Ogen : Perbahanen Rasul 19:23-29

Tema : Kembangken Usaha Si Mehuli (Pengembangen Entrepreneurship)

Melalui tema pelayanan GBKP Tahun 2019 (tahun silewat) tentang meningkatkan jiwa kewirausahaan (entrepreneurship) warga GBKP tangkas man banda selaku kalak Kristen kai pengertin erdahin. Erdahin man manusia labo sekedar cari makan saja ngenca, atau uga segelah ndatken untung ras banci pebayak diri, tapi erdahin e merupaken cara man manusia lako nuduhken ise kin ia situhuna. Janah terbagesen asangken si e, erdahin merupaken respon manusia nandangi kerina pemere si enggo isehken Dibata ku tengah-tengah kegeluhenna. Alu kata sideban maka erdahin e merupaken bagin kiniteken manusia. Hal si enda me si megati lanai isaksiken manusia bas kegeluhenna. Seh maka ibas ia ndahiken dahinna lanai bo ipakekenna gegeh Dibata ibas pendahinna. Tapi cenderung ia makeken kengasupen si lit ibas dirina, ras uga segelah banci dat untung sebanyak-banyaknya.

Johanes Calvin ngataken erdahin emekap laborare est orare ertina bekerja adalah ibadah. Dulu pekerjaan yang paling penting dan baik adalah yang berkaitan dengan hal-hal religius. Lalu Calvin membuat gebrakan, dimana pekerjaan sekuler adalah sama religiusnya selama kita lakukan dengan tetap mencirikan imago dei dalam setiap yang kita kerjakan. Emaka kai pe pendahin ntah pe usahata, Calvin sangat menekanken “kerja keras, ulet, gigih, hemat” sini ipalasi ku bas pengajaren moral rikutken Kata Dibata.

Ibas teks PJJ ta kitab Perbahanen Rasul 19:23-29, ituriken kerna lit sekalak si tergelar Demetrius sidahinna emekap sekalak tukang pirak. Situhuna dahinna selaku tukang pirak labo salah, sebab dahin enda pe maba hal si berguna, arah si e banci lahir karya-karya seni si kreatif. Tapi, simenjadi persoalan emekap arah pendahinna e ibahanina patung-patung rumah pertoton Dewi Artemis, patung-patung sibahanna e jadi pajuh-pajuhen, ras arah si e melala kal datsa keuntungen (ay. 24). Tentu dahinna enda labo sue ras Kata Dibata. Kehadiran ras pengajaran si ipeseh Paulus sangat mengganggu ia, ras menjadi ancaman kapna sebab banci merugiken usahana, mengurangi pemasukenna. Emaka ipepulungna sierdahinna bagepe kalak si seri pendahinna ras ia, jenari nina man kalak e, “O teman-teman, ietehndu maka kebayakenta rehna arah usahanta enda. Genduari banci idahndu dingen ibegindu kai si ibahani Paulus. Ikatakenna maka patung-patung si ibahan manusia labo dibata. Enggo nterem kalak papak ibahanna, labo saja i Epesus tapi pe menam ibelang-belang Propinsi Asia” (ay. 25-26). Lanjut ibas ayat 27, secara kinitekenna pe terganggu ia kerna pengajaren si i peseh Paulus ras temanna sedalanen. “Berkonspirasi” ia kerina uga segelah usahana tetap banci erdalan. Guntar kuta ibahanna, itangkapna Gayus ras Aristarkus (teman Paulus sedalanen) si atena icelakaina alu naren ia duana ku stadion (ay. 29).

