Ogen : 1 Petrus 2:13-17

Tema : Nggeluh Bagi Kalak Merdeka

Kata Pemena

Salam Sehat! ras Salam Merdeka! Kegeluhen kalak Kristen ibas negara Indonesia tentu harus ngangkai kai ertina nggeluh ibas kemerdekaan. Perjuangen pahlawan siarah lebe enggo encidahken uga mbelinna sura-sura bangsa ta guna menghadirken kemerdekaan i tengah-tengah bangsa negara Indonesia. Sebagai warga si erkiniteken tentu harus sipahami alu mbages kai ertina merdeka ibas dirinta pribadi lepas pribadi. Kemerdekaan enggo sialoken arah perjuangen siarah lebe, enggo nge kita nggeluh bagi kalak merdeka? Adi tema ta ibas wari enda nggeluh bagi kalak merdeka, ertina kita iajuk guna bengket kubas pelaku si mengalami kemerdekaan e sendiri. Tema enda merupakan sebuah undangen man banta gelah banci kita nggeluh sebagai kalak si enggo merdeka. Uga carana? Tentu mari sibahas ibas kata Dibata nari sebagai palas guna memaksimalken kemerdekaan enda alu kinitiken sipayo.

Pembahasen

Konteks surat 1 Petrus enda banci sigambarken bagi konteks kalak Kristen si lit ibas zaman genduari enda terkhusus ibas negara Indonesia. Negara Indonesia mayoritas agamana e me turang senina ta ibas Muslim nari, janah labo sitik peristiwa entah pe persoalen siterjadi erkiteken pergesekan-pergesekan agama si lit i tengah-tengah bangsa ras negara ta. Selaku kalak Kristen lit biasana kebiaren tentuna adikenca enggo lit permasalahen si terjadi nandangi teman-teman mayoritas. Sedangkan banci ka siidah teman-teman mayoritas tempa-tempa mbiar ngenehen pergeraken kalak Kristen aminna pe minoritas, tapi ibas kondisi minoritas enda bagi tempa lit keistimewaan si lit ibas kalak minoritas. Ertina arah kedua belah pihak lit denga perspektif si mengakibatkan tidak terbuka antara sada ras sidebanna, banci jadi perspektif si lit ibas kedua belah pihak enda mengekang jelmana gelah erbahan tindaken si berujung kubas mbeneken pihak-pihak sideban gelah situasi menjadi aman. Sisadari kel maka labo piga teman-teman ta si sada kiniteken pe mencoba melawan tindaken mayoritas alu motif mbeneken pihak-pihak mayoritas segelah banci kita bebas ras lanai tertekan. Penungkunenna apakah tindaken sibagenda rupana banci mereken kebebasen entah kemerdekaan man dirinta bagepe bangsata?

Kata Dibata si seh man banta ibas paksa enda mabai kita guna ngangkai maka menciptaken kegeluhen si merdeka harus ibenaken ibas person entah pe pribadi lepas pribadi si lit ibas negara enda. Labo banci bangsa Indonesia mempertahanken kemerdekaan adi kita selaku warga negara terkhusus selaku perpulungen GBKP, tapi lenga terbebas ibas tekanen-tekanen dosa keinginen daging ras sidebanna si erbahanca perukurenta lenga bebas entah pe merdeka. Emaka ibas ulang tahun negara ta enda siperlu jadi evaluasi man banta e me uga dirinta banci erguna ras berkontribusi gelah ermaju ras ersadana arih-arih ta selaku warga negara Indonesia. Sedekah enda akap kami, terlalu melala mungkin kita mengevaluasi pemerintah entah pe kepala negara ta guna memenuhi kai sura-sura ta. Emaka arah teks ta sekelenda mereken piga-piga poin penting selaku kalak sierkiniteken ibas Kristus e me:

1.    Selaku pengikut Kristus harus menjadi konduktor orkestra kegeluhen masyrakat ras bangsa guna mendukung pemimpin.(ayat 11-12)

