Ogen : Masmur 42:1-6

Tema : TEDEH ATEKU KAM O DIBATA (Tedeh Ate Nandangi Tuhan/Ulih Litbang)

Lau e me salah sada hal si penting i bas kegeluhennta manusia. Adi la lit lau si man inemen, kita hanya ngasup bertahan nggeluh sekitar 3-4 wari. Ngkai? Erkiteken fungsi lau i bas daging kulanta seh kel pentingna. Lau e me 80% zat pembentuk daging kulanta, adi la minem kita i bas sada wari saja, umpamana, maka terjadi gangguan i bas metabolisme kulanta ras terjadi dehidrasi (kekurangen cairan). Adi metabolismenta enggo terganggu maka turah erbage pinakit. Bage pe, ibas aktivitas kegeluhenta melala kegunaan lau: erdakan, ridi, nuci, niram sinuan-sinuan, rsd. I bas cataten WHO (World Health Organization) rata-rata sada kalak makeken lau 30 liter i bas sada wari, 10 liter guna konsumsi (minem), 20 liter guna sanitasi, lenga ka termasuk kebutuhen-kebutuhen si debanna. Bage pe belkih, lau pe menjadi kebutuhen pokokna, la hanya untuk inemen guna keberlangsungen geluhna, tapi pe lau enda banci nampati ia selamat arah ancaman kematen. Belkih termasuk binatang si memiliki aroma tubuh si khas, sehingga arah arah aroma dagingna enda jejaknya sangat mudah diketahui binatang predator si ate memangsa ia. Emaka untuk terhindar arah ancaman enda, belkih biasana masuk ku bas lau si maler (sungai), emaka aroma dagingna lanai teranggeh binatang sideban si ate memangsa ia. Bas kalak Kristen Lau Kegeluhen emekap Yesus Kristus, emaka ise si muas rehlah ku IA gelah minem (Joh. 7:37). Ras ise si nginem lau si iberekenNa, lanai ia muas seh rasa lalap (Joh. 4:14). Yesus Kristus hadir i tengah-tengah persekutuan kalak si tek (Mat. 18:19-20).

Teks PJJnta ngambarken ketedehen ate Pemazmur man Tuhan bagi belkih mejehe nandangi lau si maler. Enda me ende-enden Anak-anak Korah si mejehe nandangi Dibata (Rumah Pertoton). Erkiteken sada situasi kegeluhen (berada i taneh pembuangen) sierbahanca ia ndauh ras “Sion” eme siianggap Rumah Pertoton (Bait Allah). Si biasana pemazmur ras bangsa pilihan Tuhan ngelakoken penembahen (kebaktin) secara bersama (komunal) alu ersurak-surak meriah ukur, tapi kidekah ibas masa pembuangen enda lanai banci ilakoken. Ibas ingan sindauh e pe megati ihadapina situasi si la menyenangken, emaka ibas ayat 4 nina, “Suari berngi aku ngandung, iluh ngenca si man panganku. Gedang-gedang wari nungkun imbang-imbangku, “Ija kin Dibatandu?” Pemazmur ngaloken cibiren kalak sideban si megati nungkuni kerna Dibata (Ija Dibatandu).

Situasi si la menyenangken enda erbahanca ingetna uga ndube riahna ukurna banci rembak ras Dibata (ay. 5), banci beribadah ras kalak sierkiniteken, rsd si kerina e lanai banci idatkenna ibas ingan sindauh. Sienda me erbahanca turah ende-enden ketedehen kerna Dibata siigambarkenna bagi belkih mejehe nandangi lau simaler. Mejehe labo terjeng tedeh ate bage saja, tapi lebihen asa sie: Ketedehen si mesangat, seh maka adi la ilakoken banci erbahansa turah kendelen/sedih, la semangat, jadi mejehe nandangi Dibata eme sada ketedehen simesangat erpalasken kiniteken. Biasana ungkapen kata mejehe ipakeken lit latar belakangna (situasi rikut ras jarak) sibanci erbahanca sikap kalak mejehe e enggo dekahen kem, ngelamun rsd. Mejehe nandangi Dibata labo ka erbahanca kita pasif ras ngelamun saja, tapi ibas bentuk kiniteken seh maka siakuken: Adi lakin ras Ia la lit malemna.

