Nats   : Matius 12:33-37

Thema

Ibas wari pendungi kerina arus i pertanggung jawabken

1.    Eskatologi salah sada mpelajari tentang wari pendukung/akhir zaman. Bagi kai nina Tuhan Yesus Aku lawes nikapken ingan, kenca enggo mulihken ngalo-ngalo kam, gelah ija aku ije kampe.(band Yoh 14:2-3). Janah nina Malekat man ajar-ajar Yesus : O kalak Galilea, ngkai maka kam tedis natap ku langit ? Bagi enggo idah du Jesus iangkat ku Sorga, bage ka ia pagi reh mulihken àKis Ras 1:11

Endame piga-piga ayat mendukung guna nuriken man kalak si erkiniteken maka Yesus reh ka mulihken guna ngalo-ngalo kalak si enggo tek, janah tetap tek seh mate nape. Yesus la pernah erbual kai si  enggo i padankenNa kerina itepatiNa. Emaka man banta kalak Kristen perlu kal sipersiapken dirinta guna ngalo-ngalo akhir zaman e, gelah reh pe pagi Yesus ndai kita siap ikut ras Ia, gelah ija Ia kitape ije

2.    Matius 12:33-37

Hal enda ngingetken man kerina kalak kristen gelah tehna kuga harusna sebagai kalak si erkiniteken man Yesus : ibahan Yesus sada gambaren batang ras buahna. Batang si mehuli maka lit buahna  si mehuli, adi batang la mehuli maka buahna pe la mehuli, sebab arah buah itandai batangna. Membuktiken kalak si erkiniteken man Yesus maka teridah arah perbahanen ( band Yakub 2:17)

Emaka banci si tandai ia kalak si tek eme ibas ia ndalani geluhna erbahan perbahanenna si mehuli, bagepe ngerana ia lemah lembut, janah meriah ukurna erbahan si mehuli dingen nampati kalak si kekurangen. Perbahanen si mehuli eme tujuan kalak sitek, ras perbahanen si lamehuli eme tujuan kalak jahat. Emaka ibas kita nimai kerehen Tuhan Yesus si peduakaliken e maka kita menjaga dirinta, gelah ula kari kita bagi kesusuren nipe si jahat (ular beludak). Adi kesusuren nipe sijahat maka sikap geluhna lalit sitekpe simehuli, janah lalap mencari kepentingenna sendiri, ketenangenna sendiri, Ia ngukuri kalak si deban. Bahken lalap lit sura-surana guna menghancurken kalak si deban. Bagi ular beludak, kai pe atena ipanna, bahkan adi lanai lit pangan maka anakna pe ipanna, sesama nipe pe ipanna.

Tapi baik kalak si mehuli bagepe kalak jahat maka lit pagi paksana pengadilen eme kerehen Yesus si peduakaliken, janah harus pagi ipertanggung jawabken ibas wari pendungi e.(ay 36). Janah arah kai si dalanken me kita iadili. Kata-kata si enggo ndarat arah babah kita lanai banci i tarik mulihi, emaka adi enggo sempat terbelasken ranan si lapayo e maka semasih lit denga kesempatenta maka kita harus bertobat, ngakui sa kerina ope denga Ia reh. Janah ulanaika si ulihi kata-kata si lamehuli. Pertobaten eme ibas nimai kerehenNa guna ndungi doni enda. Lalit untungna man petani adi buah batang kayu si suanna e buahna la mehuli, bagepe Yesus lapernah ngarapken buahta la mehuli, tapi buahta min meramis, entebu, emaka kita ajar-ajarNa.(band yoh 15:8), enda membangun masa depanta ras masa depan kalak si deban, ras arah buahta si mehuli e, eme kemulian Dibata si beritaken arah geluhta, seh Ia reh pagi si pedualiken

Selamat Er PJJ

Pdt Anadarias Brahmana .

