Nats     : I Korinti  1 : 10-17

Tema    : Tetap Ersada  Ibas Kristus.

                (Nilahken Mara Sosial)

1.    Kini ersadan eme merupaken perbahanen Tuhan Yesus ope denga ia i Endesken man penguasa doni enda. Toto Yesus   “ Gelah ersada  ia bagi kam  ersada  ras Aku (Yohanes 17 : 11). Emaka situhuna kalak  si enggo nandai  Kristus, ras ngaloken  Kristus , jadi Juru selamatna maka wajib tetap ersada , sebab simpersadaken kalak sitek e eme Kristus sendiri.

Kini ersadan  merupaken sada kehamaten guna ndalani kegeluhen bagepe guna nehken keleng sapih-sapih  sienggo tek  man kristus, bagepe jemaat mula-mula , Perp ras  2 : 43-46.

Memang pepatahpe  ngataken : Ersada kita megegh/teguh, bercerai kita runtuh.  Kini ersadaan e , singerakut kekelengen, janah  lanai lit silebih hebat tapi seri kerina ilebe lebe Kristus, emaka tetaplah kita ersada ibas Kristus bagi temanta  wari /berngi ersada.

2.    Bagepe Rasul Paulus nehken suratna man Perpulungen Korinti gelah ibas membangun Perpulungen e harus mperdiateken kini ersadaan , sebab kai kai silakoken e labo seri ras doni  enda, adi doni  enda megatikal mengandalken diri sendiri tah diri  kalak sideban, janah mengabaikan kalak sideban ibas kegeluhen enda .

Emaka  itengah tengah  perpulungen  e maka mengatikal jemaat e  mengandalken seseorang janah mengabaikan  seseorang, ertina mujiken si A, menyudutken si B. Janah erdame sienggo jadi itengah tengah Jemaat Korinti.

Aku Arah Paulus, Aku Arah  Apolos, Aku Arah Kristus, teridah ijenda maka perpulungen e mengandalken kalak si idahna kelebihen kalak  sideban.

Alu tegas Paulus ngataken Ersada lah  ukurndu, janah ersadalah min  sura-surandu, ula turah perjengilen ula erpihak-pihak  ayat 10-13 . Perpesahen labo membangun, perpecahen labo reh majuna tetapi reh mundurna nge persadaan e. 

Kristus labo terbagi-bagi tetapi Kristus eme sada ,  sienggo  nebusi dosa manusia, janah  kerna Kristus nge siberitaken kalak si enggo  tek / rasul-rasul e.

Jadi itengah tengah persadanta gundari endape mengati  lit denga terjadi perpecahen, bagepe mengati lit itengah tengah jemaat membeda-bbedaken sada ras sidebanna. Pdt si A mantap, Pertua / Dikaken si A ahnge maka luar biasa, Nora Si A lakal bagi Nora  si B. Emaka erkiteken sie   maka  turah  perjengilen sapih-sapih perpulungen, bahkan sesama PT/DK pe lit  rusur  membeda bedaken.

Emaka perlukal si sadari maka perpulungen lit  Pertua , Diaken  lit Pdt eme erdanndanken  pemilihen Kristus, Kristus nge si netapken kita kerina.

3.    Situasi  doni  paksa gundari , baik  man kalak Kristen bagepe man kalak silenga ndai Kristus, terjadi rusur perbedan : pecah belah bas jabu, pecah ibas organisasi, pecah ibas masyarakat, bahkan pecah ibas gereja, la siangkan pengurus ras anggotana .

Enda  kerina  erkiteken perbahanen iblis sikin  merincuh maka persadan si enggo mehuli e atena  gelah hancur, bagi Adam ras Hawa i Taman  Eden, igoda iblis gelah man buah  kayu  e, emaka hubungen Dibata ras manusiasirang Kej. 3.

Adi kirta seri ras doni enda maka kematen Kristus e sda kebodohen siakap, tapi la seri kita ras doni enda maka  kematen Kristus e eme menuju keselamatan ( ayat  18). Kita si enggo ipersada  enda eme kita si enggo iperidiken ibas Kristus, bagi si iperentahken Kristus ajar-ajarNa guna meritaken, mperidiken  bagepe ngajari kerna  berita  simeriah.