Arah tema PJJnta “Tedeh Ateku Kam O Dibata” iajuk kita ngenen ulih Tim Litbang GBKP (tahun 2018) singatakenca bahwa sura-sura perpulungen GBKP guna reh ku PJJ labo jadi sada kebutuhen, tapi terjeng sekedar guna memenuhi aturen si itetapken GBKP. Mehangke entah pe mbiar perpulungen adi ipersingeti Serayan Tuhan ras pengurus sektor erkiteken la ia reh ku PJJ. Alu kata sideban, kegiaten PJJ lenga jadi ketedehen man perpulungen guna jumpa ras Tuhan bagepe senina turang si sada kiniteken. Bage pe konteks Pemazmur ibas bahan ogen PJJnta sekali enda, ngingetken kita kerna kegeluhenta selaku anak Dibata, khususna ibas masa Pandemi Covid-19. Kidekah kurang lebih telu bulan dekahna kita la banci erkebaktin i Gereja bagi biasa, la kita banci ngelakoken kebaktin PJJ, PA-PA, ras kegiaten pelayanan sidebanna. Lit nge ketedehen ate bagi pemazmur ndai? Ketedehen atena igambarkenna bagi belkih si mejehe nandangi lau maler si malem. Adi belkih la ndatken lau emaka kegeluhenna pasti terancam, baik sebagai bahan konsumsi maupun untuk keselamatan nggeluhna. Bagelah Pemazmur merasa hidupnya hampa, penuh dahaga kidekah la banci ersembah i Rumah Dibata. Uga kita? Apakah nggo lit kita si merasa nyaman dengan situasi kita paksa enda? Harapan lalit kita si bage. Tapi bagi, pemazmur tedeh ateta Rumah Pertoton, tedeh ateta tetap rembak ras Tuhan, bersekutu ras kerina anak-anak Tuhan.

Memang ersembah man Dibata labo terjeng reh ku Rumah Pertoton saja, tapi ibas kerina dampar nggeluh (Roma 12:1). Enda labo jadi sada pembenaren man banta bahwa la masalah adi kita la ersembah ku Rumah Pertoton, lang! Siperlu sirenungken eme: lit denga nge ketedehenta guna jumpa ras Dibata ibas Rumah Pertoton atau sebalikna erkiteken siakap jumpa ras Tuhan banci ijapa pe seh maka lanai lit ketedehenta reh ku Rumah Pertoton. Atau entah lit ka sila bagi ukurta sierbahanca lanai lit ketedehenta reh ku Rumah Pertoton? Sie kerina arus siinget maka pengalamen Pemazmur ibas ngertiken maka i Rumah Pertotom eme idatkenna kerinana keriahen ukurna, sebab banci jumpa ras Dibata bagepe radu ras kerina ngawan ni perpulungen Tuhan, emaka jadilah kita sitetap mejehe nandangi Rumah Pertoton.

Pdt. Melda Tarigan, STh

(GBKP Rg. Pontianak)

Ogen : 1 Raja-Raja 19: 1-18

Thema :  “Tetapken Ukurndu, Kekekenlah!”

Erpalasken cerita Nabi Elia ibas telu lokasi (Deleng Karmel, padang gurun, ras Deleng Horeb), sieteh me telu kesaksin kerna telu dahin Dibata si berbeda. Teluna ngajarken kita cara guna memahami Dibata si ngelebihi kerna definisi, doktrin, ras pemeteh manusia.

