“Megermet Nandangi Perkembangen Anak”

Lukas 2:41-52

Enda me bagin si terpenting ibas cerita Injil. Menurut undang-undang Dibata, tiap anak dilaki singgo dewasa sitading ibas radius 15 mil i Jerusalem nari harus reh ibas perayan Paskah. Pada intina sie me sura-sura tiap kalak Jahudi sitading ibas erbage-bage negeri i doni enda reh ibas perayan Paskah e. Sekalak anak dilaki Jahudi ianggap dewasa adi ia nggo umurna 12 tahun. Kedungenna ia jadi anak-anak taurat janah harus ngelaksanaken kerina ketetapen siwajipken man bana. Erkiteken sie, ibas umur 12 tahun Jesus pemenana kal reh ibas perayan Paskah. Banci sibayangken kota Jerusalem ras Rumah Pertoton bagepe kebaktinna menarik man baNa.

Sanga orangtuana mulihken ku Nasaret Jesus tading denga i Jerusalem, labo erkiteken orangtuana kurang mperdiateken Jesus, tapi erkiteken biasana diberu ibas rombongen e berkat leben erkiteken biasana ia erdalan la meter. Rombongen dilaki berkat pudin berkat erkiteken rombongen dilaki lebih meter erdalan, dua rombongen e kari jumpa kenca seh i penginapen sanga nggo berngi. Enda me pemenana Jesus reh ibas perayan Paskah. La iraguken maka Jusup erpengakap Jesus raduken ras Maria, janah Maria erpengakap Jesus justru raduken ras Jusup ngayak ia jumpa mulihken ibas ingan penginapen tapi Jesus ndai nggo bene.

Emaka mulihken ia ku Jerusalem ndarami Jesus. Erkiteken masa Paskah lit kebiasan ibas Mahkamah Agama (Sanhendrin) guna erban diskusi umum ibas Rumah Pertoton, sireh eme kalak si berminat guna megiken persoalen-persoalen agama ras teologi. Ijah me orangtuana jumpa ras Jesus. Ula sibayangken maka tempa-tempa Jesus ijah Ia ngkuasai percakapen janah lebih beluh asangken seniorna. Megiken ras nungkun eme ungkapen Jahudi sibiasa ipake man sekalak sierlajar arah guruna. Jesus sangana megiken diskusi-diskusi e janah alu dem ketutusen ndarami pemeteh bagi sekalak sierlajar simerhat erlajar.

Emaka siidah me sada bagin Pustaka Si Badia si merupaken kunci kegeluhen Jesus. “O anakku, ngkai maka bagenda perbahanenNdu man kami? Aku ras bapandu enggo ndarami Kam alu aru ate. Erjabap Jesus man bana engkai maka idaramindu Aku? La kin ietehndu Aku arus i rumah bapangKu”. Banci siidah Jesus mereken jawapen lemah lembut sekaligus tegas Jesus ngataken bapa ibas Jusup janah ngatakenca man Dibata. Paksa sie Jesus nggo ndatken keuniken hubungenNa ras Dibata. Ia lenga meteh hal sie sanga ia bayi denga. Alu tambahna umur, kesadaren Jesus pe tentu ertambahna. Janah kedungenna ibas perayan Paskah sipemenana man baNa enda, alu rempet Ia sadar maka ibas pengertin si unik Ia eme Anak Dibata.

Enda me cerita sanga Jesus ndatken ise diriNa situhuna. Janah perdiatekenlah hal enda, hal sie la erbanca ia meganjang ukur. Hal sie la erbanca ia natap kitik orangtuaNa, Maria si lemah lembut bagepe Jusup simejingkat erdahin e. Mulih Ia janah patuh Ia man bana. Kinata maka Ia eme Anak Dibata njadiken Ia sekalak anak sisempurna man orangtuaNa secara jasmani. Manusia situhu-tuhu arah Dibata la erpengakap kalak e kitiken asangken ia; justru erkiteken Ia rehna ibas Dibata nari maka Ia banci ngelaksanaken kewajipen-kewajipen manusia alu kesetian luar biasa.

