Invocatio    : Ertoto suruh-suruhen ndai nina, ”O, TUHAN, Dibata tuanku

Abraham,bahanlah maka seh sura-surangku sendah, janah ingetlah padanNdu ras tuanku Abraham” (Kejadin 24:12)

Ogen          : Perbahanen Rasul-Rasul 21:1-6

Tema         : “Muat Bagin Ibas Ertoto”

1.   Kata Perlebe

Ertoto (doa) eme kesah kegeluhen kalak si erkiniteken (Doa adalah nafas hidup orang percaya). Kita nggeluh erkiteken erkesah. Si lanai nggeluh erkiteken lanai erkesah, enggo peltep kesahana. Bageme pe kerna nggeluh secara kiniteken. Toto eme kesah geluh kinitekenta. Adi jarang kita ertoto emaka menam-menam peltep kesah kinitekenta. Kesah-kesahen me geluh kinitekenta. Adi la kita ertoto e seri ertina mate geluh kinitekenta. Lanai nggeluh kinitekenta. Emaka marilah ertoto. Ertotolah la erngadi-ngadi. Ertotolah katawari pe. Tutuslah ertoto. La ertoto guna dirita saja ngenca, tapi pe nehken pertoton syafaatta. Enda me si jadi tema umumnta nina, “Sehekenlah Pertoton Syafaat” (1 Tim. 2:1).  Jadikenlah ertoto e jadi kebiasanta. Jadiken ertoto e kebutuhenta. Bahanlah ertoto e mendarah daging man banta.

2.   Renungen/ khotbah

Rasul Paulus ras teman-temanna sangana ngelakoken safari Pekabaran Injil (PI). Piga-piga ingan idahina lako mberitaken berita si meriah kerna Jesus Kristus. Kata Dibata si jadi ayat renungenta enda me perdalanenna si perpudi menuju ku Jerusalem. Sope seh ku bas ayat khotbah, Paulus jumpa ras pertua-pertua Epesus dingen mereken kata-kata perpisahen. Sope iteruskenna perdalanenna ertoto ia kerina mpeberkat Paulus nerusken perdalanenna (20:36). Kenca si enda iterusken Rasul Paulus Cs lawes tare kapal. Kapal si inangkihina singgah i Tirus. I Tirus kapal enda mbongkar muatenna. Sanga kapal mbongkar barang si ibabana, rasul Paulus cs nusur i kapal nari lako ndahi kalak si enggo tek man Jesus ibas kuta enda. Sada Minggu dekahna Paulus Cs jumpa ras pulung ras kalak Kristen i Tirus enda. seh me paksana Paulus Cs nerusken perdalanenna. Kerina kalak si tek i Tirus enda ras ndeharana bagepe anak-anakna ikut naruhken Paulus Cs ku darat kuta seh ku tepi lawit. I tepi lawit enda me ertoto ia kerina man Dibata. Jenari kenca si salam-salamen maka Paulus ras teman-temanna nangkih ku kapal, perpulungen e mulih ku kutana (21:1-6). Tuhu-tuhu Paulus Cs ras kalak si tek nggeluh ibas toto. Paulus notoken perpulungen, perpulungen pe muat bagin bas dahin Paulus arah pertoton.

Ibas ayat invocatio si idah uga suruh-suruhen Abraham si tergelar Elieser ertoto ibas ndahiken pedah tuanna lako ndarami ndehara Isak anak Abraham. Elieser ertoto mindo man Tuhan gelah ituduhkenNa ise jodoh tuanna. Iandalkenna kal Tuhan ibas ndahiken dahinna. Tek Elieser maka Tuhan si nuduhken jodoh man Isak. Tuhan ngaloi, njawab ras nehi pertoton Elieser. ItuduhkenNa Ribka anak Betuil, kempu Nahor senina Abraham si pagi jadi ndehara man Isak (Kej. 24:12).

