Ogen : 1 Raja-Raja 2:1-4

 Thema : “Pemimpin Si Erkemalangen Tuhan”

Sope mate, Daud mereken pedah-pedahna man Salomo gelah kerajan Salomo banci megegeh. Pedah si pertama eme gelah Salomo pang maba kai si perlu ibabana sebage raja. Daud lanai bo ndekahsa mate janah Salomo la banci lalap erpenalem man bapana Daud. Ia harus jadi megegeh bagepe mbenai pendilona jadi sekalak raja amin pe lanai ije bapana Daud. Enda me pedah si seh kal pentingna arah sekalak bapa man anakna. Sada paksa bapa e pasti mate janah anak e harus ngasup maba beban pendilona jine. Ia harus ngasup amin pe lanai lit bimbingen arah bapana. Enda me pedah si seh kal jilena. Lalit gunana erban anak bergantung man orang tuana. Sekalak anak ise pe ia adi la ia banci mersan tanggung jawab pasti nggeluh alu cara si erbanca mela. Sekalak anak si lalap isediaken kerina kebutuhenna arah orang tuana tentu jadi anak si mpermelaken orang tuana jine. Adi kita ibereken pasu-pasu anak ku tengah-tengah jabunta, ula lalap sediaken kerina man bana, tapi ajarilah ia mersan tanggung jawabna jine.

Hal berikutna eme Daud ngajarken man Salomo guna ngikuti Kata Dibata, eme undang-undang Musa. Enda me rahasia kesuksesen Daud sebage raja. Ia labo raja si paling cerdas ntah pe paling hebat iba strategi perang. Ia labo sekalak raja si perpang. Piga-piga kali ibas Kitab Masmur iturikenna kerna kebiarenna. Tapi erkiteken patuh ia nandangi Kata Dibata, enda me sebabna ia jadi raja si lalap ipimpin ras ipasu-pasu Tuhan. Perbedaan raja-raja doni ras raja Israel eme raja Israel harus lit ibas ia undang-undang Musa seh maka ipatuhina undang-undang e bagepe namakenca sebage otoritas si meganjangna, labo dirina jine (bnd. Ul. 17:18-19). Kepentaren situhu-tuhu terjeng lit ibas Kata Dibata. Mbera-mbera Kata Dibata jadi otoritas si meganjangna ibas kegeluhenta kerina Moria GBKP. Mbera-mbera Kata Dibata lit ibas inganta erdahin, bagepe ibas rumahta, seh maka kebenaren Kata Dibata lah si ibegiken kita asangken pemeteh doni enda. Pediatlah kinijilen Kata Dibata mereken semangat kegeluhen man banta. Daud nehken pedah siperpudi man Salomo. Enda ilakoken Daud ngidah kerna sejarah keselamaten eme perpadanen Dibata ras Israel iteruh kepemimpinen Musa ras perpadanen Dibata ras Daud. Intina eme pesan guna ngelakoken kewajipenna alu setia man Tuhan. Jahwe eme Dibatana ertina ia iangkat sebage raja guna ngelakoken erbage-bage tugas man Tuhan. Cara kewajipen e ilakoken ijelasken alu rangkaian kalimat si biasa guna erban gembaren kerna kepatuhen. Istilah-istilah enda teridah kempak hal si seri, eme “bagi si tersurat ibas Undang-undang Musa”. Erkiteken undang-undang Musa mereken man bangsa Dibata cara kegeluhen si lit tujunna. Erkiteken memang undang-undang e eme ketetapen. Erkiteken memang Tuhan ka nge si nuruhsa. Ngkai maka Daud mpedahken enda man Salomo? Lit dua tujunna, si pertama eme kesuksesen Salomo. Kata “sangap” teridah eme ulih kepentaren. Kepentaren erkiteken matuhi Kata Dibata. Tujun sipeduaken menyangkut rencana Dibata. Padan man Daud kerna lalap lit kesusurenna ibas kerajan Israel e lit syaratna, eme kepatuhen raja alu setia, alu pusuh simbages nari. Ibas perpadanen Dibata ras Daud kerna kerajan, raja jadi contoh utama kepatuhen bangsa Dibata. Jadi, kepatuhen Salomo eme carana muat bagin ibas rencana Dibata.

