Nats : Masmur 112:1-10

Tema :

“Jabu Si Ipasu-Pasu Dibata”

Apai penungkunen si benar: kai sumber kemalemen ate kegeluhen manusia? Atau ise sumber kemalemen ate kegeluhen manusia? Penungkunen si ipilih menentuken warna, pilihen, ras tujun kegeluhen manusia. Lit si milih penungkunen si pertama. Tapi lit ka nge manusia si milih penungkunen si peduaken. Kepeken penulis Masmur 112 enda lebih condong milih penungkunen si peduaken. Maka kai si banci erbanca malem ate manusia labo erta tapi manusia ntah pe pribadi, tapi labo pribadi manusia, tapi pribadi Tuhan jine. Mbue rusur terjadi maka erban tujun kegeluhenna guna ndarami sumber kemalemen ate geluhna ibas kai, eme benda ras materi. Ibutuhken kebijaksanan nggeluh gelah kalak banci nehi sada tahap kesadaren maka situhuna si banci erbanca malem ate kalak nggeluh i doni enda eme Tuhan Dibata jine. Mungkin enda me sebabna ibas Kitab Injil ikataken maka darami lebe Kinirajan Surga ras kerinana gelah sidebanna itambahkenna man banta. Kesadaren nggeluh bagenda me siniangkatken kita ibas bahan PA enda.

Judul Masmur enda “Kemalemen ate kalak bujur”. Masmur enda termasuk cukup gendek, 10 ayat ngenca. Kenca lit kata-kata “Pujilah TUHAN!”, selanjutna Masmur enda ibas ayat 1 ilanjutken alu penetapen kerna kai sumber kemalemen ate manusia. Menurut penetapen ayat 1 enda, sumber kemalemen ate manusia lit dua, eme adi kalak erkemalangen man Tuhan ras ndalanken perintahNa. Adi manusia ngelakoken si dua enda ndai maka turah me piga-piga hasil si la terjeng berlaku man dirina saja, tapi pe man kalak sideban. Misalna, ibas ayat 2 ikataken maka anak-anak kalak si erkuasa i negeri, kesusurenna ipasu-pasu me pagi. La terjeng sie saja, isi jabuna jadi kalak bayak namura. Jabu ijenda banci ipahami secara harfiah eme rumah/jabu ingan tading, tapi pe banci ipahami sebage jabu kesusuren. Adi ipahami ibas pengertin enda, maka pasu-pasu e berkelanjuten ras berkepanjangen, sebab mencakup jabu kesusuren. La terjeng erta kebayaken, tapi pe kiniulin tetap ngarak-ngarak ia segegang geluhna. Kalak si bagenda me si la pernah kena bahaya; kalak bujur biasana eme kalak si perkeleng. Malem kal ate kalak si melumbar pepinjamken, dingen bujur ibas kerina urusen; kalak si bagenda nggit nampati kalak sideban janah la bermaksud meneken kalak ibas ia nampati sebab ia bujur ibas kerina urusen. Selanjutna ikataken maka kalak si bagenda asa ndigan pe la guling ia tetap iinget rasa lalap. Bagi nina peribahasa “gajah mati meninggalkan gading, harimau mati meninggalkan belang, manusia mati meninggalkan nama, apakah itu nama baik atau nama buruk”. Kalak si bagenda ikataken teneng ia ndalani kegeluhen, sie kerina erkiteken ia tek man Tuhan. Enda me sebabna ia alu teneng ngadapi musuh-musuhna janah la ia mbiar dingen la aru atena. Kalak si bagenda eme kalak si melumbar man kalak si kekurangen. Gegeh ras wibawana reh belinna. Tapi amin bage gia, enda me kinata kegeluhen: lalap nge lit kalak isekelewetta si cian nandangi kualitas kegeluhen kalak si bagenda. Enda me kalak jahat. La ia banci ngida keberhasilen ras prestasi nggeluh kalak si benar. Kalak jahat ngidah si e janah gara atena, erderik ipenna perbahan nembehna atena. Emaka masap me ia, jenari bene pengarapenna.