Nggeluh enda memang aneh. Maun-maun banci kita bage kal biarna nandangi sada hal simehuli si mungkin man piga-piga kalak la ia mbiar, tapi kita nggo mbiar, bagepe sebalikna, pang nandangi sada hal si erbanca mbiar kalak sideban. Lit cerita kerna empat diberu arah empat generasi. Diberu arah generasi sipeteluken si nuriken cerita enda. “Nenekku paling suka bepergian dengan menaiki kereta kuda, tetapi paling takut jika harus naik mobil. Ibuku, ke mana-mana selalu naik mobil, tetapi tidak pernah mau naik pesawat bolang-baling. Aku sendiri, suka sekali naik pesawat bolang-baling, tetapi rasanya ngeri kalau harus naik pesawat jet. Nah, anak gadisku, pekerjaannya membutuhkan ia untuk naik pesawat jet ke mana-mana. Ia menikmatinya, tetapi ia paling takut jika harus naik kereta kuda”. Lit ka cerita kerna sekalak petinju si seh kal pangna melindungi rondongna arah gangguan anak perana iseng, piga pe jumlahna. Tapi, kepeken ia pe mbiar ngidah menci.

Emaka mari siperdiateken ibas Suplemen PA Moria enda kesaksin dahin Dibata sipemena eme: Dibata deleng Horeb. Mari siidah kegeluhen sekalak nabi gelarna Elia. Ibas 1 Raja-Raja 18-20 ituriken uga Elia bage kal pangna, la ia mbiar, ngelawan 450 nabi Baal i Deleng Karmel. Enda la main-main. Enda urusen nggeluh ntah mate. Lebih asa sie, enda urusen Dibata si harus iteki kerina rakyat Israel. Elia sekalak saja naluken 450 nabi Baal. 1 Raja-Raja 18:40 nuriken, 450 nabi Baal e kedungenna igeleh Elia. Tentu, bicara talu Elia, la banci ibayangken jadi kai me Elia e? Elia eme sekalak nabi si luar biasa, perpang, la ia mbiar ngadapi kematen, janah la aru atena ngadapi musuh bage kal buena. Elia versi deleng Karmel si luar biasa e situhuna mberitaken ntah pe menggambarken Dibata versi deleng Karmel, si ngasup ngelakoken pendahin-pendahin simbelin. Dibata sibagenda me simbue idarami kalak, si erbabahan KKR Penyembuhan rohani si kin lalap mbue reh jelma guna ndahisa. Dibata si ngelebihi sakit-pinakit, mengatasi ketidakmungkinan alamiah, bagepe ngelewati jangkauan rasionalitas manusia. Kalak Kristen si terjeng erngena ate nandangi gambaren Dibata sibagenda situhuna terjeng njadiken Kekristenan bagi sada Disneyland Spiritual. Kuasa Dibata si supranatural e lalap itekanken alu berlebihen, seh maka adi sie la terjadi Dibata pe ianggap la hadir. Emaka, kalak Kristen ipaksa gelah banci berbahasa Roh, ernubuat si ibahan-bahani padahal ah ndai labo bernubuat tapi “lu-buat”.

