OGEN           : Pengerana 7:11-12

TEMA  : 

“NGGELUH ARUS PENTAR RAS ERPEMETEH”

TUJUN          : Gelah Moria :

1.    Ngangkai uga ergana pemeteh e perehken keterkelinen, ketenengen ras duit.

2.    Nggit erlajar arah lingkungen, budaya ras pemerintah guna nambahi pemeteh.

KATA PENARUH

Kitab Pengerana enda isina emekap kerna perukuren-perukuren sekalak pengerana ntah pe perpilsafat, si enggo ngukuri alu mbages kerna uga gendekna ras gulutna kegeluhen manusia si dem alu kinilabujuren ras kecedaan ate. Ibas ujung perukurenna ikatakenna maka “sia-sia geluh enda”. La iangkana perbahanen Dibata si engkuasai nasip manusia. Aminna bagepe, iajarkenna nge gelah igegehi dingen tutuslah ate manusia erdahin, janah nggeluh ia alu meriah ngaloken pemere-pemere Dibata.

Ibas kita ndalani kegeluhenta si tep-tep wari, tentulah perlu kepentaren bagepe  pemeteh segelah sidatken kiniulin ibas kegeluhenta i doni enda. Mari radu ras kita erlajar arah Pengerana 7:11-12, si jadi bahan PA-nta enda kerna tema “Nggeluh Arus Pentar Ras Erpemeteh”.

PEMBAHASEN TEKS

Pengerana 7:11-12

Ayat 11.  Kalak nggeluh arusna pentar; ergana pemeteh bali kap ras barang pusaka.

Ayat 12. Pemeteh mereken ketenangen bali ras duit. Kalak si i bas ia kepentaren dingen pemeteh, ia terkelin.

Kalak nggeluh arusna pentar; ergana pemeteh bali kap ras barang pusaka.

Kepentaren, enda me si jadi tema sentral ibas bahan PA nta enda. Kai nge ndia si imaksudken alu kepentaren ibas bahan PA-nta enda ? Adi si perdiateken isi kitab Pengerana 7:11-12 enda, maka banci siidah maka kai si isehken pengerana ijenda isina emekap kerna pengerana kalak si pentar, bali ras isi kitab Kuan-Kuanen. Ibas Kuan-Kuanen 2:6-7 ikataken, “Tuhan kap si mereken kepentaren, ibas IA nari kap manusia ndatken pemeteh ras pengertin. Man kalak  benar ras bujur iberekenNa penampat ras ampang-ampang”. I jenda banci siidah maka kepentaren e asalna ibas Dibata nari. Enda banci siidah pe ibas diri Raja Salomo, tupung ia jadi Raja, maka ibas pertotonna si ipindokenna man Dibata emekap kepentaren (1 Raja-Raja 3:1-15; 10:1-10). Dibata megiken pertoton Raja Salomo,emaka iberekenNa kepentaren man bana, labo ei saja si ibereken Dibata, tapi rikut pe umur si gedang,kebayaken bagepe kemulian sekalak raja si erkuasa. Alu bage, banci si idah ijenda maka, kepentaren si imaksudken ijenda emekap akal sehat dan keterampilan praktis yang diperlukan untuk menyelesaikan masalah sehari-hari.  Kepentaren e ibereken Dibata man kalak si patuh man Dibata.

Kepentaren si rehna ibas Dibata nari labo banci idatken arah ilmu pengetahuan saja. Melainkan, arah persadannta ras Dibata. Emaka, tupung paksa kita nggeluh denga i doni enda, tetaplah si jalin persadan si mehuli ras Dibata, subuk arah pertoton, ngoge kata Dibata, nehken kataNa bagepe ndalanken pedahNa ibas kegeluhenta si tep-tep wari. Alu bage, banci sidatken kepentaren ibas Dibata nari, sebab ibas ndalani kegeluhenta arus maka pentar kita. Kepentaren e seh kel ergana. Ergana kepentaren e bali kap ras barang pusaka (erta warisen). Ibas kita kalak Karo, erta warisen (tading-tadingen) ibas orangtua nari seh kel mehergana nilaina erkiteken erta tading-tadingen enda, memiliki makna tersendiri man banta, li nilai sejarahna si la banci terbeligai alu duit.

