Ogen           : Jesaya 54:9-10

Tema          : KELENG ATE DIBATA LA MISER IBAS KITA NARI.

PERLEBE.

Kinata Kegeluhen manusia si nggeluh ibas doni enda la terlepas ibas erbage-bage paksa, lit paksa meriah bagepe paksa ngenanami kesusahen, sienda kerina labo tersilahken kita, tapi harus nge sialaken. Ibas ngalakenca tentu tetap erpalasken Kata Dibata ras kiniteken si paguh man Tuhan. Arah kinitekenta e mpeturah gegeh ras kengasupen ibas dirinta guna ngalaken kerina situasi ras erbahanca kita tetap mbentasisa, ulihna kita menang ras kinitekenta pe reh dewasana. Ibas paksa genduari enda pe melala situasi perbeben sinialaken kita, a.l. Bencana Gunung Sinabun, Covid 19, si berdampak kubas kerisis global si mempengaruhi kerina dampar kegeluhen manusia. Emaka arah PA Mamre ta kita erlajar ras ipersingeti guna tetap nginget janji Tuhan ras keleng ateNa si tetap man banta selaku anak-anak Tuhan.

BIMBINGEN TEKS.

Kitab Yesaya 54:9-10 eme bagin peduaken ibas telu bagin kitab Nabi Yesaya i igelari Deutro Yesaya, eme kerna janji/padan Tuhan guna mulahi bangsa Israel ibas pembuangen Babilon. Arah teks enda Nabi Yesaya nuriken kerna kuasa ras keleng ate Dibata ngenca si banci mpelimbarui kegeluhen banga si sangana ngenanami kiniseran ibas pembuangen nari. Nabi Yesaya mpersingeti bangsa Israel kerna latar belakang ukumen si inanami bangsa Israel eme erkiteken nembeh ate Dibata ibas dosa-dosa bangsa e, tapi pernembeh Dibata e labo ndekah adi lit pertobaten/perubahen ibas bangsa Israel. Nabi Yesaya ningetken maka padan Dibata guna mulahi bangsa e pasti ilakoken, sue ras padan Dibata man Nuah,  ndigan pe lanai  ibahan kelenglengen man doni enda. Padan Dibata e tetap, la miser sitek pe, bicara deleng-deleng miser, uruk-uruk mundu-undu, keleng ate dibata tetap nge. Enda jadi sada janji si erbahanca bangsa e tetap megegeh ras mulihken erkiniteken man Tuhan Dibata.

Ibas Pustaka SiBadia, tangkas teridah uga padan Tuhan e isehken, Bangsa Israel mulihken ku Yerusalem alu surak-surak si meriah, rumah pertoton pe i pajekken mulihi, bangsa e ngataken bujur ras ngakui kerna sie kerina jadi erkiteken perbahanen Dibata.Melala denga janji Tuhan sienggo igenepi ibas Pustaka SiBadia, si mbelinna eme kerehen Mesias, eme Yesus Kristus sinelamatken manusia ibas kuasa dosa, kuasa kematen nari. Enda kerina nuduhken maka kai sienggo ipadanken Dibata pasti isehkenNa ibas paksa si payo rikutken sura-sura Dibata saja.

REFLEKSI

Paksa enda kita sangana ngenanami perbeben erkiteken Bencana Alam, Erupsi Gunung Sinabun si enggo cukup ndekah ras lenga erkedungen seh ibas paksa enda, bagepe kita sangana ngalaken pandemi Covid-19 si enggo setahun lebih, ras lenga terpasiteken ndigan ngadina, bagepe lit ka benca banjir  si nialaken perpulungenta ibas piga-piga ingan. Secara manusia tentu latih siakap ngalokenca ras ngalakenca, tapi arah bahan PA enda kita ipersingeti guna nginget janji Tuhan man banta, maka kita harus optimis Dibata pasti mereken serpang pulah ibas kiniseran si sangana reh man banta paksa enda. Ula sempat bene pengarapenta, janji Tuhan pasti isehkenNa ibas paksa si payo.

Uga sikapta ibas nimai janji Tuhan e, tentu saja labo kita sinik/statis, kita pe harus tetap aktif ibas ndalani kegeluhenta, tetap sidahiken dahinta, tetap kita metenget ras megermet ras pe sipatuhi  arahen pamerentah/pihak si berwenang kerna situasi enda.

