Ogen  : Ester 2:8-12

 Thema  : “Nunut Ras Mediate”

Kitab Ester merupaken kitab kontroversial. Martin Luther pernah nulak namaken kitab enda sebage bagin ibas Pustaka Si Badia. Ngkai? Erkiteken la pernah sekali kata “Dibata” ntah pe “Tuhan” ikataken ibas kitab e. Uga mungkin sada kitab ikataken “Kata Dibata” adi kata “Dibata” saja pe lalit ije? Tapi sipasti nggo ialoken Kitab Ester ibas kanon Pustaka Si Badia, nggo sialoken kitab Ester sebage bagin Pustaka Si Badia. Kerna lalitna kata “Dibata” labo maka Dibata e lalit. Seri nge bagi kalak sirusur mbelasken kata “Dibata” sie pe la menjamin maka kalak e nggo badia. Ibas kitab Ester, lalit kata “Dibata” ikataken ije, sebab Dibata lit ibalik kerina siterjadi. Seri bagi film, sutradara biasana labo tampil arah lebe, arah pudi nge ia. Tapi sutradara e ka nge situhuna ngatur kerina film amin pe ibalik layar ia. Erkiteken sie me, banci sipake kitab Ester sebage palas pemberitan Kata Dibata.

Ibas bahan PA Mamre enda teridah ijenda peran Mordekai seh kal belinna, erkiteken singaturken strategi ibas cerita ibas kitab Ester enda eme Mordekai. Adi Mordekai igambarken sebage tokoh cerita situhu-tuhu aktif mulai bena-benana nari seh pendungina, maka sebalikna Ester igambarken sebage tokoh cerita si pasif. Ibas cerita enda Mordekai lit posisina sebage pejuang silit ibas ia perjuangen, eme guna njadiken Ester sebage ratu, erkiteken paksa sie raja ngelakoken sayembara guna milih ise sibakal jadi ratu nggantiken ratu Wasti. Usaha Mordekai guna njadiken Ester, anakna, sebage ratu ntah pe permaisuri Ahasweros alu makeken momentum sanga raja ingetna lalap ratu Wasti. Perban ibas hal enda raja situhuna metedeh atena kehadiren fungsi sekalak permaisuri ibas kerajanna janah labo terjeng ertedeh atenan nandangi sosok Wasti sebage pribadi. Erkiteken sie me raja ngelakoken sayembara eme guna ndarami permaisuri pengganti Wasti. Kekuasan sierbanca perjuangen e berhasil eme kebeluhen Mordekai ibas ngaturken strategi. Mulai bena-benana nari berhasil perjuangen e guna njadiken Ester sebage ratu, Mordekai me singaturken strategi alu kebeluhenna, disamping tentu lit faktor kinijilen Ester. Tentu saja siipake sebage modal utama Mordekai ibas ngelakoken perjuangenna eme kinijilen Ester, seh maka Ester banci menang ibas sayembara e. Adi perjuangen e berhasil, maka sibakal iuntungken tentuna eme kalak Jahudi si iwakili Mordekai. Cerita ibas pasal 2 enda tentu saja erkawiten ras cerita selanjutna, eme kari kalak Jahudi jadi terselamatken erkiteken perjuangen Ester.

Ibas buku Kamus Karo Indonesia kata nunut ertina eme rulih-ulih alu teratur. Banci ikataken kata nunut enda eme kalak simegenggeng ibas nehken sura-surana amin pe la meter bagi kalak sideban, tapi seh ka nge sura-surana e, istilah jaman gundari enda nina pelan tapi pasti. Sura-sura siatena isehkenna e tuhu-tuhu rulih-ulih idalanina janah lalap ia mediate kai saja siman pesikapen guna nehken sura-surana e. Enda nandakenca arah tema bahan PA Mamre sekali enda Nunut ras mediate profil sekalak bapa silit ibas diri Mordekai e tuhu-tuhu nggo sue bagi tema PA Mamre sekali enda.

