Ogen  : 1 Tesalonika 5:19-24

Thema  : Ujilah Lebe, Cikep Si Mehuli

Kemajun teknologi sangat mempengaruhi kebiasan manusia tiap wari, termasuk seh ku cara beribadah pe. Ibas jaman lenga lit buku, Sepuluh Pedah Musa itulis ibas dua batu. Perkembangen jaman erbahanca e lanai praktis, mberatsa, emaka kotbah nabi-nabi isuratken ibas kulit kayu bagepe kulit rubia-rubia, kenca itemuken pengolahan kertas isalihken me isi Pustaka ku bentuk buku cetak, gundari enggo banci isimpan ibas bentuk file/data ibas handphone Android.

Surat 1 Tesalonika si jadi bahan PJJnta: 1 Tesalonika 5:19-24merupaken contoh man banta kerina kerna pemaken teknologi surat-menyurat/tulis-menulis ibas jamanna si erguna seh wari enda man banta eme penulisen Berita Si Meriah man perpulungen Tesalonika, si itulis man perpulungen Tesalonika. Bahan PJJnta enda ngerana kerna pedah si perpudi ras salam si ipeseh Paulus man perpulungen Tesalonika. Ola Ambati pendahin Kesah Si Badia, sebab Kesah Si Badia e me si nampati kita ibas kerina kelemahenta, si negu-negu kita ibas kerina pertoton ras pengataken bujurta. Kesah Si Badia e carana erdahin iandingken bagi api, alu nerangi, mpegeluhken, bagepe mbersihken pusuh manusia. Kita harus metenget gelah la si Ambati ntah pe la si beneken Kesah Si Badia erdahin ibas kegeluhenta. Bagi api si banci mate erkiteken keri bahan bakar, bage ka pe banci mate Kesah Si Badia adi la sipakeken ibas kegeluhenta. Ola kam anggap enteng nandangi berita kerna sura-sura Dibata. Paulus erban perbandingen alu meneken pendahin Kesah Si Badia ibas kegeluhenta berarti anggap enteng me kita nandangi berita kerna sura-sura Dibata eme ngajarken Kata Dibata ntah pe ngaloken Kata Dibata. Erpenulak nandangi berita kerna sura-sura Dibata banci erbanca bene kuasa Kesah Si Badia e ibas kita kalak si tek. Ayat 19-20 enda alu jelas ncidahken maka perpulungen sideban selain perpulungen Korinti ndatken karunia rohani (pemere Dibata) ibas ibadah umum. Perdiateken alu mehuli maka amin pe perkatan-perkatan kerna nubuat (berita kerna sura-sura Dibata) la banci ianggap enteng, tapi pe labo ka banci ialoken adi la isiksiki alu mehuli (siksik lebe makana tindes). Perlu ipebetehken kami maka kata Junani kerna karunia rohani (pemere Dibata) si berkaiten kerna ayat 19-20 enda eme kharisma biasana iterjemahken sebage “pemere Kesah”. Kata enda menekanken kiniulin Dibata ibas mereken kengasupen ras tanggung jawab khusus man pengikut Kristus. Pemere-pemere e imaksudken guna nampati pelayanenna guna ngelai kalak si lenga nandai Dibata. Pemere-pemere e pe imaksudken guna mpegegehi kula ni Kristus (perpulungen) arah kegeluhen si dem kemalemen ate, kedamen, ras pelayanen bagepe erpenembahen alu payo. Pemere-pemere Dibata lit dua jenis: 1) pemere si ibereken Dibata guna kepentingen perpulungen secara keseluruhen, 2) piga-piga kengasupen/kemampuan khusus man kalak tertentu guna ngelakoken sada dahin ntah pe kebutuhen khusus ibas kegeluhen perpulungen. Kai pe ujilah lebe. Persinget enda penting, guna nguji kerinana. Sebab, amin pe harus ngergai pengajaren, kita la banci tek bage-bage saja kai si isehken man banta, tapi harus si uji lebe alu Pustaka Si Badia ras kesaksin kegeluhen. Kita harus niksiki Pustaka Si Badia, guna ndarami apakah si katakenna benar ntah lang. Paulus meteh maka labo kalak Kristen ngenca si mengklaim lit ibas ia kesah ntah pe pengenehenen-pengenehenen ntah pe ajaren-ajaren khusus ibas Dibata nari. Emaka perpulungen harus menguji kerinana si ibegina guna mastikenca, sue ntah lang ras si iajarken Paulus erpalasken Pustaka Si Badia. Silahken kerina si jahat. Enda merupaken cara si mehuli gelah la kita itokohi erbage-bage pengajaren palsu (bnd. Joh. 7:17). Ukur si melket ras kerina perbahanen jahat si ipediat bage saja ibas kegeluhen, bakal cenderung mpeturah kesalahen-kesalahen si banci erbanca kita mate ibas perukuren. Sementara pusuh si bersih, kegeluhen si pinter, mabai kita guna ngaloken ras ngkelengi kebenaren. Erkiteken sie, harus sipedauh kejahaten ras kerina kemungkinen si jahat erkiteken dosa. Dibata, si mereken kemalemen ate man banta, erbahanca kam badia ibas kai pe; janah Ia si engkawali kam, kesahndu, tendindu ras kulandu bersih ibas kesalahen nari asum kerehen Tuhanta Jesus Kristus pagi. Dibata si ndilo kam e setia kap, janah Ia si erbahanca maka si enda banci jadi. Kemalemen ate ijenda ertinalebih asangken terjeng kemalemen ate pusuhntah pe lalit si man tangkelen. Kemalemen ate maksudna ibas ayat enda eme mencakup kemalemen ate, ketenengen ras pemulihen hubungen antara teman sada kiniteken ibas perpulungen. Sebab Dibata kap si erbahanca pagi kerina jadi sanga kerehenNa peduakaliken.

