Ogen            : Kejadin 1:26-28,

Tema            : TEMPAS DIBATA IBAS DIRINDU

(KONFESI GBKP: MANUSIA)

Invocatio: Perukurenndu bali min ras perukuren Kristus Jesus (Pilipi 2:5

Ogen: Epesus 4:17-24

Khotbah : Kejadian 1:26-28

Tema: Nggeluh Ibas Tempas Dibata (Berbudaya)

I. KATA PERLEBE

• Perpulungen sikelengi Tuhan, Pandangan Etika Kristen Ngatakenca, PANDANGAN KITA TERHADAP SESUATU ATAU SESEORANG MENENTUKAN SIKAP KITA TERHADAP SESUATU  ATAU SESEORANG ITU. Bagepe padangenta nandangi Dibata menentuken sikapta nandangi Dibata e, janah pandangenta nandangi dirinta eme tempas Dibata entah lang menentuken sikapta nandangi dirinta ras nandangi kalak sideban.
• Bahken bas kalak Karo megati kel si begi ungkapen kalimbubu entah pe ungkapenta sendiri maka ninta, “SERI KEL KAM RAS BAPANDU MBARENDA ULINA”, bagepe megati ka nge reh nina Kalimbubu e entah e ninta nandangi bere-berenta e, “NGGELUH DENGA KUAKAP TURANG KU MBARENA NATAP KAM KERINA ERSADA ARIH NAKKU”. Alu kata sideban arah perbahanenta ras pengerana ta e banci iinget kalak mulihi kiniulin orang tuanta e.
• Bagepe nina Andar Ismail ibas bukuna Seri Selamat lit telu hal bas doni enda si ise pe la metehsa eme, NDIGAN KITA TUBUH, NDIGAN KITA ERJABU, RAS NDIGAN KITA MATE. Ketubuhen enggo ndauh kel sitadingken janah gelah jumpa ras Tuhan la banci lang harus sibentasi kematen. Enggo nge kita ngasup nadingken bekalta bas doni enda? Maksudna, adi kune kenca kita pagi mate, reh ningkalak ngerana kerna anak-anakta e, “Seh kel ulina anak sianu ah ari?” reh ka ningkalak ngaloisa, “Banci kin akapndu la mehuli adi bapana pe nai seh kel ulina.” Entah kin reh ka ningkalak pagi ngerana, “La kel terpake anak sianu ah ari,” Reh ka ningkalak ngaloisa, “Banci kin akapndu terpake adi bapana pe nai labo terpake.” Siapai nge agi sitadingken nina Andar Ismail.
• Begem kepe pentingna kita ngasup encidahken tempas simehuli ibas kegeluhenta. Emaka ibas bahan PJJ ta enda erlajar kita uga kin iakataken TEMPAS DIBATA IBAS DIRINTA ras uga arusna kita nggeluhken kegeluhenta ibas tempas Dibata.