Bapa eme kalak persinik bagepe cenderung menarik diri. Tapi, lit mbue kenangen sanga bapa mendidik kami. Rusur ia nuriken turi-turin Kancil ntah pe Abu Nawas. Mawen-mawen ibabaina kami main sepak bola ntah pe iboncengna nangkih sepeda: tuntutenna bapa cukup keras. Musuh simbelin bapa eme sikap perkisat bagepe la meter. Pernah ipekpekna anakna alu sapu sanga kundul-kundul padahal ije lit sampah. Pernah isiramna anakna alu lau sanga anakna terlambat medak. Memang anak bapa tuhu-tuhu lenga banci memahami maksud bapa ibas sie kerina. Anakna sakit hati irawai bagepe ipekpeki. Kenca nggo dewasa mulai idah anakna maksud bapa e tuhu-tuhu mehuli. Kerina e ilakoken justru guna masa depan anakna. Bapa tuhu-tuhu merawa sanga anakna mekisat sebab atena anakna jadi anak simejingkat. Rawana simbelin e eme bentuk kompensasi kebiarenna adi anakna jadi perkisat. Bapa tutus ngoge ras nulis erkiteken atena erban suasana erlajar man anakna. Isuruhna anakna nggit ngoge guna erban minat ngoge bagepe nuruh anakna lawes kujapa pe sisada guna mpeturah rasa percaya diri bagepe melatih gelah anakna mandiri.

Pdt. Andreas Pranata Meliala, S.Th

GBKP Rg. Cibinong

Ogen  : Kejadin 27:1-13

 Thema : “Tep-Tep Anak Istimewa”

Ibas keluarga si dame anggota keluargana tentu saling mperdiateken, saling mendukung, seh maka keluarga jadi lebih sikap. Adi ibas jabu e pe la siangkan maka keluarga e bakal pecah. Ibas bahan PA Moria enda erlajar kita kerna kegagalen sada keluarga eme keluarga Isak, enda lit kawitenna ras tema PA Moria enda. Kejadin 27 merupaken bagin peteluken arah piga-piga manipulasi antara Jakub ras Esau, ibenai mulai kin ia duana lit ibas bertin nandena, emaka ketubuhenna ija Jakub nagangi nteguh tukul-tukul Esau, bagepe kejadin ibas Esau mulih erburu, Esau lebih penting akapna pangan asangken hakna selaku anak sintua (hak kesulungan), bagepe rebuten pasu-pasu sibakal ibereken Isak.

Kejadin 27:1-4 ngataken maka Isak nggo metua, matana nggo lanai jelas erpengidah. Isak lit sura-surana atena masu-masu anakna sintua sope ia mate. Pasu-pasu e labo pasu-pasu biasa erkiteken pasu-pasu arah keluarga Abraham eme padan Tuhan maka kesusuren Abraham bakal seh kal buena bagi bintang i langit bagepe bagi pasir i tepi lawit. Pasu-pasu enda tuhu-tuhu penting, tapi payo nge pasu-pasu e itujuken man Esau? Lit pihak siatena ngolangi Esau guna mereken pasu-pasuna man Esau. Isak itokohi anak ras ndeharana. Esau erpengakap ia itebak pudi nari bagepe ibuang nandena. Perubaten antara Jakub ras Esau terjadi ibas waktu siseh kal dekahna. Kerina enda kemungkinen terjadi erkiteken: Isak la isadarina ntah pe la memahami dampak arah padan Tuhan, alu kata sideban: kurang megermet Isak ibas hal kiniteken. Isak lit kepeken mehangkena nandangi budaya eme anak sintua si berhak ndatken pasu-pasu. Bicara megermet Isak e secara kiniteken, berarti kemungkinenna eme Isak la tegas. Isak pe lalit ibas ia ketajamen guna erbab penilaian simehuli. Sekalak bapa simehuli seharusna nandai potensi anak-anakna seh banci nentuken alu tepat anak siapai sibanci nerusken kepemimpinenna. Isak sikapna tuhu-tuhu bagi biak doni eme favoritisme. Ibas keluarga sibiakna bage, bakak terjadi perubaten antara anak-anakna, janah anak pe banci iadu-aduna orangtuana.

