Suplemen PA Mamre tanggal 28 Februari-05 Maret 2016, ogen Job 40:6-10

Thema :

”Ngangkai Karakter Mamre”

Kata Perlebe
Keadan si lebih baik megati erbahanca lit kalak meganjang rukur; iakapna maka ia me jelma si metunggungna. Anggap enteng ia man kalak, la ia ngasup ngergaken kalak aminna pe ndauh belinen ras hebaten kalak e asa ia. Tapi adi kalak si meganjang rukur e rempet ndabuh erkiteken sada sada hal, umpamana musibah tertentu si erbahanca kebangganna keri kerina, megati labo teralo-alosa, menurutna nginget jore geluhna labo pantas ia mengalami musibah e, protes ras mberontak me ibas ukurna. Bagem terjadi perubahen karakter sesekalak erkiteken enggo ia hebat tapi dungna lanai ergegeh maka kai pe banci saja ilakokenna sebagai pembelan dirina, sabab lanai itandaina bana, lanai itandaina kalak si deban erkiteken lanai itandaina Dibata.

Pembahasen teks
Job e me sekalak bapa si hebat luar biasa; bayak, erkiniteken ras ijagaina kal keselamaten isi jabuna. Dibata pe mbanggaken ia man si iblis nina “La lit sekalak pe ibabo doni si bagi ia (Job) patuhna ras ulina. Isembahna aku janah la lit si jahat ilakokenna.” (1:8). Arah izin Dibata reh me pengujin ilakoken iblis man Job, alu mbuat kerina ertana ras kerina anak-anakna ibas ia nari. Bagepe Job ibahanna enggo sakit sakiten. Keadan bayak-jore janah kerinana mehuli memang banci erbahanca manusia mehuli ibas penembahen ras perbahanena, bagi pendapat si iblis (1:9-11). Tapi labo sada kepastin maka kerina kalak si enggo jore ngasup ncidahken kepatuhenna bagi si Job.

Si jadi pembahasen bahan PA-nta eme turi-turin ibas peristiwa paksa Job ngenanami puncak kiniserana, bene perukurenna si mehuli ndube. Erkiteken Job mprotes Dibata ibas kiniseran si reh man bana, Dibata erperkara ras ia. Isungkun Dibata kehebaten Job sabab ia nuntut ras mpersalahken Dibata kerna kerina perbeben si ialamina.  Nina Tuhan ngaloisa “Job, kam ngelawan bangKu, Dibata si Mada Kuasa, nggit kam genduari talu, tah itoganndu denga atendu Aku?” (40:1). Arah angin si meter nari erjabab Tuhan man Job “O Job, adi dilaki kin kam.., pang kam ngatakenca maka aku la bujur, ...nalahken Aku gelah teridah kam benar? Megegeh kin kam bagi Aku? Banci kin soranNdu erlenggur bagi sorangKu? Di bage oseilah dage banndu salu kemulian ras kedolaten, uisi banndu salu kehamaten ras kehagan.” Seterusna Tuhan nuruh Job mbuktiken kehebatenna e alu naluken kalak si meganjang rukur, mpeteruksa, ngeripukkenca, nanemkenca ku teruh taneh, naluken kuda nil (40:1-24) ras naluken buaya lewiatan tinepa Dibata si megegeh (41:1-34). Mbegi penungkunen Dibata e maka dungna isadari Job kesalahen ras kinilatunggungenna iadep-adepen Dibata nina “Genduari kueteh TUHAN, maka kai pe ngasup kam ngelakokenca kai si isuranNdu seh kerina. ...pemetehku labo lit. ...kucakapken si la kuerti. Pemetehku kerna kam terjeng si ituriken kalak ngenca...perbahan si e mela kal kuakap kerna kai si enggo kubelasken, erkadiola aku, emaka kundul aku ibas abu dapur ras abu taneh.” (42:1-6).

