Pengerana 11 : 1-6

PERBAHANEN KALAK PENTAR

          Kitab Pengerana eme perukuren-perukuren sekalak pengerana tah pe perpilsapat, si enggo rukur alu mbages uga gendekna ras gulutna kegeluhen manusia, s idem alu kinilabujuren ras kecedaan ate. Ibas ujung perukurenna ikatakenna maka sia-sia geluh enda. La iangkana perbahanen Dibata singkuasai nasip manusia. Aminna bage pe, iajarkenna nge gelah igegehi dingen tutuslah ate manusia erdahin, janah nggeluh ia alu meriah ngaloken pemere-pemere Dibata.

          Ibas ayat 1 ikataken “berekenlah ertandu man kalak sindauh ikepar lawit” ngatakenca benakenlah dahin e anem gia ndauh denga ndatken hasil entahpe mungkin la rulih, sipenting dahikenlah, ula minter arapken untung. Ula dekahen rukur asangken ndahikenca. Ayat 2 ikataken “tamaken duitndu ibas piga-piga usaha-tuhu ibas mbue usaha” ngatakenca tupung lit kesempaten erdahin ntah pe erusaha harus ipakeken alu mehuli, ula puas ndahiken dahin e alu cara-cara bsindekah, tapi kembangken pendahin, usaha alu cara-cara simbaru. Seh maka la hanya kita singakapi ulih pendahin e, tapi kalak sideban pe tersampat arah kai siidahiken. Ayat-3-5 ngatakenca makai bas erdahin ras erusaha la banci kita bersikap pasif, tapi harus aktif, tutus, anem gia lit tantangen tapi la banci ngadi ndahikenca. Tapi harus si inget kai pe si idahiken kita harus ersukuten man Dibata, sebab Ia kap singkuhi ras masu-masu pendahinta. Ayat 6 ngatakenca maka erdahinlah tupung lit kesempaten guna ndahikenca, baik erpagi-pagi ntah berngi, mejingkat ras tutus ate ndahikenca pasti lit nge ulih pendahin si idahiken. Lit si idah kalak sindahiken dua dahin sekaligus, umpamana sekalak pegawai tapi lit ka usaha sideban, e mrjuma ntah pe lit ka asuh-asuhenna. Erdahinlah tupung lit denga kesempaten, ula milih-milih dahin, dahin ntah pe usaha si kitik adi dahiken alu tutus, pasti berkembang (bdk.Luk.16:10).

          Tema ta paksa enda eme perbahanen kalak pentar, nuduhken uga sikapta sebagai kalak sierkiniteken ibas makeken pendahin sebagai alat guna ncukupi kebutuhenta ras mpermuliaken Dibta. Sada sisi dahin eme sada hal siarus i perjuangken, latih, mbue pengorbanen, sisi sideban pendahin eme pasu-pasu Dibata si banci ialoken arah ulih pendahin. Engkai maka kita arus erdahin, erkiteken Tuhan jine pe erdahin. Ia njadiken langin ras doni enda ras kerina isina, ras mereken mandat man manusia guna njaga ras ngusahai doni enda, emaka kita harus erdahin. Ibas kita erdahin arus i lakoken alu bertanggung jawab, alu cara ngasup mengembangken pendahin, meningkatken pendapaten ibas ulih pendahin alu cara si payo. Ibas ndahiken dahin la banci itunda-tunda, tapi lit kenca kesempaten minterlah dahiken.

          Ibas mengembangken diri ibas ndahiken dahin bagepe usaha tetap harus erlajar uga maka pendahin ras usaha si idahiken kita banci berkembang, ngasup njabab tantangen ras kemajuan zaman. Kreatifitas ibas ndahiken dahin guna ncukupi kebutuhen kegeluhen sangat ibutuhken. Umpamana sekalak moria lit ibas ia talenta guna erdakan masakan khas karo, emaka ibas ia mengembangken talenta enda ibuka na usaha (catering) khusus masakan karo. Ijenda ibutuhken kreatifitas guna mengembangken usahana, umpamana uga maka gulen si itangerken ntabeh, bersih, kemasenna arus menarik, ras la mesera guna ndatken masaken enda (promosi, banci idatken arah media sosial). Uga maka cimpa kalak karo banci laris bagi pangan khas daerah sideban (bandingken ras tape kuningan, brownies bandung) tentu kalak karo harus mengembangken kreatifitas na erban pangan enda. Uga maka tupung man cimpa la melket tan ta adi sipan, adi tape kuningen ntebu ras kitik emaka keri sekali ipan, banci ka nge iban cimpa ula galangsa gelah keri sekali ipan, ntah pe uga adi cimpa isina/inti la hanya gula tualah, tapi banci ka keju, kacang, strawberry rsd. Kalak si kreatif , idahna peluang kai si banci untung ibas usahana. Pang ia muat resiko, labo minter untung lebe iukurken tapi bas proses na git ia mengembangken diri ibas erdahin.

