OGEN : KOLOSE 1:3-8

TEMA : PENGARAPEN KERNA SI ENGGO ISIKAPKEN DIBATA I SURGA

(Teologi Paulus Kerna Pengarapen Kamis Putih, Jumat Agung, Paskah)

Senina ras turang kekelengen Tuhan….

Kolose emekap sada kuta i Asia Kitik, labo Paulus si manteki perpulungen i Kolose e, tapi igejapna maka ia pe ertanggungjabab nandangi perpulungen e. Enggo ieteh Paulus maka lit guru-guru perguak nehken pengajaren si papak ibas perpulungen e. Pengajaren e ngataken guna nandai Dibata ndatken keselamaten si tuhu-tuhu, tep-tep kalak arus nembah man kuasa-kuasa si lit i awang-awang bagepe arus patuh nandangi peraturan-peraturen si deban. Paulus nehken suratna enda guna nehken pengajaren Kristus si benar janah ngelawan pengajaren si papak si iajarken guru-guru perguak. Paulus nehken maka Jesus Kristus ngasup mereken keselamaten si serta, mabai manusia gelah ula papak. Kristus ngenca pengarapen doni enda.

Adi kami ertoto kerna kam, ikataken kami bujur man Dibata, Bapa Tuhanta Jesus Kristus…. (ayat 3-4)

Aminna pe gia Paulus lenga bo nandai kalak si tek man Tuhan si lit i Kolose, tapi perpulungen e itotokenna alu pengataken bujur man Dibata. Isehkenna bujur man Tuhan sabab Paulus enggo megi berita maka perpulungen si lit i Kolose enda emekap kalak si tek man Tuhan Yesus Kristus, bagepe erkeleng ate man anak anak Dibata. Tentu enda ngajarken man banta segelahna ibas kita ertoto arus maka ibas pertoton e sisehken pe pengataken bujur man Tuhan.  Ijenda teridah maka perpulungen si lit i Kolose emekap perpulungen si tek man Tuhan bagepe erkeleng ate man kalak si deban.

Kiniteken ras keleng ate emekap dua bagin si la banci ipesirang ibas kegeluhen kalak Kristen, sabab enda enggo jadi sada. Kalak si tek man Tuhan Jesus Kristus emekap kalak si erkeleng ate. Kiniteken man Tuhan tentu teridah ibas keleng ate man kalak si deban. Kiniteken man Tuhan teridah ibas keleng ate si isehken man kalak si deban.

Kiniteken, Keleng Ate, Pengarapen (ayat 5-6)

Kalak si erkiniteken man Tuhan Jesus encidahken keleng ate man kalak si deban erkiteken            lit pengarapenna kerna kai si enggo isikapken Dibata man banta i surga. Pengarapen enda me si mabai kita megenggeng ibas erkiniteken man Tuhan. Pengarapen Kristen ngajarken man banta maka dalan kebenaren Dibata me dalan keselamaten. Pengarapen Kristen emekap ulin ernalem man Tuhan asangken man doni enda

Kiniteken, keleng ate ras pengarapen emekap 3 hal si penting ibas kegeluhen kalak si tek man Tuhan Jesus Kristus. Paulus ngataken bujur man Dibata erkiteken megi kuga kiniteken kalak Kolose man Tuhan. Bagepe kuga perpulungen ibas nehken keleng ate, subuk secara umum man kerina jelma, secara khusus ka pe man anak-anak Dibata (bd. 1 Petrus 2:17). Kita arus erkeleng ate man kerina anak-anak Dibata. Enda me ciri kegeluhen kalak si tek man Tuhan emekap nggeluh erkeleng ate. Selanjutna, kerna erpengarapen, lit pengarapenta kerna kai si enggo isikapken Dibata man banta i surga, emekap keriahen nggeluh i Surga. Kiniteken ras keleng ate  mabai kita kubas pengarapen keriahen nggeluh i Surga. Jadi, teologi Paulus kerna pengarapen emekap kalak si erkiniteken man Tuhan tuhu-tuhu enggo ngaloken lias ate Dibata. Isikapken Dibata surga jadi ingan kesenangen man kalak si erkiniteken baNa. Pengarapen kalak si tek man Tuhan emekap Surga. Doni emekap ingan kita nehken Berita Si Meriah, nehken keleng ate segelahna reh teremna kalak si erkiniteken man Tuhan dingen terkelin.

