“Ngajarken Kepentaren Dibata”

 (Ulu kepentaren eme erkemalangen man Tuhan)

Kuan-kuanen 2 : 1 - 6

Tujun PA       : Gelah Mamre

1.  Meteh maka sada ngenca dalanna gelah anak jadi pentar eme erkemalangen man Dibata

2.  Ncidahken arah pengerana, perukuren ras erbahanenna maka ia jadi bapa si pentar

Kepentaren jadi modal penting ibas kegeluhen. Sabab arah kepentaren kita banci ndalani kegeluhen alu cara si tepat. Kepentaren mereken pengertin sierbahanca ngasup netapken kai si perlu ikataken, kai si banci ilakoken, kai si arus ibahan sue ras waktu bagepe carana. Kegeluhen kalak si pentar tentu jadi pasu-pasu man sekelewetna. Maka sebage kalak si erkiniteken pe, pendilo Tuhan man banta eme jadi pasu-pasu man kegeluhen enda, mpertandaken Dibata man isi doni enda. Ije me pentingna kegeluhenta pe arus dem kepentaren, gelah arah kepentaren e kita banci ndalanken simehuli jadi kiniulin man sienterem.

Kepentaren siidatken arah uluna, eme nggeluh erkemalangen man Dibata (Kuan-kuanen 1:7). Emaka kata Dibata perlu ipelajari, janah la banci ilupaken. Arus megermet/memperhatikan bagepe ngantusi kepentaren Dibata (ay 1-2). Arah Kata Dibata enda ituriken sekalak pentar, maka kerina e banci sidatken adi kita nggit daramisa alu mindo man Tuhan. Kininggiten niksiki Kata Dibata erbahanca kita ndatken pengertin. Siayaki bagi ndarami erta siterbuni. Tentu turah ukur si tuhu-tuhu tutus ndaramisa maka banci si datken. Siangkai maka pengertin arah Dibata tuhu erguna. Adi siakap labo lit ertina banta, tentu la banci si tutusi ndaramisa apaika makekenca (ay 3-5).

Ije maka sieteh ibas ay 6, kininggiten pusuhta ndarami pengertin kepentaren ‘gayung bersambut’ ras pemere Dibata banta. Adi sidarami maka Dibata merekenca banta. Sabab Dibata ulu kepentaren e si mereken pemeteh rikut pengertin. Kuncina eme erkemalangen man Dibata alu tanda kininggitenta makeken Kata Dibata ibas kegeluhen. Menjalin relasi ras Tuhan arah persekutuan si akrab, naksiken kata Dibata arah perbahanen nggeluh ras pe ngelai alu ketutusen.

Sebage Mamre GBKP, tentu sipentingna eme melatih diri gelah erkemalangen man Dibata. Sabab tugasta, eme uga ngajarken kepentaren Dibata man anakta. Gelah ia pe banci nandai Tuhan, njadiken Tuhan sebage ulu sinasana, arus leben bapa erlajar setia man Tuhan. Sabab nggeluh alu erkemalangen man Tuhan eme sada proses kegeluhen. Si la banci lang harus bertahap sidalanken. Labo instan, la ije kita ngakukenca mis jadi karakter si tetap banta. Suatu proses hidup adi sibenaken ras nggit ndalankenca maka ertambah man banta pengertin siibereken Dibata.

Sada ketedehen ate man banta selaku orang tua, eme gelah anakta jadi sekalak si pentar ibas geluhna. Emaka arus siajarken maka sada ngenca dalanna gelah anak jadi pentar, eme erkemalangen man Dibata. Bage me sidalanken lebe maka man anakta pe idatkenna ulihna. Tentuna sipeseh pngajaren e alu ncidahkenca ibas geluhta. Arah pengerana, perukuren ras erbahanenna. Sebage tanda Mmare GBKP eme bapa si pentar, si nggeluhna setia erkemalangen man Dibata. Amin.

Pdt  Deci Kita  br Sembiring

Rg GBKP Studio  Alam

“Ajar Bapa Si Meherga”

(HUT PERMATA GBKP)

1 Samuel 2 : 22-26

                   Tujun PA       : Gelah Mamre

1.  Meteh kai sebabna pengajaren Eli lanai meherga

2.  Mereken ukumen man si salah ras pujin nandangi si mehuli

Jabu merupaken sada lembaga pendidikan kiniteken si pemena ras si pentingna ibas kegeluhen manusia. Sabab tangtangna kita nggeluh, keluarga ibas jabu me siertanggung jabab ngajarken kegeluhen si mehuli. Dikune anak-anak banci nggeluh alu kebiasaan, karakter, prilaku si mehuli, perdalinen nggeluhna pe merandal, tentu jadi kebanggan man orang tua. Sebalikna adi anak gagal dididik tentu kai terjadi ibas kegeluhen anak ei pe jadi hal si erbahanca ukur orang tua ceda. Mesui ras mpeturah kemelan siakap.

