Nats            : Mazmur 112:1-10

Tema           : Si Erkemalangen Man Tuhan

  (Erti Erkemalangen)        

I.     Kata Penaruh

Adi si oge mazmur enda, ngerana soal pasu-pasu Tuhan nandangi bangsaNa. Lit pasu-pasu Tuhan secara universal, komunal, bahkan secara personal.

Kemajun zaman megati mahanca manusia hanya ngukurken dirina jine. Manusia Tambah ka pe pandemi covid-19 si lenga eteh ujungna mahanca manusia erlomba-lomba ngaturken kegeluhenna segalahna ngasup tetap ertahan ngalaken situasi kegeluhen paksa enda. Maun-maun, ndarami kalak sierkemalangen man Tuhan pe enggo mulai mesera. Arah bahan PJJta enda kita iajuk guna ngantusi uga kin kegeluhen kalak sierkemalangen man Tuhan rikutken Mazmur 112:1-10.

II.          Mpebagesi Pengangkan Kerna Ogen

Masmur 112 enda nuriken kerna pasu-pasu Dibata nandangi anak-anakNa si erkemalangen man Tuhan dingen si ermeriah ukur ndalanken perentahNa. Masmur 112 enda eme kelanjuten Masmur 111, kerna upah si ialoken kalak si erkemalangen man Tuhan. Kegeluhen kalak si erkemalangen man Tuhan dem alu keriahen ras kejuah-juahen. Sebab arah keriahan ukur kalak si erkemalangen man Tuhan jadi pujin man Dibata. Kalak si nggeluh erkemalangen man Tuhan ngaloken hak-hak istimewa si la ialoken kalak si la erkemalangen man Tuhan. Kalak sierkemalangen man Tuhan labo kalak si lalap ngataken, “Tuhan, Tuhan, Tuhna”. Tapi kalak si erkemalangen man Tuhan eme kalak si “tunduk, hormat, mehamat” man Dibata (ay.1). Dingen nggeluh rikutken perentah-perentah Dibata. Perentah-perentah Dibata jadi kesenangenna dingen perentah Dibata enggo ituliskenna ibas pusuhna.  Kalak si erkemalangen man Tuhan, aminna pe geluhna melala alang abat, tapi la e mahanca aru ateNa. Sebab Tuhan lalap engkawali kegeluhenna. Kalak si erkemalangen man Tuhan anakanakna ipasu-pasu Dibata, ia jadi kalak sierkuasa (ay.2) ertina maka kalak si erkemalangen man Tuhan, labo terjeng ndatken pasu-pasu idur Dibata nari, tapi ia pe jadi pasu-pasu. Janah jabuna bayak namura (ay.3).

Kebayaken si imaksudken pemasmur ijenda labo kebayaken erta doni, tapi kebayaken siluar biasa si la ternilai ergana. Tapi kepentarenna jadi kesenangen man dirina. Ialokenna me erta ras kinibayeken, tapi si e kerina labo mahanca ia lupa kerna sumber erta ras kebayaken e.    Kalak sierkemalangen man Tuhan nggeluh alu bujur, adil, perkuah dingen perkeleng. Alu bage ersinalsal terang ia ibas kegelapen. Dibata la njanjiken makana kegeluhen kalak si erkemalangen man Tuhan terbebas ibas kiniseran nari. Tapi kiniseran la mahanca ia bene. Sebab Tuhan tetap engkawali ia. Janah rikutken kegeluhenna ngasup ia jadi saksi Dibata si nggeluh erkiteken paguh kinitekenna dingen ia nggit nampati kalak sideban. Arah perkuah atena ras kebujurenna iinget kalak ia (ay.4,6, 9).  Ipasu-pasu Dibata geluhna, erkiteken ibas kinilitenna labo ipakekena guna dirina saja, tapi ia pe nggit alu bujur pepinjamken (ay.5). La ia ertaktak rikutken kai si ibahanna. Tetap paguh kinitekenna. Dingen labo ia guling erkiteken tantangan doni si lit, tapi pegegehi Tuhan ia guna ngalaken kerina perbeben geluhna. Dingen ngasup ia tetap ngidah rencana Tuhan si mbelin bas geluhna. La ia mbiar nandangi imbang-imbangna. Tek ia makana Tuhan kap ras ia. Maka pasti ibela Tuhan ia iadepen imbang-imbangna (ay. 7-8).  Tapina kalak jahat gara atena ngidah kai si jadi nandangi kegeluhen kalak si erkemalangen man Tuhan (ay.10). Sebab kalak jahat ngidah kerna kejahatenna labo mereken keriahen ukur manbana. I je Dibata encidahken keadilenNa. Sebab kerina manusia ngaloken balasen sisetimpal rikutken kai siibahanna. Alu bage, kalak si jahat pe erkesempaten guna ngaloken lias dingen keleng ate Dibata si mereken kemalemen ate nandangi kegeluhenNa. 