Kita kerina pasti erpengarapen gelah ipasu-pasu Tuhan. Bahkan labo terjeng sie tapi kerina kesusurenta. Kunci kegeluhen si bage ikataken Pemasmur alu menekanken prinsip, kita ermalem ate adi kita erkemalangen man Tuhan, nggit ngelakoken perintahNa. Dibata masu-masu kita ras kesusurenta adi kita erkemalangen man Tuhan janah pusuhta ndeher ibas KataNa janah ngelakoken sura-suraNa. Kinatana siakap cukup alu terjeng erngena ate nandangi KataNa tapi la erdalan guna ngelakokenca. Kalak si erngena ate nandangi undang-undang Tuhan pasti erngena ate nandangi kebujuren ras kebenarenNa janah la ngadi seh ije saja tapi ia pasti mperjuangken ras ngelakokenca. Sie berarti si terpenting ibas kegeluhen kalak si erkemalangen man Tuhan eme sura-sura Tuhan harus terlaksana ibas doni enda.

Enda ka pe si itekanken Pemasmur, kemalemen ate kalak bujur terjadi adi ia ras kesusurenna jadi generasi kalak bujur. Generasi kalak bujur pasti ipasu-pasu Tuhan ibereken kecukupen, ras kiniulin. Alu tujun guna ngelakoken kebujuren ras kebenaren arah pusuh ras tindaken si mencerminken kekelengen man teman manusia ras kerina tinepa. Janah guna jadi generasi kalak bujur si kin kesusurenna ipasu-pasu mulailah alu maba diri ras anak jabunta jadi jabu si ersada ibas ndalanken perintah Tuhan. Mari arahken anak jabunta nandai Tuhan ras ngelakoken sura-sura Tuhan. Gundari nari pastikenlah maka anak jabunta ipasu-pasu Tuhan guna ndalanken sura-sura Tuhan i doni enda.

Anak  jabu eme kalak si seh kal deherna ras kita. Erkiteken ndeher e erbanca hubungen si intensif janah mpeturah erbage-bage perasan. Erbage-bage perasan e, misalna keleng ate, kecewa, butuh, merawa, tedeh, kepate, rsd. Hubungen ibas keluarga memang dem alu dinamika. Anak ras orangtua, perbulangen ras ndehara, kaka ras agi, permain ras simetuana, ibarat naruh ibas sada keranjang. Ndeher kal ia erkiteken sie me banci ia saling berbenturan. Tapi tetap saling membutuhken ras sikeleng-kelengen. Mereka ribut meskipun rukun, mereka rukun meskipun ribut. Enda me keluarga. Tuhan Jesus nuruh kalak si atena ngikutken Ia alu mersan silang. Silang ise si perlu si persan? Melala kalak akapna e eme silang Kristus. Padahal labo sie maksudna (bnd. Luk. 9:23). Silang si perlu si persan labo silang Kristus, tapi silangta jine. Ngkai Tuhan Jesus nuruh kita mersan silangta masing-masing? Kai maksudna? Silang eme lambang penderitan lebih tepatna eme lambang penderitan sebage pengorbanen. Lalit kalak si atena ngaloken penderitan. Tapi, kinatana ibas geluh enda lalit kalak si la ngaloken penderitan. Penderitan lit sebage bagin kegeluhenta ibas erbage-bage bentuk si berbeda. Kegeluhen jabu pe bage lit si erbanca meriah ukur lit ka si lang. Pinakit, bencana, ntah pe persoalen rumah tangga eme bagin-bagin si kurang meriah man tatapen. Kita la banci nilah arah bagin-bagin si kurang meriah man tatapen enda. La banci ntabehna saja ateta ndalani kegeluhen enda. Bagepe bagin-bagin si la ntabeh e pe perlu si persan. Enda me silangta. Bayangken seh kal beratna beban perasan orangtua si anak la bagi ukur. Tiap wari orangtua enda mersan beban si kin erbage-bage macam perasan nandangi anakna e. Beban perasan enda me silang si harus ipersan. Keluarga sideban pe ngadapi silang si bentukna berbeda ka ras keluarganta. Lenga sada bulan pe ia ngiani rumahna si mbaru. Rumah enda eme hasil kerja keras selama 10 tahun lebih. Tapi lenga ndekah iiani nggo kebakaren. Kerina erta keri ipan api. Gundari harus ka ia mbenai kegeluhen mulai dari nol. Ibas kegeluhen enda memang mbue erbage-bage silang. Tiap keluarga lit silangna masing-masing. Lit keluarga si seh kal akapkan getemna erkiteken ersura-sura lit min anak kutengah jabuna, sebalikna lit keluarga si mbue anakna, tapi perbahanen anakna sada pe la bagi ukur. Lit ndehara si tertekan batin erkiteken perbulangenna la setia. Lit anak mulai kin kitik-kitik nari nggo tadingken bapana, lit ka pe anak lit bapana tapi bapana dahinna minem-minem lalap. Lit ndehara si mbaru denga mupus anakna si pertama, tapi seminggu kenca idilo Dibata ka perbulangenna erkiteken kecelakaan. Lit perbulangen si tiap bulan harus naruhken ndeharana cuci darah janah kerina gajina ipake guna pertambar ndeharana. Adi bage ngidah keluarga sideban, mungkin rukur kita seh kal beruntungna keluarga e, la ngadapi perbeben. Memang darat nari tempa biasa-biasa saja, tempa lalit persoalen. Tapi, situhuna tiap keluarga lit persoalenna jine.

