Ogen           : 1 Johanes 4:16b-21

Thema         : “Sehken Kekelengen”

Kekelengen eme salah sada hal si paling mendasar ras terpenting ibas kegeluhen manusia. Guna ndatken kekelengen, kalak nggit ngelakoken kai pe. Guna nehken kekelengen, kalak nggit nggalari erga si mehergana kal. Labo lalit alasenna adi turi-turin kerna kekelengen, sekalak bapa harus ngasamken kesah guna anakna, sekalak dilaki simate guna diberu sikeleng atena. Kekelengen sibagenda eme kekekengen siumum. Dibata mereken kapasitas man kerina jelma guna ngergai, ersura-sura, bagepe ndalanken kekelengen. Kesadaren sebage sesama manusia rusur kal nggo cukup sebage alasen guna sikeleng-kelengen. Hubungen si unik antara dua kalak, ntah hubungen dareh ntah hubungen kekelengen, jadi palas simegegeh guna sikeleng-kelengen.

Perintah utama man manusia eme ngkelengi Dibata ras teman manusia bagi ia ngkelengi dirina jine. Persoalenna, apakah kita nggo ngkelengi alu sempurna? Amin pe sikeleng-kelengen merupaken perbahanen si seharusna lit ibas diri kalak Kristen, kepeken la kerina banci ndalankenca alu sempurna. Mbue kalak ibas ngkelengi enda tanggung-tanggung denga isehkenna kekelengen e. Perbahanen si tanggung-tanggung enda tentu saja ndauh arah cukup. Bahkan lit denga si segat atena temanna manusia.

Kekelengen eme biak Dibata. Jadi adi kita alu intensif ersada ras lit ibas kita hubungen simbages ras Dibata (rembak ras Dibata) arah Kristus maka biak Dibata e pasti maler bagepe jadi warna dominan ibas dirinta. Guna jadi kalak Kristen si produktif ibas mereken buah (kekelengen) guna kemulian Dibata, kita harus leket kempak Kristus, sumber gegeh ibas kegeluhen kinitekenta. Sebab, kekelengen Dibata ibas dirinta pasti menggerakken kita guna ngelitken semangat sikeleng-kelengen. Kalak si ngkelengi tentu upahna mbelin i doni bagepe i surga.

Kai situhuna sierbanca kekelengen e jadi la sempurna? Penulis surat 1 Johanes ngataken maka situhuna kebiaren me si erbanca kekelengen e terambati. Kebiaren eme ancamen simbelin ibas nehken kekelengen. Kekelengen Dibata ibas dirinta tentu banci meneken kebiaren, tentu saja kebiaren si uluna kempak sikap ngeraguken ras la tek nandangi kuasa Dibata. Kekelengen Dibata lalap hadir mereken dame bagepe dame e labo mereken ingan nandangi kebiarenta. Kebiaren eme bagin arah penguasan dosa ibas diri manusia, erkiteken man kalak sitek lanai lit siperlu ibiarken sebab simbelinna kal pe kebiaren enda nggo italuken Kristus eme kematen. Erkiteken sie, man kalak simereken dirina ikuasai Dibata maka ibas dirina nggo lanai lit kebiaren bagepe kearun ate.

Kekelengen Dibata erbanca sudut pandangta nandangi temanta manusia jadi berbeda. Adi lalit kekelengen Dibata, kita terjeng natap temanta manusia sebage musuh (bage me cara iblis mereken pengaruh la mehuli ibas kegeluhenta). Tapi, sanga kita megegeh ras Kristus bagepe lit ibas kita kekelengen Dibata, maka kita bakal natap temanta manusia sebage ayo Dibata si seharusna siergai ras sikelengi alu bulat ukur. Kalak si ngaku ngkelengi Dibata harus teridah arah perbahanen si icidahkenna alu ngkelengi temanna manusia. Perumpaman kalak samaria ncidahken man banta uga kin secara universal si la ibatasi kondisi, situasi, suku ras agama. Ibas kegeluhen siibereken Dibata tiap manusia tinepaNa lit perbedaan. Perbedan si lit e labo guna kita ngadili kalak tapi perbedan silit gelahna min guna saling melengkapi eme alu sikeleng-kelengen.

