(Periodeisasi Kepengurusen)

OGEN  : 1 Kronika 26 : 29-32

THEMA  : NDAHIKEN DAHIN PELAYANEN

Selaku sekalak si erkiniteken man Tuhan maka pendilo si isehken Tuhan man banta emekap guna ndahiken dahin Tuhan (pelayanen) ibas kegeluhenta si tep-tep wari. Salah sada tujun  Dibata ndilo kita emekap guna ndahiken dahinNa i doni enda. Emaka, ndahiken dahin pelayanen emekap orat nggeluh kalak si tek man Tuhan. Alu bage, ibas ndahiken dahin pelayanen, sibereken waktu, gegeh, pemikiren bagepe dirinta guna ndahikenca alu tutus.

Kinatana ibas masa genduari enda, lit lalap alasen si isehken kalak si tek man Tuhan, tupung isungkuni kebersedianna guna ndahiken dahin pelayanen, khususna i tengah-tengah gereja. Alasen si semal isehkenna emekap : sibuk, lanai lit waktu, timai lebe sebab lenga seh waktuna, ras sidebanna. Tapi, lit ka pe deba si ikut serta menyibukken diri ibas dahin pelayanen erkiteken mehangke nulak dahin-dahin pelayanen ibas gereja. Lit ka deba si ndahiken dahin pelayanen dikune lit sitik waktu si iba ibas padatna jadwal pendahin. Mereken waktunta guna erdahin, hobby entah pe kegiatan si deban banci silakoken, tapi engkai  waktu guna ndahiken dahin pelayanen mberat si akap mereken waktu bagepe dirinta ? Selaku sekalak pengikut Tuhan, arus maka turah ibas ukurta guna alu ermeriah ukur ndahiken dahin pelayanen, sabab Dibata enggo mereken usihen si mehuli ibas ndahiken dahin pelayanen bagepe mereken diriNa guna ndahiken dahin e.

Ibas bahan PJJnta minggu enda, 1 Kronika 26:19-32 isehken kerna pembagin dahin-dahin pelayanen si ilakoken ibas Rumah Pertoton man suku Lewi bagepe si deban. Dahin-dahin si isuratken ijenda emekap dahin administrasi, bagepe pengurus kerina soal agama ras perkara rayat Israel. Pemena, tugas administrasi. Tugas enda emekap idahiken ibas kesusuren Kenanaya ras anakna si dilaki. Tugas administrasi si idahikenna emekap : muniken surat-surat  ras mberesken perkara-perkara bangsa Israel. Peduaken, tugas administrasi agama ras perkara-perkara rakyat i Israel arah Barat Lau Jordan. Enda ilakoken kesusuren Hebron emekap Hasabia ras 1700 kalak keluarga. Jeria eme pemimpin kesusuren Hebron. Ibas tahun peempat puluhken Daud jadi raja, ibahan penelidiken kerna kesusuren Hebron enda. Ijumpai maka lit tentera-tentera si terberita ibas keluarga enda si tading i Jaser i daerah Gileat. Ipilih Raja Daud 2.700 kalak kepala keluarga si terberita ibas keluarga Jeria nari jenari itamaken kalak enda jadi kepala pengurus kerina soal agama ras perkara rayat Israel arah Timur Lau Jordan e me daerah Ruben, Gat, ras Manase Timur. Bageme dahin tep-tep terpuk ndahikenca alu dem tanggungjawab ras malang man Tuhan. Banci siidah maka bage kel teremna kalak Lewi ras si labo kalak Lewi ikut terlibat ikut erdahin. Dahin e labo muat belin kitikna si e kerina jadi dahin pelayanen.

I tengah-tengah pelayanen gerejanta GBKP, tuhu melala dahin pelayanen si banci siikuti

bagepe idahiken, subuk selaku Pertua, Diaken, Pengurus PJJ, Pengurus Persekutuan Kategorial Mamre, Moria, Permata, KAKR, Saitun, bagepe ibas kepanitian si lit i tengah-tengah gerejanta. Dahin pelayanen enda idahiken kerina ngawan ni perpulungen si nggit mereken dirina bagepe waktuna guna ndahiken dahin pelayanen enda.