3.   Penerapan/ aplikasinya

·       Tema: “Muat Bagin Ibas Ertoto”. Muat bagin kepeken la secara gegeh ras materi saja. Muat bagin banci arah ertoto. Si tuhuna kita kalak si tek, ertoto e geluhta. Ertoto e jadi biakta/ karakterta si mehuli. Bagi Jesus Tuhanta jine pe ndube sanga i doni enda Ia ertoto Mat. 26:39, 44), maka kita pe ertoto selaku anak-anakNa. Usihen si ibereken ras itadingkenNa mari si lakoken. Isuruh ntah la isuruh, ipindo ntah lang muat baginlah kita ibas ertoto. Subuk secara pribadi ntah ras-ras,  muat baginlah ibas ertoto. Ertina, ibas kita ertoto, kita la ertoto kerna diritna, jabuta ras kade-kadeta ngenca. Tapi kita pe ertoto kerna gerejata, perpulungen, kalak si deban, sekelewetta/ lingkungenta, situasi pandemi Covid 19, kalak si terdampak, pasien, para medis, kerina petugas lapangen, upaya pemerintah, rsd.

·       Totokenlah pendahinta, dahiken pertotonta bagi si ilakoken Elieser. Ora et Labora. Ertoto ras berusaha. Labo banci ertoto saja tapi la erdahin, la berusaha. Bagepe la ka erdahin/ erusaha saja tapi la ertoto. Ola gegehta saja si penalem tapi pasu-pasu Tuhanta. Gelah susur pasu-pasu Tuhan ertotolah. Ertoto lebe emaka iumputi alu erdahin, erusaha alu tutus. Nina Tuhan Jesus, “Erjaga dingen ertotolah gelah ola kam ndabuh ku bas percuban. Ukur mehuli me, tapi daging kote kap!” (Mat. 26:41).

·       Jadilah kalak si ertoto  (pendoa) man kalak si deban. Ertoto man kerina, la lit si tading-tading termasuk man para pemimpin (1 Tim. 2:1). Sehkenlah pertoton syafaat man kerina. Syafaat ertina eme pemindon/ permohonen. Kita mindo/ bermohon man Dibata. Totota ngena ate Tuhan. Totota ibegikenna. Pertoton kalak si bujur ergegeh kal (Jakup 5:16b). Enterem jelma perlu totota. Sekelewetta, bangsa ras negarata perlu totota. Mari dage, muat bagin kita ibas ertoto.

 Pdt. Juris Tarigan, M.Th

GBKP RG Depok – Lt. Agung

Ogen : Kolose 3:1-4

Thema : “Ipekeke Ras Kristus”

Kekeken Kristus merupaken kemegahen ibas kegeluhen kalak Kristen, sebab mereken keselamaten man tiap kalak si tek man baNa. Sembaba ras kiniteken kerna kekeken Kristus, emaka fokus kegeluhen kalak si tek labo nari kerna doni enda. Kalak si tek memang nggeluh denga i doni enda janah Tuhan terus makeken anak-anakNa jadi sira ras terang. Nggeluh si bage banci terjadi adi kalak si tek ndalani perdalanen geluhna kempak kegeluhen si rasa lalap. Adi lang, maka ia jine me mulihken itaban dosa. Kalak si nggo tek man Kristus, iidahna doni inganna tading enda eme pemere Dibata guna ia ringan ije. Emaka kalak si tek ngidah doni sebage sada ingan guna nehken kiniulin gelah kerina manusia ikut ngenanami uga kin pasu-pasu Dibata e.

Ibas Kolose 2 Paulus ngajarken kerna kalak si tek si ersada ras Kristus. Paulus mpebetehken man perpulungen i Kolose maka ia nggo ersada ras Kristus; ia nggo mate ras Kristus, ikuburken ras Kristus, bagepe ipekeke ras Kristus. Emaka ibas Kolose 3 si jadi bahan PJJnta enda atena ngajarken maka kalak si tek secara posisi nggo ipekeke ras Kristus. Dibata ngidah kita sebage kalak si nggo ipekeke ras Kristus (secara posisi). Ertina Paulus la terjeng ngataken maka perpulungen Kolose nggo bebas arah kuasa-kuasa kesah, tapi pe secara positif erbanpenegasen perpulungen si nggo ipekeke ras Kristus.Keadan enda jadi palas guna nggeluh patuh sebage pengikut Jesus. Kinata maka perpulungen Kolose nggo ipekeke ras Kristus ncidahken maka perpulungen e nggo seh ibas waktu ras keadan si tuhu-tuhu berbeda ras sebelumna sanga ia lenga tek man Kristus.