Maksud Daud man Salomo eme gelah ia jadi raja situhu-tuhu. Palasna eme undang-undang Musa, praktekna ibas konteks perebuten kuasa termasuk tindaken tegas nandangi erbage-bage pemberontaken. Kepeken maksud penulis Kitab 1 Raja-Raja enda guna mabai bangsa Israel nimai raja si patuh, si mperdiateken kesetian man Tuhan, bagepe singoge Kitab enda pe ndalanken Kata Dibata e. Man banta, Raja e nggo reh, janah ncidahken bagepe ngertiken undang-undang Musa alu sempurna seh maka padan Dibata igenepi, erkiteken Kristus nggo jadi Raja Kinirajan Dibata seh rasa lalap. Ibas Kristus, kit ape iajuk guna nggeluh sue ras Kata Dibata, muat baginta ibas rencana Tuhan.

Emaka ibas ayat 4 ikataken maka Salomo harus nggeluh alu setia iadepen Tuhan gelah padan Tuhan banci ialokenna. Kesetian ngikutken Tuhan berarti konsisten ibas matuhi Tuhan. Konsisten ibas ngkelengi Tuhan. Konsisten ibas ngikutken Tuhan. Konsisten ibas nembah Tuhan bagepe ersembah man baNa. Kai gunana lit pusuh si nggit berkorban man Tuhan, bahkan nggit kita mate guna Tuhan wari enda, tapi pagi sipersoken ka nge Tuhan e? Kai gunana sipatuhi Ia gundari, tapi bage keadan e seh kal serana, sisilahken me Kata Dibata e? Salomo ipersingeti Daud gelah tetap setia alu ukur simbages nari. Banci nge Salomo setia? Ibas masa umurna nggo metua Salomo ndabuh kubas penembahen berhala. Adi Salomo pe gagal, tentu kita pe harus alu mindo gegeh ibas Tuhan nari. La banci kita la setia man Tuhan.

Lit telu pesan ibas Suplemen PA Moria enda. Pertama, maka kita sebage anak raja pe wajib ngelakoken kebujuren ras dem kekelengen. Sebaga anak Dibata, kita kerina eme pewaris kinirajan Dibata, janah erkiteken sie kita jadi anak-anak Dibata si iarapken pe bersikap bagi Raja ibas bahan khotbahta ndai, alu bujur ras dem kekelengen. Kita iarapken ngelakoken kebujuren labo terjeng guna pemimpin ntah kalak bayak saja. Sayangna kelabujuren pe reh arah dirinta. Kita rusur la bujur ibas kegeluhenta. Labo memang ibas hal-hal simbelin, tapi ibas perbahanen tep-tep wari. Erkiteken sie ingetlah, ibas perbahanenta tep-tep wari maka kita enda eme anak Raja, janah harus me kita bujur ibas kegeluhenta. Peduaken, sanga kita milih pemimpin, maka pilihlah pemimpin si dem alu kekelengen ras dem kebujuren. Ula milih erkiteken perkade-kaden, kepeken si ipilih kita ndai pe labo lit kualitasna. Pilih pemimpin si banci ndalanken kebujuren. Ibas era keterbukaan bagi gundari enda, banci siidah erbage-bage kinilabujuren. Banci siidah ise si mehuli ras si la mehuli. Erkiteken sie mulihken kita ku point si pertama ndai, sebage anak Raja kita pe harus banci njaga kebujuren, terutama guna ia si la pernah iperdiateken kalak. Ibas kita pe seharusna lit standard ganda adi e berhubungen ras kalak si bakal ipilihna jadi sekalak pemimpin. Maksudna standar ganda enda eme: pemimpin si mehuli, jabuna pe sikap, erkiteken kalak si bage me jadi usihen. Sipeteluken, pesan kerna kerehen raja si bujur dem kekelengen, eme Jesus Kristus. Banci nggejapken maka kari ibas kerehen sekalak Mesias, raja simaba pembebasen ras kebujuren man kerina jelma. Raja enda me si erbanca kita tetap banci denga lit pengarapen ibas kegeluhenta. Adi kerinana teridah la mehuli, padan kerna kerehen raja enda erbanca kita ersikap ibas pengarapen.

