Thema        :

Kinitekenku labo bali ras kinitekenndu

Tujun        :

Mamre ngasup :
1.    Ngidah uga kiniteken Elkana selaku imam ras Hanna selaku diberu
2.    Nuduhken kiniteken selaku Imam bas jabu ras ngergai kiniteken ndehara

 

1.  Elkana sekalak perbapan sitading i Rama, ia suku Epraim janah isingetken gelar bapa ras nandena. Arah teridah maka si Elkana enda kalak si erkiniteken radu ras keluargana. Emaka kerina aturan agama ipatuhinakal ija setiap tahun ia nehken persembahen man Dibata ku rumah pertoton i Silo. Janah ibas nehken persembahen ikut sertakenna pe anak jabuna/ndeharana duana, eme Hanna ras Penina. I Silo  lit Imam gelarna Eli. Ia ipercayaken guna ngaturken kalak sinehken persembahen man Tuhan. Ibas ia nehken persembahen enda maka iaturkenna man anak-anak ras ndehara guna nehken persembahen man Tuhan. Tapi Penina pe ndatken bagin ras Hanna. Saja Hanna lenga lit pupusna emaka rusurkal ia tersudutken Penina (ceda kal ukur Hanna rusur ibahan Penina). Tapi Hanna tetap njaga hubungen ras Dibata, la putus tentuna pe hubungenna ras perbulangenna Elkana pe tetap mehuli, sebab Hanna tek maka dibalik deritana, lit Dibata si banci mereken jalan keluar. Janah Elkana pe encidahken ukurna mehuli nandangi Hanna (Ay.8)
2.  Hanna encidahken ukurna, si rusur ia isindir-sindir Penina. Emaka ibabana kerina ibas pertotonna man Dibata ibas rumah pertoton i Silo. Seh kal atena cedana tangis ia (Ay.9-10)
   Ibas pertotonna : mindo ia man Dibata gelah Dibata megiken pertotonna nina :
   a.    O, Dibata simada Kuasa
   b.    PerdiatekenNdu aku
   c.    Nehenlah kesusahenku
   d.    Ingetlah aku/ula lupaken aku
   e.    Adi ibereken Kam man bangku anak dilaki, erjanji aku maka kuendesekn ia man baNdu kidekah gelihna, janah bukna ndigan pe la ipangkasna.
   Luar biasakal pengakuan Hanna enda man Dibata. Tantangen ihadapina ka ibas Imam Eli nari, iakap Iman ia mabuk : pengadi perlangkahndu sibagena. Ngadiken minem-minem jenari pejore-jore ukurndu mulihi. Hal enda ihadapi Hanna menam lanai lit ingan ngadu-ngadu; perbulangen pe megati la mengerti, kiduana rusur naling-naling, Imam Eli ngataken ia mabuk. Tapi Hanna tutus ertoto, sebab igejabna aminna gia manusia lanai jadi teman tapi Dibata banci jadi teman situhu-tuhu.
   Emaka ijawabna : Aku labo mabuk pa. aku ertoto nuntungken kerina kesusahenku man Tuhan. Aku labo diberu si la mehuli. Tapi mbuekal kesusahenku emaka ertoto aku.
   Emaka ipasu-pasu Imam ia, alu ngataken : Mulihlah alu dame, ibereken Dibata Israel man bandu kai siipindondu. Luar biasa pertoton kalak si erkeluh-kesah ibegiken Dibata. Meriahkal ukur Hanna lawes ia, man ia, janah lanai atena ceda.
3.  Arah enda si idah kuga hebatna kiniteken Hanna, aminna gia kerina jadi imbangna tapi Dibata tetap nemani ia janah Dibata njawab pemindonna, janah seh sura-surana, emaka malemkal atena. Arah sienda siidah maka kiniteken Hanna bedakal ras kiniteken Penina, Elkana, sebab Penina ras Elkana rajin ku rumah pertoton i Silo, tapi tetap ka nge ibahanna ceda ate Hanna (Ay.7). bahkan Imam Eli pe menganggap Hanna mabuk, diberu gutul. Tapi Hanna menghadapi alu pasrah man Dibata. Dibata menjawab kerina pemindonna.                                                                                                                                       Man banta pe Mamre, maka ibas kegeluhen enda erbage-bage sinihadapi kita, tapi inget maka Dibata tetap nemani ras mereken jawaben man banta. Namun ula kal kita bagi Penina tapi bagi Hannalah kita.