Uga kita ibas ndalanken usaha ntah pe pendahinta kidekah enda? La banci sipungkiri melala tantangen si arus i hadapi para pelaku usaha ntah pe kalak si erdahin. Kidekah enda beragam kal jenis usaha si lit, ermajuna zaman erbeluhna manusia, erbahansa tingginya nilai kompetitif. Tapi ibas masa Pandemi Covid-19 enda, mbue kal usaha si gel-gel sukses ras berkembang, genduari enggo merosot bahkan merugi. Ibas si enda iajuk kita erlajar bagi sekalak perjuma si tetap megermet nandangi perubahen-perubahen musim guna kiniulin sinuan-sinuanna, tentu bage ka min sikap para pelaku usaha ntah pe kalak si erdahin nandangi perubahen-perubahen si terjadi genduari, khususna i era New Normal enda. Labo enda jadi alasen akhirna kita banci menghalalkan segala cara untuk tetap datken untung. Si perlu silakoken emekap tetap kreatif ras inovatif, eme si i gelari entrepreunership (mampu mengubah kotoren jadi emas), ras paling penting sipindo gegeh, kepentaren ibas Tuhan nari.

Bahan PJJ ta sekali enda mabai kita kubas sada perenungen, maka ibas kita ndahiken dahinta ntah pe mengembangken usahata arus tetap siperdiateken nilai-nilai si la bertentangen ras kata Dibata, tapi justru si pindo lalap gegeh bage pe pengertin ku Tuhan selaku Entrepreuner Agung. Ola mbuat keuntungen arah dahinta alu cara si la payo, bertentangan ras hukum bagepe merugiken kalak sideban. Harapen ras tekadta tentu pendahinta sukses bagepe usaha-usaha kita berkembang maju, sebab bage nge si ngena ate Tuhan dingen si e mabai kita jadi sekalak si erdahin alu ngusih perbahanen Tuhan e janah ulihna pe tama kiniulin banta ras tama kemulian Tuhan. Emaka perlu si inget ras silakoken bahwa dahinta la terjeng ngayaki keuntungen saja (Profit Oriented), tapi pe ngayaki kemulian Tuhan (To The Glory Of God Oriented).

Pdt. Melda Tarigan, STh

(GBKP Rg. Pontianak)

Ogen : Keluaren 34:22; 2 Korinti 9:10-11

Tema : Pestakenlah Kerja Rani (Kerja Rani)

Kerja Rani enggo me semal silakoken tep-tep tahun ibas Gerejanta, ras adi si nen pe ibas perkembangenna, melala nge perkembangen simehuli ibas pelaksanaanan Kerja Rani e. Bage pe ibas perpulungen ncidahken buah kinitekenna arah persembahen Kerja Rani si ipesehna pe enggo ermehulina. Tapi, gia bage pe lit denga nge rusur man pekenan, terlebih-lebih ibas paksa sigenduari enda i tengah-tengah krisis kegeluhen siberdampak ku ekonomi kita kerna Pandemi Covid-19. Maun turah nge penungkunen i tengah-tengah ngawan ni perpulungen, “Ibas tahun 2020 enda sibahan denga kin Kerja Raninta, adina kita ibas keadaan sulit?” Emaka tole pe penungkunenna, “Adi siban Kerja Rani uga ka pelaksanaanna, adi kidekah enda silaksanaken alu er-pesta meriah i tengah-tengah Gerejanta. Tapi genduari enda me labo banci sipestaken enda alu meriah?” Enda penungkunen-penungkunen ibas perpulungen.

Kata Dibata si jadi palas bahan renungen PJJ sekali enda kitab Keluaren 34:22, ncidahken bahwa nehken Persembahen Kerja Rani merupaken perentah Tuhan, “Pestakenlah Kerja Rani tupung kam menaken peranin buah pagendu sipemena, janah pestakenlah Wari Raya Sapo-sapo ibas pendungi tahun, tupung iperanindu buah kayundu.”