Mari ka siperdiateken ibas Suplemen PA Moria enda kesaksin dahin Dibata sipeduaken eme: Dibata Padang Gurun. Sidatken me sada cerita si menarik ibas 1 Raja-Raja 19:1-8. Ije isuratken kerna Isebel, sekalak ratu, si mengancam guna munuh Elia. Bage kal biarna Elia seh maka kiam ia ku padang gurun. Memang Elia tuhu-tuhu luar biasa sanga munuh 450 nabi Baal, tapi gundari sanga ngadapi Isebel, seh kal ia biarna. Ibas ayat 4 ikatakenna, “Enggo me TUHAN, buatlah kesahku; madin me aku mate!”. Emaka terpedem me Elia ibas keadan depresi ras frustasi. Emaka, kai sinilakoken Dibata? Dibata alu dem kuasa ipegaraNa persembahen tutungen si ibencahi alu lau, gundari isuruhNa malekatNa guna mpemedak Elia bagepe mberesa ia man. Adi siidah sepele kal sinilakoken Dibata enda. Terjeng man. Lalit tanda-tanda sengget ije. Elia versi padang gurun si depresi ras frustasi enda gundari iperkuanken Dibata versi padang gurun. Dibata simpekena-kena ras mereken matawari man kerina jelma. Enda me Dibata mereken roti/pangan tep-tep wari. Kai tujun Dibata mereken pangan man Elia? Ayat 7 ikataken ije, gelah Elia lit gegehna guna ndalani perdalanen sindauh. Sekalak teolog Asia Kosuke Koyama ngataken Dibata sibagenda eme “Three mile an hour God” (Allah yang berjalan tiga mil per jam). Tiga mil (4,8 kilometer) per jam adalah kecepatan seseorang berjalan kaki. Dibata si erdalan nahe. Dibata si ikut erdalan ras bangsa Israel i padang gurun. Dibata si igejapken kita penemaniNa tiap wari. Dibata si mungkin man banta terlalu “biasa-biasa saja”. Tapi, episode padang gurun enda terjeng jeda si kedungenna iterusken alu episode selanjutna: Deleng Horeb. Enda me deleng si seri ras si inangkihi Musa sanga ngaloken pengenehenen Dibata ibas bentuk rambah si la tertutung. Dibata versi deleng Horeb si kuga nge si teridah iadepen Elia?

Mari ka siperdiateken ibas Suplemen PA Moria enda kesaksin dahin Dibata sipeteluken eme:Dibata Deleng Horeb. Ibas ayat 9 isuratken ije Dibata nungkun, “Erkai kam i jenda, Elia?” Dibata nungkun man Elia kerna Elia. Elia eme inti penungkunen Dibata. Tapi, kai jawapen Elia? Ayat 10 ncidahken fakta objektif masalah si ihadapi Elia: Tapi bangsa Israel enggo ngelanggar perpadanenNa ras Kam; iruntuhkenna batar-batarNdu. Aku nari ngenca tading, janah aku pe ibunuhna atena. Tuhu-tuhu enda lalit kaitenna. Penungkunen situhuna eme, “uga keadanndu gundari?” Tapi jawapenna lalap bangsa Israel, bangsa Israel, bangsa Israel. Emaka kai jawapen Dibata nandangi jawapen Elia enda? Ayat 11, “Ndaratken, tedislah kam i lebe-lebengKu i das tampuk deleng enda”. Enda me ia! Idatas deleng ka! Iadepen Tuhan! Seh kal wajarna adi Elia ngarapken pengalamen si seri raduken Tuhan si ialamina sanga ia ngadapi 450 nabi Baal idatas deleng Karmel. Dibata si erkuasa simegegeh e banci erbanca aku megegeh. Payo nge bage? Mis kenca Dibata nuruh Elia ndarat ras tedis idatas deleng. Kenca bage mentas TUHAN, ibahanNa rembus angina kaba-kaba seh maka erbelah ibahanNa uruk-uruk, janah batu iripukkenNa. Tapi TUHAN lalit ibas angin e. Ngadi angin ndai rembus, jenari jadi me linur. Tapi, Dibata lalit ije. Jadi, kuga Dibata hadir? Ayat 12, “kenca nimpet api lit sora medate bagi sora erkusik”. Ije me Dibata hadir. Enda me Dibata si terbuni. Dalam keheningan paling hening, suara tanpa suara, Allah hadir dalam ketidakhadiran.

Blaise Pascal ngataken, “Kekristenan yang menghilangkan iman pada Allah yang tersembunyi adalah Kekristenan yang palsu”. Ia labo Dibata si sibuk kujah-kuje, labo terjeng Dibata simegegeh. Tapi, Dibata si terlalu mbelin seh maka Ia terbuni man banta. Dibata si nggo seh kal jelasna eme Dibata si lebih kitik asangken doktrin kinitekenta ras otakta. Justru erkiteken Ia terbuni, bebas Ia hadir ibas bentuk ras cara kai pe.

