Suplemen PJJ " Epesus 1 : 3-6 ; Tgl 25 April -01 Mei 2021

OGEN : EPESUS 1:3-6

TEMA : ERKITEKEN KELENG ATE-NA KITA JADI ANAK-ANAKNA

(Identitas Kalak Si Tek)

Senina ras turang kekelengen Tuhan

Ibas kita ndalani kegeluhenta si tep-tep warina, rusur kita iperhadapken alu pilihen-pilihen. Misalna, milih teman geluh, milih pemimpin, milih rumah, milih mobil, ras milih sidebanna. Ibas  milih teman nggeluh, misalna, entahpe ibas kita milih sekalak pemimpin, tentu saja si ipilih kita emekap sekalak si mehuli, si ertanggungjawab, setia, terteki, berkualitas ras pertimbangen-pertimbangen si debanna si ibahan masing-masing jelma. Di kune, kita me si ipepilihken, janah si milihsa emekap Dibata. Kuga adi Dibata pe erbahan kriteria-kriteria bagi sibahan manusia ibas IA milih kita? Apakah kriteria kinibayakaen, kepentaren, pendidiken, kebeluhen, kiniulin, bagepe ras sidebanna ibahanNa ?  Tapi, kepeken Dibata la bali ras manusia ibas milih kalak sitek man baNa jadi anak-anakNa. Dibata milih manusia labo erkiteken kiniulinnta, labo erkiteken ketutusenna nembah IA, labo erkiteken kebayakenta, labo erkiteken mejile rupanta, tapi erkiteken keleng ateNa man banta kerina manusia. Dibata milih kita tanpa syarat. Kita selaku manusia si erdosa (rusak total karena dosa), tuhu labo kita metunggung iadepenNa, tapi erkiteken keleng ateNa me maka kita ipilihNa jadi anak-anakNya.

Bagi ende-enden pujin ibas KEE 290:1-3 Labo Erkiteken Beluhku

Labo erkiteken beluhku, labo erkiteken pentarku

Tapi perbahan penampatNdu, mbelin tergejap bas ngasupku

          Labo erkiteken dahinku, labo erkiteken pangkatku

          Tapi perbahan perkuahndu, malem ateku tuhu-tuhu

Labo erkiteken ertangku, labo erkiteken bayakku

Tapi perbahan pemereNdu, pasu-pasuNdu simpar bangku

Ende-enden enda nuriken man banta maka kerina erkiteken perkuah ate Tuhan man manusia maka kita ipilihNa jadi anak-anakNa si ikelengiNa bagepe ipasu-pasuNa.

Arah bahan PJJnta ibas minggu enda, Epesus 1:3-6,  mari radu ras kita erlajar kerna kuga pandangen Paulus kerna Dibata milih dingen nentuken kita jadi anak-anakNa erkiteken keleng ateNa.

Senina ras turang ibas gelar Tuhan….

Pemilihen Dibata nandangi kerina kalak si tek man Kristus emekap jadi sada hal si penting man Paulus (nen Roma 8:29-33; 9:6-26; 11:5,7,28; Kolose 3:12; 1 Tes 1:4; 2 Tes. 2:13; Titus 1:1). Pemilihen (Yunani : eklego) enda nuduhken man banta maka Dibata milih bangsaNa si erkiniteken man Tuhan Jesus Kristus gelah nggeluh badia iadepen Dibata. I bas pandangen Paulus, pemilihen si ilakoken Dibata emekap sebage bentuk keleng ateNa man kerina manusia si ngaloken AnakNa, Jesus (Johanes 1:12), sebage bangsa pilihenNa. Pemilihen si ilakoken Dibata emekap pemilihan tanpa syarat. Dibata la erbahan syarat-syarat ibas IA milih manusia jadi anak-anakNa. Labo erkiteken perbahanen manusia si mehuli, entahpe erkiteken pengeranana si mehuli. Tapi kerina erkiteken keleng ateNa.

Paulus nehken maka doktrin pemilihen enda lit ibas kebenaren-kebenaren emekap :

1.    Pemilihen si erpusat man Kritus, pilihen enda ilakoken ibas persadan ras Yesus Kristus. Ope denga ijadiken Dibata doni enda, enggo ipilihNa kita jadi sikerajangenNa arah persadanta ras Kristus gelah kita badia dingen la ersalah ilebe-lebeNa. Erkiteken keleng ateNa (Epesus 1:4).

2.    Pemilihen ibas Kristus khususna bersifat kelompok, emekap pemilihen persadan kalak si tek man Kristus “kula Kristus” (Epesus 4:12).

3.    Pemilihen kalak guna iselamatken ibas Kristus, isehken man kerina manusia, bersifat universal (Yohanes 3:16-17; 1 Timotius 2:4-6; Titus 2:11; Ibrani 2:9). Kalak si terpilih emekap sekalak si erkiniteken man Tuhan Yesus Kristus.

