Suplemen PJJ : Johanes 4 : 39-42 ; Tgl 18-24 Oktober 2020

Ogen  : Johanes 4:39-42

Thema : “Tek Ras Erberita”

Bahan PJJ enda nuriken kerna perjumpan Jesus ras diberu kalak Samaria. Kai maksudna maka Johanes ngangkatken cerita enda ibas kitabna enda? Sebab ibas Johanes 3:36 Johanes ngataken ije kerna tek ras la tek sebab ije idatken sada perubahen siwajar guna cerita selanjutna, si merupaken sada cerita kerna kiniteken, pemena arah diberu kalak Samaria, janah kedungenna kerina penduduk kuta Samaria. Jesus kedungenna erban keputusen guna nadingken daerah e bagi si ituriken ibas Johanes 3 janah mulihken ku Galilea. Sanga ateNa mulihken ku Galilea Jesus ngelewati daerah Samaria sanga Ia ngerana-ngerana ras sekalak diberu Samaria i deher sumur. Ibas percakapen e lit ije terjadi kesalahpahamen diberu e memahami kai si ikataken Jesus. Sebab ibas kitab enda Johanes jelas kal tek ia maka manusia cenderung salah memahami pasu-pasu keselamaten Dibata amin pe pasu-pasu e lit jelas ilebe-lebe matana. Bagi diberu Samaria e, manusia cenderung erban kacau dua kinata kerna kebutuhen kula ras kebutuhen kinitekenta. Jesus mindo lau (lau e jadi sada benda situhu-tuhu nyata). Diberu e mamang atena, ngkai sekalak dilaki kalak Jahudi nggit ngerana ras ia, sekalak diberu Samaria. Jesus kedungenna ngerana kerna inemen kiniteken, lau kegeluhen (sada benda si la nyata). Diberu e menduga Jesus sangana ngerana kerna lau ibas sumur e janah meteh atena uga cara Jesus ndatken lau ibas sumur e nari adi la make timba (enda me sada perhatian kempak persoalen si nyata). Jesus ngerana ka kerna lau kegeluhen si erbanca kalak lanai muas. Emaka Jesus mengubah percakapen e seh maka alu pemetehNa kerna situasi kegeluhen diberu e, ibahanNa diberu e kagum man baNa. Emaka ituriken kerna inti penembahen man Tuhan situhu-tuhu, nembah ibas Kesah ras kebenaren, siibereken Dibata man manusia eme Kristus. Janah pemere e berlaku gundari. Diberu e kedungenna ngataken kerna kinitekenna sisangana turah alu ngataken kerna Mesias, janah langsung ia ijabap Jesus. Ikataken Jesus maka Ia me Lau Kegeluhen. Kai si ikataken Jesus enda eme salah sad acara siipake Johanes guna ncidahken kinidolaten ras kebenaren silit ibas diri Jesus. Kenca ajar-ajarNa reh njumpai Jesus janah ajar-ajarNa e sengget ngidah Jesus ngerana ras diberu kalak Samaria, sie erbanca diberu e mulihken ku rumahna janah mberitaken man kerina anak kutana. Ibas ia erberita kerna Mesias e, ia idemi kemalemen ate. Emaka kedungenna, anak kuta e pe lawes njumpai Jesus janah mulai me ia tek maka Jesus me Juruselamat doni. Kinitekenna lanai nari idatken arah kalak sideban, lanai ia bergantung kempak kesaksin diberu e, tapi idatkenna secara langsung. Lebih lanjut, kinitekenna ngelebihi kalak sipemenana kal ncidahken Kristus man bana. Johanes make cerita enda guna nehken sejumlah inti penting, si kedungenna bakal muncul. Jesus ncidahken man ajar-ajar kemungkinen kiniteken ibas kalak Samaria. Sekali nari Johanes mindo perhatianta ibas teks PJJ enda kerna pentingna kesaksin. Kesaksin Johanes Peridiken nggo ikataken, tapi gundari sekalak diberu si kinitekenna banci kataken “lenga dewasa” kepeken ibabaina kalak sideban kempak Kristus janah kalak e ndatken kiniteken silebih mbages ras megegeh asangken kiniteken saksi sipemena eme diberu ndai. Singkatna, Johanes nggo ncidahken cara Dibata nehken kekelengenNa man kalak silabo iperhitungken paksa sie.

