi bas doni enda. Sabab Tuhan enggo kap naluken kerinana. Sebalikna si la mbiar man Dibata, geluhna dem ibas kebiaren. Mbiar ia megi berita si la mehuli, aru atena kerna geluhna, ras mbiar ia talu ibahan imbang-imbangna. Melumbar pemerena man kalak si kekurangen. Kinibujuren kalak bujur lalap lit, ia ermulia dingen ihamati (ayat 9).

III.          Aplikasi/ Pengkenaina

1.             Payo kal maka kalak si erkemalangen man Tuhan eme kalak si ketuahen (ipasu-pasu Dibata). Si enda enggo ipetangkas Tuhan Jesus ibas khotbahna i uruk (Matius 5:3-11). Nina Tuhan Jesus, “Ketuahen kalak si nggejap maka ia labo kai pe ertina i lebe-lebe Dibata; sabab man bana me Kinirajan Surga” (Matius 5:3). Adi ateta nggeluh ketuahen (ermalem ate, ipasu-pasu Dibata mari dage erkemalangen tetap man Tuhan. Dibata rembak kap ras kita si erpengendes ras ernalem man baNa. Dibata si nemani ras nampati kita katawari paksa pe. Dibata me si jadi ulu geluhta. Lanai gegehta, beluhta ras pemetehta saja.

2.             Kita si erkemalangen man Tuhan, biakNa jadi biakta. Kita jadi kalak bujur ras benar. Kalak bujur teridah arah nggit mere ras melumbar mere. Kita mere erkiteken tek kita ras si gejap pe maka Dibata enggo leben mere man banta. PemereNa si mbelinna man banta eme keterkelinenta ibas ukumen si rasa lalap nari eme kematen pertendin (Joh 3:16). Janah la terjeng pasu-pasu pertendin ngena iberekenNa tapi pe pasu-pasu jasmani guna keperlun kegeluhenta si tep-tep wari.

3.             Sebage anak-anak Dibata si mehuli milikilah “mental berkelimpahan” bas kita. Ula “mental kekurangan” si asuhi bas geluhta. Mental kelimpahen me si erbahanca geluhta ngasup ngataken bujur man Tuhan, ngasup muji ras mpermuliaken Dibata. Mental berkelimpahan me si ngena ate Dibata dingen si ipindoNa bas kita nari. Mental berkelimpahan  erbahanca kita ngasup mere bagi si ngena ateNa. Mental berkelimpahan erbahanca ersuruh ukurta mere ras melumbar dingen meriah pe si akap mere man kalak si perlu, membutuhken (2 Korinti 9:7a).

4.             Lit program Mamre si enggo si sepakati bersama si igelari “Beasiswa Mamre”. Arah beasiswa Mamre enda me kita Mamre nampati anak-anakta bas gerejata GBKP sedoni  si la mampu orangtuana nekolahkenca. Tutus kal atena sekolah, lit kengasupenna erlajar gelah erpemeteh. Tapi tertobeng sekolahna perbahan la ngasup orangtuana si mupus ia. Ibas si e Tuhan nuruh kita lako ndudurken tanta guna nampati ia. Bukalah dompetta bereken penampatta. Malem me ateta ibas kita nggit mere lako nampati arah beasiswa Mamre enda. Malem ateta banci kita nampati. Malem ateta kita jadi saluren pasu-pasu arah pasu-pasu si enggo ialoken kita. Malem ateta adi anak-anakta si man sampaten e pagi seh sekolahna, erpemeteh ia, pentar ia janah datna pendahin si mehuli. 

5.             Teklah keleng ate, kiniulinta ras pemereta arah kita muat bagin mere alu melumbae e la pernah sia-sia. Keleng ate e tahan seh rasa lalap. Keleng ate me si mbelinna (1 Korinti 13:13). Banci saja labo anak-anak si sampati kita e pagi ersimulih man banta. Banci jadi labo si tandai pe anak-anak si isampati kita arah program beasiswa enda janah ia pe labo nandai kita. La masalah. Si penting kita enggo jadi penampat man bana. Dibata jine alu caraNa si la terukuri kita si ersimulih man banta. Tetaplah jadi pancur pasu-pasu man si perlu penampat ras pemereta.