II. PENGANGKAAN KERNA TEKS 

• Bahan PJJ ta sendah nuriken kerna penciptaan doni enda ras kerina isina. Manusia itepa Dibata ibas wari si pepudina. Ngatakenca maka isikapken Dibata lebe kerina keperlun geluhna subuk, panganna, siman inemenna, sinerangi ia tupung suari bagepe sinerangi ia tupung berngi je maka itepaNa manusia. Manusia itepa Dibata Dilaki ras diberu janah itamakenna itaman eden. Adi sinen ibas penciptaan mulai kin ibas langit ras doni, laut ras daraten, tumbuh-tumbuhan, penerang-penerang i langit ras rubia-rubia, janah kenca iidah Dibata siitepana ekerina seh wari pe limaken, ikataken Dibata maka kerina siitepana e mehuli. Emaka nina: “Allah melihat bahwa semuanya itu baik (Kej. 1:4, 10,12,18,21,25). Tapi kenca itepa Dibata manusia maka nina Dibata, “Maka Allah melihat segala yang dijadikanNya sungguh amat baik”. Enda ngatakenca manusia eme tinepa Dibata si muliana.
• Tujun Dibata njadiken manusia eme: gelah manusia mpekena-kena doni enda ras kerina isina. Kai si enggo isediaken Dibata man manusia enggo iserahken Dibata ibas kuasa manusia. Gelah manusia ngasup mpeka-kena doni enda ras isina kerina la banci lang manusia harus kembali menyadari bahwa manusia e eme kap perwakilen Dibata i tengah-tengah doni enda guna mpekena-kena doni enda.  Manusia itepa dibata segambar (Imago Dei) dan Serupa (similitu Dei) dengan Allah.
• Manusia dilaki ras diberu duana itepa Dibata segambar ras serupa ras Dibata. Erkiteken sie manusia arus ersekutu ras Dibata ras ngasup encidahken kekelengen, kemulian ras Kebadian Dibata. Manusia arus ngelakokenca alu nandai ras matuhi perintah Tuhan. (Kej. 2:15-17). Situhuna bas manusia lit keserupaan moral ras Dibata perbahan manusia e awalna labo erdosa, ras badia, lit bas ia hikmat, pusuh si dem alu kekelengen, ras sura-sura ngelakoken si mehuli, nggeluh ia ibas persadan ras Dibata. Tapi paksa manusia e erdosa kerinana enggo bene, alu kata sideban gambar Dibata e enggo ceda. Emaka arus ipekena arah kerehen Kristus ku doni enda.
• Sebage wujud ras gambar ras rupa Dibata, Dibata mereken kuasa man manusia e guna mpekena-kena doni enda. Menurut Charles F. Pfeiffer ras Everett F Harrison ibas buku Commetary Alkitab Wycliff nuriken maka manusia arus jadi wakil ras penatalayanen Dibata si ertanggungjawab i doni guna ngelaksanaken kerina sura-sura Dibata ras nehken sura-sura Dibata.
• Manusia si itepa Dibata e berkembang ras nggeluh ibas erbage-bage ingan, bahasa, bangsa, suku, budaya ras sidebanna. Alu kata sideban manusia  siitepa Dibata ndube enggo ertambah-tambah ndemi doni enda bagi siiperintahken Tuhan. Alu bage tentuna setiap manusia, suku, bangsa, la seri sifat, karakter, budaya masing-masing. Ibas sie me manusia perlu erkemalangen man Dibata ibas ngadapi ras ngaturken tinepa Dibata ibas doni enda.

III. PENGKENAINA

• Temata eme TEMPAS DIBATA IBAS DIRINDU. Ibas Kamus Karo Tempas ertina Sifat entah pe karakter seseorang. Alu bage tema enda ngertiken man banta maka Sifat-sifat Dibata e entah pe karakter Dibata e lit bas dirinta. Alu kata sideban maka kalak si erkiniteken man Dibata, arusna lit sifat-sifat Dibata e bas ia. Sifat-sifat Dibata eme mehuli (Mzm. 25:8), Dibata e kekelengen kap (1 Yoh.4:8, Yoh.3:16), Penyayang dan pengasih (Kel. 34:6), Dem perkuah ate (2 Raj. 13:23), Dibata e sabar ras la nukah merawa (Kel. 34:6), Dibata e jujur (Ul.32:4), Dibata e setia (Kel. 34:6), Dibata e adil (Ul. 32:4).
• Ibas Konfesita GBKP salah sada ikataken ije maka manusia adalah ciptaan Allah yang segambar dengan Allah, laki-laki dan perempuan dengan martabat yang sama (Kej. 1:26-27). Manusia diperlengkapi oleh Allah dengan hikmat dan akal budi serta dimahkotai dengan kemuliaan, hormat dan kuasa (Masmur 8:6-7). Janah ibas buku katekisasi GBKP ikataken maka tujun manusia itepa Dibata eme ”sebagai pengelola dunia yang Ia ciptakan. Manusia dicipta sebagai gambar dan rupa Allah merupakan citra Allah. Statusnya sebagai anak Allah mempunyai tugas khusus untuk menyatakan ‘diri’ Allah, merawat dan menata serta menjaga keutuhan ciptaanNya (Kej 2:15).
• Emaka erkiteken sie me maka arah bahan PJJ ta enda kita iajuk gelah nggeluh bagi tempas Dibata. Kita harus nggejapken maka kita enda me wakil Dibata i doni enda subuk man anakta, ndeharanta, perbulangenta, turang seninata ras teman-temanta, bagepe man seisi doni enda. Tentuna selaku anak-anak Dibata sifat-sifat Dibata e pe arus lit bas kita. Kita pe arus mehuli, dem alu kekelengen, perkeleng, dem perkuah ate, sabar ras la nukah merawa, jujur ras adil  ibas kai pe ras man isepe.
• Terlebih-lebih ibas masa Pandemi enda, marilah kita kerina nggit encidahken tempas Dibata e bas dirinta man kalak sideban, alu bage kalak sideban pe banci nggejapken maka ia megegeh ibas ngalaken masa pandemi enda. Adi selama enda kin kita lenga ngasup encidahken tepas Dibata bas dirinta, arah PJJ ta sekalenda iajuk kita kerina gelah nggit encidahken tempas Dibata e si lit bas dirinta man kalak sideban. Ulanai kita bagi kalak si la nandai Dibata, tapi nggeluhlah bagi anak-anak Dibata si eggo itepa Dibata segambar ras Dibata. Bagi nina ibas Efesus 4:17-24, “Olanai kam nggeluh bagi kalak si la nandai Dibata, si la erguna perukurenna, dingen gelap pengertinna. Lalit baginna ibas kegeluhen siibereken Dibata, sebab lanai kel lang-lang ia bodohna dingen mersik ukurna. Lanai sitik pe ia meteh mela, ipelepasna dirina italuken sura-surana si jahat, janah ilakokenna kerina si la mehuli alu la alang-alangen. Amin