Dibata labo objek, uga kin pe belinna Ia. Ia terlalu mbelin guna iertiken ntah pe sibahan teori ras doktrin kerna Ia. Mari sipergermetken cara rukur sibagenda, sisadari ibas keadan frustasi ras depresi, Dibata labo la hadir ibas kuasaNa. Dibata maun-maun milih guna ngelewati gambarenNa situhu-tuhu erkuasa. IdeheriNa bagepe seh kal deherna ras kita seh maka la kita ngasup ngerana kai-kai pe kerna Ia. Ibas titik sibagenda me, salah adi sikataken, “Dibata hadir ibas kegeluhenta”. Sebalikna, “kita hadir ibas pendakep Dibata”. Eme sebabna Elia kedungenna ikataken ibas ayat selanjutna, “itutupina ayona alu jubahna”. Seri sanga Musa i deleng si seri (Deleng Horeb) la ngasup ngidah ayo Dibata. Bedana, kasus Musa, Dibata reh ibas rambah si la tertutung. Ibas kasus Elia, Dibata la hadir arah cara-cara simegegeh e, tapi sora medate bagi sora erkusik. Silence!

Pengalamen hening sibagenda penting kal. Adi siperdiateken kalak Katolik tuhu-tuhu ia menyadari pentingna merenung dalam diam, bagepe nggejapken kerehen Dibata arah keheningan. Kepeken gelah banci kita hening enda pe seh kal serana. Banci kita gelisah. Piga menit denga nge benaken kebaktin ndai pe nggo kita erkusik-kusik. Pustaka ngataken ibas Masmur 37:7a, “Timailah TUHAN alu teneng, sabarlah nimai perbahanenNa”.

Rusur kal kita terlalu sibuk arah kata-katanta seh maka la ngasup megiken sora Dibata ibas keheningan. Sekali jadi ibahan me wawancara kerja guna posisi operator Sandi Morse ibas sada kapal. Ruangen wawancara melala ije kalak si ngelamar dahin e. Seh kal teremna, erkiteken masing-masing ia ngeranai janah nimai panggilen wawancara. Sibuk ia kerina ngeranai seh maka la ibegikenna sora intercom si mpedarat sora bip bip bip, kecuali sekalak pelamar si kundul ia alu teneng bagepe teneng ia nimai. Rempet ia lompat bagepe mengketi ruangen wawancara. Piga-piga menit ndarat ia alu ayo si ceria erkiteken idatkenna pendahin e. Emaka lit piga-piga kalak protes, “aku nge ndai reh leben” Lit ka si ngataken, “kita kerina lenga iwawancarai pe. Uga ka ia nggo ndatken pendahin e?” Ngerana me kalak sindatken pendahin e ndai, “kam kerina situhuna banci ndatken pendahin enda, bicara kundul alu teneng ras begikenndu ndai pesan i intercom”. “Pesan kai?” Nungkun sekalak pelamar. “Pesan ibas sandi morse si ngataken: kalak si pemenana kal megiken pesan enda iarapken bengket kubas ruangen guna ngaloken pendahin enda”.

Wari e idatas deleng Horeb, Elia si nggo mengalami Dibata si luar biasa i deleng Karmel bagepe Dibata si tuhu-tuhu setia i padang gurun, mengalami Dibata situhu-tuhu berbeda eme Dibata si tuhu-tuhu la banci iertiken, Dibata si ngelebihi cara-cara pandang kalak erkiniteken paksa sie. Manusia banci bagepe banci berusaha ngertiken Dibata, tapi tiap kali manusia ngelakokenca, harus me sieteh maka Dibata kepeken lebih asa sie.