Kita rusur kal megiken kalak si ncakapken, ndiskusiken kerna pemimpin, baik kerna jelmana ntah pe ibas kaiten pengertinna, dahinna, kedudukenna, rsd arah sekalak pemimpin. Bahkan ibas pertotonta rusur sitotoken pemimpin-pemimpinta gelah ia mimpin alu bujur, benar ras adil. Ibas konteks pemerintah, gelah pemimpin e mperdiateken kesejahteran rakyatna, terjamin keamanenna. Mbue memang arapen jelma man sekalak pemimpin.

Kepeken mbue ka nge pemimpin-pemimpin besar i doni enda banci sukses ibas kepemimpinenna erkiteken ipraktekkenna gaya kepemimpinen Jesus Kristus, eme kepemimpinen sekalak permakan, kepemimpinen si ngelai labo ielai. Kepemimpinen permakan berbeda ras kepemimpinen serigala (kerina cara iakapna halal gelah seh sura-surana). Sebab kepemimpinen permakan mengacu kubas prinsip kepemimpinen 4M: Mengenal, Mengasuh, Mengayomi, Melindungi. Janah kepemimpinen enda ipalasi alu kekelengen situhu-tuhu, kekelengen Dibata. Tujun utamana eme biri-birina selamat ras mbur kerina biri-birina e.

Karakter pemimpin si bage me si ikataken ibas bahan khotbahta enda. Kata kunci ibas bahan khotbah enda eme kepemimpinen si bujur bagepe kepate man kalak si musil, lemah ras tertindas, bagepe pang alu tegas ngukum kejahaten. Jadi, ngerana kerna pemimpin, kita kerina eme pemimpin. Sebab secara dasar pengertin kepemimpinen eme kengasupen mereken pengaruh man kalak sideban, maka sebage kalak sitek kita kerina idilo guna mereken pengaruh man tiap kalak sitek janah nggeluh bagi sura-sura Dibata, eme nggeluh alu bujur ras benar.

Pdt. Andreas Pranata Meliala, S.Th

GBKP Rg. Cibinong

Ogen : Epesus 5:15-20

Thema : “Terbeluh Makeken Waktu”

Enggo biasa ibas kerina Pengkhotbah guna erban perbedaan antara chronos ras kairos. Ibedakenna duana sebage dua mode waktu. Amin pe duana iterjemahken sebage waktu ibas Bahasa Indonesia, masing-masing lit pengertinna situhu-tuhu berbeda. Chronos ncidahken ibas uruten waktu, detik ras menit, sibanci iukur, sedangken kairos eme waktu siibereken Dibata sebage kesempaten (oppurtunity). Ibas Suplemen PA Moria enda, chronos lebih ndeher ras kai siimaksudken ibas kegeluhenta tep-tep wari (keseharian).

Alu pembedaan e, mbue pengkhotbah lebih mengutamaken kairos asangken chronos. La jarang teks Pustaka Si Badia siipakeken ibas khotbah-khotbah guna erban pembenaren pendapat sie siibuat ibas Epesus 5:15-17: “Emaka perdiatekenlah lagu langkahndu. Ola kam nggeluh bagi kalak motu, tapi bagi kalak pentar min. Pergunakenlah kesempaten si lit ibas kam alu mehuli, sabap wari-wari enda la kap mehuli. Dage ola bodoh, tapi pergemetkenlah kai si ngena ate Tuhan guna idalankenndu”. Ibas telu ayat e, Paulus mpersingeti perpulungen Epesus gelah mperdiateken cara kegeluhenna. Kai si mbedakenca, “kalak pentar” ras “kalak motu” salah sadana eme uga kalak pentar ngasup makeken waktu/wari-wari si lit. Kata waktu/wari-wari ijenda make kata Junani kairos, labo chronos. Si menarik, kata pergunakenlah ibas Bahasa aslina ertina eme “nebusi” (redeeming), tempa-tempa kairos e enggo lanai lit ertina erkiteken wari-wari e jahat.