Pemeteh mereken ketenangen bali ras duit. Kalak si i bas ia kepentaren dingen pemeteh, ia terkelin.

Pemeteh si idatken kita ibas kegeluhen si tep-tep wari pe seh kel pentingna guna sidatken, erkiteken pemeteh e mereken ketenangen. Engkai ?erkiteken alu litna pemetehta, maka banci kita mengikuti kemajun zamanta enda, mpengasup kita ibas ngadapi erbage-bage persoalen kegeluhen si mabai kubas ketenangen Bali ras duit, siiperluken kita guna encukupi keperlun nggeluh tep-tep wari. Alu litna duit ibas kita, maka kai sijadi keperlunta banci si litken.

Pengerana nehken pe maka sekalak si lit ibas ia kepentaren dingen pemeteh maka ia terkelin. Kepentaren ras pemeteh si lit ibas kita mabai keterkelinen. Enda teridah kel ibas kegeluhenRaja Salomo. Selaku sekalak raja, tentulah ia sekalak si erpemeteh, baik pemeteh ibas keuangen, pemeteh ibas pertahanen, pemeteh ibas mbangun hubungen bilateral si mehuli ras raja si deban, rsd. Kepeken, selain pemeteh, kepentaren pe lit ka ibas Raja Salomo. Seh maka, banci siidah kuga kegeluhen Raja Salomo ibas masa pemerintahenna, emekap dem alu kuasa, erta kebayakenpe ibereken Dibata man bana, rikut pe kepentaren. Enda encidahken maka sekalak si lit ibas ia pemeteh ras kepentaren, maka idatkenna me keterkelinen e.

PENGKENAINA

“Nggeluh Arus Pentar Ras Erpemeteh” enda me si jadi tema ibas bahan PA nta minggu enda. Pentar kita ngaturken kerna perdalanen kegeluhenta, baik ibas jabu, pendahin bagepe ibas kita bersosialisasi ras kalak si deban. Kerina enda banci sidatken ibas Dibata nari, arah litna kiniersadannta si paguh ras Dibata. Tentu saja, selain kepetaren, pemeteh pe seh kel perluna ibas kegeluhennta. Guna ndatken pemeteh e, arus nggit kita erlajar, ula malas. Ibas masa genduari enda, sue ras perkembangen jaman, banci kita erlajar arah sekelewetta. Misalna erlajar kerna peluang-peluang usaha kai si banci ibahan kita guna banci nambahi perekonomien ibas jabu. Sue ras kemajun teknologi, banci jadi kita erbahan usaha guna nambahi ekonomi keluarga, lanai perlu modal si mbelin entahpe ingan erusaha. Irumah nari pe banci si dalanken usahanta, alu promosi arah media sosial nari. Guna kesuksesanna pe tentu perlu melala kita erlajar segelahna si datken pemeteh kerna si e bagepe pang ngelakoken usaha e maka banci sidatken ulihna. Kesuksesan usaha enda pe la terlepas arah kuga kita mempromosikennca man kalak si deban alu menarik, seh maka konsumen pe tertarik guna  nukursa. Kuh pe pertoton segelahna usaha enda erdalan alu mehuli ibas perkuah ate Tuhan. Alu bage,banci si datken keterkelinen.

Banci ka pe kita erlajar arah budayanta selaku kalak Karo. Budaya si tentu saja sangat harmonis ibas kegeluhennta. Misalna ibas ersangkep nggeluh. Mehamat erkalimbubu, medes ersenina bagepe metami eranak beru. Konsep kerna ersangkep nggeluh enda, tuhu mabai kegeluhen si dem alu kedamen, si sampat-sampaten bagepe si keleng-kelengen. Budayanta enda erbahanca maka la kita jadi sekalak si individualis, sabab paksa jaman genduari enda kecenderungen si terjadi maka manusia bertambah individualis. Alu kita tetap makeken budayanta,khususna ibas ersangkep nggeluh, enda erbahanca kita tetap membangun hubungen sosial si tetap mehuli ku sekelewetta. Jadi kemajun jaman enda banci sihadapi alu dem kepentaren.