Ibas tep-tep kepengurusen tentu lit periodeisasi kepengurusen segelahna min lit ka regenerasi siilakoken. Guna periodeisasi enda, tentu arus lit persiapen siilakoken, segelahna kepengurusen ibas pelayanen ku lebena reh ulina. Ibas si e tentu, niarapken maka kerina ngawan ni perpulungen alu ermeriah ukur nggit mereken diri bagepe waktuna guna ndahiken dahin pelayanen Tuhan i tengah-tengah gerejanta. Ibas kita ndahiken dahin pelayanen, bagi sitersurat ibas 1 Kronika 22:19a : “Genduari erdahinlah guna Tuhan Dibatandu asa ukurndu lit ras asa tendindu lit.” Enda ngajarken man banta maka ketutusennta ibas ndahiken dahin pelayanen asa ukur ras asa tendi ikut menentuken hasil pelayanen si ilakoken kita. Dahin pelayanen si enggo ialoken, dahikenlah alu tutus guna Tuhan. Bagi si ipeseh pe ibas 1 Korinti 15:58, nina : Erkiteken si e, o senina-senina si kukelengi, tetaplah ukurndu, ula mbewat-mbewat. Mejingkatlah kam rusur i bas ndahiken dahin Tuhan, sabap ietehndu maka labo percuma dahin si idahikenndu i bas Tuhan.

I tengah dahin pelayanen si idahiken kita banci jadi jumpa tantangen siihadapi. Tapi, erkiteken perkuah ate Tuhan dingen penampatNa tantangen e banci ialaken dingen idungi alu mehuli. Keriahen ukurta ibas ndahiken dahin pelayanen emekap tupung paksa dahin pelayanen siilakoken kita erbahanca meriah ukur Dibata, aminna pe gia silakoken alu sada perjuangen si mberat.

Mari tetap semangat bagepe mereken dirinta guna ndahiken dahin pelayanen. Tuhan masu-masu kita kerina. Amin.

Pdt. Crismori V. Ginting Manik

GBKP Sitelusada

Ogen : Masmur 42:1-6

Tema : TEDEH ATEKU KAM O DIBATA (Tedeh Ate Nandangi Tuhan/Ulih Litbang)

Lau e me salah sada hal si penting i bas kegeluhennta manusia. Adi la lit lau si man inemen, kita hanya ngasup bertahan nggeluh sekitar 3-4 wari. Ngkai? Erkiteken fungsi lau i bas daging kulanta seh kel pentingna. Lau e me 80% zat pembentuk daging kulanta, adi la minem kita i bas sada wari saja, umpamana, maka terjadi gangguan i bas metabolisme kulanta ras terjadi dehidrasi (kekurangen cairan). Adi metabolismenta enggo terganggu maka turah erbage pinakit. Bage pe, ibas aktivitas kegeluhenta melala kegunaan lau: erdakan, ridi, nuci, niram sinuan-sinuan, rsd. I bas cataten WHO (World Health Organization) rata-rata sada kalak makeken lau 30 liter i bas sada wari, 10 liter guna konsumsi (minem), 20 liter guna sanitasi, lenga ka termasuk kebutuhen-kebutuhen si debanna. Bage pe belkih, lau pe menjadi kebutuhen pokokna, la hanya untuk inemen guna keberlangsungen geluhna, tapi pe lau enda banci nampati ia selamat arah ancaman kematen. Belkih termasuk binatang si memiliki aroma tubuh si khas, sehingga arah arah aroma dagingna enda jejaknya sangat mudah diketahui binatang predator si ate memangsa ia. Emaka untuk terhindar arah ancaman enda, belkih biasana masuk ku bas lau si maler (sungai), emaka aroma dagingna lanai teranggeh binatang sideban si ate memangsa ia. Bas kalak Kristen Lau Kegeluhen emekap Yesus Kristus, emaka ise si muas rehlah ku IA gelah minem (Joh. 7:37). Ras ise si nginem lau si iberekenNa, lanai ia muas seh rasa lalap (Joh. 4:14). Yesus Kristus hadir i tengah-tengah persekutuan kalak si tek (Mat. 18:19-20).

Teks PJJnta ngambarken ketedehen ate Pemazmur man Tuhan bagi belkih mejehe nandangi lau si maler. Enda me ende-enden Anak-anak Korah si mejehe nandangi Dibata (Rumah Pertoton). Erkiteken sada situasi kegeluhen (berada i taneh pembuangen) sierbahanca ia ndauh ras “Sion” eme siianggap Rumah Pertoton (Bait Allah). Si biasana pemazmur ras bangsa pilihan Tuhan ngelakoken penembahen (kebaktin) secara bersama (komunal) alu ersurak-surak meriah ukur, tapi kidekah ibas masa pembuangen enda lanai banci ilakoken. Ibas ingan sindauh e pe megati ihadapina situasi si la menyenangken, emaka ibas ayat 4 nina, “Suari berngi aku ngandung, iluh ngenca si man panganku. Gedang-gedang wari nungkun imbang-imbangku, “Ija kin Dibatandu?” Pemazmur ngaloken cibiren kalak sideban si megati nungkuni kerna Dibata (Ija Dibatandu).

