Suplemen PA Mamre : Jesaya 54 : 9 -10 ; Tgl 14 - 20 Maret 2021
Ogen : Jesaya 54:9-10
Tema : KELENG ATE DIBATA LA MISER IBAS KITA NARI.
PERLEBE.
Kinata Kegeluhen manusia si nggeluh ibas doni enda la terlepas ibas erbage-bage paksa, lit paksa meriah bagepe paksa ngenanami kesusahen, sienda kerina labo tersilahken kita, tapi harus nge sialaken. Ibas ngalakenca tentu tetap erpalasken Kata Dibata ras kiniteken si paguh man Tuhan. Arah kinitekenta e mpeturah gegeh ras kengasupen ibas dirinta guna ngalaken kerina situasi ras erbahanca kita tetap mbentasisa, ulihna kita menang ras kinitekenta pe reh dewasana. Ibas paksa genduari enda pe melala situasi perbeben sinialaken kita, a.l. Bencana Gunung Sinabun, Covid 19, si berdampak kubas kerisis global si mempengaruhi kerina dampar kegeluhen manusia. Emaka arah PA Mamre ta kita erlajar ras ipersingeti guna tetap nginget janji Tuhan ras keleng ateNa si tetap man banta selaku anak-anak Tuhan.
BIMBINGEN TEKS.
Kitab Yesaya 54:9-10 eme bagin peduaken ibas telu bagin kitab Nabi Yesaya i igelari Deutro Yesaya, eme kerna janji/padan Tuhan guna mulahi bangsa Israel ibas pembuangen Babilon. Arah teks enda Nabi Yesaya nuriken kerna kuasa ras keleng ate Dibata ngenca si banci mpelimbarui kegeluhen banga si sangana ngenanami kiniseran ibas pembuangen nari. Nabi Yesaya mpersingeti bangsa Israel kerna latar belakang ukumen si inanami bangsa Israel eme erkiteken nembeh ate Dibata ibas dosa-dosa bangsa e, tapi pernembeh Dibata e labo ndekah adi lit pertobaten/perubahen ibas bangsa Israel. Nabi Yesaya ningetken maka padan Dibata guna mulahi bangsa e pasti ilakoken, sue ras padan Dibata man Nuah, ndigan pe lanai ibahan kelenglengen man doni enda. Padan Dibata e tetap, la miser sitek pe, bicara deleng-deleng miser, uruk-uruk mundu-undu, keleng ate dibata tetap nge. Enda jadi sada janji si erbahanca bangsa e tetap megegeh ras mulihken erkiniteken man Tuhan Dibata.
Ibas Pustaka SiBadia, tangkas teridah uga padan Tuhan e isehken, Bangsa Israel mulihken ku Yerusalem alu surak-surak si meriah, rumah pertoton pe i pajekken mulihi, bangsa e ngataken bujur ras ngakui kerna sie kerina jadi erkiteken perbahanen Dibata.Melala denga janji Tuhan sienggo igenepi ibas Pustaka SiBadia, si mbelinna eme kerehen Mesias, eme Yesus Kristus sinelamatken manusia ibas kuasa dosa, kuasa kematen nari. Enda kerina nuduhken maka kai sienggo ipadanken Dibata pasti isehkenNa ibas paksa si payo rikutken sura-sura Dibata saja.
REFLEKSI
Paksa enda kita sangana ngenanami perbeben erkiteken Bencana Alam, Erupsi Gunung Sinabun si enggo cukup ndekah ras lenga erkedungen seh ibas paksa enda, bagepe kita sangana ngalaken pandemi Covid-19 si enggo setahun lebih, ras lenga terpasiteken ndigan ngadina, bagepe lit ka benca banjir si nialaken perpulungenta ibas piga-piga ingan. Secara manusia tentu latih siakap ngalokenca ras ngalakenca, tapi arah bahan PA enda kita ipersingeti guna nginget janji Tuhan man banta, maka kita harus optimis Dibata pasti mereken serpang pulah ibas kiniseran si sangana reh man banta paksa enda. Ula sempat bene pengarapenta, janji Tuhan pasti isehkenNa ibas paksa si payo.
Uga sikapta ibas nimai janji Tuhan e, tentu saja labo kita sinik/statis, kita pe harus tetap aktif ibas ndalani kegeluhenta, tetap sidahiken dahinta, tetap kita metenget ras megermet ras pe sipatuhi arahen pamerentah/pihak si berwenang kerna situasi enda.
Situasi perbeben enda ningetken kita guna mediate ras kepate nandangi kalak sideban isekelewetta, enda sada kesempaten man banta guna encidahken kekelengen alu nampati kalak sideban, memang kerina nge kita terdampak, tapi lit kange si lebih berat baban geluhna/korban bencana asangken kita. Nampati kalak sideban banci isehken alu mereken penampat, baik moril entahpe materil sue ras gegeh ras kengasupen ibas kita bagepe kebutuhen kalak si man sampaten. Emaka sipindoken-lah gegeh ibas Dibata nari man banta guna jadi saluran berkat man kalak sideban, sebab Tuhan erdahin alu erbage-bage cara ras media, banci saja kita ipake Dibata guna ngerehken serpang pulah ibas perbeben kalak si lit isekelewetta. Amin.
Pdt Togu Persadaan Ginting Munthe
GBKP – Rg Cililitan
