Suplemen PJJ : Kolose 1 : 3-8 : Tgl 11-17 April 2021

 

 

OGEN : KOLOSE 1:3-8

TEMA : PENGARAPEN KERNA SI ENGGO ISIKAPKEN DIBATA I SURGA

(Teologi Paulus Kerna Pengarapen Kamis Putih, Jumat Agung, Paskah)

Senina ras turang kekelengen Tuhan….

Kolose emekap sada kuta i Asia Kitik, labo Paulus si manteki perpulungen i Kolose e, tapi igejapna maka ia pe ertanggungjabab nandangi perpulungen e. Enggo ieteh Paulus maka lit guru-guru perguak nehken pengajaren si papak ibas perpulungen e. Pengajaren e ngataken guna nandai Dibata ndatken keselamaten si tuhu-tuhu, tep-tep kalak arus nembah man kuasa-kuasa si lit i awang-awang bagepe arus patuh nandangi peraturan-peraturen si deban. Paulus nehken suratna enda guna nehken pengajaren Kristus si benar janah ngelawan pengajaren si papak si iajarken guru-guru perguak. Paulus nehken maka Jesus Kristus ngasup mereken keselamaten si serta, mabai manusia gelah ula papak. Kristus ngenca pengarapen doni enda.

Adi kami ertoto kerna kam, ikataken kami bujur man Dibata, Bapa Tuhanta Jesus Kristus…. (ayat 3-4)

Aminna pe gia Paulus lenga bo nandai kalak si tek man Tuhan si lit i Kolose, tapi perpulungen e itotokenna alu pengataken bujur man Dibata. Isehkenna bujur man Tuhan sabab Paulus enggo megi berita maka perpulungen si lit i Kolose enda emekap kalak si tek man Tuhan Yesus Kristus, bagepe erkeleng ate man anak anak Dibata. Tentu enda ngajarken man banta segelahna ibas kita ertoto arus maka ibas pertoton e sisehken pe pengataken bujur man Tuhan.  Ijenda teridah maka perpulungen si lit i Kolose emekap perpulungen si tek man Tuhan bagepe erkeleng ate man kalak si deban.

Kiniteken ras keleng ate emekap dua bagin si la banci ipesirang ibas kegeluhen kalak Kristen, sabab enda enggo jadi sada. Kalak si tek man Tuhan Jesus Kristus emekap kalak si erkeleng ate. Kiniteken man Tuhan tentu teridah ibas keleng ate man kalak si deban. Kiniteken man Tuhan teridah ibas keleng ate si isehken man kalak si deban.

Kiniteken, Keleng Ate, Pengarapen (ayat 5-6)

Kalak si erkiniteken man Tuhan Jesus encidahken keleng ate man kalak si deban erkiteken            lit pengarapenna kerna kai si enggo isikapken Dibata man banta i surga. Pengarapen enda me si mabai kita megenggeng ibas erkiniteken man Tuhan. Pengarapen Kristen ngajarken man banta maka dalan kebenaren Dibata me dalan keselamaten. Pengarapen Kristen emekap ulin ernalem man Tuhan asangken man doni enda

Kiniteken, keleng ate ras pengarapen emekap 3 hal si penting ibas kegeluhen kalak si tek man Tuhan Jesus Kristus. Paulus ngataken bujur man Dibata erkiteken megi kuga kiniteken kalak Kolose man Tuhan. Bagepe kuga perpulungen ibas nehken keleng ate, subuk secara umum man kerina jelma, secara khusus ka pe man anak-anak Dibata (bd. 1 Petrus 2:17). Kita arus erkeleng ate man kerina anak-anak Dibata. Enda me ciri kegeluhen kalak si tek man Tuhan emekap nggeluh erkeleng ate. Selanjutna, kerna erpengarapen, lit pengarapenta kerna kai si enggo isikapken Dibata man banta i surga, emekap keriahen nggeluh i Surga. Kiniteken ras keleng ate  mabai kita kubas pengarapen keriahen nggeluh i Surga. Jadi, teologi Paulus kerna pengarapen emekap kalak si erkiniteken man Tuhan tuhu-tuhu enggo ngaloken lias ate Dibata. Isikapken Dibata surga jadi ingan kesenangen man kalak si erkiniteken baNa. Pengarapen kalak si tek man Tuhan emekap Surga. Doni emekap ingan kita nehken Berita Si Meriah, nehken keleng ate segelahna reh teremna kalak si erkiniteken man Tuhan dingen terkelin.

Kerna Berita Si Meriah (ayat 6-8)

Berita Si Meriah e tetap maba pasu-pasu janah enggo mbar i tengah-tengah doni enda. Berita Si Meriah kerna Dibata, si erkeleng ate man manusia. Dibata enggo nikapken ingan si mehuli emekap surga man kalak si setia erkiniteken man baNa, nggeluh ibas keleng ate dingen setia erpengarapen man Tuhan. Sekalak tokoh si isehken ijenda emekap Epapras. Ia emekap sekalak si tutus erdahin ibas dahin Kristus guna nampati Paulus. Ia pe si nurikenca man Paulus ras teman-temanna kerna kuga perpulungen si lit i Kolose nggeluh ibas keleng ate si ibereken Kesah Si Badia man bana.

