(TI-Hubungen Sosial/Sentuhan)

Roma 1:8-12

MESIKEL AKU JUMPA RAS KAM

Senina ras turang ibas gelar Tuhan Yesus Kristus..

Kinata kegeluhen manusia emekap lit hubungen sosial si terus ibangun erkiteken manusia labo ngasup nggeluh si sada tanpa membangun hubungan si mehuli ras kalak si deban. Ibas bahan PJJnta minggu enda, icidahken Paulus arah surat si isehkenna kerna ketedehen atena banci jumpa ras perpulungen si lit i kuta Roma. Ibas ia encidahken ketedehen ate guna banci jumpa ras perpulungen i Roma, ipesehkenna arah suratna enda, kerna :

1.   Pujin Man Perpulungen i Roma (ayat 8)

Isehken Paulus pengataken bujurna man Dibata kerna perpulungen Roma si tetap setia erkiniteken man Tuhan amin gia kiniseran igejapkenna erkiteken kininitekenna man Tuhan si erbahanca pemerintah Roma menindas perpulungen kalak si tek man Tuhan si lit i kuta Roma. Tentu saja, kata pujin si isehken Paulus man perpulungen Roma, erbahanca reh gegehna ia kerina ibas ngalaken kiniseranna. Kiniteken perpulungen i Roma terberita seh ku belang-belang doni enda. Kekaisaran Roma sangat membenci kekristenan, erkitekenkekristenan menentang peyembahan Kaisar si menganggap dirina sebage dewa. Kekeristenan hanya nembah man Dibata saja ngenca. Erkiteken si eme maka kalak Kristen si i Roma nggejapken kiniseran.

2. Paulus Notoken Perpulungen i Roma (ayat 9)

Selaku sekalak si erkiniteken man Tuhan, meteh maka perpulungen i Roma e ngalaken kiniseranna, mabai Paulus tutus dingen tetap setia notokenca. Pang Paulus ngatakenca maka Dibata me kap saksina erkiteken memang tuhu-tuhu itotokenna perpulungen i Roma enda.

3. Ketedehen Paulus Jumpa Ras Perpulungen I Roma (ayat 10-11)

Amin gia Paulus lenga pernah jumpa ras perpulungen si lit i Roma tapi igejapkenna ketedehen atena gelah banci jumpa ras perpulungen enda. Engkai ? Erkiteken mbelin kel pengarapen Paulus banci mpegegehi kiniteken perpulungen i Roma arah ia membagiken pemere pertendinn (karunia rohani) guna mpegegehi kiniteken perpulungen enda si sangana ngalaken kiniseran si tuhu-tuhu mberat.

4. Mpegegehi Pekepar (ayat 12)

Ibas Paulus nehken pergegeh man perpulungen si lit i Roma, tek ia maka alu bage ia pe reh gegehna. Emaka nina Paulus ibas suratna : “Maksudku gelah ipegegehi kita pekepar; kam kupegegehi alu kinitekenku janah aku ipegegehindu alu kinitekenndu.”. Enda encidahken man banta maka ibas kita mpegegehi kalak si deban si sangana lit ibas kiniseran, situhuna alu bage kita pe reh gegehna ibas ngalaken erbage  bage perbeben nggeluh.

Bagem me Paulus nehken ketedehen atena banci jumpa ras perpulungen si lit i Roma.

Senina ras turang ibas gelar Tuhan Jesus Kristus.

I tengah kegeluhenta paksa genduari enda, erbage kiniseran pe banci jadi sangana nderpa kita. Banci jadi erkiteken dampak Covid 19 si mempengaruhi kesehaten, perekenomian, persekolahan anak-anak pe arus melalui virtual si tentu saja membutuhken dana si bertambah asa si enggona sewaktu ia erlajar ku sekolah. Banci jadi pe kita kena PHK ibas ingan erdahin nari eriteken dampak Covid 19, usaha si menurun, melala turah perbeben ibas jabu. Enda kerina jadi kiniseran si paksa genduari sangana ialaken kita. Erkiteken dampak Covid 19 pe lanai kita sidahi-dahin amin gia sitedehen, lanai kita si salamen bagi si enggona, lanai kita bersentuhen.

I tengah kiniseran si igejapken kita paksa enda, kai si arus ilakoken kita? Bagi usihen si isehken Paulus man banta, emekap :

1. Nehken Pujin/Kata Pergegeh

Enda banci ilakoken kita alu menggunaken ulih Teknologi Informasi  emekap melalui WA, SMS, Video Call, Telpon, Facebook, Youtube, rsd. Si sehken kerna kata pergegeh man senina turangta si deban. Banci si pakeken Kata Dibata, entahpe ende-enden puji, bagepe banci ka nge arah renungen Kata Dibata. Tek kita maka Kata Dibata si isehken bagepe kata pergegeh dingen ende-enden pujin tek kita  mpegegehi kalak si deban bagepe kita sendiri situhuna pe ngalaken kiniseran e.