Salah sada teolog gelarna James Barnett ibahanna sada kajian kerna diakonia alu mbenakenca erban kajian kerna inti gereja sebage persadan pengikut Kristus si la nandai pemisahen antara rohaniawan ras perpulungen; ia kerina idilo ngelai, ngusih Kristus. Pada dasarna diakonia berarti pelayanen ntah pe penampat idorong arah kekelengen; bena-benana bersipat pribadi, kedungenna berkembang jadi komunitas. Ibas pemahamen Padan Sindekah, khususna ibas lingkungen bangsa Israel, ngelai la ipahami sebage sada hal si lalit ertina. Undang-undang keimaman mencakup kininggiten guna saling melayani. Tapi ibas undang-undang Junani-Romawi istilah diakonia lit ije konotasina mpekitik kalak sebab e idahiken sekalak budak. Tapi, ibas Padan Simbaru istilah enda muncul lebih kurang 100 kali, ipakeken terutama guna pelayanen man jelma sinterem, bahkan man si lebih rendah kedudukenna. Pelayanen man kerina manusia ipahami pe sebage pelayanen man Tuhan. Jesus Kristus mereken pengertin ras isi simbaru nandangi istilah enda. Jesus me Diaken simbelin. Alu bage sikap kegeluhen sibenar arah sekalak pengikut Kristus eme sebage sekalak pelayan, diaken, bagi uga icontohken Kristus jine.

Diakonia la terjeng aktivitas ras pelayanen erpalasken hobi, idorong perkuah ate tapi kesadaren maka kita nggo iselamatken Tuhan pelin-pelin erkiteken lias ateNa, emaka kita idorong guna mbagiken ras ndalanken kekelengen man teman manusia. Diakonia merupaken dahin si iendesken Tuhan, man banta; kita idilo guna jadi tanda-tanda penampat ras keselamaten man teman manusia. Jadi, penampat man teman manusia e idorong arah kiniteken ras pengataken bujur man Tuhan. Alu bage kerina sindalanken diakonia sekaligus iingetken gelah menguji motivasina: apakah kerina e tuhu-tuhu merupaken ungkapen kiniteken ras pengataken bujur bagepe guna nampati teman manusia si ilayani, ntah kin terutama guna mpepuasken diri ras ambisi sindalanken diakonia e. Sekalak teolog Van Klinken mencatat piga-piga motivasi, misalna kekelengen man teman manusia, kiniulin, ate mekuah, hubungen emosional, pengataken bujur, rsd. La mesunah menilai apakah kerina enda mehuli ras lang. Tapi menurutna lit dua motivasi si seharusna seh kal megegehna, eme solidaritas ras keadilen. Jurgen Moltmann sendalanen ras Teologi Pengarapen sijadi ciri khas perukuren teologisna nambahken sada motivasi ntah pe gegeh pendorong eme pengarapen. Itegaskenna maka diakonia eme ngikutken Jesus, ibas sudut pandang Kinirajan Dibata si menerobos bengket kubas doni. Diakonia harus jadi dalan kegeluhen si nandakenca kegeluhen perpulungen Kristen, arah sie banci mengatasi perbedan etnis, sosial ras gendes. Perpulungen memang iakui sebage tanda ras antisipasi arah kai si iarapken. Tapi Kinirajan Dibata si menerobos e la banci ibatasi ibas gereja, erkiteken Kesah Dibata bertindak sue ras sura-sura ras padan Dibata simehuli guna kerina tinepa.

Sasaren khusus bahan PJJ enda eme mpeturah gelahna kerina perpulungen mediate nandangi unit-unit pelayanen diakonia ibas gerejanta GBKP. PAK Gelora Kasih, YKPD Alpha Omega, PPOS, Komisi HIV/AIDS & NAPZA, Badan Pusat CUM, YAKES GBKP, Komisi Penanggulangan Bencana, Yayasan Ate Keleng, Pusat Pelatihan Pertanian Organik, Tim Posko Sinabung. Unit-unit pelayanen enda ipake Dibata arah gerejanta lako mpepaler pasu-pasu Dibata man doni enda. Arah enda me banci sigejapken uga kelengna Dibata man banta kerina. Erkiteken sie ergiah-giah ras terbukan min ukur perpulungen muat bagin nampati unit-unit pelayanen diakonia silit ibas gerejanta enda alu ikut notokenca, ndahisa, bagepe nampati ibas dana. Apai kai bas masa pandemi bagenda aksi-aksi sosial banci ka nge ilakoken la gia terban kita reh guna ndahisa sibanlah aksi mpepulung dana ibas runggunta, sektorta, arisenta, rsd guna nehken kekelengen ku unit-unit pelayanen diakonia gerejanta enda.

