Nats   : Markus 16:19-20

Thema :

Beritakenlah

1. Bena kata

Kerna Kenangkihen Tuhan Yesus  ku surga salah sada wari-wari sipenting ibas gereja kurang kal ndat ken perhatian ibas gereja, beda Natal ras Paskah. Sementara kenangkihen TUHAN ku surga e situhuna punya makna si luar biasa, erkiteken kenangkihen ku surga e. Ia (YESUS) nikapken ingan man kita kalak si enggo tek man bana bagepe sekaligus mendewasaken murid muridna gelah pang nehken sura sura Dibata/kekelengenna ku doni enda terutama manusia. Emaka kenca ia enggo ngajari ajar ajarna 3 tahun ras kenca ia keke lit 40 wari nari ia ras ajar ajarNa emaka Ia nangkih ku surga.

2. Uraian nats

Markus 16:19-20, kenca enggo Tuhan Yesus keke ibas simate nari, ia njumpai ajar ajarNa, guna ncidahken dirina maka Ia tuhu-tuhu keke ibas simate nari (Mark 16:9-18), bagepe Yesus ngajak ajar-ajarNa man, sebap enggo isikapkenNa api guna nutunng ikan (Yoh 21:12-13), tentuna enda mereken keyakinan man ajar-ajarNa maka kai pe langasup naluken Ia ras pengikutNa sebab kematen sendiri langasup nalukenca. Arah maka Yesus enggo cukup ncidahken pengajaren-pengajarenNa man ajar-ajarNa umpamana, arah Yesus pepalem kalak sakit, mere man lima ribu kalak, pegeluh kalak mate bagepe erbage bage hal sienggo i bahan yesus. Emaka arah kai sienggo ibahanNa, maka enggo cukup modal ajar-ajar guna nerusken missi i doni enda. Emaka ope denga Ia nangkih i jumpaina ajar-ajarNa dingen ibabana ku uruk zaitun, janah ijenda Yesus ngutus ajar-ajarNa  gelah meritaken berita si meriah kubelang-belang doni enda dingen Yesus njamin maka ajar-ajar ndatken gegeh ibas Ia nari, aku ras kam seh kedungen jaman (Mat 28:16-20, Per.Ras 1:8). Si idah maka: kenca Tuhan Yesus ngerana man ajar-ajarNa, ertina Yesus  membekali ia terus alu nuriken maka ula tadingken kuta Jerusalem, ras reh me pagi penampat (Per.Ras 1:5). Penguatan terus adi la itadingken Jerusalem e, bagepe kita tetap ndatken penguatan adi tetap kita ringan ibas ingan sibadia. Emaka kenca yesus nangkih ku surga maka mulai me ajar-ajar e erberita kujapape,  ertina ajar-ajar (Gereja) harus erberita man kerina manusia. Emaka teridahkal tuhu kuasa Dibata erdahin arah ajar-ajarNa :

-          Tuhan nampati ia/nampati gereja/kita

-          Tuhan radu ras ia/kita gereja ndahiken dahin e, emaka la mbiar

-          Tuhan nge si erbahanca ajar ajar/gereja/kita ngasup erberita ijape, sepanjang nggeluh ras tek man Tuhan e.

-          Dibata erban melala mujizat/tanda sengget arah ajar ajar/gereja bagepe kita lalit si metahat ibas dibata

3. Pengkenaina

Tuhan Yesus nangkih ku Surga, guna nikapken ingan man banta gelah ibas ingan e pagi kita ras Yesus. Bagepe Kenangkihen Tuhan Yesus ngingetken kita maka dewasa kita, ras terusken kal sienggo ibahanna. Amninna gia la si idah ia tapi malem ateta erkiteken kita tek (Yoh 20:29). Injil labo ngadi aminna pe ia enggo nangkih, malahen reh mbarna pe ibabai ajar-ajarna, tentuna man banta bagepe tetap sebagai gereja harus terus erberita ku belang-belang doni enda. Tanpa kecuali semua wajib mendengarkan injil itu. Bagepe tentuna enggo melala si gejapken perbahanen Dibata, dingen tand sengget enggo sidatken, emaka kita me sebagai saluran mujizat e nandangi manusia. Man kita gereja, terutama warga GBKP, situhuna kalak Karo enggo me begina BSME, tapi aminna bage gia labo ngadi missi GBKP terus bas doni enda, sebap hakta min GBKP simalem ijapa pe labanci hadir : Sumatera, Jawa, Sulawesi, Kehmantan Nusa Tenggara, Ambon Papua, enda me tugasta si terbuka denga guna siterusken kita terus semangat ras menyemangati kalak bagepe para penginjil-penginjil ta kerina. Pdt, Pt, Dk ras jemaat GBKP. Inget, kuga ia nangkih ku surga maka bage ka me ia pagi rah ngalo-ngalo kita kerina. ( Perb.Ras 1:10-11)