Emaka  man banta  si enggo ersada ras Kristus, maka kita pe bagi Rasul Paulus eme meritaken Berita  simeriah ku  kerina jelama labo erpalasken gegehta, tapi  gegeh si  ibereken  Yesus Kristus man banta .

4.    Sierbanca terjadi  perpecahen  e, eme megati siakap kita si hebatna, ras perbahanenta rusur siakap si melalalna, bagepe megatika kita menyanjung seseorang ras menjatuhken seseorang. Emaka gelah ula jadi perpecahen e, maka kita tetap saling menghargai ibas Kristus, bagepe kita saling mendukung ibas sikugapana pe bas kegeluhen enda, kai pe si lakoken maka kerina harus gelar Dibata si er mulia, labo gelarta. Sebab kita i pilih eme meritaken perbahanen Dibata simbelin, sebab kita enggo ngaloken Perkuah Ate Dibata. (Band I Petrus 2 : 9 – 10).

Ersadalah ibas  Kristus, Erdamelah ras sesama manusia, ras sehkenlah tanggung jawabta sebagai kalak si enggo i persada Kristus.

Pdt  Andarias Brahmana

Ketua Klasis Jakarta Kalimantan

OGEN : EPESUS 1:3-6

TEMA : ERKITEKEN KELENG ATE-NA KITA JADI ANAK-ANAKNA

(Identitas Kalak Si Tek)

Senina ras turang kekelengen Tuhan

Ibas kita ndalani kegeluhenta si tep-tep warina, rusur kita iperhadapken alu pilihen-pilihen. Misalna, milih teman geluh, milih pemimpin, milih rumah, milih mobil, ras milih sidebanna. Ibas  milih teman nggeluh, misalna, entahpe ibas kita milih sekalak pemimpin, tentu saja si ipilih kita emekap sekalak si mehuli, si ertanggungjawab, setia, terteki, berkualitas ras pertimbangen-pertimbangen si debanna si ibahan masing-masing jelma. Di kune, kita me si ipepilihken, janah si milihsa emekap Dibata. Kuga adi Dibata pe erbahan kriteria-kriteria bagi sibahan manusia ibas IA milih kita? Apakah kriteria kinibayakaen, kepentaren, pendidiken, kebeluhen, kiniulin, bagepe ras sidebanna ibahanNa ?  Tapi, kepeken Dibata la bali ras manusia ibas milih kalak sitek man baNa jadi anak-anakNa. Dibata milih manusia labo erkiteken kiniulinnta, labo erkiteken ketutusenna nembah IA, labo erkiteken kebayakenta, labo erkiteken mejile rupanta, tapi erkiteken keleng ateNa man banta kerina manusia. Dibata milih kita tanpa syarat. Kita selaku manusia si erdosa (rusak total karena dosa), tuhu labo kita metunggung iadepenNa, tapi erkiteken keleng ateNa me maka kita ipilihNa jadi anak-anakNya.

Bagi ende-enden pujin ibas KEE 290:1-3 Labo Erkiteken Beluhku

Labo erkiteken beluhku, labo erkiteken pentarku

Tapi perbahan penampatNdu, mbelin tergejap bas ngasupku

          Labo erkiteken dahinku, labo erkiteken pangkatku

          Tapi perbahan perkuahndu, malem ateku tuhu-tuhu

Labo erkiteken ertangku, labo erkiteken bayakku

Tapi perbahan pemereNdu, pasu-pasuNdu simpar bangku

Ende-enden enda nuriken man banta maka kerina erkiteken perkuah ate Tuhan man manusia maka kita ipilihNa jadi anak-anakNa si ikelengiNa bagepe ipasu-pasuNa.

Arah bahan PJJnta ibas minggu enda, Epesus 1:3-6,  mari radu ras kita erlajar kerna kuga pandangen Paulus kerna Dibata milih dingen nentuken kita jadi anak-anakNa erkiteken keleng ateNa.

Senina ras turang ibas gelar Tuhan….