Guna lebih mbages kita ngerungken kerna thema PJJ enda bagepe pendalankenna ibas kegeluhenta, banci sioge arah kesaksin sekalak teolog eme Henri Jozef Machiel Nouwen. Ikatakenna ibas salah sada tulisenna, “kita tahu bahwa tanpa keheningan, kata-kata kehilangan maknanya. Tanpa mendengarkan, berbicara tak memulihkan. Tanpa jarak, kedekatan tak dapat menyembuhkan”. Selama lebih 20 tahun, Nouwen ngajar ibas piga-piga institusi pendidiken si terkenal, Universitas Notre Dame, Universitas Yale, Universitas Harvard. Sada paksa, sekalak penulis spiritualitas sideban gelarna Jean Vanier nuruh sekalak pernanden guna ndahi Henri Nouwen janah nampati kegeluhen tep-tep wari Henri Nouwen. Sebelumna, Henri Nouwen sempat menulis gelar Jean Vanier si ikagumina ibas sada bukuna, amin pe ia lenga pernah jumpa ras Jean Vanier. Pernanden e tading ibas rumah Henri Nouwen selama piga-piga minggu, ngurusi keperlun Henri Nouwen tep-tep wari. Janah Henri Nouwen lalap nimai kai nge siipesanken Jean Vanier arah kerehen pernanden enda. Tapi, kepeken seh asa minggu terakhir pernanden enda erdahin ras Henri Nouwen lalit kai pe dat Henri Nouwen pesanna ntah pe lalit pernanden e ngata kai pe. Kepeken, kerehen pernanden e jine sijadi pesan siatena ipesehna arah Jean Vanier. Pengalamen enda erbekas kal man Henri Nouwen. Singkat cerita, Nouwen kedungenna erban keputusen guna nadingken karier akademisna situhu-tuhu nggo mantap janah bergabung ia ras komunitas L’Arche Daybreak i Ontario, Kanada. Enda komunitas si khusus ngelai dilaki ras diberu alu disabilitas intelektual, janah tertarik kal akap Henri Nouwen. Ibas ingan enda me ia jumpa ras teman-temanna, eme ia sikin ibas lebe-lebe masyarakat lalap ianggap sebage manusia “la normal” bagepe lalit gunana. Tapi, ibas pertemanenna e, Nouwen ndatken kekelengen Dibata situhu-tuhu. Salah sadana eme pertemanen Nouwen ras sekalak anak perana singgeluh alu disabilitas intelektual si paling parah. Adam Arnett gelarna. Pertemanenna ras Adam kedungenna ibahanna kubas sada buku si erjudul Adam: God’s Beloved. 11 tahun kenca sie kegeluhen Nouwen i L’Arche ngerana kerna makna kegeluhen tep-tep wari raduken ras teman-temanna, khususna Adam, si rusur kal iasingken masyarakat erkiteken ianggap “la normal”. Sada kegeluhen situhu-tuhu mejile. Sada kegeluhen si la efisien, tapi seh kal badiana.

Berkaiten kerna kesaksin Henri Nouwen enda lit sada judul artikel si itulis Philip Yance, “The Hole Ineffiency of Henri Nouwen” ibas majalah Christianity Today tahun 1996. Artikel singkat e merupaken kesaksin Philip Yance kerna kegeluhen ras karya spiritrual Henri Nouwen. Yance tuhu-tuhu terkesan ibas keputusen Nouwen secara radikal guna mereken dirina ras kegeluhenna i komunitas L’Arche bagepe mereken waktuna erjam-jam guna merawat Adam Arnett. Ituliskenna Yance kai sinilakoken Nouwen tiap wari eme mperidi ras mencukur kumis, gosokna ipenna, isurina bukna, negu-negusa sanga ia berusaha man. Perbahanen sederhana si iulih-ulihi e man bana nggo jadi sada peribadahen man Tuhan. Tuhu-tuhu la menarik menurut penatap doni, tapi tuhu-tuhu enda perbahanen badia. Nina Henri Nouwen, “bukan Adam, tapi aku, sindatken manfaat utama arah pertemanen kami”. Singkatna, ibas kondisi fisikna sibage, Adam nggo jadi guru man Nouwen.