SELAMAT  ER-PJJ

Pdt Andarias Brahmana

Tema Umum  : Erdasa ras Erpengarapen I Bas Ertoto (bdk. Perb. 1:1-4)

Invocatio      : Alu meseksek mindo aku man ba-Ndu, cidahken bangku perkuah ate-Ndu sue ras si enggo ipadanken-Ndu (Masmur 119:58)

Khotbah       : Lukas 18:1-8

Tema

Megenggeng I Bas Ertoto

Kata Penaruh

Enda me wari terakhir kita erbahan Pekan Doa Tahun enda, kenca iawali alu 3 wari Pra- pekan doanta  tahun enda, ertina enggo melala kita ngerana kerna ertoto.

Nina Calvin : toto eme kesah kalak Kristen.  Ungkapen enda ngataken man banta maka  la banci kegeluhen kalak Kristen ipesirang ras toto. Adi iandingken toto e seri ras kesah e ertina  berhubungen ras ‘kegeluhen’, kalak si nggeluh eme kalak si erkesah tapi kalak si la erkesah e me kalak mate.  Alu bage  seteh  maka toto e seh kel perluna, la banci isirangken ras kegeluhen kalak  Kristen.

Pelaksanaan Pekan Doanta enda salah sada eme uga maka “kita nggeluh ibas pertoton ras pertotonta e nggeluh ibas kita”, alu bage seh kita kubas tema umum Pekan Doanta :”Ersada ras Erpengarapen Ibas ertoto” alu bage kerina warga GBKP lit ibas sada hubungen rohani si iiket alu pertoton.

Tema terakhir  10 wari ertoto tahun enda eme Megenggeng i bas Ertoto, kai kin ulihna adi kita megenggeng ibas ertoto ?

Ngragari Kata Dibata

Ay. 1. Ertoto Persuruhen  Jesus

Jesus selaku Anak Dibata tuhu-tuhu menyadari maka pertoton e seh kel pentingna. Mengawali pelayanen-Na kenca IA iperidiken,  40 wari-40 berngi  IA membangun hubungen si intensif ras Bapa si nuruh IA (Mat.4:1-11). Jesus ibas ndalanken pelayanena  si melala kel tantangen ras siman dahinken, lalap ibaba-Na ibas pertoton-Na. Sebab igejapken-Na adi la kin IA mindo gegeh ku Bapa-Na labo IA ngasup ndalanken kerina dahin penyelamaten doni enda.

Mbue ayat-ayat Alkitab si nuriken maka ertoto e persuruhen Tuhan Jesus, misalna :

-          Matius 7:7 “Mindo, ndarami dingen nuktuk”

-          Lukas 26:41 “Erjaga dingen ertotolah gelah ola kam ndabuh ku bas percuban. Ukur manusia mehuli kap tapi kote kap dagingna!

-          Lukas 11 :5-10 “Meseksek Mindo”

-          Matius 6:5-15

-          Rsd

Man banta selaku pengikut Jesus seharusna kai siikataken Jesus harus si dalanken, adi lang labo kita tuhu  “pengikut” si setia. Bage ka me pe ibas ayat enda Jesus ngajari ajar-ajar-Na gelah ertoto, sebab ieteh Jesus labo lalap IA ras ajar-ajar nerusken dahin pebelangken berita si meriah. Ibas dampar si deban Jesus meteh uga beratna tantangen dahin pebelangken berita si meriah e. Jesus ngajari ajar-ajar ertoto gelah ula peltep pengarapenna.

Tentu enda ka me pe si harus si dalanken selaku pengikut Kristus. Tantangen geluh wari lepas wari tuhu erberatna,  baik ibas ncukupken keperlun nggeluh, buena sakit-pinakit kerina e banci berimbas kuba kiniteken, erkiteken sie “megenggenglah kita ibas eroto, lah kita pe ula peltep pengarapen (putus asa).