Kegagalen Isak sidebanna eme la mimpin keluargana guna ndarami Tuhan, la mendidik anakna ibas Tuhan. Hal enda berbeda ras Jakub ibas ia metua. Sanga Jakub i Betel, Jakub nuruh alu tegas gelah kerina kalak nadingken berhalana. Hal enda merupaken sada ketegasen guna mabai kerina keluarga reh kempak Tuhan, nembah man Tuhan, bagepe ngaloken padan Tuhan. kegagalen Isak sidebanna eme ia la sendalanen ras ndeharana. Keluarga sibage bakal erdalan alu mesera terutama sanga harus muat keputusen. Kegagalen seterusna eme gagal ibas mendidik anak kerna nilai-nilai kiniteken, moral ras keluarga umpamana: saling mperdiateken, membentuk hubungen simbages. Jakub ibas umurna nggo metua eme sada contoh simehuli. La ipilihna Ruben anakna sintua sebage penerus kepemimpinenna, bagepe Jusup, tapi siipilihna eme Juda. Hal enda ncidahken ketajamen Jakub ngidah potensi anakna. Amin bage, posisi Jusup labo talu asangken Juda. Jusup labo isepeleken Jakub, bahkan 2 anak Jusup ijadiken sikerajangen Jakub jadi bagin 12 suku Israel seh maka posisina seri ras anak-anak Jakub. Isak ipediatna saja Esau ngempoi diberu kalak Kanaan.

Ribka atena pasu-pasu Isak ibereken man Jakub. Hal enda erkiteken faktor favoritisme ntah Ribka megiken padan Tuhan nandangi Esau ras Jakub. Ribka ngajuk Jakub guna ngelakoken strategina. Salah nge Ribka ngelakoken sibage? Apakah adi Ribka la erban strategi maka Jakub la ipasu-pasu? Tujun Ribka eme benar tapi cara silakokenna e salah. Cara sisalah bakal ncedai tujun sibenar. Tuhan la perlu isampati manusia, apai ka alu cara nipu. Adi lit ibas Ribka kiniteken sibenar, tujun sibenar bagepe cara sibenar, maka seharusna ia ertoto mindo man Tuhan erbanca pusuh perbulangenna jadi lembut seh maka perbulangenna jadi sendalanen ras ia ibas meteh sura-sura Tuhan.

Arah tema PA Moria sekali enda lit ije sada perenungen sibanci idatken kita eme adi Dibata mereken potensi man anakta labo seri kerina, ula sipaksaken sie man kerina anakta. Sampatilah anakta ndatken kai sijadi potensi siibereken Dibata man bana. Emaka, arah potensi-potensi silit, sidarami ras siidah kai sijadi kebutuhen masyarakat, seh maka arah potensina e banci jadi sumbangen maksimal guna kemulian Dibata. Sebab enda me tugas kalak Kristen, eme mereken nanam man sekelewetna. Sebab potensi-potensi e perlu ikembangken kenca nggo idatken. Adi Tuhan mereken sekalak anak siseh kal beluhna, maka anak e pe eme sekalak anak siseh kal gutulna. Beluh ras gutul rusur kal la terpesirang. Sekalak anak sigutul lalap nge lit ibas ia kemungkinen guna beluh. Tapi sekalak anak sigutul ras beluh adi la ibabai banci ceda kegeluhenna.

Mbue kalak salah memahami maka unggul (excellent) berarti menang nandangi kalak sideban. Padahal situhuna, unggul lebih berarti jadi dirinta jine siterbaik. Budaya kompetisi ibas dunia modern enda memang nggo ngajarken makna keunggulen ibas semangat menang-talu. Padahal, Pustaka Si Badia ngajarken sada gagasen maka sekalak jelma si unggul mungkin saja secara objektif la lebih berhasil asangken kalak sideban, tapi pastilah ia secara subjektif nggo jadi siterbaik man dirina jine. Bayangken adi kerina orangtua mendidik anakna alu etos keunggulen sibagenda; lanai perlu lit anak-anak si tertekan tendina erkiteken merasa italuken teman-teman sekelasna. Anak-anak sierlajar memahami konsep keunggulen sibagenda, bakal pang ia erjuang asa gegeh guna ngembangken ras mengolah diri amin pe ia la pernah ndatken peringkat pertama ibas kelas ras naluken teman-temanna sideban.

Pdt. Andreas Pranata Meliala, S.Th

GBKP Rg. Cibinong

Ogen : 2 Raja-Raja 5:1-14

 Thema : “Anak Sierkiniteken Dingen Sierguna”