Nats   : Kuan-kuanen 3:9-10

Thema  :

 Mehamatlah Man Tuhan

(Pentakosta ras Kerja Rani)

1.    Minggu enda si cakapken kerna wari Raya Pentakosta sekaligus KerjRrani. Janah si jadi Temana eme mehamatlah man Tuhan. Perayaan pentakosta enda lit hubungenna ras ngerayaken Kerja Rani, ija Dibata ngataken man umatNa maka ibas ngerayaken wari ke lima puluh. Ibas tradisi kalak Jahudi perayaan wari ke lima puluh e sedalan ras pesta Kerja Rani. Nina Tuhan: beligai pitu minggu kenca i persembahkenndu pungo gandum si pemena ndai, dage ibas wari si pe lima puluhken, eme sada wari kenca lepas wari sabat si pepituken, bahan ka persembahen gandum si mbaru man Tuhan (Imamat 23:15-16)

Tradisi si endaka me maka kita mengadopsi perayaan e, tapi lebih asa si e maka Yesus ngataken man ajar-ajarNa gelah nima kesah penampat e i Jerusalem. Emaka kenca Yesus Nangkih ku surga 10 warina nusur me kesah si badia e, ngkuasai ajar-ajarna, janah erpalasken si enda maka kai si ikataken Yesus kerina tepatina. Per rasul 2:1-4

Erpalasken kuasa kesah si badia ndai ajar-ajar i demiNa, emaka ajar-ajar pe erkhotbah ngataken man jelma si lit i je paksa e (15 negara cakap) janah kerina ngantusi kai si belasken ajar-ajar e.

2.    Mehamat man Tuhan sada hal si wajib kel si lakoken erkiteken si eteh maka kerina si lit ibas kegeluhen enda bekas tinepaNa ras perbahanenNa bas kegeluhenta enda. Tapi kini hamatenta e la ngenca terjeng arah dirinta saja, tapi arah kerinana (totalitas), eme arah nehken persembahen pengataken bujur man Tuhan eme: Ulih Juma Simehulina Kal Man Tuhan.

Engkai maka kita nehken persembahen e man Tuhan:

a.    Erkiteken kita pe bekas tinepana

b.    Erkiteken kai si lit bas kita e eme erkiteken Dibata njadikenca

c.    Kita pe dat pasu-pasu, sehat, suka cita erkiteken Dibata

d.    Gelah Dibata tetap masu-masu juma ras usahanta

-        Dem lumbung alu gandum

-        Sampur lau anggur

Seh maka lanai siat ingan munikenca. Ajaib ras luar biasa perbahanen Dibata nandangi kita kerina, ija kepeken Dibata mereken si mehuli man anak-anakNa

3.    Ibas minggu tanggal 7 Juni 2019 enggo itetapken Modramen GBKP sebagai minggu Kerja Rani, tentuna kita Runggun enggo ngaturkenca Jadwal ndigan si lakoken Kerja Raninta. Tapi perlu si eteh maka kerja rani salah sada kegiaten Gerejanta GBKP si isemarakken, bahkan lit deba erbahanca ipadu ras budaya, erkiteken Kerja Rani salah sada kegiaten gerejanta GBKP nampati pendapaten se GBKP  mulai runggun nari seh ku synode. Emaka mari si cakapken kuga tehnisna kita ngaloken kerja raninta. Janah kita ka mendukung lewat daya doa dan dana. Baik arah hasil pertanianta, arah hasil usahanta bage pe arah pendapatenta sidebanna. (karyawan pemerintah teh swasta).

Si penting ula kaita sitading-tading sebab kerina silit bas kita e eme pemere Dibata

Selamat Erkerja Rani

Pdt Andarias  Brahmana

Nats : Masmur 112:1-10

Tema :

“Jabu Si Ipasu-Pasu Dibata”

Apai penungkunen si benar: kai sumber kemalemen ate kegeluhen manusia? Atau ise sumber kemalemen ate kegeluhen manusia? Penungkunen si ipilih menentuken warna, pilihen, ras tujun kegeluhen manusia. Lit si milih penungkunen si pertama. Tapi lit ka nge manusia si milih penungkunen si peduaken. Kepeken penulis Masmur 112 enda lebih condong milih penungkunen si peduaken. Maka kai si banci erbanca malem ate manusia labo erta tapi manusia ntah pe pribadi, tapi labo pribadi manusia, tapi pribadi Tuhan jine. Mbue rusur terjadi maka erban tujun kegeluhenna guna ndarami sumber kemalemen ate geluhna ibas kai, eme benda ras materi. Ibutuhken kebijaksanan nggeluh gelah kalak banci nehi sada tahap kesadaren maka situhuna si banci erbanca malem ate kalak nggeluh i doni enda eme Tuhan Dibata jine. Mungkin enda me sebabna ibas Kitab Injil ikataken maka darami lebe Kinirajan Surga ras kerinana gelah sidebanna itambahkenna man banta. Kesadaren nggeluh bagenda me siniangkatken kita ibas bahan PA enda.

