Pengerana 11 : 1-6

PERBAHANEN KALAK PENTAR

          Kitab Pengerana eme perukuren-perukuren sekalak pengerana tah pe perpilsapat, si enggo rukur alu mbages uga gendekna ras gulutna kegeluhen manusia, s idem alu kinilabujuren ras kecedaan ate. Ibas ujung perukurenna ikatakenna maka sia-sia geluh enda. La iangkana perbahanen Dibata singkuasai nasip manusia. Aminna bage pe, iajarkenna nge gelah igegehi dingen tutuslah ate manusia erdahin, janah nggeluh ia alu meriah ngaloken pemere-pemere Dibata.

          Ibas ayat 1 ikataken “berekenlah ertandu man kalak sindauh ikepar lawit” ngatakenca benakenlah dahin e anem gia ndauh denga ndatken hasil entahpe mungkin la rulih, sipenting dahikenlah, ula minter arapken untung. Ula dekahen rukur asangken ndahikenca. Ayat 2 ikataken “tamaken duitndu ibas piga-piga usaha-tuhu ibas mbue usaha” ngatakenca tupung lit kesempaten erdahin ntah pe erusaha harus ipakeken alu mehuli, ula puas ndahiken dahin e alu cara-cara bsindekah, tapi kembangken pendahin, usaha alu cara-cara simbaru. Seh maka la hanya kita singakapi ulih pendahin e, tapi kalak sideban pe tersampat arah kai siidahiken. Ayat-3-5 ngatakenca makai bas erdahin ras erusaha la banci kita bersikap pasif, tapi harus aktif, tutus, anem gia lit tantangen tapi la banci ngadi ndahikenca. Tapi harus si inget kai pe si idahiken kita harus ersukuten man Dibata, sebab Ia kap singkuhi ras masu-masu pendahinta. Ayat 6 ngatakenca maka erdahinlah tupung lit kesempaten guna ndahikenca, baik erpagi-pagi ntah berngi, mejingkat ras tutus ate ndahikenca pasti lit nge ulih pendahin si idahiken. Lit si idah kalak sindahiken dua dahin sekaligus, umpamana sekalak pegawai tapi lit ka usaha sideban, e mrjuma ntah pe lit ka asuh-asuhenna. Erdahinlah tupung lit denga kesempaten, ula milih-milih dahin, dahin ntah pe usaha si kitik adi dahiken alu tutus, pasti berkembang (bdk.Luk.16:10).

          Tema ta paksa enda eme perbahanen kalak pentar, nuduhken uga sikapta sebagai kalak sierkiniteken ibas makeken pendahin sebagai alat guna ncukupi kebutuhenta ras mpermuliaken Dibta. Sada sisi dahin eme sada hal siarus i perjuangken, latih, mbue pengorbanen, sisi sideban pendahin eme pasu-pasu Dibata si banci ialoken arah ulih pendahin. Engkai maka kita arus erdahin, erkiteken Tuhan jine pe erdahin. Ia njadiken langin ras doni enda ras kerina isina, ras mereken mandat man manusia guna njaga ras ngusahai doni enda, emaka kita harus erdahin. Ibas kita erdahin arus i lakoken alu bertanggung jawab, alu cara ngasup mengembangken pendahin, meningkatken pendapaten ibas ulih pendahin alu cara si payo. Ibas ndahiken dahin la banci itunda-tunda, tapi lit kenca kesempaten minterlah dahiken.