Kai nge pendidiken e janah ise nge siharus jadi pendidik? Dua hal enda merupaken masalah situhu-tuhu serius ibas pendidiken, erkiteken dua hal enda merupaken kunci kelangsungen sejarah ras kualitas sada bangsa. Berlangsungna sejarah lit ibas tan kalak simendidik sekalak anak. Adi kita ngendesken sekalak anak man sekalak pendidik si la meteh kerna pendidiken alu tepat janah la seharusna jadi pendidik, maka kita nggo ngendesken ertanta sipaling meherga man kalak sideban, janah la sieteh bakal ijadiken kai anakta e. Emaka karakter merupaken istilah situhu-tuhu penting ibas pendidiken. Kita membentuk karakter; kita membentuk pribadi; enda merupaken kalimat mbages maknana. Pribadi ntah pe oknum ras karakter merupaken istilah sincidahken kempak sada hal singgeluh, silit ije usihen Dibata. Istilah enda merupaken terminologi silit ije unsur totalitas erti situhu-tuhu arah usihen Dibata, eme manusia itepa lit kepribadian seh maka imungkinken ngembangken sada kepribadian silalit duana i doni enda. Alu bage pribadi eme hak simbelinna kal sibanci sidatken sebage usihen Dibata.

Ibas kegeluhenta rusur kal sipake perukuren ntah pe standar sibahan kita jine guna menilai sada hal. Rusur kal kita nggo bertindak erpalasken penilaianta e alu la meteh apakah bayangenta e benar ntah lang. Kita pe lit ibas kita bayangenta jine kerna ciri-ciri sekalak pemimpin simehuli ras standar kai siharus silit ibas sekalak jelma guna jadi pemimpin. Ciri-ciri enda biasana siidah arah penampilen fisik sekalak jelma. Enda me sigelari profiling. Sibahan profiling sekalak jelma erpalasken penampilenna. Erpalasken tampilen arah darat saja, emaka kedungenna kita bakak erbahan tindaken sue erpalasken profile e.

Bahan PA Mamre enda nuriken kerna Naaman sikin eme puanglima tentera kerajan Aram. Ibas kelebihen ras kehebatenna, Naaman pe sekalak sindatken pinakit gadamen. Janah ikataken ibas bahan PA Mamre enda maka Naaman lit dua perjumpan penting sinalihken kegeluhenna eme sipemena perjumpan ras sekalak anak diberu arah bangsa Israel, sipeduaken perjumpanna ras Nabi Elisa. Hal enda ibenai arah serangan bangsa Aram ku Israel seh maka anak diberu e ibaba ku Aram sebage tabanen. Anak diberu e kedungenna jadi pelayan sisetia man ndehara Naaman. Gelar anak diberu si la tercatat ibas Pustaka Si Badia tempa-tempa la iakap penting, tapi gelar Tuhan itandai arah anak diberu e. Anak diberu e mpetandaken Nabi Elisa singasup mpepalem pinakit gadamen tuanna e.

Lit piga-piga hal sibanci sipelajari arah kegeluhen anak diberu e. Amin pe Naaman nggo nerang Israel janah maba anak diberu e sebage tabanen, tapi lalit ukur guna erbalas ibas dirina, bahkan seh kal ia setiana ngelai keluarga Naaman. Teridah kal ijenda maka keluarga Naaman tuhu-tuhu tek man, seh maka Naaman pe tek nandangi kai sikatakenna guna mpepalem Naaman. Teridah pe maka anak diberu e ipebelin ibas keluarga sierkemalangen man Tuhan, erkiteken jelas kal lit ibas ia pemeteh sicukup kerna Tuhan seh maka irekomendasikenna maka lit nabi i Samaria sibanci mpepalem pinakit tuanna Naaman. Kinitekenna man Dibata erbanca ia terus nggeluh i negeri kalak sikin eme musuh Israel. Tuhu-tuhu enda labo umum.

Sekalak anak kitik reh man sekalak Pandita gelah pandita e reh ku rumah guna notoken sisakit. Emaka mis ersikap pandita ndai reh ku rumah anak kitik ndai. Sengget pandita e kepeken siman totonken kucing anak kitik e sisangana sakit. Erkiteken agak kesal pandita e, ilebe-lebe kucing e ertoto pandita janah ngataken ibas pertotonna “o kucing, adi nggeluh atendu, nggeluhlah; adi mate atendu, matekenlah. Amin”. Anak e ngataken bujur maka panditana reh ras notoken kucing kesayangenna sikin piga-piga wari kenca sie malem kucingna ndai. Sebage tanda pengataken bujur anak e erban sada gambar. Itaruhkenna gambar e ku rumah pandita. Kebetulen pandita e sangana sakit. Nungkun me anak e “banci nge kutotoken kam pak pendeta?” “Tentu saja banci”, bage jabap pandita e. Maka alu serius ras dem ketutusen ertoto me anak e, “o pandita, adi nggeluh atendu, nggeluhlah; adi mate atendu, matekenlah. Amin”. Kepeken anak e eme sekalak fast-learner eme pelajar cepat. Ia meter menangkap sada contoh. Situhuna tiap anak memang mesunah menyerap contoh ras meter erlajar arah sada contoh. Bahkan situhuna kalak dewasa pe mesunah kena pengaruh sada contoh.