2.    Selaku pengikut Kristus ndalanken sura-sura Dibata ibas erbahan si Mehuli(ayat 13-15)

3.    Selaku Pengikut Kristus ibereken kebebasen erpalasken bagi budak Dibata(ayat 16)

4.    Selaku pengikut Kristus tetap mehamat ras engkelengi teman manusia bagepe pemimpin.(ayat 17)

Piga-piga poin enda banci jadi garis besar ta ibas surat I Pet. 2:13-17 kerna kegeluhen selaku kalak si enggo nggeluh ibas Kristus. Sipemena ndai e me menjadi konduktor orkstra kegeluhen ertina bahwa kita selaku anak-anak Kristus harus mereken keharmonisen ibas ruang lingkup kegeluhenta. Adi jadi konduktor e me pemimpin ibas sada pertunjuken music, janah ia simabai kerina pemusik guna memainken alat music sehingga terjadi keharmonisan suara. Tentu enda berkaiten kubas poin sipeduaken e me erbahan simehuli kutengah-tengah temanta manusia bagepe selaku kalak singgeluh ibas sada negara ras pemerintahen. Kepatuhen man pemerintah ibas ndalani wari-wari ta banci jadi salah sada perbahanen simehuli sinisuraken Dibata man kita manusia. Sebab pemerintah tentu Dibata similihsa ia guna jadi pemimpin, janah sura-sura Dibata man bana labo terjeng ia mereken kebijaken, tapi sura-sura Dibata banci jadi arah ia erdandanken warga ras masyarakatna si patuh man pemerintah ras mendukung pemerintah. Enda me sada perbahanen simehuli tanda kita erkamalangen man Dibata e me patuh man pemimpin-pemimpinta.

Sipeteluken e me kerna kebebasen sinibereken Dibata man banta guna ndalani kegeluhenta selaku pengikut Kristus. Kita enggo ibebasken Kristus ibas tabanen dosa nari ras bagepe kita enggo i pelepas ibas keinginen dagingta nari. Enda me sada kebebasen sierbahanca manusia banci nggeluh rikutken sura-sura Dibata. Ertina bahwa kerina perbahanenta erpalasken keleng ate ta man Yesus Kristus sebab enggo ibereken Perkuah Ate simbelin man banta segelah banci kita ngaloken keselamaten. Sura-sura ras kenikmaten doni lanai banci menekan ras bagepe mengikat kita guna nggeluh ibas kecedan ate Dibata. Bebas tapi nggeluh bagi budak Dibata, nggeluh bagi budak Dibata berfokus kubas relasita kempak Dibata. Emaka adi nggo payo relasita kudatas tentu enda pe berkaiten kubas poin siterakhir e me, mehamat ras engkelengi kerina tinepa Dibata. Relasi kubas kita sapih-sapih manusia tentu menjadi puncak ibas keleng ate Dibata man banta segelah kita banci nggeluh ibas kemalemen ate erkiteken enggo siperjuangken kinirajan Dibata ibas doni enda.

Penutup

Selaku Mamre sijadi imam i tengah-tengah jabu, ibas paksa enda kita iajuk guna nggeluh sebagai konduktor orkestra kegeluhen. Enda me salah sada tanda kita nggeluh ibas kemerdekan e me ibas kita ndalanken kegeluhen, aminna melala pergumulen ras tantangen sijadi man banta tetap malem ate erkiteken kerina banci sihadapi alu perukuren sila terhimpit entah pe iteruh keterikaten dosa sierbahanca kita banci gulut ras kote kinitekenta. Partitur lagu si imainken ibas orkestra e me sura-sura Dibata, adi partitur kegeluhenta paksa enda e me Pustaka Sibadia. I je me kita ndatken kata Dibata bagi paksa enda si enggo seh man banta. Kita nggeluh bebas ibas engkelengi manusia ras bagepe patuh man pemimpin-pemimpinta selaku kalak si enggo i merdekaken, lanai lit penjajah ibas ukurta sierbahanca rugi siakap adi kita engkelengi temanta manusia ras matuhi pemimpin ta. Enda kerina justru erpalasken keleng ate ras pengataken bujurta man Dibata si enggo nelamatken kita ibas dosa nari. Emaka mari kita nggeluh bagi kalak merdeka si enggo i merdekaken Dibata guna maba kemalemen ate kusklewetta. Dirgahayu Negara Republik Indonesia. Merdeka..Merdekaa..Merdekaa!

