Suplemen PA Mamre tanggal 06-12 Maret 2016, ogen I Korintus 16:13-16

Thema :

”Mamre Si Erjaga-jaga”

 

Kata Perlebe
Lit pribahasa nina “Lukahen mbangun asangken ngerawatsa”. Tentuna pribahasa enda jadi erkite- kiteken pengamaten si terjadi isekitarta, umpamana ibas mbangun dalan, kenca enggo jadi megati lanai iperdiateken perawatenna. Perawaten e me hal si penting guna mpertahanken keawetenna ras gelah tujun si jadi alasen pembangunen e tetap jadi perayaken, la ndempar ku tujun hal hal si deban si sia-sia, janah adi banci arah perawaten banci pe ikembangken ku melala tujun si terulin. Ibas kerina pembangunen, entah e pembangunen bangunen, dalan ras sidebanna, pembangunen organisasi, pembangunen jabu, pembangunen gereja ras sidebanna  adi la irawat labo banci awet, kwalitasna pasti menurun ras la tepat sasaren.

Pembahasen teks
Perpulungen Korinti e me perpulungen bekas panteken Rasul Paulus. Sebage Rasul si ertanggung jawab maka kenca perpulungen e ipantekina la ia lupa ngerawatsa ras ngusahken kemajun perpulungen e. Erkiteken si e, aminna pe ia i Epesus (16:8) lalap nge idahikenna kemajun perpulungen Korinti, e me arah ndatken berita kerna perdalanen pelayanen ras persolen persoalen ibas perpulungen e, gelah banci isampatina. Erkiteken si e, adi si perdiateken surat Rasul Paulus si pemena  cukup gedang ras komplit (lit ka suratna si peduken). Melala perbeben ras persoalen si jadi  ibas perpulungen e, guna ndungisa Rasul Paulus muat bagin alu mereken nasehat ras pengajaren. Secara garis besar isi surat Rasul Paulus si pemena e me; njawab masalah perpecahen ibas perpulungen (1:10-4:21), kerna perjabun (5:1-7, 40), kerna kalak Kristen ras kalak perbegu (8:1-11:1), kerna kegeluhen perpulungen ras kebaktin (11:2-14:40), pengajaren kerna kekeken Kristus ras kekeken kalak si tek ibas si mate nari (15:1-58), kerna erdiakonia, nehken  persembahen  guna nampati kalak kristen si i Judea(16:14) ras ibas bagin penutup suratna isehkenna himbauan himbawan gelah perpulungen metenget ras mediate, nggit mere penampat man serayan Tuhan si isuruhna reh ku perpulungen e guna nerusken pelayanen si enggo ibenakenna.

Ibas kata pendungi suratna e Rasul Paulus mere nasehat gelah:

1. Erjaga-jaga; si biasana erjaga jaga e me pasuken erkiteken situasi la aman. Kegeluhen perpulungen e la pernah aman, Rasul Paulus erpengakap kenca itadingkenna perpulungen e lit penyusup si bengket bagi serigala si merawa guna encedaken perpulungen (bdg. Perb. Rasul 20:29) gelah perpulungen merap ras serap-serap. Situasi la aman e pe banci rehna arah perpulungen e nari erkiteken perayaken kepentingen pribadi entah pemeteh si kurang.
2. Tetap erkiniteken; semangat erkiniteken perpulungen la tetap, banci surut entah berubah setia. Banci ka pe lit si mundur (murtad) ibas kiniteken e nari erkite-kiteken la megegeh ngalaken persoalen geluh entah pe mundur ibas perpulungen e nari erkiteken la teralokenna sikap teman sada perpulungen entah kebijaken tertentu. Erkiniteken banci tetap adi tetap lit kesetian man Dibata, ndalanken tanggung jawab nggeluh erkiniteken, tutus kebaktin, ngoge (mpelajari) Kata Dibata, ertoto, ndalanken kekelengen ras sidebanna.
3. Bagi dilakilah kam; “..emaka erperanglah bagi dilaki” (1 Samuel 4:9). Kata sindiran bagi dilakilah kam labo kata kata si umum ibelasken. si biasana mbelasken kata kata e eme kalak si mbelin (erwibawa) man kalak si ianggap kurang kesetianna ras percikcik ncidahken kebenaren. Umpamana bagi ibas bahan PA-nta minggu si lewat asum Job erperkara ras Dibata erkiteken kecerobahenna erkiniteken, e maka nina Dibata man bana “O Job, adi dilaki kin kam tuhu...” (Job 40:7). Kata kata bagi dilakilah kam merupaken pengajuk si agak kasar (keras) gelah  perpulungen tegas ibas ndalanken kinitekenna, pang ras nggit muat resiko berkorban guna tujun si benar, la kiam ibas masalah nari, labo ndarami zona nyaman tapi ngelibatken diri jadi pahlawan iman ndungi perbeben si lit.
4. Megenggeng; sedekah erjuang pasti lit perbeben si man alanken, lit kinisuin. Ibas si e ula cengeng sabab ngandung entah serko serko labo ndungi masalah. Alokenlan kinisuin e tapi ula lalap mengeluh, megenggenglah ngalakenca. “Janah katakenlah bujur man Dibata i bas si kugapana pe”
5. Kasa kai si ilakokenndu bahanlah e alu ate keleng; nggeluh kekristenen e arus dem alu kinipangen, pantang mundur ras ula nggit gagal utamana ula nggit gagal ibas erkeleng ate. (bdg 1 Kor 13:1-13)