Emaka sibenaken arah masa danak-danak. Lalit kalak situbuh i doni enda nggo tehna apai simehuli apai si la mehuli. Sinilakoken anak kitik eme menyerap ras meniru kai saja siidah ras ibegina arah kalak dewasa. Kerinana sibahan kalak dewasa eme contoh. Ibas hal enda, anak tubuh iandingken bagi kertas mbentar ras polos. Lingkungenna me si mewarnai kertas e. Jelas ijenda pengaruh orangtua luar biasa belinna. Sanga anak mulai erlajar ngerana, kata-kata sibegi e nge siusihna. Kerina perbahanen orangtua iperdiateken ras iusih. Adi bapa sisakenna nakan ibas piring, anak pe ikut erbahan bage. Adi nande lalap numpahi, anak pe jadi erlajar numpahi. Adi bapa lalap namaken kerinana ibas inganna alu sikap, anak pe erbahan bage. Adi nande nggit rusur nampati kalak sideban, anak pe jadi nggit nampati. Kerina sikataken ras ibahan kalak dewasa ianggap anak kitik sebage ukuren kai sibanci ras kai si la banci.

Sanga anak mulai sekolah, ia ndatken panuten simbaru eme guru. Adi guru e mehuli ras berwibawa, la metahat anak e lebih ngusih usihen guruna asangken orangtuana. Sementara sie anak e pe mulai ngusih usihen teman-temanna. Emaka sumber usihenna lanai sada ngenca. Rusur kal hal enda erbanca anak jadi bingung. Misalna, semula ia erpengakap maka nipak kucing eme perbahanen biasa erkiteken sie me sirusur ibahan bapana, tapi gundari ia megiken arah guruna maka kita harus ngkelengi asuh-asuhen.

Kedungenna sanga anak mbengketi umur sekitar 12-15 tahun, kecenderungen guna ngusih orangtua mulai sitik-sitik bene. Ibas tahap umur enda sangana ndarami jati diri janah erkiteken sie ia erban jarak ras mpedauh dirina arah orangtuana nari. Ndeher ia ras teman sebayana alu cara ngusih penampilen, istilah-istilah, perbahanen ras gaya hidup teman-teman sebaya. Kerina usihen arah teman sebaya biasanga langsung iusih, alu la erban perhitungen mehuli ntah la mehuli. Kecenderungen ngusih usihen mbue erkurangna ibas umur dewasa. Tapi sie labo berarti maka kalak dewasa la menyerap usihen. Misalna, lit sekalak karyawan mbaru sierdahin alu dem disiplin ras tanggung jawab. Tapi kenca piga-piga minggu iidahna teman-temanna ras pimpinenna mekisat erdahin sanga jam erdahin. Mbelin kemungkinen karyawan simbaru e pe ngikuti usihen e.

Mbue kalak salah memahami maka unggul (excellent) berarti menang nandangi kalak sideban. Padahal situhuna, unggul lebih berarti jadi dirinta jine siterbaik. Budaya kompetisi ibas dunia modern enda memang nggo ngajarken makna keunggulen ibas semangat menang-talu. Padahal, Pustaka Si Badia ngajarken sada gagasen maka sekalak jelma si unggul mungkin saja secara objektif la lebih berhasil asangken kalak sideban, tapi pastilah ia secara subjektif nggo jadi siterbaik man dirina jine. Bayangken adi kerina orangtua mendidik anakna alu etos keunggulen sibagenda; lanai perlu lit anak-anak si tertekan tendina erkiteken merasa italuken teman-teman sekelasna. Anak-anak sierlajar memahami konsep keunggulen sibagenda, bakal pang ia erjuang asa gegeh guna ngembangken ras mengolah diri amin pe ia la pernah ndatken peringkat pertama ibas kelas ras naluken teman-temanna sideban.

Pdt. Andreas Pranata Meliala, S.Th

GBKP Rg. Cibinong