Tradisi nehken Kerja Rani ibas kalak Israel merupaken Perentah Tuhan. Bage kalak Israel mbengketi kegeluhen i taneh perpadanen (Taneh Kanaan), idalanina kegeluhenna, iusahaina taneh si ibereken man bana, emaka paksa rani iberekenna hasil pertama siterbaik sebagai persembahen Kerja Rani. Ibas Padan Si Ndekah, Kerja Rani igelari wari raya Pentakosta, eme wari pelimapuluhken kenca Paskah (wari raya guna mperingeti kuasa Tuhan ibas pembebasen bangsa Israel arah perbudaken Mesir nari). Erkiteken 50 wari eme 7 minggu emaka wari epe igelari Wari Raya Pitu Minggu. Wari Raya Pentakosta nandaken enggo dung peranin buah page. Kerja Rani encidahken pengataken bujur bangsa Israel erkiteken enggo dung peranin page. Bangsa Israel ermeriah ukur erkiteken pasu-pasu Tuhan si enggo ialokenna. Emaka icidahkenna me kinihamatenna, bagepe kepatuhenna nandangi perentah Tuhan alu maba hasil ranina. Ibas wari raya enda kerina bangsa Israel si tading ija pa pe pulung i Jerusalem, emaka tuhu-tuhu meriah kal. Ibas Padan Si Mbaru, wari Pentakosta eme wari pelimapuluhken kenca Paskah (mperingeti kekeken Tuhan Jesus ibas kematen = pembebasen anak-anak Tuhan ibas perbudaken dosa nari). Wari Pentakosta eme wari mperingeti nusurna Kesah Si Badia man ajar-ajar Tuhan Jesus. Emaka rikutken kalender gerejanta, nehken Persembahen Kerja Rani biasana ilakoken kenca Kebaktin Minggu Pentakosta.

Perentah Tuhan ibas kitab Keluaren enda ibereken man kalak Israel tupung ia lit ibas perdalanen menuju taneh Kanaan. Lenga lit tanehna, lenga lit rumahna, lenga lit jumana, sebab ia bangsa perlajang denga. Tapi Tuhan enggo menetapken maka bangsa Israel harus mpersembahken persembahen Kerja Rani. Janahna kalak Israel amina lenga ia seh ku taneh Kanaan enggo iayukenna Perentah Tuhan enda.

Arah Kata Dibata enda kita ibabai selaku warga GBKP, bagi bangsa Israel kegeluhennta pe bekas penegu-negu Tuhan. Enggo 130 tahun Berita Si Meriah seh ku kita kalak Karo. Belanda nari “ikirim” Tuhan para missionaris guna nehken Kata Dibata man banta, adi lang entah “perbegu’ denga kita genduari. Bagepe kegeluhenta pe secara pribadi kerina, mulai kin tubuh seh ngasa genduari, ibas kita ndalani perjuangen-perjuangen kegeluhennta tep-tep wari, tuhu sigejapken penemani Tuhan makana banci kita bagi sigenduari enda. Jadiken enda sebagai motivasi bagepe peringet-ingeten man banta, segelah tetap mpengasup kita hidup setia ras taat guna ndalanken perentah Tuhan, termasuk emekap nehken Persembahen Kerja Rani. Pandemi Covid-19 kidekah 3 bulan enda, ula erbahanca kita lupa kerna keleng ate Tuhan segedang-gedang kegeluhennta. Ula erbahanca kita jungut-jungut ras seolah-olah mengingkari pasu-pasu Tuhan simbelin ibas kegeluhenta. Erlajar arah bangsa Israel, setia ras displin ia ngelakoken ritual-ritual keagamaanna dalam situasi krisis sekalipun, enda dalan-dalanna ia lalap nginget Keleng Ate Tuhan ibas kegeluhenna sebagai bangsa pilihen.

Setiap perentah Tuhan ibereken man banta pasti guna kiniulinnta. Emaka alu kita mbereken persembahen Kerja Rani, enda tanda kepatuhen nandangi perentah Tuhan guna maba kiniulin bas kegeluhennta. Enda tanda pengataken bujurta kerna pasu-pasu Tuhan segedang-gedang kegeluhennta. Emaka ula kita ertaktak ibas mbereken persembahen Kerja Ranita. Si endesken enda alu meriah ukur man Tuhan arah GerejaNa. Kita percaya Gereja ipakai Tuhan guna mengelolasa segelah banci ipergunaken untuk pembarken Kata Dibata, bagepe nampati kalak simembutuhken (ncidahken Keleng Ate Tuhan).