Pdt. Andreas Pranata Meliala, S.Th

GBKP Rg. Cibinong

Ogen    : Masmur 16:5-11

Thema  : “Moria Si Paguh”

Manusia la pernah meteh alu pasti kegeluhenna ibas masa depan. Kita terjeng ndalanisa ngenca. Ibas perdalanen kegeluhen enda. Manusia iperhadapken alu erbage-bage pilihen. Mawen-mawen, manusia kebenen pemetehna guna nentuken pilihen. Sanga pilihen e la tepat, terjebak me manusia e ibas kebiaren bagepe ndabuh ibas kejahaten. Ngadapi kegeluhen enda pemasmur, erban dua pilihen eme ngendesken kegeluhenna kempak Tuhan bagepe mbangun kegeluhen radu ras kalak sibadia. Emaka seterusna pemasmur erban penekanen gelah kegeluhen e idalani alu kebenaren. Kegeluhen sibage me sibanci inanami ras mereken kiniulin ras kemalemen ate.

Emaka perlu me kita ngaloken ras ngataken bujur kerna kerina pasu-pasu Tuhan ibas kegeluhen enda. Manusia nggo erban sukat-sukat nandangi kegeluhen enda. Manusia ndarami sukat-sukat e alu erbage-bage cara. Tempa-tempa sukat-sukat siibahan manusia e nentuken kegeluhen si sempurna. Padahal, sanga manusia seh ibas kai sinisurakenna tetap nge ia la tenang. Sukat-sukat siibahan manusia e la mereken jaminen kegeluhen siermalem ate. Memang, silebih sedih ka, target siiayaki e la pernah tersehi. Kegelisahen ras kesedihen terus mewarnai kegeluhen manusia kidekah kegeluhenna itentuken arah dirina jine. Daud erkadiola nandangi dosana emaka ipelimbaruina pemahamenna kerna Tuhan. Situhuna Tuhan netapken kerina kegeluhen manusia. Tuhan mereken bagepe netapken bagin sijadi sikerajangen manusia. Siutama, manusia ngataken bujur kerina siibereken Tuhan man bana.

Perlu ka nge kita megiken sora pusuh. Manusia mesera kal akapna netapken pilihen simbue, tapi manusia cenderung netapkenca ibas sukat-sukat doni. Ijenda me fungsi pusuh siibereken Tuhan man manusia. Pusuh sibersih merupaken bagin arah cara Tuhan nehken sura-suraNa man manusia. Erkiteken sie, patut sipekena-kena kebersihen pusuh bagepe megiken sora pusuhta. Alu bage, perukuren ras perbahanenta ngena ate Tuhan.

Kita pe perlu natap kempak Tuhan. Natap kempak Tuhan berarti ngelakoken perintah Tuhan, siap kita ngaloken kai siisehken Tuhan nandangi kegeluhen anak-anakNa. Anak-anak Tuhan banci tek, maka kegeluhen anak-anak Tuhan lit ibas perlindungen Tuhan. Tuhan lalap mimpin anak-anakNa. Kiniteken sibagenda mpegegehi kalak sitek ndalani kegeluhen enda. Emaka ngataken bujur, megiken sora pusuh, bagepe natap kempak Tuhan merupaken kunci man manusia ndatken kemalemen ate si sempurna. Manusia si nggeluh ibas Tuhan maka kegeluhenna dem alu kemalemen ate bagepe kedamen, bagepe nggejapken kegeluhen enda seh kal ulina.