Selanjutna, ibas pemerintahen. Banci siidah kai si ilakoken pemerentah guna meningkatken kesejahteraan masyarakat Indonesia. Erbage inovasi enggo ilakoken pemerintahta seh maka banci igejapken warga Indonesia, dalam hal pembangunen si semakin merata. Bagepe pemimpinta si berpihak man rakyat, alu terus berusaha mensejahteraken rakyat melalui kebijaken-kebijaken bagepe program pembangunen negaranta. Arah si e pe kita banci erlajar maka kuga kita selaku sekalak si erkiniteken pe arusna terus berusaha bagepe erdahin guna kesejahteraan kuta inganta tading.

Selamat ndalani kegeluhen alu dem kepentaren bagepe erpemeteh.

Pdt. Crismori Veronika Br Ginting Manik

GBKP Sitelusada

OGEN : PILIPI 2:1-4

TEMA

: RADU MPERDIATEKEN

TUJUN : Gelah Moria :

Ø  Mperdiateken kalak si  sekelewetna.

Ø  Nggejapken maka ia perlu man kalak si deban ras kalak si deban pe perlu man bana.

METODE PA : Diskusi ras Aksi (PRT)

Kata Perlebe

Manusia eme mahluk sosial, ertina manusia labo ngasup nggeluh sisada-sisada, arus maka ianggeluh si sampat-sampaten sada ras si debanna. Erkiteken si e, kata “radu” (Ind. saling) jadi salah sada hal sipenting ilakoken i tengah-tengah persadan si lit ibas kegeluhennta. Kegeluhen manusia ibas kinierbagen erbahanca jadi sada kesempaten   guna meningkatken kiniersadan. Persadan ibas kinierbagen banci tetap terpelihara alu litna radu mperdiateken  bagepe radu ngergai kinierbagen e.

Bahan PA nta ibas Minggu enda ngajuk kita ku bas sada tema “Radu Mperdiateken” erpalasken Pilipi 2:1-4. Alu bage, mari sisiksiki teks alkitab enda segelahna siangkai kai si jadi pengajaren ibas teks enda man banta.

Pembahasen Teks

Perpulungen i Pilipi eme perpulungen si pemena si i panteki Paulus i Eropah, propinsi Roma i Makedoni. Surat Paulus man perpulungen i Pilipi enda isuratkenna sanga Paulus i penjara. Ia bas kiniseran erkiteken lit teman-teman sapih Kristen ngelawan ia, janah erkiteken pengajaren-pengajaren si papak si lit i tengah-tengah perpulungen Pilipi. Amin bage pe icidahken Paulus nge keriahen ukurna raskinitekenna man perpulungen e. Enda jadi erkiteken kiniteken Paulus man Jesus Kristus.

Paulus nuratken suratna enda guna ngataken bujur man perpulungen i Pilipi kerna pemere perpulungen e sanga Paulus lit i bas kiniseran. Iajuk Paulus maka perpulungen e pe ermeteruk ukur bali ras Kristus. Iturikenna pe kerna keriahen, kemalemen ate si ibereken Dibata man kalak si nggeluh ibas persadan ras Kristus. Enda kerina encidahken kekelengen si mbages i bas Paulus nandangi perpulungen i Pilipi.

Ayat 1. Kegeluhenndu i bas Kristus erbahanca kam megegeh. Ma kin keleng ateNa e ngapuli kam ? Ma rembak kin kam ras Kesah Dibata ? Ma kin si keleng-kelengen kam dingen mekuah atendu sekalak nandangi sidebanna ?