2. Ertoto

Notoken dirinta, keluarganta, pelayanen gerejanta, pemerintahta bagepe kerina manusia segelahna tetap megegeh ibas ngalaken kiniseran bagepe tetap bertahan, sehat menjuah juah. Tetap setia erkiniteken man Tuhan. Bagi si isehken ibas Jakub 5:16b, “Pertoton kalak si benar ergegeh kel”.

3. Erdahin

Bagi Paulus si tetap setia erdahin nehken Berita Si Meriah amin gia ia ngalaken kiniseran, ibas kegeluhenta pe arus maka kita tetap erdahin. Arah pendahinnta banci si saksiken kuga Dibata tetap nampati kita ibas usaha pendahin si ilakoken kita seh maka tercukupi kebutuhen kegeluhen.

Bagem me kita ndalani kegeluhenta. Tetap membagun hubungen sosial si mehuli bagepe ngelakoken tanggungjawab sosialta alu nggeluh si sampaten, saling menguatkan. Guna sie banci sipakeken hasil teknologi informasi. Lanai kita nggeluh erbana-bana.

Tuhan masu masu kita kerina.

Pdr. Crismori Veronika Br Ginting Manik

GBKP Sitelusada

(GBKP NJAYO)

1 KORINTI 2:13-16

DEWASA KEGELUHEN PERTENDIN

Senina ras turang ibas gelar Tuhan Yesus Kristus.

Dewasa emekap sada tingkaten si mabai kita dem kepentaren ibas menyikapi keadaan si terjadi. Kedewasaan labo iukur alu umur sekalak jelma, tapi kuga ia menyikapi sada masalah seh pe ku ndatken sada solusi si mehuli guna ndungi sada persoalen. Tapi, asa gendurai enda enterem denga manusia si secara umur enggo metua, tapi secara sikap bagi anak-anak denga. Emaka, nina Paulus ibas 1 Korinti 13:11, “Asum anak-anak denga aku, pengeranangku, perukurku, ras pengertinku bali ras anak-anak. Tapi kenca aku dewasa, kutadingken kerina biak anak-anak e”. Enda nuduhken man banta maka ibas kalak si dewasa lanai lit teridah sikap bagi sekalak anak-anak, sabab enggo ietehna membedaken siapai si mehuli bagepe siapai si jahat, rukur alu kritis bagepe ibas tindakenna si rasional, ertanggungjawab, mandiri, jadi sekalak “pemecah masalah” si pentar. Bagem me kerna sekalak si ikataken dewasa.

Arah bahan PJJnta enda, ateta erlajar kerna “Dewasa Kegeluhen Pertendin” i tengah tengah gerejanta GBKP si enggo njayo,

Senina ras turang ibas gelar Tuhan Yesus.

Paulus nuratken suratna man perpulungen si lit i Korinti erkiteken lit terjadi persoalen-persoalen kerna kegeluhen ras kiniteken Kristen ibas gereja si enggo ipanteki Paulus i kuta Korinti. Sanga si e, Korinti eme sada kuta si mbelin si iingani erbage-bage bangsa, jadi ibu kota propinsi Akhaya, jajahen Roma. Kuta e terkenal erkiteken perbinaganna, kebudayanna si megah, lagu langkah si la mehuli si enggo biasa, ras agama-agama si erbage-bage pe lit ibas kuta e. Itengah situasi si bage rupana me Paulus nehken Berita Si Meriah man kalak si lit i Korinti.

Kai saja dage si isehken Paulus man perpulungen I Korinti, khususna ibas 1 Korinti 2:13-16 ?

1.   Kebenaren Pertendin (ayat 13)

Dage asum iterangken kami kebenaren pertendin man kalak si enggo dewasa kegeluhen pertendinna labo kami ngerana alu kata-kata si iajarken kepentaren manusia, tapi alu kata-kata si iajarken Kesah Dibata.Ijenda, Paulus mpeseh man perpulungen i Korinti bagepe man banta kerina maka ibas ia nehken pengajaren kerna kebenaren pertendin e, Kesah Dibata nge si mabai ia ngasup mpesehkenca alu mehuli. Kebenaren pertendin si isehken Paulus emekap kerna keselamaten manusia si pusatna emekap Kristus Yesus (2:2,5). Erkiteken kuasa Kesah Dibata me maka kebenaren pertendin e banci isehken man manusia. Dibata nehken kebenarenNa emekap man kalak si enggo tek dingen ipilihNa alu kuasa KesahNa. Bas ia lit kepentaren Dibata, si mabai ia ngasup ngaloken kerna Yesus Kristus me dalan keselamaten e. Kepentaren Dibata  petembil ras kepentaren manusia si asalna i doni enda nari emekap kepentaren doni, si labo ngasup ngaloken maka Yesus Kristus me dalan keselamaten e.