Ay.2-7 Hakim Si La Bujur vs Dibata Si Bujur

Mbue kalak kisat ertoto, erkiteken akapna e lalit gunana, buang-bunag energi ras waktu. Lit kalak si erpengakap kai pe teh Tuhan nge, sebab lit ka kin ayat Alkitab si ngataken maka “ope denga ipindondu enggo leben ieteh Bapandu kai si iperlukendu (Mat.6:8). Ijenda Jesus ngerana kerna uga kita arus eroto gelah ula mulih-ulih, japi mbue kalak nangkap ertina sepenggel saja, seh ia kubas sada kesimpulen adi enggo ieteh Dibata kai kita perlu man kai kita mindo.

Jesus erbahan perumpamaan uga sekalak hakim si la erkemalangen man Dibata dingen la erkeleng ate man manusia, si merasa terganggu erkiteken sekalak diberu si enggo mbalu mindo penampat gelah perkarana ras imbangna idungi, seh maka aminna pe ia la erkemalangen man Dibata dingen la erkeleng ate man manusia  dungan tergerak ukurna lako ndungi perkarana e, sebab mbiar ia irauk diberu balu-balu e.

Hakim si la bujur ras la erkeleng ate man manusia pe nggit ia mereken kai siipindo diberu balu-balu ndai gelah idungi perkarana ras imbangna, apai ka Dibata si bujur, tentu labo itimaina maka IA terganggu ras mbiar irauk maka ibereken-Na kai siipindo kita.

Arah perumpamaan enda Jesus ngataken man ajar-ajarNa maka labo  lit pertoton si la ibegikrn Tuhan, alu bage labo lit pertoton si sia-sia. Sekaligus enda ngataken man banta maka ertoto e labo buang-buang waktu ras enegi. Emaka megenggenglah ibas ertoto Tuhan pasti mereken jawaben si tepat ibas waktu si tepat, erkiteken kebujurenNa.

Ay.8. Ertoto tanda bukti Kiniteken

Salah sada erbahan kalak  kisat ertoto erkiteken la ia tek nangdangi pertotonna, sebab pertoton e berhumbungen kel ras kiniteken. Pertoton tanpa ibarengi ras kiniteken seri nge ras mantra-mantra (toto hafalen, rutinitas) tanpa roh eme  pertoton si mate.  Pertoton si labo ilandasi alu kiniteken labo ngerehken si mehuli.

Pertoton e labo kepe berhubungen ras mindo kerna keperlun-keperlun nggeluh. Pertoton e berhubungen kubas keselamaten. Lit kebiaren Jesus ibas kerehen Anak Manusia si isuruh Dibata e  lit denga nge pagi erkiniteken i doni enda, sebab kune lang kerina bengket ku neraka.

Ertoto ras kiniteken e berhubungen erat la banci ipisahken jadi labo perlu sibahan penungkunen apai nge lebe, erkiniteken lebe maka ertoto entah ertoto lebe maka turah kiniteken ?  adi menurut kami seri ras kalak si erlajar naik sepeda “sambil erdalan menjaga keseimbangen”, sebab labo banci si jaga keseimbangen sepeda adi la erdalan,adi bage uga pe  lalap nge guling, adi erdalan saja la jaga keseimbangen mis kel kita  ndabuh ku parik. Bage me pe ibas ertoto  ibas kita ertoto erpaguhna kinitekenta ibas erpaguhna kinitekenta erulina pertotonta.

Megenggenglah ibas ertoto seh maka paguh kinitekenta, alu bage ngasup kita bengket kubas rancangen Tuhan ras ngaloken kerina jawaben Tuhan e si terbaik man banta.

Pointer Aplikasi

1.    Ertoto eme persuruhen Tuhan

2.    Setiap pertoton pasti ngerehken ulih si mehuli

3.    Pertoton e labo saja ibas konteks pemenuhun keperlun geluh, tapi pe maba kita kubas si ngena ate Tuhan.

Pdt. Saul Ginting

GBKP Runggun Bekasi

Invocatio      : “Pertoton Daud. O Tuhan, dengkehkenlah pemindonku kerna kinibujuren, perdiatekenlah pertotonku mindo penampat! Begikenlah pertotonku, i bas biberku nari si la lit i je penipu” (Masmur 17:1)

Khotbah       : Pilipi 4:6-8

Tema

“Ertoto Mpegegehi Kula, Ukur ras Tendi!”