Pdt. Juris Tarigan, MTh (GBKP Depok – LA; 081316879945) 

Suplemen PJJ 29 Juli – 04 Agustus 2018

Nats       : 1 Timotius 4 : 11-16

Thema  : Tanggung Jawab Nandangi Gereja

1.       Gereja eme persekutuan kalak si tek man Tuhan Yesus, ija manusia si nai ia nggeluh ibas kegelapen, emaka reh ia ku terang emaka ibentukna sada persadaan. Emaka lit ija persadaan Tri tugas gereja, ersaksi, ersekutu, ras melayani. Janah gereja eme jelmana, labo gedungna bagi ende-enden anak KA-KR.

Emaka gereja ndai harus ndalanken kai si i perintahken Yesus sebagai kepala gereja nda. Sebab nina Yesus: laweslah, beritakenlah, peridikenlah, ajarilih, janah ingetlah aku ras kam seh kedungen zaman. (bnd Mat 28:16-20). Arah pesan enda me maka gereja berkembang ku belang-belang doni enda, termasukpe ku kuta kalak karo (GBKP). Kita enggo ngaloken BSM 128 thn dekahna, emaka arah gerejanta, lanai ngenca i Sumatra Utara, tapi pe ku seluruh Indonesia enda kecuali Ambon, Papua lenga lit  jah gerejanta, amina gia ijah pe enggo enterem kalak karo warga GBKP, tapi persadanta GBKP lenga lit.

Tapi puji Tuhan ibas kita GBKP 77 tahun enggo njayo, enggo banci lit persekutuan i Sumatra, Jawa, Bali, Sulawesi, Nusatenggara, Kalimantan. Sienda kerina eme erkiteken Tuhan Yesus, mereken tanggung jawab man banta warga gereja guna mengembangkan missi GBKP enda ku seluruh wilayah. Kita ikut muaat bagin dari Doa, Daya ras Dana.

2.       Kitab 1 Timotius 4:11-16 eme Paulusnehken suratna man Timotius, anak rohanina si melayani i daerah Efesus, jemaat si berkembang kal. Tapi Timotius njumpai tantangen ibas ia melayani ras mengembangkan missi, terutama guru-guru palsu. Tantangen e reh na i kalangen perpulungen e sendiri bage i luar perpulungen, emaka ia selaku singuda denga, harus nehken kai sini i hadapina man Rasul Paulus selaku bapa Rohanina.

Min seharusna Paulus reh nampati Timotius, guna ngalahken pengajaren papak e, tapi Paulus malahen nehken pesan: “ula kal pelepas ise pe anggap entang man bandu” Paulus ngarapken ibas kengudanna tetap ngajarken pengajaren benar ras melayani alu mehuli. Arah perbahanen, pengerana, nehken keleng ate, ibas kiniteken bagepe ibas ukurndu, sebab kam jadi usihen. Keteladanen me si banci ngalahken kerinana, sebab pengajaren pelsu e labo rehna ibas Dibata nari.

Emaka tole nina Paulus:

a.       Ula sia-siaken pemere si isehken Dibata

b.      Dalankenlah alu tutus pemere Dibata e

c.       Harus Berkembang, teridah kemajun

d.      Jaga dirindu i jaga pengajaren

Sebab imbas si enda kerina eme “keselamatan man Timotius, ras keselamatan kalak sideban” Sebagai pelayan, tidak mengalah ibas lit serangen, tapi hadapi serangen alu perbahanen si mehuli. Sebab talu nge kerinana arah kita ngkelengi

3.       Kai kin tanggung jawbta sebagai warga nandangi persekutuanta? Tentu endame si penting, ibas kita enggo 77 tahun njayo (mendiri). Tentuna dari segi pengembangen gerejanta eme, kita reh giah-giahna erberita si meriah sebab melala denga wilayah si lenga teridah (kita, misalna ku wilayah Kalimantan, Sulawesi, Ambon, Papua.. Emaka harus si gerakken semanagat kerina warga gelah ikut erberita. Bagepe dukungan dana si memang salah sada penggerak perdalanen BSM e, emaka perlu sitingkanken tanggung jawab: kolekte, persepuluhen, ras persembahen sidebanna. GBKP/missi banci bergerak eme litna dukungenta (doa, dana,ras daya)