Ipekeke ertina ijenda eme ikut berpartisipasi ntah pe ikut muat bagin. Tek nandangi Berita Si Meriah berarti ikut muat bagin ibas kuasa kekeken Kristus. Labo berarti sanga Jesus ipakuken ras ipekeke ibas si mate nari, kita pe ikut ibas peristiwa e. Ikut muat bagin maksudna alu kekeken Kristus berarti perpulungen nggejapken kuasa kekeken Kristus sanga ia tek nandangi Berita Si Meriah. Tek nandangi Berita Si Meriah erbanca perpulungen si sebelumna mate jadi nggeluh. Kuasa kekeken Kristus si megegeh e gundari erdahin ibas kegeluhen kalak si tek.

Perpulungen Kolose nggo ipekeke ras Kristus. Perpulungen e nggo keke ibas si mate nari. Erkiteken keadan perpulungen Kolose berbeda ras keadan sebelumna, perpulungen e isuruh guna ndarami erta-erta surga, Perpulungen Kolose nggo ipekeke ras Kristus. Geluhna gundari eme sikerajangen Kristus. Kai si jadi sura-sura Kristus harus pe jadi sura-surana.

Isuruh guna ndarami erta-erta surga ijenda ibas bentuk kata kerja aktif enda ncidahken kempak perbahanen manusia seh maka teridah keseimbangen karya Dibata ibas perpulungen ras perbahanen perpulungen. Kesempurnan nggeluh ibas Kristus bersipat dinamis labo statis. Kata kerja “ndarami” ipahami radu ras “bulatkenlah ukur” ibas ayat 2. Dua kata kerja enda la banci ipahami sebage bentuk ntabeh rusur siakap kerna hal-hal ibas masa depan seh maka lupa kita maka situhuna kita enda nggeluh ibas masa gundari enda (masa depan tidak akan ada tanpa masa kini). Dua kata kerja enda la terjeng lit ije muaten teologis, tapi lebih khusus kerna muaten etis (perbahanen). Ndarami berarti fokus kerna perbahanen nggeluh secara teologis. Ndarami erta-erta surga berarti fokus kempak Kristus. Erkiteken sie persadan ras Kristus nggo jadi bagin kegeluhen perpulungen, emaka isuruh perpulungen guna ndarami erta-erta surga berarti isuruh guna mpegeluhken Kristus arah pengerana ras perbahanenta.

Ibas ayat 1 enda teridah maka kekeken ras Kristus merupaken peristiwa si nggo terjadi sanga manusia tek man Jesus. Emaka perlu ka ipebetehken man perpulungen kerina, ndarami erta-erta surga labo berarti segat ateta nandangi doni enda ntah pe la ateta tading i doni enda. Ndarami erta-erta surga berarti ndarami hal-hal si jadi sura-sura Kristus. Tujun kegeluhen kalak Kristen fokusna eme ingan ija Jesus ipermuliaken ras kundul arah kemuhen Dibata. Erta-erta surga ncidahken maka kalak Kristen situhuna nggo ikut muat bagin ibas kekeken Kristus. Perpulungen e nggo lit i surge amin pe gundari terbuni denga. Secara ringkas, banci ikataken isuruh kita guna ndarami erta-erta surga merupaken perintah guna mpegeluhken Kristus arah pengerana ras perbahanenta.

Jesus Kristus kundul ibas kemuhen Dibata. Enda Bahasa anding-andingen. Labo maka Dibata kundul ibas kawes Jesus janah Jesus kundul ibas kemuhen Dibata.Maksudna perpulungen Kolose isuruh ndaramisa erkiteken Kristus lit ije. Ngkai maka bage? Masyarakat Jahudi ras non-Jahudi erpengakap posisi kemuhen merupaken ingan si mehamat. Bahasa anding-andingen kemuhen ibas Padan Sindekah ertina eme gegeh ras ingan cicio. Jadi, kalimat “kundul arah kemuhen Dibata” ncidahken kerna sentralitas ras keutamaan Kristus i surga. Sentralitas Kristus i surga enda me si harus icidahken kalak si tek ibas doni enda. Kegeluhen kalak si tek eme kegeluhen si mastiken sentralitas ras keutamaan Kristus ibas doni bagi i surga.