Pdt  Abel Sembiring 

Rg  GBKP  Tambun 

Nats   : Kejadin 22 : 1 – 4

Tema  : Dibata Nikapkenca (Teologi Perjabun)

Abraham eme sekalak sienggo tuhu-tuhu teruji ibas kinitekenna nandangi Dibata. Ia igelari bapa kalak si tek man Dibata erkiteken ia labo saja sekalak si tek nandangi Tuhan tapi pe kalak si ngendesken kerina kegeluhenna man Tuhan. Kiniteken Abraham iuji Dibata alu mesangat, ija Dibata merentahken ia guna ngelakoken sada hal si bertentangen ras akal sehat bagepe kekelengenna selaku sekalak bapa eme mereken (mpersembahken) anakna Ishak. Anak sienggo ndekah kel itimaina, anak siipadanken Dibata man bana. Sibayangken kuga kira-kira pusuh ras penggejapen Abraham selaku sekalak bapa. Tuhu secara manusie enda sada perentah ras pemindon Dibata simberat nandangi Abraham, tapi ibas si e la lit sitik pe ukur Abraham lako nimbak sura-sura Dibata. Ibas perdalanen kegeluhen Abraham, lit telu (3) pengujin kiniteken si idalani Abraham eme :

Pendilo guna nadingken kutana, kade-kadena, rumah bapana jenari lawes ku negeri siituduhken Dibata “pepagi” man bana (Kej. 12 : 1). Kerina kenyamanenna, simeherga ibas kegeluhenna arus itadingkenna dingen lawes ku kuta si lenga eteh kuja tujunna.

Guna tek nandangi padan Dibata mereken kesusuren sienterem (Kej. 12 : 2). Abraham ituntut guna ngelawan logika ras pemikirenna secara manusia sebab paksa Dibata nehken padanNa umur Abraham enggo metua (75 tahun). Padan Dibata epe arus itimaina 25 tahun dekahna.

Perentah guna mpersembahken anakna Ishak jadi persembahen tutungen man Dibata.

Kerina idalani ras ilakoken Abraham sue ras kai siiperentahken Dibata man bana, la lit sitik pe siikurangina ras itambahina. Terlebih ibas natsta ituriken maka erpagi-pagi si lampas Abraham berkat ku taneh Moria guna nehi perentah Dibata. Dibata mereken perentah enda alu tujun :

Kuga nge keleng ate Abraham man Dibata; belinen nge man Dibata ntah man Ishak?

Kuga nge kiniteken ras pengarapen Abraham nandangi Dibata; lalah arah kehadiren Ishak ibas kegeluhenna enggo menggeser “keutamaan” Dibata.

Ibas kinatana tuhu-tuhu Abraham erkeleng ate man Dibata, keleng atena icidahkenna arah kepatuhenna nandangi perentah Dibata. Hal enda banci ilakoken Abraham erkiteken tek dingen igejapkenna maka anak e pemere Dibata. Tupung isungkun Ishak ia: “bapa, ija kin biri-biri si man persembahenken e”? “Nina Abraham : Dibata kari nikapkenca”! (Kej. 22 : 7 – 8). Payo me maka Dibata sinikapkenca.

Yehova Jireh (Dibata Nikapkenca) enda negasken man banta maka sinasa lit e Dibata empuna dingen Dibata nge simerekenca man banta. Dibata meteh kai siniperluken kita dingen si pas ibas kegeluhenta. Si jadi tanggungjawabta eme kuga kite tetap nggeluh erkiniteken man Dibata, nggeluh patuh ras setia nandangi kerina perentah Dibata.