Pdt. Andreas Pranata Meliala

GBKP Rg. Cibinong

Nats : Markus 10:13-16

Thema :

 “Pelepas Anak-Anak E Reh Ndahi Aku Dukungen Ku Piara”

Anak eme pemere Dibata. Sayangna, maun-maun la si bahan ia bagi pemere Dibata ibas kegeluhenta. Alu la sisadari, mungkin mbue kita muat hak-hakna. Bahan PA enda ngerana kerna uga seharusna kita memperlakuken anak.

Latar belakang kalak si ibaba ntah pe reh man Jesus biasana eme erkiteken sakit. Misalna saja sanga jelma sinterem ngidah Jesus sangana erdalan i tepi danau dano Galilea, nterem jelma reh maba kalak cempang, kalak pentang, kalak silanai banci ngerana, rsd, emaka itamakenna ibas nahe Jesus. Bage ka pe sanga Kristus ibas Genesaret, bage itandai kalak e Jesus, emaka kerina kalak sakit ibaba ku Ia. Hal si seri pe terjadi sanga Jesus sangana i Kapernaum. Ibas buena kalak si reh ndahi Ia, reh me empat kalak si maba temanna man Jesus alu cara menjebol atap rumahna.

Berbeda ras kerina cataten idatas, sekali enda lit kalak maba anak-anak man Jesus. Lalit indikasi maka anak-anak e sakit. Ketedehen orangtua anak-anak e gelah Jesus masu-masu anak-anak e. Bagi tan Jesus si dem kuasa e mpepalem kalak sakit, bage ka me ia kerina ngarap gelah tan si seri e pe masu-masu anak-anak e.

Tapi ajar-ajar merawa. Perlu iinget maka paksa sie Jesus mbaru denga ngajarken kerna ngulihken teman nggeluh (perceraian) si berbeda ras konsep pada umumna paksa sie. Hal enda erbanca bingung ajar-ajar. Bahkan ibas Kitab Matius icatat maka ajar-ajar e ngerana man baNa “adi bage kin, ulin me la erjabu”. Sada komentar si nandaken ajar-ajar e la siap ngaloken pengajaren Jesus. Ibas kebingungen e rempet situasi jadi gejek erkiteken kerehen anak-anak. Mbue denga ibas kita enda butuh ketenengen sanga ngadapi stres. “Harap tenang ada ujian” bage me biasana tulisen si oge kita. Erkiteken terlalu fokus kita kerna sura-suranta, ajar-ajar gagal guna nandai sura-sura Dibata. Tempa-tempa tulakna anak-anak e, Kristus malah ngalo-ngalo anak-anak e, idakepNa, janah ipasu-pasuNa.

