Suplemen PA Moria : 1 Raja-raja 2 : 1-4 ;Tgl 14-20 Juni 2020
Ogen : 1 Raja-Raja 2:1-4
Thema : “Pemimpin Si Erkemalangen Tuhan”
Sope mate, Daud mereken pedah-pedahna man Salomo gelah kerajan Salomo banci megegeh. Pedah si pertama eme gelah Salomo pang maba kai si perlu ibabana sebage raja. Daud lanai bo ndekahsa mate janah Salomo la banci lalap erpenalem man bapana Daud. Ia harus jadi megegeh bagepe mbenai pendilona jadi sekalak raja amin pe lanai ije bapana Daud. Enda me pedah si seh kal pentingna arah sekalak bapa man anakna. Sada paksa bapa e pasti mate janah anak e harus ngasup maba beban pendilona jine. Ia harus ngasup amin pe lanai lit bimbingen arah bapana. Enda me pedah si seh kal jilena. Lalit gunana erban anak bergantung man orang tuana. Sekalak anak ise pe ia adi la ia banci mersan tanggung jawab pasti nggeluh alu cara si erbanca mela. Sekalak anak si lalap isediaken kerina kebutuhenna arah orang tuana tentu jadi anak si mpermelaken orang tuana jine. Adi kita ibereken pasu-pasu anak ku tengah-tengah jabunta, ula lalap sediaken kerina man bana, tapi ajarilah ia mersan tanggung jawabna jine.
Hal berikutna eme Daud ngajarken man Salomo guna ngikuti Kata Dibata, eme undang-undang Musa. Enda me rahasia kesuksesen Daud sebage raja. Ia labo raja si paling cerdas ntah pe paling hebat iba strategi perang. Ia labo sekalak raja si perpang. Piga-piga kali ibas Kitab Masmur iturikenna kerna kebiarenna. Tapi erkiteken patuh ia nandangi Kata Dibata, enda me sebabna ia jadi raja si lalap ipimpin ras ipasu-pasu Tuhan. Perbedaan raja-raja doni ras raja Israel eme raja Israel harus lit ibas ia undang-undang Musa seh maka ipatuhina undang-undang e bagepe namakenca sebage otoritas si meganjangna, labo dirina jine (bnd. Ul. 17:18-19). Kepentaren situhu-tuhu terjeng lit ibas Kata Dibata. Mbera-mbera Kata Dibata jadi otoritas si meganjangna ibas kegeluhenta kerina Moria GBKP. Mbera-mbera Kata Dibata lit ibas inganta erdahin, bagepe ibas rumahta, seh maka kebenaren Kata Dibata lah si ibegiken kita asangken pemeteh doni enda. Pediatlah kinijilen Kata Dibata mereken semangat kegeluhen man banta. Daud nehken pedah siperpudi man Salomo. Enda ilakoken Daud ngidah kerna sejarah keselamaten eme perpadanen Dibata ras Israel iteruh kepemimpinen Musa ras perpadanen Dibata ras Daud. Intina eme pesan guna ngelakoken kewajipenna alu setia man Tuhan. Jahwe eme Dibatana ertina ia iangkat sebage raja guna ngelakoken erbage-bage tugas man Tuhan. Cara kewajipen e ilakoken ijelasken alu rangkaian kalimat si biasa guna erban gembaren kerna kepatuhen. Istilah-istilah enda teridah kempak hal si seri, eme “bagi si tersurat ibas Undang-undang Musa”. Erkiteken undang-undang Musa mereken man bangsa Dibata cara kegeluhen si lit tujunna. Erkiteken memang undang-undang e eme ketetapen. Erkiteken memang Tuhan ka nge si nuruhsa. Ngkai maka Daud mpedahken enda man Salomo? Lit dua tujunna, si pertama eme kesuksesen Salomo. Kata “sangap” teridah eme ulih kepentaren. Kepentaren erkiteken matuhi Kata Dibata. Tujun sipeduaken menyangkut rencana Dibata. Padan man Daud kerna lalap lit kesusurenna ibas kerajan Israel e lit syaratna, eme kepatuhen raja alu setia, alu pusuh simbages nari. Ibas perpadanen Dibata ras Daud kerna kerajan, raja jadi contoh utama kepatuhen bangsa Dibata. Jadi, kepatuhen Salomo eme carana muat bagin ibas rencana Dibata.
Maksud Daud man Salomo eme gelah ia jadi raja situhu-tuhu. Palasna eme undang-undang Musa, praktekna ibas konteks perebuten kuasa termasuk tindaken tegas nandangi erbage-bage pemberontaken. Kepeken maksud penulis Kitab 1 Raja-Raja enda guna mabai bangsa Israel nimai raja si patuh, si mperdiateken kesetian man Tuhan, bagepe singoge Kitab enda pe ndalanken Kata Dibata e. Man banta, Raja e nggo reh, janah ncidahken bagepe ngertiken undang-undang Musa alu sempurna seh maka padan Dibata igenepi, erkiteken Kristus nggo jadi Raja Kinirajan Dibata seh rasa lalap. Ibas Kristus, kit ape iajuk guna nggeluh sue ras Kata Dibata, muat baginta ibas rencana Tuhan.