Kerna Berita Si Meriah (ayat 6-8)

Berita Si Meriah e tetap maba pasu-pasu janah enggo mbar i tengah-tengah doni enda. Berita Si Meriah kerna Dibata, si erkeleng ate man manusia. Dibata enggo nikapken ingan si mehuli emekap surga man kalak si setia erkiniteken man baNa, nggeluh ibas keleng ate dingen setia erpengarapen man Tuhan. Sekalak tokoh si isehken ijenda emekap Epapras. Ia emekap sekalak si tutus erdahin ibas dahin Kristus guna nampati Paulus. Ia pe si nurikenca man Paulus ras teman-temanna kerna kuga perpulungen si lit i Kolose nggeluh ibas keleng ate si ibereken Kesah Si Badia man bana.

Senina ras turang kekelengen Tuhan…

Amingia enggo si bentasi Kamis Si Badia, Jumat Si Mbelin, Sabtu Pengarapen ras Paskah, ibas PJJnta sekali enda erlajar kita kerna si enda.

Kamis Si Badia

Kebaktin Kamis Si Badia ilakoken guna nginget mulihi kerna wari-wari nandangi kematen Tuhan Jesus.  Jesus murihi nahe ajar-ajarNa bagepe kenca iburihiNa nahe ajar-ajarNa iberekenNa roti Paskah man ajar-ajarNa. Dibata ningetken kita kerna keleng ateNa teridah arah kiniteruken ukur ras kesetianNa ibas ngalaken kiniseran si jadi usihen man banta kerina. Amin gia melala perbeben si igejapken kita, erpadan kita tetap setia ibas nehken keleng ate, nggeluh alu meteruk ukur ibas jabu ras sekelewetta. Ibas Kebaktin Kamis Si Badia enda, silakoken me Lakon Persadan Si Badia bagepe Siburihen Nahe, si mpepaguhi kinitekenta guna nggeluh ibas kiniteruken ukur ras kesetian ibas ndalanken sura-sura Dibata. Enda me biak geluh anak-anak Dibata.

Jumat Si Mbelin

Kebaktin Jumat Si Mbelin siilakoken emekap guna nginget kuga Jesus Kristus si enggo ngasamken kesahNa guna nebusi manusia. KematenNa i kayu persilang jadi kahulta, gelahna kita manusia terkelin. Yesus mate ipakuken ku kayu persilang, kematenNa mekelesa bali ras kalak jahat, ukumen ras pernembeh Dibata ipersanNa. Kristus ngenanami kiniseran erkiteken dosa manusia, IA erlebuh man Dibata si i Surga gelah ialemiNa dosa manusia. Erkiteken kita enggo ngaloken keleng ate Kristus si mbelin man banta, arus pe maka kita nggeluh nehken keleng ate man doni enda dingen tetap setia mersan kayu persilang ibas kita ngikutken IA.

Sabtu Pengarapen

Ibas kita erbahan Kebaktin Sabtu Pengarapen, ije kita ngerenungken erti keleng ate Dibata arah kematen Jesus Kristus. Kematen eme hal si tuhu-tuhu ibiari manusia. Seh maka encakapken kematen ras ngidah tanda-tanda kematen pe enggo nambahi kebiaren. Emaka tambah me ateta mesui di kune kalak si ikelengi kita lawes nadingken doni enda.  Pengertin enda me si ipelimbarui arah kita mperingeti kematen Jesus Kristus. Jesus enggo bengket ku doni kematen, dingen naluken kuasa kematen. Kematen pe la ngasup nirangken kita ibas keleng ate Dibata nari. Seh  maka ku doni kematen pe kita iperjuangkenNa dingen iselamatkenNa. Kematen Kristus e maba keselamaten dingen keterkelinen man banta bagepe man kalak si enggo mate ibas Kristus. Alu bage, lanai aru ateta nandangi kematen si arus ibentasi kita.

