Suplemen Mamre : Matius 4 : 1 -11 ; Tgl 07 Februari 2021

(Spiritualitas Jesus Jadi Karakter Mamre)

Ogen   : Matius 4:1-11

Tema  : “Sembahlah Tuhan Dibatandu”

KATA PERLEBE

Anthony Collins sekalak Filsuf Deisme arah Inggris nari, ibas sada wari ia jumpa ras sekalak kristen si berkat atena ku gereja. Emaka cakap-cakap kalak enda, nungkun ia man kalak kristen e “Dibata si sembah ndu e Mbelin ntah Kitik?” Kalak kristen ndai jababsa nina, “dua-duana”. “Dibata e ‘Mbelinen’ asangken langit si mbelang janah Dibata e ‘Kitik’ maka ia banci ringan ibas pusuh ku”. Megi jababen enda sengget kel Anthony Collins, seh maka itulis na maka jababen kalak kristen ndai lebih erpengaruh asangken kerina buku Filsafat si pernah i ogena. E maka si jadi penungkunen man banta, “Uga belinna Dibata e man banndu?” Jababenna e nentuken kinitekenta ras siempengaruhi kerina kegeluhenta kerna penandaita kerna Dibata, ise Dibata e? Uga Ia belinna Ia bas geluhta? Adi siukuri uga buena kearun ate bas geluhta,maka salah sada penyebabna eme ibas kita la tek Dibata ngasup engkawali kita.Melala kalak kristen ndalani geluhna tempa-tempa Dibata e lalit. Lit nge Dibata e? Lit nge pengaruh Dibata e bas geluhta? Apai nge siakap lebih susah La Erdibata ntah La Ersen ?

Enterem jelma gelisah kel adi la jemak HP sada wari tapi biasa-biasa akapna adi la ngoge alkitab kidekah enda, ntah la beribadah ibas wari Minggu ntah pe la ertoto. Uga kin penembahenta man Dibata sedekah enda, terlebih ibas paksa-paksa pandemi covid-19 enda? La lah kita enggo la nai njadiken Dibata sebagai pusat penembahenta. Melala si bahan alasenta gelah la ikut ibadah/kebaktin, subuk erkiteken on line/live streaming la ninta bagi ibadah, make zoom siakap bagi mekarus, ras sidebanna. Emaka arah bahan PA Mamrenta enda ibabai kita guna tetap setia ersembah man Tuhan saja, amin gia melala perbeben singupuh kita. Mamre harus tetap jadi ‘imam’ ibas jabu singusih spiritualitas Jesus jadi karakterna.

PEMBAGESI TEKS

Ibas Injil Matius nuriken maka ope denga Jesus menaken pendahinNa siibenaken arah Galilea nari, Ia harus mentasi sada proses percuban i gurun pasir. Janah arah pengalamenNa enda mereken pengajaren ras makna man banta eme kerna:

1.   Olasibahan pengarapenta kempak Dibata erkiteken hal-hal sisementara (ay. 3-4)

Kenca Jesus erpuasa empat puluh wari empat puluh berngi maka enggo igejapNa melihe. Ituriken ijenda kerna sisi kemanusian Jesus, tapi iblis reh encubai Ia alu menyentuh sisi ke-Allah-an Jesus alu ngataken, “erkiteken Kam Anak Dibata salihken dage batu enda jadi roti”. Tempa-tempa ate iblis ngataken “genduari enggo kam melihe, janah cara si cepat ras mesukah ndatken pangan eme arah makeken kuasaNdu guna nalihken batu-batu enda jadi roti”. Tapi ngaloi Jesus, “labo alu roti saja manusia nggeluh, tapi arah tep-tep kata si ibelasken Dibata”.

Manusia memang perlu kal kerna pangan ras hal-hal jasmani sidebanna (status, kinibayaken, jabaten), tapi kerina enda labo sipentingna. Kita nggeluh labo terjeng lit si man pangan ras hal-hal jasmani sidebanna. Tapi erkiteken Kata Dibata sijadi jaminen man manusia, maka nina icukupiNa kai siniperluken kita. Iblis terus encubai manusia alu strategina makeken hal-hal jasmani guna encubai kita ras erbahca aru ateta adi langa si datken kai sinisuraken kita kerna erta doni enda. Emaka melala kalak tergoda rayuan iblis, jenari ngelakoken jalan pintas ras menghalalken kerina cara guna ndatken kerina erta doni enda, amin gia e la ngena ate Tuhan.

2.  Ola sipaksaken Tuhan guna nampati kita rikutken cara ras waktu sinisuraken kita (ay. 5-7)

Siitawarken iblis man Jesus ibas percuban sipeduaken eme ‘demonstrasi mujizat yang spektakuler’. Ibabai iblis me Jesus ku Jerusalem janah isuruhna Ia tedis i babo anjung-anjung Rumah Pertoton. Jenari nina man Jesus, “adi Anak Dibata kin Kam, dabuhken baNdu ku teruh, sabab lit tersurat i bas Pustaka Si Badia begenda: ‘Isuruh Dibata  kap malekat-malekatNa reh njagai Kam, itatangna nge Kam alu tanna gelah NaheNdu pe la terantuk ku batu”. Ayat 6b enda ibuat iblis erpalasken Masmur 91:11-12. Tapi Jesus ngaloi iblis nina, “Ola cubai Tuhan Dibatandu”.