Kata kerja “ndarami” merupaken gambaren si teridah araha kata kerja “bulatkenlah ukur” ibas ayat 2. Duana ncidahken keseimbangen antara perbahanen si teridah ras motivasi perbahanen si la teridah. Perbahanen ras motivasi perbahanen jadi sada mengarah kempak sada tujun, eme Kristus. Ibas Pilipi 3:5 kalak dewasa teridah arah cara rukurna. Ibas Roma 8:5-8 perukuren sekalak jelma teridah arah carana nggeluh. Perukuren si la teridah jadi konkret ibas perbahanen sekalak jelma. Ertina, sinilakoken sekalak jelma eme gambaren perukurenna. Perpulungen Kolose sebage anggota kinirajan surga isuruh guna nggeluh uga kin seharusna warga kinirajan surga. Perpulungen e gundari harus ngukurken hal-hal surgawi asangken ngukurken hal-hal doni. Emaka kai bedana hal-hal surgawi ras hal-hal doni. Perukuren manusia (sura-sura daging) ulihna eme kematen, sedangken perukuren Kesah mereken kegeluhen. Enda terjeng Bahasa anding-andingen ngenca, labo kula secara jasmani maksud Paulus ijenda tapi cara nggeluh sindekah si nulak kerehen Kristus. Labo doni si itulak Paulus, tapi cara nggeluh doni si lalit ije Kristus. Perpulungen Kolose isuruh guna nggeluh i doni radu ras Kristus janah fokus kempak Kristus ibas kerina perbahanen ras perukurenna. Ibas pengertin enda isuruh guna “bulatkenlah ukur” berarti lit lah ibas kita motivasi. Ngukurken erta-erta surga berarti ngelitken motivasi-motivasi si jadi palas arah kerina perbahanen ras perukuren bagi Kristus.

Ibas ayat 3 ikataken ije perpulungen mate nandangi cara nggeluh sindekah merupaken Bahasa anding-andingen si ncidahken kempak peristiwa si terjadi sanga perpulungen megiken Berita Si Meriah janah sebage dampakna tek man Kristus. Kiniteken man Jesus nggo mabai perpulungen arah cara nggeluh iteruh kuasa-kuasa kesah doni kempak kegeluhen ibas persadan ras Kristus.

Perpulungen Kolose ndarami ras ngukurken erta-erta surga labo saja erkiteken ia mate ras Kristus tapi pe nggeluh radu ras Kristus. Sebage manusia si nggo ipekeke radu ras Kristus, ia gundari ikut muat bagin ibas kekekenNa. Jadi, ia harus mpegeluhken kegeluhenna si berbeda ras kegeluhen sebelumna. Perhatian perpulungen Kolose gundari harus fokus kempak Kristus. Gundari kegeluhen perpulungen Kolose terbuni denga, tapi pagin sanga Jesus reh kegeluhenna pasti icidahken kerina. Istilah “kegeluhen” ibas ayat 3 ncidahken kempak kegeluhen si gundari, sedangken istilah “kegeluhen” ibas ayat 4 ncidahken kempak kegeluhen ibas masa si reh. Emaka, labo berlebihen adi ikataken kami maka kegeluhen kalak si tek man Jesus eme kegeluhen surgawi. Nggeluh ras Jesus eme kegeluhen surgawi si terbuni denga janah sangana nimai icidahken kerina sanga kerehenNa peduakaliken. Guna sementara waktu enda kalak si tek ibuniken denga. Seh pagi waktuna kegeluhen e icidahken.

Kegeluhen perpulungen Kolose ibuniken. Kai ertina? Ibuniken ibas ise nari? Kai si ibuniken? Ise mbunikenca? Doni la nandai Kristus bahkan kalak Kristen jine la nandai dirina jine. Jadi, si ibuniken man doni eme Kristus ras diri kalak Kristen. Ungkapen ibuniken eme kempak misteri Dibata ras kerina erta kepentaren ras pemeteh si terbuni man kalak si lenga tek. Teks ngataken maka si terbuni labo erta surgawi tapi kegeluhen perpulungen. Kristus gundari lit i surga. Kalak Kristen nggeluh ras Kristus seh maka si terbuni man doni ntah pe kalak Kristen eme kemulian nggeluh ras Kristus i surga e. Kemulian nggeluh ras Kristus tetap nimai icidahken e kerina sanga kerehen Kristus peduakaliken. Jadi, si terbuni labo kegeluhen simbaru kalak Kristen erkiteken justru kegeluhen enda me si sangana isaksiken kalak Kristen man doni enda. Si terbuni eme kemulian nggeluh ras Kristus i surga. Kerna kegeluhen i surga enda, baik kalak si tek ntah pe kalak si la tek la ngidahsa gundari enda.