Agustinus sekalak Bapa Gereja mereken pengaruh cukup mbelin ibas kegeluhen sejarah gereja. Ia tubuh ibas tahun 354 i Tagaste Afrika Utara. Padahal masa laluna seh kal melketna. Tapi nandena Monika la ngadi-ngadi notoken ia gelah ia nggeluh ibas pertobaten. Tapi pertoton nandena kepeken labo mis kal berhasil. Tapi nandena eme nande si megegeh guna terus notoken Agustinus. Sanga Monika ertoto ibas gereja janahna ngandung, reh me Uskup Ambrosius ngapuli Monika janah ngerana ia man Monika “seorang anak yang begitu banyak didoakan dengan air mata, mustahil akan binasa”. Kedungenna pertoton Monika ialoi Tuhan. Agustinus bertobat, emaka iperidiken Uskup Ambrosius ia ibas tahun 387 sanga umurna 33 tahun. Ibas hal enda banci siidah Monika nggo banci maba anakna man Jesus guna ipasu-pasu ras ipake sebage alat ibas tan Tuhan.

Tentuna labo salah lalap kita notoken gelah anak-anakta sukses ibas studi, ibas pendahin, ibas ndarami teman nggeluh bagepe ibas perjabunna. Tapi adi labo kita tutus guna jumpa secara pribadi ras Jesus, maka kerina kemalemen ate ras kesuksesen anak-anak e labo erguna. Ibas hal enda rusur kita gagal guna maba anak-anak secara pribadi man Jesus, erkiteken kita jine kepeken lenga jumpa ras Jesus secara pribadi. Padahal anak-anak perlu teladan arah sikap ras perbahanen orangtuana. Mungkin gagal anak-anakta e guna iajarken, gagal megiken rananta, tapi situhuna la pernah ia gagal ngusih perbahanenta selaku orangtuana.

Ibas salah sada negara bagian Amerika Serikat ilaksanaken perlombaan ganda. Peserta harus ngasup erlangi, ersepeda ras kiam alu la ngadi-ngadi. Sekalak peserta ndaftaken anakna si berkebutuhan khusus. Anakna la banci ngerana ras la banci tedis apai ka erdalan. Tapi bapana seh kal atena kelengna man anakna e. Sanga panitia perlombaan e nulak anakna e, bapana ngerana maka ia sindalani kerina pertandingen e janah igendongna anakna e. Kedungenna bapa ras anak e ngikuti pertandingen si seh kal beratna e. Pertama, bapa e harus maba anakna erlangi ibas jarak si cukup ndauh. Peduaken, bapa e harus maba anakna ikut ersepeda. Peteluken, bapa e harus maba anakna kiam ibas kursi roda. Kerina pertandingen e ilakoken  alu dem kekelengen ras semangat gelah anakna ermeriah ukur ras mehaga i lebe-lebe jelma sinterem. Kedungenna bapa ras anak e banci ngelewati kerina jenis pertandingen janah ia banci menang ibas pertandingen e.

Sanga kekelengen Jesus ndemi pusuhta selaku orangtua, maka la pernah kita mela guna ngakui kekurangen ras kelemahen anak-anakta. Sebalikna kekelengen Jesus e mendorong kita guna memanusiakan anak-anakta secara utuh. Orangtua si idemi alu kekelengen ras kepentaren aras Jesus, la terjeng mereken fasilitas man anakna secara materi. Tapi selaku orangtua si idemi kekelengen Tuhan Jesus, labo ka tutupina kesalahen anakna. Sebalikna orangtua si pentar ajarkenna anakna guna pang ngakui kesalahenna. Erkiteken cara pengajaren si benar arah nandena, Agustinus nggo bertobat janah jadi sekalak pemimpin gereja.