Salam,
Pdt. A. Brahmana
081317054961

 

Thema    :

Kam Manusia Simbaru

Tujun        :

Mamre Ngasup :
1.    Erjuang nadingken biak-biak geluh sindekah
2.    Nggeluhken kegeluhen si mbaru selaku anak Dibata

 

Kenca enggo manusia ndabuh ku bas dosa, maka manusia enggo bene bas ia Kemuliaan Dibata. Emaka lanai lit dalan pulah adi la kin Dibata e reh guna njumpai manusia ndai. Arah enda me maka reh Tuhan Yesus Kristus ku doni enda guna mulihi manusia si enggo erdosa ndai gelah manusia e banci mulihken jumpa ras Dibata mulihken. Gelah  kemulian Dibata banci ngiani/ringan itengah-tengah manusia.

 

Manusia simbaru eme manusia si enggo ngaloken Tuhan Yesus sebagai Juruselamatna, janah Ia enggo itebusi arah dareh Yesus si enggo itebusi arah dareh Yesus sienggo mambur i kayu persilang ras darehNa si mambur e mbersihken kerina dosa-dosa, maka alu bage kerina perbahanen manusia si gel-gel nimbah Dibata enggo ipulihken Yesus Kristus.

 

Emaka arah enda kita kerina sebagai mamre/perbapan enggo meriahkal ukurta erkiteken kerina kita enggo nadingken biak-biak si la ngena ate Dibata, si nimbak Dibata ibas kegeluhen enda. Emaka biak-biak doni enda enggo itadingken janah biak simbaru enggo jadi penyemangat bas kegeluhen.
Kegeluhen sindekah sinilakoken kita eme :
•    Erlua-lua
•    Erlagu la mehuli
•    Hawa nafsu
•    Sura-sura si jahat
•    Rangap
Igambarken Paulus eme nggeluh ercebah bas kubang dosa. Emaka merawa Dibata man manusia.

Tapi kenca reh Tuhan Yesus Kristus ku doni enda, maka hubungan manusia ndai ipelimbarui mulihi. Emaka manusia ndai enggo iperdameken ras Dibata. Janah kalak si enggo iperdameken ras Dibata maka enggo iambengkenna :
•    Merawa
•    Ngamuk
•    Segat ate
•    Lanai cekurak
•    Lanai melasken cakap kotor
•    La perbual
Enda me manusia simbaru janah terus ipelimbarui rikutken tempas Dibata. Janah kalak si terus ipelimbarui maka ia me guna nandai Dibata alu serta.

 

Arah kata Dibata si seh man banta sendah ngingetken maka kerina biak-biak si ndekah e ulanai si lakoken. Sebab geluh simbaru enggo sialoken ibas Dibata nari. Emaka adi enggo sialoken maka ulanaikal si ulihi erbahan si la mehuli si la ngena ate Dibata.
Kegeluhen simbaru ibas Tuhan eme :
a.    Tidak berjalan dijalan orang berdosa (Mzm. 1:1)
b.    Tidak hidup dalam perkumpulan orang berdosa (Mzm. 1:5)
c.    Tetap nggeluh bas perdamen (Mrks 9:50)
d.    Selalulah berdamai dengan lawanmu (Mat 5:25)
Guna ndalanken sienda harus tetap nggeluh ibas Yesus Kristus sebagai Juruselamatna

Kesimpulan
1.    Ambengkenlah biak-biak si la mehuli ibas kam nari
2.    Gelah lanai reh rawa Dibata maka kita tetap ipelimbarui erpalasken kata Dibata
3.    Nggeluh ibas Tuhan Yesus katawari pe, janah tetap ngelakoken kai si ngena ateNa

Salam,
Pdt. A. Brahmana
081317054961

 

Thema:

”Mamre Idola”

 