2.   Dewasa Kegeluhen Pertendin (ayat 14-15)

Tapi kalak si la lit ibas ia Kesah Dibata, labo ngaloken kasa kai si asalna ibas Kesah Dibata nari. La ia ngasup ngangkasa……….. Kalak si enggo dewasa kegeluhen pertendinna, ngasup ia ertimbang kerna kai pe….Paulus ngajarken man banta kerna kuga Kesah Dibata si lit ibas kegeluhen sekalak si tek nandangi kebenaren pertendin. Kalak si la lit ibas ia Kesah Dibata, labo ia ngaloken kasa kai si asalna ibas Kesah DIbata nari, ertina ia la ngaloken kebenaren pertendin e, la ia ngaloken maka Yesus Kristen me dalan keselamaten man manusia si tek bana. Engkai ? Erkiteken ibas kegeluhenna la lit Kesah Dibata, ia nulak kasa kai si rehna ibas Dibata nari, kegeluhenna  erpalasken kepentaren doni si mabai ia nggeluh pe bagi sura-sura doni enda. Kalak si nggeluh sue ras sura-sura doni enda, teridah ibas kegeluhenna “sician-cianen, bagepe mpeturah perubaten” (3:3), erlagu langkah si la mehuli (1 Korinti 5).

Tapi kalak si enggo dewasa kegeluhen pertendinna, ngasup ia ertimbang kerna kai pe. Enda me kap biak sekalak si enggo dewasa : sabab enggo ietehna membedaken siapai si mehuli bagepe siapai si jahat, rukur alu kritis bagepe ibas tindakenna si rasional, ertanggungjawab, mandiri, jadi sekalak “pemecah masalah” si pentar. Alu bage, sekalak si dewasa kegeluhen pertendinna maba kegeluhen si lit ibas kedamen, sebab ia enggo nggejapken perdamen si isehken Jesus Kristus si enggo nelamatken ia ibas dosa-dosana nari.

3.   Perukuren Kristus (ayat 16)

Ise kin meteh perukuren Tuhan ? Isekin ngasup ngajarken IA ? Tapi ibas kita lit kap perukuren Kristus.Ibas kita lit perkuren Kristus ertina alu penampat Kesah Dibata e, ngasup kita ngangkai kerna peratenNa ibas kegeluhenta, engkelengi bagi Kristus engkelengi. Bagi si isuratken ibas Filipi 2:5-8, ikataken maka :Perukurenndu bali min ras perukuren Kristus Jesus: Aminna gia tetap lit i bas Ia biak Dibata, erkuasa dingen ermulia Ia bali ras Dibata, tapi si enda la IpertahankenNa. Arah ukurna jine ItadingkenNa kerina si lit i bas Ia. Jadi seri Ia ras manusia; nggeluh bagi sekalak juak-juak. Janah teridah bagi sekalak jelma. Meteruk UkurNa, janah patuh Ia man Dibata seh matena pe; eme mate i kayu persilang. Ijenda icidahken man banta biak Kristus si dem alu kiniteruken ukur, bagem me pe ibas kegeluhen kalak si tek man Tuhan, dem kiniteruken ukur.

Senina ras turang ibas gelar Tuhan Jesus Kristus,

Kita selaku ngawan ni perpulungen GBKP, emekap persadan kalak si tek man Tuhan, maka ibas kegeluhenta pe lit nge perukuren Kristus si dem alu kiniteruken ukur. Enggo 79 tahun GBKP Njayo (23 Juli 1941-23 Juli 2020), ertina GBKP enggo dewasa, enggo mandiri. Mulai paksa si e GBKP terus berjuang guna banci mandiri secara teologi, daya bagepe ibas pendanaanna.  Kemandirian gerejaadalah suatu upaya bersama yang dilakukan secara terus menerus memperkembangkan segala kemampuan atau potensi yang dimilikinya dan dipergunakan secara bebas dan bertanggung jawab bagi persekutuan, pelayanan dan kesaksian.Kemandirian berarti memiliki kepribadian yang dapat berdiri sendiri dalam hubungan langsung dengan Kristus sebagai sumber segalanya. Ketergantungan kepada Kristus ini yang kemudian membawa kepercayaan orang ada “Kesatuan Iman” (Ef.4: 13) untuk saling membantu dalam menciptakan kemandirian, baik antar sesama , satu gereja dengan gereja yang lain, baik di dalam maupun di luar negeri .

