Invocatio      : “Pindolah, tentu ngalo me kam; Daramilah, tentu idatndu; Tuktuklah, tentu italangi pintun man bandu”(Mat 7 : 7)

Khotbah       : I Tesalonika 1 : 2 - 7

Tema

Ertoto ras Erdahin

I. Kata Perlebe

 Sada semboyan Latin si cukup terkenal ibas St. Benedict : “Ora et Labora; Berdoa dan Bekerja” enda rusur sibelasken ibas kegeluhenta selaku anak-anak Dibata. Enda pe jadi gelementa ibas ndalani tanggungjawab ras pendahinnta sitep-tep wari. Ija kita selaku manusia sue ras keberadaan jamanta genduari ituntut guna terus erdahin, tapi labo ka e ngatakenca maka banci silupaken tanggungjawab kinitekenta selaku manusia si terbatas eme ertoto man Dibata (ersembah man Dibata). Melala siidah ibas kinata maka erkiteken kesibuken ibas pendahin, lanai ingetna Dibata; Wari-wari epe akapna enggo kurang mbue; wari minggu epe lanai sempat lako ersembah man Dibata. Kalak si sadar maka kegeluhenna eme pemere Dibata, dingen sadar pe ia maka terbatas kel kengasupenna ibas ndalani kegeluhenna bagepe ndahiken dahinna tentu labo ia lupa tetap mindo gegeh ras kepentaren man Dibata, subuk arah toto bagepe ersembah ibas tep-tep kesempaten si lit.

II. Isi

Tesalonika eme ibukota Makedoni sipaksa e lit iteruh jajahen kekaisaren Roma. Perpulungen e eme bekas panteken Paulus ras Silas, tapi erkiteken cian ras nembeh ate kalak Yahudi sebab Paulus ras Silas berhasil ibas nehken pengajaren man perpulungen emaka ibahanna perlawanen. Erkiteken si e Paulus ras Silas lawes nadingken Tesalonika lawes ku Berea. Perpulungen enda ibas perkembangennya jadi perpulungen situhu-tuhu ngasup mereken usihen man perpulungen si deban si lit isekeleweta (ay. 7). Aminna pe perpulungen ibas paksa arus ngenanami kiniseran ras penindasen tapi Berita si Meriah e tetap banci ipembarken. Paulus arah suratna enda ersura-sura mpegeghi ras mpetetap ukur perpulungen segelah tetap nggeluh ibas kiniteken man Dibata dingen setia ibas ndalanken sura-sura Dibata. Ipujiken Paulus pe perpulungen enda erkiteken kiniteken ras kekelengenna (ay. 1). Kinigenggengen perpulungen ibas ngalaken kiniseran, kesetiaan encidahken kiniteken arah perbahanen, kinilatihen erdahin erkiteken keleng ate ras ketetapen ukur erpengarapen man Dibata e banci jadi erkiteken ulih Pendahin Kesah si Badia. La lit sitik pe Paulus mujiken bana kerna pendahinna ibas meritaken Berita si Meriah man perpulungen Tesalonika. Siidah kuga Dibata erdahin mpetangkas kuasa ras kemulianna dikune erdahin ras ertoto enda tetap sibahan jadi motto geluhta selaku anak-anak Dibata. Paulus idahikenna dahinna lako meritaken Berita Si Meriah itengah-tengah tantangen ras perlawanen ibas kalak Yahudi nari, bagepe la ia lupa guna tetap notoken dahin siidahikenna e segelah alu gegeh ras penampat Kesah si Badia mereken ulih simehuli (ay. 3). Gegeh ras kengasupenna ndahiken dahinta e banci saja erbaleng, tapi lit gegeh ras kuasa simbelin si erdahin radu ras kita, arah pertotonta, eme gegeh Dibatanta.

Matius 7:7 sijadi bahan invocationta eme bagin ibas khotbah Jesus iuruk sinuriken kerna karakter ras jati diri selaku anak-anak Dibata. Khususna ibas perikop enda eme kerna ertoto. Ertoto eme kesah kegeluhen kalak si erkiniteken, emaka kalak si lanai ertoto berarti kinitekenna mate. Lit 3 hal sijadi penekanen ibas ayat enda eme ; 1). Pindolah, ertina lit kesadarenta ras kinitekenta maka Dibata tetap megiken pertotonta, 2). Daramilah, nuduhken kerna pemindon situhu-tuhu si rehna ibas pusuh nari alu palas kesetiaan ras kepatuhen man Dibata, 3). Tuktuklah, mengacu kubas ketutusen ras kesetiaan guna tetap ertoto man Dibata amin pe kai sijadi sura-suranta e lenga tersehi.