          Ibas mengembangken diri ibas ndahiken dahin bagepe usaha tetap harus erlajar uga maka pendahin ras usaha si idahiken kita banci berkembang, ngasup njabab tantangen ras kemajuan zaman. Kreatifitas ibas ndahiken dahin guna ncukupi kebutuhen kegeluhen sangat ibutuhken. Umpamana sekalak moria lit ibas ia talenta guna erdakan masakan khas karo, emaka ibas ia mengembangken talenta enda ibuka na usaha (catering) khusus masakan karo. Ijenda ibutuhken kreatifitas guna mengembangken usahana, umpamana uga maka gulen si itangerken ntabeh, bersih, kemasenna arus menarik, ras la mesera guna ndatken masaken enda (promosi, banci idatken arah media sosial). Uga maka cimpa kalak karo banci laris bagi pangan khas daerah sideban (bandingken ras tape kuningan, brownies bandung) tentu kalak karo harus mengembangken kreatifitas na erban pangan enda. Uga maka tupung man cimpa la melket tan ta adi sipan, adi tape kuningen ntebu ras kitik emaka keri sekali ipan, banci ka nge iban cimpa ula galangsa gelah keri sekali ipan, ntah pe uga adi cimpa isina/inti la hanya gula tualah, tapi banci ka keju, kacang, strawberry rsd. Kalak si kreatif , idahna peluang kai si banci untung ibas usahana. Pang ia muat resiko, labo minter untung lebe iukurken tapi bas proses na git ia mengembangken diri ibas erdahin.

Pdt Rena Teti br Ginting

Rg GBKP Bandung Barat

Kolose 4 : 7-14

NGERGAI DAHIN RAS SIERDAHIN

          Kolose 4:7-14 eme kata pendungi si isehken Rasul Paulus man perpulungen Kolose. Tupung Paulus nulisken surat enda, ia sangana ibas penjara (ay. 18), janah tujun nulisken surat enda eme guna petetap ukur perpulungen kerna dahin pelayanenna rikut ras kegeluhen teman-temanna si ikut muat bagin ibas meritaken berita si meriah. Situasi si inanami Paulus, anem gia ia ibas situasi penjara, tapi la ngadi guna meritaken berita si meriah. Bage buena tantangen si ihadapi Rasul Paulus ibas kegeluhenna, tapi engkai maka la ia surut nehken berita si meriah? Hal enda i pengaruhi keleng atena man Dibata si mereken kepercayaan man bana guna ngelai perpulungen gelah tek man Tuhan. Emaka uga beratna pe tantangen si lit ibas nehken berita si meriah, la ngkurangi semangat Rasul Paulus ras teman-temanna guna tetap erberita, mereken pergegeh ras semangat man perpulungen Kolose.

          Keberhasilan Rasul Paulus nehken berita si meriah, la terlepas ibas penampat teman-temanna si ikut mendukung perdalinen pelayanen Paulus. Paulus ras teman-temanna jadi sada team si solid ras ikut ertanggung jawab. Enterem kalak enggo ngaloken Yesus Kristus sebagai Juru Selamat, ras enda bekas pendahin ras pelayanan Rasul Paulus, she maka gelar na itandai kalak sinterem. Ibas keberhasilen ras ketutusenna nehken berita si meriah Rasul Paulus la ngelupaken teman-temanna eme Tikikus si nampati Rasul Paulus naruhken surat-surat (bdk.Kol.4:7;Ep. 6:21); Erguna sekalak budak si enggo tek man Yesus janah jadi kalak si tutus. Aristarkus sienggo jadi perberita si meriah ras erkiteken pang ia ngelawan penembahen man Dewi Artemis ia itamaken ku penjara; Markus bebere Barnabas, sekalak simbue kal penampatna nandangi pelayanen Paulus; Justus si ipake rumahna i Korinti guna nehken berita simeriah; Epapras teman sada aron Rasul Paulus erkiteken pernah radu ras ipenjaraken; Dokter Lukas ras Demas sekalak si enggo tek man Yesus; Nimpa ibas Laodikea nari, sekalak diberu si beluh rende ras landek ras Arkipus si melala nampati ras ndungi dahin si ibereken Paulus man bana. Enda me gelar-gelar sinampati Rasul Paulus bas dahina meritaken berita si meriah, erbage-bage latar belakang kegeluhen si lit ibas kalak enda, tapi ersada arih ras ertutus ate ia kerina ndahiken dahin nampati Rasul Paulus ibas ndahiken dahin pelayanenna.