Guna mendukung GBKP Njayo enda, tentu saja arus i dukung ngawan ni perpulungen GBKP si dewasa ibas kegeluhen pertendin, muat bagin alu mehuli ibas kegeluhen gereja, ernanam man jelma si enterem, jenari nehken pujin kemulian man Dibata. Ibas ngawan ni perpulungen GBKP enggo dewasa ibas erkiniteken maka lanai lit teridah sikap bagi sekalak anak-anak, sabab enggo ietehna membedaken siapai si mehuli bagepe siapai si jahat, rukur alu kritis bagepe ibas tindakenna si rasional, ertanggungjawab, mandiri, jadi sekalak “pemecah masalah” si pentar. Lanai lit “sician-cianen, bagepe biak si mpeturah perubaten, lanai lit lagu langkah si la mehuli.  Bagem me kerna sekalak si ikataken dewasa. GBKP pe njayo baik secara daya (ngawan perpulungen), dana (encukupi kerina kebutuhen si mendukung pelayanen si lit i tengah GBKP) ras teologina (emekap teologi si muncul ibas budaya Karo nari si gelari pe budaya kontekstual).  Selamat GBKP Njayo 79 Tahun (23 Juli 1941-23 Juli 2020).

Pdt  Chrismori  Veronika br Ginting

GBKP Rg Sitelusada 

(Hari Pendidikan/Penjemaatan TK PAUD)

Bacaan : Titus 1:1-4

THEMA : MPEGEGEHI KINITEKEN ALU PENGAJAREN

Senina ras turang ibas gelar Tuhan Yesus Kristus.

Pendidiken emekap salah sada hal si penting kel, erkiteken alu pendidiken banci ngobah keadaan doni enda ku arah si lebih mehuli. Pendidiken ibenaken ibas jabu nari, bapa ras nande jadi guru si pemena man anak-anak. Pendidiken si isehken emekap ibas bentuk pengajaren alu kata-kata entah pe usihen si isehken orangtua man anak-anak.

Anthony de Mello dalam bukunya Doa Sang Katak 2 Meditasi dengan Cerita menuliskan suatu cerita tentang betapa pentingnya pendidikan melalui teladan orang tua dan juga orang yang ada disekeliling kepada anak. Sedemikian ceritanya. Ada tiga orang anak yang dituduh telah mencuri buah semangka dan dibawa ke pengadilan. Mereka menghadap hakim dengan perasaan takut. Mereka berpikir akan menerima hukuman berat karena hakim itu dikenal sebagai orang yang sangat keras. Hakim itu juga seorang pendidik yang bijaksana. Dengan satu ketokan palu ia berkata, “Kalau di sini ada orang yang ketika masih anak-anak belum pernah mencuri buah semangka, silahkan tunjuk jari.” Ia menunggu. Para pegawai pengadilan, polisi, pengunjung dan hakim sendiri tetap meletakkan tangan mereka di meja mereka. Ketika sudah puas melihat bahwa tidak ada satu jaripun yang diangkat dalam sidang itu, hakim itu berkata, “Perkara ditolak”.

Turi-turin I datas enda ndai nuriken man banta maka penting kel usihen si mehuli isehken orangtua man anak, labo terjeng kata si ibelasken saja, tapi pe arah orat nggeluh tep-tep wari si teridah ibas perbahanen, jadi sada bentuk pengajaren kerna kiniulin si banci isehken orangtua man anak-anakna.

Ibas bahan PJJnta minggu enda, Titus 1:1-4, emekap surat Paulus si isehkenna man Titus, emekap anak Paulus si tuhu-tuhu rikutken kiniteken. Isehken Paulus ibas  suratna enda maka ia emekap sekalak persuruhen dibata  dingen rasul Yesus Kristus (ayat 1). Selaku sekalak persuruhen Dibata (hambanya Tuhan), maka kegeluhenna emekap iteruh dolat (otoritas) Dibata. Paulus tidak berhak atas dirinya sendiri. Tuanna me si berhak erkuasa nandangi kegeluhenna sebab ia me si mpuna persuruhen e. Sedangken, rasul  emekap utusen. Sebage sekalak utusen tugasna emekap ndalanken kai si iperintahken si enggo mengutus ia. Erkiteken si e lit wewenangna ibas erdahain su e ras si enggo iperentaheken tuanna.  Selaku sekalak persuruhen, Paulus arus patuh man tuanna si enggon nuruh ie, emekap Yesus Kristus.