“Tuhan tidak bisa hadir di mana-mana, itu makanya Tuhan menciptakan ibu-ibu” (peribahasa Yahudi). Peribahasa enda tentu la bermaksud mpekitik kuasa Dibata, tapi mpebelin peran pernanden sebage wakil Tuhan i doni. Diberu sihebat e eme diberu si nggit nggeluh susah ras dilaki si ikelengina. Sedangken dilaki sihebat eme dilaki si labo pediatna diberu si ikelengina nggeluh susah. Sebab ibas jaman gundari dahin dilaki nggo banci idahiken diberu, tapi lit dahin diberu si la ngasup ilakoken dilaki asa ndigan pe, kerna mupus anak begepe mere minem. Lit pendahin diberu si labo banci idahiken dilaki, tapi menam kerina pendahin dilaki gundari banci idahiken diberu.

Agustinus sekalak Bapa Gereja mereken pengaruh cukup mbelin ibas kegeluhen sejarah gereja. Ia tubuh ibas tahun 354 i Tagaste Afrika Utara. Padahal masa laluna seh kal melketna. Tapi nandena Monika la ngadi-ngadi notoken ia gelah ia nggeluh ibas pertobaten. Tapi pertoton nandena kepeken labo mis kal berhasil. Tapi nandena eme nande si megegeh guna terus notoken Agustinus. Sanga Monika ertoto ibas gereja janahna ngandung, reh me Uskup Ambrosius ngapuli Monika janah ngerana ia man Monika “seorang anak yang begitu banyak didoakan dengan air mata, mustahil akan binasa”. Kedungenna pertoton Monika ialoi Tuhan. Agustinus bertobat, emaka iperidiken Uskup Ambrosius ia ibas tahun 387 sanga umurna 33 tahun. Ibas hal enda banci siidah Monika nggo banci maba anakna man Jesus guna ipasu-pasu ras ipake sebage alat ibas tan Tuhan. 27 Agustus eme perayan Santa Monica. Ia eme sekalak si lalap notoken Agustinus janah jadi pribadi si paling berpengaruh man kerina pernanden bagepe ndehara. Jadi penungkunen man banta kerina ise diberu hebat simereken pengaruh ibas kegeluhenta, ise Monika ibas kegeluhenta?

Paus Fransiskus pernah ngataken “keluarga tempat pengampunan”. Lalit keluarga si sempurna. Lalit orangtua si sempurna. Lalit perjabun si sempurna. Lalit anak si sempurna. Kita saling mengeluh kerna sada ras sidebanna. Lalit keluarga si sehat janah keluarga asa ndigan pe labo sehat adi la idalankenna saling mengampuni ibas tengah-tengah jabu. Pengampunen e seh kal pentingna guna kesehaten emosi ras ketahanen pertendin bagepe kinitekenta. Adi lalit pengampunen, tentu keluarga e pe sakit. Eme sebabna keluarga harus jadi ingan simaba kemalemen ate, labo kematen, ingan guna ndatken tambar labo ingan nambahi pinakit. Ingan ndatken pengampunen, labo rasa bersalah.

Secara umum tentuna Kata Dibata enda itujuken man banta kerina, tapi secara khusu itujuken pe man Moria siberulang tahun 63-ken. Kerna pelayanen ras pelayan, genduari Pandita GBKP nggo lebih mbue diberu asangken dilaki, kerna Pertua/Diaken pe ibas piga-piga runggun nggo lebih mbue diberu asangken dilaki. Soal erkebaktin teridah ijapa pe lebih nterem Moria sipulung ibas gereja bagepe ibas kebaktin-kebaktin sideban asangken Mamre. Tapi perlu jadi cataten, persoalen pe rusuren ka nge turah ibas kategorial Moria asangken Mamre. Persoalen seragam, tujun retret, adangen, terlambat diakonia, jenis gulen, sisa gulen ras sidebanna ulanai min mpeturah kinilaersadan.