Arah bahan PJJnta wari enda lit piga-piga hal si seh man banta eme :

Kiniteken ras kesetian man Dibata mbelin kel hubungenna ras penandainta Dibata e alu payor as benar. Reh bagesna penandainta man Dibata, kesetian ras kepatuhenta ngikutken kataNa pe reh teridahna.

Jabunta ras kerina isina eme pemere Dibata. Emaka kuga kita ngasup mabai isi jabunta erkemalangen ras erkiniteken man Dibata. Selaku orang tua erlajar kita man Abraham, sibabai ras sibereken usihen man anak jabunta kerna nggeluh ibas kiniteken man Dibata. Kalak sierkiniteken teridah arah kesetian ras ketutusenna er-Dibata, bagepe arah kiniulinna ibas kegeluhen.

Adi Ishak ipindo Dibata guna ipersembahenken jadi korban tutungen, kita ras isi jabunta ipindo Dibata guna jadi persembahen si nggeluh man Tuhan arah kerina dampar kegeluhenta (Roma 12 : 1). Arah dirinta, jabunta, jabaten, pendahin ras kerina kinilitenta kita mpermuliaken Tuhan.

Berkat jangan menggeser “Sang Sumber Berkat” yaitu Allah. Seh ras la seh sura-suranta keutamaan Dibata selaku ulu kegeluhenta ula min bergeser. Abraham la menggeser pengarapenna man Dibata aminpe sampur keriahen ras kemalemen ate sinisehken Dibata man bana arah anakna Ishak. La sitik kita silebih focus ku bas pemere asangken sumber/ ulu pemere e, emaka megati kita kecewa ibas kegeluhen enda.

Ibas kinata kegeluhenta genduari enda, khusuna ibas masa pandemic Covid 19 simereken dampak nandangi kerina kegeluhenta, terlebih secara ekonomi/ pendahin tetaplah kita erkiniteken ras erpengarapen maka Dibata nikapken kerina siniperluken kita. Siperlu silakoken eme tetap setia man baNa, nggeluh ibas kata Dibata.

Pdt. Elba Pranata Barus, S.Th

Runggun Bandung Timur

Nats            : Mazmur 112:1-10

Tema           : Si Erkemalangen Man Tuhan

  (Erti Erkemalangen)        

I.     Kata Penaruh

Adi si oge mazmur enda, ngerana soal pasu-pasu Tuhan nandangi bangsaNa. Lit pasu-pasu Tuhan secara universal, komunal, bahkan secara personal.

Kemajun zaman megati mahanca manusia hanya ngukurken dirina jine. Manusia Tambah ka pe pandemi covid-19 si lenga eteh ujungna mahanca manusia erlomba-lomba ngaturken kegeluhenna segalahna ngasup tetap ertahan ngalaken situasi kegeluhen paksa enda. Maun-maun, ndarami kalak sierkemalangen man Tuhan pe enggo mulai mesera. Arah bahan PJJta enda kita iajuk guna ngantusi uga kin kegeluhen kalak sierkemalangen man Tuhan rikutken Mazmur 112:1-10.

II.          Mpebagesi Pengangkan Kerna Ogen

Masmur 112 enda nuriken kerna pasu-pasu Dibata nandangi anak-anakNa si erkemalangen man Tuhan dingen si ermeriah ukur ndalanken perentahNa. Masmur 112 enda eme kelanjuten Masmur 111, kerna upah si ialoken kalak si erkemalangen man Tuhan. Kegeluhen kalak si erkemalangen man Tuhan dem alu keriahen ras kejuah-juahen. Sebab arah keriahan ukur kalak si erkemalangen man Tuhan jadi pujin man Dibata. Kalak si nggeluh erkemalangen man Tuhan ngaloken hak-hak istimewa si la ialoken kalak si la erkemalangen man Tuhan. Kalak sierkemalangen man Tuhan labo kalak si lalap ngataken, “Tuhan, Tuhan, Tuhna”. Tapi kalak si erkemalangen man Tuhan eme kalak si “tunduk, hormat, mehamat” man Dibata (ay.1). Dingen nggeluh rikutken perentah-perentah Dibata. Perentah-perentah Dibata jadi kesenangenna dingen perentah Dibata enggo ituliskenna ibas pusuhna.  Kalak si erkemalangen man Tuhan, aminna pe geluhna melala alang abat, tapi la e mahanca aru ateNa. Sebab Tuhan lalap engkawali kegeluhenna. Kalak si erkemalangen man Tuhan anakanakna ipasu-pasu Dibata, ia jadi kalak sierkuasa (ay.2) ertina maka kalak si erkemalangen man Tuhan, labo terjeng ndatken pasu-pasu idur Dibata nari, tapi ia pe jadi pasu-pasu. Janah jabuna bayak namura (ay.3).