Ibas menaken ayat sipemena enda, isehken Paulus man perpulungen Pilipi maka “kegeluhenndu i bas Kristus erbahanca kam megegeh”.Sekalak si erkiniteken man Tuhan emekap sekalak si ndalani kegeluhenna ibas Kristus. Hidup melekat dalam Kristus. Teridah biak-biak Kristus ibas kegeluhenna.Identitas Kristus teridah ibas kata ras perbahanenna. Sekalak si nggeluh ibas Kristus emekap sekalak si megegeh ibas ngalaken erbage tantangen nggeluh i doni enda alu erbage kinierbagenna.

Ibas bagin enda pe, icidahken kualitas sekalak si nggeluh ibas Kristus emekap sekalak si dem keleng ate, tetap setia ngerembakken diri ras Tuhan bagepe nggeluh si keleng-kelengen bagepe ermekuah ate sekalak nandangi si debanna. Kerina enda sehkel pentingna ibas kegeluhenta segelah tetap terjaga kiniersadaan ibas kinierbagen.

Ayat 2. Gelah tuhu-tuhu malem ateku, kupindoken man bandu: Ersada min arihndu, sikeleng-kelengen min kam, ersadamin geluhndu dingen ersada ukurndu.

Paulus enggo ngidah maka i tengah-tengah perpulungen i Pilipi enggo lit terjadi perpecahen, nggeluh erbana-bana. Erkiteken si e, ipindoken Paulus man perpulungen i Pilipi segelahna perpulungen e : ersada arih, sikeleng-kelengen, ersada geluh dingen ersada ukur. Enda jadi pilar si paguh ibas mbangun kiniersadan i tengah-tengah perpulungen si dem kinierbagen. Kinierbagen ibas pendidiken, pendahin, latar belakang kegeluhen bagepe ibas sudut pandang, rsd.

Ayat 3. Ola ibahanndu kai pe erpalasken kerangapen, entah si erpalasken ukur meganjang.Tapi peteruklah ukurndu sekalak nandangi sidebanna. Ola kel iakapndu ulin kam asangken kalak si deban.

Perpecahen i tengah-tengah perpulungen e terjadi erkiteken perpulungen enggo mulai terjangkit pinakit kerangapen bagepe ukur meganjang. Di kune i tengah perpulungen e lit kalak si bagenda rupana, emaka kecenderungenna terjadi me perselisihen bagepe perpecahen.Kalak si merangap la pernah ia puas alu kai si lit ibas ia. Segala cara iusahakenna guna banci mpebayak bana. La pernah lit kata bias entahpe cukup ibas kegeluhenna. Terobsesi guna ndatken kebayaken bagepe kekuasaan. Erkiteken si e, ilakokenna segala cara guna ndatkenca. Sekalak si meganjang ukur emekap sekalak si mementingken  dirina sendiri (egoisme). Di kune biak-biak merangap ras meganjang ukur lit i tengah perpulungen, erbahanca turah me perpselisihen dingen perpecahan

Erkiteken si e, ipersingeti Paulus me perpulungen e segelahna min i tengah-tengah perpulungen e mpeteruk ukur sekalak nandangi si debanna (radu mpeteruk bana), bagepe segelahna ula min lit kiniganjangen ukur. Ola kel lit pengakap maka ulin kita asangken kalak si deban.

Ayat 4. Ola keperlunndu saja ngenca iperdiatekenndu tapi perdiateken pe keperlun kalak si deban.

Selanjutna, isehken Paulus pe man perpulungen e segelahna nggit mperdiateken keperlun kalak si deban. Radu mperdiateken. Engkai? Erkiteken enda jadi sada bentuk kebutuhen tep-tep jelma ibas kegeluhenna si tep-tep wari selaku sekalak mahluk sosial. Radu mperdiateken subuk ibas kesusahen bagepe keriahen ukur. Alu bagepe kiniersadaan e tetap paguh i tengah-tengah perpulungen.

Aplikasi

Kiniersadan i tengah-tengah persadannta MORIA enda tentu perlu tetap si jaga alu mehuli, segelah MORIA terus berkembang dan maju radu ras-ras. Guna njagai kiniersadan e, arah bahan PA nta minggu enda, Pilipi 2:1-4, isehken man banta kerna 4 hal, emekap.

