Ogen            : Johanes 14:23-26

Thema           : “Dibata Si Telu Sada”

Johanes 14:23-26 si jadi bahan PJJnta enda eme rangkaian pesan perpisahen Tuhan Jesus ras ajar-ajarNa. Ibas ayat 22 lit ije ikataken Judas (labo Judas Iskariot), “O Tuhan nggit Kam mpetandaken diriNdu man kami, janah la man doni enda?”. Emaka jawapen siiberekenNa man ajar-ajarNa eme, erkiteken kekelengen nge kerina. Ngkai maka bage? Ibas Tuhan Jesus masalah perjuangen Israel ngelawan kalak Roma eme sada hal si la perlu ituriken paksa sie. Isilahkenna sie janah mabai perhatianna, ras perhatianta, kempak sada hal silebih mbelin, eme uga carana kalak banci nggejapken penemani ras keleng ate Kristus. Tempa-tempa ajar-ajar e nungkun, “ngkai Kam la mpetandaken diriNdu man doni enda?”, tapi itafsirken Jesus penungkunen e alu erti “ngkai Kam mpetandaken diriNdu man kalak si patuh nandangi KataNdu?”. Emaka ulihi kami eme erkiteken kekelengenNa. Pangen akap Jesus e nuriken keleng ate Bapa man bana si ngkelengi Ia. Ia si patuh, si ngkelengi Ia, pasti ikelengi Dibata Bapa, alu cara si la terbatas kerna teori saja. Bentuk kekelengen e eme Tuhan Jesus ras Dibata Bapa pasti reh man bana si matuhi KataNa, janah ringan ras ia. Ibas konteks enda ungkapen “ringan ras ia” labo enda maksudna ulih hasil talenta sekalak jelma, tapi maksudna eme hasil kepatuhen. Teridah ijenda pasu-pasu e ibereken khusus man kalak si patuh, labo man tiap kalak si tubuh peduakaliken (lahir baru).

Kalak si nggejapken penemani Dibata eme kalak si patuh nandangi perintahNa janah ngelakokenca. Alu enda Kristus ncidahken maka kerina siikatakenNa ibas Johanes 14 enda man ajar-ajar la terjeng maksudna man kalak si genduari jadi pengikutNa, tapi pe man kerina kalak si tek man baNa erkiteken pemberitanna. Emaka ibas Johanes 14:23-26 enda, lit ije: kewajipen kalak si ngaku sebage ajar-ajar Tuhan Jesus. Kenca ngaloken perintah-perintah Kristus, kita harus ngalokenca. Sebage kalak si idilo ras ngaku Kristen, kita nggo ngaloken perintah Kristus, siibegi ras sioge. Kita ndatken pemeteh kerna perintahNa e. Tapi, sie saja la bias. Adi kita memang mbuktiken diri jadi Kristen, kita harus matuhi perintahNa. Lit ije martabat kalak si ngelakoken kewajipen sekalak ajar-ajar. Kristus natap ia kerina sebage kalak singkelengi Ia. Labo kalak si beluh ndai, tapi kalak si ngikutken perintahNa. Perlu siperdiateken, bukti si pasti kal kerna kekelengenta man Kristus eme kepatuhen kempak perintah Kristus.

Emaka kai ka upah siiberekenNa man kalak si bage. Upahna luar biasa. Kekelengen man Kristus la pernah sia-sia. Ialokenna me kekelengen Bapa: kalak si ngkelengi Aku, ikutkenNa kap katangKu. Alu bage ikelengi BapangKu me ia. Kita la ngasup ngkelengi Dibata adi la ibereken pasu-pasu man banta guna ngkelengi Ia. Ialokenna me kekelengen Kristus. Kristus pe ngkelengi ia. Sebage Bapa, Dibata ngkelengi manusia, janah Tuhan Jesus pe ngkelengi sebage senina, sebage anak sintua.