Jadi, kepentaren sekalak jelma icidahken arah kengasupenna ndatken sura-sura Dibata itengah-tengah erbage-bage sura-sura si jahat. Kepentaren sibagenda me ngelebihi kengasupen makeken waktu (kronologi), tapi pe makeken momen ntah pe kesempaten siibereken Dibata (kairologi). Alu kata sideban, kepentaren nggeluh eme seni ndatken kairos ibas tumpuken chronos. Alu bage, situhuna pemisahen antara kairos ras chronos, bagi ilakoken jelma sinterem, situhuna lalit gunana. Ndatken momen kairos si penting itengah-tengah rutinitas chronos memang penting ras perlu, tapi ibas waktu si seri harus ikataken maka kairos labo banci idatken idarat/diluar chronos. Kairos lalap ia perlu chronos guna hadir ras teridah. Momen-momen penting siidahiken Dibata lalap muat ingan ibas ras melekat ibas, labo idarat kegeluhenta tep-tep wari. Ertina ia hadir ibas kegeluhenta tep-tep wari (keseharian).

Erkiteken sie, tek kami sebage penulis Suplemen PA Moria enda kepentaren nggeluh labo terjeng icidahken arah kengasupenta “makeken kairos”, bagi si isaranken Paulus, tapi pe kengasupenta “makeken chronos”. Bahkan, man kami sebage penulis Suplemen PA Moria enda, si terakhir enda ndai “makeken chronos” rusur kal lebih mesera/susah ilakoken asangken si pertama “makeken kairos”. Kesusahenna eme maka kita la pernah banci mastiken alu tepat apakah si ipakeken kita eme chronos ntah kairos. Sebab, la pernah lit Kairos adi lalit chronos, tapi chronos tetap lit amin pe lalit kairos. Emaka, menurut pendapat kami ibas tulisen enda spiritualitas/kiniteken chronos si sehat si banci erbanca kita dewasa guna lebih pentar ndatken, adi perlu erbahan kairos ibas chronos e. Alu erbahan kairos, labo maksud kami ngatakenca maka kita banci nggancihken Dibata ibas ncidahken kairos. Tapi, tek kami maka kerina chronos e jine eme pemere Dibata. Kita lah, alu dem kiniteken, makeken chronos si tempa-tempa biasa-biasa e nalihkenca jadi Kairos si dem alu makna.

Sope jam mekanik itemuken, manusia ngagak waktu alu menyesuaiken diri kubas geraken alam. Alam jadi jam si nampati manusia ngikuti irama doni enda. Detak jantung manusia berdetak raduken deburen ombak i pantai ntah pe sora sue-sue (jangkrik) si ersora ibas tengah berngi. Manusia ngagak umurna alu mpergermetken geraken matawari si pultak ras sundut. Idatkenna posisina i kerangen ntah pe gurun alu mperdiateken/mpergermetken konstelasi ntah pe tata-bintang i langit.

Tapi, kedungenna, jam mekanik erbanca waktu lit ibas tan manusia. Malahen terlalu teratur. Janah akibatna malah jadi ironis. Manusia lanai jadi sahabat waktu. Iakapna maka gundari ia jadi tuan nandangi waktu. Janah alu cara sie, waktu lanai jadi irama pengiring geraken alam, tapi jadi hamba aktivitas manusia si nggo ndauh terpisah arah alam. Janah perubahen enda reh dekahna reh parahna kenca kemajun teknologi reh dekahna erbanca mpedauh manusia arah doni enda nari.