Paskah

Kebaktin Paskah si ilakoken kita emekap ibas kita mperingeti kemenangen, kekeken Tuhan Jesus Kristus ibas si mate nari. Tuhan Jesus enggo naluken kuasa kematen. Tuhan Jesus enggo naluken  kuasa dosa. TuhanJesus enggo mereken kemenangen dingen jaminen keselamaten man banta. Erkiteken si e, alu ermeriah ukur kita nehken bujur man Tuhan si enggo nelamatken kita manusia ibas kuasa dosa nari. Kekeken Kristus njamini kita nggeluh metunggung iadep-adepen Dibata janah  metunggung ndahiken dahin Tuhan jadi perberita si meriah ku sekelewetta.

Senina ras turang kekelengen Tuhan…

Kita enggo ngelakoken Kebaktin Kamis Si Badia, Jumat Si Mbelin, Sabtu Pengarapen bagepe Wari Paskah. Enda kerina silakoken guna mpetetap ukur segelahna tetap setia erkiniteken man Tuhan amin gia melala kiniseran si arus ialaken kita ibas kegeluhen i doni enda. Enggo sialoken keleng ate Tuhan si mbelin ibas kegeluhenta emekap Jesus Kristus, AnakNa Si Tonggal, si enggo mate i kayu persilang guna nebusi dosanta, dingen enggo keke ibas kematen nari. Tentu enda kerina mpetetap ukurta guna tetap setia erpengarapen man baNa. Kalak si tek man Tuhan, nggeluh alu dem keleng ate dingen tetap setia erpengarapen man baNa saja emekap kalak si ndatken keselamaten, keriahen nggeluh ibas Sorga. Tuhan masu masu kita kerina. Amin.  

Pdt. Crismori V. Br Ginting Manik

 GBKP Sitelusada

OGEN          : MASMUR 19:1-9

TEMA          : TEP-TEP WARI ERBERITA

(Perayaan HUT Kategorial)

Senina ras turang kekelengen Tuhan….

Lit sekalak pelukis si tergelar Aaron Schurr, ia sekalak pelukis pemandangen alam semesta situhu-tuhu mejile. Hasil lukisenna, seh kel miripna ras pemandangen si aslina. Karya lukisen Aaron Schurr enda, erbahanca kerina kalak takjub ngidah jilena pemandangen ibas erbage-bage ingan i doni enda si enggo ilukiskenna. Tupung paksa kita lit itengah-tengah doni enda, ngidah kerina tinepa Dibata si tuhu-tuhu mehuli, erbahanca megah si akap ngidah tinepa Dibata e. Bagem me pe pemasmur, ngidah kerina tinepa Dibata mabai pemasmur muji dingen mpermuliaken Dibata si enggo nepa doni enda.

Masmur 19 enda emekap  Masmur Daud si nuriken kerna kemulian Dibata. Ije isehken Pemasmur man banta kerna penyataan Dibata, emekap penyataan umum arah tinepaNA (matawari, awang-awang , langit). Penyataan khusus emekap arah undang-undangNa. Penyataan adalah inisiatif Allah sendiri untuk membuka diriNya agar manusia yang adalah ciptaanNya dapat mengenal Allah Penciptanya.  Enda kerina ilakoken Dibata segelahna kita kerina manusia nandai Dibata alu payo  bagepe mpermuliaken IA. Alu bage, ibas ogen PJJnta ibas minggu enda, Masmur 19:1-9, lit 2 bagin si isehken man banta, emekap :

1.    Kemulian Dibata teridah ibas langit, awang-awang ras matawari (ayat 1-7)

2.    Kerna ndalanken Undang-Undang Tuhan (ayat 8-9)

Pemena : Kemulian Dibata teridah ibas langit, awang-awang ras matawari (ayat 1-7)