Kalak situhu-tuhu ngkelengi Jesus janah tuhu-tuhu patuh nandangi rananNa pasti nggejapken kehadiren ras kekelengen langsung arah Bapa ras Anak. Bapa ras Anak reh man kalak si tek arah Kesah Si Badia. Erkiteken Jesus mpetandaken diri man kalak si tek si patuh arah Kesah Si Badia si mpetandaken kehadiren pribadi Jesus ibassa bagepe nemani kalak si ngkelengi Ia. Kesah Si Badia mereken kesadaren man banta kerna rembakna Jesus ras kinata kekelengenNa, pasu-pasuNa ras penampatNa. Hal enda termasuk dahin utama Kesah Si Badia. Kinatana maka Kristus ndeheri kita arah Kesah Si Badia seharusna erbanca kita menanggapi alu kekelengen, penembahen, ras kehamaten. Emaka perlu siperdiateken maka kekelengen Bapa tergantung ibas kekelengenta man Jesus ras kesetianta kempak KataNa.

Kalak si la matuhi ajaren Kristus lalit kekelengenna man Kristus e janah adi lalit kekelengenna kinitekenna pe labo lit (bnd. 1 Joh. 2:3-4). Sikataken maka kalak tetap selamat amin pe ia ngadi ngkelengi Kristus janah mulai ka nggeluh alu la mehuli, sie bertentangen ras ranan Jesus kerna kekelengen, kepatuhen, ras Kesah Si Badia si ringan ibas kalak si tek.

Kai nge pengakun ntah pe dalil ajaren paling sentral ibas kiniteken kalak Kristen? jawapna: Dibata Si Telu Sada, Dibata si mpetandaken diri sebage Bapa, Anak, ras Kesah. Ija nge bagin ibas Pustaka Si Badia si nuratken ajaren Dibata Si Telu Sada enda? Situhuna, lit piga ayat-ayat ibas Pustaka si ngataken Dibata, Jesus, Kesah Si Badia, tapi lalit ayat secara eksplisit ngataken maka telu pribadi enda eme Dibata Si Telu Sada. Adi bage, kai nge dasar gereja ibas kerina aliren radu ras ngakuken Dibata Si Telu Sada? Adi siperdiateken ibas Padan Simbaru, khususna ibas Johanes 14 si jadi oratenta, kai si tersirat ibas Padan Simbaru teridah ibas penjelasen Jesus maka Ia labo erdahin sisada. “O Pilipus, la kin kam tek maka Aku ersada ras Bapa, janah Bapa ersada ras Aku? Kerina si enggo Kukataken man bandu, labo ibas Aku nari saja. Bapa si ersada ras Aku e me si ndahiken kerina si e” (Joh. 14:10). “Kusuruh pagi Penampat si reh ibas Bapa nari ndahi kam. Ia kap Kesah si ncidahken kebenaren Dibata. Adi enggo pagi Ia reh, Ia kap si ersaksi kerna Aku” (Joh. 15:26). Lebih konkrit ka adi siperdiateken Matius 28:19, “Laweslah ku kerina bangsa manusia, bahanlah ia jadi ajar-ajarKu: Peridiken ias ibas gelar Bapa, gelar Anak, ras gelar Kesah Si Badia”.

Emaka sekitar seratus tahun kenca erbage-bage penggelaren kerna Dibata e ibukuken ibas Pustaka Si Badia, Tertullianus (160-220) Tunisia nari mulai meneliti, membahas, ras nuratken bahan-bahan ajaren si mengimani maka Dibata erdahin ibas diri Jesus ras KesahNa. Ajaren e igelari “Tritunggal” ntah pe “Trinitas”. Ajaren enda isampati ras iterusken Origens (185-254) Mesir nari. Kenca arah erbage-bage pertimbangen, ajaran e ialoken gereja. Kedungenna ajaren enda ibahan Athanasius (296-373) lebih eksplisit, bagi irumusken ibas Pengakun Kiniteken Nicea-Konstantinopel. Ije lit kalimat, “Aku tek man sada Dibata, Bapa si la ersibah kuasaNa ... Aku tek man sada Tuhan, Yesus Kristus, Anak Dibata si Tonggal ... Aku tek man Kesah si Badia ... si reh ibas Bapa ras Anak nari, siraduken Bapa ras Anak e isembah dingen imuliaken ...”