Kai pesan si banci idatken arah bahan PJJnta enda? Kesah Si Badia e ibereken Dibata man banta guna negu-negu kita ibas perdalanen kegeluhenta. Ertina jadilah kita kalak si pentar (berhikmat) makeken pemeteh/teknologi si ibereken Dibata man banta. Ula sijadiken pemeteh/teknologi e guna ncedai kalak sideban. Gundari ibas masa-masa Pandemi Covid-19 melala kal kita si berdebat kerna banci ntah la banci gereja nehken pelayanen alu erbahan ibadah online. Pemeteh/teknologi si ibereken Dibata man banta sipakeken sie kerina guna jadi sarana gelah pelayanen banci tersehi alu mehuli. Adi ateta lebih nyaman alu metode kebaktin bersama ras keluarganta alu la make sarana ibadah online (live streaming, khotbah arah youtube), silahkan saja si penting kita tetap nembah man Dibata ibas jabunta masing-masing. Adi ateta lebih nyaman alu metode kebaktin bersama ras keluarganta alum aka sarana ibadah online akap kami sie labo ncedai. Si penting ula siambati adi Kesah Si Badia e mabai kita guna bersekutu ras Tuhan ibas jabunta. Bukan lagi waktunya berbedat tapi berbuat. Mari kita pe sipakeken teknologi informasi ibas jamanta si gundari enda guna erBerita si mehuli, umpamana alu nehken renungen Kata Dibata, kata-kata motivasi ibas WA group. Emaka adi sisebarken berita, perlu ka cek mehuli payo ntah lang, bagi pesan Kepolisian nina “Saring sebelum Sharing”, gundari lanai jamanna “Mulutmu Harimaumu” tapi “Jarimu Harimaumu”. Apai ka Pandemi Covid-19 enda tuhu-tuhu mpeturah kebiaren ibas kita, emaka pesehlah berita si mehuli saja. Media sosial merekam kerina kai si itamaken kita kubassa janah megati ipersingetina tiap tahunna, tentu mela pagi anak kempunta adi ogena status bapa-nandena, nini-bulangna ibas media sosial guna mpebau-bau kalak sideban si segat atena.

Ibas kegeluhen enda kita banci langsung ngaloken kerinana. Harus lit tahap seleksi ras saringenna sope si putusken ras netapkenca guna ialoken ras ipakeken. Jaman enda jaman si erbanca bingung. Ijah-ije ras menam ibas tiap kesempaten, reh buena saja kalak Kristen si nungkun: “uga carana gelah banci mbedaken apai si reh arah Kesah Si Badia, ras apai si labo arah Kesah Si Badia?”.Tapi, sayang, “nguji kesah” labo hal si mesunah. Erkiteken sie, kebingungen reh tambahna. Reh buena kalak Kristen si polos ras sederhana jadi korban. Jaman enda tuhu jaman aneh. Ibas sada sisi, nina kalak jaman enda jaman canggih. Ija kemampuan intelektual ras penalaran rasional berperan penting. Tapi kepeken ibas piga-piga bidang ngenca. Tapi, ibas bidang sideban, dukun ras klinik seh kal larisna. La berlebihen adi sikataken, “bisnis spiritual online” lako jaman gundari enda. Kalak bayak, kalak perpangkat, kalak terpelajar banci kena banna. Si lebih parah kalak beragama pe kena. Labo saja lit kalak Kristen si rajin ku dukun, tapi reh buena ka pe “dukun-dukun Kristen online”. Praktekna seri nge bagi dukun, saja mungkin ikatakenna gelar Tuhan Jesus ras ayat-ayat Alkitab. Emaka reh bingungna me perpulungen e. Sebab lit ka nge jaman gundari enda si muat ayat Alkitab janah ibagikenna ibas media sosial alu cara “ketik amin”, padahal ayat ah ndai labo bage jiwana. Lit ka nge kita ibas jaman gundari enda mesunah kal mbagiken berita alu la ieteh kai inti berita e, dahinta guna ndabuhken kalak sideban ngenca. Emaka silahken lah si jahat ibas pemaken teknologi enda gelah Dibata ngenca terpuji ibas kegeluhenta. Ula kita erpengakap teknologi e merupaken tujun. Teknologi e alat ibas kegeluhenta guna nampati kita, bagepe ibas pelayanenta. Ula min kita reh ku gereja perban canggihna teknologi si ipake piah erbanding-banding ka kita. Tapi alu perukuren si pentar si ibabai Kesah Si Badia si katakenlah bujur maka alu teknologi si lit e banci terpeseh pelayanen alu mehuli man banta.