Situasi perbeben enda ningetken kita guna mediate ras kepate nandangi kalak sideban isekelewetta, enda sada kesempaten man banta guna encidahken kekelengen alu nampati kalak sideban, memang kerina nge kita terdampak, tapi lit kange si lebih berat baban geluhna/korban bencana asangken kita. Nampati kalak sideban banci isehken alu mereken penampat, baik moril entahpe materil sue ras gegeh ras kengasupen ibas kita bagepe kebutuhen kalak si man sampaten. Emaka sipindoken-lah gegeh ibas Dibata nari man banta guna jadi saluran berkat man kalak sideban, sebab Tuhan erdahin alu erbage-bage cara ras media, banci saja kita ipake Dibata guna ngerehken serpang pulah ibas perbeben kalak si lit isekelewetta. Amin.

Pdt  Togu  Persadaan Ginting Munthe

GBKP – Rg  Cililitan

Ogen           : 3 Johanes 1:5-8

Tema          : METEMUE DINGEN NAMPATI.

PERLEBE.

Malem kal ate orang tua adi anak-anakna ncidahken biak-biak si mehuli ibas kegeluhenna si tep-tep wari, perbahanen simehuli jadi ingeten ras pe jadi usihen man kalak sideban. Dibata pe Tentu saja erngena ate ngidah kita selaku anak-anakNa ngelakoken perbahanen simehuli e, sebab enda me perentah Dibata si harus sidalanken ibas doni enda. Motivasi Ibas ndalanken perbahanen simehuli e eme kiniteken man Dibata, segelah ola rayo-ayo ntah pe lit motivasi tertentu ibas ndalankeca. Ibas PA Mamre ta enda, kita iajuk guna tetap erbahan si mehuli man kerina manusia alu la ngenehen latar belakangna, bagepe ngajarken ras ngajuk anak-anak ngumban biak si nggit metemue ras nampati kalak sideban.

BIMBINGEN TEKS

Ogenta ibas PA enda, eme Surat Rasul Yohanes man Gayus bagepe pengajuk Rasul Yohanes man perpulungen kalak Kristen si merap marpar ibelang-belang doni guna tetap ngelakoken perbahanen simehuli eme nampati Perberita Simeriah, bagepe kalak si perlu man sampaten, aminnpe pe la itandai. Enda isehken Rasul Yohanes kenca ialokenna berita  kerna perbahanen Gayus si nampati kalak musil  ras mendukung pelayanen kalak si erberita simeriah (Penginjil) alu mereken Ingan ras penampat-penampat si iperluken ibas dahin meritaken Injil. Ibas Pustaka SiBadia, lit piga-piga kalak si tergelar Gayus: (Perb.19:29, Gayus kalak Makedonia, teman Paulus si ngenanami kiniseran erkiteken Injil  i Efesus, ; Perb.20:4, Gayus ibas kuta Derbe, si nemani Paulus i Makaedonia ku Troas ras Siria,; 1 Kor 1:14, Gayus si iperidiken Paulus sanga tading i Korinti,; Roma16:23, Gayus si mereken penampat man Paulus, ; 3Yoh 1. Gayus ibas Efesus nari sekalak serayan i Efesus si ngaloken surat ibas Yohanes).

Rasul Yohanes ningetken kerna perbahanen Gayus e enggo jadi berita simehuli ras jadi kesaksin man kalak kristen ibas erbage-bage ingan. Enda labo hanya jadi pujin man Gayus tapi jadi persinget segelah perbahanen sibage tetap  ilakoken ras idalanken erpalasken kiniteken man Dibata, arah nampati kalak sideban, terlebih-lebih nampati dahin ibas meritaken Berita Simeriah epe sada dahin pelayanen si nyata si harus ilakoken jadi gaya hidup kalak Kristen i belang-belang doni enda.

REFLEKSI

Dahin guna meritaken Injil eme dahin siharus isehken kerina kalak Kristen i doni enda, sebab enda Amanat Agung Tuhan Yesus sope nangkih ku surga. Ibas ndalanken dahin e, kalak Kristen perlu sisampat-sampaten alu gegeh ras kengasupen ras talenta si lit ibas dirina. Ibas nehken dukungen e labo hanya berbentuk materi saja, tapi melala dampar si banci silakoken, contohna: Mereken fasilitas ingan, nuduhken dalan, rsd. Enda kerina termasuk nge meritaken Berita simeriah.