Sekalak diberu si pentar ibas kegeluhen si teruji seh kubas pusuhna. La kulit ntah arah darat ngenca mejile tapi ibas pusuhna pe mehuli. Tergejap keleng atena arah kinijingkatenna ras penikapkenna jabuna ras kerna paksa sireh. Ertina kalak si labo asa gedang bukna ngenca perukurenna ertina la pragmatis carana rukur. Kerina kai si ilakokenna lit kerina gunana, berarti diberu si pentar eme diberu si la ikut-ikuten, labo diberu si mbiar la ngikuti trend ntah terjeng korban mode. Adi lit moria sibagenda telap nari nge mamre sindatkenca. Adi lenga, ibas ulang tahun moria sekali enda, sijadiken momen guna evaluasi diri ras erlajar jadi sekalak moria si pentar. Menaken kin arah erkemalangen man Dibata.

Pdt. Andreas Pranata Meliala, S.Th

GBKP Rg. Cibinong

Ogen           : Ulangen 18:9-13

Thema         : “Setialah Man Tuhan”

Bahan PJJnta siibuat ibas Ulangen 18 enda merupaken persinget Musa man bangsa Israel gelah ia metenget sanga mbengketi taneh perpadanen eme Kanaan sebage pemere Dibata man bangsa e. Sebab bangsa sideban si ringan ijah nggo ngelakoken si la ngena ate Tuhan eme praktek kegelapen (ay. 9). Enda me alasen Tuhan nilahken ia iadepenNa. Persinget enda itujuken man bana sitek man Dibata ibas konteks Musa bagepe man banta ibas jaman gundari enda sitek man Jesus Kristus erkiteken litna kemungkinen ia nggo ipengaruhi lingkungen sekitar seh maka isalihkenna pengarapen janah bergantung ia kempak gegeh sideban si justru ngelawan Tuhan. Padahal Pustaka Si Badia alu jelas ngelarang kekristenan ngelakoken si la ngena ate Tuhan erkiteken Tuhan ngenca ulu gegeh kalak sitek. Tapi, kepeken mbue kalak Kristen tek ras ngelakoken praktek okultisme sebage tradisi nai-nai nari si enggo sieteh ras-ras.

Istilah okultisme asal katana eme ibas Bahasa Latin okultus lit ije ertina: terbuni, misteri, gelap. Setan lalap erdahin ibas hal-hal tertentu secara terbuni ras misterius (mesera ngaloken ras ijelasken rikutken perukuren manusia) guna nipu manusia si la meteh alu tepat seh maka tertipu janah rukur maka aliren e idatken arah Tuhan. Gundari enda setan reh seriusna erkiteken setan mulai lit alu erbage-bage kedok seh maka manusia natapsa guna ndemi kebutuhen rohani si la pernah ijumpai bagi New Age Movement, white magic guna penyembuhen ras sidebanna. Gelah lebih meyakinken ka, ia si tek nandangi aliren e nggit melayani kalak sideban alu la ngarapken upah. Padahal aliren e asalna ibas setan nari si lit alu penampilen situhu-tuhu menarik. Man kalak sierkiniteken, setan bakal tampil secara religius, misalna dukun simaba Pustaka Si Badia bagepe make pertoton sibiasana ipake kekristenan. Adi iperdiateken alu megermet, ibas Ulangen 18 banci ijumpai mbue perbahanen si la ngena ate Tuhan si lit denga terjadi seh asa gundari.

Musa mpersingeti ibas ayat 10, “Ola persembahken anak-anakndu ibas api i babo batar-batar persembahenndu. Ola pelepas bangsandu ertendung, ngoge tanda-tanda, ntah mpergunaken mangmang”. Memang setan enda nggit kal mereken kebayaken man jabu lepas jabu tapi kepeken ibas ia mereken kebayaken e sie kerina labo gratis, lit pindona tumbalna. Enggo pe rusur iidah praktek sebage rupana lit konsekuensina adi erpersukuten man setan, lalap ka nge manusia enda nembah man setan. Padahal ibas Johanes 8:44 nggo ikataken Jesus, “Bapandu si Iblis nge janah tuhu-tuhu kam anakna. Sura-sura si Iblis e nge si ikutkenndu. Nai nari Iblis pemunuh kap. La pernah ikapitina si benar, sabap lalit si benar ibas Ia. Adi erbual ia biakna nge, sabap ia perguak dingen bapa kerina kalak si perguak”. Emaka setan e pe tehna carana nipu kalak Kristen bagepe kalak si la erkiniteken. Musa pe mpersingeti praktek ertendung, ngoge tanda-tanda, ermangmang enda me cara mereken pengaruh man sekalak jelma gelah kalak e bene kesadarenna janah nggit ngelakoken kerina perintah si isehken man bana. Praktek enda tuhu-tuhu la ngena ate Tuhan. Setan enda pe kepeken nggo bengket kubas ilmu astronomi (ilmu perbintangan) seh maka lit me istilah astrologi. Adi isiksisi arah sudut pandang ilmu pengetahuan prinsip enda lit ije unsur kebenaren eme pergeraken bulan si mpengaruhi pasang surut laut. Tapi setan make sie guna nipu manusia. Emaka si jadi persoalen lit ka nge kalak Kristen enda pe tek nandangi hal sibage. Uga kin pe sada hal si ioge pasti leket ibas perukuren kalak si ngogesa, erkiteken si enda me Dibata ngelarang bangsa Israel guna ngoge tanda-tanda. Padahal situhuna kegeluhen manusia lit ibas tan Tuhan seh maka la perlu nari meteh masa depan erkiteken pimpinen Tuhan lalap ras ia.