Pdt Rena Teti br Ginting

Rg GBKP Bandung Barat

Kolose 4 : 7-14

NGERGAI DAHIN RAS SIERDAHIN

          Kolose 4:7-14 eme kata pendungi si isehken Rasul Paulus man perpulungen Kolose. Tupung Paulus nulisken surat enda, ia sangana ibas penjara (ay. 18), janah tujun nulisken surat enda eme guna petetap ukur perpulungen kerna dahin pelayanenna rikut ras kegeluhen teman-temanna si ikut muat bagin ibas meritaken berita si meriah. Situasi si inanami Paulus, anem gia ia ibas situasi penjara, tapi la ngadi guna meritaken berita si meriah. Bage buena tantangen si ihadapi Rasul Paulus ibas kegeluhenna, tapi engkai maka la ia surut nehken berita si meriah? Hal enda i pengaruhi keleng atena man Dibata si mereken kepercayaan man bana guna ngelai perpulungen gelah tek man Tuhan. Emaka uga beratna pe tantangen si lit ibas nehken berita si meriah, la ngkurangi semangat Rasul Paulus ras teman-temanna guna tetap erberita, mereken pergegeh ras semangat man perpulungen Kolose.

          Keberhasilan Rasul Paulus nehken berita si meriah, la terlepas ibas penampat teman-temanna si ikut mendukung perdalinen pelayanen Paulus. Paulus ras teman-temanna jadi sada team si solid ras ikut ertanggung jawab. Enterem kalak enggo ngaloken Yesus Kristus sebagai Juru Selamat, ras enda bekas pendahin ras pelayanan Rasul Paulus, she maka gelar na itandai kalak sinterem. Ibas keberhasilen ras ketutusenna nehken berita si meriah Rasul Paulus la ngelupaken teman-temanna eme Tikikus si nampati Rasul Paulus naruhken surat-surat (bdk.Kol.4:7;Ep. 6:21); Erguna sekalak budak si enggo tek man Yesus janah jadi kalak si tutus. Aristarkus sienggo jadi perberita si meriah ras erkiteken pang ia ngelawan penembahen man Dewi Artemis ia itamaken ku penjara; Markus bebere Barnabas, sekalak simbue kal penampatna nandangi pelayanen Paulus; Justus si ipake rumahna i Korinti guna nehken berita simeriah; Epapras teman sada aron Rasul Paulus erkiteken pernah radu ras ipenjaraken; Dokter Lukas ras Demas sekalak si enggo tek man Yesus; Nimpa ibas Laodikea nari, sekalak diberu si beluh rende ras landek ras Arkipus si melala nampati ras ndungi dahin si ibereken Paulus man bana. Enda me gelar-gelar sinampati Rasul Paulus bas dahina meritaken berita si meriah, erbage-bage latar belakang kegeluhen si lit ibas kalak enda, tapi ersada arih ras ertutus ate ia kerina ndahiken dahin nampati Rasul Paulus ibas ndahiken dahin pelayanenna.

          Tema ta ibas perpulungen jabu-jabu enda eme ngergai dahin ras si erdahin, maksudna ijenda eme uga perpulungen ras kerina serayan (pertua/diaken) ngergaken pendilo si enggo isehkenNa man serayan. Jadi serayan ibas meritaken Kebenaren Dibata i tengah-tengah perpulungen labo hal sigampang. Ibas setiap lagu langkah kegeluhenna ia harus jadi terang, gelah arah kai si ilakokenna terpuji gelar Tuhan (bdk. Matius 5:16). Jadi serayan Tuhan megati melala dahin pelayan si arus i dahiken, ngikuti pembinaan, ndahi kalak sakit, rapat, sermon, ras kegiaten-kegiaten si deban si megati harus nadingken pendahin bagepe keluarga. Megati ibas dahin pelayanen e turah ka konflik, persoalen i tengah-tengah perpulungen, janah serayan e isalahken. Ibas kerina persoalen si lit sekalak serayan tetap harus ndahiken dahinNa, la surut erkiteken lit persoalen, sebab labo manusia si mada dahin e, tapi Tuhan kap simadasa, serayan terjeng suruh-suruhenNa ngenca.

          Ibas kerina latar belakang si lit ibas ibas serayan si meganjang sekolahna, si biasa-biasa pendidikenna, si bayak ras si biasa-biasa kegeluhenna kerina seri ibas Dibata guna ndahiken dahinNa. Ibas ndahiken dahinNa kerina meherga iadep-adepen Dibata. Ibas majekken kula Kristus lit kalak si ertutus ate mendukung temanna sada dahin guna tampil ibas pelayanen man jelma sinterem. Enda me si inanami Paulus, lit kalak siertutus ate, arah pudina, la itandai kalak, tapi Paulus sangat tergantung nandangi pendahin kalak si kurang ndatken peran penting ntah pe berasa di balik layer pelayanen Paulus. Pendahin ras pelayanen Rasul Paulus labo banci mejile tanpa dukungen teman-temanna.