1.    Tetap setia nggeluh ibas persadan ras Kristus.

2.    Ersada arih, sikeleng-kelengen, ersada geluh, ersada ukur.

3.    Ola merangap, ola meganjang ukur, ola mperdiateken kepentingen diri sendiri

4.    Meteruk ukur, radu mperdiateken.

Kinatana i tengah-tengah persadannta MORIA, kuga nge ndia enda ilakoken ? Di kune enda enggo ilakoken alu mehuli tentu ertambah-tambahna MORIA si pulung ibas kita ngelakoken PA MORIA bagepe kegiaten gereja si debanna. Tapi, labo ka tersilahi kita maka MORIA la banci hadir ibas kegiaten-kegiaten erkiteken pendahin, sakit, rsd. Banci jadi ka pe erkiteken lit perbeben si mberat iakapna seh maka la ia banci pulung. Ngidah keadaan si bagenda rupana, perlu kel kita radu mperdiateken sapih-sapih kita MORIA. Banci silakoken aksinta emekap alu ngelakoken perkunjungen man bana. Arah perkunungen si ilakoken kita banci ieteh kuga kerna keberadaanna, kai perbeben geluhna janah banci ka pe si dukung ka ia arah motivasi bagepe pertoton.

Selaku sekalak si erkiniteken man Tuhan, sekalak si nggeluh ibas Tuhan, tentu saja biak-biak Kristus si dem alu keleng ate, nggit mperdiateken kalak si deban dingen meteruk ukur e lit ibas kita. Alu bage, enda mabai kita, ibas kegeluhennta selaku mahluk sosial, la kita nggeluh erbana-bana, tapi saling mperdiateken sada ras sidebanna. Alu bage tercipta me kiniersadaan i tengah-tengah MORIA. “Radu Mperdiateken” enda pe jadi sada bentuk kita nehken sada kesaksian kerna Berita Si Meriah man kalak si deban. Usihen si bagenda rupana banci siidah ibas kegeluhen perpulungen mula-mula bagi si ituriken ibas Perbahanen Rasul-Rasul 2:43-47. Arah kiniersadan bagepe si keleng-kelengen si teridah ibas perpulungen e, erbahanca maka tep-tep wari itambahi Tuhan ku perpulungen e kalak si iselamatkenNa (Perb. Rasul 2:47).

Selamat Radu Mperdiateken.

Pdt. Crismori Veronika Br Ginting Manik

GBKP Sitelusada

OGEN   : 2 RAJA-RAJA 20:1-11

TEMA   :

PINAKIT LA NGAMBATI

TUJUN : Gelah Moria :

Ø  Meteh turi-turin kiniteken Hiskia i bas ia sakit.

Ø  Tetap erjuang ras ertoto amin pe lit pinakit.

Kinata kegeluhennta manusia erpaksa-paksa. Lit paksa meriah ukur, lit paksa ceda ate;lit paksa sehat, lit ka paksa sakit. Ngidah situasi perkembangen jaman genduari enda, pinakit si nderpa kita pe tambah erbagena. Lanai bo terjeng pinakit influenza saja si nderpa tapi banci ka pe kita idenden pinakit kanker, jantung, stress, depresi, ras sidebanna.

Bahan PA Morianta ibasminggu enda, nuriken kerna sekalak tokoh si tergelar Raja Hiskia. Kepeken pinakit, labo erpilihen, sekalak raja pe banci sakit. Ibas paksa si e, Raja Hiskia sakit janah menam mate. Enda encidahkenca maka pinakit si ngkenai Raja Hiskia seh kel kelekna, pinakit enda rentan maba ku kematen. Tupung paksa si e reh me Nabi Jesaya ngatakenca man bana, “Tuhan ngataken man bandu maka ikatakenndu pedahndu si perpudi man kerina isi jabundu, sabab lanai kam malem. Ersikaplah kam guna kematenndu.” Kai si isehken Nabi Jesaya man Raja Hiskia enda, tentulah sada berita si erbahanca ukur ergulutna, erkiteken labo berita kemalemen siisehken tapi berita kematen, janah si nehkenca pe man Raja Hiskia emekap sekalak nabi, si tentu saja enda jadi sada hal si ianggap pasti terjadi.