Situasi si la menyenangken enda erbahanca ingetna uga ndube riahna ukurna banci rembak ras Dibata (ay. 5), banci beribadah ras kalak sierkiniteken, rsd si kerina e lanai banci idatkenna ibas ingan sindauh. Sienda me erbahanca turah ende-enden ketedehen kerna Dibata siigambarkenna bagi belkih mejehe nandangi lau simaler. Mejehe labo terjeng tedeh ate bage saja, tapi lebihen asa sie: Ketedehen si mesangat, seh maka adi la ilakoken banci erbahansa turah kendelen/sedih, la semangat, jadi mejehe nandangi Dibata eme sada ketedehen simesangat erpalasken kiniteken. Biasana ungkapen kata mejehe ipakeken lit latar belakangna (situasi rikut ras jarak) sibanci erbahanca sikap kalak mejehe e enggo dekahen kem, ngelamun rsd. Mejehe nandangi Dibata labo ka erbahanca kita pasif ras ngelamun saja, tapi ibas bentuk kiniteken seh maka siakuken: Adi lakin ras Ia la lit malemna.

Arah tema PJJnta “Tedeh Ateku Kam O Dibata” iajuk kita ngenen ulih Tim Litbang GBKP (tahun 2018) singatakenca bahwa sura-sura perpulungen GBKP guna reh ku PJJ labo jadi sada kebutuhen, tapi terjeng sekedar guna memenuhi aturen si itetapken GBKP. Mehangke entah pe mbiar perpulungen adi ipersingeti Serayan Tuhan ras pengurus sektor erkiteken la ia reh ku PJJ. Alu kata sideban, kegiaten PJJ lenga jadi ketedehen man perpulungen guna jumpa ras Tuhan bagepe senina turang si sada kiniteken. Bage pe konteks Pemazmur ibas bahan ogen PJJnta sekali enda, ngingetken kita kerna kegeluhenta selaku anak Dibata, khususna ibas masa Pandemi Covid-19. Kidekah kurang lebih telu bulan dekahna kita la banci erkebaktin i Gereja bagi biasa, la kita banci ngelakoken kebaktin PJJ, PA-PA, ras kegiaten pelayanan sidebanna. Lit nge ketedehen ate bagi pemazmur ndai? Ketedehen atena igambarkenna bagi belkih si mejehe nandangi lau maler si malem. Adi belkih la ndatken lau emaka kegeluhenna pasti terancam, baik sebagai bahan konsumsi maupun untuk keselamatan nggeluhna. Bagelah Pemazmur merasa hidupnya hampa, penuh dahaga kidekah la banci ersembah i Rumah Dibata. Uga kita? Apakah nggo lit kita si merasa nyaman dengan situasi kita paksa enda? Harapan lalit kita si bage. Tapi bagi, pemazmur tedeh ateta Rumah Pertoton, tedeh ateta tetap rembak ras Tuhan, bersekutu ras kerina anak-anak Tuhan.

Memang ersembah man Dibata labo terjeng reh ku Rumah Pertoton saja, tapi ibas kerina dampar nggeluh (Roma 12:1). Enda labo jadi sada pembenaren man banta bahwa la masalah adi kita la ersembah ku Rumah Pertoton, lang! Siperlu sirenungken eme: lit denga nge ketedehenta guna jumpa ras Dibata ibas Rumah Pertoton atau sebalikna erkiteken siakap jumpa ras Tuhan banci ijapa pe seh maka lanai lit ketedehenta reh ku Rumah Pertoton. Atau entah lit ka sila bagi ukurta sierbahanca lanai lit ketedehenta reh ku Rumah Pertoton? Sie kerina arus siinget maka pengalamen Pemazmur ibas ngertiken maka i Rumah Pertotom eme idatkenna kerinana keriahen ukurna, sebab banci jumpa ras Dibata bagepe radu ras kerina ngawan ni perpulungen Tuhan, emaka jadilah kita sitetap mejehe nandangi Rumah Pertoton.