Pdt. Jaya Abadi Tarigan, M. Th

GBKP Runggun Bandung Pusat

 

OGEN            : KETANGKASEN 4:11,

 

Tema         : DIBATA SI ERMULIA

 

EVALUASI TAHUN 2020 (TEKHNOLOGI INFORMASI)

 

I.                   KATA PENARUH

 

·           Perpulungen sikelengi Tuhan, tentu labo kebetulan ibas Tahun 2020, tahun pelayanen GBKP eme “MENINGKATKAN KEMAMPUAN WARGA BKP DALAM PENGELOLAAN INFORMASI DAN KETERAMPILAN DALAM PENGGUNAAN TEKHNOLOGI INFORMASI”. Emaka mulai Bulan Januari tahun 2020 kegiaten GBKP mulai tingkat Moderamen, Klasis, Runggun, kerina erlumba erbahan seminar tentang Tekhnologi Informasi.

 

·           Emaka Dungkenca  kerina tingkat Moderamen, Klasis, Runggun erbahan seminar-seminar tentang tekhnologi Informasi dan penggunaannya ibas Bulan Februari, emaka Bulan Maret Minggu ke-3 tahun 2020 lanai kita banci beribadah ibas Gedung Gereja erkiteken pandemic Covid-19 nderpa Indonesia.

 

·           Tapi erkiteken arah seminar-seminar ras persiapen-persiapen si enggo ilakoken erbahansa kerina kegiaten gerejanta ibas Tahun 2020 ibas masa pandemic, lalit sada pe la terlaksana aminna gia dalam bentuk si berbeda. Bahken Tahun 2020 banci itutup alu perayaan Natal si penuh dengan hikmat ras nyata ibas nehken kekelengen alu aksi natal ku bidang pelayanan GBKP eme, Rumah singgah Narkoba ras HIV AIDS, YAYASAN PENYANDANG CACAT ALFA OMEGA, PANTI ASUHEN GELORA KASIH, PUSAT PELAYANAN ORANG TUA SEJAHTERA YAPOS, termasuk nampati kas Moderamen GBKP. Alu kata sideban, si  amini maka, Tuhan enggo ngaturken ras mpersipaken kita kerina ngadapi situasi Pandemi enda.

 

·           Emaka alu la siarap pe maka tahun pelayanen GBKP ibas tahun 2021 enda eme, GENERASI MUDA MENJADI BERKAT, ternyata enggo me mulai terlaksana arah masa pandemi enda, erkiteken secara umum belang-belang GBKP enda ibas ibadah Live Streaming enggo me idominasi oleh anak-anak PERMATAnta.