Ula kita mbiar ibas nehken persembahen Kerja Rani. Sebab bagi Surat Paulus man perpulungen i Korinti (2 Korinti 9:10-11), maka pemenan kerina dahin (ku juma, ku kantor, ku sekolah, erbinaga, ras sidebanna) Dibata singaturkenca. Setiap proses dahin silakoken bage pe seh ku hasilna, si enda kerina Dibata kap si ngaturkenca. Kalak si melumbar mbere (mbereken persembahen) eme kap tanda kalak sipatuh nandangi perentah Tuhan, ras mbeluh ngataken bujur kerna pasu-pasu Tuhan. Kalak si bagenda ipasu-pasu Dibata ibas segala dampar kegeluhenna, jenari kalak si deban pe terberkati arah perbahanen mehuli si lakoken kita e dingen ipujina Tuhan.

Mari belajar dari filosofi “Sumur”, sebuah sumur jika dibiarkan tidak pernah dipergunakan airnya, justru air menjadi bau dan tidak berguna. Tetapi adi rusur sipergunaken launa, “diberikan” baik guna erdakan, ridi, minem, rsd, lau la pernah urak, justru tetap cukup banci ipergunaken, bagepe ibas mbereken Persembahen.

Pdt. Melda Tarigan, STh

(GBKP Rg. Pontianak)

Ogen  : Johanes 19:38-42

Thema  : Nehken Kekelengen Arah Budaya

Adi ngerana kita kerna budaya, akap kami enggo pe kita nggeluh ibas jaman kemajun enda, janah enggo bengket ibas Berita Si Meriah, labo salah dingen la mela nggit erlajar kita kerna si adi. Siman kebiarenken pepagi merga ras beru e nari ngenca tading (genduari pe beru ‘Br’ enggo mulai itadingken) ibas dirinta, apai ka pepagi adi lanai siangka ras lanai iantusi kerna ranan adat ntah pe orat nggeluhta. Kita kalak Karo enggo kap merap-marpar ku kerina penjuru doni, banci nggeluh sukses amin la pe penampat kade-kade, erkiteken sie nterem kalak Karo lanai erdiate nandangi adat Karo, terlebih alu nggejapken maka kai pe banci tembe adi lit lah duit. (Tempa-tempa lanai kita perlu anak beru erkuskas/erdakan sabap enggo mbue pangan banci ipesan; tole pe lanai kita perlu kalimbubu lampas reh ibas kerjanta guna maba osenta, erkiteken enggo mbue salon nikapkenca bulang-bulang ras tudungta). Emaka melala kita lanai sieteh tumburen guna ngayak-ngayak duit/kinibayaken/pangkat, lupa nandangi adat budaya, lupa erkade-kade, piah lanai mehamat erkalimbubu, lanai metenget/melias ersenina, ras lanai metami er anak beru. Piah dungna enggo bagi kuan-kuan Karo: “Tarum ngayak-ngayak siman tadingenken lupa siman ayaken (ersangkep nggeluh) piah dungna taneh sedepa ngenca sikerajangenta”.

Bahan PJJnta enda nuriken ibas paksa sie sekalak si tergelar Jusuf kalak Arimatea si tuhu-tuhu kagum nandangi pengajaren ras pelayanen Tuhan Jesus, tapi erbuni-buni ia kagum nandangi Tuhan Jesus erkiteken mbiar ia man kalak Jahudi. Ipindokenna man Pilatus gelah banci min ibuatna mait Jesus. Paksa sie eme persiapen wari Sabat kalak Jahudi. Erkiteken wari Sabat ibenaken kenca matawari seh ku sundutna, mait Tuhan Jesus harus mis ikuburken sope wari Sabat ibenaken. Sebab mindahken ras nguburken mait la banci ilakoken ibas wari Sabat. Jusuf kalak Arimatea enda eme anggota Mahkamah Agama Jahudi (Sanhendrin), si nentuken keputusen kerna kematen Jesus si harus ipakuken i kayu persilang. Anggota Mahkamah Agama Jahudi buena lit 71 kalak, janah paksa sie Jusuf kalak Arimatea enda ngenca si la setuju kerna ukumen si isehken man Tuhan Jesus. Ibas ia mindoken mait Tuhan Jesus e man Pilatus tuhu-tuhu ije Jusuf kalak Arimatea enda lanai iukurina kerna reputasina, erkiteken ia kalak penting. Paksa sie ise si jabatenna jadi anggota Mahkamah Agama Jahudi berarti ia kalak terpandang. Perlu ka sieteh kerina ise kalak Jahudi si menyentuh mait kalak mate berarti nggo lanai ipebadiakenna me dirina (menajiskan diri).