III. Pengkenaina

1. Erdahin eme kearusen nggeluh selaku anak-anak Dibata. La ngena ate Dibata anak-anakna nggeluh ibas kekurangen, emaka kegeluhen enda arus tetap siperjuangken arah pendahinnta. Tapi arus maka siinget pendahin e eme pemere Dibata labo Dibata. Sebab melala gundari anak-anak Dibata erkiteken pendahin lanai er-Dibata; ngayak-ngayak pendahin lanai lit waktu guna ersembah/ ertoto man Dibata; ngayak-ngayak pendahin (kesuksesen/jabaten) piah cara sikugapape idalanken aminna pe lanai bagi sura-sura Tuhan.

2. Ertoto eme gambaren relasinta ras Dibata. Ertoto eme salah sada cara pengungkapen kinitekenta. Emaka ibas ertoto sipindolah kai si banci mpebelin kinitekenta man Dibata, labo kai sijadi sura-suranta saja. Melala anak-anak Tuhan si kecewa kerna ulih pertotonta sebab kai siipindona e la sue ras sura-sura Dibata.

3. Ertoto eme salah sada caranta guna mpersiapken dirinta pe ibas ngaloken kai saja pe siterjadi ibas kegeluhen enda. Kalak siertoto sope erdahin enggo memiliki modal guna ngalo-ngalo sikugapana pe. Amin pe bagi ukur, la e erbahanca ia meganjang rukur, anem pe la bagi ukur la ka e erbahanca ia surut ibas kiniteken man Dibata.

4. Ertoto ras Erdahin. Pertoton e jadi palasta guna banci ndahiken dahinta alu payo, mehuli ras sikap. Banci kap sibandingken ibas kita ndahiken dahinta ibenai alu pertoton ras lang. Emaka anak-anak Dibata sitetap ibas pertoton, pendahinna pe enggo pasti sikap; arah pendahinna ia jadi pasu-pasu dingen ibahanna pendahinna e pe jadi dalan guna naksiken kerna kemuliaan Dibata.

5. Ora Et Labora; totoken dahinndu, dahiken ka kai siitotokenndu e.

Pdt. Elba Barus

GBKP Runggun Bandung Timur

Invocatio      : “ertotolah kerna aku gelah banci aku ngerana alu mehuli, maka banci kupetangkas rahasia e bagi patutna” (Kol. 4:4)

Nats   : 2 Timotius 2:1-7

Thema

Notoken Laskar Kristus

Lit 2 sikap/dampak  si rusur siidah ibas kegeluhen  tupung manusia ngenanami kiniseran, sipemena manusia reh rembakna ras Dibata, si peduaken manusia reh ndauhna ras Dibata. 

Timotius ibas kinigudanna muat bagin guna meritaken berita si meriah, tupung rasul Paulus ibas penjara.  Tapi aminna pe rasul Paulus ibas penjara, ia tetap mengikuti perdalanen  pelayanen Timotius, janah rasul Paulus pe ngeteh maka melala kal tantangen si arus ialaken Timotius ibas ndahiken dahin pelayanenna.  Jadi sebagai rasul ras teman sepelayanan Timotius si lebih metua, Rasul Paulus tetap mpersingeti ras mpegegehi Timotius  alu surat. Janah renungenta berngi enda merupaken bagin surat sipeduaken si itulis Rasul Paulus man Timotius.

Ibas pengogenta, Rasul Paulus menyapa Timotius alu panggilan “anakku”, enda nuduhken maka Rasul Paulus ras Timotius memiliki hubungen sindeher. Jadi, pasti keleng kel ate Rasul Paulus nandangi Timotius bagi sekalak bapa si ngekelengi anakna. Tentuna kerina persinget e ertujun gelah Timotius selamat (megegeh ras megenggeng) ibas ngalaken tantangen-tantangen sireh. 