Emaka kenca sada abad nggo lit Pengakun Kiniteken Nicea-Konstantinopel si merumusken ajaren Dibata Si Telu Sada ndai, ikembangken Augustinus (354-430) i Aljazair nari si irumusken ibas Pengakun Kiniteken Athanasius, si rulih-ulih irevisi gereja seh abad waluh. Gelar Athanasius ijadiken judul amin pe ia nggo mate piga puluh tahun sebelumna. Pengakun enda bagenda nina, ibas bahasa indonesia suratken kami, “... Sang Bapa adalah Allah, Sang Putra adalah Allah, dan Sang Roh Kudus adalah Allah; namun tidak ada tiga Allah, melainkan hanya ada satu Allah ... Bapa tidak berasal dari siapa pun, tidak diciptakan dan tidak diperanakkan; Putra berasal dari Bapa saja, tidak dijadikan atau diciptakan melainkan diperanakkan; Roh Kudus berasal dari Bapa dan dari Putra, tidak dijadikan atau diciptakan, melainkan dipancarkan ... Dalam ketritunggalan ini tidak ada yang lebih dulu, atau yang lebih kemudian; tidak ada yang lebih tinggi, atau yang lebih rendah, ...”. Rumusen Pengakun Kiniteken Nicea-Konstantinopel (selanjutna igelari Niceanum) ras Pengakun Kiniteken Athanasius (selanjutnaa igelari Athanasium) ialoken kerina gereja i doni enda. Apakah rumusen pengakun kiniteken e final ras mutlak? Lang! Kerina dogma ntah pe dalil ajaren agama eme produk manusia fungsina sebage alat sinampati kita guna erban ungkapen (mengungkapkan) kai si iteki kita.

Apakah alu pengakun kiniteken enda misteri Dibata Si Telu Sada nggo jelas? Tentu lang. Kerina dogma ntah pe dalil ajaren nadingken tanda tanya guna generasi selanjutna. Pengertinta kerna Dibata tuhu-tuhu terbatas seh maka terjeng meremang saja siidah. Nina Paulus, “Sabap pemeteh ras nubuatta labo dem. Kai siidah kita genduari enda bali ras awih si meremang-remang ibas cermin tembaga; tapi pagin kerina siidah alu petala-tala. Pemeteh si lit ibas aku genduari langa dem; tapi pagin pemetehku e jadi kuh dingen serta me, bali ras pemeteh Dibata kerna aku kuh dingen serta kap” (1 Kor. 13:9,12). Emaka alu bage, apakah ajaren Dibata Si Telu Sada perlu sibela? Lang! Keyakinenta kerna Dibata labo perlu ibela. Tuhu-tuhu arogan kal kita adi kita merasa ngasup mewakili Dibata guna mbela Ia. Adi bage, kai siharus silakoken? Ngataken bujur kita janah terus siperjelas kinitekenta kerna Dibata Si Telu Sada. Ngataken bujur kerna kiniulin Dibata seh maka nggit Ia hadir alu telu cara si akap kami tuhu-tuhu kreatif. Sebaga Dibata Bapa, Ia mpekena-kena ras memulihken kita. Sebage Anak, Ia ngalemi ras nemani kita. Sebage Kesah, Ia mbersihken ras mereken pengaruh ibas pusuhta. Kai ertina e, labo sieteh, tapi banci sigejapken ras siungkapken.