Pdt. Andreas Pranata Meliala, S.Th

GBKP Rg. Cibinong

Ogen  : Roma 8:9-11

Thema : Geluh Si Mbaru Ibas Kristus

Ibas bahan PJJnta Roma 8:9-11 Paulus mulihi langsung menyapa singoge suratna enda janah mulihi erban penekanen isi ayat 5-8 man singoge suratna. “Kam labo nggeluh rikutken sura-sura ukur manusia, tapi kam nggeluh rikutken sura-sura Kesah adi tuhu kin Kesah Dibata ringan ibas kam”. Erti “nggeluh” ijenda nggo ijelasken banci sinehen ibas ayat 5. “Sura-sura ukur manusia” ijenda seri ertina bagi ayat 8, eme biak manusia erkiteken dosa. Nggeluh rikutken sura-sura ukur manusia ertina eme: lit ibas lingkungen pengaruh ukur manusia e. Adi kita lit ibas lingkungen si dem racun, kesehaten kulanta pasti ceda erkiteken sie. Amin pe kita nggo ertambar, la banci kita malem adi kita tetap nggeluh ibas lingkungen si seri. Sie me si ikataken ibas ayat 9a enda: ibas peridin kita nggo ipeserap ibas lingkungen si la mehuli nari, lingkungen si dem racun kiniteken e, janah kita ipindahken ku lingkungen Kesah, lingkungen si erbanca sehat secara kiniteken.

“Kalak si lalit Kesah Kristus ibas ia, la ia sikerajangen Kristus”, kalimat enda la itulis alu maksud ngeraguken kinata maka perpulungen Roma “nggeluh rikutken sura-sura Kesah”. Kita la ibabai guna ndarami bukti ibas dirinta, ibas suasana pusuhta, maka Kesah memang tading ibas kita. Seri bagi Roma 3:30, bagepe ibas Roma 8:17, kalimat “adi tuhu kin” la ncidahken syarat, tapi hubungen sebab-akibat. Erkiteken Kesah ringan ibas kita, kita lanai “nggeluh rikutken sura-sura ukur manusia”. Kerehen Kesah ibas kalak si tek njamini ia nggo ndarat ibas lingkungen si banci erbanca ia ceda. Emaka Kesah e si ringan ibas kegeluhenta la terjeng kentisik ngenca, ntah pe harus lit lebe kejadin-kejadin si erbanca kita sengget (peristiwa supranatural). Kesah tading ibas dirinta bagi kita ngiani sada rumah: tetap, terus-menerus. Bagi kita ngatur ras mengubah rumahta seh asa sue bagi kebutuhen ras seleranta, bage ka pe kerna tindaken Kesah ibas kegeluhenta. Sie si ikataken alu jelas ibas 1 Korinti 6:19 bagepe 1 Korinti 3:16. Emaka berbeda keadaan kegeluhen manusia si iani Kesah asangken si iani dosa. Dosa tading ibas rumah kegeluhenta sebage penyerobot, si erbanca rumah e, kegeluhenta, seh kal cedana. Sebalikna, Kesah ngiani rumah kegeluhenta memang Ia kin si mpuna rumah kegeluhenta, si ngerawat rumah e alu mehuli. Cara Kesah ringan ibas kita labo bagi cara kesah-kesah si mengketi kalak ibas agama sideban. Kalak si kerasuken e labo nari ia si bas e, janah kenca ia sadar lanai ingetna kerna perbahanen ntah pengeranana. Sebalikna, kalak si tek si ibabai Kesah tetap sadar, tetap nge ia bage, ia labo pasif, tapi seh kal aktifna. Janah tetap ia jine si bertanggung jawab kerna perbahanenna. Erkiteken sie kita ibabai erdalan rikutken sura-sura Kesah. Emaka perlu ka sipergermetken kerehen Kesah merupaken patoken guna nentuken apakah sekalak jelma eme kalak Kristen. Hal sienda me rusur si iperdebatken ibas kalangen gereja Pentakosta-Kharismatik. Saja perlu siinget kai si kataken ndai kerna cara kerehen Kesah ibas dirinta. Sebab, kita lanai bo ngeraguken kerehen Kesah ibas dirinta ras ndarami bukti-buktina ibas keadanta, ibas suasana pusuhta, ibas perbahanenta. Sebab kita nggo ngaloken Kesah, eme ibas peridin. Paulus nambahken kalimat ibas Roma 8:9a sebage persinget. Sebab kalak Kristen pe banci nulak Kesah Si Badia, banci ipediatna penghuni sindekah rumah kegeluhenna bengket mulihken (bnd. Mat. 12:43-45).