          Adi siinget, jabu Hana ras Elkana cukup ndekah ertima ketubuhen sekalak anak. Kenca Tuhan masu-masu jabu Elkana arah bertin Hana, tubuh Samuel. Kenca sie sue bagi padanna man Dibata, Samuel iendeskenna jadi anak si ikut ngelai ibas rumah pertoton, alu bimbingen imam Eli (1 Samuel 1:11-2:11). Ije ituriken maka Samuel reh belinna reh ngenana ate manusia bagepe ate Dibata. tentu arah kata enda, Samuel jadi anak si megiken ajar. Ia taat nandangi Tuhan bagepe ndalanken tugas pelayananna. Samuel jadi anak si megiken ajar orang tuana ras ngusih perbahanen simehuli.

Tentu ei la jadi sada kebetulan. Samuel jadi seorang anak si disiplin dalam iman, tapi nyatanya tampilan keluarga imam Eli malah yang bertolak belakang dengan pengajaran baik. Sabab isuratken maka kegeluhen anak-anak imam Eli, la man usihen. Hofni ras Pineas nggeluh alu la bujur. Perbahanenna sitik pe la nuduhken kegeluhen kalak siniajarken kerna palas Kata Dibata, sabab tercurna gelar Tuhan arah perlagulangkanna duana.

Imam Eli banci ikataken ‘gagal’ ngajarken anak-anakna kerna Kata Dibata. Bagepe anak-anakna la njadiken pengajaren bapana jadi hal si meherga guna iikutken. Imam Eli la tegas mendisiplinkan anak-anakna ibas pengajaren si mehuli. Kedungenna mabai anakna ndabuh ku bas dosa. Pengajaren bapa ibas jabuna lanai meherga, sabab banci jadi la iberekenna usihen simehuli sue ras pelayanen si rusur ilakokenna sebage sekalak imam. La idalankenna tugas ‘keimaman’ ibas jabuna.

          Ketegasan tentu berbeda dengan kekerasan. Melala orangtua erpengakap maka ngajarken anak harus keras, kasar, galak, marah. Nuduhken gegeh tah pe citra diri selaku orangtua si patut ibegiken ajar katana. Tapi kedungenna keras si la erturi-turin, misalna sipersingeti anakta si erbahan salah alu tan si ngerana, memukul, mencubit, menampar. Atau memarahi dengan kata-kata kasar, makian dan bentakan. Padahal lenga lit sibahan ketegasan kerna apai si benar apai si salah. Kai konsekuensina tah pe ulihna si tetap la jelas man anak-anakta. La siperdiateken keperlunna ibas komunikasi sue usia bagepe situasina.

Ketegasan iperlukan komitmen ras konsistensi. Bagepe tetap peka nandangi kai si terjadi ras mengutamakan kebutuhan anak. Man anak si kitik denga ras remaja. tentu beda cara nuduhken ketegasan e. Ibas nehken ajar si mehuli, man anak iperluken arahan ras alasan si logis. Kata-kata siipake pe arus membangun memotivasi, la guna ndabuhken anak gelah orangtua teridah lebih pintar, lebih tahu dan berkuasa. Arus memandang dua sisi. Dikune anak erbahan salah apai ka sada hal si pernah iajarken ras ipersingeti bana, maka patut anak iukum. Ukumen pe tentu ula encedai pusuhna tah pe fisikna saja, arus ukumen si mpeturah pengertin bana. Persingetilah alu kekelengen. Pilih waktu ras cara si tepat. Tandana kita peduli man anak.

Ula lupa ka sebalikna, adi anak ndalanken ajar, meherga akapna ndalanken pedah maka bereken ka pujin nandangi si mehuli si enggo ilakokenna. Sibereken tanda maka kai siniajarken e erpalasken keleng ate gelah aturen si patut, idalankenna ulihna pe mehuli man bana. Enda me gunana ketegasan gelah sikap kepemimpinan sekalak bapa sebage orang tua, tuhu-tuhu banci tetap mereken usihen si mehuli. Efek jera man anak seh kel pentingna, tapi mari sibereken alu tanggung jabab ras keleng ate si tetap tegas.

Khususna dalam rangka njadiken Mamre sekalak bapa si mereken pengajaren meherga man anak usia PERMATA. Tentu perlu sijadiken PERMATA sebage teman arih guna ndalanken si mehuli. Kai siisuanken gundari enda erbuah ibas kegeluhenna wari pepagi. PERMATA perlu ndatken usihen, maka marilah Mamre GBKP tetap ndalanken peran sebage bapa, la saja man anak sinipupus, tapi jadi usihen man anak gerejanta, kerina PERMATA siikelengi Tuhan. Amin.