Salah sada kunci spiritualitas si tep-tep wari eme mulihken erteman ras alam inganta tading enda. Alam enda me situhuna si jadi rumahta ibas ndalani kegeluhen tep-tep wari. Tapi, nggejapken alam pe harus berarti erteman ras waktu sebab arah waktu ras alam me Dibata mereken pangan guna ipan tep-tep wari. Alu sikap Jesus ncidahken kebenaren enda, sanga ia ngajari ajar-ajarNa guna ertoto, “Bereken min man kami nakan cukup ibas wari si sendah enda” (Mat. 6:11), ntah pe ibas versi sideban, “Bereken min man kami nakan cukup tep-tep wari” (Luk. 11:3). Alam me ingan kegeluhen manusia si ibassa Dibata mereken pangan man banta guna bertahan nggeluh. Janah alam enda pe lit waktuna jine. Waktu jadi irama si erbanca jantung alam enda lalap berdetak.

Ibas tanggal 7 Mei 2019, Jean Vanier idilo Dibata ibas umur 90 tahun. Ia me pendiri komunitas L’Arche, si ertina “bahtera”, sada komunitas persahabaten man kalak disabilitas mental. Mungkin lit kita si nandai Henri Nouwen si pernah mereken sisa kegeluhenna guna njadiken dirina jadi teman man kalak disabilitas mental i L’Arche. Keputusen Henri Nouwen e ibuatna erkiteken pengaruh Jean Vanier si seh kal megegehna. Kepeken salah sada erta spiritual arah Jean Vanier si lalap erbanca iinget eme pentingna jadi sekalak si erteman ras waktu. Nina ibas tulisenna: Hari ini, anda hidup di musin dingin; percayalah bahwa musim semi akan tiba. Esok, kuncup-kuncup akan muncul, kemudian bunga-bunga dan buah-buah. Engkau tengah melewati sebuah masa yang buruk. Jangan terlalu mendramatisasi segala hal. Jadilah seorang sahabat waktu. Lihatlah matahari yang bersinar, burung-burung yang berkicau, dan bintang-bintang yang bersinar di waktu malam. Engkau pun adalah bagian semesta ini; engkau pun tengah bertumbuh dan diundang untuk berbuah. Nantikanlah dengan kesabaran. Pertumbuhan membutuhkan waktu.

Menurut kami, dunia modern nggo mengubah manusia arah “sahabat waktu” jadi “tuan waktu” ntah pe ironisna mala jadi “budak waktu”. Kai kin pe e, hasil akhirna eme kita jadi musuh alam enda. Jean Vanier nerusken kalimat idatas ndai alu negasken maka salah sada testimoni simbelin arah kegeluhen manusia sebage musuh waktu eme sampah. Ikatakenn ka ibas lanjuten tulisenna: Tidakkah engkau menyadari bahwa di dalam alam tak ada sampah? Hanyalah kita manusia yang menghasilkan dan menolak. Hal ini tidak terjadi di dalam alam. Daun-daun membusuk dan menjadi kompos, yang dipakai untuk mempertahankan kehidupan baru yang akan muncul. Bahkan kematian itu sendiri memberikan kehidupan. Kita adalah bagian dari dunia alamiah tanpa sampah, hanya lingkaran kehidupan dan di mana kematian secara terus-menerus diubah menjadi kehidupan.

Alu produksi sampah si seh kal buena si mpengadi siklus kegeluhen ras kematen si isediaken alam enda. Hal si bage erbanca lebih meter kematen alam sekaligus mencegah munculna kegeluhen arah kematen e. Sampah-sampah plastik si nggo seh kal buena i taneh ras laut, jadi racun-racun si mastiken hal sie.