“Tapi adi Kristus ringan ibas kam, maka amin arus gia kulandu mate erkiteken dosa, tendindu nggeluh kap erkiteken Dibata enggo ngerembakken kam kempak diriNa”. Ibas ayat 10 enda lit semacam pembedan ibas dirinta si kin kita sikerajangen Kristus eme kula ras kesah. Kai maksud pembedaan enda? Maksudna eme kita harus menyadari maka kulanta tetap eme kula erdosa si harus mate sebage upah dosa, tapi ibas Kristus, kesahta tetap nggeluh erkiteken ibas kesah lit kegeluhen simbaru arah Kesah Si Badia si mpebincarken kebenaren ras keadilen Dibata. Hal enda la berarti kulanta la ipekeke, tapi pembedaan enda imaksudken gelah kita harus meteh maka kita lalap ipebadiaken arah pendahin Kesah Si Badia janah sie labo sipatna instan, tapi ngelewati erbage-bage proses si kedungenna mabai kempak kesempurnan kula ras kesah. Alu kata sideban, kalak si nggeluh ibas Kesah bakal naluken sura-sura ukurna bagepe dosana. Ngkai? Erkiteken ibas kesahta lit kegeluhen si ngasup naluken kematen.

“Adi Kesah Dibata si enggo mpekeke Jesus ibas si mate nari ringan ibas kam, maka Dibata si enggo mpekeke Kristus ibas si mate nari e la banci lang mereken geluh si mbaru man kulandu si arus mate e, arah KesahNa si ringan ibas kam e”. Ibas ayat 11 enda Kesah lanai ikataken “ringan ibas kam” (ayat 9), tapi “si mpekeke Kristus”. Sebab si ate itegasken ijenda eme hubungen erat antara kekeken Kristus ras kekekenta. Kekeken Kristus idahiken Kesah. Emaka kerehen Kesah ibas dirinta merupaken jaminen maka kita pe bakal ipekekeNa. Kerehen Kesah ibas kita merupaken jaminen maka selain kegeluhen simbaru si berlaku mulai gundari, kita pe ibereken kegeluhen si rasa lalap. Jadi, teridah ijenda ayat 10 ngerana kerna kegeluhen simbaru ibas erti “etis” ntah pe perbahanen sanga kita nggeluh i doni enda, sedangken ayat 11 njanjiken kegeluhen si rasa lalap.

Kai si banci irenungken ibas bahan PJJnta enda. Mpersilahang bana (penyangkalan diri) ras mersan silang eme dua tindaken si lanai ngukurken dirinta jine, tapi lebih ngukurken sura-sura Dibata ibas kegeluhen amin pe perbeben e mengancam kita. Tandana kita nggo ngaloken geluh simbaru Kristus berarti kita harus mpebincarken terang kemulian, terang kekelengen ras kebenaren si ipebincarken Kristus. Enda me jati diri kalak Kristen si tuhu-tuhu, eme pang nehken kebenaren Kristus, tapi tetap ngkelengi ia si erdosa bagi Kristus si pang nehken kebenaren alu la kompromi ras ngkelengi ia si nggo papak. Tandana ka pe kita nggo ngaloken geluh si mbaru ibas Kristus alu pembabai Kesah Si Badia, pakekenlah kulanta enda si kin ibas kulanta enda me ringan Kesah Dibata guna kemulian Dibata. Carana eme alu makeken mata, pemegi, perukuren, pengerana, bagepe kerina perbahanenta guna mpermuliaken Dibata. Pakekenlah matanta guna ngidah si mehuli saja. Pakekenlah pemeginta guna megiken Kata Dibata alu mehuli. Pakekenlah babahta guna mberitaken Berita Si Meriah ras ngajar Kata Dibata, labo guna ncakapken kalak. Pakekenlah perukurenta guna ngukurken kebenaren Kata Dibata, labo lalap ngukurken hal si sipatna semu. Pakekenlah perbahanenta guna mberitaken Berita Si Meriah, jadi saksiNa, rsd. Kerina e sumberna arah pusuh si nggo ipelimbarui Kesah Si Badia.