 

·           Tapi erkiteken bahan PJJ ta enda isinggung kerna evaluasi, tentu siakui maka melala denga nge siman pekenan ibas kita kerina subuk alat-alat bagepe Sumber Daya Manusia ibas komitmen ras ketekunen ibas ngelai Tuhan. Emaka arah bahan PJJ ta enda mari dage kita erlajar uga arusna ibas pelayanenta banci erbansa Dibata si ermulia arah kerina kecibal kegeluhenta janah labo dirinta.

 

II.                PEBAGESI PENANGKAAN KERNA TEKS

 

·         Kitab Ketangkasen 4 enda nuriken kerna pengenehen Yohanes uga Dibata mbuka pintu Surga janah minter ia idemi Kesah si Badia si erbahansa Yohanes ndatken kesempaten  naksiken kai si la pernah isaksiken manusia. Iidahna sada kursi kinirajaan i Surga janah sekalak kundul ije janah ayoNa ersinalsal bagi permata Jaspis ras permata Sardis janah kursi e ikeleweti benteha (Pelangi) si erbae rupana.

 

·         Yohanes ndatken kesempaten guna ngidah “pintu “surga” janah la hanya ngidah pintu surga tapi pe ia ibereken kesempaten guna bengket ku bas. Lalit ise pe iijinken Dbata ku Surga guna nuriken kai si iidahna  tapi Yohanes ndatken kesematen e. Bahken Yohanes isuruh Dibata bengket kubas janah gelah icidahkenNa man Yohanes kai si bakal terjadi i doni kenca sie.

 

·         Pintu enda ngertiken man banta maka ertina Yohanes ngidah pintu masuk labo pintu ke luar, janah pintu masuk e eme pintu kempak kursi kinirajaan Surga. Adi secara umum manusia ndarami jalan ke luar secara kedagingan entah pe dalan ke luar kempak dosa adi lit perbeben, kiniseran, kepahitan si ialamina, tapi Yohanes ndatken kesempaten bengket kubas pintu kinirajaan Surga e gelah ietehna kai si nandangi terjadi ibas doni.

 

·         Pintu ibukaken man Yohanes ertina Tuhan nikapken pintu si terbuka man banta kerina, emaka kita harus bengket ku bas pintu e janah labo ndarami jalan ke luar secara kedagingen guna ndungi perbeben siihadapi kita. Mungkin banci jadi lit kalak ndarami dalan kelur erkiteken la ia ngasup ngalaken erbage-bage perbeben si reh nderpa ia.

 

·         Bagepe Yohanes ngidah maka isekelewet kursi e lit 24 kursi kinirajaan, janah ibas kursi e kundul 24 pertua-pertua, uisna mbentar janah ipakena mahkota emas. Ikelewet kursi kinirajaan e lit empat mahluk si nggeluh, sada teptep dampar janah si dem mata arah lebe rasa rah pudi.

 

·         Kai si idah Yohanes e situhuna mereken pengertin si luar biasa man kalak si erkiniteken. Empat mahluk e eme symbol sejumlah malaikat Tuhan, dua puluh empat tua-tua e sebagai symbol kalak si erkiniteken. Kai siidah Yohanes e encidahken maka Dibata hadir ras ibas ingan Dibata hadir e lalit ingan nandangi kesombongen, la kita siakap sihebatna, la kita meganjangen rukur (bnd. Yakobus 4:16), erkitekenDibata nandai manusia ras kelemahen-kelemahenna. Janah benteha (Pelangi) siidahna e melambangken perpadanen Dibata bagi perpadanenNa ras Nuh, janah Dibata la pernah la nepati janjiNa.

 

·         Kai siidah Yohanes ibas Surga e ngertiken man banta:

 

1.      Kursi Kinirajan ngataken man banta maka Dibata kundul ikursi kinirajan Dibata si ikeleweti empat mahkluk ras ipuji sebagai pencipta alam semesta.

 

2.      Kursi kinirajan Dibata i Surga ngataken man banta maka Kursi kinirajan Surga e labo kosong janah labo bual tapi memang lit kin kursi kinirajaan Dibata e si i Surga. Dibata mpeseh man kalak si Badia i doni ras menjamin maka Dibata paksana ndahiken rencana-rencana-Na. Dibata erpadan maka Ia merintah kerina tinepaNa arah Yesus Kristus.