Bapa, Anak ras Kesah Si Badia lalap radu ras hadir ras ndahiken dahin si seri (penciptaan, penyelamatan, dan penebusan) masing-masing alu peran ras tugas si jadi porsina guna erbahan dahin e jadi nyata. Ibas karya penciptaan, misalna: Sang Bapa adalah penciptaan, Sang Anak membuat karya penciptaan itu menjadi nyata, dan Roh Kudus memampukan ciptaan itu menyadari keberadaanNya sebagai ciptaan Allah dan karena itu menjalani kehidupannya menurut teladan yang ditunjukkan Allah kepadanya. Dalam hal keilahian, tidak ada pribadi Allah yang di depan, pribadi Allah yang di tengah, dan Allah yang di belakang. Ketiga pribadi itu sama-sama di depan dan sama-sama di belakang. Pribadi ilahi yang satu hanya mau dikenal dalam kebersamannya dengan dua pribadi yang lainnya sebagai satu Allah.

Sipelajari Doktrin Trinitas (Dibata Si Telu Sada) eme guna kita ncidahken usahanta membahasaken Dibata alu telu kata eme Dibata e lebih mbelin asangken kata-kata manusia janah kerina bentuk usahanta guna erban gambaren keberadan Dibata. Nina Karl Barth, “Allah ada di surga dan kita di bumi”. Augustinus pe ngataken, “Allah adalah pencipta dan kita hanyalah ciptaan”. Kata-kata ntah pe bahasa siipake kita guna erban gambaren kerna Ia pe tuhu-tuhu terbatas. Uga ka mungkin bahasanta si terbatas enda banci menampung Dibata situhu-tuhu la terbatas? Johanes Calvin ngataken hal si seri, tapi ibas ungkapen si berbeda ibas bahasa Latin: finitum non capac infiniti, si terbatas la banci menampung si la terbatas (yang terbatas tidak dapat menampung yang tak terbatas). Enda labo berarti maka usahanta membahasaken Dibata merupaken sada spekulasi. Lang! Bahasanta memang terbatas. Dibata si la terbatas tuhu-tuhu tehna kerna keterbatasenta, tapi ibas kiniulinNa nggit Ia makeken bahasanta si terbatas guna mengkomunikasiken diriNa. Enda sada pasu-pasu si harus sikataken bujur. Salah sada bentukna eme makeken bahasanta si terbatas e guna mberitaken Dibata si la terbatas alu kesadaren maka kai siikataken kerna Dibata la pernah ngasup erban gambaren Dibata e alu sempurna. Gambarenta kerna Dibata lalap merupaken gambaren si lenga dung, tapi harus lalap iulih-ulihi. Karl Barth erban gagasen si menarik kerna hal enda, eme, “Mengatakan hal yang sama dalam kata-kata yang lain”. Ngataken hal si seri alu kata-kata sideban seh telu kali.