III.       Pengkenaina

Erkemalangen man Tuhan eme gaya hidup. Labo banci kita pekulah-kulah nggeluh erkemalangen man Dibata, padahal situhuna pusuh ras peratenta labo man Dibata. Selaku anak-anak Tuhan mari si jadiken erkemalangen man Tuhan jadi gaya hidup. Siencidahken jati dirinta selaku kalak si erkiniteken. Tentuna kalak si nggeluh erkemalangen man Tuhan ndatken pasu-pasu idur Dibata nari. Tapi labo pasu-pasu e sijadi perayakenta. Sebab kemalangen man Tuhan nge keriahen si tuhu-tuhu. Keriahen si la ternilai ergana. Alu bage, mari radu ras kita nggeluh erkemalangen man Tuhan, rikut pe ras kerina isi jabunta. Sijadiken maka jabunta jadi sumbul keriahen si tuhu-tuhu labo terjeng guna dirinta ras jabunta tapi pe guna kalak sideban. Jadikenlah jabuta jadi saksi Tuhan si nggeluh dingen mabai jabu sideban erkemalangen man Tuhan.

Pdt  Nenny Triana Br Sitepu 

Runggun GBKP Cisalak 

OGEN : Kejadian 12 : 1 – 3 (GBKP MABA PASU - PASU)

TEMA : JADI PASU – PASU

          Tep-tep wari, jelma mindo pasu-pasu man Tuhan arah pertotonna. Sebab enda hal si utama kel iarapken manusia ibas geluhna. Kerina i awali alu pasu-pasu. Memulai dahin, ibas jabu, rsd. Pasu-pasu nggo ianggap jadi singkawali, sinjamini bagepe restu ibas kegeluhen enda si reh na ibas Dibata nari. 

 Ibas kitab Kejadin 12 : 1 – 3 enda mula - mulana Dibata ndilo Abram (lenga Abraham) janah erbahan Perpadanen gelah arah kesusurenna jadi sada bangsa simbelin (bangsa Israel) jadi pasu – pasu man bangsa – bangsa sideban (Pemilihan dan Pengutusan jadi berkat). Ise kin Abram? Abram bhsa ibrani ‘Avram ertina bapak yang dimuliakan Abraham Avraham Bapak sejumlah Bangsa besar (Kej. 17 :5) tubuh i kuta Ur – Kasdim anak Terah seninana Nahor ras ras Haran. Reh Tuhan ndahi ia ibas umur 75 Tahun maba Abram ku taneh Kanaan. Anakna Ishak ras Ismael janah ndeharana gelarna Sarah, Abraham enggo ianggap bangsa Israel leluhur bena – bena Bangsa Israel umur Abraham lit 175 tahun (Kej. 25 : 7) mate ia i Hebron Kanaan (Kej 23:19).