Dibata si lalap ianggap hadir arah tanda-tanda sengget, iadepen Elia, gundari justru teridah ibas keheningan. Lit hal luar biasa si terjadi ibas momen sie: Elia menyadari ise Dibata situhu-tuhu janah Elia mengalami pemulihen. Kedungenna, siap ia nerusken tugasna selaku nabi. Dibata bahkan mereken tugas mbaru man bana. Alu kata sideban, perjumpan ras Dibata, alu cara kai pe, la pernah mengijinken kalak guna kiam arah masalahna. Perjumpan ras Dibata mereken kesempaten kentisik man banta guna ngelakoken retret, tapi Dibata la pernah mpediat kita guna kiam arah masalahta. Perjumpan ras Dibata mereken gegeh simbaru guna mengketi mulihken kubas masalah kegeluhen alu semangat, visi, ras sudut pandang simbaru.

Emaka ibas Suplemen PA Moria sekali enda lit 4 hal si itawarken kami si jadi pesan man bandu kerina Moria. Pertama, sidatken me telu kesaksin kerna Dibata. Tek kami kerina isi Pustaka Si Badia bakal mereken kesaksin lebih mbue kerna Dibata. Apakah kita terjeng erngena ate nandangi salah sada gambaren kerna Dibata? Dibata si kuga? Mbue kalak Kristen terjeng erngena ate man Dibata versi deleng Karmel si tuhu-tuhu megegeh ras ngelupaken maka Dibata pe hadir sebage pemelihara kegeluhenta kidekah kita ndalani perdalanen ibas padang gurun, ntah pe Dibata si erbanca kita gelisah si hadir ibas Ia sinik ras keheningan. Peduaken, bahan PA Moria sekali enda malah secara khusus ncidahken seh kal pentingna mengalami kerehen Dibata ibas keheningan, erkiteken rusur ibas situasi hening e, pengalamen erDibata tuhu-tuhu jadi nyata. Kita pe mengalami pemulihen kegeluhen paling nyata. Ibas doni si seh kal gejekna enda (super bising), mulailah kebiasan guna ngergai perjumpan ras Dibata arah keheningan. Peteluken, ula pernah siakap Dibata nadingken kita. Ibas keterbatasenta ngidah bukti kerehen Dibata sibanci igejapken, sibegi, siidah, seh kal mungkinna erkiteken keterbatasenta selaku manusia. Dibatanta eme Imanuel, Dibata ras kita. Sanga siakap Dibata la megiken kita, la kin lah situhuna kita nggo lit ibas pendakep Dibata. Peeempatken, siterakhir kita harus erlajar guna la mendikte Dibata. Adi lang, uga Dibata nggit hadir ras erdahin ibas kegeluhenta? Ingetlah, Dibata e lit, janah kita enda labo Dibata.

Pdt. Andreas Pranata Meliala, S.Th

GBKP Rg. Cibinong 

Ogen : Kuan-kuanen 6:12-15

Tema : Beritakenlah Situhu Dingen Erguna (TI Ras Etika)

Kitab Kuan-kuanen enda itulis sekalak si ibereken Dibata kepentaren ras kengasupen mereken pedah-pedah (nasehat) Dibata, ntah pe mekatep ikataken bahwa kitab enda berisikan “kumpulan ucapan-ucapan bijak.” Kalak si ngoge, megiken ras makekenca, ngaloken pemeteh ras nambahi kepentaren si rehna ibas Tuhan. Inti pengajaran ibas Kitab enda eme mabai anak-anak Tuhan segelah erkemalangen man Dibata sebab eme bena-bena kepentaren (1:7). Secara keseluruhen kitab enda bertujuan untuk mengetahui hikmat dan didikan yang menjadikan anak-anak Tuhan pandai, benar, adil, jujur, ras guna mereken pengetahuan ras kepentaren.