Gereja ibas usahana situhu-tuhu guna menanggapi Dibata simpetandaken diri, ngaku tek man Dibata sebage “Tuhan yang ada di atas kita”. Ia lebih mbelin asangken kerina gagasen, perukuren ras pandangenta. “Tuhan di atas kita” sie me si nepa kita ras erbahan kerinana jadi lit. Pengakun enda irumusken secara konkret ibas pengakun kiniteken man “Dibata selaku Bapa”. Ibas pengalamen pergaulen ras Dibata, gereja minter menyadari maka pengakunna nandangi Dibata sebage “Tuhan di atas kita” kepeken lenga bias. Dibata selaku “Tuhan di atas kita” tuhu-tuhu seh kal dauhna. Pengalamen manusia ras Dibata sibagenda la bage, eme ndauh ras la terdeheri. Dibata sinidatas e tuhu-tuhu ndeher ras manusia. Ia labo terjeng lit sebage Bapa. Lebih asa sie, Ia pe igejapken sebage senina. Erkiteken pengalamen enda, gereje terdorong guna mbelasken mulihi pengakun kinitekenna. Sebage penegasen pengakun kerna Dibata sebage Tuhan sinidatas, gereja negasken ka maka Dibata e radu ras eme “Tuhan di antaras kita”. Ia labo saja ndauh ras mesera ndeherisa, tapi pe Ia lit itengah-tengahta, jadi salah sada diantara kita. Pemahamen kiniteken enda lit ibas pengakun kerna “Dibata Anak”. Anak e me sierbanca sitandai pendahin Bapa. Adi sedekah enda Bapa e terbuni. Ibas Anak e lanai Bapa e terbuni. Anak e me wujud diri Bapa si sempurna. Ertina, icidahken Anak e man banta ise Bapa e. Ibas diri, kegeluhen, ras dahin Anak e banci me siidah Bapa e. Emaka ikataken me Anak e Imanuel: Dibata itengah-tengahta. Uga kin pe iulih-ulih pengakun kerna Dibata si sada ibas dua kata tuhu-tuhu teridah nggo sikap. Gereja tetap merasa lit kal kerna Dibata e si lenga terakomodasi. Lit dimensi sideban silenga ikataken kerna Dibata e adi pengakun ndai ngadi ije. Pengalamen pergaulen manusia ras Dibata ncidahken maka Dibata pe ringan ibas kita. Erdahin Ia labo terjeng ras kita, tapi pe ibas kita guna nalihken kelemahen ras keterbatasenta jadi gegeh ras kesempurnan. Ibas kesadaren enda me gereja sekali nari ngakuken kiniteken si seri man Dibata alu kata-kata sideban. Iakukenna me Dibata e sebage “Tuhan di dalam kita”. Dibata Kesah Si Badia jadi kata kunci guna dimensi sipeteluken arah pengakun gereja kerna Dibata. Ise nge Kesah Si Badia e? Ia me pribadi peteluken ibas Dibata Si Telu Sada. Dibata Kesah Si Badia eme pribadi si lalap bergerak ndarat ibas Bapa menuju kempak Anak janah arah Anak nari menuju Bapa. Ibas keberadanna enda, Dibata Kesah Si Badia eme persadan antara Bapa ras Anak. Dibata Kesah Si Badia eme sirkulasi ntah pe geraken siigelari ibas Dibata Si Telu Sada. Ibas pengalamen perjumpanna ras Dibata, gereja mengalami maka Dibata reh man bana labo terjeng ibas sada cara, tapi telu cara. Dibata mpetandaken diri man gereja sebage Bapa Anak, ras Kesah Si Badia, ntah pe ibas ungkapen si lebih akrab ibas cuping kalak Indonesia: Allah di atas kita, Allah di antara kita, dan Allah di dalam kita.

Pdt. Asnila Br. Tarigan

GBKP Rg. Cijantung

Ogen  : 1 Petrus  5 : 2 - 4   

Tema  :  “Mpermakani Rarasen Biri-Biri Dibata”

(Ngataken Bujur Ibas Enggo Dungna Perdalinen Pemilihen Pertua-Diaken)

I.      Kata Perlebe

Patut kal kita ngataken bujur man Tuhan. Enggo itaruhkenNa gerejaNa GBKP si malem enda ndahiken dahin sekali ibas 5 tahun eme pesta iman “Pemilihen Pertua-Diaken” periode 2019-2024. Secara umum kerina tahapen-tahapen si lit ibas dahin enda enggo erdalan alu mehuli. Mulai kin tahap sosialisasi, pembinan man ngawan, terus ku pemilihen bakal calon ras penetapen calon. Ilanjutken ku pemilihen secara runggun. Kenca si e erbahan kursus man calon Pertua-Diaken. Jenari pengukuhen ras penangkuhen. Lit denga runggun lenga seh ku pelantiken BPMR si mbaru ras penetapen seksi/ komisi. Tapi secara umum buen runggun-runggun enggo ngelakokenca. Bageme Dibata ibas Tuhanta Jesus Kristus Simada Gereja nggo ngendesken dahin pelayanen e man banta Pandita, Pertua-Diaken. Kita me si igelari serayan Dibata, aron Tuhan. IendeskenNa biri-biriNa eme perpulungen man banta serayanNa guna si permakani ras si kepkep alu mehuli bagi si ngena ateNa.   