Pdt. Andreas Pranata Meliala, S.Th

GBKP Rg. Cibinong 

Ogen            : Johanes 14:23-26

Thema           : “Dibata Si Telu Sada”

Johanes 14:23-26 si jadi bahan PJJnta enda eme rangkaian pesan perpisahen Tuhan Jesus ras ajar-ajarNa. Ibas ayat 22 lit ije ikataken Judas (labo Judas Iskariot), “O Tuhan nggit Kam mpetandaken diriNdu man kami, janah la man doni enda?”. Emaka jawapen siiberekenNa man ajar-ajarNa eme, erkiteken kekelengen nge kerina. Ngkai maka bage? Ibas Tuhan Jesus masalah perjuangen Israel ngelawan kalak Roma eme sada hal si la perlu ituriken paksa sie. Isilahkenna sie janah mabai perhatianna, ras perhatianta, kempak sada hal silebih mbelin, eme uga carana kalak banci nggejapken penemani ras keleng ate Kristus. Tempa-tempa ajar-ajar e nungkun, “ngkai Kam la mpetandaken diriNdu man doni enda?”, tapi itafsirken Jesus penungkunen e alu erti “ngkai Kam mpetandaken diriNdu man kalak si patuh nandangi KataNdu?”. Emaka ulihi kami eme erkiteken kekelengenNa. Pangen akap Jesus e nuriken keleng ate Bapa man bana si ngkelengi Ia. Ia si patuh, si ngkelengi Ia, pasti ikelengi Dibata Bapa, alu cara si la terbatas kerna teori saja. Bentuk kekelengen e eme Tuhan Jesus ras Dibata Bapa pasti reh man bana si matuhi KataNa, janah ringan ras ia. Ibas konteks enda ungkapen “ringan ras ia” labo enda maksudna ulih hasil talenta sekalak jelma, tapi maksudna eme hasil kepatuhen. Teridah ijenda pasu-pasu e ibereken khusus man kalak si patuh, labo man tiap kalak si tubuh peduakaliken (lahir baru).

Kalak si nggejapken penemani Dibata eme kalak si patuh nandangi perintahNa janah ngelakokenca. Alu enda Kristus ncidahken maka kerina siikatakenNa ibas Johanes 14 enda man ajar-ajar la terjeng maksudna man kalak si genduari jadi pengikutNa, tapi pe man kerina kalak si tek man baNa erkiteken pemberitanna. Emaka ibas Johanes 14:23-26 enda, lit ije: kewajipen kalak si ngaku sebage ajar-ajar Tuhan Jesus. Kenca ngaloken perintah-perintah Kristus, kita harus ngalokenca. Sebage kalak si idilo ras ngaku Kristen, kita nggo ngaloken perintah Kristus, siibegi ras sioge. Kita ndatken pemeteh kerna perintahNa e. Tapi, sie saja la bias. Adi kita memang mbuktiken diri jadi Kristen, kita harus matuhi perintahNa. Lit ije martabat kalak si ngelakoken kewajipen sekalak ajar-ajar. Kristus natap ia kerina sebage kalak singkelengi Ia. Labo kalak si beluh ndai, tapi kalak si ngikutken perintahNa. Perlu siperdiateken, bukti si pasti kal kerna kekelengenta man Kristus eme kepatuhen kempak perintah Kristus.

Emaka kai ka upah siiberekenNa man kalak si bage. Upahna luar biasa. Kekelengen man Kristus la pernah sia-sia. Ialokenna me kekelengen Bapa: kalak si ngkelengi Aku, ikutkenNa kap katangKu. Alu bage ikelengi BapangKu me ia. Kita la ngasup ngkelengi Dibata adi la ibereken pasu-pasu man banta guna ngkelengi Ia. Ialokenna me kekelengen Kristus. Kristus pe ngkelengi ia. Sebage Bapa, Dibata ngkelengi manusia, janah Tuhan Jesus pe ngkelengi sebage senina, sebage anak sintua.