 

3.      Yohanes ngidah sinalsal bagi si ipantulken permata Jaspis ras Permata Sardis ngertiken maka Dibata lit ibas terang si la ngasup ise pe ndeherisa.Janah Dibata eme terang janah lalit kegelapen bas Dibata (bnd. 1 Yohanes 1:5).

 

4.      Dibata setia kap janah Dibata mbuka pintu Surga ngataken maka Dibata tetap mbuka dalan man banta ibas kita ngalaken perbebenta.

 

5.      Dua puluh empatna pertua-pertua e menterken mahkotana i lebe-lebe Kursi Kinirajaan Dibata, ngertiken kiniteruken ukur erkiteken mahkota emas e pe labo lit ergana erkiteken Dibata e ngenca patut isembah, janah erkiteken Dibata me si njadiken kerina si nasa lit, janah erkiteken peraten Dibata nge maka kerina e lit dingen nggeluh. (ay.11)

 

III.             PENGKENAINA

 

·         Temata eme DIBATA SI ERMULIA. Ibas Kamus Alkitab 'Kemuliaan' pada umumnya menerjemahkan kata Ibrani kavod yang mengacu kepada kekayaan, kemegahan, atau reputasi (meskipun dlm pengertian terakhir kavod sering diterjemahkan 'kehormatan'). Kemuliaan Israel bukanlah bala tentaranya tapi Yahweh (Yer 2:11). Alu kata sideban Dibata ngenca patut ndatken kerinana termasuk kebayaken, kemegahen, kehormaten.

 

·         Tentu arah bahan PJJ ta enda lanai lit alasenta maka kita la mereken kemuliaan man Tuhan sebab Dibata kap sinjadiken kerina sinasa lit janah erkiteken peraten Dibata nge maka kerina sinasa lit enda lit dingen nggeluh. Bagi tahun 2020 si lewat aminna gia kita lanai banci muji ras permuliaken Tuhan arah kinipulungenta ku gereja bagepe PJJ ibas rumah turang seninanta kerina bage pe aminna gia la kita banci sidahi-dahin sada ras sidebanna, tapi tangkas uga Tuhan nikapken Tekhnologi Informasi bagi sigenduari endagelah banci denga kita muji ras permuliaken Tuhan ibas masa pandemic enda pe.

 

·         Emaka tetaplah sidukung terus anak-anakta Permata ras KA-KR ibas muji ras mpermuliaken Tuhan ibas masa pandemi enda alu makeken Tekhnologi Informasi si enggo lit. Janah selaku anak-anak Permata si selama enda enggo ikut mendukung perdalinen kegiaten gerejanta alu makeken Tekhnologi Informsi si enggo lit, tetaplah semangat ras setia ibas mpermuliaken Tuhan alu talenta si lit ibas kita.

 

·         Tentu pasti nge lit kekurangen-kekurangen ras tantangen bagepe kinilapuasenta ibas mpermuliaken Tuhan ibas masa pandemic enda, tapi ula e erbahansa urak semangatta guna mpermuliaken gelar Tuhan. Bagi kai siituriken man banta arah bahan PJJ ta enda, bahwa ibas kita ngalaken kerina perbeben sinihadapi kita bas doni enda, Dibata enggo mbukaken pintu man banta janah enggo mbuka ken dalan man banta gelah kita banci ndatken serpang pulah ibas kerina perbebenta.

 

·         Emaka ibas masa pandemi enda pe marilah tetap kita kerina setia ersembah man Tuhan, tetaplah kita kerina setia ertoto man Dibata, ras marilah kita kerina tetap erpengarapen man Dibata sebab tek kita maka Tuhan mbuka ndalan man banta ibas ngalaken kerina perbebenta. Tetaplah bereken kemulian man Tuhan ibas siugapana pe arah keterlibatenta muji ras permuliaken Dibata, sebab Dibata kap sinjadiken kerina si nasa lit, janah erdandanken PeratenNa nge maka kerina e lit dingen nggeluh. Amin

 

 

 

Pdt. Jaya Abadi Tarigan, M. Th

 

GBKP Runggun Bandung Pusat

 

