Suplemen PA Mamre : Ketangkasan 3 : 1-3 ; Tgl 29 Jul - 04 Agutus 2018
Suplemen PA Mamre 29 Juli-04 Agustus 2018
Ketangkasen 3: 1-3
“Metenget Dingen Erjaga-jaga”
I. Kata Perlebe
Kunci biasana kitik. Rumah si galang pe ibuka alu kunci si kitik. Bage ka pe kata kunci guna mengketi ras memahami Surat/Kitap Ketangkasen. Kata kuncina eme kata megenggeng (ibas bahasa Junani hupomone). E ngenca, kitik kal ngenca kata kuncina. Ibas Kitap Ketangkasen, kata e sama sekali la menonjol. Muncul pitu kali. Tapi, kata megenggeng merupaken kata pembuka dalan guna memahami isi Kitap Ketangkasen, latar belakang penulis ras si ngaloken Kitap enda. Ibas kata megenggeng (hupomone) banci siidah sada dinamika kegeluhen perpulungen paksa sie, si tetap ngasup bertahan ngadapi tantangen-tantangan ibas jamanna: kegeluhen si dem alu perjuangen, kesetian man Tuhan, kesabaren ibas perbeben si mesangat, ngaloken kematen alu dem kinigenggengen, bagepe ketahanen nggeluh i tengah-tengah buena persoalen. Kata megenggeng eme ungkapen secara eksistensial soal kinipangen naksiken kiniteken man Tuhan Jesus, seh maka ngasup nadingken perukuren si dem alu kearun ate, kebiaren, keputusasaan i tengah-tengah situasi si seh kal beratna. Pemenana muncul kata megenggeng ibas Kitap Ketangkasen banci si idah ibas Ketangkasen 1: 9. Ije lit ungkapen “kinigenggengen nimai Jesus”. Selanjutna, perdiateken maka ibas ayat e lit telu hal si isejajarken, eme kesusahen, Kerajan, ras kinigenggengen. Penulis ras singaloken Kitap/Surat enda lit ibas telu kondisi enda ndai. Kondisi si pemena eme kesusahen, maksudna penderitan erkiteken isiksa kalak. Kondisi peduaken eme Kerajan, maksudna status sebage warga Kerajan janah Kristus me sebage raja. Kondisi sipeteluken eme kinigenggengen. Kai nge sebabna penulis Kitap Ketangkasen merasa patut megenggeng ras erpengarapen man Jesus ibas penderitan enda? Erkiteken Jesus eme saksi si tutus, Anak sintua si enggo ipekeke Dibata iba si mate nari, si erkuasa nandangi kerina raja-raja i doni enda (1: 5b). Perdiateken telu hakikat Jesus ibas ayat e. Pemena, Jesus eme saksi si tutus ibas matuhi kiniseranNa. Peduaken, erkiteken kesetianNa e, keke Ia ibas si mate nari. Peteluken, erkiteken kesetian ras kekekenNa e, erkuasa Ia ngelebihi raja-raja si gundari sangana erkuasa niksa penulis Kitap Ketangkasen enda. Si ngoge Kitap enda mis tehna kai tujun Kitap enda isuratken. Kata kunci Kitap Ketangkasen enda eme kinigenggengen.