Uga kininggitenta jadi “sahabat waktu”, bagi iusulken Jean Vanier enda, hadir secara konkret ibas relasinta pribadi lepas pribadi? Emaka kami sebage penulis Suplemen PA Moria enda salut nandangi pemikiren dua kalak teolog kontemporer kerna hal enda. Si pertama eme Stanley Hauerwas si mencoba menerapken konsep “sahabat waktu” arah Jean Vanier enda guna konteks demensia. Mbue kalak si nggo metua (Lansia/Saitun) si mengalami demensia, eme kondisi saraf tertentu si erbanca menurun pengingetna seh maka relasi antar pribadi jadi terganggu. Lit mbue penyebab demensia si banci ikataken kita, misalna pinakit Alzheimer, stroke, multiple sclerosis, rsd. Stanley Hauerwas tek ia maka alu erteman ras waktu merupaken cara simehuli guna jadi teman man sekalak jelma si sangana bergumul ibas pinakit demensia. Ikataken Stanley Hauerwas, “kita lupa bahwa pemberian kita yang paling berharga bagi orang lain adalah kehadiran; cukup dengan hadir … Ketika taka da banyak hal lain yang dapat kita lakukan selain hadir; Anda akan menemukan … apa artinya menjadi seorang sahabat waktu”. Jean Vanier jine ngelakoken olah spiritual sebage sahabat waktu alu ia hadir man teman-temanna si nggeluh ibas disabilitas intelektual. Kehadirenna man bana menuntut ia guna tuhu-tuhu erdame ras waktu.

Terkait denga ras demensia ndai, John Swinton teolog kontemporer sipeduaken ngataken ia si berjuang erkiteken nggo menurun pengingetna mungkin tuhu-tuhu kebenen memorina. Tapi, tetap nge ia ndatken kegeluhen si meherga, sebab ia tetap lit ibas memori-memori Dibata. Pernah John Swinton ngataken bagenda: Bahkan di dalam sesuatu yang tampaknya tak memberi harapan seperti demensia anda dapat menemukan kemungkinan-kemungkinan, sebab Allah adalah satu Allah yang tak pernah melupakan kita, yang berkata, Aku akan selalu ada bersamamu, Aku akan selalu ada bagimu, di dalam segala sesuatu dan di setiap saat. Bukanlah apa yang kita ingat mengenai kita yang berarti, melainkan apa yang Allah ingat tentang kita, dan ini bukan hanya bagi orang-orang dengan demensia, ini bagi kita semua.

Pdt. Andreas Pranata Meliala, S.Th

GBKP Rg. Cibinong

Ogen : Perbahanen Rasul 19:23-29

Tema : Kembangken Usaha Si Mehuli (Pengembangen Entrepreneurship)

Melalui tema pelayanan GBKP Tahun 2019 (tahun silewat) tentang meningkatkan jiwa kewirausahaan (entrepreneurship) warga GBKP tangkas man banda selaku kalak Kristen kai pengertin erdahin. Erdahin man manusia labo sekedar cari makan saja ngenca, atau uga segelah ndatken untung ras banci pebayak diri, tapi erdahin e merupaken cara man manusia lako nuduhken ise kin ia situhuna. Janah terbagesen asangken si e, erdahin merupaken respon manusia nandangi kerina pemere si enggo isehken Dibata ku tengah-tengah kegeluhenna. Alu kata sideban maka erdahin e merupaken bagin kiniteken manusia. Hal si enda me si megati lanai isaksiken manusia bas kegeluhenna. Seh maka ibas ia ndahiken dahinna lanai bo ipakekenna gegeh Dibata ibas pendahinna. Tapi cenderung ia makeken kengasupen si lit ibas dirina, ras uga segelah banci dat untung sebanyak-banyaknya.

Johanes Calvin ngataken erdahin emekap laborare est orare ertina bekerja adalah ibadah. Dulu pekerjaan yang paling penting dan baik adalah yang berkaitan dengan hal-hal religius. Lalu Calvin membuat gebrakan, dimana pekerjaan sekuler adalah sama religiusnya selama kita lakukan dengan tetap mencirikan imago dei dalam setiap yang kita kerjakan. Emaka kai pe pendahin ntah pe usahata, Calvin sangat menekanken “kerja keras, ulet, gigih, hemat” sini ipalasi ku bas pengajaren moral rikutken Kata Dibata.

