Suplemen PJJ : Roma 5:1-5 ; Tgl 12-18 September 2021

REMBAK RAS DIBATA ERKITEKEN KINITEKEN

Roma  5 : 1 – 5 

(Teologi Paulus Kerna Kiniteken)

I.       Kata Perlebe

Selaku tinepa Dibata, kerina manusia ngarap, nura ras mejehe gelah banci rembak ras Dibata. Rembak ras Dibata labo ngerana kerna jarak tapi kerna pembenaran. Gelah manusia banci nggeluh ersada mulihi rasa Dibata. Uga carana gelah manusia banci ersada ras Dibata? Erbage-bage perukuren, upaya ras cara ibahan manusia gelah banci rembak/ ibenarken i lebe-lebe Dibata. Lit mperembak dirina ku Dibata alu ndalanken undang-undang/ peraturen. Lit mperembakken dirina arah erbahan persembahen-persembahen ras ritual misalna cibal-cibalen/ sesajen. Lit ka deba arah erbahan si mehuli sebage sada dalan mpepulung jasa ras pahala. Kerina cara-cara enda erpalasken ras berpusat ku bas perbahanen, gegeh, kebeluhen ras kengasupen manusia. Uga kita kalak Kristen banci rembak ras Dibata? Kai nina Pustaka Si Badia, secara khusus bas teologi rasul Paulus?                            

II.   Penjelasen Kata Dibata

 Manusia perdosa iperembakken (dibenarkan) Dibata kempak diriNa labo erkiteken pendahin ras kengasupenna. Kerina manusia erdosa i lebe-lebe Dibata. Kalak Jahudi erdosa erkiteken la ngasup ndalanken Undang-Undang/ Taurat. Kalak si la Jahudi pe erdosa i lebe-lebe Dibata erkiteken la ndalanken pusuh peratenna alu payo. Tek man Jesus Kristus me dalanna ras carana manusia rembak (dibenarkan) ras Dibata. Enda me si ituriken rasul Paulus ibas Roma 1:16 seh 4:25. Labo erkiteken gegeh, pemeteh ras beluh manusia maka ia banci rembak ras Dibata. Kerina kalak perdosa banci ngaloken pengalemen dosa arah pengorbanen Kristus i kayu persilang. Pengalemi dosa enda ibereken alu la nggalar man kalak perdosa erkiteken ia tek man Jesus Kristus (bdk. Joh. 13:6). Dibata mereken Jesus Kristus jadi juruselamat man manusia perdosa. Erkiteken Kristus maka manusia enggo itebusi, dosa-dosana enggo ialemi Dibata (bdk. Efesus 1:7). Kalak si tek ngaloken lias ate Dibata si erbahanca ia rembak ras Dibata (bdk. Ef. 2:8, 9).    

 Paulus nuriken ulih (konsekuensi) kalak si irembakken mulihi ras Dibata. Pemena, iperdameken ras Dibata arah Tuhan Jesus Kristus (5:1). Jesus me kelang-kelang si mpersada mulihi hubungen Dibata ras manusia perdosa. Payo nggeluh dame e lenga inanami alu sempurna ibas kegeluhen gundari. Si e pagi inanami alu lengkap tupung kerehen Tuhan Jesus peduakaliken. Nggeluh dame enda imungkinken erkiteken kalak perdosa nggo banci ndatken dalan masuk ku bas lias ate Dibata. Peduaken, kita nggeluh ras ringan ibas lias ate Dibata (5:2). Erkiteken si e meriah ukurta sabab lit pengarapenta maka kita ikut dat bagin ibas kemulian Dibata. Peteluken, banci ermegah ibas kiniseranta sabab arah kiniseranta turah me saber ate (ayat 3). Arah kita saber ateta teridah maka kita enggo menang ibas pengujin. Janah erkiteken kita enggo menang ibas pengujin, lit pengarapenta si labo erbahanca kecewa (ayat 4, 5).   