Pemilihen Dibata nandangi kerina kalak si tek man Kristus emekap jadi sada hal si penting man Paulus (nen Roma 8:29-33; 9:6-26; 11:5,7,28; Kolose 3:12; 1 Tes 1:4; 2 Tes. 2:13; Titus 1:1). Pemilihen (Yunani : eklego) enda nuduhken man banta maka Dibata milih bangsaNa si erkiniteken man Tuhan Jesus Kristus gelah nggeluh badia iadepen Dibata. I bas pandangen Paulus, pemilihen si ilakoken Dibata emekap sebage bentuk keleng ateNa man kerina manusia si ngaloken AnakNa, Jesus (Johanes 1:12), sebage bangsa pilihenNa. Pemilihen si ilakoken Dibata emekap pemilihan tanpa syarat. Dibata la erbahan syarat-syarat ibas IA milih manusia jadi anak-anakNa. Labo erkiteken perbahanen manusia si mehuli, entahpe erkiteken pengeranana si mehuli. Tapi kerina erkiteken keleng ateNa.

Paulus nehken maka doktrin pemilihen enda lit ibas kebenaren-kebenaren emekap :

1.    Pemilihen si erpusat man Kritus, pilihen enda ilakoken ibas persadan ras Yesus Kristus. Ope denga ijadiken Dibata doni enda, enggo ipilihNa kita jadi sikerajangenNa arah persadanta ras Kristus gelah kita badia dingen la ersalah ilebe-lebeNa. Erkiteken keleng ateNa (Epesus 1:4).

2.    Pemilihen ibas Kristus khususna bersifat kelompok, emekap pemilihen persadan kalak si tek man Kristus “kula Kristus” (Epesus 4:12).

3.    Pemilihen kalak guna iselamatken ibas Kristus, isehken man kerina manusia, bersifat universal (Yohanes 3:16-17; 1 Timotius 2:4-6; Titus 2:11; Ibrani 2:9). Kalak si terpilih emekap sekalak si erkiniteken man Tuhan Yesus Kristus.

Ijenda si idah maka Dibata milih manusia labo erkiteken IA enggo ngidah kiniulin si lit ibas manusia. Dibata milih manusia erkiteken keleng ateNa bagepe sura-suraNa. Ibas pemilihen si enggo ilakoken Tuhan, “enggo itentuken” (Yunani : prooroizo) Dibata bena-benana nari maka kerina jadi sue ras sura-sura Dibata ibas pemilihen si ilakokenNa; si igelari pe predestinasi. Jadi, predestinasi terdiri ibas 2 bagin, emekap pemilihen (election) ras penolaken (reprobation). Pemilihen ijenda emekap kerna kalak si bengket ku surga. Sedangken, penolaken (reprobation)  emekap kerna kalak si bengket ku neraka. Pemilihan siilakoken Tuhan emekap nandangi persadan kalak si tek man Tuhan Jesus Kristus, si nggeluh “ibas Kristus’.

Kerna predestinasi enda, Calvinisme ngataken maka Dibata nentukan kegeluhen manusia guna ndatken keselamaten, bagepe lit ka kalak si ndabuh kubas ukumen rasa lalap erkiteken dosa-dosana. Johanes Calvin pe nehken maka  Dibata nehken pemereNa man manusia si la banci itulak manusia. Si imaksudken ijenda kerna si la banci itulak emekap adi Dibata enggo milih sekalak manusia guna iselamatken bagepe mereken Kesah Si Badia guna mpelimbarui dirina, arah kegeluhen si male jadi kegeluhen si mbaru, maka la lit ise pe si ngasup nulaksa. Dibata erdolat guna milih manusia, labo erkiteken kiniulin manusia entahpe kelebihen si lit ibas manusia e, tapi kerina erkiteken dolat Dibata. Adil nge ndia enda ? Si ikataken adil emekap kerina manusia si enggo ndabuh kubas dosa pasti mate. Adi Dibata milih manusia guna iselamatken erpalasken dolat Dibata e, enda kerina erkiteken keleng ate dingen guna memajuken kegeluhen kalak si tek man Tuhan.