Selaku sekalak persuruhen Dibata dingen rasul Yesus Kristus, kai saja dahin Paulus ?

Pemena  mpegegehi kiniteken anak-anakNa si terpilih. Peduaken, mabai anak-anakNa si terpilih e kempak si ngena ate Dibata rikutken pengajaren agama.

Enda encidahken maka selaku sekalak persuruhen Dibata bagepe selaku rasul Yesus Kritus, Paulus ertanggungjawab guna nehken pengajaren kerna erkiniteken man Tuhan man kalak si enggo ngaloken Tuhan Yesus ibas kegeluhenna sebage Juruselamatna. Memelihara iman orang-orang pilihan. Alu bage kinitekenna teridah ibas perbahanen si tep-tep wari bagi si ngena ate Dibata rikutken pengajaren agama. Ibas si e kerina, labo terjeng ngajarkenca saja siilakoken Paulus, tapi arus pe ilakokenna. Enda teridah tuhu arah kesetiaanna erkiniteken man Tuhan Yesus amin gia erbage kiniseran si  igejapkenna bagepe ibas perbahanenna alu tetap setia ersaksi kerna Tuhan man enterem jelma. Pengajaren kerna erkiniteken man Tuhan si isehken Paulus erpalasken pengarapen kerna kegeluhen si tuhu-tuhu si la erkeri-kerin (ayat 2). Dibata enggo erpadan guna nelamatken manusia ibas dosa nari. Janah padanNa e ilakokenna alu mereken AnakNa si Tonggal emekap Yesus Kristus guna nebusi dosa manusia. Enda me si ipembarken Paulus selaku persuruhen Dibata si Engkelini kita.

Arah surat Paulus man Titus enda, isehken man banta maka selaku sekalak si erkiniteken man Tuhan arus maka kinitekennta tetap paguh man baNa. Selaku orangtua, kita pe arus ka mperdiateken kiniteken anak-anak i tengah-tengah jabunta segelahna ia pe tetap setia erkiniteken man Tuhan. Guna si e, orangtua arus nehken pengajaren bagepe usihen si mehuli kerna erkiniteken man Tuhan ku anak-anak si lit i tengah jabu segalahna anak-anak pe tetap setia erkiniteken man Tuhan bagepe ndalani kegeluhen ibas dalan kebenaren Tuhan.

Selain pendidiken secara spiritualitas, arus ka pe isehken man anak-anak pendidiken guna intelektualitas. Pendidiken spiritualitas arus tetap isehken sendalanen ras pendidiken secara intelektualitas segelahna anak-anak ta jadi anak si pentar, bagepe tetap setia ndalanken kebenaren Tuhan ibas kegeluhenna. Alu bage, anak-anakta jadi sekalak anak si pentar baik secara spiritual (kecerdasan spiritual), kecerdasan intelektual, kecerdasan secara emosianal. Jadi, anak-anakta jadi anak si dem kepentaren si rehna ibas Tuhan nari.

Pendidiken ibereken man anak-anak mulai kin ia ibas bertin nari seh ku segedang-gedang kegeluhen. Kai saja si iajarken ? Ertoto, rende muji Dibata, erkiniteken man Tuhan bagepe orang nggeluh kalak si erkiniteken man Tuhan. Enda banci isehken orangtua man anak-anak ibas jabu, Selain si e, pendidiken ibas sekolah nari pe penting idatken anak-anak segelahna tambah ka pe pemetehna. Mulai kin ibas PAUD, TK, SD. SMP, SMA, S1, S2 seh pe ku S3.

“Mpegegehi Kiniteken Alu Pengajaren” enda tema PJJnta ibas minggu enda. Gerejanta emekap GBKP  pe ngelakoken dahin enda alu mehuli arah kegiatan pelayanen si ilakoken i tengah-tengah gereja. Pengajaren kerna Kata Dibata si isehken ibas Kebaktin Minggu, KAKR, PJJ, PA, ngapuli, pelajaren katekisasi/aloken, ras sidebanna. Alu bage, pengarapennta segelah kiniteken tetap paguh bagepe kiniteken e teridah ibas perbahanen si tep-tep wari.

Tuhan masu masu kita kerina. Amin.

Pdt. Crismori V. Br Ginting Manik

GBKP Sitelusada