Pdt. Melda Tarigan, STh

(GBKP Rg. Pontianak)

Ogen : Kuan-kuanen 6:12-15

Tema : Beritakenlah Situhu Dingen Erguna (TI Ras Etika)

Kitab Kuan-kuanen enda itulis sekalak si ibereken Dibata kepentaren ras kengasupen mereken pedah-pedah (nasehat) Dibata, ntah pe mekatep ikataken bahwa kitab enda berisikan “kumpulan ucapan-ucapan bijak.” Kalak si ngoge, megiken ras makekenca, ngaloken pemeteh ras nambahi kepentaren si rehna ibas Tuhan. Inti pengajaran ibas Kitab enda eme mabai anak-anak Tuhan segelah erkemalangen man Dibata sebab eme bena-bena kepentaren (1:7). Secara keseluruhen kitab enda bertujuan untuk mengetahui hikmat dan didikan yang menjadikan anak-anak Tuhan pandai, benar, adil, jujur, ras guna mereken pengetahuan ras kepentaren.

Adi siperdiateken secara menyeluruh kitab Kuan-kuanen enda, penulis mekatep mengkonfrontir antara kalak bujur ras kalak jahat, kalak pentar ras kalak bodoh, si rajin ras si perkisat, ras sidebanna, si enda ncidahken bagem mbagesna perbedaan antara keduana. Kitab Amsal memberikan pilihan-pilihan etis mengenai suatu komparasi realitas (contoh: dari pada membunuh lebih baik hidup penuh kasih). Penulis sedang menjelasken ntahpe memperlihatken secara nyata pertentangen antara hasil-hasil ibas ndarami kepentaren ras menghidupi kegeluhen si bodoh.

Bahan PJJnta Kitab Kuan-Kuanen 6:12-15 merupaken bagian ibas Kitab Kuan-kuanen pasal 6:1-35. Ibas teks enda banci si idah kuga penulis mbereken kata persinget man generasi nguda, bagepe man banta, eme iajuk segelah kerina kalak ertanggung jawab nandangi kegeluhen sesama manusia. Ibas ayat 1-11 isingetken segelah anak-anak Tuhan (apai ka nguda denga) harus hati-hati ibas mbelasken cakap (setiap ucapan yang kita sampaikan sudah menjadi miliki orang lain, banci jadi utangnta), bagepe harus mejingkat, la banci perkisat. Kalak perkisat isuruh erlajar arah perkis. Penulis kitab Kuan-kuanen mewanti-wanti ola kari kerna kisatta erdahin, silakoken dalan si langena ate Dibata, contohna eme ibas ay. 12-15.

Ibas paksa si e kalak jahat mekatep berkonspirasi makeken bahasa tubuh guna menghancurken kalak sideban. Alu cara meritaken berita si la tuhu (ay. 12); mengedipkan mata, bermain kaki dan menunjuk-nunjuk dengan jari agar merasa aman (ay. 13). Kejahaten dalam bentuk gerakan isyarat atau kedipan mata sangat sulit untuk ibuktikan. Memang kai sibahanna labo tereteh kal, tapi sama mematikannya dengan peluru yang menembus jantung. Tapi man kalak sibagenda nina penulis kitab Kuan-kuanen, reh me cilaka ndabuh man bana e maka mate me ia (ay. 15). Dibata labo sinik ngidah perbahanen si jahat, tapi ibalasNa me pagi tep-tep kalak sue ras kai si enggo ibahanna (Rm. 2:6).

Bahan PJJnta enda maba kita ibas sada perenungen, segelah selaku kalak Kristen harus tetap erbahan simehuli, sue ras sura-sura Dibata ibas kai pe dampar kegeluhenta. Khususna sue ras

tema Beritakenlah Situhu Dingen Erguna (TI Ras Etika).  

Pemaken teknologi informasi cukup mbar ibas kegeluhenta genduari (era Revolusi 4.0) ras nggo jadi salah sada kebutuhen ibas kita. Teknologi Informasi enda ulih pemeteh ras kepentaren manusia si ibereken Dibata ibas kegeluhen enda. Mbelin kal kegunanna nandangi kegeluhen manusia adi paslah pemakenta, banci nampati manusia i bas erbage curak komunikasi si perluken. Subuk arah internet, media massa, media sosial, ras sidebanna. Arah kerina kemajun teknologi informasi enda, si rusurna sipake eme arah smartphone (handphone). Tuhu-tuhu adi sipake alu payo kerina teknologi enda nampati kegeluhenta. Kai si iperluken banci alu sada alat saja enggo terjabab kerina. Perlu informasi politik, cuaca, erga-erga barang, rsd enggo lit kerina. Pengiriman berita arah sms, WA, Facebook, Twitter, Instagram, email, gambar, video, transfer duit, genduari kerina banci ilakoken arah smartphone-ta. Ije pe enggo banci si litken Pustaka Si Badia, Tafsiren Alkitab, Kitab Ende-Enden, ras lagu-lagu Rohani, rsd.