Gambaren radu ras Kristus ipake guna erban gambaren persadanta secara pribadi antara kalak si tek ras Kristus. Istilah “radu ras Kristus” ncidahken kempak masa depan. Ise si mbunikenca? Enda bentuk pasif kata kerja “ibuniken” ras kata kerja “icidahken” ibas ayat 3 iidah sebage cara pasif Dibata. Alu bage, icidahken kari si terbuni e merupaken karya Dibata. Kegeluhen kalak Kristen radu ras Kristus ikataken lebih lanjut “ibas Dibata”. Adi ikataken kegeluhen kalak si tek radu ras Kristus ibas Dibata, enda jelas ncidahken kepastin kegeluhen e. Kata “ibas Dibata” ncidahken maka kegeluhen si terbuni e tuhu-tuhu aman ras la banci ikuit ise pe. Disamping sie, erkiteken Kristus jine lit ibas Dibata janah kalak si tek si jadi sikerajangen Dibata pe lit ibas Dibata, maka teridah sada persadan kalak si tek ras Dibata. Persadan si nteguh ras pasti. Ertina, perpulungen Kolose mulai kin sanga ia tek man Kristus seh asa kerehen Kristus peduakaliken, lit ibas pengepkepen Dibata.

Kai si gundari ibuniken pasti icidahken sanga kerehen Jesus peduakaliken. Nggeluh radu ras Kristus si gundari terbuni pasti pagin icidahken. Sanga Kristus icidahken mulihi kempak doni, paksa sie me kalak si tek pe ikut icidahken ras Kristus. Icidahken Kristus e nggo pasti bakal terjadi ibas wari pendungi. Tapi, waktu icidahken e tetap merupaken rahasia. Kai si sedekah enda terbuni icidahken seh maka identifikasi Kristus ras anakNa si tuhu-tuhu ndeher jadi teridah sanga kerehenNa peduakaliken. Hal enda teridah sanga perpulungen Kolose la terjeng ikataken nggeluh ras Kristus, tapi Kristus eme kegeluhen perpulungen Kolose. Perpulungen Kolose la terjeng nggeluh ras Kristus. Kegeluhen perpulungen Kolose eme Kristus. Kegeluhen eme Kristus labo ertina maka kegeluhen Kristus si keke i surga banci ipeseri ras kegeluhen kalak si tek i doni ntah pe perpulungen eme kula kekeken Kristus. Kegeluhen eme Kristus berarti Kristus sebage sumber, pusat ras tujun kegeluhen kalak si tek secara pribadi bagepe secara perpulungen/persadan.

Gundari Kristus kundul ibas kemuhen Dibata. Sanga Jesus ncidahken diriNa ibas kerehenNa peduakaliken, teridah me maka anakNa radu ras Ia. Sanga Jesus Anak Dibata ncidahken diri tentu sie bakal jadi wari anak-anak Dibata icidahken ibas si terbuni nari. Duana radu terjadi janah labo merupaken dua tahapen. Wari ija Ia icidahken ije wari kemulian. Kemulian nggeluh si sedekah enda ibuniken bakal icidahken. Sanga Jesus si imuliaken ncidahken diri, ibas wari e kalak si tek bakal icidahken ibas kemulian. Enda berarti anak-anak Dibata bakal jadi seri ras anak Dibata ras ngaloken kula kekeken si mulia (Pil. 3:20; Rom: 8:18; 1 Joh. 3:2). Aspek pengarapen ibas masa depan enda erbanca motivasi ngelakoken perbahanen si mehuli ibas perpulungen Kolose guna ngelakoken kai si isuruh Dibata. Motivasi kerna masa depan jadi salah sada dasar moralitas Kristen. Jadi, anak-anak Dibata erkiteken kiniteken man Anak Dibata.