II.    Isi

  Surat 1 Petrus enda ialamatken man kalak Kristen i bagin utara Asia Kitik (Turki). Kalak Kristen si merap marpar enda sangana ngenanami melala kiniseran erkiteken kinitekenna. Petrus ngerana man pertua-pertua perpulungen i Asia Kitik enda (ayat 1). Ipindona gelah pertua-pertua e mpermakani rarasen biri-biri si sangana ngenanami kiniseran. Pendilo Petrus enda ngingetken man banta uga ndube Tuhan Jesus jine nuruh Petrus mpermakani biri-biriNa. Sabab Petrus pernah mersoken Tuhan seh 3 kali. Mbuktiken kerna keleng atena man Jesus, ipindoNa gelah Petrus mpermakani perpulungenNa (Johanes 21:15-19). Si eteh ras-ras uga tutusna Petrus ndahiken persuruhen Tuhan Jesus e. Lanai sitik pe ia mbiar mpeseh kebenaren Kata Dibata aminna i lebe-lebe pejabat ras penguasa. La ia surut aminna ia iancam ras ipenjaraken. Uga ia tutus mpermakani rarasen e bageme ipindona man pertua-pertua bas mpermakani. Rarasen biri-biri (gereja/ perpulungen) e Dibata kap punana. Janah Dibata si merekenca man pertua-pertua e. Erkiteken si e Petrus mindo  gelah pertua-pertua e ngepkepsa alu ukur meriah bagi si ngena ate Dibata, ola alu ukur mberat (ayat 2a).   

  Petrus ngingetken man pertua-pertua e kerna motivasi si payo dingen mehuli ibas mpermakani dingen ngepkep perpulungen. Sipemena: ola ngelai erkiteken mata duiten tapi erkiteken ukur ersuruhlah guna ngelayani (ayat 2b). Sipeduaken: ola erkiteken atendu merentahi perpulungen, tapi bahan diri jadi usihen man perpulungen e (ayat 3). La banci perayakenna kerna kekuasan doni tapi pelayanen.

 Petrus ngingetken maka lit ulih, upah ibas mpermakani ras ngepkep rarasen biri-biri Dibata. Upah enda denggo ialoken. Upah enda ialoken asum reh pagi Kepala Permakan, Permakan Situhu-tuhu eme Tuhan Jesus peduakaliken. Man kalak si tutus mpermakani ras ngepkep perpulungen ialokenna me rudang-rudang tanda kehagan si la ermelus-melus (ayat 4). Rudang-rudang si merim si la ermelus-melus enda me tanda kehagan ras kemenangen. 

III.   Pengkenaina

1.      Mpermakani eme sada dahin ibas bidang peternakan. Mpermakani membutuhken kemeteruken ukur, ketetapen ukur ras kinigenggengen. Mpermakani la terjeng mere pangan/ gagaten ngenca. Tapi pe mere minemsa, nambarisa kune sakit, mbalutisa kune luka, njagasa gelah ula lalar, ndarami seh dat si enggo ndempar, ras njagasa kune lit rubia-rubia si meliar atena njerngem biri-biri e.  Bageme filosofi, jiwa ras semangat dahin enda ibaba ku bas dahin serayan Tuhan. Tuhan Jesus jine ngajarken kerna si enda. Jabaten Pandita, Pertua ras Diaken eme jabaten si enggo itetapken Dibata lako mpermakani ras ngepkep perpulungenNa.  