Ibas dampar si deban maka melala pemaken Teknologi Informasi, khususna melalui media sosial alu la payo. Perkembangen jaman mabai kita arus bijak ibas makeken media sosial enda. Megati, kurang kita ertanggungjawab ibas kai si enggo siberitaken (posting). Komunikasi ras jelma si enterem bas media sosial banci saja mpeturah perubaten erkiteken kata-kata si menyinggung sekalak jelma. Lit ka mpermbarken berita-berita si la tuhu (hoax) kerna jelma entah kelompok tertentu, seh ka si adun pe ku pengadilen. Lit erbahan postingen si menyinggung soal SARA (suku, agama ras antar golongan), menganggu orang yang lemah (bullying, body shaming) si erbahanca lit ketersinggungan sada ras sidebanna, akun bodong (palsu). Bagepe arah media sosial la sitik penipuan perdagangen, perjudin on line, perselingkuhen ras sidebanna. Enda kerina tentu jadi pengkebet si la erguna ras pe la ngena ate Dibata. Kerina enda jadi sada persinget man banta segelah metenget, megermet bagepe pentar ibas makeken teknologi informasi, khususna pe arah media sosial. Ula bagi si ituriken ibas kitab Kuan-kuanen ndai; meriah kapna meritaken berita si la tuhu, nipu kalak, alu atki pacikna ibahanna rencana-rencana jahat ras i japa pe ibahanna perubaten. Kemajuan Teknologi Informasi ola min menghilangken identitas kita selaku anak-anak Tuhan si berbudaya ras memiliki etika. Khususna selaku kita kalak Karo, yang sangat mengedepankan kearifan lokal kerna marga silima, rakut sitelu, tutur siwaluh, ija arah si enda teridah kerna jiwa siergan, siangken, ras sikeleng-kelengen.

Kita arus pentar makeken kemajuan Teknologi Informasi si lit. Ingat slogan ATD: aku, TI, ras Dibata. Manusia tinepa Dibata rikut ras TI ulih tinepa manusia erkiteken kepentaren ras kengasupen si ibereken Dibata tujunna min mpermuliaken Dibata. Ertina, ibas sitelu e Dibata si utama: TI ngelai manusia, manusia ngelai Dibata alu make TI. Dibata me terpuji sebab IA me si mereken kepentaren.

Perkembangen Teknologi Informasi (TI) genduari seh kal majuna ras maba mbue kegunaan man banta, apai ka ibas situasi Pandemi Covid-19 enda. Banci sipake guna mendukung pelayanen ras kegiatenta, kita tetap banci mpembarken Berita Si Meriah. Gia ibas masa genduari, sementara waktu lanai kita banci bagi semalna pulung-pulung kebaktin, gedung-gedung Gereja harus "tutup", tapi Kata Dibata tetap banci diberitakan, alu pelayanen secara virtual (online) melalui aplikasi-aplikasi si lit. Gereja-gereja bersinergi segelah tetap pelayanan erdalan alu lancar ras mehuli, Kata Dibata tetap banci siberitaken, janah tetap tersentuh ras terhubung kerina ngawan ni perpulungen Tuhan.

Kemajuan teknologi informasi (TI) labo terolangi ras labo banci si pedauh enda ibas kegeluhenta nari. Si penting uga makeken si enda kerina alu mehuli ku biak-biak si erguna ibas kegeluhenta enda (sue ras kita kalak berbudaya ras beretika). Umpamana group WA keluarga, Sektor, kategorial banci ipakai guna ingan beritaken kata situhu dingen erguna, emekap nuriken Kata Dibata, mpeseh kata penjemba (motivasi), nuriken pedah-pedah ras sidebanna. Emaka, mari simanfaatken peluang mberitaken tentang hal-hal situhu ras berguna, melalui media teknologi informasi sigenduari, gelah arah si e pe tetap Terpuji Tuhanta Yesus Kristus.

Pdt. Melda Tarigan, STh

(GBKP Rg. Pontianak)