Adi siperdiateken secara menyeluruh kitab Kuan-kuanen enda, penulis mekatep mengkonfrontir antara kalak bujur ras kalak jahat, kalak pentar ras kalak bodoh, si rajin ras si perkisat, ras sidebanna, si enda ncidahken bagem mbagesna perbedaan antara keduana. Kitab Amsal memberikan pilihan-pilihan etis mengenai suatu komparasi realitas (contoh: dari pada membunuh lebih baik hidup penuh kasih). Penulis sedang menjelasken ntahpe memperlihatken secara nyata pertentangen antara hasil-hasil ibas ndarami kepentaren ras menghidupi kegeluhen si bodoh.

Bahan PJJnta Kitab Kuan-Kuanen 6:12-15 merupaken bagian ibas Kitab Kuan-kuanen pasal 6:1-35. Ibas teks enda banci si idah kuga penulis mbereken kata persinget man generasi nguda, bagepe man banta, eme iajuk segelah kerina kalak ertanggung jawab nandangi kegeluhen sesama manusia. Ibas ayat 1-11 isingetken segelah anak-anak Tuhan (apai ka nguda denga) harus hati-hati ibas mbelasken cakap (setiap ucapan yang kita sampaikan sudah menjadi miliki orang lain, banci jadi utangnta), bagepe harus mejingkat, la banci perkisat. Kalak perkisat isuruh erlajar arah perkis. Penulis kitab Kuan-kuanen mewanti-wanti ola kari kerna kisatta erdahin, silakoken dalan si langena ate Dibata, contohna eme ibas ay. 12-15.

Ibas paksa si e kalak jahat mekatep berkonspirasi makeken bahasa tubuh guna menghancurken kalak sideban. Alu cara meritaken berita si la tuhu (ay. 12); mengedipkan mata, bermain kaki dan menunjuk-nunjuk dengan jari agar merasa aman (ay. 13). Kejahaten dalam bentuk gerakan isyarat atau kedipan mata sangat sulit untuk ibuktikan. Memang kai sibahanna labo tereteh kal, tapi sama mematikannya dengan peluru yang menembus jantung. Tapi man kalak sibagenda nina penulis kitab Kuan-kuanen, reh me cilaka ndabuh man bana e maka mate me ia (ay. 15). Dibata labo sinik ngidah perbahanen si jahat, tapi ibalasNa me pagi tep-tep kalak sue ras kai si enggo ibahanna (Rm. 2:6).

Bahan PJJnta enda maba kita ibas sada perenungen, segelah selaku kalak Kristen harus tetap erbahan simehuli, sue ras sura-sura Dibata ibas kai pe dampar kegeluhenta. Khususna sue ras

tema Beritakenlah Situhu Dingen Erguna (TI Ras Etika).  

Pemaken teknologi informasi cukup mbar ibas kegeluhenta genduari (era Revolusi 4.0) ras nggo jadi salah sada kebutuhen ibas kita. Teknologi Informasi enda ulih pemeteh ras kepentaren manusia si ibereken Dibata ibas kegeluhen enda. Mbelin kal kegunanna nandangi kegeluhen manusia adi paslah pemakenta, banci nampati manusia i bas erbage curak komunikasi si perluken. Subuk arah internet, media massa, media sosial, ras sidebanna. Arah kerina kemajun teknologi informasi enda, si rusurna sipake eme arah smartphone (handphone). Tuhu-tuhu adi sipake alu payo kerina teknologi enda nampati kegeluhenta. Kai si iperluken banci alu sada alat saja enggo terjabab kerina. Perlu informasi politik, cuaca, erga-erga barang, rsd enggo lit kerina. Pengiriman berita arah sms, WA, Facebook, Twitter, Instagram, email, gambar, video, transfer duit, genduari kerina banci ilakoken arah smartphone-ta. Ije pe enggo banci si litken Pustaka Si Badia, Tafsiren Alkitab, Kitab Ende-Enden, ras lagu-lagu Rohani, rsd.