2.      Tema: “Mpermakani Rarasen Biri-Biri Dibata” (1 Petrus 5:2-4). Mpermakani rarasen biri-biri Dibata dahin si mehuli kap (1 Timotius 3:1). Emaka permanilah rarasenNa rikutken si ngena ate Dibata. Ingetlah janjita sope kita ikukuhken ras itangkuhken. Ninta ndube, “Tuhu bage ateku”. “Tuhu bage ateku” ertina kita erjanji ras komitmen lako tutus ndahiken persuruhen Tuhan. Si dahiken bagi si ngena ate Dibata. Labo ninta ‘tuhu bagi ateku’. Beda kal “Tuhu bage ateku” ras “Tuhu bagi ateku”. Aminna 1 huruf ngenca bedana tapi ertina seh kal petembilna. Sipemena, kita mpermakani bagi si ngena ate Dibata. Sipeduaken, kita mpermakani bagi ngena ateta saja, ate-ateta saja si ban. Adi bagi ateta (ukurta) nggit kita. Adi lang la kita nggit. Si darami lalap alasenta ngelak ras nulak dahin ras tanggung-jababta.    

3.      Mari si pepayo motivasi/ perayakenta bas mpermakani. Gelah kune nggeduk si pepinter, ras adi melket si murniken. Adi perayakenta terjeng gelar si merim ngenca marilah si pekena. Perayaken terjeng gelar ngenca teridah kap arah kisat ngelai, kisat ndahi perpulungen. Ola kal perayakenta terjeng gelar ngenca. Ola ngelai erkiteken lit canna, ndatken keuntungen materi, doni. Ingetlah maka kerangapen nangdangi duit eme sumbul kerina kejahaten (1 Timotius 6:10). Ngelailah erkiteken ukurta ersuruh ras  meriah. Melayanilah apa adanya, bukan karena ada apa-apanya. Bagepe ola perayakenta guna ndatken kekuasan. Gelah banci kita merentahi kalak. I gereja la inganna merentahi tapi ersaksi ras ngelai.

4.      Jadilah Pt-Dk usihen si mehuli man perpulungen. Jadi teladan ibas perukuren, pengerana, kejingkaten, kemeteruken ukur, erkeleng ate (bdk. 1 Timotius 4:12). Uga si tuhuna, kinatana: mpermakani ntah justru nuntut gelah ipermakani, ngelai ntah ielai, jadi usihen ntah jadi pandangen? Mari si renungken alu mbages. La kinlah kita jadi batu antuken erkiteken malas, sombong, meganjang ukur ras sok kuasa? Ula kal sempat jadi si enda bas kita serayan Tuhan.

5.      Kita mpermakani alu tutus, patuh ras setia gelah meriah ukur Kepala Permakan eme Tuhanta Jesus Kristus. Enggo isikapkenNa upah man banta eme rudang-rudang si la ermelus-melus si jadi keriahen, kehagan, kemalemen ate ras kemenangen (bdk. Ketangkasen 2:10c). Si aloken me upah e tupung kerehenNa peduakaliken. Situhuna gundari nari pe pasu-pasuNa si aloken ras si nanami ibas kita mpermakani rarasenNa.             

III.   Diskusi

1.        Biak-biak perman si kuga nge si perlu iusih i bas kegeluhenta?

2.        Dukungen kai nge si banci si bahan man Pertua-Diakenta i bas periode enda?

 Pdt  Juris  Tarigan

GBKP Rg Depok – Lenteng Agung 

Ogen           : Sakaria 10: 1-3

Tema : Pindolah Man Tuhan

 (Entrepreneurship: Okultisme)

Piga-piga waktu silewat, Indonesia sempat ngenanami kemarau/kekeringan si luar biasa. Biasana kenca seh bulan alu akhiren “-ber”, Indonesia memasuki musim perudan. Tapi ibas paksa si udan pe tempa-tempa segan nusur i Indonesia enda. Sempat sekali jadi piga-piga daerah khususna s iingani kalak karo erbahan ritual ndilo wari udan. Turah penungkunen ije, adi silakoken ritual sibage, situhuna kita sangana mindo udan man ise?