Ibas bagin suratna pe banci siidah maka Rasul Paulus menekanken kembali kerna kesetiaan ras ketutusen ibas ndalanken tanggung jawab eme tetap nerusken pengajaren si enggo pernah i begi ras ialoken Timotius guna  ipeseh ka tole man kalak sideban (ay.2). Enda nuduhken maka dahin Berita Si Meriah la banci ngadi I ipembarken aminna pe melala tantangen sibakal ras siarus ialaken Timotius. Tangtangen bagepe kiniseran labo hal si arus ihindari, tapi arus ialaken ras ihadapi (ay.3, …ikutlah) erkiteken kiniseran ras tantangen e merupaken proses si arus ialaken guna banci ndatken ulih. Kecibal e igambarken Rasul Paulus bali bagi:

·         Ay. 4: sekalak Laskar si sangana ertugas si arus focus ras patuh nandangi perintah gelah ngena ate komandanna. Timotius eme Laskar ras komandanna eme Dibata. Jadi guna nerusken dahin mberitaken berita Simeriah ibas doni enda ibarat bagi laskar sisangana erperang. Tentuna keselamaten Laskar e, labo terjeng hanya erkiteken keahlian ntah pe pemeteh ibas erperang, tapi pe arus tetap focus ras patuh man pimpinen.  Musuh pasti lalap ndarami kelemahen ras kesalahennta. Tapi enda labo hal si patut jadi kebiaren erkiteken pimpinenta eme Dibata, sindauh lebih erkuasa asangken kerina manusia bas doni enda, si pasti uga kita banci tetap menyenangken Tuhanta selaku komandanta.

·         Ay.5: sekalak siikut bas perlomban siarus patuh nandangi peraturen-peraturen bas perlomban.  Sekalak atlit sope lenga erlumba, pasti melala ndatken pelatihen-pelatihen. Keahlian tidak didapatka alu proses si singkat tapi ndekah. Kenca siap erlumba, sekalak siikut bas perlumban pe arus ka nge ia nggit patuh ibas peraturen-peraturen perlumban. Jadi la cukup alu kebeluhen tapi pe arus patuh man kerina peraturen-peraturen. Timotius singuda denga pe, arus tetap ngasup njagai dirina alu kepatuhen man aturen-aturen Dibata. La cukup hanya terampil tapi pe arus njagai dirina ndalanken aturen-aturen bas perlumban e. Tetap jujur, la erbahan kecurangen bagepe setia.

·         Ay.6: Sekalak perjuma si arus latih erdahin gelah banci ngaloken uih ibas juma e nari. Hal sipaling menyenangkan bagepe si paling inantiken sekalak perjuma eme masa rani. Tentuna gelah banci rani, sekalak perjuma arus erbintuas lebe ibas nuanken benih. Kenca isuanken, ijagai, ipelihara erkiteken melala ka nge tangatangen subuk ibas cuaca, bagepe hama sierbahanca benih sienggo isuan e banci turah she erbuah.  Sie ilakoken ibas waktu sindekah. Sebab labo banci kenca isuanken pepagi mis iperani. Perjuma arus metenget kerna kai si ibutuhken sinuan-sinuanna. Bagi mpebelin-belin sekalak anak. Tapi kerina kelatihen ras pengorbanen e, sai igalari alu keriahen paksa rani.

Jadi arah telu profesi enda banci siidah maka kerinana labo terlepas ibas perjuangan bas ndalani proses guna ndatken ulih si mehuli.  Guna ndatken ulih simehuli labo terlepas ibas proses si mehuli.

Terakhir,  Paulus ngataken maka persinget bagepe pengajaren siisehkenna man Timotius, arus iukuri ras iperdiateken guna I dalanken alu pengertin si enggo ibereken Dibata.

Tentuna kita banci ngidah maka sebagai Laskar Kristus perlu dukungen guna ndalanken tugas panggilenna. Secara umum, kerina kita eme Laskar Kristus si ertanggung jawab guna ncidahken  identitasta sebagai Laskar Kritus si maba berita Si meriah man doni enda. Secara khusus, Laskar Kritus eme kalak si nggit idilo secara khusus (pdt/pt/dk), terlebih enggo ka terpilih serayan Tuhan ibas periode si mbaru enda. Uga caranta mempersiapkan dirinta bagepe encidahken dukungenta? Tentuna selain persiapen ibas dirinta sendiri, maka kita kerina pe arus sitoto-toton bagi bahan invocatiota (kol.4:4) Erkiteken doni enda eme medan peperangen, arena perlomban bagepe juma si jadi inganta berkarya.