Pemasmur nuriken man banta maka Dibata ermulia ibas tinepaNa. Langit, awang-awang ras matawari enggo itepa Dibata alu kataNa jine. Arah Kata e ijadiken Dibata kerina si nasa lit;  la lit sada pe ibas kerina si enggo jadi e ijadiken la arah Kata e (Johanes 1:3). Tinepa Dibata e nuriken man banta kerna kuasa Dibata si mbelin. Kerina tinepa Dibata encidahken kemulian Dibata. Langit ras awang-awang erberita kerna perbahanen Dibata si mbelin(ayat 2). Pergantin wari, suari ras berngi nuriken mbelinna kuasa Dibata si enggo nepa doni enda. Dibata enggo erbahan terang ras gelap bagepe matawari guna nerangi doni enda ras kerina isina. Matawari pultak ibas erpagi-pagi, nerangi doni, seh pe ku ben wari, ndabuh ku gelapna. Kerina lit ibas keteraturen.

Dibata si enggo nepa doni enda ras kerina isina, erdolat nandangi kerina tinepaNa. Erkiteken si e, subuk manusia bagepe ras tinepa Dibata sidebanna pe arus maka mpermuliakan IA, meritaken kerna IA dingen nembah IA ibas kegeluhen si tep-tep wari.

Peduaken : Kerna ndalanken Undang-Undang Tuhan (ayat 8-9)

Kenca pemasmur nuriken kerna Dibata ermulia i bas tinepaNa, ilanjutken pemasmur ka nuriken kerna Undang-Undang Tuhan. Kerna Undang-Undang Tuhan, ikataken pemasmur maka :

1.     Undang-Undang Tuhan mereken gegeh si mbaru, terteki, mereken pengertin man kalak si kurang pentar.

2.     Undang-undang Tuhan benar kap, emaka kalak si ngikutkenca meriah tetap. Perentah Tuhan benar kap, mereken pengertin ku bas perukuren.

Kerina enda encidahken man banta maka Undang-Undang Tuhan seh kel perluna ibas  kegeluhenta, mabai kita kerina tetap ersada ras Tuhan dingen tetap setia ndalani kegeluhen sue ras Undang-Undang Tuhan. Tet-tep wari kita ngorati Kata Dibata bagepe ngelakokenca ibas kegeluhenta.

Senina ras turang si ikelengi Tuhan Jesus Kristus.

Selaku sekalak si erkiniteken man Tuhan, enggo si angkai maka kemulian Dibata teridah ibas kerina tinepaNa. Kita manusia selaku tinepa Dibata arus tetap tutus ras setia mpermuliaken IA ibas kerina dampar kegeluhenta.

Kuga carana ? Sue ras oraten PJJnta ibas minggu enda, emaka :

1.    Marilah si jagai kerina tinepa Dibata alu mehuli. Ula si cedaken. Sebab adi tinepa Dibata ceda, maka dampakna pe si gejapken ibas kegeluhenta si tep-tep wari.

2.    Marilah beritaken kerna kemulian Dibata si teridah ibas kerina tinepaNa man kalak si deban. Tep-Tep wari kita setia erberita man kalak si deban kerna Dibata si ermulia e, subuk arah kata bagepe perbahanennta. Kata si maba kegeluhen bagepe kedamen rikut pe perbahanenta si maba kiniulin.

3.    Mari siberitaken pe kerna kemulian Dibata i tengah-tengah Perpulungen Jabu-Jabu entahpe PA Kategorial bagepe man teman-temanta si deban.

4.    Tetaplah setia nggeluh sue ras undang-undang Tuhan. Erkiteken si e, tep-tep wari, setialah kita muji Tuhan, ngorati kataNa, bagepe ngelakokenca ibas kerina dampar geluhta. Sebab Undang-Undang Tuhan mereken gegeh si mbaru, mereken pengertin, erbahanca kita pentar bagepe mereken keriahen ukur man banta. KataNdu kap tending man nahengku, nerangi dalan si kudalani (Masmur 119:105). Kerina enda, siberitakenlah man kalak si deban.