Gundari tuntuten kekelengen Tuhan Jesus si erbanca pusuhta jadi lembut, si memotivasi kalak guna ngelawan kerina bentuk kekerasen, memotivasi anak-anak guna ngkelengi teman manusia ibas prinsipna merupaken dahin utama orangtua. Adi selaku orangtua kita gagal guna maba anak-anak jumpa ras ndatken pasu-pasu ibas Tuhan Jesus nari, maka anak-anakta rentan ndabuh ibas erbage-bage tindaken kekerasen. Banci siidah anak-anak Palestina si nggo iajarken guna maba senjata api. Banci ka pe siidah anak-anak si lalit ibas ia kekelengen, ngisi kekosongen geluhna alu narkoba.

Janah adi lalit kekelengen Kristus ibas kita, kita pe selaku orangtua banci jadi monster nandangi keluarganta. Kerna sienda Kata Dibata justru naksiken uga tokoh Kristus selaku Juruselamat justru reh ras nempatken anak-anak sebage contoh si ipake guna memahami Kinirajan Dibata (ay. 14). Kata Dibata naksiken kegeluhen anak-anak si lugu ikataken Tuhan Jesus sebage si mpuna Kinirajan Dibata. Kinirajan Dibata la pernah iwarisken man kalak si la pinter perukurenna.

Erkiteken sie sope kita maba anak-anak man Jesus, marilah kita lebe nggit guna ipasu-pasu Tuhan Jesus. Tapi apakah kita nggit reh ngadap man baNa, lit ibas kita pusuh si bersih, si bujur janah si nggit ngkelengi Tuhan? Adi kita nggo ipasu-pasu Tuhan maka pasti me kita pe jadi pasu-pasu man anggota jabunta.

Ibas tahun enda, ilakoken PIARA (Pesta Iman Anak Dan Remaja). PIARA enda jadi sada kesempaten anak-anakta jumpa ras Dibata bagepe ras teman-temanna. Secara khusus thema PIARA tahun enda eme nggeluh ibas kesalingtergantungen sada nandangi sidebanna; mediate nandangi teman, bagepe nandangi lingkungen. Ibas PIARA teremen anakta tading ibas tenda. Kecibal enda mabai anak-anakta nggeluh sederhana ras kebersaman. PIARA mabai anakta mediate nandangi kalak sideban, jadi kalak si paguh ngalaken erbage kecibal si terbatas. Kegeluhen si mediate erkiteken nggejap keleng ate Dibata jenari icidahkenna man teman-temanna.

Pdt. Andreas Pranata Meliala

GBKP Rg. Cibinong

Nats : Pengerana 12:9-14

Tema : 

 “Ranan Si Pentar”

 “Adi ngerana la nggalar”. Kuan-kuan enda mungkin nggo rusur si begi, emaka kai pe banci ibelasken kalak asa atena, asa puasna, kai pe ibelaskenna, lalit si ngelarangsa. Ngerana sitik ntah mbue, gendek ntah gedang lalit aturenna, emaka kai pe banci ibelaskenna. Emaka nggo terkuan “peten ngerana asang man” perban mbuesa ia ngerana dingen meriah akapna ngeranai. Saja perlu ka nge kita njaga maka ranan si belasken kita e la erban ceda pusuh kalak, la erbanca nembeh ate kalak ibas kita erbelas.

Penulis Kitab Pengerana erban sada resume kerna kegeluhen secara umum erpalasken pengalamen pribadina. Mulai arah bindu 1 seh ku bindu 12, bahan PA enda merupaken bagin akhir arah kesimpulen si ibenaken mulai bindu 1. Mbue kalak salah memahami Kitab Pengerana alu ngataken penulisna isina pesimis nandangi kegeluhen enda alu mulih-ulih ngataken: “kerinana ibas geluh enda eme sia-sia”. Memang payo enda salah sada tema teologis si rulih-ulih ibas Kitab enda. Tapi labo e ngenca, salah sada tema sideban si iulih-ulihi penulisna eme “Erkemalangen man Dibata”. Emaka adi sipersada dua tema ndai jadi me: “kerinana ibas geluh enda eme sia-sia, erkemalangenlah man Dibata”, janah adi ibalikken pe susunenna, maka tetap nge “erkemalangenlah man Dibata” ras “kerinana ibas geluh enda eme sia-sia”. Kerinana ibas geluh enda memang sia-sia, tapi erkemalangen man Dibata ndauh ngelebihi kerinana ibas geluh enda. Erkiteken Dibata ndauh ibas geluh enda janah Ia kap si nepa geluh enda. Gelah ula sia-sia, erkemalangenlah man Dibata.