Ogen  : Johanes 4:39-42

Thema : “Tek Ras Erberita”

Bahan PJJ enda nuriken kerna perjumpan Jesus ras diberu kalak Samaria. Kai maksudna maka Johanes ngangkatken cerita enda ibas kitabna enda? Sebab ibas Johanes 3:36 Johanes ngataken ije kerna tek ras la tek sebab ije idatken sada perubahen siwajar guna cerita selanjutna, si merupaken sada cerita kerna kiniteken, pemena arah diberu kalak Samaria, janah kedungenna kerina penduduk kuta Samaria. Jesus kedungenna erban keputusen guna nadingken daerah e bagi si ituriken ibas Johanes 3 janah mulihken ku Galilea. Sanga ateNa mulihken ku Galilea Jesus ngelewati daerah Samaria sanga Ia ngerana-ngerana ras sekalak diberu Samaria i deher sumur. Ibas percakapen e lit ije terjadi kesalahpahamen diberu e memahami kai si ikataken Jesus. Sebab ibas kitab enda Johanes jelas kal tek ia maka manusia cenderung salah memahami pasu-pasu keselamaten Dibata amin pe pasu-pasu e lit jelas ilebe-lebe matana. Bagi diberu Samaria e, manusia cenderung erban kacau dua kinata kerna kebutuhen kula ras kebutuhen kinitekenta. Jesus mindo lau (lau e jadi sada benda situhu-tuhu nyata). Diberu e mamang atena, ngkai sekalak dilaki kalak Jahudi nggit ngerana ras ia, sekalak diberu Samaria. Jesus kedungenna ngerana kerna inemen kiniteken, lau kegeluhen (sada benda si la nyata). Diberu e menduga Jesus sangana ngerana kerna lau ibas sumur e janah meteh atena uga cara Jesus ndatken lau ibas sumur e nari adi la make timba (enda me sada perhatian kempak persoalen si nyata). Jesus ngerana ka kerna lau kegeluhen si erbanca kalak lanai muas. Emaka Jesus mengubah percakapen e seh maka alu pemetehNa kerna situasi kegeluhen diberu e, ibahanNa diberu e kagum man baNa. Emaka ituriken kerna inti penembahen man Tuhan situhu-tuhu, nembah ibas Kesah ras kebenaren, siibereken Dibata man manusia eme Kristus. Janah pemere e berlaku gundari. Diberu e kedungenna ngataken kerna kinitekenna sisangana turah alu ngataken kerna Mesias, janah langsung ia ijabap Jesus. Ikataken Jesus maka Ia me Lau Kegeluhen. Kai si ikataken Jesus enda eme salah sad acara siipake Johanes guna ncidahken kinidolaten ras kebenaren silit ibas diri Jesus. Kenca ajar-ajarNa reh njumpai Jesus janah ajar-ajarNa e sengget ngidah Jesus ngerana ras diberu kalak Samaria, sie erbanca diberu e mulihken ku rumahna janah mberitaken man kerina anak kutana. Ibas ia erberita kerna Mesias e, ia idemi kemalemen ate. Emaka kedungenna, anak kuta e pe lawes njumpai Jesus janah mulai me ia tek maka Jesus me Juruselamat doni. Kinitekenna lanai nari idatken arah kalak sideban, lanai ia bergantung kempak kesaksin diberu e, tapi idatkenna secara langsung. Lebih lanjut, kinitekenna ngelebihi kalak sipemenana kal ncidahken Kristus man bana. Johanes make cerita enda guna nehken sejumlah inti penting, si kedungenna bakal muncul. Jesus ncidahken man ajar-ajar kemungkinen kiniteken ibas kalak Samaria. Sekali nari Johanes mindo perhatianta ibas teks PJJ enda kerna pentingna kesaksin. Kesaksin Johanes Peridiken nggo ikataken, tapi gundari sekalak diberu si kinitekenna banci kataken “lenga dewasa” kepeken ibabaina kalak sideban kempak Kristus janah kalak e ndatken kiniteken silebih mbages ras megegeh asangken kiniteken saksi sipemena eme diberu ndai. Singkatna, Johanes nggo ncidahken cara Dibata nehken kekelengenNa man kalak silabo iperhitungken paksa sie.