          Emaka mari siergaken dahin ras sierdahin Tuhan si enggo terpilih ibas periode 2019-2024 enda. Selaku anggota perpulungen meherga min siakap kerina serayan Tuhan anem uga gia latar belakang kegeluhenna, mbelin ntah kitik gia peran na ibas pelayanen itengah-tengah perpulungen la banci sibeda-bedaken. Sekalak serayan la banci menonjolkan diri ibas ndahiken dahinNa, ntah pe pekitik bana ibas tanggung jawab si arus ilakokenna. Selaku perpulungen mari sibereken penghargaan man “peminpin rohani” ta, sebab kesuksesen ngeluh, kemalemen ate si idatken kita la terlepas arah penjujuri Dibata arah pelayanen serayanna si ngajarken kita kerna kearusen nggeluh.

Pdt Rena Teti br Ginting

Rg GBKP Bandung Barat

Nats : Heber 13:5-6

Thema

Ermengkahlah Atandu Asa Lit Bas Kam

1.    Kitab Heber Enda merupakan surat penggembalaan man perpulungen Asia kitik. Janah si nulis surat pe labo tercatat, janah man jemaat ijape lakatakenna, Engkai,. Erkiteken paksa si e mberat Kel si mandalanken jemaat erkiteken penguasa. Aminna  Kristen berkembang pesat, emaka la sitik jemaat ndatken perlakuan semena-mena. Ekonomi sulit, pendahinna pelabo terbuka man Kalak Kristen, janah usaha-usaha sinidalankenna pemegati i cedaKen baik pertanianna. Emaka si nulisken surat Enda labo melala erbahan jalan keluar sebab baik si nulis bagepe si ngaloken  sama-sama ndatken perlakuan si seri. Emaka penulis hanya menguatkan arah surat si nikirimkenna man jemaatna, sebab Firman Tuhan Sada pergegeh si la Lit tadingenna. Arah Dibata, simereken jalan keluar.

2.    Ibas Heber 13:5-6, ija penulis ngingetken soal ekonomi (duit), memang duit la erbau tapi merim, kerina Kel kita perlu duit, sebab Lit kuan-kuan “Lit duit muit-uit, lalit duit mekuit” Janah secara doni maka Lit denga kap duit segala-galana. Tapi penulis ngingetken maka labo ikatakenna; la perlu duit, labo mandaramen duit, tapi Nina Ibas geluhndu ula Kam merangap nandangi duit. Engkai maka Enda isingetken..? Sebab Ibas ayat 4 isingetken maka Nina” kerina Kam ngergaken perjabun, kegeluhen, perbulangen, ras ndehara Ibas perjabun labanci melket. Lit mungkin Kalak/ndehara tahpe perbulangen ndarami duit alu la mehuli (erlua-lua), Adi gundari banci sikataken selingkuh, PSK, gigolo. Memang gampang Kel dat duit, tapi si Enda mala ngena ate Dibata. Emakai ajarkenna jemaat, aminnagia situasi sulit ula kal bermain main ras kuasa jahat guna ndarami duit, tapi kita mensyukuri kai si Lit ibas kita arah pemereNaku tengah-tengah Jabunta. Tolepe itegasken maka asa ndigan pe la itadingken Dibata anak-anak si ikelengi Na, Ia masu-masu anak-anak Na si tetap setia ndalani kegeluhen ibas Doni Enda. Allah menciptakan, Allah menolong, Allah memberkati, dan Allah segala-galanya, si penting bersyukur, mensyukuri kerina si enggo Lit ibereDibata: suami, istri, anak-anak, harta, semuanya pemereNa. Tuhan kap sinampati emaka labo perlu mbiar, kai banci ibahan Kalak manbangku ay 6, teks Enda iangkat erpalasken Mazmur 118:6, Mazmur Enda Mazmur kemenangen, ija musuh-musuh italuken Dibata, labo arah gegeh jelma tapi gegeh Dibata guna nampati Kalak sitek man banNa.

Emaka man banta sebagai warga kerajaan Dibata, la kap Lit si man kebiarenken bas geluh Enda, tapi ula la kita lupa ndahinken dahinta bagi ende-enden Nina :

Si dahiken-dahinta

Enem wari kujuma

Wari Minggu ku Gereja

Pasui-pasu Tuhan dahinta

Oh malemna, endame pengarepen kalak Kristen

Kita menjaga hubungen si mehuli ras Dibata, bagepe hubungen si mehuli ras anak Jabunta, hubungen si mehuli ras sesama anak Tuhan ras kerina jelma. Lalit sitik pe kita ngerubah keputusan Tuhan, janah ise pelabo kita beluh ngerubah geluhta Adi lakin ras Dibata kita ngerubah dirinta. Ndarami harta bagi singena ate Tuhan, ndarami harta arah toto ras erdahin. Totoken dahindu ras dahiken totondu.

Meteruk ukurndu, ula bera-bera, yakini kerina dahindu, usahandu i pasu-pasu Dibata

Selamat Er PJJ

Pdt Anadarias Brahmana .