Kalak situhu-tuhu ngkelengi Jesus janah tuhu-tuhu patuh nandangi rananNa pasti nggejapken kehadiren ras kekelengen langsung arah Bapa ras Anak. Bapa ras Anak reh man kalak si tek arah Kesah Si Badia. Erkiteken Jesus mpetandaken diri man kalak si tek si patuh arah Kesah Si Badia si mpetandaken kehadiren pribadi Jesus ibassa bagepe nemani kalak si ngkelengi Ia. Kesah Si Badia mereken kesadaren man banta kerna rembakna Jesus ras kinata kekelengenNa, pasu-pasuNa ras penampatNa. Hal enda termasuk dahin utama Kesah Si Badia. Kinatana maka Kristus ndeheri kita arah Kesah Si Badia seharusna erbanca kita menanggapi alu kekelengen, penembahen, ras kehamaten. Emaka perlu siperdiateken maka kekelengen Bapa tergantung ibas kekelengenta man Jesus ras kesetianta kempak KataNa.

Kalak si la matuhi ajaren Kristus lalit kekelengenna man Kristus e janah adi lalit kekelengenna kinitekenna pe labo lit (bnd. 1 Joh. 2:3-4). Sikataken maka kalak tetap selamat amin pe ia ngadi ngkelengi Kristus janah mulai ka nggeluh alu la mehuli, sie bertentangen ras ranan Jesus kerna kekelengen, kepatuhen, ras Kesah Si Badia si ringan ibas kalak si tek.

Kai nge pengakun ntah pe dalil ajaren paling sentral ibas kiniteken kalak Kristen? jawapna: Dibata Si Telu Sada, Dibata si mpetandaken diri sebage Bapa, Anak, ras Kesah. Ija nge bagin ibas Pustaka Si Badia si nuratken ajaren Dibata Si Telu Sada enda? Situhuna, lit piga ayat-ayat ibas Pustaka si ngataken Dibata, Jesus, Kesah Si Badia, tapi lalit ayat secara eksplisit ngataken maka telu pribadi enda eme Dibata Si Telu Sada. Adi bage, kai nge dasar gereja ibas kerina aliren radu ras ngakuken Dibata Si Telu Sada? Adi siperdiateken ibas Padan Simbaru, khususna ibas Johanes 14 si jadi oratenta, kai si tersirat ibas Padan Simbaru teridah ibas penjelasen Jesus maka Ia labo erdahin sisada. “O Pilipus, la kin kam tek maka Aku ersada ras Bapa, janah Bapa ersada ras Aku? Kerina si enggo Kukataken man bandu, labo ibas Aku nari saja. Bapa si ersada ras Aku e me si ndahiken kerina si e” (Joh. 14:10). “Kusuruh pagi Penampat si reh ibas Bapa nari ndahi kam. Ia kap Kesah si ncidahken kebenaren Dibata. Adi enggo pagi Ia reh, Ia kap si ersaksi kerna Aku” (Joh. 15:26). Lebih konkrit ka adi siperdiateken Matius 28:19, “Laweslah ku kerina bangsa manusia, bahanlah ia jadi ajar-ajarKu: Peridiken ias ibas gelar Bapa, gelar Anak, ras gelar Kesah Si Badia”.

Emaka sekitar seratus tahun kenca erbage-bage penggelaren kerna Dibata e ibukuken ibas Pustaka Si Badia, Tertullianus (160-220) Tunisia nari mulai meneliti, membahas, ras nuratken bahan-bahan ajaren si mengimani maka Dibata erdahin ibas diri Jesus ras KesahNa. Ajaren e igelari “Tritunggal” ntah pe “Trinitas”. Ajaren enda isampati ras iterusken Origens (185-254) Mesir nari. Kenca arah erbage-bage pertimbangen, ajaran e ialoken gereja. Kedungenna ajaren enda ibahan Athanasius (296-373) lebih eksplisit, bagi irumusken ibas Pengakun Kiniteken Nicea-Konstantinopel. Ije lit kalimat, “Aku tek man sada Dibata, Bapa si la ersibah kuasaNa ... Aku tek man sada Tuhan, Yesus Kristus, Anak Dibata si Tonggal ... Aku tek man Kesah si Badia ... si reh ibas Bapa ras Anak nari, siraduken Bapa ras Anak e isembah dingen imuliaken ...”