Pdt  Deci Kita  br Sembiring

Rg GBKP Studio  Alam

Ogen  : Jeremia 9 : 23-24

Tema : “Ermegah Ate Erkiteken Tuhan”

(Menumbuhkan rasa kebanggan Mamre sebagai warga GBKP serta menurunkannya kepada anak)

Tujun : 1.  Meteh maka palas kemegahen nandangi Tuhan

 2.  Ngasup ia nusurkenca kemegahen e man anak jabuna eme nandangi gereja GBKP enda

Ku ise nge biasana kalak ndarami pemeteh? Tentu ku kalak si lit ibas ia kepentaren. Iarapken kepentaren si lit, mereken petunjuk nggeluh, guna meteh kai si arus ilakoken. Ku ise nge biasana kalak ndarami penampat? Tentu ku kalak si lit ibas ia gegeh kengasupen. Gelahna arah gegeh si lit banci nampati kalak si kote. Ku ise nge biasana kalak ndarami jaminen kerna kai siiperluken? Banci ka ku kalak si lit ibas ia kebayaken. Pemere kalak bayak, banci njamini kegeluhen kalak si perlu.

Payo nge maka keperlunta ndarami pemeteh, penampat, ras jaminen, mabai kita minter ndarami kalak si deban si iidah kita lit bas ia siniperluken e. Tapi perlu si inget, manusia la serta/sempurna ibas makeken kai si lit ibas dirina, adi terjeng ngarapken gegehna jine. Labo kerina manusia beluh makeken si lit bas ia, guna kiniulun kegeluhenna ras sekelewetna. Emaka tetap perlu proses erlajar guna ‘melatih diri’ gelahna kerina simehuli si lit ibas dirinta, banci ipakeken alu maksimal.

Arah Kata Dibata, isingetken man banta, maka kerina bagin kegeluhen subuk kepentaren, gegeh, kinibayaken, sada pe ula sempat erbahanca dirinta ermegah nandangi kerinana. Sabab labo lit ertina kerina sie, adi la nandai ras meteh ulu sinasana eme Dibata. Arah sie maka kemegahen si tuhu-tuhu eme, adi banci kita nandai Tuhan Dibata. Sabab manusia, tentu la ngasup mereken kebujuren ras kebenaren si serta. Lenga tentu mabai tanda nggeluh simpehaga Dibata

Jeremia ngingetken bangsa e gelahna la erpenalemen man gegeh si deban, subuk ibas ndalanken upacara keagamaan, bagepe ku bangsa-bangsa si lit isekelewetna. Tantangen pelayanen Jeremia si mbelin eme guna ngajuk bangsa e, gelah tek nandangi Dibata. Jangan berpaling dari Tuhan dan mengejar ilah lain bahkan jika hanya untuk membanggakan diri dalam apa yang dimiliki kemudian melupakan Tuhan. Emaka ikataken labo lit erti kemegahen seakaten ernalem man Tuhan arah keleng ateNa, si nuduhken keadilen ras kebenaren. Siingetlah maka dikune kerina si mehuli lit ibas kita, e semata-mata labo kerna kinibeluhen mausia. Kerina e reh ibas perkuah ateNa kap man banta. Enda jadi palas kegeluhenta kalak si tek, kemegahenta eme ibas penandai ku Tuhan Dibata.

Sebage Mamre GBKP, bapa itengah jabu ras gereja, gereja eme wadah/inganta menumbuhkan pengenalan nandangi Tuhan. Ermegah kita sabab banci siidah kegeluhen si ersaksi maka adi kita jadi kalak si pentar erpemeteh, ergegeh rikut bayak ibas kai-kai pe, kerina e rehna ibas Dibata. Si enggo encidahken keleng ateNa banta, nuduhken dalin si man bentasen. Pengenalan akan Tuhan eme si pentingna, jadi palas kegeluhenta. Gelah siangkai ras sieteh ija nari rehna kerina si lit ibas kita, maka perlu tetap meteruk rukur. Adi la kerna Dibata si merekenca tentu la kap atan kita ngalokenca rikut makekenca. Erpenandai kerna Dibata janah ermegah ibas IA, eme ‘warisan’ si mehergana ku anak kempunta. Gegeh banci urak, pemeteh banci lesap, kebayaken banci bene, tapi keleng ate ras penandainta nandangi Tuhan ulu kerinana, kemegahen si la erkeri-kerin. Amin.

Pdt  Deci Kita  br Sembiring

Rg GBKP Studio  Alam