Bage ka pe kai siilakoken Nikodemus tuhu-tuhu resikona mberat man bana. Nikodemus ikataken ibas Kitab Johanes, ija ia ikataken ije sebage kalak Parisi ras pemimpin agama Jahudi (ertina ia pe sekalak anggota Mahkamah Agama Jahudi) si ndahi Jesus sanga tengah berngi (Joh. 3:1-21). Teridah Nikodemus enda tuhu-tuhu ras kagum nandangi biak ras pengajaren Tuhan Jesus, tapi mbiar ia tereteh teman-temanna kalak Parisi sideban. Nikodemus pe ikut ngelegi mait Jesus e. Ibabana kira-kira telu puluh kilo minak mur si isinggur ras minak gaharu.

Perlu sieteh kerina, ibas daerah Timur Tengah Kuno paksa sie, piga-piga rempah si ianggap sebage barang mewah si meherga (bnd. 1 Raj. 10:10,25; Esek. 27:17-22), khususna jenis si harus iimpor arah negeri-negeri si ndauh nari. Ibas jaman Padan Sindekah perdagangen rempah-rempah tuhu-tuhu iperdiateken pemerintahen Salomo alu mehuli. Salomo ndatken bea masuk pajak tiap kalak si ngelewati daerah kekuasanna guna maba rempah-rempah.

Perlu iterangken kami ijenda piga-piga batang mur mungkin turah i Palestina, tapi buen mur iimpor Arab ras Afrika Timur nari. Sejenis damar si leket si warnana terang enda maler arah batang-batangna. Kenca damar enda terkena udara, emaka keras me ia janah salih warnana jadi coklat. Damar mur ihancurken ras ipake guna erban balsam ras minak merim si seh kal mergana, termasuk minak badia guna upacara agama (Kel. 30:23-33). Mur pe ipake guna membalsem kalak mate, enda banci sinehen ibas ayat 39 bahan PJJnta enda.

Bage ka pe minak gaharu. Sejenis damar si merim batangna pe meganjang si turah i daerah Asia Tenggara ras India Utara, ntah tanamen gaharu si bulungna mekapal berbentuk mawar. Damar gaharu bauna seh kal merimna tapi nanamna seh kal pagitna. Gaharu ipake guna erban minak merim, tambar, ras membalsem kalak mate.

Sope mait ikuburken, biasana ibalsem alu rempah-rempah si itamaken/ibaluti alu kain puti, termasuk ije campuren mur ras gaharu. Rempah-rempah e la menahan pembusuken mait, tapi erguna sebage pembasmi bau busuk/bau macik bagepe tambar disinfeksi.

Mait Tuhan Jesus pe ibaluti alu kain putih. Janah kain putih si ibalutken ku mait Tuhan Jesus eme bahan si seh kal mergana. Erkiteken make kain putih ibas jaman Padan Sindekah merupaken sada kearusen man imam-imam (bnd. Kel. 28:39). Kerina jubah, sorban ras ikat pinggang bahanna arah kain putih nari (ibas Bahasa Indonesia ikataken kain lenan). Menurut cataten Pustaka/Alkitan pemaken kain putih (kain lenan) ihubungken ras kalak si istimewa, kalak badia. Kain putih (kain lenan) paksa sie ilambangken sebage pemere si bernilai tinggi man sekalak diberu si ikelengi sekalak dilaki.