          Pendilo Dibata nandangi Abraham segelah nadingken kutana, kade – kadena, rumahna gelah lawes ku sada ingan eme negeri sienggo ipadanken Dibata man bana. Enda me pendilo Dibata nandangi Abraham janah Dibata ersura – sura (nehken misi Dibata man Abraham) eme “nterem kubahan sinursurndu janah eme pagi jadi bangsa simbelin. Kupasu – pasu kam, janah kubahan terberita gelarndu arah kam nterem kalak dat pasu - pasu” arah enda me perpadanen Dibata cikal bakal litna bangsa Israel jadi bangsa Pilihen Dibata. ayat 3 “Kupasu – pasu kalak simasu – masu kam tapi kusumpahi kalak sinumpahi kam janah erkiteken kam ku pasu – pasu kerina bangsa - bangsa” enda me perpadanen sinisehken Dibata man Abraham janah tuhu – tuhu jadi kerina Padan Dibata man Abraham ras kesusurenna seh jadi sada bangsa simbelin eme igelari bangsa Israel, janah bangsa Israel enda me jadi bangsa Perpadanen guna jadi pasu – pasu man bangsa – bangsa sideban.

Lit sicukup menarik ibas pendilo Tuhan nandangi Abram enda eme : Pertama Abram tuhu – tuhu patuh la erpenulak ibas pendilo Dibata amin gia nadingken kade – kade, orang tua, sangkep nggeluh lawes kukuta kalak (keluar dari zona nyaman) sebab Abram situhuna enggo nyaman ibas geluhna tapi itadingkenna kerina e guna ngayuken pendilo Dibata. Ibas kegeluhenta pe mawen rusur enggo siakap nyaman ndalani kegeluhen enda lit istilah ngatakenca maka bagenda aja pe enggo hebat e. Misalna selaku serayaan Dibata pelayanenta bage – bage aja pe enggo me sikap e, la kita nggit keluar zona nyamanta. Genduari me paksanan kita ndarat ibas zona nyaman alu erbahan perubahen pelayanen itengah – tengah pandemi enda jadi kesempaten guna mengembangken pelayanenta, pandemi enda enggo mengubah zona nyaman pelayanenta kubas pelayanen era baru eme era Dibata labo hadir ibas gereja saja.

 Bagepe man banta selaku anak – anak Dibata ibas padan simbaru segelah kitape gelah tetap patuh ras setia nandangi Pedah ras kata Dibata sebab lit misi Dibata arah kegeluhenta anak – anak Dibata arus jadi gambaren Dibata ibas doni enda segelah iidah kalak ibas dirinta biak – biak Dibata. Bangsa pilihen guna jadi pasu – pasu man doni enda uga kita banci jadi pasu – pasu : eme nggeluhken biak singena ate Dibata, bagi Abraham kujape perdalanenna tetap jadi pasu – pasu labo man keluargana saja tapi pe man kalak sideban. Bagepe kita subuk arah perukuren, pengerana ras perbahanen tetap ncidahken kemuliaan Tuhan nandangi kalak sideban. Subuk nandangi gereja, masyarakat, bangsa Negara bagepe nandangi tinepa Dibata gelah alu bage doni enda ras kerina isina tek maka Dibata nai nari genduari ras pagin tetap erkeleng ate man doni enda.

Ketaaten nandangi Tuhan em bena-benana pasu-pasu sireh ku bas geluhta. Pemahaman kita kalak si erkiniteken kita enda pasu-pasu man kalak sideban. Bagi Abram i pasu-pasu Tuhan labo guna dirina, kita pe harus menyadari ketika kita mindo pasu-pasu, i je nggo ka kita siap guna menjadi pasu-pasu man doni enda.

Pdt Neni Triana  br Sitepu

GBKP Runggun  Cisalak

Ogen  :  Matius 5:13-16

Thema  : “SIRA RAS TERANG DONI”

Ersaksi arah kegeluhen seh kelpentingna ras labanci iabaikan entah pe terlupaken. Bagi kai si iarapken Yesus, gelah kita ersaksi (perb.1:8,Mat 28:18-20) arah kegeluhen si ernanam ras erguna man kalak si enterem, bagepe man doni enda.