Kata Perlebe

Erti kata idola sue si ijelasken ibas Kamus Besar Bahasa Indonesia e me “Orang, gambar, patung, dsb yang menjadi pujian”. Jadi tema Mamre-nta si ngataken “Mamre idola” e me mamre si jadi pujin, curahan perhatian, tapi makna kata enda langa bo tentu kerina kalak banci ngalokenca. Sesekalak jelma banci jadi idola man si “A” tapi langabo tentu teraloken si “B” jadi idolana, ras kai si jadi pujin e langa bo jelas; mungkin model bukna, bajuna, sorana rende ras sidebanna. Ibas Alkitab labo lit i idah kami kata idola tapi si ipake e me kata “teladan” si ijelasken Kamus Besar Bahasa Indonesia ertina e me: “Suatu yang patut di tiru atau baik untuk di contoh (tentang perbuatan, kelakuan, sifat dsb)”. Erti kata teladan ibas cakap karo e me usihen, enggo jelas si man usihen e eme  perbahanen, ras si lebih spesisifik mencakup sifat si jadi palas perbahanen. Jadi bahan PA nta wari enda ngajuk kita ngerana kerna Mamre si jadi usihen erkiteken lagu langkahna entah pe perbahanenna si mehuli bagepe pusuhna si bersih (tulus).

 

Pembahasen teks

Kerina kalak si erkiniteken i lebuh gelah jadi usihen “Janah kam, i bas kai pe arus jadi usihen kerna dahin si mehuli. Tutus min atendu dingen ergiah giahlah ukurndu ngajar” (Titus 2:7). Perberita si meriah adi langa ia ngasup njadiken dirina jadi usihen kerna kata Dibata ula min ia pebenarken diri alu ngataken ”Begikenlah kai si kuajarken, dalanken kerina e alu tutus, ula inehenndu-ula usihndu perbahanenku”. Perberita si meriah arusna ope denga ia mberitaken berita Kata e, enggo min lagu langkahna mehuli, sabab kalak si mberitaken kata Dibata ope denga ia ngaloken dahin e arusna ia enggo mengalami pertobaten, gelah lagu langkahna ula jadi batu antuken nandangi berita si meriah si iberitakenna.

Kata Dibata si iberitaken perberita si meriah ipertimbangken kalak si ilayanina arah lagu langkah perberita si meriah e. Erkiteken si me maka Rasul Paulus arus mbela dirina kerna motifasina ngelai perpulungen i Korintus, gelah berita si meriah si iberitakenna ula itulak, erkite-kiteken lit perpulungen nulak diri Rasul Paulus alu ngataken Rasul Paulus perbual, iragukenna palas kekelengen Rasul Paulus (bdg. 2 Kor 1:17-2:4). Adi kerasulen Rasul Paulus itulak maka kerina pengajaren si enggo isehkenna pe itulak. Perberita si meriah labo banci berlawanen motivasina bagepen perbahanenna ras berita si meriah si iberitakenna.

 

Ibas nehken pembelanna Rasul Paulus labo alu merawa tapi isehkenna alu megah atena, sabab menurut Rasul Paulus adi lit pengaloken perpulungen e salah kerna ia e erkiteken mediate kap perpulunegn e man bana maka lit penilaianna kerna dirina ras pengajaren si isehkenna. Nina Rasul Paulus “Pusuh peraten kami naksiken maka ibas hubungen kami ras kalak si deban, terlebih lebih ras kam, perbahanen kami tetap erpalasken kinibujuren ras ukur si bersih i adep-adepen Dibata”. Kalimat enda merupaken kalimat pembuka ibas ate Rasul Paulus gedang ngerana kerna pemberitanna. Rasul Paulus mpetandaken bana kerna motivasina si bersih, man ise pe labo atena nembeh terlebih lebih ka pe man perpulungen Korintus. Kinibujuren ras ukurna si bersih e pang Rasul Paulus mpertanggung jawab kenca i adep adepen Dibata. Pembuktin kebenaren alu mbaba gelar Dibata merupaken cara meyakinken kalak gelah pembelanna ialoken. Umpamana bagi cakap anak-anak sapih–sapih ia i kesain, kira-kira nina: “Pang aku ersumpah, maka bujur kap aku ras pusuhku pe bersih kap, Dibata saksina”. Rasul Paulus erusaha meyakinken perpulungen Korintus alu cakapna si meteruk maka nina adi ngasup ia tetap rukur bersih ras mehuli perbahanenna labo e erkteken kelebihenna, tapi erkiteken lias ate Dibata si mpengasup ia ngaloken situasi e, tetap tenang ras rukur positip.