Erberita la seri ras ngerana. Erberita terjadi arah perbahanen kegeluhen tep-tep wari. Perbahanen situhuna berarti geraken simeter tapi alu perhitungen sitepat. Erberita berarti ngelakoken kegiaten alu meter tapi alu metenget ras tutus, sebab kita isuruh bagi biri-biri itengah-tengah serigala. Adi sada mobil tabraken ras sada sepeda motor. Siidah sendiri terjadina tabraken e. Apakah kita nggit jadi saksi? Mungkin lang. Mungkin la nggit kita jadi saksi erkiteken jadi saksi e erbanca repot saja. Jadi saksi ntah pe erberita e la mesunah. Kita harus inget kai siidah, sibegiken ras sigejapken. Sebab kerina nge kari isungkuni man banta. Emaka ersaksi pe harus objektif. Enda mesera kal, sebab nggit ras la nggit tiap kalak la banci bebas arah perukuren subjektif. Adi kesaksin e ngerugiken kita sada pihak, banci pe terjadi maka kedungenna kita merasa bersalah. Pusuhta mulai ngerana. Erkiteken kesaksinta kalak irugiken. Adi jadi saksi tabraken saja pe nggo seh kal rumitna, apai ka jadi saksi guna perkara si lebih mbelin. Jadi saksi guna Kristus erkawiten perkara si seh kal belinna. Kita iangkat jadi saksi kerna kegeluhen ras perbahanen Kristus. Jadi saksi guna Kristus pasti ndauh lebih rumit asangken jadi saksi ibas pengadilen. Ersaksi guna Kristus labo terjeng ngerana, tapi ncidahken sada gaya hidup. Johanes ersaksi alu cara erban buku tujunna eme gelah kita tek maka Jesus e Mesias, Anak Dibata, bagepe arah kinitekenta ndatken kegeluhen ibas gelarNa. Perdiateken dua tujun e, eme gelah kalak jadi tek janah gelah kalak ndatken kegeluhen ibas Kristus ntah pe ndatken kualitas kegeluhen Kristus. Intina jadi saksi guna Kristus e la mesunah janah la ntabeh. Mbue risikona.

Thema PJJnta eme “Tek Ras Erberita”. Inti sipemena jadi kalak Kristen eme jadi ajar-ajar Tuhan ntah pe jadi murid Tuhan. Sebab alu kita jadi murid Tuhan merupaken konsep utama ibas pengajaren Kristen. Jadi ajar-ajar Tuhan e lit ije ikawitken ras ngikutken ntah pe ngelakoken. Jadi ajar-ajar Tuhan eme ngikutken guru ras ngelakoken sura-suraNa. Jadi ajar-ajar berarti nggeluh sue ras ajaren guru bagepe erbuah pengajaren guru e ibas bentuk perbahanen tep-tep wari. Jadi ajar-ajar labo status, tapi sada gaya hidup alu sada misi mpermuliaken Dibata. Ijenda teridah kaitenna antara jadi ajar-ajar ras njadiken ajar-ajar. Gaya hidup sebage ajar-ajar bakal erbahan kalak sideban jadi ajar-ajar Tuhan. Inti peduaken eme kerna identitas, emaka iperidiken me ia ibas gelar Bapa, Anak ras Kesah. Inti peteluken eme kerna erlajar ras ngajar. Guna banci ngajar kalak perlu lebe erlajar. Ibas ngajar kita erlajar. Erlajar guna ngelakoken kerina si iperintahken Dibata man banta. Perdiateken kata “ngelakoken” ijenda. Maksudna eme ngelakoken sura-sura Dibata. Kita erlajar labo terjeng guna meteh, tapi guna ngelakoken. Enda me inti pemberitanta ibas mberitaken Berita Si Meriah. Kita idilo guna erberita sebage ajar-ajar Jesus seh maka kegeluhenta e njadiken kalak sideban pe ajar-ajarNa. Emaka adi isuruh kita terus erberita, enda labo soal jumlah tapi soal kualitas. Labo soal pertambahen tapi pertumbuhen. Kita isuruh erberita eme ngajarken kerna keleng ate Kristus.

Pdt. Andreas Pranata Meliala, S.Th

GBKP Rg. Cibinong