Emaka ibas ayat 4 ikataken maka Salomo harus nggeluh alu setia iadepen Tuhan gelah padan Tuhan banci ialokenna. Kesetian ngikutken Tuhan berarti konsisten ibas matuhi Tuhan. Konsisten ibas ngkelengi Tuhan. Konsisten ibas ngikutken Tuhan. Konsisten ibas nembah Tuhan bagepe ersembah man baNa. Kai gunana lit pusuh si nggit berkorban man Tuhan, bahkan nggit kita mate guna Tuhan wari enda, tapi pagi sipersoken ka nge Tuhan e? Kai gunana sipatuhi Ia gundari, tapi bage keadan e seh kal serana, sisilahken me Kata Dibata e? Salomo ipersingeti Daud gelah tetap setia alu ukur simbages nari. Banci nge Salomo setia? Ibas masa umurna nggo metua Salomo ndabuh kubas penembahen berhala. Adi Salomo pe gagal, tentu kita pe harus alu mindo gegeh ibas Tuhan nari. La banci kita la setia man Tuhan.
Lit telu pesan ibas Suplemen PA Moria enda. Pertama, maka kita sebage anak raja pe wajib ngelakoken kebujuren ras dem kekelengen. Sebaga anak Dibata, kita kerina eme pewaris kinirajan Dibata, janah erkiteken sie kita jadi anak-anak Dibata si iarapken pe bersikap bagi Raja ibas bahan khotbahta ndai, alu bujur ras dem kekelengen. Kita iarapken ngelakoken kebujuren labo terjeng guna pemimpin ntah kalak bayak saja. Sayangna kelabujuren pe reh arah dirinta. Kita rusur la bujur ibas kegeluhenta. Labo memang ibas hal-hal simbelin, tapi ibas perbahanen tep-tep wari. Erkiteken sie ingetlah, ibas perbahanenta tep-tep wari maka kita enda eme anak Raja, janah harus me kita bujur ibas kegeluhenta. Peduaken, sanga kita milih pemimpin, maka pilihlah pemimpin si dem alu kekelengen ras dem kebujuren. Ula milih erkiteken perkade-kaden, kepeken si ipilih kita ndai pe labo lit kualitasna. Pilih pemimpin si banci ndalanken kebujuren. Ibas era keterbukaan bagi gundari enda, banci siidah erbage-bage kinilabujuren. Banci siidah ise si mehuli ras si la mehuli. Erkiteken sie mulihken kita ku point si pertama ndai, sebage anak Raja kita pe harus banci njaga kebujuren, terutama guna ia si la pernah iperdiateken kalak. Ibas kita pe seharusna lit standard ganda adi e berhubungen ras kalak si bakal ipilihna jadi sekalak pemimpin. Maksudna standar ganda enda eme: pemimpin si mehuli, jabuna pe sikap, erkiteken kalak si bage me jadi usihen. Sipeteluken, pesan kerna kerehen raja si bujur dem kekelengen, eme Jesus Kristus. Banci nggejapken maka kari ibas kerehen sekalak Mesias, raja simaba pembebasen ras kebujuren man kerina jelma. Raja enda me si erbanca kita tetap banci denga lit pengarapen ibas kegeluhenta. Adi kerinana teridah la mehuli, padan kerna kerehen raja enda erbanca kita ersikap ibas pengarapen.
Kita rusur kal megiken kalak si ncakapken, ndiskusiken kerna pemimpin, baik kerna jelmana ntah pe ibas kaiten pengertinna, dahinna, kedudukenna, rsd arah sekalak pemimpin. Bahkan ibas pertotonta rusur sitotoken pemimpin-pemimpinta gelah ia mimpin alu bujur, benar ras adil. Ibas konteks pemerintah, gelah pemimpin e mperdiateken kesejahteran rakyatna, terjamin keamanenna. Mbue memang arapen jelma man sekalak pemimpin.
Kepeken mbue ka nge pemimpin-pemimpin besar i doni enda banci sukses ibas kepemimpinenna erkiteken ipraktekkenna gaya kepemimpinen Jesus Kristus, eme kepemimpinen sekalak permakan, kepemimpinen si ngelai labo ielai. Kepemimpinen permakan berbeda ras kepemimpinen serigala (kerina cara iakapna halal gelah seh sura-surana). Sebab kepemimpinen permakan mengacu kubas prinsip kepemimpinen 4M: Mengenal, Mengasuh, Mengayomi, Melindungi. Janah kepemimpinen enda ipalasi alu kekelengen situhu-tuhu, kekelengen Dibata. Tujun utamana eme biri-birina selamat ras mbur kerina biri-birina e.
Karakter pemimpin si bage me si ikataken ibas bahan khotbahta enda. Kata kunci ibas bahan khotbah enda eme kepemimpinen si bujur bagepe kepate man kalak si musil, lemah ras tertindas, bagepe pang alu tegas ngukum kejahaten. Jadi, ngerana kerna pemimpin, kita kerina eme pemimpin. Sebab secara dasar pengertin kepemimpinen eme kengasupen mereken pengaruh man kalak sideban, maka sebage kalak sitek kita kerina idilo guna mereken pengaruh man tiap kalak sitek janah nggeluh bagi sura-sura Dibata, eme nggeluh alu bujur ras benar.
Pdt. Andreas Pranata Meliala, S.Th
GBKP Rg. Cibinong