Pdt. Sripinta br Ginting

GBKP Runggun Cileungsi

Invocatio      : Ertoto aku gelah arah persadannta kalak si erkiniteken mabai kita ku pengertin si terbagesen kerna kerina pemere si ialoken kita ibas kegeluhenta erkiteken persadanta ras Kristus (Pilemon 1:6)

Khotbah     : Epesus 6:18-20

Thema

 Njagai Geluh Perpulungen Arah Pertoton

Epesus 6:18-19 atena ncidahken maka kegeluhen Kristen harus ijaga ras ipekena-kena erkiteken ngadapi kuasa jahat ibas doni si sangana ngerintak kita ibas Tuhan nari. Tapi bagin enda la termasuk ibas rangkaian perlengkapen senjata Dibata/senjata rohani bagi ibas perikop enda.

Pertoton la ipake terjeng perlu ngenca tapi berhubungen kukerina totalitas kegeluhen manusia. Alu kata sideban, toto merupaken bagin kegeluhen manusia eme kerohanianna/kinitekenna si ipersiapken guna jadi kalak Kristen si megegeh ras bertumbuh ibas kiniteken. Enda me alasen ngkai pertoton mindo guna kalak si badia termasuk Paulus, la imasukken  bagin ibas perlengkapen senjata Dibata/senjata rohani. Toto eme kesah kegeluhen kalak Kristen (nafas orang percaya). Kalak si erkiniteken i doni enda sadar kerna pentingna toto erkiteken ianggap sebage hubungen inti ras utama si mendasar antara manusia ras Dibata. Erkiteken sie, tiap agama pasti lit, ncakapken ras tuhu-tuhu menekanken toto alu erbage-bage macam bentukna/modelna.

Ibas bahan khotbah pekan wari peteluken enda, Paulus ngajarken mulihi kerna toto man perpulungen Epesus, “Bahanlah sie kerina alu ertoto, mindo penampat man Dibata. Ertotolah ibas bukuna alu kuasa Kesah. Erkiteken sie erjaga-jaga dingen tutuslah kam ibas ertoto”. Adi ilakoken alu salah maka pertoton e la seh ku Dibata tapi kuasa sideban eme setan si njabapsa sue keperlun si notokenca tapi labo arah sumber si tuhu-tuhu. Kedungenna, pertoton e malah erbahanca ndauh sirang ibas Tuhan nari, makin brutal, liar bagepe egois ibas nehken pertotonna. Alu bage, pertoton si salah banci mabai manusia erdosa.

Epesus 6 mbukaken konsep pertoton si seharusna lit ibas perukuren kalak Kristen eme: pertama, “ertotolah ibas bukuna alu kuasa Kesah”. Alu kata sideban, pertoton kalak Kristen harus ipimpin, ibimbing bagepe ibereken pencerahen arah Kesah Si Badia janah labo banci ate-atena saja. Kalak Kristen seharusna ertoto guna kepentingen Kesah, sue ras biak Kesah ras ndalanken kerina biak Dibata ibas diri kalak si ertoto e. Pustaka ngajarken maka justru erkiteken Tuhan si tading ibas diri manusia, nggo meteh kerina keperlunna maka ia harus ertoto sue ras sura-suraNa. Alu bage, pertoton kalak Kristen berbeda secara total ras kerina konsep pertoton i doni enda. Adi kalak Kristen lenga ngasup ngidah perbedan enda, berarti ia lenga ertoto secara Kristen. Sanga anak Tuhan ertoto, Dibata Si Telu Sada terlibat ije. Tuhan Jesus ngajarken maka kalak Kristen harus ertoto man Dibata Bapa i surga, ibas gelar Anak eme Jesus Kristus. Perintah e ncidahken struktur Dibata Sitelu Sada si memposisiken Dibata oknum peduaken sebage mediator ibas kerina pertoton kalak Kristen. Erkiteken sie, adi la arah Kristus lalit pertoton si seh ku Dibata Bapa. Kerna peranan Kesah Si Badia Roma 8:26 ngataken, “Bage me pe Kesah Dibata reh nampati kita, kita si kote enda. Sabap la sieteh kuga arusna kita ertoto; Kesah e me ertoto kerna kita man Dibata alu kelsehen si la terbelasken”. Enda me rumusen sah ras lengkap bagepe harus ilakoken erkiteken Tuhan jine si netapkenca. Sanga kalak Kristen ertoto, pembabai Kesah Si Badia ibas dirina ngajari ia seh maka ietehna kai si harus itotoken ras metenget nandangi sura-suraNa. Penerapen struktur enda harus secara tepat ras la banci iputarbalikken erkiteken enda me identitas pertotok kalak Kristen si banci ipertanggungjawapken.