Judul Masmur enda “Kemalemen ate kalak bujur”. Masmur enda termasuk cukup gendek, 10 ayat ngenca. Kenca lit kata-kata “Pujilah TUHAN!”, selanjutna Masmur enda ibas ayat 1 ilanjutken alu penetapen kerna kai sumber kemalemen ate manusia. Menurut penetapen ayat 1 enda, sumber kemalemen ate manusia lit dua, eme adi kalak erkemalangen man Tuhan ras ndalanken perintahNa. Adi manusia ngelakoken si dua enda ndai maka turah me piga-piga hasil si la terjeng berlaku man dirina saja, tapi pe man kalak sideban. Misalna, ibas ayat 2 ikataken maka anak-anak kalak si erkuasa i negeri, kesusurenna ipasu-pasu me pagi. La terjeng sie saja, isi jabuna jadi kalak bayak namura. Jabu ijenda banci ipahami secara harfiah eme rumah/jabu ingan tading, tapi pe banci ipahami sebage jabu kesusuren. Adi ipahami ibas pengertin enda, maka pasu-pasu e berkelanjuten ras berkepanjangen, sebab mencakup jabu kesusuren. La terjeng erta kebayaken, tapi pe kiniulin tetap ngarak-ngarak ia segegang geluhna. Kalak si bagenda me si la pernah kena bahaya; kalak bujur biasana eme kalak si perkeleng. Malem kal ate kalak si melumbar pepinjamken, dingen bujur ibas kerina urusen; kalak si bagenda nggit nampati kalak sideban janah la bermaksud meneken kalak ibas ia nampati sebab ia bujur ibas kerina urusen. Selanjutna ikataken maka kalak si bagenda asa ndigan pe la guling ia tetap iinget rasa lalap. Bagi nina peribahasa “gajah mati meninggalkan gading, harimau mati meninggalkan belang, manusia mati meninggalkan nama, apakah itu nama baik atau nama buruk”. Kalak si bagenda ikataken teneng ia ndalani kegeluhen, sie kerina erkiteken ia tek man Tuhan. Enda me sebabna ia alu teneng ngadapi musuh-musuhna janah la ia mbiar dingen la aru atena. Kalak si bagenda eme kalak si melumbar man kalak si kekurangen. Gegeh ras wibawana reh belinna. Tapi amin bage gia, enda me kinata kegeluhen: lalap nge lit kalak isekelewetta si cian nandangi kualitas kegeluhen kalak si bagenda. Enda me kalak jahat. La ia banci ngida keberhasilen ras prestasi nggeluh kalak si benar. Kalak jahat ngidah si e janah gara atena, erderik ipenna perbahan nembehna atena. Emaka masap me ia, jenari bene pengarapenna.

Kita kerina pasti erpengarapen gelah ipasu-pasu Tuhan. Bahkan labo terjeng sie tapi kerina kesusurenta. Kunci kegeluhen si bage ikataken Pemasmur alu menekanken prinsip, kita ermalem ate adi kita erkemalangen man Tuhan, nggit ngelakoken perintahNa. Dibata masu-masu kita ras kesusurenta adi kita erkemalangen man Tuhan janah pusuhta ndeher ibas KataNa janah ngelakoken sura-suraNa. Kinatana siakap cukup alu terjeng erngena ate nandangi KataNa tapi la erdalan guna ngelakokenca. Kalak si erngena ate nandangi undang-undang Tuhan pasti erngena ate nandangi kebujuren ras kebenarenNa janah la ngadi seh ije saja tapi ia pasti mperjuangken ras ngelakokenca. Sie berarti si terpenting ibas kegeluhen kalak si erkemalangen man Tuhan eme sura-sura Tuhan harus terlaksana ibas doni enda.