Senina ras turang ibas gelar Tuhan…

Alu bage, sue ras tema PJJnta, Erkiteken Keleng AteNa Kita Jadi Anak-AnakNa; kai nge ndia si arus silakoken selaku sekalak si enggo ipilih Tuhan jadi anak-anakNa erkiteken keleng ateNa ?

1.   Tetap setia nggeluh ibas persadan ras Kristus.

Kalak si erkiniteken man Tuhan emekap anak-anak Dibata si setia nggeluh ibas persadan ras Kristus, ipasu-pasuNa alu erbage-bage pemere pertendin. Kerina enda ipakeken guna mpermuliaken Dibata. Sekalak si nggeluh ibas persadan ibas Tuhan, maka ibas kegeluhenna tetap setia erdalan ibas kebenaren Tuhan, nggeluh badia sentudu ras sura-sura Tuhan. Aminna pe gia tawaren doni enda terus ngusahaken guna ngerintak manusia kubas dosa, tapi erkiteken litna persadan si paguh ras Tuhan, la ia ndabuh kubas perbahanen dosa, tapi tetap nggeluh ibas Tuhan. Kalak si nggeluh ibas persadan ras Tuhan, emekap sekalak si setia nggeluh sue ras Kata Dibata si mabai kegeluhena tetap erdalan ibas kataNa.

2.   Nggeluh Ibas Keleng Ate

Kita e nggo ipilih Dibata jadi anak-anakNa erkiteken keleng ateNa. Jadi, biak geluh kalak si tek man Tuhan emekap biak keleng ate bagi keleng ate Tuhan man manusia. Keleng ate tanpa syarat. Keleng ate man Dibata bagepe keleng ate sapih-sapih kita manusia, subuk ibas jabu bagepe i tengah-tengah perpulungen. Alu bage, amin gia melala perbeben nggeluh paksa genduari enda, tapi ibas keadaan si mesera pe tetap banci jadi pasu-pasu man kalak si deban. Nggit nampati kalak si deban, amin gia lit ibas kekurangen. La nimai bayak lebe maka nggit nampati. Tapi, amin gia nggeluh mesera, tetap nggit nampati kalak si lit ibas kesusahen. Enda kerina ilakoken erkiteken enggo igejapken maka Dibata erkeleng ate man banta, alu bage kita pe arus nehken kekelengen man kalak sideban.

Terlebih i  tengah masa pandemi enda, si jadi tantangen man kerina manusia, ibas kerina ingan i doni enda, si tuhu berdampak ku bas ekonomi, kesehaten, budaya bagepe agama. Arus maka teridah biak-biak anak-anak Dibata emekap keleng ate arah nggeluh si sampat-sampaten segelahna radu megegeh ibas ngalaken perbeben enda.

Selamat Nggeluh Si Keleng-Kelengen. Tuhan masu masu kita kerina. Amin.

Pdt. Crismori V. Br Ginting Manik

GBKP Sitelusada

OGEN          :1 KORINTUS 13:1-13

TEMA          :METEH SI PENTINGNA I BAS KEGELUHEN

(Sehna Berita Si Meriah Man Kalak Karo)

Senina ras turang kekelengen Tuhan….

Surat Rasul Paulus si pemena man kalak Korinti enda itulisken erkiteken lit turah persoalen-persoalen kerna kegeluhen ras kiniteken Kristen ibas gereja si enggo ipanteki Paulus i kuta Korinti. Sanga si e Korinti eme sada kuta si mbelin si iingani erbage-bage bangsa, jadi ibu kota propinsi Akaya, jajahen Roma. Kuta e terkenal erkiteken perbinaganna, kebudayanna si megah, lagu Langkah si la mehuli, ras agama-agama si erbage-bage si lit ibas kuta e.Persoalen-persoalen pokok si man hadapen Rasul Paulus e me kerna perpecahen-perpecahen ras lagu langkah si la mehuli si lit ibas perpulungen, kerna lagu Langkah perjabun, persoalen-persoalen perpulungen, bagepe ras si debanna. Khususna ibas bindu 13 nuriken kerna pemere Dibata si mbelinna man anak-anakNa eme kekelengen.