          Tema ta ibas perpulungen jabu-jabu enda eme ngergai dahin ras si erdahin, maksudna ijenda eme uga perpulungen ras kerina serayan (pertua/diaken) ngergaken pendilo si enggo isehkenNa man serayan. Jadi serayan ibas meritaken Kebenaren Dibata i tengah-tengah perpulungen labo hal sigampang. Ibas setiap lagu langkah kegeluhenna ia harus jadi terang, gelah arah kai si ilakokenna terpuji gelar Tuhan (bdk. Matius 5:16). Jadi serayan Tuhan megati melala dahin pelayan si arus i dahiken, ngikuti pembinaan, ndahi kalak sakit, rapat, sermon, ras kegiaten-kegiaten si deban si megati harus nadingken pendahin bagepe keluarga. Megati ibas dahin pelayanen e turah ka konflik, persoalen i tengah-tengah perpulungen, janah serayan e isalahken. Ibas kerina persoalen si lit sekalak serayan tetap harus ndahiken dahinNa, la surut erkiteken lit persoalen, sebab labo manusia si mada dahin e, tapi Tuhan kap simadasa, serayan terjeng suruh-suruhenNa ngenca.

          Ibas kerina latar belakang si lit ibas ibas serayan si meganjang sekolahna, si biasa-biasa pendidikenna, si bayak ras si biasa-biasa kegeluhenna kerina seri ibas Dibata guna ndahiken dahinNa. Ibas ndahiken dahinNa kerina meherga iadep-adepen Dibata. Ibas majekken kula Kristus lit kalak si ertutus ate mendukung temanna sada dahin guna tampil ibas pelayanen man jelma sinterem. Enda me si inanami Paulus, lit kalak siertutus ate, arah pudina, la itandai kalak, tapi Paulus sangat tergantung nandangi pendahin kalak si kurang ndatken peran penting ntah pe berasa di balik layer pelayanen Paulus. Pendahin ras pelayanen Rasul Paulus labo banci mejile tanpa dukungen teman-temanna.

          Emaka mari siergaken dahin ras sierdahin Tuhan si enggo terpilih ibas periode 2019-2024 enda. Selaku anggota perpulungen meherga min siakap kerina serayan Tuhan anem uga gia latar belakang kegeluhenna, mbelin ntah kitik gia peran na ibas pelayanen itengah-tengah perpulungen la banci sibeda-bedaken. Sekalak serayan la banci menonjolkan diri ibas ndahiken dahinNa, ntah pe pekitik bana ibas tanggung jawab si arus ilakokenna. Selaku perpulungen mari sibereken penghargaan man “peminpin rohani” ta, sebab kesuksesen ngeluh, kemalemen ate si idatken kita la terlepas arah penjujuri Dibata arah pelayanen serayanna si ngajarken kita kerna kearusen nggeluh.

Pdt Rena Teti br Ginting

Rg GBKP Bandung Barat

OGEN   : 2 RAJA-RAJA 20:1-11

TEMA   : PINAKIT LA NGAMBATI

TUJUN : Gelah Moria :

Ø  Meteh turi-turin kiniteken Hiskia i bas ia sakit.

Ø  Tetap erjuang ras ertoto amin pe lit pinakit.

Kinata kegeluhennta manusia erpaksa-paksa. Lit paksa meriah ukur, lit paksa ceda ate;lit paksa sehat, lit ka paksa sakit. Ngidah situasi perkembangen jaman genduari enda, pinakit si nderpa kita pe tambah erbagena. Lanai bo terjeng pinakit influenza saja si nderpa tapi banci ka pe kita idenden pinakit kanker, jantung, stress, depresi, ras sidebanna.

Bahan PA Morianta ibasminggu enda, nuriken kerna sekalak tokoh si tergelar Raja Hiskia. Kepeken pinakit, labo erpilihen, sekalak raja pe banci sakit. Ibas paksa si e, Raja Hiskia sakit janah menam mate. Enda encidahkenca maka pinakit si ngkenai Raja Hiskia seh kel kelekna, pinakit enda rentan maba ku kematen. Tupung paksa si e reh me Nabi Jesaya ngatakenca man bana, “Tuhan ngataken man bandu maka ikatakenndu pedahndu si perpudi man kerina isi jabundu, sabab lanai kam malem. Ersikaplah kam guna kematenndu.” Kai si isehken Nabi Jesaya man Raja Hiskia enda, tentulah sada berita si erbahanca ukur ergulutna, erkiteken labo berita kemalemen siisehken tapi berita kematen, janah si nehkenca pe man Raja Hiskia emekap sekalak nabi, si tentu saja enda jadi sada hal si ianggap pasti terjadi.