Itengah kegalauan hati si igejapken Raja Hiskia kenca megi berita e, ertoto ia, janah ikusurna ayona ku dinding. Tuhu memang pertoton jadi salah sada hal penting si arus ilakoken tupung paksa ukur gulut bagepe tupung paksa kita lit ibas keadaan sakit. Engkai ? Erkiteken arah pertoton banci sidatken ketenangen ukur, kemalemen ate, gegeh, janah tek kita maka Dibata erkuasa nandangi pinakitta bagepe Dibata si erkuasa mpepalem pinakitta. Ibas pertoton si isehken Raja Hiskia, iturikenna isi pusuhna, emekap kerna kuga ia sedekah enda enggo alu tutus ersembah man baNa. Nina Hiskia, “Ingetlah Tuhan; alu tutus ras erkemalangen enggo kulayani Kam, janah tetap kuusahaken ndalanken kai ateNdu ngena.” Kenca bage tangisHiskia, megogo kel atena.

Tuhu memang, Hiskia emekap sekalak Raja si erkemalangen man Tuhan. Ibas 2 Raja 18:3isehken, “Raja Hiskia ngelakoken si ngena ate Tuhan, bali ras nini Raja Daud nai”. Selain si e, Hiskia pe emekap sekalak raja si ngelakoken reformasi (pembaharuan) ibas erkiniteken nandangi bangsa Juda si enggo ndabuh kubas penembahen man gana-gana bagepe perbegu. Ikernepken dingen iripukkenna ingan penembahen perbegu bagepe gana-gana si jadi sembah-sembahen. Icidahkenna kuga ia erkiniteken alu payo man Dibata. Hiskia patuh manTuhan; la pernah isimbakna; tapi alu metenget iikutkenna kerina undang-undang si enggo ibereken Tuhan man Musa. Nginget si e kerina, maka labo akap Raja Hiskia mungkin ia banci sakit mekelek seh maka ia mate. Tuhu megogo kel atena.

Kenca Jesaya nehken berita kerna kematen Raja Hiskia, lawesme ia nadingken Hiskia.Tapi ope denga ibentasina kesain si i tengah, isuruh Tuhan ia mulihken ndahi Hiskia. Nina Tuhan man raja, “Aku, Tuhan, Dibata nini-ninindu Daud enggo megi pertotonndu janahngidah iluhndu mambur. Ku pepalem kam, janah kedun ku Rumah Pertoton kam. Kutambahi umurndu sepuluh lima tahun. Kupulahi kam ras kuta Jerusalemibas Assur nari. Aku mpertahanken kuta enda, guna kehamatenKu ras erkiteken perpadanen si Kubahan ras suruh-suruhenku Daud.”Kepeken pertoton si isehken Hiskia alu dem kiniteken man Tuhan idengkehkenNa. Malem ia ibas pinakitna nari,terluput ibas kematen nari, bagepe ndatken bonus kegeluhen si tambahken Tuhan sepuluh lima tahun nari, bagepe ipulahi Tuhan me ia bagepe kuta Jerusalem ibas Assur nari. Mujizat si tuhu-tuhu mbelin enggo terjadi ibas kegeluhen Raja Hiskia si mabai keriahen ukur. Iajuk Dibata pe raja Hiskia segelah ia tetap ku Rumah Pertoton emekap guna tetap setia ersembah man Tuhan dingen ngataken bujur pe man baNa.