Keleng ate labo terjeng kata si ibelasken tapi kerna kai siilakoken. Keleng ate labo hanya kerna penggejapen tapi pe kerna perilaku kegeluhen tep-tep wari, Keleng ate jadi karakter kegeluhen kalak si erkiniteken man Tuhan Jesus. Erkiteken si e, ibas 1 Korinti 13:1-13 enda, isehken Pauluskerna :

1. Keleng ate. (ayat 1-3)

Paulus menaken bindu 13 enda alu ngataken “Bicara beluh kel pe aku ngerana ibas kerina cakap manusia janah cakap malekat pe, tapi adi la aku erkeleng ate man kalak si deban, maka kai si kubelasken e la lebih asangken gung si erbulnang ntah penganak si erdeping” (ayat 1). Enda nuriken man banta maka ibas erbage-bage kebeluhenta subuk kebeluhenta ngerana ibas kerina cakap manusia janah ibas cakap malekat, lit ibas kita pemere ernubuat, si eteh kerina rahasia, lit ibas kita kerina pemeteh, ngasup mindahken deleng erkiteken kiniteken man Tuhan, numbangken kerina erta-erta, bagepe ngkorbanken diri seh mate guna ndatken kemegahen; tapiadi la lit keleng ate bas kita maka labo lit gunana kerina e man banta. Jadi, keleng ate jadi prinsip nggeluh kalak si e rkiniteken man Tuhan Jesus. Keleng ate si imaksudken ijenda emekap keleng ate, bagi keleng ate Dibata man manusia, keleng ate Agape, keleng ate si la ngarapken balasen, keleng ate si engkelengi erkiteken kekelengen, keleng ate tanpa syarat.  Bagem me kita ibas nehken keleng ate man sapih-sapih kita manusia

2. Sifat Dasar Keleng Ate (ayat 4-7)

Ibas ayat 4-7 enda, isehken Paulus kerna karakteristikkalak Kristen si erkeleng ate, emekap ia arus megenggeng, mehuli, la percian, la meganjang ukur, la sombong, la mekarus, la encariken untung man bana saja, la pergelut, la ngkira kesalahen kalak, la meriah ukurna adi kalak erbahan si jahat, ikut ermeriah ukur ibas si benar, ngasup nggengken kai-kai pe, tek maka lit si mehuli ibas kerinana, tetap erpengarapen dingen sabar ibas kai-kai pe. Kerina karakteristik keleng ate enda enggo icidahken Tuhan Jesus ibas biak-biak kegeluhenNa si jadiusihenta. Ibas masa pelayanen Jesus, pelayanen si ilakokenna labo hanya IA nehken pengajaren kerna keleng ate, tapi IA sendiri enggo ngendesken kesahNa i kayu persilangguna manusia sebage tanda keleng ateNa si mbelin man manusia si perdosa. Erkiteken si e, kita erkeleng ate erkiteken Tuhan Jesus Kristus enggo leben engkelengi kita. Keleng ate mabai kita tetap berpikiran positif nandangi kalak si deban, makeken kerina kinibeluhen, kiniliten, bagepe kerina  pemere Dibata si lit ibas kitaguna kiniulin ibas kegeluhen bagepe ibas nehken tanda keleng ate man kalak si deban.

3. Si pentingna Emekap Keleng Ate (ayat 8-13)

Paulus nehken man banta kerina maka keleng ate emekap hal siutama asangken  pemere-pemere Dibata si debanna. Kiniteken la rikut ras keleng ate, la lit ertina. Pengarapen la rikut ras keleng ate maka kegelapen me ngenca si idatken kita. Erkiteken si e keleng ate emekap penggenapan iman dan pengharapan.