Selamat ber PJJ

Pdt Andarias  Brahmana

081317054961

Suplemen PJJ Tgl  22-28 Juli 2018

Nats       : Matius 25:14-30

Thema  : tutus ras bujur ibas pendahin

1.       Kalak karo nai-nai nari pe enggo kal tutus erdahin, emaka kalak karo si ku idah labo lit si nggeluh ibas penderitaan bagi suku-suku sideban. Janah ku jape ia lawes tentuna inganna erdahin lebei darami, kujuma tah erbinaga, tah erdahin i kantor. Emaka si pedahken Dibata enggo banci terpenuhi kalak karo, cur-cur kal panasna guna memenuhi kebutuhenna. Janah kalak larope nai iajarken gelah bujur ibas kaipe, emaka nina nini-nininta: adi la kam tutus erdahin kelehen kam, adi la kam bujur maka lalit pagi temanndu. Sebab ke bujuren pe nambahi semangat erdahin guna ndarami keperlun geluhna. Tapi sada penungkunen kugange ndia gundari kalak karo, semangat denga nge erdahin, ras bujur denga nge ibas kai-kai pe... ? Tentuna secara kiniteken ninta tutus ras bujur.... puji Tuhan

2.       Gambaren kerajaan surga eme ituriken bagi tuan, si atena lawes, emaka berena hartana guna i modalken juak-juakna si telu, pemerena pe lako seri eme:

a.       50 duit emas

b.      20 duit emas

c.       10 duit emas

Janah labo iberena perintah kuga ban duit e, janah la ka bo katakenna digan  ia mulih. Tapi si jelas maka tua enggoberharap gelah i gunaken duitna e. Situhuna adi juak-juak ia pasti enggo tehna sura-sura tuanna. Tapi sayang seribu kali sayang, juak-juak pe laka seri perbahanenna, ija dua juak-juak mis i gunakenna modal, berhasil 100 % , tapi lit sada kuga kin nai bere modal bage lalap, lagunakena.

Apapun ceritanna, maka paksana mulih pagi tuan simada modale, sebab ia er sura-sura gelah tambah hartana, tapi si jumpainya arah laporan pertanggungjawaban la bagi sura-surana. Dua pujikenna tapi sada lang. Si 50 ras 20puluh, jumpaina tuan babana modal ras untungna, emaka nina tuan “mehuli kap perbahanenndu e” kam juak-juak si tutus, tutus atendu bas si kitik, maka ku percayaken siterlebihen,  mari bengket kam ku bas ersenang-senang ras aku. Pujian, sukacita man kalak si tutus, sebab enggo berhasil. Tapi si 10 pe ngelaporka, ia la gunakenca, bahkan ibunikenna, penuh alasen si lamasuk akal: kam kejam. Iperaninndu atendu si la isuanndu memang kalak malas pasti melala alasen, pembelaan ibas kesalahenna, (OMDO saja tahpe  NATO)

Emaka nina tuan kam juak-juak si jahat, buat lah duit e, juak-juak si la terpake enda sampetkenlah kubas ingan si gelap, tangis dingen mesui me atena. Teridah kal tuan adil, bujur man kalak si kerja keras i pujikenna janah ipesenag-senagna, man kalak si malas i ukumna, mberat, susah kal akapna, ndalani geluhna.

3.       Kita pe sebagai kalak kristen lanai banci kita la tutus erdahin, sebab arah kita ndahinken ndahinta maka kita dat pasu-pasuNa, janah bagi janji Dibata man Abraham kupasu-pasu kam, arah kam  enterem kalak ndatken pasu-pasu.

Emaka tidak ada tempat bagi orang malas dan santai, tapi harus kerja keras, sebab erdahin eme amanah Dibata. Erdahin bas doni enda guna kebuttuhen geluh, tapi pe erdahin guna erbelangken berita si meriah guna kesenangen surga. Inget nina Jesus “daramilah lebei kini rajanna, gelah icukupken bandu (Mat 6:33).

Berarti sembari kita erdahin guna berita si meriah, maka kita pe tutus ardahin ndahiken  dahinta( perjuma, perbinaga, pegawai PNS ras swasta). Arah kerja kerasta kita ngalo ken rejeki ibas Dibata nari. Radu ras sie maka kita pe jujur arah ulih dahita e, eme arah rejekinta maka kita nampati pelayanen, nampati temanta si man sampaten, (Kalak jujur terus akan diberkati).

Sebab labo kerina kal man banta kai si bereken Dibata ( berbahagialah). Bicara pe kita berbagi pasti buen denga nge tading bas kita. Alu e maka Dibata : kam juak-juak si mehuli, mari ras kita ersenag-senang. Emaka, tutus, jujur eme si man bahanenta.

Selamat PJJ

Pdt Andarias  Brahmana

081317054961