Ibas nehken penampat enda harus erpalasken Kata Dibata/kiniteken, ula rayo-ayo sebab kerina kalak Kristen eme enngo i rakut ibas kula Kristus.

Metemue ras nampati eme gaya hidup kalak kristen ras kebiasaan ibas budayanta si perlu ikembangken ibas kegeluhenta si teptep wari, enda banci ibenaken ibas keluarganta. Emaka kita selaku orangtua tetap mereken usihen ras ngajarken kebiasaan enda man anak-anakta, misalna rumah ta jadi ingan ngincuah man keluarga si reh i kuta nari erkiteken lit keja-kerja, nampati sekelewetta si perlu man sampaten. Amiin.

Pdt  Togu  Persadaan Ginting Munthe

GBKP – Rg  Cililitan

(Anak Si Nguda Jadi Pasu-Pasu)

Ogen  : Masmur 144:1-2, 12

Tema  : “Anak Si Megegeh Dingen Mejile”

KATA PENARUH

Ibas perkembangen jaman si tempa-tempa lanai erdalan tapi kiam alu pedas, rikutken kemajun teknologi informasi enda erbahanca anak si nguda (kitik, remaja, anak perana/singuda-nguda) cenderung ngikuti tren jaman si sangana berkembang. Anak singuda ngelakoken si enda guna ndatken pengakun ibas lingkungenna, jenari gelah la ikataken ketinggalan zaman ras KuPer (kurang pergaulan). Melala kal sinikataken tren i bas anak singuda, mulai cara peruis, pengerana, gaya hidup, ingan gawah-gawah, musik, gadget, seh ku bas kebiasan-kebiasan nggeluh bagi ngisap, dugem (dunia gemerlap), narkoba, ras sidebanna. Emaka jabu iarapken jadi pematang ibas pembentuken karakter bagepe pembentuken proses kegeluhen anak singuda enda. Janah gereja pe harus muat bagin i bas mempersiapken generasi-generasi muda enda, gelah la ia terjerumus ku bas hal-hal negatif si banci menghacurken masa depanna. Tapi gereja ras keluarga (Mamre GBKP) harus muat bagin i bas proses enda, gelah banci anak si nguda enda jadi pasu-pasu bagepe megegeh ras mejile.

PEMBAGESI TEKS

Ibas Masmur 144 enda banci si idah uga ‘Ende-enden pengataken bujur Raja’ erkiteken menang ibas perang nari, jenari igejapkenna uga penemani ras pasu-pasu Tuhan ibas kerina kegeluhenna. Masmur enda termasuk salah sada masmur si cukup gedang eme 15 ayat. Janah banci ibahan ku bas piga-piga bagin. Pemena ayat 1-4; Peduaken ayat 5-8; Peteluken ayat 9-11; Peempatken ayat 12-15. Oratenta ibas PA Mamre enda eme bagin I (ayat 1,2), bagepe bagin IV (ayat 12).

Ibas bagin I ayat 1 ras 2, ije si idah uga pemasmur mpenangkih pujinna man Tuhan, igejapkenna maka Tuhan kap si jadi sekawalna ibas ndalani kegeluhenna terlebih sangana ia erperang ras imbang-imbangna, jenari ikatakenna maka Tuhan kap singajarisa (jadi guru/mentor) erbahan strategi bagepe ngelawan imbangna tupung ia erperang. Ibas ayat 2 ituriken pemasmur alasenna muji dingen ngataken bujur man Tuhan, sabab itehna maka Tuhan kap singkawali dingen jadi pembelana. Tuhan ijadikenna ingan cilinggem ras ampang-ampang si paguh, seh maka la ia kena bahaya, senjata imbangna la engkenai jenari la ngelukai kulana. Jadi, tuhu-tuhu iakukenna maka banci ia selamat, la mate ibas erperang jenari mulihken ku istanana alu kemenangen e kerina erkiteken pengkawali Tuhan dingen Tuhan singampang-ngampangi ia tetap.