Kenca bage isuruh Jesaya gelah idampelken buah ara si medakdak ku bareh raja, gelah malem akapna.Buah ara si medakdak me si jadi tambar guna nambari pinakit raja Hiskia. Tentu, kuasa Dibata si erdahin, si makeken buah are si medakdak e jadi tambar simehuli guna nambari pinakit Hisia si enggo mekelek, si erbahanca menam ia mate. Tapi, kepeken Raja Hiskia lenga bo tek kel maka Dibata ngasup mpepalemkenca ia ibaspinakitna janah ngasup ia ku Rumah Pertoton. Emaka ipindokenna tanda ibas Tuhan nari. Ibas kuasa Tuhan maka terjadi me tanda si ipindoken Hiskia,emekap awih-awih si surut sepuluh jingkang.

Arah turi-turin kiniteken Hiskia ibas sakit enda, banci ipelajari kita piga-piga hal, emekap :

1.    Sekalak raja si erkiniteken man Tuhan pe banci sakit mekelek. Erkiniteken man Tuhan labo jadi sada jaminen maka kita la sakit. Dibata la pernah erjanji maka dikunekita erkiniteken man bana, janah tutus ngelakoken pedahna,maka kita la pernah sakit. Sekalak si tek man Tuhan pe banci sakit mekelek si banci mabai ku kematen.

2.    Pinakit si tejadi man raja Hiskia labo erkiteken ia erdosa.

3.    Pinakit mekelek si nderpa kita erbahanca ukur gulut, galau. Ibas paksasi bage rupana, ertotolah alu tutus man Dibata. Alu bage banci sidatken ketenangen ukur, gegeh dingen kemalemen ate bagepe kinitekennta tetap paguh man Tuhan.

4.    Dibata ndengkehken pertoton si isehken man baNa janah njababsa sue ras kai si iperluken.

5.    Tupung paksa sakit arus maka kita ertambar. Tambar si ipakeken kita ipasu-pasu Tuhan

Banci jadi, genduari enda kita lit ibas keadaan sakit si mekelek bagi siigejapken raja Hiskia, si mabai ku kematen. Pinakit-pinakit si tuhu-tuhu jadi kebiaren, misalna kanker baik rahim, payudara, serviks, darah, getah bening, rsd. Banci jadi pinakit si nderpa kita gagal ginjal seh maka arus tetap rutin ndalan hemodialisa, pinakit jantung, stroke, kelumpuhan ras sidebanna. Ingetlah maka Dibata nampati kita, kalak si tek man baNa, tupung paksa kita sakit. Bahanlah maka pinakit si nderpa kita jadi sada bagin guna naksiken kerna kuasa Tuhan ibas kegeluhenta.

Erdamelah ras pinakitta. Alu bage, kita ipengasup Tuhan ngaloken pinakit sinderpa. Ula talu kiniteken man Tuhan erkiteken pinakit. Amin gia pinakit lit ibas daging kulanta, la erbahanca kita kebenen semangat, kiniriahen ukur, bagepe ketenangen. Sabab tupung paksa kita lit ibas keadaan sakit, la megegeh, ije me gegeh Tuhan si serta ibas kegeluhenta (bdk. 2 Korinti 12:7-10). Banci jadi pinakit si nderpa kita emekap pinakit  kronis si tetap melekat ibas kulanta. Misalna diabetes. Alu kita ngasup erdame ras pinakit diabetess misalna, si enda ngajuk guna banci njagai kesehatan, alu ngelakoken kai siisaranken dokter guna silakoken segelah diabetes la ermekelekna, tapi banci si iminimalken perkembangenna. Emekap alu njagai perpan, ngaturken alu mehuli perpedem, perukuren, rsd. Tetaplah setia erjuang njagai kesehaten bagepe ertoto man Dibata seh maka tetap ngasup njagai kesehaten alu mehuli.

Alu bage, bagi tema PA Morianta enda, Pinakit La Ngambati kita guna ersaksi kerna Tuhan man enterem jelma arah pendahinnta, pelayanennta bagepe perbahanennta.Amin gia pinakit tetap lit ibas kulanta tapi  Pinakit La Ngambati Kita guna tetap ertoto ras ersaksi kerna Dibata man kerina jelma.

Pdt. Crismori Veronika Br Ginting Manik

GBKP Sitelusada