Anakta nggo lit duniana sendiri. Tiap wari sibuk ia alu pendahinna ntah pe kegiatenna. Uga cara hubungenta ras anak singgo mandiri sibage? Tetap akrap ntah mulai jaga jarak? Tentu saja kita tetap denga ngkelengi anak amin pe ia nggo dewasa. Tapi, keleng ate banci berbentuk ibas erbage-bage bentuk siberbeda. Jadi, uga kita mpekena-kena ras nerusken keleng ate man anak singgo dewasa? Mulai anak kitik denga kerina orangtua ngkelengi anakna. Keleng ate terutama berbentuk ibas bentuk kepedulian. Piga-piga tahun kedungenna, sanga anak mulai lanai ras orangtua, keleng ate pe berbentuk ibas bentuk aru ate. Orangtua siapai nge si la aru atena sanga anakna lenga mulih padahal seharusna nggo seh i rumah. Penulis kitab Lukas merasa perlu mencatat maka Jesus ibas umur remaja pernah aru ate orangtuaNa sanga bene Jesus arah pengawasen.

Kerina orangtua aru ateta ibas erbage-bage hal. Aru ateta pertumbuhen ras kesehatenna, kedungenna aru ateta pelajarenna i sekolah, emaka aru ateta pergaulenna, bagepe aru ateta keselamatenna. Kedungenna aru ateta karirna, bagepe aru ateta masa depanna, kedungenna aru ateta maka ia lenga ka nge ndatken teman geluh, ras seterusna. Aru ate nandangi keadan anak tentuna lit niat mehuli, tapi banci berdampak buruk. Orangtua perlu megermet bagepe meteh duduk perkarana. Alu la isadari mungkin kita nggo agak kebablasen ntah pe keterusen.

Emaka marilah siidah piga-piga akar masalah simungkin jadi benih sikap orangtua aru ateta anakta singgo dewasa. Mungkin alu la sisadari lit kebutuhen guna terus merasa erguna bagepe lit ertina ibas kegeluhen enda. Selama piga-piga tahun kita nggo ngatur kegeluhenna. Gundari lanai bage. Akibatna kita merasa kebenen fungsi ras erti kegeluhen. Emaka siusahaken ka ndatkenca alu cara ngatur ras aru ateta man bana. Padahal ia nggo lanai merasa perlu nari iatur. Ia nggo ngasup ngatur dirina jine. Mungkin siakap kita sibenarna paling meteh kepribadian ras karakter anakta. Payo sieteh ia luar dalam selama lebih 20 tahun. Tapi, kenca piga-piga tahun perpudi cara kegeluhenna nggo mbue berubah erkiteken hubungenna ras dunia informasi ras lingkungen pendahin silabo sitandai. Ia pe nggo berubah erkiteken hubungenna si intensif ras perbulangen bagepe ndeharana.

Mungkin kita merasa lebih pentar asangken anakta. Memang benar, nggo mbue sipan sira ras lebih berpengalamen. Tapi, alu la sieteh anakta nggo mbue bertumbuh ibas kepentarenna. Banci jadi ibas hal-hal tertentu kita lebih pentar, tapi ibas mbue hal justru anakta silebih pentar asangken kita. Sipasti, ia ndauh lebih mbue meteh asangken kita. Mungkin kita merasa tetap denga bertanggung jawab nandangi kesehaten, kesejahteran, ras keselamatenta. Salah sada ciri kedewasan eme banci mbedaken antara mehuli ras la mehuli, banci nuruh ras ngelarang diri sendiri, banci njaga diri sendiri janah banci bertanggung jawab man diri sendiri. Adi anakta nggo dewasa ngkai kita tetap denga merasa bertanggung jawab nandangi dirina? Labo kita, tapi ia jine me si ertanggung jawab nandangi kegagalen ras keberhasilenna.

Segedang wari selama lebih 20 tahun kita nggo mpebelin anakta. Ibas sehat ras sakitna, alu senang ras la meriah ukur, kita nggo merawat, ngkelengi, ras aru ateta man bana. Sie me bentuk kepedulian orangtua. Tapi, gundari seh waktuna maka ia jine harus banci peduli man dirina jine. Tentu saja kita tetap denga terus ngikuti perkembangen dalan kegeluhenna janah mereken masuken siperluken. Tapi, masuken e sipeseh lanai bo sebage simereken keputusen, tapi sebage teman diskusi siseri. Masuken e sikomunikasiken alu manjar-anjar ras pentar.  

