Suplemen PJJ : Tgl 07-14 Maret 2021 ; Matius 8 : 23 - 27
Nats : Matius 8 : 23 – 27
Tema : I Peteneng Jesus angin meter
Pernah i oge kami sada tulisen judulna : The God is Deat, tulisen enda nuriken sada kekecewaan penulis nadangi kecibal kegeluhen sini alamina, perbeben si rumput-umput, ertindih-tindih, enggo ka ndabuh itindih redan ras tertindih ka kotoren. La ngadi-ngadi erlebuh man Tuhan tapi perbeben e lalap la erkedungen.
Adi sibandingken ka kecibal sipaksa si alami gundari, si Covid 19 enda pe lalap la mulih-ulih ku kutana, la erngadi-ngadi pertoton ipenangkih, erlebuh man Tuhan, jore me ateta tapi reh ka banjir, meletus ka Deleng Sinabun, oh tah lanai kin ibegi Tuhan soranta erlebuh.....
Bagem perukuren ajar-ajar tupung perahu sinitumpangina ras Yesus iderpa angin meter ras galumbang si mesangat, ibas situasi sibage i ingeti ajar-ajar Yesus sisangana tertunduh: ”O Tuan, sampati min! Enggo cilaka kita!”
Dari sada sisi kuakap, kai sinilakoken ajar-ajar enggo pas, sabab i etehna kuja ia arusna erlebuh.....Sabab megati ka nge manusia ndarami/ erlebuh man sideban labo man Dibata.
Tapi Yesus la minter mpengadi angin ras Galumbang ndai, tapi justru “mempertayakan”, “mengoreksi” kiniteken ajar-ajar: ”Engkai maka kam mbiar, kurang kal tuhu kinitekenndu”(26). Mbiar tah terlalu mbiar eme tanda kurang kiniteken. Pernyatan ajar-ajar: Enggo cilaka kita!” encidahken maka kebiaren engkeleweti ajar-ajar. Ajar-ajar terlalu fokus kubas masalah sinihadapina asangken fokus nandangi kuasa Yesus si sebelumna enggo megati isaksikenna; mpepalem kalak gadamen (8:1-4 ; mpepalem suruh-suruhen perwira Roma 8:5-13 ; rstna).
Ibas sisi sideban banci siidah keleng ate Yesus si luar biasa; Angin meter, galumbang sierdeso la ngasup mpekeke Yesus, tapi Sekali sora erlebuh ajar-ajar minter ibege Yesus. Bagem me pe kepe megermet kal Yesus ndengkehken soranta erlebuh.
Arah turi-turin ipejeneng Yesus angin simeter enda me dua prinsip siperlu siinget dikune lit perbeben nggeluh:
Sipemena dari sisi TUHAN maka : “ Lenga bo keri keleng ate Tuhan, perkuah ateNa tetap nge lit, Keleng ateNa mbincar tep-tep erpagi-pagi, bali tetapna ras matawari sipultak arah Timur. (Perngandungen 3:22-23). Payo megati la siidah matawari pultak arah Timur, labo berarti ibas wari e pultah ia arah Barat, Utara atau sudut sideban atau la ia pultak wari e. Matawari tetap pultak saja perban mekapal embun sierbanca la ia teridah, bagem pe Keleng ate Dibata tetap nge lit, mekapalsa embun perbebenta maka lanai siidah maka Tuhan tuhu-tuhu erkeleng ate man banta.
Sipeduaken dari sisi kita :
“Dage kuasailah dirindu janah petenenglah ukurndu gelah ngasup kam ertoto” 1 Pet.4:7. Ibas litna silabagi ukur sipesikap perukurenta, teneng kita, “Tantangen” sijadiken jadi “Tentengen”, Ula kita terlalu reaktif, lanai sieteh tumburen, tempa tempa lanai kita erkiniteken. Inget adi sada perahu nge kita ras Yesus, mbelin kuasaNa belinen kuasaNa asangken kuasa perbeben e, emaka Lebuhlah Ia.
Pdt.IGM – GBKP Rg.Pondok Gede