Peduaken,  “ertotolah rusur”. Pertoton kalak Kristen si tuhu-tuhu berbeda ras pertoton secara umum i doni enda si ertoto terjeng lit perluna saja. Kerina kegeluhen Kristen si tuhu-tuhu situhuna merupaken hubungen komunikasi ras Dibata. Enda me pertoton si tuhu-tuhu si jadi gegeh spiritualitas Kekristenan. Tapi pertoton Kristen labo terjeng ritual agama tapi hubungen Kesah antara sada pribadi ras pribadi sideban. Melala kalak atena meteh sura-sura Tuhan tapi lalap ia la nggit erbahan hubungen si megegeh ras Tuhan e. Selain sie, pertoton Kristen la perlu nimai seh waktuna guna reh ku gereja tapi ija pe ras ndigan pe erkiteken komunikasi ras Dibata ilakoken secara Kesah ras kebenaren.

Peteluken, “ertotolah rusur guna kerina anak-anak Dibata”. Sinimaksud ijenda anak-anak Dibata eme kerina anak Tuhan. Pertoton sibagenda igelari Sapaat, si merupaken hak istimewa ras pendilo man kerina anak Tuhan ija sekalak pendoa syafaat terpanggil jadi imam iadepen Dibata guna mewakili kerina anak Tuhan. Enda me fungsi imam si ibereken Tuhan man kalak Kristen. Situhuna manusia la berhak guna notoken dirina jine erkiteken Tuhan nggo meteh kerina keperlunna. Selain sie, Tuhan labo ngelupaken janjiNa janah pasti nepatisa erkiteken memang bage kin hakNa. Adi la ikabulken pertotonta e pe hak Dibata. Pustaka ngajarken maka si terbaik eme ertoto ras bergumul alu pusuh si mbagesna nari guna kepentingen kerina anak Tuhan antara lain pertumbuhen kiniteken ras penggenapen rencana Dibata ibas dirina. Alu kata sideban, kerina anak Tuhan harus saling notoken sada ras sidebanna. Akibatna, terjadi me biak saling mperdiateken ras ngukurken kai si mehuli man temanna manusia seh maka lit ije terbangun kekelengen. Enda me carana mbangun kiniersadan kula ni Kristus. Adi tiap anak Tuhan terjeng ngukurken dirina saja emaka kedungenna sirang me ia. Padahal pertoton situhu-tuhu merupaken usihen Tuhan Jesus sebage juru syafaat ibas kawes Dibata Bapa si lalap ertoto man kerina perpulungen. Mbue konsep agama ras filsafat doni ngajarken pertoton si egois, Pustaka justru ngajarken pertoton sapaat ras pertoton guna Berita Si Meriah (Pekabaran Injil) i doni enda.

Peempatken, “janah ertoto pe man gunangku, gelah ibereken Dibata man bangku kata-kata si payo adi aku ngerana, dingen gelah pang aku ngerana dingen mpetangkas rahasia Berita Si Meriah e”. Ibas konteks enda, Paulus la mindo itotoken guna kepentingenna jine. Memang ia mengalami mbue kesusahen, peniksan ras penderitan janah lalap ia keluar masuk penjara. Tapi lit ibas diri Paulus jiwa si ngukurken sura-sura Dibata. Enda me pertoton si tuhu-tuhu ija si notoken tedeh atena guna mewujudken isi pusuh Tuhan ibas kegeluhenna ibas doni enda seh maka terjadi kesamaan visi antara Bapa i surga ras diri Paulus. Paulus ngataken bage erkiteken ia merasa lenga sempurna, khususna kebiarenna sanga ia ibas penjara. Tapi pertoton si tuhu-tuhu ngasup menghadirken Kinirajan Dibata ibas doni enda.

Pdt. Andreas Pranata S. Meliala, S.Th

GBKP Rg. Cibinong