Kalimat penungkunen si pemena si isehken Dibata man Job “Adi dilaki kin kam tuhu”. Penungkunen Dibata e nuruh Job membuktiken kehebatenna mbandingkensa ras kuasa Dibata. Bahasa anak muda jaman si gundari “Jangan omong doang..., buktikan!” Dibata nuruh Job mbuktiken kinilabujurenNa bagi si ipersoken Job. Bagepe Dibata nuruh Job ncidahken kemulianna, kedolatenna, kehamaten ras kehaganna. Kerna tuntuten Dibata e labo lit kengasupen Job mbuktikenca; sabab labo lit kemulian, kedolaten, kehamaten ras kehagan manusia adi la kin Dibata si merekenca. Manusia tanpa Dibata labo banci mulia, erdolat ras labo lit kehamaten ras kehaganna. Erga entah pe kwalitas geluh manusia lit ibas kengasupenna mpermuliaken Dibata, arah kesetianna man Dibata ibas ngaloken kerina si jadi man bana.
Selaku bapa si erkiniteken man Dibata ibas kesalahenna enggo tangkas, Job melukah man ajarenken, melukah man katanken, nggit mbegiken kata, e maka nggit ia pehuliken pendapat ras perukurenna; ipeterukna bana alu cara ngakui kerina kesalahenna ras kundul ia ibas abu dapur ras abu taneh sebagai simbol ngataken labo lit sitik pe erga geluhna, ia hina (abu simbol kehinaan), meteruk ras adi la kin iembusken  Dibata kesah kegeluhen e (bagi ibas turi-turin Dibata nepa manusia si pemena) abu kap ngenca ia.

Aplikasi  ras Renungen
Maun jadi ibas manusia hanya memiliki mental siap sedia jadi pemenang tapi la ngasup ngalo ngalo adi ia talu. Adi kalak si bage ngikuti turnamen entah pe pertandingen, adi ia menang teridah kal keriahenna, bangga kal ia, tapi adi ia talu e mis merawa, protes seh maun nggit pe ngelakoken kekerasen erkiten la akapna pas ia si kalah. Jadi pemenang atena lalap, banci kin bage?

 

Bagem lebih kurang si jadi ibas pengalamen geluh Job; asum ia ibas kelimpahen tuhu –tuhu teridah kal kehebatenna, luar biasana ibas kerina kini ulin, tapi ibas reh percuban, la ia ngasup ngalokenca, nembeh ras erperkara ia ras Dibata. Lanai isadarina maka kerina si ialokenna rehna ibas Dibata nari ras kerina si lit ibas ia tetap kap Dibata empuna. Jadi ate-ate Dibata kap adi ibuatna ateNa. Adi isadari Job Dibata kap empuna si lit ibas ia, tentu ngasup min ndai ia ngalokenca kiniseran ras kinisuina ibas Dibata muat kerina sinasa lit ibas ia. Kepatuhenna man Dibata arusna min labo itentuken pasu pasu si ialoken, tapi pe aminna kiniliten e pe ibuat Dibata arusna tetap min patuh ras mpermuliaken  Dibata.

 

Labo banci manusia mbenarken dirina ilebe lebe Dibata, bagi si tersurat ibas Roma 3:10 “Lalit ise pe si bujur ilebe-lebe Dibata”. Ise pe labo banci menang erperkara ras Dibata. Kebenaren manusia labo ngasup ngalaken kebenaren ras kemulian Dibata. Erkiteken si e sebage Mamre si sadari min maka Dibata-lah si bahan jadi fokus kegeluhenta. Kalak si njadiken dirina jadi fokus kegeluhenna ibas muat keputusen ras perbahanenna erpalasken pertimbangen kai si cocok iakapna, e maka labo ia ngasup  ngertiken hal hal si jadi man bana adi la bagi ukurna, labo teralokenna, kesusahenna megati ertambah –tambah. Persoalen si kitik pe jadi mbelin man bana. Lain ras kalak si njadiken Dibata fokus geluhna; maka keriahenna e me mpermuliaken Dibata, igejapkenna gegeh Dibata ngarak ngarak kegeluhenna, emosina stabil, megenggeng ia ibas ngalaken percuban, seh maka kerina persoalen iangkana lit ujungna ibas kemenangen.
Kalak si fokus ku dirina labo banci tetap kinitekenna, emosina ras kedamen geluhna. Situasi si berubah ubah mpengaruhi penandaina kerna Dibata, penandai ras pengharganna man isi jabuna ras teman manusia. Ibas kesalahen si ilakokenna cenderung carana ndungi masalahna bagi cara Adam ras Hawa ibas turi turin ia ndabuh ku bas dosa, ibas Dibata reh ndahi ia; isadarina kesalahenna tapi labo ia ngasup ndungi permasalahenna alu ngakui kesalahenna saja, tapi pe ibas ia ngakui kesalahenna isalahkenna ka kalak si deban guna membenarken dirina.
                              

 pdt.ewgm.sitelusada-bekasi