Peristiwa si ehampir mirip ras kai sijadi bahan oratenta sekalenda. Ibas negaranta Indonesia, dua ngenca lit musim. Musim perudan ras musim kemarau. Tapi i Israel bagepe daerah-daerah si beriklim Sub-Tropis, lit 4 musim eme: musim semi, musim panas, musim gugur ras musim dingin. Ibas musim semi, tentuna sinuan-sinuan mulai bersemi, bunga-bunga terlak ras biasana melala udan paksa musim semi, sementara kenca mulai masuk kubas paksa musim panas, udan biasana mulai berkurang, janah pe suhu udara lebih lasna asa si biasa. Logikana, enterem jelma ngarapken udan ibas pendungi musim semi guna jadi persiapen ibas memasuki musim panas.

Masalahna man ise kita mindo— udan e? kata Dibata jelas ngataken maka kita arus mindo udan man Tuhan Dibata, arusna kin pe man Dibata ngenca (ay. 1a). engkai maka bage? Tentuna erkiteken Dibata nge sinjadiken doni ras kerina isina (kej. 1:1-31). Adi Dibata sinjadikensa, emaka ia nge sierkuasa penuh nandangi iklim ras musim. Dibata ngasup penusur kemarau si la erngadi-ngadi seh telu tahun la nusur udan (Jak. 5:17, 1 Raj. 18:1), tapi Dibata pe ngasup penusur udan simeder guna ndungi kemarau e (1 Raj. 18:45). Lebih asa si e, Dibata pe ngasup penusur udan 40 wari 40 berngi seh maka lau ndemi doni ras engkernepken tinepa si lit ibassa seakatan tinepa si ringan ibas Bahtera Nuh (Kej. 7:12).

ÚÚÛDibata erpadan penusur udan meder man kerina kalak si mindo man bana (ay. 1b). lit tersurat ibas pustaka si Badia “Pindolah tentu idatndu” (Mat. 7:7). Pindolah man Dibatakai saja pe keinginenta banci sip indo man baNa. Amin pe banci saja labo kerina pemindonta e ijababNa alu kata “Yes” tapi silang-langna kita enggo mindo man baNa ras e encidahken maka siakui Dibata e selaku Dibata sierkuasa nandnagi kegeluhenta. Bali bagi sekalak anak si mindo man bapana, tentuna bapa e labo mungkin mereken batu adi anakna mindo Roti (Mat. 7:9-11).

Ibata ngelarang kita mindo man sideban seakatan man baNa saja. Ibas konteks penulisen kitab sakaria enda, senangen iakap bangsa Israel mindo petunjuk ras mindo pasu-pasu nandangi gana-gana si ipajuh, guru sibeluh ngoge nasip, ras guru sibaso. La ia nungkun man Dibata, situhu-tuhu jadi Dibata sierkuasa nandangi kegeluhen bangsa Israel. Tek kal bangsa e nandangi kai siibelasken guru sibeluh ngoge nasip ras gru sibaso e. Padahal kai si ikataken guru-guru e labo tuhu. Lalit kepeken gunana mindo petunjuk ntah pe nasehat man guru sibeluh ngoge nasip ras guru sibaso e. alu ngelakoken hal sib age akhirna bangsa Israel pe ndauh ibas Dibata nari, merap marpar bagi biri-bir si lalit permakanna. Uga ningen Dibata mpermakani bangsa Israel adi bangsa Israel sendiri pe la nggit ipermakani Dibata? Senangen iakapna ndarami sierbahanca senang pusuhna arah belas-belas guru sibeluh ngoge nasip e.

Bahan renungen enda, ngajuk kita guna niksiki dirinta, ntah pernah sekali jadi sipindo petunjuk man dukun, peramal ntah “orang pintar” sideban. Tapi arusna, paksa kita netapken pusuh ras kinitekenta guna tek man Dibata, ertina kit ape arus tek sepenuhna man Dibata. Ibas situasi sikugapana pe, arus me kita erpengendes man Dibata. Teklah kita tuhu-tuhu man Dibata sebab Ia me Dibata sierkusa ras simere kegeluhen man banta kerina manusia tinepaNa.

Pdt.Abdi E.Sebayang,M.Th.

GBKP  RG  Graha Harapan