Pdt. Andreas Pranata Meliala, S.Th

GBKP Rg. Cibinong

Ogen  : Roma 8:9-11

Thema : Geluh Si Mbaru Ibas Kristus

Ibas bahan PJJnta Roma 8:9-11 Paulus mulihi langsung menyapa singoge suratna enda janah mulihi erban penekanen isi ayat 5-8 man singoge suratna. “Kam labo nggeluh rikutken sura-sura ukur manusia, tapi kam nggeluh rikutken sura-sura Kesah adi tuhu kin Kesah Dibata ringan ibas kam”. Erti “nggeluh” ijenda nggo ijelasken banci sinehen ibas ayat 5. “Sura-sura ukur manusia” ijenda seri ertina bagi ayat 8, eme biak manusia erkiteken dosa. Nggeluh rikutken sura-sura ukur manusia ertina eme: lit ibas lingkungen pengaruh ukur manusia e. Adi kita lit ibas lingkungen si dem racun, kesehaten kulanta pasti ceda erkiteken sie. Amin pe kita nggo ertambar, la banci kita malem adi kita tetap nggeluh ibas lingkungen si seri. Sie me si ikataken ibas ayat 9a enda: ibas peridin kita nggo ipeserap ibas lingkungen si la mehuli nari, lingkungen si dem racun kiniteken e, janah kita ipindahken ku lingkungen Kesah, lingkungen si erbanca sehat secara kiniteken.

“Kalak si lalit Kesah Kristus ibas ia, la ia sikerajangen Kristus”, kalimat enda la itulis alu maksud ngeraguken kinata maka perpulungen Roma “nggeluh rikutken sura-sura Kesah”. Kita la ibabai guna ndarami bukti ibas dirinta, ibas suasana pusuhta, maka Kesah memang tading ibas kita. Seri bagi Roma 3:30, bagepe ibas Roma 8:17, kalimat “adi tuhu kin” la ncidahken syarat, tapi hubungen sebab-akibat. Erkiteken Kesah ringan ibas kita, kita lanai “nggeluh rikutken sura-sura ukur manusia”. Kerehen Kesah ibas kalak si tek njamini ia nggo ndarat ibas lingkungen si banci erbanca ia ceda. Emaka Kesah e si ringan ibas kegeluhenta la terjeng kentisik ngenca, ntah pe harus lit lebe kejadin-kejadin si erbanca kita sengget (peristiwa supranatural). Kesah tading ibas dirinta bagi kita ngiani sada rumah: tetap, terus-menerus. Bagi kita ngatur ras mengubah rumahta seh asa sue bagi kebutuhen ras seleranta, bage ka pe kerna tindaken Kesah ibas kegeluhenta. Sie si ikataken alu jelas ibas 1 Korinti 6:19 bagepe 1 Korinti 3:16. Emaka berbeda keadaan kegeluhen manusia si iani Kesah asangken si iani dosa. Dosa tading ibas rumah kegeluhenta sebage penyerobot, si erbanca rumah e, kegeluhenta, seh kal cedana. Sebalikna, Kesah ngiani rumah kegeluhenta memang Ia kin si mpuna rumah kegeluhenta, si ngerawat rumah e alu mehuli. Cara Kesah ringan ibas kita labo bagi cara kesah-kesah si mengketi kalak ibas agama sideban. Kalak si kerasuken e labo nari ia si bas e, janah kenca ia sadar lanai ingetna kerna perbahanen ntah pengeranana. Sebalikna, kalak si tek si ibabai Kesah tetap sadar, tetap nge ia bage, ia labo pasif, tapi seh kal aktifna. Janah tetap ia jine si bertanggung jawab kerna perbahanenna. Erkiteken sie kita ibabai erdalan rikutken sura-sura Kesah. Emaka perlu ka sipergermetken kerehen Kesah merupaken patoken guna nentuken apakah sekalak jelma eme kalak Kristen. Hal sienda me rusur si iperdebatken ibas kalangen gereja Pentakosta-Kharismatik. Saja perlu siinget kai si kataken ndai kerna cara kerehen Kesah ibas dirinta. Sebab, kita lanai bo ngeraguken kerehen Kesah ibas dirinta ras ndarami bukti-buktina ibas keadanta, ibas suasana pusuhta, ibas perbahanenta. Sebab kita nggo ngaloken Kesah, eme ibas peridin. Paulus nambahken kalimat ibas Roma 8:9a sebage persinget. Sebab kalak Kristen pe banci nulak Kesah Si Badia, banci ipediatna penghuni sindekah rumah kegeluhenna bengket mulihken (bnd. Mat. 12:43-45).