5.    Ibas kita mperingeti HUT Kategorial i tengah-tengah gereja, kerina enda silakoken sebage sada tanda pengataken bujur man Dibata bagepe kesaksin, erberita man kalak si deban kerna Dibata si enggo nampati dingen ngkawali kegeluhenta, bagepe i tengah-tengah persadan kategorial subuk Moria, Mamre Saitun, Permata ras KAKR.

Selamat Setia Erberita Tep-Tep Wari.

Kesah Si  Badia nampati kita kerina. Amin.

Pdt. Crismori V. Br Ginting Manik

GBKP Sitelusada

“LAU MALER”

(Hari Air Sedunia)

Kejadian  2 : 10 – 13

10I Eden lit sada lau belin, janah ipalerina peken e. Kenca ngepari Eden, lau ndai erbelah empat.

11Si pemena Pisun gelarna, maler ngkeleweti negeri Hawila.

12(I je lit emas, si merim-merim, ras batu permata si meherga.)

Piga-Piga pengamat nuriken nina: Air merupakan sumber daya alam yang digunakan oleh hajat semua makhluk hidup. Rata-rata kebutuhan air yaitu sebesar 60 L/orang/hari, diperkirakan setiap harinya kebutuhan air bersih ini akan meningkat dari tahun ke tahun seiring bertambahnya populasi manusia (Pitoyo dan Mohammad 2014).

Jumlah penduduk dunia sebesar 6,121 milyar diperlukan air bersih sebanyak 367 km3 per hari (Priyono et.al 2014). Sedangkan pada tahun 2025 diperlukan air bersih sebanyak 492 km3 per hari, dan pada tahun 2100 diperlukan air bersih sebanyak 611 km3 per hari (Priyono et.al 2014).

Masalah utama yang dihadapi berkaitan dengan sumber daya air adalah kuantitas air yang sudah tidak mampu memenuhi kebutuhan yang terus meningkat. Sedangkan kualitas air untuk keperluan domestik yang terus semakin menurun dari tahun ke tahun (Priyono et.al 2014).

Ibas mulana tembe doni enda Dibata ngelitken lau belin simaler ibas taman Eden (ay. 10-14). Empatna lau mbelin seh kal pentingna guna mereken suasana nyaman ras erbahan mehumur taneh ibas  Peken e.

Arah e pe siidah maka , kerina si tepa Dibata iasuhiNa alu mpepaler lau si cukup. Lebih asa sie pe icidahken kerna kiniulin ras kebayaken bekas tinepa Dibata i negeri Hawila i je lit emas, si merim-merim, ras batu permata si meherga.(11-12).

Nginget pentingna Lau ibas kegeluhen, seh maka Yesus pe ngataken maka ia Lau Kegeluhen. Nina Yesus,”Adi ietehndu kerna pemere Dibata, janah itandaindu ise simindo lau man bandu enda, tentu ipindondu BaNa lau, jenari iberekenNa man bandu lau simereken kegeluhen.(Yoh.4:10)

Rikutken Tema-nta:”Lau Maler” sendalanen ras peringeten Hari Air seDunia maka ipersingeti man banta lako njagai ras pekena-kena alam lingkungenta ija kita ringan. Megati sibegi kata-kata kalak sibeluh nina: “Wariskanlah Mata Air bukan Air Mata”.

Langkah konkrit sibanci silakoken guna mewarisken Mata Air eme:

-       Mateken kran lau tupung la ipake

-       Ngurangi penggunan bahan kimia sibanci erbahanca lau tercemar.

-       La ngombakken sampah ku lau maler

-       Ngelakoken Penghijauan i sekitar rumah masing-masing

-       Nggit bergabung/ikut muat bagin ibas komunitas peduli lingkungen.

Pengertin si lebih mbages  ibas dampar kiniteken,  Tema enda pe ningetken kita guna terus “mpepaler lau kegeluhen” gelah suasana Eden banci ternanami mulihi. Arus sisadari maka ibas paksa enda enterem kal jelma si muas nandangi lau kegeluhen sibanci mereken “kelegaan” ibas erbage-bage situasi kegeluhen si sangana inanana.

Pdt.Iswan Ginting Manik-

GBKP Pondok Gede.