Ibas teks PJJ ta kitab Perbahanen Rasul 19:23-29, ituriken kerna lit sekalak si tergelar Demetrius sidahinna emekap sekalak tukang pirak. Situhuna dahinna selaku tukang pirak labo salah, sebab dahin enda pe maba hal si berguna, arah si e banci lahir karya-karya seni si kreatif. Tapi, simenjadi persoalan emekap arah pendahinna e ibahanina patung-patung rumah pertoton Dewi Artemis, patung-patung sibahanna e jadi pajuh-pajuhen, ras arah si e melala kal datsa keuntungen (ay. 24). Tentu dahinna enda labo sue ras Kata Dibata. Kehadiran ras pengajaran si ipeseh Paulus sangat mengganggu ia, ras menjadi ancaman kapna sebab banci merugiken usahana, mengurangi pemasukenna. Emaka ipepulungna sierdahinna bagepe kalak si seri pendahinna ras ia, jenari nina man kalak e, “O teman-teman, ietehndu maka kebayakenta rehna arah usahanta enda. Genduari banci idahndu dingen ibegindu kai si ibahani Paulus. Ikatakenna maka patung-patung si ibahan manusia labo dibata. Enggo nterem kalak papak ibahanna, labo saja i Epesus tapi pe menam ibelang-belang Propinsi Asia” (ay. 25-26). Lanjut ibas ayat 27, secara kinitekenna pe terganggu ia kerna pengajaren si i peseh Paulus ras temanna sedalanen. “Berkonspirasi” ia kerina uga segelah usahana tetap banci erdalan. Guntar kuta ibahanna, itangkapna Gayus ras Aristarkus (teman Paulus sedalanen) si atena icelakaina alu naren ia duana ku stadion (ay. 29).

Uga kita ibas ndalanken usaha ntah pe pendahinta kidekah enda? La banci sipungkiri melala tantangen si arus i hadapi para pelaku usaha ntah pe kalak si erdahin. Kidekah enda beragam kal jenis usaha si lit, ermajuna zaman erbeluhna manusia, erbahansa tingginya nilai kompetitif. Tapi ibas masa Pandemi Covid-19 enda, mbue kal usaha si gel-gel sukses ras berkembang, genduari enggo merosot bahkan merugi. Ibas si enda iajuk kita erlajar bagi sekalak perjuma si tetap megermet nandangi perubahen-perubahen musim guna kiniulin sinuan-sinuanna, tentu bage ka min sikap para pelaku usaha ntah pe kalak si erdahin nandangi perubahen-perubahen si terjadi genduari, khususna i era New Normal enda. Labo enda jadi alasen akhirna kita banci menghalalkan segala cara untuk tetap datken untung. Si perlu silakoken emekap tetap kreatif ras inovatif, eme si i gelari entrepreunership (mampu mengubah kotoren jadi emas), ras paling penting sipindo gegeh, kepentaren ibas Tuhan nari.

Bahan PJJ ta sekali enda mabai kita kubas sada perenungen, maka ibas kita ndahiken dahinta ntah pe mengembangken usahata arus tetap siperdiateken nilai-nilai si la bertentangen ras kata Dibata, tapi justru si pindo lalap gegeh bage pe pengertin ku Tuhan selaku Entrepreuner Agung. Ola mbuat keuntungen arah dahinta alu cara si la payo, bertentangan ras hukum bagepe merugiken kalak sideban. Harapen ras tekadta tentu pendahinta sukses bagepe usaha-usaha kita berkembang maju, sebab bage nge si ngena ate Tuhan dingen si e mabai kita jadi sekalak si erdahin alu ngusih perbahanen Tuhan e janah ulihna pe tama kiniulin banta ras tama kemulian Tuhan. Emaka perlu si inget ras silakoken bahwa dahinta la terjeng ngayaki keuntungen saja (Profit Oriented), tapi pe ngayaki kemulian Tuhan (To The Glory Of God Oriented).

Pdt. Melda Tarigan, STh

(GBKP Rg. Pontianak)