Rasul Paulus pe ngajuk perpulungen gelah ngikuti teladan si enggo ibahan Istepanus ras isi jabuna, kenca ia jadi kristen icidahkenna peranna sertana ibas perpulungen alu nehken penampat ras ngelai jadi jemaat si aktif, muat bagin ibas pelayanen. Perbahanen Istepanus ras isi jabuna e merupaken proklamasi kerna geluh kekristenen bagi si ilakoken perpulungen si pemena (bdg Perb. Rasul 2:43-47). Nggeluh kekristenen e arus nggit erdiate ras engkelengi perpulungen, salah sadana bagi si ipedahken Rasul Paulus nggit mediate man serayan Tuhan.

Aplikasi  ras Renungen
Cukup mehuli pertumbuhen gerejanta GBKP, bagi si idah ibas inganta sekalak-sekalak. Tapi amin bage gia gerejanta langa bo pulah ibas erbage-bage permasalahen nari. Penungkunenna tanggung jawab ise kin ndungisa persoalen e, persoalen keuangen, utang si langa tergalari, pembangunen si langa terdungi, program si arus ievaluasi, mpersiapken program guna waktu si reh, persoalen ajaren, perpecahen ibas perpulungen, etika, sosial, kesehaten ras sidebanna? Perlu si renungken piga-piga kuan kuan kalak karo nina “Adi la beluh pehuliken ncedai lah gia ula”. “Sepuluh pande kudin talu ibahan sekalak pande kah-kah”. “Ula min bagi perlangi katak, nina: Megembur gia ku tadingken labo kuranaken si penting aku seh ku lepar” “Si la ngukurken page lapat” ras si debanna. Kuan kuan e isehken man kalak si la mediate, si ncedai kiniersadan ibas jelma si enterem ras kalak si ngukurken bana saja la ngukurken ras la ndahiken kedamen man kalak sideban.

 

Bagi Rasul Paulus min kita, bagi Istepanus min kita ras bagi kegeluhen perpulungen si pemena min kita, perbahan ate keleng man perpulungen ras perbahan mbiar man Dibata emaka iberekenna perhatinna guna mperdiateken persoalen persoalen si turah ibas perpulungen. Semangat membangunta bagi si ilakoken Rasul Paulus man perpulungen korinti min, aminna ia i Epesus nari i idahna kai si terjadi ras kai si iperluken perpulungen e. Erkiteken mediate ras kepate ia, persoalen ibas ingan si ndauh pe nggit ia njadiken dirina sumber dame. Adi la mediate, masalah si ilebe-lebe mata pe la i idah, janah adi i idah labo lit kininggiten terlibat ndungisa. E maka ula min kurang kekelengenta maka banci kita mediate ras nggit erkorban ngeluangken waktunta, pikirenta, pemetehta, kinilitenta ras sidebanna alu tulus. Nggit pe kita mbabai isi jabunta jadi model (teladan) bagi perpulungen si pemena ibas erkiniteken, bagi si ilakoken Istepanus ras isi jabuna.

                                pdt.ewgm.sitelusada-bekasi