Itengah kegalauan hati si igejapken Raja Hiskia kenca megi berita e, ertoto ia, janah ikusurna ayona ku dinding. Tuhu memang pertoton jadi salah sada hal penting si arus ilakoken tupung paksa ukur gulut bagepe tupung paksa kita lit ibas keadaan sakit. Engkai ? Erkiteken arah pertoton banci sidatken ketenangen ukur, kemalemen ate, gegeh, janah tek kita maka Dibata erkuasa nandangi pinakitta bagepe Dibata si erkuasa mpepalem pinakitta. Ibas pertoton si isehken Raja Hiskia, iturikenna isi pusuhna, emekap kerna kuga ia sedekah enda enggo alu tutus ersembah man baNa. Nina Hiskia, “Ingetlah Tuhan; alu tutus ras erkemalangen enggo kulayani Kam, janah tetap kuusahaken ndalanken kai ateNdu ngena.” Kenca bage tangisHiskia, megogo kel atena.

Tuhu memang, Hiskia emekap sekalak Raja si erkemalangen man Tuhan. Ibas 2 Raja 18:3isehken, “Raja Hiskia ngelakoken si ngena ate Tuhan, bali ras nini Raja Daud nai”. Selain si e, Hiskia pe emekap sekalak raja si ngelakoken reformasi (pembaharuan) ibas erkiniteken nandangi bangsa Juda si enggo ndabuh kubas penembahen man gana-gana bagepe perbegu. Ikernepken dingen iripukkenna ingan penembahen perbegu bagepe gana-gana si jadi sembah-sembahen. Icidahkenna kuga ia erkiniteken alu payo man Dibata. Hiskia patuh manTuhan; la pernah isimbakna; tapi alu metenget iikutkenna kerina undang-undang si enggo ibereken Tuhan man Musa. Nginget si e kerina, maka labo akap Raja Hiskia mungkin ia banci sakit mekelek seh maka ia mate. Tuhu megogo kel atena.

Kenca Jesaya nehken berita kerna kematen Raja Hiskia, lawesme ia nadingken Hiskia.Tapi ope denga ibentasina kesain si i tengah, isuruh Tuhan ia mulihken ndahi Hiskia. Nina Tuhan man raja, “Aku, Tuhan, Dibata nini-ninindu Daud enggo megi pertotonndu janahngidah iluhndu mambur. Ku pepalem kam, janah kedun ku Rumah Pertoton kam. Kutambahi umurndu sepuluh lima tahun. Kupulahi kam ras kuta Jerusalemibas Assur nari. Aku mpertahanken kuta enda, guna kehamatenKu ras erkiteken perpadanen si Kubahan ras suruh-suruhenku Daud.”Kepeken pertoton si isehken Hiskia alu dem kiniteken man Tuhan idengkehkenNa. Malem ia ibas pinakitna nari,terluput ibas kematen nari, bagepe ndatken bonus kegeluhen si tambahken Tuhan sepuluh lima tahun nari, bagepe ipulahi Tuhan me ia bagepe kuta Jerusalem ibas Assur nari. Mujizat si tuhu-tuhu mbelin enggo terjadi ibas kegeluhen Raja Hiskia si mabai keriahen ukur. Iajuk Dibata pe raja Hiskia segelah ia tetap ku Rumah Pertoton emekap guna tetap setia ersembah man Tuhan dingen ngataken bujur pe man baNa.