Ijenda si idah maka Dibata milih manusia labo erkiteken IA enggo ngidah kiniulin si lit ibas manusia. Dibata milih manusia erkiteken keleng ateNa bagepe sura-suraNa. Ibas pemilihen si enggo ilakoken Tuhan, “enggo itentuken” (Yunani : prooroizo) Dibata bena-benana nari maka kerina jadi sue ras sura-sura Dibata ibas pemilihen si ilakokenNa; si igelari pe predestinasi. Jadi, predestinasi terdiri ibas 2 bagin, emekap pemilihen (election) ras penolaken (reprobation). Pemilihen ijenda emekap kerna kalak si bengket ku surga. Sedangken, penolaken (reprobation)  emekap kerna kalak si bengket ku neraka. Pemilihan siilakoken Tuhan emekap nandangi persadan kalak si tek man Tuhan Jesus Kristus, si nggeluh “ibas Kristus’.

Kerna predestinasi enda, Calvinisme ngataken maka Dibata nentukan kegeluhen manusia guna ndatken keselamaten, bagepe lit ka kalak si ndabuh kubas ukumen rasa lalap erkiteken dosa-dosana. Johanes Calvin pe nehken maka  Dibata nehken pemereNa man manusia si la banci itulak manusia. Si imaksudken ijenda kerna si la banci itulak emekap adi Dibata enggo milih sekalak manusia guna iselamatken bagepe mereken Kesah Si Badia guna mpelimbarui dirina, arah kegeluhen si male jadi kegeluhen si mbaru, maka la lit ise pe si ngasup nulaksa. Dibata erdolat guna milih manusia, labo erkiteken kiniulin manusia entahpe kelebihen si lit ibas manusia e, tapi kerina erkiteken dolat Dibata. Adil nge ndia enda ? Si ikataken adil emekap kerina manusia si enggo ndabuh kubas dosa pasti mate. Adi Dibata milih manusia guna iselamatken erpalasken dolat Dibata e, enda kerina erkiteken keleng ate dingen guna memajuken kegeluhen kalak si tek man Tuhan.

Senina ras turang ibas gelar Tuhan…

Alu bage, sue ras tema PJJnta, Erkiteken Keleng AteNa Kita Jadi Anak-AnakNa; kai nge ndia si arus silakoken selaku sekalak si enggo ipilih Tuhan jadi anak-anakNa erkiteken keleng ateNa ?

1.   Tetap setia nggeluh ibas persadan ras Kristus.

Kalak si erkiniteken man Tuhan emekap anak-anak Dibata si setia nggeluh ibas persadan ras Kristus, ipasu-pasuNa alu erbage-bage pemere pertendin. Kerina enda ipakeken guna mpermuliaken Dibata. Sekalak si nggeluh ibas persadan ibas Tuhan, maka ibas kegeluhenna tetap setia erdalan ibas kebenaren Tuhan, nggeluh badia sentudu ras sura-sura Tuhan. Aminna pe gia tawaren doni enda terus ngusahaken guna ngerintak manusia kubas dosa, tapi erkiteken litna persadan si paguh ras Tuhan, la ia ndabuh kubas perbahanen dosa, tapi tetap nggeluh ibas Tuhan. Kalak si nggeluh ibas persadan ras Tuhan, emekap sekalak si setia nggeluh sue ras Kata Dibata si mabai kegeluhena tetap erdalan ibas kataNa.

2.   Nggeluh Ibas Keleng Ate

Kita e nggo ipilih Dibata jadi anak-anakNa erkiteken keleng ateNa. Jadi, biak geluh kalak si tek man Tuhan emekap biak keleng ate bagi keleng ate Tuhan man manusia. Keleng ate tanpa syarat. Keleng ate man Dibata bagepe keleng ate sapih-sapih kita manusia, subuk ibas jabu bagepe i tengah-tengah perpulungen. Alu bage, amin gia melala perbeben nggeluh paksa genduari enda, tapi ibas keadaan si mesera pe tetap banci jadi pasu-pasu man kalak si deban. Nggit nampati kalak si deban, amin gia lit ibas kekurangen. La nimai bayak lebe maka nggit nampati. Tapi, amin gia nggeluh mesera, tetap nggit nampati kalak si lit ibas kesusahen. Enda kerina ilakoken erkiteken enggo igejapken maka Dibata erkeleng ate man banta, alu bage kita pe arus nehken kekelengen man kalak sideban.

Terlebih i  tengah masa pandemi enda, si jadi tantangen man kerina manusia, ibas kerina ingan i doni enda, si tuhu berdampak ku bas ekonomi, kesehaten, budaya bagepe agama. Arus maka teridah biak-biak anak-anak Dibata emekap keleng ate arah nggeluh si sampat-sampaten segelahna radu megegeh ibas ngalaken perbeben enda.

Selamat Nggeluh Si Keleng-Kelengen. Tuhan masu masu kita kerina. Amin.

Pdt. Crismori V. Br Ginting Manik

GBKP Sitelusada