Kitab Pengerana fokusna eme kerna kerinana ibas geluh enda, termasuk kalak bujur ntah pe la bujur, pasti masap. Erpalasken pemahamen enda, penulis Kitab Pengerana mpebagesi kepentaren (Ind. Hikmat) alu ngataken maka adi wari ciger denga sesekalak harus ngenanami kegeluhenna alu la harus ngelakokenca alu hal-hal si justru banci erbanca ia cilaka janah erkiteken sie erbanca ia ndauh arah kesenangen nggeluh situhu-tuhu. Nginget kerna nggeluh enda la menentu ntah pe la stabil janah nginget maka manusia pasti ngadapi kesia-sian geluh erkiteken erbage-bage hal, kepentaren si uga nge si iperluken kalak ibas ndalani kegeluhen alu la ngelanggar undang-undang moral si nggo isepakati manfaatna guna kegeluhen? Apakah kepentaren negatif nandangi kegeluhen, seh maka lanai ternanami? Atau bersikap terlalu positif nandangi kegeluhen seh maka ncedai kegeluhen e jine? Tapi ula min seh ngelakoken hal-hal si erbanca usaha ngenanami kegeluhen e la bermanfaat erkiteken e lebih memuasken arah ngenanami kegeluhen alu la terhormat. Ngenanami kegeluhen alu terhormat eme ngehamati Dibata ibas ibadah ntah pe nepati janji man kalak sideban, janah alu la mpebelin-belin erta kebayaken si lit ibas ia. Ngenanami kegeluhen alu erkemalangen man Dibata ras undang-undangna. Ngenanami kegeluhen si bage si igambarken Penulis Kitab Ende-Enden Salomo uga sekalak anak perana ngkelengi si atena ngena, bagepe sebalikna. Penekanen Kitab Pengerana enda eme lalit si bertahan ibas geluh enda, emaka nanamilah geluh enda lebih mehuli ilakoken alu cara si bermanfaat asangken ncedai, janah si la  ngelukai dirinta bagepe ngelukai kalak sideban (khususna ibas mpeseh ranan). Man sada generasi si kebenen kesempaten mengungkapken potensi pribadi manusia ibas erbage-bage bentuk umpamana ndatken pendahin, kesejahteran geluh bagepe jaminen masa depan, ntah pe generasi si ndatken kesempaten e, pesan penulis Kitab Pengerana enda perlu ipahami ras ipegeluhken.

Piga-piga penafsir Kitab Pengerana enda umumna setuju maka Kitab Pengerana 12:9-14 merupaken pembelaan sekalak murid man guruna. Tapi, ayat 12-14 teridah ije merupaken tambahen sekalak editor si agak keberaten alu pemahamen-pemahamen Pengerana si rusur kal la ngikutken rumusen ortodoks si nggo irumusken generasi sebelumna. Kritikenna man Pengerana isehkenna secara umum: “Kitap lalit tampukna, janah melala erlajar mahanca latih daging”. Tapi, si ngoge kitap e meteh maka kitap si imaksudken eme Kitap Pengerana enda. Adi sipergermetken si enda maka penulis Kitap Pengerana enda menyadari maka geluh ras mate merupaken dua kinata si lebih luas asangken perumusen-perumusen si ortodoks ras si nggo ibakuken. Rumus-rumus ortodoks la banci menambah kai pe ibas kegeluhen, ras la ba banci ngurangi sitik pe kerehen malekat kematen. Alu kata-kata si isina skeptis ras pesimis, Pengerana atena menyadarken kita maka labo rumus-rumus ortodoks si ngkuasai geluh ras mate, tapi Tuhan Dibata jine. Kerinana eme sia-sia, tapi ibas sie kerina lit Tuhan janah erkiteken sie banci sikataken bujur kerna geluh si seh kal gendekna enda, sisadari seh kal rapuhna manusia, tapi sekaligus seh kal ulina Tuhan janah seh kal tebuna geluh enda man dalanen.