Emaka kenca sada abad nggo lit Pengakun Kiniteken Nicea-Konstantinopel si merumusken ajaren Dibata Si Telu Sada ndai, ikembangken Augustinus (354-430) i Aljazair nari si irumusken ibas Pengakun Kiniteken Athanasius, si rulih-ulih irevisi gereja seh abad waluh. Gelar Athanasius ijadiken judul amin pe ia nggo mate piga puluh tahun sebelumna. Pengakun enda bagenda nina, ibas bahasa indonesia suratken kami, “... Sang Bapa adalah Allah, Sang Putra adalah Allah, dan Sang Roh Kudus adalah Allah; namun tidak ada tiga Allah, melainkan hanya ada satu Allah ... Bapa tidak berasal dari siapa pun, tidak diciptakan dan tidak diperanakkan; Putra berasal dari Bapa saja, tidak dijadikan atau diciptakan melainkan diperanakkan; Roh Kudus berasal dari Bapa dan dari Putra, tidak dijadikan atau diciptakan, melainkan dipancarkan ... Dalam ketritunggalan ini tidak ada yang lebih dulu, atau yang lebih kemudian; tidak ada yang lebih tinggi, atau yang lebih rendah, ...”. Rumusen Pengakun Kiniteken Nicea-Konstantinopel (selanjutna igelari Niceanum) ras Pengakun Kiniteken Athanasius (selanjutnaa igelari Athanasium) ialoken kerina gereja i doni enda. Apakah rumusen pengakun kiniteken e final ras mutlak? Lang! Kerina dogma ntah pe dalil ajaren agama eme produk manusia fungsina sebage alat sinampati kita guna erban ungkapen (mengungkapkan) kai si iteki kita.

Apakah alu pengakun kiniteken enda misteri Dibata Si Telu Sada nggo jelas? Tentu lang. Kerina dogma ntah pe dalil ajaren nadingken tanda tanya guna generasi selanjutna. Pengertinta kerna Dibata tuhu-tuhu terbatas seh maka terjeng meremang saja siidah. Nina Paulus, “Sabap pemeteh ras nubuatta labo dem. Kai siidah kita genduari enda bali ras awih si meremang-remang ibas cermin tembaga; tapi pagin kerina siidah alu petala-tala. Pemeteh si lit ibas aku genduari langa dem; tapi pagin pemetehku e jadi kuh dingen serta me, bali ras pemeteh Dibata kerna aku kuh dingen serta kap” (1 Kor. 13:9,12). Emaka alu bage, apakah ajaren Dibata Si Telu Sada perlu sibela? Lang! Keyakinenta kerna Dibata labo perlu ibela. Tuhu-tuhu arogan kal kita adi kita merasa ngasup mewakili Dibata guna mbela Ia. Adi bage, kai siharus silakoken? Ngataken bujur kita janah terus siperjelas kinitekenta kerna Dibata Si Telu Sada. Ngataken bujur kerna kiniulin Dibata seh maka nggit Ia hadir alu telu cara si akap kami tuhu-tuhu kreatif. Sebaga Dibata Bapa, Ia mpekena-kena ras memulihken kita. Sebage Anak, Ia ngalemi ras nemani kita. Sebage Kesah, Ia mbersihken ras mereken pengaruh ibas pusuhta. Kai ertina e, labo sieteh, tapi banci sigejapken ras siungkapken.

Bapa, Anak ras Kesah Si Badia lalap radu ras hadir ras ndahiken dahin si seri (penciptaan, penyelamatan, dan penebusan) masing-masing alu peran ras tugas si jadi porsina guna erbahan dahin e jadi nyata. Ibas karya penciptaan, misalna: Sang Bapa adalah penciptaan, Sang Anak membuat karya penciptaan itu menjadi nyata, dan Roh Kudus memampukan ciptaan itu menyadari keberadaanNya sebagai ciptaan Allah dan karena itu menjalani kehidupannya menurut teladan yang ditunjukkan Allah kepadanya. Dalam hal keilahian, tidak ada pribadi Allah yang di depan, pribadi Allah yang di tengah, dan Allah yang di belakang. Ketiga pribadi itu sama-sama di depan dan sama-sama di belakang. Pribadi ilahi yang satu hanya mau dikenal dalam kebersamannya dengan dua pribadi yang lainnya sebagai satu Allah.

Sipelajari Doktrin Trinitas (Dibata Si Telu Sada) eme guna kita ncidahken usahanta membahasaken Dibata alu telu kata eme Dibata e lebih mbelin asangken kata-kata manusia janah kerina bentuk usahanta guna erban gambaren keberadan Dibata. Nina Karl Barth, “Allah ada di surga dan kita di bumi”. Augustinus pe ngataken, “Allah adalah pencipta dan kita hanyalah ciptaan”. Kata-kata ntah pe bahasa siipake kita guna erban gambaren kerna Ia pe tuhu-tuhu terbatas. Uga ka mungkin bahasanta si terbatas enda banci menampung Dibata situhu-tuhu la terbatas? Johanes Calvin ngataken hal si seri, tapi ibas ungkapen si berbeda ibas bahasa Latin: finitum non capac infiniti, si terbatas la banci menampung si la terbatas (yang terbatas tidak dapat menampung yang tak terbatas). Enda labo berarti maka usahanta membahasaken Dibata merupaken sada spekulasi. Lang! Bahasanta memang terbatas. Dibata si la terbatas tuhu-tuhu tehna kerna keterbatasenta, tapi ibas kiniulinNa nggit Ia makeken bahasanta si terbatas guna mengkomunikasiken diriNa. Enda sada pasu-pasu si harus sikataken bujur. Salah sada bentukna eme makeken bahasanta si terbatas e guna mberitaken Dibata si la terbatas alu kesadaren maka kai siikataken kerna Dibata la pernah ngasup erban gambaren Dibata e alu sempurna. Gambarenta kerna Dibata lalap merupaken gambaren si lenga dung, tapi harus lalap iulih-ulihi. Karl Barth erban gagasen si menarik kerna hal enda, eme, “Mengatakan hal yang sama dalam kata-kata yang lain”. Ngataken hal si seri alu kata-kata sideban seh telu kali.