Ibas dampar si deban maka melala pemaken Teknologi Informasi, khususna melalui media sosial alu la payo. Perkembangen jaman mabai kita arus bijak ibas makeken media sosial enda. Megati, kurang kita ertanggungjawab ibas kai si enggo siberitaken (posting). Komunikasi ras jelma si enterem bas media sosial banci saja mpeturah perubaten erkiteken kata-kata si menyinggung sekalak jelma. Lit ka mpermbarken berita-berita si la tuhu (hoax) kerna jelma entah kelompok tertentu, seh ka si adun pe ku pengadilen. Lit erbahan postingen si menyinggung soal SARA (suku, agama ras antar golongan), menganggu orang yang lemah (bullying, body shaming) si erbahanca lit ketersinggungan sada ras sidebanna, akun bodong (palsu). Bagepe arah media sosial la sitik penipuan perdagangen, perjudin on line, perselingkuhen ras sidebanna. Enda kerina tentu jadi pengkebet si la erguna ras pe la ngena ate Dibata. Kerina enda jadi sada persinget man banta segelah metenget, megermet bagepe pentar ibas makeken teknologi informasi, khususna pe arah media sosial. Ula bagi si ituriken ibas kitab Kuan-kuanen ndai; meriah kapna meritaken berita si la tuhu, nipu kalak, alu atki pacikna ibahanna rencana-rencana jahat ras i japa pe ibahanna perubaten. Kemajuan Teknologi Informasi ola min menghilangken identitas kita selaku anak-anak Tuhan si berbudaya ras memiliki etika. Khususna selaku kita kalak Karo, yang sangat mengedepankan kearifan lokal kerna marga silima, rakut sitelu, tutur siwaluh, ija arah si enda teridah kerna jiwa siergan, siangken, ras sikeleng-kelengen.

Kita arus pentar makeken kemajuan Teknologi Informasi si lit. Ingat slogan ATD: aku, TI, ras Dibata. Manusia tinepa Dibata rikut ras TI ulih tinepa manusia erkiteken kepentaren ras kengasupen si ibereken Dibata tujunna min mpermuliaken Dibata. Ertina, ibas sitelu e Dibata si utama: TI ngelai manusia, manusia ngelai Dibata alu make TI. Dibata me terpuji sebab IA me si mereken kepentaren.

Perkembangen Teknologi Informasi (TI) genduari seh kal majuna ras maba mbue kegunaan man banta, apai ka ibas situasi Pandemi Covid-19 enda. Banci sipake guna mendukung pelayanen ras kegiatenta, kita tetap banci mpembarken Berita Si Meriah. Gia ibas masa genduari, sementara waktu lanai kita banci bagi semalna pulung-pulung kebaktin, gedung-gedung Gereja harus "tutup", tapi Kata Dibata tetap banci diberitakan, alu pelayanen secara virtual (online) melalui aplikasi-aplikasi si lit. Gereja-gereja bersinergi segelah tetap pelayanan erdalan alu lancar ras mehuli, Kata Dibata tetap banci siberitaken, janah tetap tersentuh ras terhubung kerina ngawan ni perpulungen Tuhan.

Kemajuan teknologi informasi (TI) labo terolangi ras labo banci si pedauh enda ibas kegeluhenta nari. Si penting uga makeken si enda kerina alu mehuli ku biak-biak si erguna ibas kegeluhenta enda (sue ras kita kalak berbudaya ras beretika). Umpamana group WA keluarga, Sektor, kategorial banci ipakai guna ingan beritaken kata situhu dingen erguna, emekap nuriken Kata Dibata, mpeseh kata penjemba (motivasi), nuriken pedah-pedah ras sidebanna. Emaka, mari simanfaatken peluang mberitaken tentang hal-hal situhu ras berguna, melalui media teknologi informasi sigenduari, gelah arah si e pe tetap Terpuji Tuhanta Yesus Kristus.

Pdt. Melda Tarigan, STh

(GBKP Rg. Pontianak)