Piga-piga kalak beranggapen maka guna banci rembak ras Dibata ras ndatken kebadian, manusia harus nerapken bana arah kerina kesenangen geluh enda. Sebalikna, Pengerana malah menyaranken kita guna ermeriah ukur ras ngenanami geluh enda. Bage ka pe umumna kalak berpendapat maka geluh enda lit tujun tertentu, Pengerana malah ngataken geluh enda lalit tujunna. Amin pe hal sie lit, Dibata ngenca metehsa, janah Ia mpebetehkenca man banta. Erkiteken sie me, ayat 9-11 merupaken tambahen si perpudi, si mungkin sengaja itambahken murid Pengerana enda guna membela pendapat Pengerana enda si rusur bertentangen ras pendapat jelma sinterem paksa sie. Bagin enda ngataken maka selain Pengerana e pentar, ia pe ngajarken pemeteh man kerina jelma. Maksudna eme Pengerana sama sekali la atena erbanca ceda kiniteken kalak, tapi gundari erban penungkunen sada hal si mungkin nggo ianggap mapan ibas masyarakat. Tapi, tetap saja kai sinilakoken Pengerana e ianggap piga-piga kalak sebaga sada hal si mengganggu. Enda seri bagi adi lit si nungkun lit nge ntah lang Tuhan e? Man kalak si ergama la seri ras kita, khususna ia si lit sikap fanatisme sempit, tentu penungkunen enda eme sada hal si mengganggu. Murid Pengerana membela guruna alu dua alasen. Pertama, atena ngataken maka Pengerana enda situhuna la asal ngerana, tapi nggo iukurken ntah pe irenungken lebe kerinana. Tujunna eme ngajarken pemeteh gelah kalak meteh kerna kinata kegeluhen enda situhuna. Kai siniajarkenna e merupaken ulih ibas ia ertimbang, menguji, ras menyusun alu mehuli. Peduaken, kebenaren si isehken banci jadi sada hal si ncedai. Sanga manusia erdosa, manusia lanai banci muniken kesalahenna. Ia lanai banci terbuka ras ngaloken kalak sideban ibas kerina keterbukaanna. Alu mengungkapken kinata situhuna, labo maka Pengerana alu sengaja atena ncedai ukur kalak arah kai si ikatakenna (thema), tapi erkiteken ia me sekalak guru si pentar si lebih asangken kalak sideban, janah erkiteken sie me ia ngajarken kalak alu si mehuli. Bahkan, guna sie me sengaja ia milih kata-kata si ntabeh man beginken (ay. 10). Amin pe sie kepeken kai si ikatakenna ceda kalak si megisa (la teraloken kalak), sie erkiteken ia ngerana kerna kebenaren alu bujur (ay. 11). Ibas ayat 11 ranan kalak pentar iandingken bagi ciken janah ciken ipake guna mabai asuh-asuhen kempak dalan si benar. Adi asuh-asuhen sangana ibabai, maun-maun asuh-asuhen e banci kena pekpek. Enda tentu la bagi ukur, tapi tetap iperluken gelah asuh-asuhen e mengarah ibas dalan si benar. Ranan kalak si pentar mungkin memang banci ceda ukur kalak si megisa adi la siap, tapi sie isehken guna mabai kita lit ibas dalan si benar. Amin bage gia kita tetap harus kritis ras metenget (ay. 12). Erkemalangen man Dibata ras ncikep paguh perintahNa. Erkiteken Dibata pasti maba tiap perbahanenta ku pengadilen si mehuli ntah si la mehuli. Nanamilah geluh enda alu bertanggung jawab. Kedungenna, Pengerana atena kita jine si ngerenungken kai si nggo ikatakenna e. Ngidah geluhta jine, nungkun janah kedungenna sicubaken njabapsa, nggo nge payo kai sinilakoken, kai sinibelasken kita.

Pdt. Andreas Pranata Meliala

GBKP Rg. Cibinong