Senina ras turang kekelengen Tuhan…

Amingia enggo si bentasi Kamis Si Badia, Jumat Si Mbelin, Sabtu Pengarapen ras Paskah, ibas PJJnta sekali enda erlajar kita kerna si enda.

Kamis Si Badia

Kebaktin Kamis Si Badia ilakoken guna nginget mulihi kerna wari-wari nandangi kematen Tuhan Jesus.  Jesus murihi nahe ajar-ajarNa bagepe kenca iburihiNa nahe ajar-ajarNa iberekenNa roti Paskah man ajar-ajarNa. Dibata ningetken kita kerna keleng ateNa teridah arah kiniteruken ukur ras kesetianNa ibas ngalaken kiniseran si jadi usihen man banta kerina. Amin gia melala perbeben si igejapken kita, erpadan kita tetap setia ibas nehken keleng ate, nggeluh alu meteruk ukur ibas jabu ras sekelewetta. Ibas Kebaktin Kamis Si Badia enda, silakoken me Lakon Persadan Si Badia bagepe Siburihen Nahe, si mpepaguhi kinitekenta guna nggeluh ibas kiniteruken ukur ras kesetian ibas ndalanken sura-sura Dibata. Enda me biak geluh anak-anak Dibata.

Jumat Si Mbelin

Kebaktin Jumat Si Mbelin siilakoken emekap guna nginget kuga Jesus Kristus si enggo ngasamken kesahNa guna nebusi manusia. KematenNa i kayu persilang jadi kahulta, gelahna kita manusia terkelin. Yesus mate ipakuken ku kayu persilang, kematenNa mekelesa bali ras kalak jahat, ukumen ras pernembeh Dibata ipersanNa. Kristus ngenanami kiniseran erkiteken dosa manusia, IA erlebuh man Dibata si i Surga gelah ialemiNa dosa manusia. Erkiteken kita enggo ngaloken keleng ate Kristus si mbelin man banta, arus pe maka kita nggeluh nehken keleng ate man doni enda dingen tetap setia mersan kayu persilang ibas kita ngikutken IA.

Sabtu Pengarapen

Ibas kita erbahan Kebaktin Sabtu Pengarapen, ije kita ngerenungken erti keleng ate Dibata arah kematen Jesus Kristus. Kematen eme hal si tuhu-tuhu ibiari manusia. Seh maka encakapken kematen ras ngidah tanda-tanda kematen pe enggo nambahi kebiaren. Emaka tambah me ateta mesui di kune kalak si ikelengi kita lawes nadingken doni enda.  Pengertin enda me si ipelimbarui arah kita mperingeti kematen Jesus Kristus. Jesus enggo bengket ku doni kematen, dingen naluken kuasa kematen. Kematen pe la ngasup nirangken kita ibas keleng ate Dibata nari. Seh  maka ku doni kematen pe kita iperjuangkenNa dingen iselamatkenNa. Kematen Kristus e maba keselamaten dingen keterkelinen man banta bagepe man kalak si enggo mate ibas Kristus. Alu bage, lanai aru ateta nandangi kematen si arus ibentasi kita.

Paskah

Kebaktin Paskah si ilakoken kita emekap ibas kita mperingeti kemenangen, kekeken Tuhan Jesus Kristus ibas si mate nari. Tuhan Jesus enggo naluken kuasa kematen. Tuhan Jesus enggo naluken  kuasa dosa. TuhanJesus enggo mereken kemenangen dingen jaminen keselamaten man banta. Erkiteken si e, alu ermeriah ukur kita nehken bujur man Tuhan si enggo nelamatken kita manusia ibas kuasa dosa nari. Kekeken Kristus njamini kita nggeluh metunggung iadep-adepen Dibata janah  metunggung ndahiken dahin Tuhan jadi perberita si meriah ku sekelewetta.

Senina ras turang kekelengen Tuhan…

Kita enggo ngelakoken Kebaktin Kamis Si Badia, Jumat Si Mbelin, Sabtu Pengarapen bagepe Wari Paskah. Enda kerina silakoken guna mpetetap ukur segelahna tetap setia erkiniteken man Tuhan amin gia melala kiniseran si arus ialaken kita ibas kegeluhen i doni enda. Enggo sialoken keleng ate Tuhan si mbelin ibas kegeluhenta emekap Jesus Kristus, AnakNa Si Tonggal, si enggo mate i kayu persilang guna nebusi dosanta, dingen enggo keke ibas kematen nari. Tentu enda kerina mpetetap ukurta guna tetap setia erpengarapen man baNa. Kalak si tek man Tuhan, nggeluh alu dem keleng ate dingen tetap setia erpengarapen man baNa saja emekap kalak si ndatken keselamaten, keriahen nggeluh ibas Sorga. Tuhan masu masu kita kerina. Amin.  

Pdt. Crismori V. Br Ginting Manik

 

 GBKP Sitelusada