Enda ka pe si itekanken Pemasmur, kemalemen ate kalak bujur terjadi adi ia ras kesusurenna jadi generasi kalak bujur. Generasi kalak bujur pasti ipasu-pasu Tuhan ibereken kecukupen, ras kiniulin. Alu tujun guna ngelakoken kebujuren ras kebenaren arah pusuh ras tindaken si mencerminken kekelengen man teman manusia ras kerina tinepa. Janah guna jadi generasi kalak bujur si kin kesusurenna ipasu-pasu mulailah alu maba diri ras anak jabunta jadi jabu si ersada ibas ndalanken perintah Tuhan. Mari arahken anak jabunta nandai Tuhan ras ngelakoken sura-sura Tuhan. Gundari nari pastikenlah maka anak jabunta ipasu-pasu Tuhan guna ndalanken sura-sura Tuhan i doni enda.

Anak  jabu eme kalak si seh kal deherna ras kita. Erkiteken ndeher e erbanca hubungen si intensif janah mpeturah erbage-bage perasan. Erbage-bage perasan e, misalna keleng ate, kecewa, butuh, merawa, tedeh, kepate, rsd. Hubungen ibas keluarga memang dem alu dinamika. Anak ras orangtua, perbulangen ras ndehara, kaka ras agi, permain ras simetuana, ibarat naruh ibas sada keranjang. Ndeher kal ia erkiteken sie me banci ia saling berbenturan. Tapi tetap saling membutuhken ras sikeleng-kelengen. Mereka ribut meskipun rukun, mereka rukun meskipun ribut. Enda me keluarga. Tuhan Jesus nuruh kalak si atena ngikutken Ia alu mersan silang. Silang ise si perlu si persan? Melala kalak akapna e eme silang Kristus. Padahal labo sie maksudna (bnd. Luk. 9:23). Silang si perlu si persan labo silang Kristus, tapi silangta jine. Ngkai Tuhan Jesus nuruh kita mersan silangta masing-masing? Kai maksudna? Silang eme lambang penderitan lebih tepatna eme lambang penderitan sebage pengorbanen. Lalit kalak si atena ngaloken penderitan. Tapi, kinatana ibas geluh enda lalit kalak si la ngaloken penderitan. Penderitan lit sebage bagin kegeluhenta ibas erbage-bage bentuk si berbeda. Kegeluhen jabu pe bage lit si erbanca meriah ukur lit ka si lang. Pinakit, bencana, ntah pe persoalen rumah tangga eme bagin-bagin si kurang meriah man tatapen. Kita la banci nilah arah bagin-bagin si kurang meriah man tatapen enda. La banci ntabehna saja ateta ndalani kegeluhen enda. Bagepe bagin-bagin si la ntabeh e pe perlu si persan. Enda me silangta. Bayangken seh kal beratna beban perasan orangtua si anak la bagi ukur. Tiap wari orangtua enda mersan beban si kin erbage-bage macam perasan nandangi anakna e. Beban perasan enda me silang si harus ipersan. Keluarga sideban pe ngadapi silang si bentukna berbeda ka ras keluarganta. Lenga sada bulan pe ia ngiani rumahna si mbaru. Rumah enda eme hasil kerja keras selama 10 tahun lebih. Tapi lenga ndekah iiani nggo kebakaren. Kerina erta keri ipan api. Gundari harus ka ia mbenai kegeluhen mulai dari nol. Ibas kegeluhen enda memang mbue erbage-bage silang. Tiap keluarga lit silangna masing-masing. Lit keluarga si seh kal akapkan getemna erkiteken ersura-sura lit min anak kutengah jabuna, sebalikna lit keluarga si mbue anakna, tapi perbahanen anakna sada pe la bagi ukur. Lit ndehara si tertekan batin erkiteken perbulangenna la setia. Lit anak mulai kin kitik-kitik nari nggo tadingken bapana, lit ka pe anak lit bapana tapi bapana dahinna minem-minem lalap. Lit ndehara si mbaru denga mupus anakna si pertama, tapi seminggu kenca idilo Dibata ka perbulangenna erkiteken kecelakaan. Lit perbulangen si tiap bulan harus naruhken ndeharana cuci darah janah kerina gajina ipake guna pertambar ndeharana. Adi bage ngidah keluarga sideban, mungkin rukur kita seh kal beruntungna keluarga e, la ngadapi perbeben. Memang darat nari tempa biasa-biasa saja, tempa lalit persoalen. Tapi, situhuna tiap keluarga lit persoalenna jine.

Pdt. Andreas Pranata Meliala

GBKP Rg. Cibinong