I.        PENDAHULUAN

Ibas paksa kita kote, ukur serbut erkite-kiteken melala perbeben, kecedan ate, sakit pinakit, ekonomi sulit, megati banci mabai kita jadi sada pribadi si ergegehna ertoto. Mabai kita erdeherna ras Tuhan. Tapi situhuna kegeluhen ertoto (aktifitas ertoto) labo hanya ilakoken tupung kita ibas ngenanami kegogon bagepe bas paksa melala perbebenta, tapi pertoton ilakoken ibas kerina paksa ras situasi kegeluhenta subuk sehat ntah sakit, subuk paksa kegogon ntah keriahen, pertoton harus tetap silakoken jadi tanda pengataken bujur dingen pengarapenta nandangi Tuhan.

II.        PENDALAMAN NAS

Surat Pilipi eme surat sinitulis Rasul Paulus si sangana ngenanami kiniseran erkiteken ipenjaraken i Kota Roma ibas tahun antara 60-63 M. Amin gia Paulus sangana i penjara tupung ia nulisken kitab Pilipi tapi tema mbelin sinitulisken Paulus khususna Pasal 4 eme tetap ermeriah ukur ibas Tuhan amin gia melala perbeben ras aru ate si man alanken ibas kegeluhen.

Ibas ayat 6 ikataken, “Ola aru atendu kerna kai pe, tapi i bas kerina pertotonndu, pindolah man Dibata kai si iperlukenndu, janah pindolah rusur man baNa alu pusuh si dem pengataken bujur”. Selaku manusia Paulus pe tentu ngenani perbeben terlebih selaku Rasul Kristus si mbue ngenanami kiniseran, pernah menam mate erkiteken karam kapalna, ia pernah ipekpeki ras igudami, ia ipenjaraken tapi Paulus arah surat enda mpegegehi kerina kita si mbue ngenanami kiseran ras erbage-bage persoalen geluh. Emaka gelah kearun ateta bene sibaba kerina ku bas totonta man Tuhan. Ibas 1 Petrus 5:7 ikatakenna “Ampekenlah kerina kearun atendu man Dibata, sabap Ia kap si mperdiateken kam” (bhs. Indonesia, “Serahkanlah segala kekuatiranmu kepadaNya, sebab Ia yang memelihara kamu”). Lit ije kata ‘kerina/semua’ la setengah-setengah, labo seperteluna, labo ka 90 % tapi kerinana/semuanya, enda nuriken maka Tuhan tuhu-tuhu mperdiateken kita janah ngasuhi kita ibas kerina dampar geluhta. Ibas bahasa Inggris kata kekhawatiren iperinci alu ndauh nina: “all your anxieties, all yuor worries, all your concerns, once and for all” (semua ketakutan, kecemasan, kegelisahan, ketidaktenangan, segala yang membebani pikiran, sekali untuk selamanya). Ola nari ibaken entah tadingken kerina perbebenta tapi endesken/serahkan man Tuhan kerinana/semuanya, seh makana enggo menahang si akap ndalani geluh enda.

Ibas ay. 7 ikataken gelah ola mbiar janah ola aru ate kerna kai pe, ertina ibas kerina aspek geluhta em kap kula, tendi ras ukurta tetap i cukupken Tuhan adi kita tetap ernalem dingen nggit mindo man Tuhan ibas pertotonta. Emaka ulih ibas pengendesenta dingen pemindonta arah pertotonta man Tuhan, icukupkenNa dingen ijujuriNa kai siniperluken kita eme kap “Kemalemen ate si rehna i bas Dibata nari, si la terukuri manusia, ngarak-ngarak pusuh ras ukurndu erkiteken persadanndu ras Kristus Jesus” (ay. 7).

Jenari gelah kita banci ndatken dame sejahtera ibas geluhta harus lebe sibeneken perukuren-perukuren si negatif jenari merubah caranta rukur kerna hal-hal si positif dingen mehuli, alu bage kegeluhenta pe banci jadi mehuli. Ay. 8 ngatakenca, “kedungenna o senina-seninangku, ukurilah kerna simehuli, e me kerna si bujur, mulia, benar, bersih, mejile ras kerna kerina si patut ipuji”.

