Suplemen PA Mamre : Kuan-Kuanen 11:24-25 ; Tgl 16-22 Juni 2019

Nats : Kuan-Kuanen 11:24-25

 Tema :

“Melumbar Ibas Nampati”

Sisampat-sampaten eme tanggung jawab kalak si erkiniteken ibas geluhna. Sabap Dibata nepa manusia, labo gelah nggeluh sisada-sisada ntah pe terjeng ras kelompokna saja ngenca. Manusia itepa labo guna rukur kerna dirina saja ngenca. Ibas masyarakat urban kita ibabai guna jadi mandiri ntah pe la bergantung nandangi ise pe. Konsep sie tentu saja payo. Mulai kin danak-danak nari kita perlu sitik-sitik erlajar mandiri. Mandiri berarti bebas ibas pengawasen, pengaruh, campur tangan, bagepe penampat arah kalak sideban nari. Kalak si mandiri banci erban keputusen sendiri, njaga diri sendiri, bagepe ncukupi keperlun sendiri. Kerina kalak pada dasarna atena mandiri. Tapi, amin pe kita nggit janah ngasup mandiri, mustahil kita banci mandiri ibas kerinana. Ibas hal-hal tertentu kita pe bergantung nandangi kalak sideban. Nggeluh eme kesalingtergantungen bagepe sisampat-sampaten.

Kitab Kuan-Kuanen merupaken kumpulen tulisen alu erbage-bage gaya si berbeda-beda. Kinierbagen enda ncidahken ruang lingkup si luas ibas masyal Ibrani si biasa iterjemahken ‘Amsal/Kuan-Kuanen’ ibas bahasa Indonesia/Karo. Kata masyal mungkin ibuat ibas akar kata si berarti ‘menyerupai’ ntah pe ‘dibandingkan dengan’. Jadi, Amsal/Kuan-Kuanen bena-benana mungkin merupaken semacam perbandingen, bagi si rusur si idah ibas Padan Sindekah: “Ranan mehuli desken tengguli, entebu nanamna, tama kejuah-juahen man kula” (Kuan. 16:24). Hikmat Ibrani eme seni guna nehi keberhasilen janah Kitab Kuan-Kuanen eme buku petunjuk guna nggeluh si berhasil. Alu mengutip ras melukisken kebiasan geluh si negatif ras positif, Kitab Kuan-Kuanen njelasken perbahanen si benar ras salah ibas erbage keadan. Ibassa memang lalit keterangen kerna sejarah Israel ras tema-tema mbelin nubuat nabi-nabi (misalna perpadanen). Tapi labo maka penulisna la mperdiateken hal-hal sie. Malah, tujunna eme guna menerapken prinsip-prinsip kiniteken perpadanen Israel ibas sikap ras pengalamen tep-tep wari. Undang-undang kekelengen (Im. 19:18; Ul. 6:5; Mrk. 12:29-31) merupaken inti si seh kal pentingna ibas Padan Sindekah ras Kitab Kuan-Kuanen berfungsi sebage penjelasen si luas kerna hal sie. Tiap kalak Israel natap Undang-Undang Dibata sebage kewajipen bersyarat si menuntut kesetian ras dem kepatuhen. Hal enda ndeher kal ras konsep kerna erkemalangen man Tuhan sebage bena-benana pemeteh (Kuan. 1:7; 2:5; 9:10; Jop 28:28; Msm. 111:10). Hampir seri ras penandai kerna Dibata bagi si itekanken ibas Kitab Nabi-Nabi, kewajipen enda merupaken kesadaren guna mereken Dibata mengisi ibas tiap segi kegeluhen. Tujun utama Kitab Kuan-Kuanen eme guna njelasken alu teliti ras tepat janah mesunah iinget, kai si imaksud alu siap ngelai Dibata.

Alu tangkas arah bahan ogen ituriken maka kalak si erkiniteken harus njadiken maka melumbar mere man kalak sideban harus jadi sada biak ibas geluhna. Melumbar man kalak sideban labo njadiken manusia reh musilna. Kai siangkatken Kitab Kuan-Kuanen 11:24-25 petembil ras caranta rukur. Semalna kalak si melala iamburkenna erta-ertana pasti urak ibas ia, janah kalak sibunikenna kinibayakenna pasti la urak ertana. Secara kegeluhen doni payo bage. Sebalikna, kalak si pengarapenna erpalasken keleng ate Dibata, la ia mbiar ibas nampati kalak sideban. Aminna pe ituriken maka kalak si melumbar e pasti itambahken Dibata kinibayakenna, labo e saja ngenca palasna man bana. Sabap lit palas sideban simabai ia melumbar mere ras nampati, eme tanda keleng man kalak sideban. Emaka labo lit kebiarenna ras kearun ate ibas ia aminna gia ia harus nampati kalak sideban. Sabap ibas kiniteken ras pengarapenna tek ia maka Dibata pasti nikapken si mehuli man bana.

Mulai kin nai nari gereja ncikep paguh prinsip nggeluh kesalingtergantungen ntah pe sisampat-sampaten (bnd. Gal. 6:2). Nats enda merupaken lanjuten perikopna sinidatas kerna pola kegeluhen rikutken Kesah Si Badia (buah-buah Roh Gal. 5:22-23). Hubungen antara dua kutipen enda ncidahken maka pola kegeluhen sisampat-sampaten merupaken implikasi arah pendahin Kesah Si Badia. Misi kegeluhenta labo terjeng nampati kalak sideban, tapi pe nggit isampati kalak sideban. Kita nggeluh labo terjeng man kalak sideban, tapi pe arah kalak sideban. Enda me pengertin sisampat-sampaten ras kesalingtergantungen. Ibas kita melumbar e kepeken nggo leben Tuhanta Jesus Kristus melumbar man banta kerina alu mereken kesahNa man banta kerina.

Ibas kita mere e palasna eme kap kekelengen Tuhan Jesus si nggo leben sialoken. Alu kekelengen Tuhan Jesus si la terbatas e, Tuhan Jesus nebusi manusia si nggeluh ibas sada kemusilen mendasar, eme ibas dosa, iserapken arah tinepana nari. Penebusen e eme karya Kristus si seh kal bayakna, si seh kal melumbarna man banta. Nggit Ia jadi musil, nusur ku doni enda gelah kita jadi bayak. Pengidah kami labo pernah kalak si melumbar ibas dahin pelayanen gereja kemalun ibahan Dibata. Malah mbue erbage-bage idatken pemere ibas Tuhan nari rezeki si simpar. Nggeluh reh tenengna. Keluarga pe nggeluh dame. Kalak pe erngena ate man bana. Sie kerina igejapkenna erkiteken pemere Tuhan e labo man bana ngenca ibereken, tapi pe harus ipepaler man kalak si memerluken. Melumbar ibas nampati labo arah kiniganjangen ukur tapi tuhu-tuhu nggejapken perkuah ate Tuhan si mbelin e. Emaka metedeh lah lalap ateta nampati kalak. Sebab nampati nggo jadi gaya hidup man banta. Mere labo reh musilna, la mere labo ka reh bayakna.

Pdt. Andreas Pranata Meliala

         GBKP Rg. Cibinong