Pdt. Andreas Pranata Meliala, S.Th

GBKP Rg. Cibinong 

“Ranan Si Pegeluhken”

Kuan-Kuanen 15:1-4

Pengajaren kerna kata-kata hikmat sipemena banci idatken ibas ayat 1. Pengajaren enda ncidahken seh kal belinna kuasa kata-kata ibas kegeluhen manusia. Kata-kata enda banci ncedai, tapi banci e mbangun keharmonisen kegeluhen tiap manusia bagepe masyarakat. Jabap simelias mantak rawa si gara. Pengajaren enda kerna uga seharusna sekalak jelma ngadapi kinirawan, eme alu make kata-kata hikmat, labo pekulah-kulah. Kata-kata e lemah lembut seh maka ngasup nilahken ranan sipanas. Makna istilah sipake guna “jabap” labo terjeng mereken jawapen nandangi penungkunen, tapi kempak mabai ntah pe ngaloken ajaken guna sada diskusi.

Pengajaren kerna kata-kata hikmat ibas ayat 1 ilanjutken ibas ayat 2. Kata-kata hikmat sinimaksud ibas ayat enda eme kata-kata kalak benar. Kata-kata sibelaskenna mbedaken kalak benar ras kalak bodoh. Ranan kalak pentar dem alu pemeteh. Kalak pentar la terjeng nggeluh pentar, tapi pe lit ibas ia pemeteh. Kegeluhenna erpalasken kempak prinsip kebenaren, keadilen, ras kiniulin situhu-tuhu iperluken guna kesejahteran masyarakat. Istilah Ibrani sipake guna pemeteh maknana umum, tapi sinimaksud ibas ayat enda eme pemeteh moral, praktis, ntah pe teknis. Jadi, adi kalak benar ngerana, ranan sibelaskenna la saja ranan sibenar, mehuli, adil, pentar erkiteken erpalasken pemeteh siakui masyarakat umum, tapi pe ipertimbangken leben alu mehuli. Tapi ranan kalak bodoh lalit ertina. Kejahaten ras kebodohenna erbanca ia mbelasken hal-hal sijahat ras bodoh, siterbegi lebih jahat ras bodoh erkiteken ibelasken saja alu sembarangen, la iukurina leben.

Ibas pengajaren kerna kata-kata hikmat sibenar ras kata-kata sibodoh sijahat ras ncedai keharmonisen kegeluhen masyarakat ibas ayat 1 seh ayat 2, itambahken sada persinget maka kepeken Tuhan mperdiateken tiap perbahanen, kata-kata manusia. Ibas kerina ingan lit mata Tuhan. Perbahanen Dibata mperdiateken ibas ayat enda la terjeng ngidah, tapi pe ertimbang ras ngadili bagepe mereken balasen siseri. Pengadilen Tuhan labo erpalasken aturen manusia, tapi aturen Tuhan jine.

Pengajaren kerna kata-kata hikmat berikutna isehken ibas ayat 4. Kata-kata pentar eme kata-kata sierban malem jelma. Ranan sipentar mereken kegeluhen. Ibas ayat enda seh kal belinna pengaruh ranan nandangi tiap pribadi sideban ntah pe nandangi anggota masyarakat. Ranan sibenar ras ibelasken alu tepat banci ngapuli, mpepinteri, mpegegehi, ndungi masalah, mbangun kegeluhen mpeturah kegeluhen kalak sideban simegiken ranan e. Sementara ranan bodoh singelukai pusuh. Ranan enda erbanca kalak simegikenca putus asa seh maka ranan e ncedai perbahanen, bagepe kegeluhen kalak sideban. Ranan sibage pe banci ncedai keharmonisen kegeluhen masyarakat.