II. Tafsiren/Isi
Wari enda kita ngukal Kitap Ketangkasen sehubungen ras surat si itujuken man perpulungen i Sardis. Kota Sardis eme kota si bayak janah merupaken ibukota Lydia si inganna lebih kurang 30 mil Tiatira nari. Kota e selain terkenal erkiteken pabrik wol, terkenal ka ia erkiteken penembahen berhala. Penduduk kota e lebih mengutamaken penembahen man dewi sibeli asangken man kaisar janah ibas praktek penembahenna lit ije praktek percabulen. Seh maka kegeluhen agamana saja pe nggo ceda. Kota Sardis eme kota kematen erkiteken ije tempa teridah lit kedamen tapi situhuna kedamen palsu. Ibas surat man perpulungen Sardis lit keuniken si lalit ibas surat-surat si ipeseh Johanes man perpulungen sideban. Ibas surat sideban, ipujiken Johanes perpulungen e emaka ise si ersalah ipersingeti ibas suratna secara pribadi, tapi i Sardis keras kal Johanes mereken persinget janah langsung man pemimpin perpulungenna. Jadi ijenda masalahna labo terjeng pribadi tapi ibas kerina perpulungen e nggo ivonis Tuhan ras ikataken Tuhan, “Kueteh kerina pendahinndu: kam ikataken nggeluh, padahal situhuna mate”. Enda merupaken persinget si keras si peseh man perpulungen.
Situhuna lit empat hal si banci ibanggaken perpulungen Sardis, eme: lit reputasi si dinamis ras aktif alu kerina pendahinna ibas konteks paksa sie seh maka perpulungen sideban pe kagum man perpulungen Sardis enda, ngasup menyaring ajaren-ajaren si la payo, lit ibas perpulungen programna guna ngelakoken si mehuli, lit modalna ngelakoken Berita Si Meriah. Tapi sanga ikataken, “kam ikataken nggeluh, padahal situhuna mate”. Kalimat e la ntabeh man beginken. Gereja si mungkin ibas mata manusia lit penilaian sebage gereja si nggeluh tapi situhuna mate iadepen Dibata. Teridah kal tempa nggo ngelakoken si payo tapi mungkin lenga kita ngelakokenca. Hal enda itujuken man gereja sepenuhna si lit ije serayan Tuhan, pengurus ras kerina si terlibat ibas gereja.
III. Pengkenaina
Sanga ikataken Jesus maka Ia reh bagi sekalak pinangko. Tentu enda jadi persinget man perpulungen enda. Berarti, reputasi gereja si mejile tapi la berdampak tentu banci bahaya man banta. Enda nggo jadi contoh nyata man banta perpulungen Sardis si justru reputasina paling mejile justru ndatken persinget si paling keras ibas Dibata nari. Adi gereja si lit ibas situasi genting saja pe banci sikap akapna “perpedemna”, banci sibuat kesimpulen maka kerina gereja pasti “terpedem” kecuali lalap ia “imedakken”. Gereja si lit pengarapenna, la ia “terpedem” secara rohani, eme gereja si lalap rukur kai nari si harus terus ilakoken guna kemulian Tuhan.
Arah situasi perpulungen i Sardis Tuhan mpersingeti gerejaNa gelah: metenget, lanai ipediatna ijole-joleken pengajaren si papak. Perlu ia metenget ras erjaga-jaga erkiteken kerehen Jesus Kristus si la terukuri manusia janah kerehenNa iandingken bagi sekalak pinangko. Janah ia kerina perlu mpeturah mulihi semangat si menam bene gelah mulihken ia kerina ngelai Tuhan alu perbahanen si ngena ate Dibata. Perlu ingetna mulihi kebenaren Kata Dibata si pernah iajarken man bana kerina, patuh nandangi Kata Dibata ibas kegeluhenna si tep-tep wari, janah jera ibas kerina dosa si nggo jadi “gaya hidup”. Man perpulungen si matuhi persinget enda, Tuhan erpadan maka ia kerina bakal ngenanami kegeluhen sebage kalak si berkemenangen, kegeluhen ras Kristus ibas kegeluhen si rasa lalap. Jadi, arah bahan PA enda, kita iajarken maka labo kesibuken ras buena kegiaten pelayanen si jadi sukat-sukat kerohanianta ras kesehaten gerejanta, tapi uga kegeluhen rohani si bersih si jadi palas tiap kegeluhen ras kesibukenta.
Pdt. Andreas Pranata S. Meliala, S.Th
(GBKP Rg. Cibinong)