Ibas bagin IV eme ayat 12, turah sada pengarapen maka adina Tuhan tetap masu-masu dingen mereken kemenangen man bangsaNa emaka generasi penerus eme anak-anak dilaki ras diberu banci jadi pewaris ras mereken kemegahen nandangi orang tua bagepe bangsaNa. Ikataken maka anak-anak perana balilah desken batang kayu turah alu megegeh, janah anak-anak diberu jadi desken tiang si ihias i bas suki-suki istana. Hal enda iertiken, maka turah pengarapen nandangi generasi penerus si tangguh ras berkualitas, ija anak-anakna si dilaki banci jadi andalen, terpenalem jenari megegeh ibas erperang guna njagai bangsana, jenari la mesukah melus ras mate tapi turah desken batang kayu simereken ketenengen ras kemalemen ate sabab banci jadi ingan cilinggem i teruh batangna, bageme pengarapen orang tua man anakna. Jenari anak-anakna sidiberu iarapkenna jadi singuda-nguda si mberu, mejile, merupa. Emaka kinijilenna iandingken tiang si mejile dingen ihias si lit i istana si megah. Bageme pengarapen pemasmur nandangi generasi bangsana si i pasu-pasu Tuhan. 

Bageme ende-enden raja Israel sienggo menang i bas perang nari, janah pengarapenna maka Tuhan tetap masu-masu bangsaNa, seh maka la terjeng nandangi generasi si genduari saja tapi pe terus ku generasi-generasi selanjutna, la terjeng man sada kesunduten ngenca tapi terus ku kesunduten peduaken, peteluken ras seterusna. Alu bage bangsa Tuhan enda tetap megegeh ras terus turah desken batang kayu si megegeh ras banci jadi ingan cicio, jenari erbahanca malem ate sabab kinijilen ras merupa subuk rupa bagepe perukurenna.

APLIKASI

Presiden Soekarno pernah ngataken, "Beri aku 1.000 orang tua, niscaya akan kucabut semeru dari akarnya, dan beri aku 10 pemuda niscaya akan kuguncangkan dunia".Enda nuduhken uga mbelinna potensi anak singuda (pemuda-pemudi) si ngasup erbahan perubahen ras kiniulin-kiniulin. Emaka lit istilah singataken, “untuk menghancurkan satu bangsa yang sangat besar itu sangatlah mudah, racuni saja generasi mudanya, maka tak lama kemudian kematian besar siap merenggut”. Istilah enda ngingetken kita mulihi kerna uga belinna potensi anak si nguda enda. Mari sipergermetken, la lah generasi mudanta sigenduari enggo melala ‘teracuni’ jaman enda. Emaka gereja (Mamre GBKP) harus hadir, maba tambar ras penawar racun jaman enda, guna nelamatken generasi mudanta terlebih rudang-rudang gerejanta kerina.

Anak, remaja (KAKR) ras pemuda (Permata) eme generasi penerusta, subuk generasi penerus ibas keluarga, masyarakat, terlebih-lebih generasi penerus iman i bas gerejaNa GBKP enda. Gelah banci anak singuda enda ‘jadi pasu-pasu’ tentu iperluken proses. Generasi penerus gereja enda e me generasi si berproses mulai genduari nari, labo lit si langsung jadi bagi siniarapken kita, tapi berproses ibenaken ibas jabu ntah rumah nari lebe, emaka lingkungen masyarakat, jenari berproses i tengah-tengah perpulungen Tuhan i bas gerejaNa. Emaka sijadiken gereja secara esensi bali ras jabu/keluarga Dibata ingan bertumbuh ras pembentuken generasi muda sejak dini. Gereja ijadikenna inganna berproses kerna kinitekenna, pergumulenna ras kegeluhenna emaka keleng atena gereja enda sebab igejapkenna tuhu-tuhu gereja ‘berjasa’ ibas membentuk ras membina ia. Mamre selaku bapa ibas jabu sekaligus jadi ‘bapa rohani’ man anak-anakna, ikut ertanggung jawab ibas pembentuken proses kiniteken anak singuda enda, gelah alu bage anak singuda enda banci jadi pasu-pasu, subuk nandangi jabu, bangsa ras negaranta terlebih nandangi gerejanta GBKP simalem enda.

I bas realita si idah kita, keberadan Anak, Remaja (KAKR) bagepe Pemuda (Permata) GBKP, condong denga iperlakuken sebagai pewaris masa depan gereja, langa mengikut sertaken sebagai pemilik gereja masa kini. Anak singuda langa i libatken ku bas pelayanen-pelayanen, seh maka terjeng i jadiken objek pelayanen langa ikut jadi subjek (pelaku) ibas pelayanen gereja.

Pdt. Irwanta Brahmana

(GBKP Rg. Surabaya)