III.     Pengkenaina

1.        Ope Kristus Jesus reh ku doni enda kita manusia nggeluh perimbang/ ermusuhen ras Dibata. Manusia ermusuhen ras Dibata erkiteken dosa ras kesalahenta. Kenca manusia ndabuh ku bas dosa, kerina si ibahan manusia la payo i lebe-lebe Dibata. Dosa mpetubuh dosa si deban. Dosa eranak ras erkempuken dosa. Kita lanai ngasup mulahi dirita ibas kuasa dosa nari. Kita lanai ngasup erdame ras nggeluh dame ras Dibata. Alu bage ukumen si rasa lalap eme kematen jadi sekerajangenta. ‘Upah dosa e me kematen’ (Roma 6:23a). ‘Andiko, cilaka me tuhu aku! Ise nge si mulahi aku i bas biak kematen nari?’ (Roma 7:24).

2.        Tema: “Rembak ras Dibata Erkiteken Kiniteken.” Puji Tuhan kita iperembakken mulihi ras Dibata. Kita iperdameken mulihi ras Tuhan. Kita ibenarken ntah pe ipersada mulihi ras Dibata. Ndube kita enggo sirang ras ermusuhen ras Tuhan erkiteken dosa, nduari kita ipersada ras erdameken erkiteken Kristus eme arah kinitekenta. Puji Tuhan, ibahanNa serpang pulah nangdangi dosa-dosata. Lit arapen nggeluh dingen erdame ras Dibata. Dibata me si ngukuri (berinisiatif), erbahan cara ras dalan (berprakarsa ras berkarya) lako mulahi manusia i bas dosa ras kematen si rasa lalap nari. Labo Dibata si perlu erdame ras manusia tapi manusia si erdosa nge si perlu erdame ras Dibata. Janah Jesus Kristus reh lako ndameken manusia ras Dibata. ‘‘Kukataken bujur man Dibata si mulahi aku arah Jesus Kristus Tuhanta’ (Roma 7:25a).  

3.        Kita enggo irembakken mulihi ras Dibata i bas Kristus. Kita enggo nggeluh i bas dame ras perdamen ras Dibata. Kita ipersada ras Dibata mulihi labo alu erga si murah, erga obral tapi alu erga si seh kal ergana si la terbeligai alu duit, erta/ kinibayaken. Kita idameken alu dareh Kristus si mate i kayu persilang (bandingken 1 Petrus 1:18-20). Erkiteken si e ola anggap enteng, remeh ras sepele nangdangi erga perdamen si ibahan Dibata man banta. Ola la ergaken lias ras perkuah ate Dibata si enggo iberekenNa arah Kristus Jesus man banta. Tapi mehergalah si akap dingen si ergakenlah perdamen si enggo si aloken kita e.

4.        Carata ngergaken kerembakkenta mulihi ras Dibata i bas Kristus e me alu encidahken kepatuhen si tetap man Dibata. Tetaplah gelem kinitekenta man Tuhan Jesus alu enteguh. Ola kal sempat mobah kinitekenta seakatan man Tuhanta Jesus Kristus. Ola kari erkiteken lit kiniseran ras jumpa perbeben kita minter salih kinitekenta. Ola erkiteken Covid `9 ras dampakna lanai ateta tutus erkiniteken man Jesus Kristus. Ola erkiteken erta, tahta ras wanita (kesenangen doni) si kentisik si pulahi kinitekenta man Kristus. Si gelemlah pengarapenta alu enteguh.

5.        Ciri-ciri kalak si enggo rembak ras Dibata erkiteken kinitekenna eme:

sipemena, nggeluh ibas dame. Sipeduaken, ngasup ermeriah ukur aminna jumpa ras ikenai kiniseran. Sabab tek kita Dibata pasti nampati kita. La pernah kita ipediatNa si sada ngalaken tantangen ras perbeben geluhta. Sipeteluken, arah kiniseran turah saber ateta. Peempatken, tahan ujin. Kalak si saber eme tanda tahan uji. Sipelimaken, lit pengarapenta si la pernah mengecewaken. Amin.

 Pdt. Juris Tarigan, M.Th (GBKP RG Bogor)