“Tapi adi Kristus ringan ibas kam, maka amin arus gia kulandu mate erkiteken dosa, tendindu nggeluh kap erkiteken Dibata enggo ngerembakken kam kempak diriNa”. Ibas ayat 10 enda lit semacam pembedan ibas dirinta si kin kita sikerajangen Kristus eme kula ras kesah. Kai maksud pembedaan enda? Maksudna eme kita harus menyadari maka kulanta tetap eme kula erdosa si harus mate sebage upah dosa, tapi ibas Kristus, kesahta tetap nggeluh erkiteken ibas kesah lit kegeluhen simbaru arah Kesah Si Badia si mpebincarken kebenaren ras keadilen Dibata. Hal enda la berarti kulanta la ipekeke, tapi pembedaan enda imaksudken gelah kita harus meteh maka kita lalap ipebadiaken arah pendahin Kesah Si Badia janah sie labo sipatna instan, tapi ngelewati erbage-bage proses si kedungenna mabai kempak kesempurnan kula ras kesah. Alu kata sideban, kalak si nggeluh ibas Kesah bakal naluken sura-sura ukurna bagepe dosana. Ngkai? Erkiteken ibas kesahta lit kegeluhen si ngasup naluken kematen.

“Adi Kesah Dibata si enggo mpekeke Jesus ibas si mate nari ringan ibas kam, maka Dibata si enggo mpekeke Kristus ibas si mate nari e la banci lang mereken geluh si mbaru man kulandu si arus mate e, arah KesahNa si ringan ibas kam e”. Ibas ayat 11 enda Kesah lanai ikataken “ringan ibas kam” (ayat 9), tapi “si mpekeke Kristus”. Sebab si ate itegasken ijenda eme hubungen erat antara kekeken Kristus ras kekekenta. Kekeken Kristus idahiken Kesah. Emaka kerehen Kesah ibas dirinta merupaken jaminen maka kita pe bakal ipekekeNa. Kerehen Kesah ibas kita merupaken jaminen maka selain kegeluhen simbaru si berlaku mulai gundari, kita pe ibereken kegeluhen si rasa lalap. Jadi, teridah ijenda ayat 10 ngerana kerna kegeluhen simbaru ibas erti “etis” ntah pe perbahanen sanga kita nggeluh i doni enda, sedangken ayat 11 njanjiken kegeluhen si rasa lalap.

Kai si banci irenungken ibas bahan PJJnta enda. Mpersilahang bana (penyangkalan diri) ras mersan silang eme dua tindaken si lanai ngukurken dirinta jine, tapi lebih ngukurken sura-sura Dibata ibas kegeluhen amin pe perbeben e mengancam kita. Tandana kita nggo ngaloken geluh simbaru Kristus berarti kita harus mpebincarken terang kemulian, terang kekelengen ras kebenaren si ipebincarken Kristus. Enda me jati diri kalak Kristen si tuhu-tuhu, eme pang nehken kebenaren Kristus, tapi tetap ngkelengi ia si erdosa bagi Kristus si pang nehken kebenaren alu la kompromi ras ngkelengi ia si nggo papak. Tandana ka pe kita nggo ngaloken geluh si mbaru ibas Kristus alu pembabai Kesah Si Badia, pakekenlah kulanta enda si kin ibas kulanta enda me ringan Kesah Dibata guna kemulian Dibata. Carana eme alu makeken mata, pemegi, perukuren, pengerana, bagepe kerina perbahanenta guna mpermuliaken Dibata. Pakekenlah matanta guna ngidah si mehuli saja. Pakekenlah pemeginta guna megiken Kata Dibata alu mehuli. Pakekenlah babahta guna mberitaken Berita Si Meriah ras ngajar Kata Dibata, labo guna ncakapken kalak. Pakekenlah perukurenta guna ngukurken kebenaren Kata Dibata, labo lalap ngukurken hal si sipatna semu. Pakekenlah perbahanenta guna mberitaken Berita Si Meriah, jadi saksiNa, rsd. Kerina e sumberna arah pusuh si nggo ipelimbarui Kesah Si Badia.

Pdt. Andreas Pranata Meliala, S.Th

GBKP Rg. Cibinong