Adi siidah arah keterangen enda, tuhu-tuhu luar biasa kai si ilakoken duana tokoh enda eme Jusuf kalak Arimatea ras Nikodemus guna nehken kehamaten man Tuhan Jesus. Man bana duana Tuhan Jesus e arus isehken kehamaten rikutken adat penguburen kalak Jahudi. Emaka inganNa ikuburken pe ibas peken (taman), kuburen pe si lenga pernah ipake, mait Jesus ibalutina alu kain putih (dagangen mbentar simeherga) janah itamakenna pe rempah-rempah rikutken adat penguburen kalak Jahudi. Ulih perbahanen Jusup kalak Arimatea ras Nikodemus enda tuhu-tuhu mereken serpang pulah ras pengapul man ajar-ajar Jesus ras sangkep nggeluh Jesus (bnd. Luk. 23:55-56).

Rikutken bahan PJJnta enda, iajuk me kita kerina selaku serayan Tuhan bage pe ngawan ni perpulungen guna nehken kekelengen ibas kegeluhenta, khususna salah sada dampar eme arah budaya ntah pe peradatenta kalak Karo. Ibas dampar kematen, bagi si ilakoken Jusup kalak Arimatea ras Nikodemus situhuna biak-biak si bage pe enggo idalanken orangtuanta ndube. Kerinana iarapken muat bagin maka banci erlayas perdalanen peradaten penguburen kalak si enggo mate. Asum runggu, icakapken me kerna wari penguburenna, ingan pulung, utang adat, inganna ikuburken, ertenah ntah pe ngayaki ras sidebanna. Tuhu, ibas dampar sienda, semalna kita selaku gereja pe muat bagin. Lit ka nge runggun si nikapken peti adi kune si mate e anggota perpulungenna. Bage pe diakonia pe sipedalan nge.

Arah sienda teridah maka arah kerina bentuk-bentuk dahin perdaten ibas kalak Karo mulai kin ibas bertin nari (ngembah manuk mbur), kenca tubuh seh anak perana/singuda-nguda, erjabu (nereh empo), kerja tahun, mengket rumah, ngelegi merga ras beru, nengget, nambari ose man orangtua, mereken ciken/kujam-kujam ras tuk-tuk, mate ras kerina berku-berkuna ku semin. Lit nge ibas kalak Karo oratna ras ranan adatna, gelah lit torosna perdalanen nggeluh (ratur bagi toros gula gajah), gia sekali ibas dampar keriahen ntah pe keguluten/ceda ate. Ibas sienda kerina tereteh maka kepeken kalak Karo enda kalak beluh, ija ia rusur rukur, “Ola sempat mindo kalak sipatut ia ngalo”. Teridah kekelengen e mbelin ibas pusuhna (em inti adat), gia pelain-lain bentukna, bagi ikataken: “keleng ate senina, adi keri page i rumah man berenken, page ibas keben pe ilegi; keleng ate anak beru (erturang) la bias bas busan bereken, tapi page ibas lebengen pe ikurkur; ras keleng ate kalimbubu benih iberekenna”.

Emaka iarapken arah bahan PJJnta sekali enda jadi me kita kalak Karo desken: “gelang sada tariken, timah sada pinuang; kerbo sada karang, jadi berkisen bunga baban ku tiga ia kerina, maka mejile nina kalak kenjahe, merim nina sikenjulu, lalit pandangen nina sikepultaken ras kesunduten; teridah ia pagi kalak siradat itengah-tengah negara-bangsa i doni enda”. Jadilah GBKP enda desken: “jabu silindung bulan, jadi ingan ngelepasken latih, beluh ngergaken jelma sinterem, njaga gelah sierga-ergan jelma sitading ije, ingan sada perarihen, rumah ingan singgah, ras nehken kekelengen”. “Jabu sendi gading, ingan sumpit ngadi, ingan pengadun jelma sinterem”. “Jabu kurung manik, rumah ingan arih-arih kerina jelma, jadi jabu perberita si meriah nandangi sangkep nggeluhna”.

Pdt. Andreas Pranata Meliala, S.Th

GBKP Rg. Cibinong