Suplemen PA Mamre : Epesus 5:16-17 ; Tgl 28 April - 04 Mei 2019

Ogen  : Epesus 5 : 16 – 17

Tema

 Pentar Makeken Kesempaten

·         Tuhu-tuhu enterem pepagi kalak sierkadiola erkiteken nia-niaken waktu, entah pe makeken waktu guna si sea-sea entah pe kurang erguna. Sebab kesempaten biasana la reh dua kali, waktu erdalan terus dingen la danci iulihi entah pe mundur.

·         Dibata erbahan waktu guna ipakeken alu mehuli. Dibata me simada waktu, iberekenNa man banta selaku pemere sini arus ipertanggungjawabken pepagi. Kerina si enggeluh radu ras ibereken waktu ras kesempaten, uga kita ngergai waktu situhuna termasuk uga kita ngergai Tuhan simbereken waktu e.

·         Sibahan contohna bagi dua kalak mahasiswa radu kuliah ibas sada jurusen. Si sekalak pakekenna waktu guna erlajar, empersiapken diri guna ngadapi ujian. Sedangken si sekalak nari la diatena erlajar, sinilakokenna eme ermeriah-meriah saja. Tentuna tupung seh waktu ujian, man si erlajar tentuna jadi keriahen man bana guna encidahken ulihna erlajar sedekah enda. Sedangken si la erlajar, ujian e jadi masalah simbelin man bana, la lit keriahen ibas ujian e, siteridah eme kebodohenna sedekah enda. Tentuna kerinana enda teridah ibas nilai sinidatkenna, teridah me siapai si erlajar ras siapai si la erlajar.

·         Kalak sipentar eme kalak sindarami singena ate Tuhan. Siterpenting man Paulus eme uga carandu erdalan. Sabab adi kita ngerana kerna ija kita erdalan, kerinana la lit siideal, sabab kita enggeluh ibas doni alu kegelapen ras kejahatenna. Adi arapkenndu kin segelah kalak adil ras bujur man bandu, tentuna kekecewan nge siperanindu. Emaka uga carandu ngadapi situasi segelah ula kam gedap, uga carandu enjingkangken nahendu segelah ula tertuktuk.

·         Paulus ngidah lit “kesempaten” sidanci ipakeken ibas kerina kondisi. Gambaren sinipesehna eme bagi istilah “menebus” entahpe “membeli”. Bagi kalak si lit ibas pasar saham, lit situasi pasar saham yang sangat buruk, ija melala saham-saham si ergana ndabuh. Adi kam nukur saham paksa ergana meteruk, kenca bage idayakenndu sanga ergana naik, maka ibas paksa e kam ndatken mbue keuntungen. Bagenda me gambaren makeken kesempaten ibas wari-wari si la mehuli. Tapi analogi saham enda terjeng mbukaken pengangkanta (labo mendorong kita guna nukur saham tah pe bermain saham), sinimaksudken ijenda “ibas situasi seburuk kai pe, lit denga kesempaten si mehuli adi sipake hikmat Tuhan”.

·         Siterutama empergunaken waktu guna keterkelinen. Bahwa kesempaten guna selamat eme sedekah kita enggeluh ibas doni enda; kenca kita mate waktu enggo berlalu, lanai danci iulihi. Kalak sipentar meteh kai si terpenting ras terutama ibas kegeluhenna, segelah ia ula erkadiola rasa lalap. Istilahna lit skala prioritas ibas kita makeken waktu kegeluhenta. Adi sitempatken Tuhan si terutama ibas kegeluhenta maka sidebanna ngumputi alu ratur. Maka siingetlah rusur Matius 6:33 “Tapi si pentingna kal, daramilah lebe KinirajanNa, janah dalankenlah si ngena ateNa, maka icukupiNa kai si perlu man bandu”. Amin.

Pdt. Sura Purba Saputra, M. Th

GBKP Harapan Indah