Kekelengen la erkeri-kerin. Adi ernubuat masap kap, ngerana ibas erbage-bage cakap Kesah ngadi me, janah pemeteh pe masap nge. Paulus mengkritik perpulungen Korinti si menganggap maka pemere-pemere Dibata enda jadi hal si utamana ibas kegeluhen, erbahanca perpulungen e lanai nehken keleng ate (mengabaikan kasih). Padahal pengajaren si isehken Tuhan man banta emekap “Kelengilah Tuhan Dibatandu asa ukurndu, asa tendindu, dingen asa gegehndu lit. Enda me perentah si mbelinna dingen si pentingna. Sipeduaken bali ras si ndai eme, “Kelengilah temanndu manusia bagi kam ngkelengi dirindu.” (Matius 22:37-39). Erkiteken si e kegeluhen kalak si tek man Tuhan emekap nggeluh nehken keleng ate.Bagi si isehken ibas 1 Korinti 13:13, “Dage lit telu si tetap arus idalanken, eme: erkiniteken man Tuhan, erpengarapen man Dibata, erkeleng ate man kalak si deban, janah si pentingna ibas si telu e, eme engkelengi kalak si deban”.

Senina ras turang ibas gelar Tuhan Jesus..

Ibas kita ngorati Kata Dibata bahan PJJnta minggu enda, tuhu jadi sada persinget man banta, bagepe mengevaluasi kita kerna kegeluhenta selaku sekalak si erkiniteken man Tuhan. Lit denga kita, kalak Kristen si encakapken kerna keleng ate tapi ibas kegeluhenta nggeluh denga kita ibas percian, meganjang ukur, sombong, mekarus, ncariken untung man banta saja, pergelut, ngkirai kesalahen kalak. Tentu enda kerinana arus sitadingken, sabab keleng ate si isehken kita emekap keleng ate si la ngarapken upah, keleng ate tanpa syaratbagi keleng ate Tuhan man manusia.

Keleng ate Tuhan si enggo sigejapken emekap ibas IA enggo nelamatkan kita ibas dosa nari, mabai kita nehken keleng ate man kalak si deban. Arah bahan PJJnta enda, erlajar kita arah keleng ate si enggo isehken Tuhan Jesus Kristus man banta, emekap keleng ate si nggit mereken kegeluhenNa guna keselamaten manusia. Keleng ate labo terjeng cakap saja tapi seh pe kubas perbahanen tep-tep wari simaba kiniulin man kalak si deban.

Ibas kita mperingeti 131 tahun Berita Si Meriah seh man kalak Karo, si ibaba Badan Zending Belanda emekap NZG. Erkiteken si e maka ibas Minggu enda, 18 April 2021, kita mperingeti 131 tahun sehna Berita Si Meriah man kalak Karo. Tentu saja Badan Zending Belanda emekap NZG enggo nggejapken keleng ate Tuhan ibas kegeluhenna si enggo mereken keselamaten erkiteken perkuah ateNa.  Ibas enggo igejapken keleng ate Tuhan si mbelin, si enggo nelamatken manusia ibas dosa nari, erbahanca maka alu ermeriah ukuria nehken Berita Si Meriah e man kalak Karo. Erkiteken si e me maka kalak Karo bengket kubas persadan kalak si erkiniteken man Tuhan Jesus janah terus ertambahna Kalak Karo si erkiniteken.

Senina ras turang ibas gelar Tuhan

Selaku sekalak si enggo nggejapken keleng ate Tuhan si enggo nelamatken kita manusia ibas dosa nari alu ngendesken kesahNa man banta, endanjemba kita pe nggit nehken keleng ate man sapih-sapih kita manusia terlebih-lebih man senina ras turang si lit ibas kiniseraan, si tuhu-tuhu ngarapken penampatta segelahna ia banci ndalani kegeluhen alu mehuli. Contohna, nandangi kerina kekelengennta si terdampak bencana alam i daerah NTT rikut pe ije anggota perpulungen GBKP Perpulungen Kupang. Keleng ateta man sapih-sapih kita manusia mabai kita kerina ermeriah ukur nggeluh si sampat-sampaten terlebih ibas ngalaken kiniseran. Erkiteken si e, sibahanlah aksinta guna encidahken keleng ate man kekelengenta si man sampaten, misalna man kekelengenta si terkena bencana, entahpe si debanna. Alu bage kita kerina kalak si erkiniteken man Tuhan banci jadi pasu-pasu man kalak si deban arah kita nehken kekelengen.

Kesah Si Badia si mpengasup kita nehken kekelengen man sapih sapih kita kerina manusia. Tuhan masu-masu kita kerina. Amin.

Pdt. Crismori V. Br Ginting Manik

GBKP Sitelusada