Pdt. Andreas Pranata Meliala, S,Th

GBKP Rg. Cibinong 

Ogen : Juna 3:4-10

Thema : “Ndalani Perubahen Simbaru”

Juna ndalanken dahinna, bengket ia kubas kota Niniwe. Ikataken Juna maka 40 wari nari, kota Niniwe bakal ikernepken. Kepeken Nabi Juna berpendapat maka nubuat ukumen enda eme pesan siperpudi si ate Tuhan isehken man kalak Niniwe: erkiteken kalak Niniwe nggo ngelakoken mbue kejahaten, maka Tuhan ngukum ia kerina. Adi bage, maka nubuat sibelasken Juna jadi nubuat la ersyarat: uga kin pe perbahanen kalak Niniwe, kota Niniwe pasti ikernepken. Tapi la bage maksud nubuat enda. Nubuat enda la imaksudken sebage pesan siperpudi, tapi sebage tuntuten siperpudi. Nubuat Juna eme nubuat ersyarat: adi kalak Niniwe la jera, adi ia la mulihken kempak Tuhan maka kota Niniwe bakal ikernepken. 40 wari nari. Tuhan tetap denga mbuka dalan man kalak Niniwe guna jera, tetap mbuka dalan guna nalihken cara kegeluhenna. Kalimat 40 wari nari rusur siidah ibas Padan Sindekah. Waktu 40 wari eme waktu pembersihen, waktu puasa ras ukumen. Dekahna banjir simbelin eme 40 wari. Musa ringan idatas deleng Sinai kidekah 40 wari. Bangsa Israel harus erdalan ibas padang gurun kidekah 40 tahun. Juna erban nubuat maka kenca 40 wari nari, Niniwe bakal ikernepken.

Kalak Niniwe tek man Dibata. Nubuat sibelasken Juna maba ulih simeter. Kata tek ijenda ibas bahasa aslina eme nteguh, setia, akar katana eme aman. Kata aman e seri ras kata amin. Kalak Niniwe tek man Dibata, eme ia ngendesken diri man sada hal sinteguh ras setia. Kalak Niniwe la tek ibas babah saja, tapi alu perbahanen nyata. Iungkapkenna pertobatenna ibas perbahanen. Kidekah 40 wari sitetap denga ibereken Tuhan man bana kerina, atena erpuasa saja. Erpuasa eme tanda pertobaten. Sebaga tanda pertobaten kalak Niniwe nangtangi bajuna emaka ipakena uis guni. Kerina kalak Niniwe muat bagin ibas puasa ras perkabungen e. Perintah sipedarat raja man kalak Niniwe sipatna tuhu-tuhu keras bagepe berlaku man manusia bagepe rubia-rubia. Labo saja manusia harus erpuasa, tapi pe asuh-asuhen, eme lembu ras biri-biri. Kata Ibrani taam la berarti man saja, tapi lebih asa sie ngenanami sitik saja pe la banci. Jadi kalak Niniwe la banci man kai pe. Bahkan asuh-asuhen la banci man dukut bagepe la banci minem. Manusia ras asuh-asuhen harus make uis guni sebage tanda perkabungen. Kalak Niniwe haruslah masing-masing mpelimbarui perbahanenna sijahat. Kalak Niniwe labo terjeng muat perbahanen sisipatna lahiriah saja bagi erpuasa ras make uis guni. Tapi lit ka nge perubahen pertendin ije. Sie berarti kalak Niniwe tuhu-tuhu cara geluhna harus mulihken kempak Tuhan. Kalak Niniwe nggo ndalani dalan sisalah janah gundari harus milih dalan sideban. Dalan sipilihna seh asa gundari itandai alu kejahaten.

Pengarapen kalak Niniwe arah ia erpuasa ras make uis guni mbera-mbera Dibata salih ukurna janah la ngkernepken kota Niniwe. Kepeken pengarapen kalak Niniwe tuhu-tuhu jadi bagi siarapkenna. Sanga Dibata ngidah perbahanen kalak Niniwe maka kalak Niniwe e nggo robah arah perbahanenna sijahat, erkadiola me Dibata arah marakelesa siatena isehkenNa man kota Niniwe. Dibata labo saja ngukum, tapi pe erkadiola, adi manusia jera.

Masa pandemi eme masa gelap bagepe masa susah. Tahun 2020 virus corona mewabah i Indonesia bagepe kerina doni. Melala korban sakit bagepe idilo Dibata. Kita terkurung ibas kebiaren. Ekonomi menam mate. Enda krisis ekonomi paling parah ibas 100 tahun. Erkiteken wabah enda kita kerina la terkecuali irugiken ibas bentuk siberbeda-beda. Lenga ka kerugin ibas bidang emosi. Sisehken kehamaten man tenaga medis bagepe petugas-petugas sideban sierdahin alu la erlatih-latih nampati korban, tapi justru tenaga medis e ka nge sijadi korban. Nggo iberekenna kesahna guna nampati kalak.