Melala kal kalak Kristen (Mamre) simemaksa Tuhan guna nampati ia alu mujizat-mujizat si luar biasa sanga ia ngenanami erbage perbeben ras masalah. Adi la terjadi mujizat e man bana, erbahansa la nai ia tek man Tuhan jenari mobah kinitekenna. Arah kai sinikataken Jesus man iblis ndai, ateNa njelasken maka Kata Dibata isehkenNa man banta labo guna mengontrol Tuhan ras memaksa Tuhan guna ngelakoken mujizat bagi ate-ateta ntah sura-suranta saja. Kata Dibata labo guna icubai tapi guna iteki ras i imani gelah manusia erlajar erpengarapen janah ngendesken dirina man Tuhan saja. Bereken Tuhan erdahin ibas geluhta guna nampati ras mereken simehulina man banta ibas paksa ras cara Dibata. Sabab ibas kita memaksa Tuhan guna nehken mujizatNa ibas caranta, maka i je me situhuna kita meraguken kuasa Tuhan.

3.  Ola sigantiken posisi Tuhan ibas kegeluhenta alu dibata-dibata sideban, tapi tetap jadiken Tuhan siutama ibas geluhta (ay. 8-11).

Tupung iblis nuduhken man Jesus kerina kerajan doni ras kebayakenna, jenari nina iblis man Jesus, “kerina kerajan doni enda ras kiniulinna kubereken man baNdu, adi nggit Kam erjimpuh nembah man bangku”. Tapi ngaloi Jesus nina, “Sembahlah Tuhan Dibatandu, janah Ia saja ngenca patut man sembahen”.

Jesus ngangkai maka ope denga Ia i cubai i gurun pasir, perlebe Ia ngaloken tanda peridin i Lau Jordan janah kenca Ia iperidiken e terbegi sora sijadi proklamasi ntah pe pernyataan maka Ia me Anak Dibata janah ibas Ia lit kuasa. Ibas pasal terakhir injil Matius enda pe ikataken Jesus, “Nggo ibereken Dibata man bangKu kerina kuasa i Surga ras i doni”. Enda nuduhken maka otoritas ras keilahian ibas Jesus ipetangkasNa. Emaka tupung iblis encubai Ia, ngasup Jesus menang ngelawansa sabab ibas Jesus lit kuasa janah Ia me Tuhan simada sinasa litna.

APLIKASI

·           La lit manusia (Mamre) singgeluh i doni enda si la ngenanami godaan ras cubaan ibas iblis nari, terlebih kerna kenikmaten doni enda. Subuk kerna godaan arah mata, arah babah bagepe sura-sura doni sidebanna; godaan pangkat ras gila hormat, bagepe kerna erta doni enda. Emaka perlu kita erlajar arah Tuhan Yesus singasup menang arah kerina percuban doni enda.

·           Penandaita ras pemahamenta kerna Dibata menentuken ku bas kualitas kinitekenta man Tuhan

·           Dibata sisembah kita eme Dibata singerajai ras sinjadiken sinasalitna. Ia me ngenca sierkuasa seh rasa lalap, emaka man baNa saja kita nembah.

·        Kerajan doni ras kerina kemegahen doni enda kentisik saja me kap, ermasap-masap. Tapi kerajan Dibata tetap rasa lalap, emaka daramilah lebe kinirajanNa, janah dalankenlah si ngena ateNa, maka icukupiNa kai si perlu man banta (bnd. Matius 6:33)

·     Enda merupaken sada perintah man kalak kristen khususna Mamre gelah nggeluh monoteis. Nggeluh ibas sada Dibata saja eme Dibata ibas Yesus Kristus. Jadi penungkunen man banta. Ngkai maka kita arus ersembah man Dibata saja. Engkai la banci ersembah man Dibata sideban? Kita ersembah man Dibata saja, erkite-kiteken Dibata e patut isembah. Dibata siisembah kita eme Dibata sinjadiken langit ras doni, bagepe kerina isina. Dibata singgo nelamatkan kita ibas dosa nari, ras tetap nemani ibas kerina kegeluhenta. Adi ersembah man dibata-dibata sideban, si dat kita eme kesenangen-kesenangen doni ngenca, tapi e kerina sesaat ngenca.

·       La lit dibata sideban bas kegeluhen Mamre ras jabunta. Ersembah man Dibata saja, la saja terjeng tek ras ngikuti kebaktin minggu, PJJ ras PA, tapi arus teridah ibas kegeluhenta tep-tep wari. Ersembah man Tuhan arus totalitas geluhta. Emaka si arus silakoken eme mehamat ras nggeluh ketergantungan man Tuhan saja.

Pdt. Irwanta Brahmana

(GBKP Rg. Surabaya)