III.        APLIKASI

Jadi kalak kristen labo jaminen maka la nai kita ngenanami perbeben ntah masalah nggeluh, tapi jadi kalak kristen lit sada jaminen maka kita ipegegehi ngalaken kerina perbebenta arah kita erpengendes man Tuhan janah tek kita Tuhan nampati kita guna ndungi kerina masalahta. La nai kita erbebe sekalak kerna perbebenta alu ngandalken gegeh ras kemampunta tapi siendesken kerinana man Bapa si ni Surga. Siharus ilakoken kalak kristen ibas perbebenna em kap “reh ku adepen Tuhan”, amin gia melala denga kita adi lit perbebenta leben si dahi temanta, si teleponi janah curhat kita man bana sebab siakap banci kari iberena solusi tapi megati sebalikna banci ka nambahi si man tangkelen. Emaka si dahilah Tuhan bagi si ituriken bas Pustaka si Badia, “E maka marilah sideheri alu la biar-biaren Dibata si erkuasa si dem alu lias ate. I je sialoken perkuah ate ras lias ate gelah dat kita penampat i bas paksa si iperluken kita” (Heber 4:16). Sabab tek kita i bas tan Tuhan kerina perbebenta la bo lit si mberatsa ntah menahangsa, bagepe tetap si gelem pengarapenta maka “mata Tuhan tetap nare kempak kita dingen mperdiateken kerina perbebenta janah Tuhan-ta ndauh kal belinen asangken perbebenta”.

Ibas sada tulisen thehealthsite.com, ikataken maka pertoton labo hanya sekedar uga caranta ngerembakken dirinta man Tuhan, tapi lebih asa si e ertoto mereken mbue kal manfaat subuk nandangi kesehaten kula, ukur ras tendi. Kegiaten ertoto pe banci mabai kita jadi pribadi si tetap rukur ras bertindak alu positif, lebih tenang ras terbebas arah erbage masalah kesehaten fisik ras psikis. Para ahli ngatakenca maka lit 4 ulih/manfaat sehat arah kita ngelakoken aktivitas ras kebiasan si teratur ibas  ertoto :

1.    Mencegah ras Mengatasi Stres

Ibas sada penelitin siilakoken para ahli psikis ibas tahun 2014 ngataken, maka ertoto mereken manfaat simbelin kal eme kap banci mencegah ras mengatasi stres. Seh makana arah gegeh pertoton banci mabai kita terhindar arah resiko depresi bagepe masalah-masalah psikis sideban. Pertoton banci mabai sekalak jelma reh tenengna ibas rukur, la mesukah putus asa tapi tetap rukur alu positif.

2.    Ertoto Erbahanca Ukur Meriah (Membuat Bahagia)

Ulih ertoto la terjeng banci mencegah ras mengatasi stres tapi banci ka maba ulih erbahan perukurenta tetap meriah. Para ilmuwan mempublikasiken ulih penelitinna ibas JAMA Networks Journal ngatakenca maka kalak si aktif dingen tutus ngikuti kerina kegiaten-kegiaten ibadah/kebaktin ras disiplin ibas ertoto, maka jelmana teridah lebih bahagia asa kalak si labo tutus ngelakoken ritual keagamaanna. La terjeng man bana saja tapi perukuren si dem keriahen pe teridah arah anak jabuna, seh makana jabuna jadi jabu si sempabu ras ermalem ate.

3.    Cawir Metua (Panjang Umur)

Ibas sada study penelitin siilakoken ilmuwan i Harvard School of Public Health ngataken maka kalak si religius ntah patuh eragama jenari ertoto secara rutin subuk i rumah ntahpe i rumah-rumah ibadahna sekalak-sekalak, secara umum nggeluh cawir metua ras gedang umurna geluh (memiliki umur yang panjang). Sebab kalak si tutus ertoto ras kegeluhen spiritualna pe sehat maka mabai dirina rukur alu teneng jenari enggeluh sehat, tenang ras bahagia.

4.    Mpegegehi Kula (Meningkatkan Sistem Kekebalan Tubuh)

Kalak si tutus dingen disiplin ertoto banci meningkatken dingen lit ibas ia sada sistem kekebalan tubuh yang kuat. Arah pemikiren si tetap positif, rukur alu teneng ras nggeluh meriah ukur (bahagia) dingen disiplin ertoto lit ibas ia sistem kekebalen tubuh si megegeh ras kuat. Kalak si tutus ertoto, saber dingen geluh alu tetap erpengendes man Tuhan banci terhindar arah resiko serangen jantung bagepe tekanan darah tinggi.

Pdt. Irwanta Brahmana

GBKP Runggun Surabaya