Situhuna epidemi ras pandemi nggo piga-piga kali terjadi. Pernah kidekah 5 tahun (1347-1351) benua Eropa terkena wabah Pes. Akibatna sepertelu penduduk Eropa mate. Bayangken, sada arah telu kalak mate. Pernah lit ka wabah Kolera kidekah 8 tahun (1852-1860) terkena i Asia, Eropa, Amerika Utara, ras Afrika. Rulih-ulih virus flu mewabah, pernah Flu Unggas ras Flu Babi ngkenai Kanada, Amerika Serikat, ras Meksiko tahun 2009-2010. Emaka MERS i Timur Tengah tahun 2012. Bagepe Virus Ebola tahun 2014-2016 i Afrika. Tapi, Virus corona enda me sipaling erbanca kita mesera. Virus enda lebih mesunah menular bagepe banci erbanca kalak mate. Alu lalit nuduhken gejala, tiap kalak banci jadi penular. Tuhu-tuhu wajar kita kerina mbiar.

Arah bahan PA Mamre enda kita ibabai guna ngelitken sikap mental ngadapi masa gelap bagepe masa susah. Manusia iandingken bagi koin lit ia dua sisi. Sada sisi kita rapuh seh maka sembarang waktu banci ndatken pinakit ras marakelesa, tapi ibas sisi sideban kita megegeh ras ngasup nampati kalak sideban. Nggit isampati bagepe nggit nampati, nggit ibere ras nggit mere merupaken inti kiniulin manusia. Kita eme manusia hina simesunah kal italuken virus sikitik. Tapi, ibas sisi sideban kita eme manusia simulia singasup radu ras berjuang mengatasi bencana nasional enda janah keke mulihken arah perbebenta enda.

Masa gelap ras masa susah akibat virus enda memang eme pengujin man banta. Iuji ise kin situhuna. Uga kerna pertemanenta isukati arah pengorbanenta. Tapi, pengorbanen banci teridah ibas masa susah. Segedang geluh rulih-ulih kita bakal ndatken masa gelap bagepe masa susah. Ije kualitasta sebage manusia teruji. Apakah kita banci jadi teman situhu-tuhu man temanta siperlu penampatta?

Jelas me virus enda nggo maba dampak si la mehuli nandangi erbage-bage kegeluhen, la terkecuali bidang keagamaan. Caranta erkebaktin, misalna, lanai banci ilakoken bagi biasa. Lit ibadah virtual. Mbue anggota jemaat canggung denga ngelakoken enda. Tapi, lanai tersilahken. Virus enda nggo erban doni enda dem alu kebiaren. Ilumpuhkenna mbue bidang: ekonomi, politik, hubungen-hubungen sosial, bagepe kebiasan sideban sibiasa silakoken. Dunia pendidiken pe terpaksa mengubah cara ndalanken pendidiken. Kidekah enda konvensional ilakoken ibas ruang kelas, gundari ilakoken i rumah secara daring, sedangken orangtua rempet jadi guru man anak-anak sierlajar i rumah.

Perubahen sada hal sipasti ibas kegeluhenta. Ibas kerina dampar kegeluhen tetap lit ibas perubahen. Emaka siperluken kita labo gegeh guna ngelawan ibas litna perubahen enda tapi kengasupen penyesuaian diri nandangi perubahen e. Perubahen ibas ndalani kegeluhen pe harus silakoken. Harus rajin kita cuci tangan pake sabun bagepe make cairen pembersih tan berbahan alcohol, jaga jarak siaman ras kalak simbatuk bagepe bersin/kebacihen, tetap make masker, adi labo terlalu penting ula pedah lebe ndarat. Memang enda cukup mamang ateta ibas ndalankenca erkiteken la kita biasa. Tapi sienda nggo jadi keharusen man banta guna njagai kegeluhenta kerina. Arah kita njaga dirinta, sijaga kegeluhen temanta silit i doni enda. Kesadaren kolektif tuhu-tuhu kal ipentingken guna ngelawan pinakit enda.

Pdt. Andreas Pranata Meliala, S.Th

GBKP Rg. Cibinong