Amina Perpulungen Korinti nulak dirina tapi Rasul Paulus tetap ngaloken perpulungen e alu pusuh si bersih. Pusuh si bersih, ketenagenna ras perukurenna si mehuli e labo erbahanca Rasul Paulus meganjang rukur, tapi kerina e igejapkenna erkiteken lias ate Dibata. Emaka labo lit sura-sura Rasul Paulus gelah ia imegahken, tapi Tuhan Dibata kap si tetap arus i megahken. Kai si ibahan Rasul Paulus e pantas jadi usihen (teladan), tapi ise pe labo ka ngasup ngusih bagi si ilakoken Rasul paulus adi la kin ia nggeluh iteruh lias ate Dibata.

 

Nina Rasul Paulus “Dage kupindoken man banndu: usihlah aku” (1 Korinti 4:16). Bagem seharusna kata-kata si mpegegehi kesaksin ras pengajaren si isehken sekalak perberita si meriah, pang ia njadiken dirina jadi model pengajarenna. Seterusna siperdiateken pe tenah Rasul Paulus man Titus selaku perberita si meriah si umurna nguda denga “Janah kam, ibas kai pe arus jadi usihen kerna dahin si mehuli. Tutus min atendu dingen ergih-giahlah ukurndu ngajar” (Titus 2:7). Kalak si umurna nguda denga kurang ialoken sebage pengajar, tapi Rasul Paulus mere pengajaren man Titus, aminna umurna nguda denga adi ijadikenna dirina jadi usihen dingen ergiah giah ia ibas nehken pengajaren tentu ia ialoken perpulungen.

 

Aplikasi ras Renungen

Ngusih-ngusih gaya sesekalak jelma mungkin melala kalak si beluh tapi ngusih kiniulin perukuren, motivasi ras perbahanen si mehuli labo banci ilakoken kalak adi la kin seri si jadi palas perbahanenna e. Bagi si ituriken ibas bahan bahasenta enda Rasul Pulus enggo ncidahken palas motivasi ras perbahanenna si mehuli e me lias ate Dibata, e maka kalak si atena ngusih perbahanen Rasul Paulus arus ka ia nggeluh iteruh lias ate Dibata.

 

Kai si iadapi sekalak mamre ibas kegeluhena; ibas jabuna, ibas lingkungen pendahinna ras ibas lingkungen pergaulenna labo kerinana bagi ukur. Maun-maun jumpa hal si mngecewaken si erbahanca banci turah emosi, tapi perlu kal isadari maka arus min nilai nilai kiniteken e lebih megegeh mere pengaruh, gelah situasi si mengecewaken e la erbahanc hilang kendali seh maka merosot nilai dirina. Kualitas diri mehuli ula min erkite-kiteken si iadapi bagi ukur, tapi si iadapi bagi ukur entah la bagi ukur sekalak mamre tetap min jadi teladan, sabab kiniulinna erkite-kiteken kualitas kinitekenna man Dibata.

 

Jadi teladan labo prestasi si man ayaken tapi si penting si jadi perayaken kalak si tek e me lagu langkah si enggo teruji kebenaren ras kualitas kiniulinna.  Adi teladan si jadi perayaken maka perbahanen si mehuli banci jadi ilakoken alu terpaksa. Entah pe perbahanen si mehuli ilakoken erkite-kiteken lit kalak si ngidahsa, adi bage uga lagu langkahna adi paksa ia si sada entah la lit kalak si  mperdiatekenca? Keteladanen e me erkite-kiteken perbahanen si ipalasken jujur erkiniteken; motvasi si bersih, iadep-adepen Dibata ras iadep-adepen manusia mehuli perbahanenna.

 

Sue ras kata Dibata ibas kitab Ulangen 6:6-7; tanggung jawab sekalak bapa e me mperdiateken kata Dibata ras ngajarkenca ku isi jabuna, khususna man anak-anakna. Erkiteken si e mamre arus teraloken keteladanenna, lit wibawana (“kuasana”)  gelah ajaren si isehkenna ialoken anggota jabuna.

                                          pdt.ewgm.sitelusada-bekasi