Bahan PJJ nta sekalenda eme bagin pengajaren Yesus idatas uruk uruk,guna

peangkaken man kalak sienggo tek dat predikat” Sira ras terang”. Kalak sierkiniteken e igelari Gereja.

Sira ras terang,eme  siibutuhken setiap jelma. Kita laterpesirang  ras sira/terang. Setiap wari kita berhubungen ras sira bage pe terang.  Sira fungsina mempengaruhi bagepe terang  berfungsi guna mempengaruhi. Sada sendok sira itamaken ku gulen sada belanga minter ipengaruhina/iubahna gulen lanai hambar. Terang si kitik adi tamaken ibas gelap, minter ipengaruhina gelap e jadi terang. Tapi gelap la  terpengaruhisa terang e. Bagem kalak Kristen arus mempengaruhi ola ia ipengaruhi.

Kuga maka sira berpengaruh man gulen sada belanga? Nggit sira ndarat ibas bungkusna nari,dingen nggit melengas,emaka minter lit pengaruhna  man gulen sada belanga. Bagepe Terang labo itutupi alu tumba, tapi nggit keri melengas guna nerangi sekelewetna. Bali ras  sebatang lilin siterang, itamaken ibas si gelap, ipengaruhina gelap jadi terang. Bagem igambarken kegeluhen kalak Kristen itengah tengah doni enda.

Kehadiren gereja i doni enda guna mempengaruhi dunia  kegelapen gelah nggeluh ibas terang Tuhan. Bagepe  mempengaruhi biak doni,ku biak singena ate Dibata. Guna sie kalak Kristen arus nggit ndarat ibas zona aman nari guna mempengaruhi kalak sienterem ku simehuli.

Kalak sierkinteken,tah pe gereja itamaken Tuhan i doni enda,jadi pasu pasu ku sekelewetna,tah pe jadi saksi Tuhan i bas inganna tading. Gereja silanai erguna man kalak sideban,situhuna lanai  igelari gereja( sira silanai masin,iambekken,sabab jadi sinanggel man kalak sideban).Ciri gereja yang benar eme jadi pasu pasu man jelma sienterem.

Sira ras terang, berarti ibutuhken kehadirenna ijapa pe. Adi la ia ije idarami kalak.

Tereteh ia la ije. Misalna gulen latama sira minter teridah. Ija sirana? Tapi adi ije pe ia,labo Ncidahken bana, tapi tergejapken.

Bagepe Terang suari labo ia inget, tupung berngi rempet mate lampu,kerina kalak nggejapken gulut, gara lampu minter salih jadi meriah akap(kehadiren terang mengubah suasana gulut jadi tenang. Bagem arusna kehadiren  gereja i doni enda,  tergejap man kerina jelma reh tenangna,reh malemna atena.

Gia sekali sira ras terang ibutuhken oleh semua orang, tapi sira ras terang e igunaken alu tepat sasaran ras tepat takaran. Adi la tepat banci jadi batu sandungan, tercurna gelar Dibata simereken gelar man kalak Kristen. Bali ras gulen mbuesa sira, kerina kalak banci jungut jungut. Tah pe  terang si melebihi bagi sewajarna banci mesilau akap kalak kerina. Contohna kalak Kristen ia ngenca akapna benar , Badia kal akapna bana, mandangi, sombong rohani rsdna. Enda kerina sira ras terang si over dosis,jadi sinanggel man klk sienterem.

Arah uraian idatas,berarti kalak Kristen tah pe gereja sebagai sira ras terang,berarti Gereja siernanam man kalak sienterem, gereja si mpeturah ate malem man kalak sienterem. Gereja simpeturah ate kalak megedang ija  ia tading. Ersinalsallah terangndu ilebe lebe kalak sienterem,gelah ipujina Dibata Bapandu si isurga(ay.16).

                                                                                     Pdt  Neni Triana br Sitepu

Runggun GBKP  Cisalak