Kebayaken si imaksudken pemasmur ijenda labo kebayaken erta doni, tapi kebayaken siluar biasa si la ternilai ergana. Tapi kepentarenna jadi kesenangen man dirina. Ialokenna me erta ras kinibayeken, tapi si e kerina labo mahanca ia lupa kerna sumber erta ras kebayaken e.    Kalak sierkemalangen man Tuhan nggeluh alu bujur, adil, perkuah dingen perkeleng. Alu bage ersinalsal terang ia ibas kegelapen. Dibata la njanjiken makana kegeluhen kalak si erkemalangen man Tuhan terbebas ibas kiniseran nari. Tapi kiniseran la mahanca ia bene. Sebab Tuhan tetap engkawali ia. Janah rikutken kegeluhenna ngasup ia jadi saksi Dibata si nggeluh erkiteken paguh kinitekenna dingen ia nggit nampati kalak sideban. Arah perkuah atena ras kebujurenna iinget kalak ia (ay.4,6, 9).  Ipasu-pasu Dibata geluhna, erkiteken ibas kinilitenna labo ipakekena guna dirina saja, tapi ia pe nggit alu bujur pepinjamken (ay.5). La ia ertaktak rikutken kai si ibahanna. Tetap paguh kinitekenna. Dingen labo ia guling erkiteken tantangan doni si lit, tapi pegegehi Tuhan ia guna ngalaken kerina perbeben geluhna. Dingen ngasup ia tetap ngidah rencana Tuhan si mbelin bas geluhna. La ia mbiar nandangi imbang-imbangna. Tek ia makana Tuhan kap ras ia. Maka pasti ibela Tuhan ia iadepen imbang-imbangna (ay. 7-8).  Tapina kalak jahat gara atena ngidah kai si jadi nandangi kegeluhen kalak si erkemalangen man Tuhan (ay.10). Sebab kalak jahat ngidah kerna kejahatenna labo mereken keriahen ukur manbana. I je Dibata encidahken keadilenNa. Sebab kerina manusia ngaloken balasen sisetimpal rikutken kai siibahanna. Alu bage, kalak si jahat pe erkesempaten guna ngaloken lias dingen keleng ate Dibata si mereken kemalemen ate nandangi kegeluhenNa. 

III.       Pengkenaina

Erkemalangen man Tuhan eme gaya hidup. Labo banci kita pekulah-kulah nggeluh erkemalangen man Dibata, padahal situhuna pusuh ras peratenta labo man Dibata. Selaku anak-anak Tuhan mari si jadiken erkemalangen man Tuhan jadi gaya hidup. Siencidahken jati dirinta selaku kalak si erkiniteken. Tentuna kalak si nggeluh erkemalangen man Tuhan ndatken pasu-pasu idur Dibata nari. Tapi labo pasu-pasu e sijadi perayakenta. Sebab kemalangen man Tuhan nge keriahen si tuhu-tuhu. Keriahen si la ternilai ergana. Alu bage, mari radu ras kita nggeluh erkemalangen man Tuhan, rikut pe ras kerina isi jabunta. Sijadiken maka jabunta jadi sumbul keriahen si tuhu-tuhu labo terjeng guna dirinta ras jabunta tapi pe guna kalak sideban. Jadikenlah jabuta jadi saksi Tuhan si nggeluh dingen mabai jabu sideban erkemalangen man Tuhan.

Pdt  Nenny Triana Br Sitepu 

Runggun GBKP Cisalak