Erberita la seri ras ngerana. Erberita terjadi arah perbahanen kegeluhen tep-tep wari. Perbahanen situhuna berarti geraken simeter tapi alu perhitungen sitepat. Erberita berarti ngelakoken kegiaten alu meter tapi alu metenget ras tutus, sebab kita isuruh bagi biri-biri itengah-tengah serigala. Adi sada mobil tabraken ras sada sepeda motor. Siidah sendiri terjadina tabraken e. Apakah kita nggit jadi saksi? Mungkin lang. Mungkin la nggit kita jadi saksi erkiteken jadi saksi e erbanca repot saja. Jadi saksi ntah pe erberita e la mesunah. Kita harus inget kai siidah, sibegiken ras sigejapken. Sebab kerina nge kari isungkuni man banta. Emaka ersaksi pe harus objektif. Enda mesera kal, sebab nggit ras la nggit tiap kalak la banci bebas arah perukuren subjektif. Adi kesaksin e ngerugiken kita sada pihak, banci pe terjadi maka kedungenna kita merasa bersalah. Pusuhta mulai ngerana. Erkiteken kesaksinta kalak irugiken. Adi jadi saksi tabraken saja pe nggo seh kal rumitna, apai ka jadi saksi guna perkara si lebih mbelin. Jadi saksi guna Kristus erkawiten perkara si seh kal belinna. Kita iangkat jadi saksi kerna kegeluhen ras perbahanen Kristus. Jadi saksi guna Kristus pasti ndauh lebih rumit asangken jadi saksi ibas pengadilen. Ersaksi guna Kristus labo terjeng ngerana, tapi ncidahken sada gaya hidup. Johanes ersaksi alu cara erban buku tujunna eme gelah kita tek maka Jesus e Mesias, Anak Dibata, bagepe arah kinitekenta ndatken kegeluhen ibas gelarNa. Perdiateken dua tujun e, eme gelah kalak jadi tek janah gelah kalak ndatken kegeluhen ibas Kristus ntah pe ndatken kualitas kegeluhen Kristus. Intina jadi saksi guna Kristus e la mesunah janah la ntabeh. Mbue risikona.

Thema PJJnta eme “Tek Ras Erberita”. Inti sipemena jadi kalak Kristen eme jadi ajar-ajar Tuhan ntah pe jadi murid Tuhan. Sebab alu kita jadi murid Tuhan merupaken konsep utama ibas pengajaren Kristen. Jadi ajar-ajar Tuhan e lit ije ikawitken ras ngikutken ntah pe ngelakoken. Jadi ajar-ajar Tuhan eme ngikutken guru ras ngelakoken sura-suraNa. Jadi ajar-ajar berarti nggeluh sue ras ajaren guru bagepe erbuah pengajaren guru e ibas bentuk perbahanen tep-tep wari. Jadi ajar-ajar labo status, tapi sada gaya hidup alu sada misi mpermuliaken Dibata. Ijenda teridah kaitenna antara jadi ajar-ajar ras njadiken ajar-ajar. Gaya hidup sebage ajar-ajar bakal erbahan kalak sideban jadi ajar-ajar Tuhan. Inti peduaken eme kerna identitas, emaka iperidiken me ia ibas gelar Bapa, Anak ras Kesah. Inti peteluken eme kerna erlajar ras ngajar. Guna banci ngajar kalak perlu lebe erlajar. Ibas ngajar kita erlajar. Erlajar guna ngelakoken kerina si iperintahken Dibata man banta. Perdiateken kata “ngelakoken” ijenda. Maksudna eme ngelakoken sura-sura Dibata. Kita erlajar labo terjeng guna meteh, tapi guna ngelakoken. Enda me inti pemberitanta ibas mberitaken Berita Si Meriah. Kita idilo guna erberita sebage ajar-ajar Jesus seh maka kegeluhenta e njadiken kalak sideban pe ajar-ajarNa. Emaka adi isuruh kita terus erberita, enda labo soal jumlah tapi soal kualitas. Labo soal pertambahen tapi pertumbuhen. Kita isuruh erberita eme ngajarken kerna keleng ate Kristus.

Pdt. Andreas Pranata Meliala, S.Th

GBKP Rg. Cibinong