“Ntah make guna-guna, janah ola pediat ia nungkun man begu kalak si enggo mate”. Ibas dunia okultisme, istilah si ipake eme spiritisme. Padahal Pustaka Si Badia ngataken maka kalak mate la banci berhubungen ras dunia kalak singgeluh, bage ka pe sebalikna. Tapi lit kemungkinen man manusia guna berkomunikasi ras setan.

Setan e erbage-bage carana mereken pengaruh man banta, tuhu-tuhu kreatif kal setan e ibas tiap pendahinna, secara teknologi, ketik saja arah internet, mbue si erban tawaren jasa kuasa kegelapen, lengkap ikut ras alamat bagepe nomor siman telponen. Man perbinaga lit penglaris, man pemimpin ntah pejabat lit penergang gelah malang kalak man cakapna, man preman lit tahan takil. Tapi kuasa setan e amin pe megegeh tapi lit nge tetap sibarna bagepe lit unsur ulihna si la mehuli. Simake penglaris megati la binagana ngenca laris, jabuna e pe laris, erkiteken lancar usaha, mbue sen. Usaha buka cabang, jabu pe buka cabang. Simake penergang la teruhenna ngenca mbiar man bana, ndehara ras anak-anakna pe mbiar ngerana ras ia seh maka la dame jabuna. Simake tahan takil memang la mempan kena sekin tapi mate ka nge erkiteken megus-gus kena aspal. Asa gundari lenga lit ilmu tahan aspal.

Kai dage faktor sekalak jelma mindo kuasa setan ibas ia erusaha? Mbue faktorna. Lit faktor erkiteken perkisat, kisat erdahin. Lit erkiteken penampat setan e meter, bagi singketep lacina. Lit erkiteken persaingen usaha, saingenta pake penglaris, adi kita pe lang ntah nandangi tutup nge usaha e. Lit faktor krisis, erkiteken gagal lalap ibas usaha, la megenggeng, la sabar.

Ibas media sosial pe mbue ibahan iklak-iklan penawaren jasa paranormal, peramal, guru mbelin sibanci nampati persoalen geluhta. Alu la isadari arah ngikuti aplikasi ras nonton acara silit ije pengaruh okultisme perukurenta bagepe sudut pandangta nggo ibabaina dingen ikuasai kegelapen. Seh maka riahen dingen tutusen ateta nonton ras make aplikasi e asangken lawes kebaktin bagepe ngoge Pustaka Si Badia. Emaka lanai bo kita setia man Tuhan, hubungenta ras Tuhan icedai alu teknologi silit hubungenna ras okultisme. Emaka selaku perpulungen Tuhan megermet kita bagi siikataken Musa, sijaga hubungenta ras Tuhan ola kita nggit ibabai teknologi silit hubungenna ras okultisme gelah ula siakap erkiteken ulih ramalem teknologi sierbanca kita ndatken kai pe dingen mejuah-juah tapi sisadarilah maka Dibata nge simereken kerina ibas geluhta.

Pdt. Andreas Pranata Meliala, S.Th

GBKP Rg. Cibinong