Kenca bage isuruh Jesaya gelah idampelken buah ara si medakdak ku bareh raja, gelah malem akapna.Buah ara si medakdak me si jadi tambar guna nambari pinakit raja Hiskia. Tentu, kuasa Dibata si erdahin, si makeken buah are si medakdak e jadi tambar simehuli guna nambari pinakit Hisia si enggo mekelek, si erbahanca menam ia mate. Tapi, kepeken Raja Hiskia lenga bo tek kel maka Dibata ngasup mpepalemkenca ia ibaspinakitna janah ngasup ia ku Rumah Pertoton. Emaka ipindokenna tanda ibas Tuhan nari. Ibas kuasa Tuhan maka terjadi me tanda si ipindoken Hiskia,emekap awih-awih si surut sepuluh jingkang.

Arah turi-turin kiniteken Hiskia ibas sakit enda, banci ipelajari kita piga-piga hal, emekap :

1.    Sekalak raja si erkiniteken man Tuhan pe banci sakit mekelek. Erkiniteken man Tuhan labo jadi sada jaminen maka kita la sakit. Dibata la pernah erjanji maka dikunekita erkiniteken man bana, janah tutus ngelakoken pedahna,maka kita la pernah sakit. Sekalak si tek man Tuhan pe banci sakit mekelek si banci mabai ku kematen.

2.    Pinakit si tejadi man raja Hiskia labo erkiteken ia erdosa.

3.    Pinakit mekelek si nderpa kita erbahanca ukur gulut, galau. Ibas paksasi bage rupana, ertotolah alu tutus man Dibata. Alu bage banci sidatken ketenangen ukur, gegeh dingen kemalemen ate bagepe kinitekennta tetap paguh man Tuhan.

4.    Dibata ndengkehken pertoton si isehken man baNa janah njababsa sue ras kai si iperluken.

5.    Tupung paksa sakit arus maka kita ertambar. Tambar si ipakeken kita ipasu-pasu Tuhan

Banci jadi, genduari enda kita lit ibas keadaan sakit si mekelek bagi siigejapken raja Hiskia, si mabai ku kematen. Pinakit-pinakit si tuhu-tuhu jadi kebiaren, misalna kanker baik rahim, payudara, serviks, darah, getah bening, rsd. Banci jadi pinakit si nderpa kita gagal ginjal seh maka arus tetap rutin ndalan hemodialisa, pinakit jantung, stroke, kelumpuhan ras sidebanna. Ingetlah maka Dibata nampati kita, kalak si tek man baNa, tupung paksa kita sakit. Bahanlah maka pinakit si nderpa kita jadi sada bagin guna naksiken kerna kuasa Tuhan ibas kegeluhenta.

Erdamelah ras pinakitta. Alu bage, kita ipengasup Tuhan ngaloken pinakit sinderpa. Ula talu kiniteken man Tuhan erkiteken pinakit. Amin gia pinakit lit ibas daging kulanta, la erbahanca kita kebenen semangat, kiniriahen ukur, bagepe ketenangen. Sabab tupung paksa kita lit ibas keadaan sakit, la megegeh, ije me gegeh Tuhan si serta ibas kegeluhenta (bdk. 2 Korinti 12:7-10). Banci jadi pinakit si nderpa kita emekap pinakit  kronis si tetap melekat ibas kulanta. Misalna diabetes. Alu kita ngasup erdame ras pinakit diabetess misalna, si enda ngajuk guna banci njagai kesehatan, alu ngelakoken kai siisaranken dokter guna silakoken segelah diabetes la ermekelekna, tapi banci si iminimalken perkembangenna. Emekap alu njagai perpan, ngaturken alu mehuli perpedem, perukuren, rsd. Tetaplah setia erjuang njagai kesehaten bagepe ertoto man Dibata seh maka tetap ngasup njagai kesehaten alu mehuli.

Alu bage, bagi tema PA Morianta enda, Pinakit La Ngambati kita guna ersaksi kerna Tuhan man enterem jelma arah pendahinnta, pelayanennta bagepe perbahanennta.Amin gia pinakit tetap lit ibas kulanta tapi  Pinakit La Ngambati Kita guna tetap ertoto ras ersaksi kerna Dibata man kerina jelma.

Pdt Crismori br Ginting

Rg  GBKP Stitelusada