Gereja ibas usahana situhu-tuhu guna menanggapi Dibata simpetandaken diri, ngaku tek man Dibata sebage “Tuhan yang ada di atas kita”. Ia lebih mbelin asangken kerina gagasen, perukuren ras pandangenta. “Tuhan di atas kita” sie me si nepa kita ras erbahan kerinana jadi lit. Pengakun enda irumusken secara konkret ibas pengakun kiniteken man “Dibata selaku Bapa”. Ibas pengalamen pergaulen ras Dibata, gereja minter menyadari maka pengakunna nandangi Dibata sebage “Tuhan di atas kita” kepeken lenga bias. Dibata selaku “Tuhan di atas kita” tuhu-tuhu seh kal dauhna. Pengalamen manusia ras Dibata sibagenda la bage, eme ndauh ras la terdeheri. Dibata sinidatas e tuhu-tuhu ndeher ras manusia. Ia labo terjeng lit sebage Bapa. Lebih asa sie, Ia pe igejapken sebage senina. Erkiteken pengalamen enda, gereje terdorong guna mbelasken mulihi pengakun kinitekenna. Sebage penegasen pengakun kerna Dibata sebage Tuhan sinidatas, gereja negasken ka maka Dibata e radu ras eme “Tuhan di antaras kita”. Ia labo saja ndauh ras mesera ndeherisa, tapi pe Ia lit itengah-tengahta, jadi salah sada diantara kita. Pemahamen kiniteken enda lit ibas pengakun kerna “Dibata Anak”. Anak e me sierbanca sitandai pendahin Bapa. Adi sedekah enda Bapa e terbuni. Ibas Anak e lanai Bapa e terbuni. Anak e me wujud diri Bapa si sempurna. Ertina, icidahken Anak e man banta ise Bapa e. Ibas diri, kegeluhen, ras dahin Anak e banci me siidah Bapa e. Emaka ikataken me Anak e Imanuel: Dibata itengah-tengahta. Uga kin pe iulih-ulih pengakun kerna Dibata si sada ibas dua kata tuhu-tuhu teridah nggo sikap. Gereja tetap merasa lit kal kerna Dibata e si lenga terakomodasi. Lit dimensi sideban silenga ikataken kerna Dibata e adi pengakun ndai ngadi ije. Pengalamen pergaulen manusia ras Dibata ncidahken maka Dibata pe ringan ibas kita. Erdahin Ia labo terjeng ras kita, tapi pe ibas kita guna nalihken kelemahen ras keterbatasenta jadi gegeh ras kesempurnan. Ibas kesadaren enda me gereja sekali nari ngakuken kiniteken si seri man Dibata alu kata-kata sideban. Iakukenna me Dibata e sebage “Tuhan di dalam kita”. Dibata Kesah Si Badia jadi kata kunci guna dimensi sipeteluken arah pengakun gereja kerna Dibata. Ise nge Kesah Si Badia e? Ia me pribadi peteluken ibas Dibata Si Telu Sada. Dibata Kesah Si Badia eme pribadi si lalap bergerak ndarat ibas Bapa menuju kempak Anak janah arah Anak nari menuju Bapa. Ibas keberadanna enda, Dibata Kesah Si Badia eme persadan antara Bapa ras Anak. Dibata Kesah Si Badia eme sirkulasi ntah pe geraken siigelari ibas Dibata Si Telu Sada. Ibas pengalamen perjumpanna ras Dibata, gereja mengalami maka Dibata reh man bana labo terjeng ibas sada cara, tapi telu cara. Dibata mpetandaken diri man gereja sebage Bapa Anak, ras Kesah Si Badia, ntah pe ibas ungkapen si lebih akrab ibas cuping kalak Indonesia: Allah di atas kita, Allah di antara kita, dan Allah di dalam kita.

Pdt. Asnila Br. Tarigan

GBKP Rg. Cijantung